▫️دنیزه قارشی بیر اوتوراجاقدا،
چیینینه باشیمی سؤیکه‌ییب-
سسیندن شعرلر دینله‌مک کیمی،
اوشاقجا ایستک‌لریم اولدو.
باغیشلا!

#ناظیم_حیکمت
#شعر_اوجاغی
@SheirOcagi

▫️اعتراف

سنی تانیدیغیم او ایلک گونلری،
یادیما سالاندا غوصّه‌لنیرم.
یالانچی باخیشا، ساختا سؤزلره،
نئجه آلدانمیشام، دونوب قالیرام!

حقیقی کیملیگین، معنویّتین،
کاش بللی اولایدی او واختلار منه!
سنین‌تک غورورسوز قادینلا بیرگه،
ایتیرمیش اولمازدیم هئچ بیر ثانیه.

ایندی وارلیغین دا بیر خیال کیمی،
اؤتور گؤزلریمدن، یادا دوشنده.
او کئچن گونلرین خاطیره‌لری،
یانیب کوله دؤنموش غمده-کدرده.

بعضاً قلبیمده‌کی صاف محبّتی،
دۇیماق ایسته‌ییرم سانکی یئنیدن.
اؤتن ایللرده‌کی عولوی حیسلری،
گئرییه قایتارماق کئچیر کؤنلومدن.

او آن عقلیم ایله حیسلر آراسی،
بیر ساواش باشلاییر داخیلده، اینان!
قلبیم سنه دوغرو آددیملاسا دا،
سوورولور غضب‌له، کین چووغونوندان.

#علی_احمدوو
#شعر_اوجاغی
@SheirOcagi

▫️سئومک «موبالیغه صنعتی‌»دیر،
موبالیغه ائدین!

#عصمت_اؤزل
#شعر_اوجاغی
@SheirOcagi

▫️او، منه باخیب گولومسه‌مه‌یی اؤیرنمیشدی، من ده اونا باخیب ناغیللارا اینانماغا باشلامیشدیم.

📚 ملَک
#قاراقان
#شعر_اوجاغی
@SheirOcagi

▫️سن اویونچوسان، لازیم اولاندا گؤز یاشلارینی شن قهقهه‌لرله دییشه بیلیرسن.

📚 سؤیودلو آرخ
#الیاس_افندی‌یئو
#شعر_اوجاغی
@SheirOcagi

▫️بو یاز چیچک‌لمه، اریک آغاجیم!

نه گؤیَرت بو دردی، نه لکدن کئچیر،
سیلکه‌له، چالخالا، الکدن کئچیر!
داها گولدن کئچیب، چیچکدن کئچیب،
بو یاز چیچک‌لمه، اریک آغاجیم!

اویاتما، قوی یاتسین یاتان دردلری،
کؤز-کؤز اوره‌ییمی چاتان دردلری.
گؤردوم چیچه‌یینی آتام، دردلرین!
بو یاز چیچک‌لمه، اریک آغاجیم!

بو درد قایا-قایا، داش-داش گول‌لنیر،
داش-قایا اوستونده ساواش گول‌لنیر،
یییه‌سیز یورد یئری یاواش گول‌لنیر،
بو یاز چیچک‌لمه، اریک آغاجیم!

#رامیز_قوسارچایلی
#شعر_اوجاغی
@SheirOcagi

▫️ایمکانسیز عشق

فالچی قادین یالان سؤیله‌ییر، یالان:
«بیزی بیر-بیریمیز اوچون یاراتمیش تانریمیز.»

نئجه مومکون دئییل‌سه اولدوزلاری گؤی‌اوزوندن توپلاماق،
اؤیله‌سینه ایمکانسیز بیر شئی‌دیر عشقیمیز.

قۇرۇدو کؤلگه‌سینده اوتوردوغوموز آغاجلار،
باغچالاردا سئودیگین چیچک‌لر قالمادی.
ساده‌جه خاطیره‌لرده‌دیر ابدی اولان.
واز کئچه بیلمه‌دیگیمیز،
اونودا بیلمه‌دیگیمیز...
اونلار بئله، بیزه یار اولمادی.

