▪️خاطیرلاییرام...

دولاندی یازیمیز، من آمما هله،
هر آخشام دوققوزو خاطیرلاییرام.
آیلی گئجه‌لرده گیزلین گؤروشو،
گؤز ووران اولدوزو خاطیرلاییرام.

گونشین اوزونو آلدی قارانلیق.
دان‌اولدوز باتارکن، هاوا تورانلیق.
سون‌باهار کوله‌یی اَسدی بیرآنلیق.
اؤتوب کئچن یازی خاطیرلاییرام.

سارالمیش یارپاغیم قارلا سئویشیر.
کئچمیشیم صاباحلا هر آن اؤتوشور.
جومجولوق واراقلا یازیم اؤپوشور.
ساریشین بیر قیزی خاطیرلاییرام.

#پاشا_موغانلی
@SheirOcagi

کیم دئدی سانا کی، چیخیب یولوما
گنج یاشیمدا گؤندره‌سن اؤلومه
آدینی کیم قازدی بیلمم کؤنلومه
گل کی سنسیز عؤمروم خاراب اولدو، هئی...

سن گئتدین آردینجا بوینوم بوکولدو
آخدی آخدی گؤز یاشلاریم تؤکولدو
ائللر، دوستلار، بیرر- بیرر چکیلدی
همدمیم بیر قدح‌ شراب اولدو، هئی...

دوغموش‌کن سولئیمان تاختینا گونش
نه بیر موشفیق همدم، نه جاواد بیر اش
نه‌دیر بو ایچیمده سؤنمه‌ین آتش؟
کؤنلومده اومیدلر سراب اولدو، هئی...

من بئزگینم سنسیز هر بیر گونومدن
کؤنول عاصی* بخته اولان کینیمدن
کئچدیم اوغروندا تانریمدان، دینیمدن
باسدیغین یئر مانا محراب اولدو، هئی...!

* عاصی: عوصیانکار
#آلماس_ایلدیریم
کؤچورن:
#پاشا_موغانلی
@SheirOcagi

▪️بو سونسوز حیاتدا،
اؤلومدن یوخ،
دؤنومدن قورخورام.
گَل!
یاپیش الیمدن!
بیر...
ایکی...
اوچ...

اوچ منیمله.

اوچ...
ایکی...
بیر...
بیتدی حیات...!

#پاشا_موغانلی
@SheirOcagi

▪️اوخول یولو
(اوشاق شعری)

قارانلیق گئدیب
گونش دوغاندا
گؤزللیکلری
گؤرن زاماندا

شیرین یوخودان
دوراجام داها
چون دوشونورم
بو گون صاباحا

گون آیدین آتا
او آن دئیه‌جم
گون آیدین آنا
من سؤیله‌یه‌جم

اَل- اوزوم یویوب
یئمَک یئیه‌جم
فیرچا ووروب تئز
پالتار گئیه‌جم

آنام نازلاییب
منی اؤپرکن
تئز توتوب اونو
اؤپه‌جه‌یم من

تک دئییل بو گون
منیم‌له کؤنلو
چانتامدادیر چون
آنامین دیلی

اوخول یولوندا
باخیب ساغ- سولا
گؤزل دیلیم‌له
دوشه‌جم یولا

#پاشا_موغانلی
@SheirOcagi

▫️گئجه دیر؛
فاجیعه یارادیب سوکوت،
یوخسول خیاواندا.
باییرا دوشونورم
بیری سوووشور؛
سوووشور ایکیسی
و من
بوغولورام
سنسیزلیک ق ف س ی ن د ه...

#پاشا_موغانلی
@SheirOcagi

‍ ▫️یئنه او باغ اولایدی...


یئنه او باغ اولایدی، یئنه ییغیشاراق سیز
او باغا کؤچه‌یدینیز.
بیز ده مورادیمیزجا، فلکدن کام آلایدیق،
سیزه قونشو اولایدیق.

