▫️دردیم چوخدو، دیندیرمه‌یین حضرات!
منی بیر آلا گؤز جئیران اؤلدورور
قیلینج‌سیز، توفک‌سیز آلیر جانیمی
کیمسه بیلمیر، پونهان-پونهان اؤلدورور

هئچ بیلمیرم نئیله‌میشم، نئیله‌رم
خنجر آلیپ قارا باغریم تئیله‌رم
بیر جانیم وار یارا قوربان ائیله‌رم
ائل دئسین: «آشیق دا قوربان اؤلدورور»

«علسگر»م بیر گؤزَله مهمانام
اؤلمه‌یینجه چتین دؤنم، اوسانام
عزرائیلی، قانلی توتماسین آنام
منی بیر کیپرییی پیکان اؤلدورور...

#آشیق_علسگر
@SheirOcagi

▫️عاغیلدان کم، هوشدان چاشقین، دیلدن کوت،
ناقابیل، کلمه‌سی بی‌ثمر منم.
مجنون کیمی ویرانه‌لر کؤنجونده،
سرگردان، صحرایی-قلندر منم.

عیبادت واختیندا موشکول حال اولدوم
ایبلیس عملینده پورکامال اولدوم
قضا ووردو، سین ایچینده لال اولدوم
هر سؤزو دیللرده بیر دفتر منم.

صنعتیم معصیت، یوخدو ثاوابی
نکرئیینه دیلیم توتماز جاوابی
عدالت حاکیمین پایی-تورابی،
کامیل اوستادلارا قول کمتر منم.

دولاندیم بیهوده، گزدیم افسانا
تابع اولدوم نفسه، اویدوم شیطانا
خئیر عملیم یوخدو مرد و مردانا،
گوناهکار، گوناهکار، گوناهکار منم.

دونیانین جیفه‌سی آلداتدی منی
اونوتدوم عوقبانی، توتدوم دونیانی
باغیشلا تقصیریم، یا کرم کانی!
ایرَحم ائیله، یازیق «علسگر» منم...!

#آشیق_علسگر
@SheirOcagi

▫️ناگاه باد سرسر اسدی اوزومه
عؤمور بوستانيمين تاغی کسیلدی
اؤز اليمدن خطا دَيدی اؤزومه
بدَندن قولومون ساغی کسیلدی.

قضا توتدو، قدر منی بودادی
آغلاتدی دوست‌لاری، گولدوردو یادی
زهرمارا دؤندو آغزيمين دادی
اليمده شربتيم، آغی كسيلدی.

كؤنلوم ياسدان چیخمیر، قلبیم یارادان
بو درد و محنتدن، بو ماجرادان
دؤولت گئتدی، حؤرمت قالخدی آرادان
قاپیمیزدان دوست آیاغی کسیلدی.

مُقرّردی؛ قاچماق اولماز اؤلومدن
فلگین قیلینجی دَیدی بئليمدن
بير تولَك ترلانيم گئتدی اليمدن
اوره‌ییمین بندی، باغی کسیلدی.

«علسگر!» ایش‌لرین موشکولدو موشکول
دردینی دئمه‌يه يوخدو اهلی ديل
دؤی باشينا، فغان ائيله متّصيل!
داها دئييب-گولمک چاغی کسیلدی...

#آشیق_علسگر
@SheirOcagi

▫️یازیق

او غملی اوزونو، مسکین حالینی،
دوشونن ده یازیق، بیلن ده یازیق.
آغلاسان، آغلارام من سندن بئتر،
داغلادین سینه‌می گولنده، یازیق.

بیرینی سئوه‌یدین، سیرداش اولایدین،
کؤنلون ایسته‌ینه پئشکش اولایدین،
یا دا قورویایدین، بیر داش اولایدین،
بزه‌نیب بو ائوه گلنده، یازیق.

«علسگر» دورارمی ماتاه ساتماسا؟
ایگید سایرییارمی* بختی یاتماسا؟
ایکی کونول بیر-بیرینی توتماسا،
آلان دا یازیق‌دی، گلن ده یازیق.

#آشیق_علسگر
* خسته‌لنمک (Sayrımaq)
#شعر_اوجاغی
@SheirOcagi