اونوت مندن قالان نه وارسا!
اونوتماق یالنیزلیغین تسلّی'سی‌دیر.
گونشی بیر قدح شراب کیمی ایچیب-
دلیجه‌سینه سرخوش اولماق،
ان گؤزل طرفی‌دیر ایمکانسیزلیغین.

اومیدلریمیز فیرتینالی دنیزلر اورتاسیندا بیر لیماندا قاییق‌دیر ایندی.
دالغالار دونَنکیندن داها ظالیم،
کولک داها آجیماسیز.
نه بولود وار اوفوقلرده، نه گمی.

مؤوسوملر توز پمبه دئییل،
گوندوزلر گئجه‌دیر، گئجه‌لر زیندان.
گونشین چیخماسینی گؤزله‌مک، بوشونا.
بوشونا آرتیق، مدد اومماق داش قلبلی زمانه‌دن.

اینان کی، قیریلمیش بیر آینا کیمی پارام‌پارچا، قیریق-تؤکوک‌دور عشقیمیز!
چاره‌سیزلیگیم، اومیدسیزلیگین ماهنیسی‌.
ماهنی‌لارین ان ایچلیسی، ان حوزونلوسودور
بؤیوک عشقیمیز.

#اومید_یاشار_اوغوزجان
#شعر_اوجاغی
@SheirOcagi

🔹تحکییه ادبی درنه‌یی(457-جی جلسه)
🔹اوخوناجاق اثر: آتابه‌یین دفنی – خئیرالددین سولطان
🔹اؤزبک ادبییاتی
🔹اورمیه-چهارراه آپادانا- مجتمع فرهنگی هنری اورمیه
🔹سه شنبه- 11 اردیبهشت ماه 1403
🔹ساعت:17-19:30
@tahkie
Butajournal.com
#ادبییات #آذربایجان_تورکجه_سی #داستان #مودئرن_نثر #تحکییه #اورمو #خئیرالددین_سولطان #اؤزبک_نثری #حئکایه

▫️۲۹ آپریل، #دونیا_رقص_گونودور.

بو پُست‌دا آزربایجان بلکه ده دونیا میلّتینین ان‌اسکی رقص‌لریندن بیرینی تانیتدیریریق:

«یاللی رقص» آزربایجانین ان‌اسکی فولکلور رقص‌لریندن بیری‌دیر.

بو ویدیودا گؤردویونوز داش، اورژینالی آزربایجانین «قوبوستان» بؤلگه‌سینده یئرلشن «قاوال داشی»نین، ماکئتی دیر. بو مکاندا «توپلو یاللی رقص داش‌یازماسی» واردیر. بو داشین اسکی‌لییینی ۱۵مین ایل اؤنجه‌یه عایید بیلیرلر. آرخئولوق‌لار، «قاوال‌داشی، رقص ائدن‌لره سس یاراتماق اوچون قوللانیلیرمیش» دئیه اینانیرلار. بالاجا داش‌لارلا بو بؤیوک داشا ضربه وورولاندا گورولتولو و درین بیر سس یارانیر.

یاللی رقصینین ایلکین و ان ساده شکلی، ایشیق و ایستی قایناغی اولان اود شؤعله‌سینین اطرافیندا، شن‌لیک و مراسیم شکلینده اولارمیش. بئله بیر مراسیمده، تانریچایا دؤنوشن اودا تاپینارمیشلار. یاللی، آستا و آغیر باشلانیب قاچماغا بنزر یئگین آددیم‌لارلا، سورعتله سونا چاتیر.

یاللی رقص، قالارغی بیر گله‌نک اولاراق، آزربایجان میلّتی آدینا یونسکودا قئیده آلینمیشدیر.‌ یاللی رقص بیرلیک، مینّت‌دارلیق، سئوینج و گوجدن بیر سیمگه‌دیر...