یئنه او باغ اولایدی، سنی تئز- تئز گؤره‌یدیم،
قلمه سؤز وئره‌یدیم،
هر گون بیر یئنی نغمه، هر گون بیر یئنی ایلهام...
یازایدیم سحر- آخشام.
آرزویا باخ سئوگیلیم، تئللریندن اینجه‌می؟
سؤیله، اورییینجه‌می؟

یئنه او باغ اولایدی، یئنه سیزه گله‌یدیک،
دانیشایدیق، گوله‌یدیک.
اورکک باخیشلارینلا روحومو دیندیره‌یدین،
منی سئویندیره‌یدین.
گیزلی صؤحبت آچایدیق روحون احتییاجیندان
قارداشیندان، باجیندان
چکینه‌رک چوخ زامان صؤحبتی ديَیشه‌یدین،
منیمله اَییشه‌یدین.

یئنه ده بیر وورایدی قلبیمیز گیزلی- گیزلی،
سن ای اسمر بنیزلی!
بو یاز بیر باشقا یازدیر، بو یاز داها دا خوشدور،
وای او قلبه کی بوشدور!
هر اوفوقده بیر هوس، هر بوجاقدا بیر اومود،
اینسانلار داها مسعود،
دویغولار داها اینجه، فیکیرلر داها درین،
اورکلر داها سرین.
اینسانلارین ووقاری، طلبی داها یوکسک.
یولوموزدان داش- کسسک
تمیزلنمیش بیر آز دا. ائللرین کئفی سازدیر،
بو یاز بیر باشقا یازدیر!

یئنه او باغ اولایدی، یئنه او قوملو ساحیل،
سولار اؤته‌یدی دیل- دیل.
ساچین کیمی قیوریلان دالغالارا دالایدیم
دالیب ایلهام آلایدیم.
اندامینی هوسله قوجاقلارکن دالغالار،
قلبیمده قاسیرغالار،
فیرتینالار جوشایدی، قیسقانجلیقلار دوغایدی،
منی حیرصیم بوغایدی؛
جوموب آلایدیم سنی دالغالارین الیندن،
یاپیشایدیم بئلیندن،
خیالیمیز اوزه‌‌یدی سئودا دنیزلرینده،
لپه‌لر اوزه‌رینده،
ایلهامیمین یئلکنی زرّین ساچین اولایدی،
سولار خیرچین اولایدی.
بو نه گؤزل شئعیردیر، بو نه گؤزل منظره،
گلین باخین خزره.
چیخالیم بوزوونادا کیچیک قایالیقلارا،
سئیر ائده‌لیم بیر آرا...
گئجه‌لر سایریشارکن اولدوزلار لاله کیمی،
ایشیقلار ژاله کیمی
چیله‌نیب داغیلارکن اطرافا داملا- داملا،
ان یاخین بیر آداملا
نه گؤزلدیر دینله‌مک سولارین نغمه‌سینی،
طبیعتین سسینی!
نه گؤزلدیر دولاشماق، ایستی یای فصیللری
بو سرین ساحللری!
نه گؤزلدیر سحرلر، بیزیم بؤیوک روحوموز،
آشیب- داشان دویغوموز،
شکلینده‌کی سولاردان باخاراق لذّت آلماق،
بو ماوی شئعره دالماق، دالغالار کیمی قالماق،
دالغالار کیمی ائنمک
بعضن هورکوب چکینمک.
هر دالغا بیر کیشنه‌ین بَیاض یاللی آت کیمی،
بیزیم بو حیات کیمی

یئنه او باغ اولایدی سئودالار اؤلکسینده،
او سؤیود کؤلگه‌سینده،
اینجی قوملار اوستونده یئنه وئریب باش- باشا
یایی وورایدیق باشا.
گونلریمیز کئچه‌یدی
قیزغین فرح‌لر کیمی، دولو قدح‌لر کیمی؛
یارپاقلار آراسیندان اوزاداراق الینی
اوخشایاراق تئلینی،
گئجه‌لر دارایایدی ساچلارینی، آی گؤزل!
سن گؤزلسن، آی گؤزل؟
اللرینده اللریم، گؤزلرینده گؤزلریم...
آسیلایدی سؤزلریم
کؤنلونون قولاغیندان بیر قیزیل تانا کیمی،
گونش دوغانا کیمی.
بو یاز دوستلاریم بیر آز بختور اولاجاقلار،
جان- جییر اولاجاقلار.
بیر آز دا اوزاقلارا آچاجاقلار یئلکنی،
روح یئنی، حیات یئنی...
چیخاجاقلار گؤیلری آشاراق دؤنه- دؤنه–
بولودلارین فؤوقونه.
اوچاجاقلار صاباحا، اوچاجاقلار یارینا،
ائفیر بوشلوقلارینا.
واختیله بیر کؤلگه تک هور یاشاماق ایسته‌ین
بو اینسان اوغلو بیلسن
آزادلیق اؤلکسینده داها شاد اولاجاقدیر،
دونیا داد آلاجاقدیر.

