▫️منده، سونسوزادک قالارغی اولاجاغینی ساندیغیم چوخ شئیلر یوخ اولدو.

#مارسل_پروست
#شعر_اوجاغی
@SheirOcagi

▫️چتین‌دیر.

چتین‌دیر سنینله دوستلوق ائله‌مک،
سن بالین ایچینده آغو وئریرسن.
بیلیرم، قلبیندن کئچن بودور کی،
هر یئرده همیشه غولون اولوم من.

بیلیرم، نه اوچون شن قاغایی‌لار،
نغمه‌یه توتورلار کؤرپه بالیغی.
بیلیرم، نه اوچون گئجه، آیی‌لار-
یئریییر آرخاجا چوبان‌سایاغی.

دئدیم یاز ائدرسن قیشیمی منیم،
گلدین... گوللریمه یامان یاغدی قار.
پامبیق‌لا کسیرسن باشیمی منیم،
باشینا گلن‌لر باشماقچی اولار.

گؤلسن... تیمساح‌لارین یاتیر درینده،
چؤلسن... باتاقلیغین اوت آلتیندادیر.
آجیغین گیزلنیب گولوش‌لرینده،
قیلینجین، خنجرین قیزیل قیندادیر.

پالیدسان... کؤلگه‌نده سولوخان شیوَم،
کیمسه‌یه چاتماییر آمانیم، آهیم.
بیر یاندان دئییرسن «آخی نه شیوَن؟»
بیر یاندان قویمورسان قلبی‌یه قالخیم.

بعضاً دوستلاریم دا دوست بیلیر سنی،
بیزی دالاشدیریب «باریش!» دئییرسن.
دارا ایته‌له‌ییب سن اؤزون منی،
سونرا دوشمنیمی هده‌له‌ییرسن.

گویا باجارمیرام یاخشینی گؤرم،
گویا جان وئریرسن اودا اوتنده.
قالماق ایسته‌میرم، من ایسته‌میرم،
یالانچی بیر دوستون بوش مینّتینه.

#آغا_لاچینلی
#شعر_اوجاغی
@SheirOcagi

▫️آغلاماق مسئله‌سی

نه تهر ائتمه‌لی ده آغلایا بیلمه‌لی،
باشا دوشمه‌دن؟
نه تهر ائتمه‌لی ده آغلایا بیلمه‌لی
عاییبسیز، آشیکارا، یاغمور میثالی؟

نئیلرسن، آلیشقانلیق.
ایچین قان آغلارکن، اوزون گولر،
دیکیلی‌داش کیمی یئرینده دورارسان یئنه.
یاوروم! یئتیشمک نه موشکول‌موش مگر-
آنالار کیمی آغلامانین ایگیدلیگینه؟

#ناظیم_حیکمت
#شعر_اوجاغی
@SheirOcagi

◽حیاتدا یالنیز ائنیش یوخوشدان دئییل
شاشدیریلماغیمیز.
شاشقینلیق بارماغی
حیاتین هامار یولونون
غفیل چالا چؤکک‌لریندندی
دیشیمیز آراسیندا...

قیزیلی قان ایچینده
یارامیزدا دئییل
بم-بیاض، گؤزل-گؤیچک، پارلاق دریمیز آلتیندا
سیزلایان آجیدیر
گیزلی سیرّیمیز.

غفیل اولایلار چاغی
چاشقینلیقدا چالیقلامامیز،
آنلاماز اوشاغین هوشونو گلیشدیرمک اوچون
الینه وئریلمیش اویونجاقدیر سانکی
عؤمور پازئلیمیز.

گله‌جک گلمه‌یینجک
یارانیشین دارک(dark) آدلی آدلانان حیصّه‌سیدیر
او قدر وار
او قدر یوخ
او قدر دانیلماز
او قدر گؤرولمز
او قدر آندی ایچیلمز وارساییم...

حیات الی بیچاقلی شرطچی‌لر الینده
کسیلمه‌میش قارپیزدیر
اؤز بوستانچیلیغینا گؤونسن ده بئله،
بعضاً
ایچینین اولامیشلیغی‌یلا
اؤزوندن اوزونه آچار شوبهه یولونو.