#شعر_اوجاغی
@SheirOcagi

▫️ایچینده داشیدیغین او اومید قیرینتیلاریندان باشقا، نه وار الینده؟!

📚 گؤزل ایتیردیک.
#جان‌ار_یامان
#شعر_اوجاغی
@SheirOcagi

▫️آغلاما!

آغلاییرسان، ایندی آغلا،
منی اؤلنده آغلاما!
قبریم اوسته گوللر سولوب-
خزان گلنده آغلاما!

سیخیلما یاس ساخلایاندا،
گئییب قارا باغلایاندا!
آغلا دوشمن آغلایاندا،
دوستلار گولنده آغلاما!

گؤزل داوران، گؤزل اینله،
داریلما درد گؤزَلین‌له!
گؤز یاشینی اؤز الین‌له،
اؤزگه سیلنده آغلاما!

اؤز طامی وار، اؤز تهَری،
اؤلوم عؤمروم سون بهَری.
گیزله گؤزوندن قهَری،
گؤزون بیلنده آغلاما!

آخشام شری، سحر دانی،
سنینله بؤلدوم هر آنی.
سونونجو دفعه دونیانی،
یاری بؤلنده آغلاما!

#رامیز_قوسارچایلی
#شعر_اوجاغی
@SheirOcagi

▫️سئون کیشینین ویجدانی، سئویلن قادینین قورویوجو مله‌یی‌دیر.

📚 گولن کیشی
#ویکتور_هوگو
#شعر_اوجاغی
@SheirOcagi

▫️بیری بویوروق ائتمک اوچون دونیایا گلر، بیری بویوروقلارا بویون اَیمک اوچون؛
من‌سه عوصیان ائتمک اوچون دونیایا گلمیشم.

#ارنستو_چگوارا
#شعر_اوجاغی
@SheirOcagi

▫️چای کناریندا بیر نفر عابد،
حقّه اولموشدو شوق ایله ساجد.

گؤردو بیر کلّه سو اوزونده عیان،
آپاریر چای آشاغی سیلِ روان.

دوروب عابد او کلّه‌یه یئتدی،
کلّه‌نین حالینی سؤال ائتدی.

او قورو کلّه نیطقه گلدی روان،
دئدی: «ای عابدِ فرشته‌نشان!

شاه ایدیم من جهاندا عزّت ایله،
روزگاریم کئچیردی شوکت ایله.

تاج ایله تخت و دولتیم وار ایدی،
گنج و زرّ و رعیّتیم وار ایدی.

هر طرف ایشلر ایدی فرمانیم،
خوش کئچردی همیشه دورانیم.

مجلسیمده مدام جامِ شراب،
ساقی و باده، چنگ و تار و رباب.

نئچه زرّین‌کمر غلام‌لاریم،
حاصل ایدی جهاندا کام‌لاریم.

مجلیسیم خُلد، باده کوثر ایدی،
هر مراد ایسته‌سم- میسّر ایدی.

ائیله‌دی دهر عیشیمی برباد،
مرغِ روحه اجل اولوب صیّاد.

منزلیم تا که بیر مغاک اولدو،
بدنیم دؤندو تیره خاک اولدو.

قبریمی سیل هم فنا قیلدی،
منی بو حالا مبتلا قیلدی»...

«سیّد»ا، بیر دیاردیر بو فنا،
که برابردیر اوندا شاه و گدا!

#سیدعظیم_شیروانلی
#شعر_اوجاغی
@SheirOcagi

#اطلاعیه‌ی_ادبی

ادبای عزیز و سروران گرامی، اولین جلسه شعرخوانی و نقد شعر، #چهارشنبه ۴۰۳٫۲٫۱۲ راس ساعت: ۴:۰۰ بعد از ظهر در سالن اجتماعات اداره‌ی فرهنگ و ارشاد اسلامی برگزار خواهد شد.
حضور اساتید و دوستان مایه دلگرمی ماست.

لطفا اطلاع‌رسانی کنید.

