یالقییزایدیم اوخوماق چون هوسیم گلمیردی
بوغازیم قانلا توتولموشدو سسیم گلمیردی

دوشونوردوم کی منیم دردیمی تار آنلایاجاق
باغرا تار گلمه‌دی بارماقلارا سیم گلمیردی

گئتمه بیر آزدا اوتور ایندی گلیبسن نفسیم
سن یوخویدین بوغولوردوم نفسیم گلمیردی

من ائشیتدیم کی گولون عطرینی یئللر یایاجاق
اینتیظار ایللری بیرآنلیق اسیم گلمیردی

هئی دئییردیم سنین اوغروندا سو سپدیم کوچه‌یه
سن گلن یوللارا قورباندا کسیم گلمیردی

سن گئدرکن جانا دوردوم چیغیرام دؤن گئری‌یه
بوغازیم قانلا توتولموشدو سسیم گلمیردی

#ارن_موغانلی
@SheirOcagi

سانکی ایللردی گؤزوم دویغولو یوللاردا قالیب
غم قوشو اؤز یوواسین سینه مین اوستونده سالیب

اوقدر یوللارا باخدیم کی قاچیب گوز قاراسی
ایندی آغ گؤزلریمین عکسینه گونلر قارالیب

سوزو قالمیش بوغازیندا قوجا وولکان داغی تک
ایچیم اودلاردا یانیر دیل دوداق اوستون قار آلیب

داغچی آرتیق اورگیمدن انیب آنجاق هله ده
باغریمین داغلاری اوستونده آیاق رددی قالیب

نقطه ویرگول سپیلیب سوزلریمه اوتقونورام
اورگیم یازماغا گلمیر، قلمیم فیکره دالیب

#ارن_موغانلی
@Eren_mughanli
@SheirOcagi

سئوگیدن تیترک اولان تای توشون آددیملارییام
قول قانادسیز سورونن بیر قوشون آددیملارییام

او قدر یورغونام آللاه، او قدر دارماداغین!
کی ساواشدان قاییدان بیر قوشون آددیملارییام

ائنيشي تاپدالاییب یوللاری دورت ناللی گئدن
ايندي سه قاردا قالان يوققوشون آددیملارییام

نه جهنم نه ده جنت، ائله برزخ ده گزن،
نئچه ایل بونجا قاباق اؤلموشون آددیملارییام

#ارن_موغانلی
@SheirOcagi

▫️اونوت منی

اونوت منی، یوبانما،
چیخیب گئدیم یانیندان،
اثر ده قالماسین قوی،
بو سئوگی‌نین دادیندان.

اونوت منی سحرلر،
اوفوق ایشیلدایاندا،
یاواشجا پنجره‌ن‌دن
بوداق خیشیلدایاندا.

اونوت منی گون اورتا،
کولک گونو اَیَنده،
دیوان‌دا حال‌سیز حال‌سیز
کیتاب واراقلایاندا.

اونوت منی هر آخشام،
سیزیلتیدان بئزنده،
دوروب گئدیب ارین چون
میخک‌لی چای سوزنده.

اونوت منی دوننده
اونوت منی بوگون ده
اونوت منی، اونوت، تام.
سحر... گون اورتا... آخشام...

#ایلقار_فهمی
کوچوردو:
#ارن
@SheirOcagi

▫️درد دردی اریدیر، اودور،
درد دردین دیبینه چؤكور،
درد دردين اليندن توتور،
درد دردين ايپینی چکیر.

نه اوزون‌دور دردین ایپی!
دولانیر دؤرد بير طرفى.
دونيانين دردلى طرفى،
دردسيز طرفينى چکیر.

دونیادان بئزمیر هله ده،
شوکور دئییب بو گونه ده،
آدام لاپ اؤز دردينى ده،
سئوينه-سئوينه چکیر.

#رامیز_رؤوشن
کؤچوردو:
#ارن
@SheirOcagi