هر شئی بو قدر حیاتدیر حیاتدا دئمه‌لی...

#حکیمه_باباکشی‌_زاده«نغمه»
#شعر_اوجاغی
@SheirOcagi

▫️اولدوزوم- اونو اوزون زامان‌دیر حئیرانلیق‌لا ایزله‌دیگیم ماوی‌لیک‌لردن آشاغییا ائنمیش؛ منه ذرّه قدر آزالمایان پارلاقلیغی و صافلیغی ایله بیر قادین اولاراق گلمیشدی.

📚 وادیده‌کی زانباق
#اونوره_دو_بالزاک
#شعر_اوجاغی
@SheirOcagi

▫️چوخلاری بدبخت‌لیگین یوکونو بؤلمک اوچون همیشه اؤزلرینه یولداش آختاریرلار.

📚 کامیل‌لیک بیلیمی
#بالتاسار_گراسیان
#شعر_اوجاغی
@SheirOcagi

▫️اوشاقلیغیمدان قاچیرام.

قالین بیر کیتابدی اوشاقلیق چاغیم،
اونو واراقلادیم، قلبیم کؤورَلدی.
یاماقلی پالتاریم، یالین آیاغیم،
گؤزومله یئریییب گؤروشه گلدی.

قیرخدا من دوغولدوم، قیرخ‌ بیرده داعوا،
باشینا گلمه‌ین آخی نه بیلسین؟!
داغیلدی قوینونا قوندوغوم یووا،
آز قالدی دونیام دا قاچیب اکیلسین.

گؤروشلو ایناما ایلیشیب قالدیم،
یاخشی یوخولاردا یئتیشدیم کاما.
مکتبه گئتمه‌میش ساواد دا آلدیم،
مکتوب یازا-یازا عسگر آتاما.

اوووندورماق اوچون بیر آج بالانی،
ناغیل سؤیله‌یَردی ننه‌م هر آخشام.
قورخونج ناغیل‌لارین باش قهرمانی،
قوروقلو بوستاندا اؤزوم اولموشام.

اوشاق اویون سئور ایلک آیلاریندان،
دوشدو اوشاقلیغیم باشقا اویونا.
مئشه‌ده یاشایان آییلارین دا،
بیر اورتاق چیخمیشدیم آرمود پایینا.

قالین بیر کیتاب‌دی اوشاقلیق چاغیم،
اوخویان دئییر کی: «ساغ اول، قوچاغیم!»

کؤهنه بیر توفنگین لوله‌سی تکی،
ایچیمدن مین دؤنه اود-آلوو کئچیب.
منی گؤرن دوستوم گؤز برَلدیر کی:
اؤلوم بره‌سیندن* دیری اوو کئچیب.

#آغا_لاچینلی
* پوسقو (Bərə)
#شعر_اوجاغی
@SheirOcagi

▫️اؤزومه اؤیود

اوسلانما هئچ، هپ دلی قال!
بؤیومه ساقین، اوشاق قال!
اَس دلی-دلی، بؤیله قال!
سئودانین سون خرمنینده،
قوتار، توز-توز سوورولا قال!
سوچ‌اوستو تاپمالی اؤلوم!
اؤلورکن ده سئودالی قال!

#عزیز_نسین
#شعر_اوجاغی
@SheirOcagi

▫️اینسانلار حیاتلارینین بیر زامان بیته‌جه‌ییندن قورخورلار. حالبوکی اونلار حیات‌لارینین هئچ بیر زامان باشلامایاجاغیندان داها چوخ قورخمالی‌دیرلار. بیر چوخلاری یاشاماغا باشلامامیشدیر.
باشلامایان بیر حیاتین بیتمه‌سیندن ایسه قورخمازلار.

📚 رئیل‌لر اوزرینه اوزانمیش آدام
#رؤوشن_عبدالله‌اوغلو
#شعر_اوجاغی
@SheirOcagi

▫️ایکیمیز می، همن می؟!