یئنه او باغ اولایدی، یئنه ییغیشاراق سیز
او باغا کؤچه‌یدینیز.
بیز ده مورادیمیزجا فلکدن کام آلایدیق،
سیزه قونشو اولایدیق.

یئنه او باغ اولایدی، سنی تئز- تئز گؤره‌یدیم؛
قلمه سؤز وئره‌یدیم.
هر گون بیر یئنی نغمه، هر گون بیر یئنی ایلهام...
یازایدیم سحر- آخشام.
آرزویا باخ سئوگیلیم، تئللریندن اینجه‌می؟
سؤیله، اوره‌یینجه‌می؟

#میکاییل_مشفیق
کؤچورن:
#پاشا_موغانلی
اوخویور:
#شؤوکت_علی‌اکبراوا

@SheirOcagi

‍ ▫️‍ تیراختور


گونش‌لی ماوی گؤیون
آلتیندا گئی قیرمیزی
یاشیل مئیدان‌دا اویون-
باشلا اوجالت سن بیزی
بیز اون‌ایکینجی یاریق
اؤلونجه سن‌له واریق

بیل کی ظفر سنین‌دیر
اوجال بوی آتماغین‌لا
سن بیزلری سئویندیر
یاریشلار اوتماغین‌لا
بیز اون‌ایکینجی یاریق
اؤلونجه سن‌له واریق

حاققی‌نی یئسه‌لر ده
ایاغینین اوسته ‌دور
بایراغین زیروه‌لرده
اسسین هر آن تیراختور
بیز اون‌ایکینجی یاریق
اؤلونجه سن‌له واریق

#پاشا_موغانلی




▫️Tiraxtur


Günəşli mavi göyün
Altında gey qırmızı
Yaşıl meydanda oyun-
Başla ucalt sən bizi
Biz onikinci yarıq
Ölüncə sənlə varıq

Bil ki zəfər sənindir
Ucal boy atmağınla
Sən bizləri sevindir
Yarışlar utmağınla
Biz onikinci yarıq
Ölüncə sənlə varıq

Haqqını yesələr də
Əyağının ustə dur
Bayrağın zirvələrdə
Əssin hər an tiraxtur
Biz onikinci yarıq
Ölüncə sənlə varıq

#paşa_muğanlı
@SheirOcagi

▪️اوخول یولو
#اوشاق_شعری

قارانلیق گئدیب
گونش دوغاندا
گؤزللیکلری
گؤرن زاماندا

شیرین یوخودان
دوراجام داها
چون دوشونورم
بو گون صاباحا

گون آیدین آتا
او آن دئیه‌جم
گون آیدین آنا
من سؤیله‌یه‌جم

اَل- اوزوم یویوب
یئمَک یئیه‌جم
فیرچا ووروب تئز
پالتار گئیه‌جم

آنام نازلاییب
منی اؤپرکن
تئز توتوب اونو
اؤپه‌جه‌یم من

تک دئییل بو گون
منیمله کؤنلو
چانتامدادیر چون
آنامین دیلی

اوخول یولوندا
باخیب ساغ- سولا
گؤزل دیلیمله
دوشه‌جم یولا

#پاشا_موغانلی
@SheirOcagi

▫️حیس ائتمه کئچمیشه قاییتدیم بو گون
قارشیما چیخدین‌سا، گؤرنده سنی
سینه‌م‌ده سورکلی هیجران یاشاییر
باخیشین ساخلاییب او گونده منی...

#پاشا_موغانلی
@SheirOcagi