▫️چوخلو اوزونتولرله،
ایلده بیر بارماق بندی قدر ایره لی له مک له،
قایانین ایچینده لاغیم آتیرام
مینلرجه ایل
دیشلریمی اوزگونلشدیرمیشم
دیرناقلاریمی سیندیرمیشام
آیری بیر یؤنه چاتماق اوچون:
ایشیغا، آچیق هاوایا
و آزادلیغا.

و ایندی کی اللریمدن قان تؤکولور
و دیشلریم یوواغلاریمدا تیتره ییر
بیر چوخوردا،
سوسوزلوق و توز-تورپاقدان چاتلاق-چاتلاق،
ایشدن ال چکیب اؤز ایشیمه دوشونورم:

من حیاتیمین ایکینجی یاریسینی،
داشلاری سیندیرماق،
دووارلاردا نوفوذ ائتمک،
قاپیلاری قیرماق،
و حیاتیمین ایلک یاریسیندا، اؤز الیمله، اؤزوم و‌ آیدینلیق آراسیندا قویدوغوم انگللری قیراغا چکمکله کئچیرتمیشم...

#اوکتاویو_پاز (۱۹۱۴-۱۹۹۸) مکزیک لی شاعیر
چئویری
#شعر_اوجاغی
@SheirOcagi

▫️ساییقلاماغیمین دالیسینی توتورام
اوتاقلار...
خیاوانلار..‌

الیمی اورا-بورا سورته سورته،
زامانین قارانلیق کوریدورونون ایچینه گیریرم
پیلله لردن قالخیب ائنیرم.
ترپنمه دن، الیمله دووارلاری گزیرم.
باشلانیش نوقطایا قاییدیرام.
سنین اوزونو گزیرم
وارلیق کوچه لریمین ایچینه گیریرم
زامانسیز بیر گونشین آلتیندا،
منیم یانیمدا،
سن بیر آغاج کیمی یئریییرسن
بیر ایرماق کیمی گئدیرسن
بوغدا سونبولو کیمی اللریمده بوی آتیرسان
بیر سینجاب کیمی اللریمده تیتره ییرسن
مینلرجه قوش کیمی اوچورسان
گولوشون منه سپیلیر
باشین، بیر بالاجا اولدوز کیمیدیر اللریمده
سن گولومسه یه رک نارینج یئدییین زامان،
دونیا یئنیدن یاشیللاشیر
دونیا باشقالاشیر...

#اوکتاویو_پاز
#شعر_اوجاغی
@SheirOcagi

▫️اللریم،
ووجودونون اؤرتوسونو قیراغا چکیر.
باشقا بیر چیلپاقلیغا بوکور سنی.
گؤوده‌نده باشقا گؤوده‌لری تاپیر...
اللریم،
باشقا بیر گؤوده یارادیر سنه.‌‌..

#اوکتاویو_پاز (۱۹۱۴-۱۹۹۸) مکزیک‌لی شاعیر
#شعر_اوجاغی
@SheirOcagi

▫️بیر ایرماق کیمی، بوتون بویونو آددیملاییرام.
بیر مئشه‌نین ایچیندن کئچیلن کیمی، گؤوده‌نین ایچیندن کئچیرم.
داغلارین اته‌یینده دیدرگین اولوب بیردن-بیره هئچین تینینده سونا چاتان بیر جیغیر کیمی،
سنین دوشونجه‌ قیلینجینین آغیزیندا یئریییرم.
آغ آلنینین حئیرتینده، دوشوب تیکه-تیکه اولور کؤلگه‌م؛
تیکه-پارچالاریمی بیر-بیر توپلاییرام؛
و گؤوده‌سیز، اؤز یولوما گئدیرم، آختارا-آختارا و ال هاواسیلا...

#اوکتاویو_پاز (۱۹۱۴-۱۹۹۸) مکزیکلی شاعیر و یازیچی
#شعر_اوجاغی
@SheirOcagi

▫️سئومک ساواشماقدیر.
ایکی اینسان بیر-بیرینی قوجاقلایاندا،
دونیا آلت-اوست اولور،
هوس‌لر، دوشونجه‌لر جانلانیر،
اسیرلرین اوموزلاریندا قانادلار گؤیریر،
دونیا گئرچک و حیسّ ائتمه‌لی اولور،
شراب، یئنه شراب اولور،
چؤرک، عطرینی یئنیدن تاپیر،
سو، سو اولور.

سئومک، ساواشماقدیر.
بوتون قاپیلاری آچیر؛
سن، داها،
صیفت‌سیز بیر اربابین،
سونسوز زنجیرلره محکوم ائتدییی،
نومره‌لی بیر کؤلگه دئییلسن...

#اوکتاویو_پاز
#شعر_اوجاغی
@SheirOcagi

▫️سئومک،
بوتون عونوان‌لاریمیزدان سویونماق‌دیر.

#اوکتاویو_پاز
#شعر_اوجاغی
@SheirOcagi

▫️منی گئجه‌نین اؤته‌سینه آپار
«من»، «سن» اولدوغوم یئره،
«بیز»، بیر-بیریمیز اولدوغوموز یئره،
بوتون ضمیرلرین بیر-بیرینه زنجیرلندیگی اؤلکه‌یه!

#اوکتاویو_پاز
#شعر_اوجاغی
@SheirOcagi