اورایا چاتماق می؟ ایکیمیز می؟ همن می؟!
دور، گؤزله منی!
گلیرم، ان گؤزل یئریندن اؤپه‌جه‌یم،
بیلمم دوداقلارین می؟ گؤزلرین می؟

اؤنجه سسین ایدی منی چاغیران عشقه،
سونرا باخیشلارین، اللرین اولدو.
و بیر صاباح باشلادی عؤمرومده،
گؤردویوم بوتون صاباحلاردان باشقا.

تورموزو پاتلادی ایچیمده اؤزلَمین.
من بو عشقی دایاندیرا بیلمیرم آرتیق.
ان یاخشیسی منه گلمه‌ن.
گل، آما هئچ گئتمه!
چاتاق دویولماز دادینا قووشماغین!

باخ! اللرین ده اوشوموش،
آما قلبیم سیم‌سیجاق.
تیتره‌مه، قورخما، آرتیق یانیمداسان!
هئچ‌ بوراخما بو اوشاقسی حالینی!
نه گؤزل،
نه گؤزل‌دیر سنین‌له بیر آیدینلیق اولماق!

سؤیله، بیر داها سؤیله، «منم» دئ، «سنینَم» دئ!
یاخینلاش، اویاندیر منی بیر اؤلوم یوخوسوندان!بورون ماوی‌لیگیمه!
بو بیزیم گؤی‌اوزوموز.
باخسانا، بیر دونیا چالخالانیر ایچیمده!

اورایا چاتماق می دئمیشدین، ان اوجایا؟
ایکیمیز ایدی می؟ همن ایدی می؟!
باخ، سنینله نئجه بیر بوتون اولدوق ایندی!
هاراداییق می؟ اوراداییق ایشده.

#اومید_یاشار_اوغوزجان
#شعر_اوجاغی
@SheirOcagi

▫️بعضاً کیشی‌لر ایتیرمه‌لی‌دیرلر و یا بیر قدَر ایتیرمه‌لی‌دیرلر کی، ایتیردیکلرینین قیمتینی آنلایا بیلسینلر.

📚 قادین کیمی داوران، کیشی کیمی دوشون!
#استیو_هاروئی
#شعر_اوجاغی
@SheirOcagi

▫️ایللر داغا دؤنوب دوشدو آرایا،
اورتادا چوخ اومو، چوخ کوسو اولوب.
یاخشی کی آخشاملار باخیریق آیا!
سمالار باریشیق گوزگوسو اولوب.

گؤرنده گؤزونه چوخ باخمامیشام،
ائله بیلیرسن کی داریخمامیشام؟
آخی نئیله‌ییم کی، یالقیز بیر قوشام،
یوخوم دا بیر آنین مورگوسو اولوب.

سنی تانییاندان، گیرینجم، گیرینج،*
نه کؤنلوم توختاق‌دی، نه قولاغیم دینج.
بو نئجه سئوگی‌دی، بو نئجه سئوینج؟-
درددن اوخویانین تورکوسو اولوب.

سنین بیر باخیشین داشی موم ائیلر،
گولسن، بوخارلانار گولونج گیلئی‌لر.
حالیمدان‌ حالی‌دی توتولموش گؤیلر،
بولودلار باشیمین توستوسو اولوب.

چکدیگیم آغرینی چکمه‌سین هئچ کیم!
گؤر نئچه اوزو وار بو کئشمَکئشین!
یارییان عشقیمی قورویان عشقین،
عؤمرومون قورخوسو-هورکوسو اولوب.

#آغا_لاچینلی
* جانا گلمیش
#شعر_اوجاغی
@SheirOcagi

▫️یاشاماق شوخلوغا گلمز،
بؤیوک بیر جیدّیَت‌له یاشایاجاقسان،
بیر سینجاب کیمی مثلا!
یعنی یاشامانین دیشیندا و اؤته‌سینده هئچ بیر شئی گؤزله‌مه‌دن،
یعنی بوتون ایشین-گوجون یاشاماق اولاجاق!