روابط عمومی انجمن شعر و ادب استاد شهریار شهرستان پارساباد مغان
#شعر_مغان
@sher_mughan

▫️هئچ بیر ایلیشکی یالنیزلیغی آرادان آپارا بیلمز.
هر بیریمیز دونیادا یالنیزیق.

#اروین_یالوم
#شعر_اوجاغی
@SheirOcagi

▫️عشق ایدی او.

عشق ایدی او، دَییشدیرن بوتون گئجه‌لریمی.
عشق ایدی او، منی دوروب یئنی‌له‌ین.
او ایدی، دویغولو ائدن سرت اللریمی.
او ایدی، دؤرد نالا گئدیشیمه «دور!» دئین.

بیر بیچاغین کسکین اوزونده قان لکه‌سی‌یدیم،
عشق ایدی یئنه منی یویوب آریدان سو.
بؤیله آغ، پاک اولاجاغیمی بیلیرمی‌یدیم-
ایچیمده آچماسایدی او سئومک دویغوسو؟!

من بیر دوستاغام ایندی سئوگییه، کؤنوللو.
چؤزمه‌یین اللریمی، زنجیرلریم قالسین!
گؤرسون پرانقالاریم* او دوغاجاق گونو،
و بو دونیایا عشق دولو شعرلریم قالسین!
سنینله هر یئرده گؤزل، هر زامان یئنی،
ایسته‌مم... سنسیز خاطیرلاماسینلار منی!

#اومید_یاشار_اوغوزجان
* آغیر جزا وئریلمیش توتوقلولارین آیاقلارینا تاخیلان قالین زنجیر
#شعر_اوجاغی
@SheirOcagi

▫️آییل ائی کارگر!

آییل، ائی کارگر، بس‌دیر، گؤز آچ بیر خواب غفلتدن!
جهاندا مرحمت اومما بو قانوندان، بو دؤولتدن!

سارالدین گول کیمی، سولدون، ازیلدین، پایمال اولدون،
بوکولدو قامتین غمدن، قوجالدین درد و مؤحنتدن.

همیشه گؤزلرین گریان، سویوقدا آج-سوسوز، عوریان،
داش اولسا دیل‌لنر اینسان، گلر جانه بو ذیلّتدن.

الین بوش، ائوده اؤولادین-عیالین هر شئیه حسرت،
سنی دیندیرسه‌لر دینمه، قیزار شرم و خجالتدن!

سنین سایه‌نده ظالیملر توتوب کاشانه‌ده مسکن،
آلیر اؤز کامینی هر گون ملَک‌منظر بیر آفتدن.

ایچر مئی، مست اولار دائیم، خیاباندا وورار وولتا،
قیزارمیش گؤزلری هردم شیشر افراطِ شهوتدن.

دئییلسن کیمسه‌دن اسکیک، دئمک اولماز بونا دیرلیک،
سنی آزاد ائدر «بیرلیک» بو زنجیرِ اسارتدن.

#محمد_بی‌ریا
@SheirOcsgi

▫️بعضاً بونو قبول ائتمه‌یه مجبوروق: بعضی آداملار بیر تک اوره‌ییمیزده قالا بیلرلر، حیاتیمیزدا دئییل.

#سیلویا_پلات
#شعر_اوجاغی
@SheirOcagi

▫️آتا-آناسیز دوغولمادیم گؤبه‌لک کیمی.
گؤبه‌لک کیمی بؤیودوم، آما گؤبه‌لک کیمی تئز ییخیلمادیم. هر یئرده بیر شئه وار ایدی، ایچیمه چکدیم؛ منی سوواران کیمسه اولمادی.
بؤیودوم... اییده آغاجی کیمی اَیری-بویرو، آز سویا راضی و آزربایجان کندلرینین اؤیرتمنی اولدوم.
آتام دئییر: ایرانی ایرانلی‌لار آراسیندا بؤلسه‌‌یدیلر، سنین پایینا بوندان آرتیق دوشمزدی.

#صمد_بهرنگی
#شعر_اوجاغی
@SheirOcagi