#ناظیم_حیکمت
#شعر_اوجاغی
@SheirOcagi

▫️هر بیریمیز اؤز یولونو گئتمه‌لی‌‌دیر:
من سنه ساری،
سن منه ساری!

#جبران_خلیل_جبران
#شعر_اوجاغی
@SheirOcagi

▫️منی آهینا تاپشیر،
سون گوناهینا تاپشیر!
اوزاق، اوزاق توتاجاق،
سن لاپ یاخینا تاپشیر-
اوزونو گؤره بیلیم!

منی غضبینده بوغ،
سئوگی عذابیندا بوغ!
کوسمه‌رم، اینجیمه‌رم،
تکی من هامیدان چوخ-
گؤزونو گؤره بیلیم.

سن آغریت، من ده دؤزوم،
کؤزون یاندیرسین کؤزوم!
ایمکان وئر آخشام، سحر،
گؤزونه باخسین گؤزوم-
اؤزومو گؤره بیلیم!

#ابوالفتح_مدداوغلو
#شعر_اوجاغی
@SheirOcagi

▫️مکاندان آیریلما!
«کیلیدلری اونودوبسان» بهانه‌سی‌یله اونا دؤن!

واختی کورلاما!
قادینلار قیفیل‌لاردان، تئلفونلاردان، سیقارا قوتولاریندان خوشلانمازلار.

مکاندان آیریلما!
اونا  ائله دؤن،
سانکی اوره‌یینی ماسا اوزرینده اونودوبسان!

#محمود_درویش
#شعر_اوجاغی
@SheirOcagi

▫️کیم ایدی او یانینداکی؟ کیم ایدی؟
نه دانیشیردینیز؟
ایشده بونا دایانا بیلمه‌رم، قهر اولارام.
دونن گئجه نه ائتدین؟
هارا گئتدین؟
آه! اوتورسایدین دا، منی دوشونسه‌یدین یا!
اَیلَنه بیلدین می باری؟
یاتارکن نه اوخودون؟
سونرا یاخشی یاتا بیلدین می؟
رؤیاندا نه‌لر گؤردون؟ سؤیله‌سنه!

آنلادیم آرتیق، منی سئومیرسن.
سئودیگینی سانماق‌لا یانیلمیشام.
ذاتاً چیرکین بیر آدامام من، سینیرلی‌یم، قیسقانجام، چوخ حیسلی‌یم.
دائیما منی سئوه‌جه‌یینی دوشونمه‌مه‌لی‌یدیم.
سوچلویام.
اؤزومو سئوگی‌لریمین منجیل‌لیگیندن قورتارا بیلمه‌دیم.
ضعیف، منجیل بیر آدامام اؤیله‌یسه.
سونرا یالانچی‌یام، ایکی اوزلویم.‌
سنینله دانیشارکن سنین‌له یاتماغی دوشونورم.‌
سئوگی‌یله الینی توتدوغوم زامان، اصلینده یانچاقلارینی توتورام، بیلمیرسن.
اؤزومه گؤره حئسابلاریم دا وار منیم.
یانیمدا اولمان غورور وئریر، سئوینج وئریر منه. فقط سنه کیمسه باخماسین ایسته‌ییرم،
کیمسه دانیشماسین سنین‌له.
هپ منیم اول، دورمادان منیم اول!
گونون هر ساعاتیندا و اؤلونجه‌یه قدر منیم اول!

منی سئویرسن می؟ هه می؟ اؤیله‌یسه سؤیله:
کیم ایدی او یانینداکی؟ کیم ایدی؟ هارا گئدیردینیز؟

سئون ظالیم‌دیر، بیلیرسن، عشق ائقوئیست‌دیر. سن ظالیم‌ اولما!
آنلامیرسان، آنلامیرسان... بیر آز آنلا منی!

سنه گیلایه ائتمه‌یه‌جه‌یم آرتیق.
بوتون سوچ منیم، سنی بو قدر سئومه‌مه‌لی‌یدیم.
بو کؤهنه و اوتانماز دونیادا نه بیر کیمسه بو قدر سئویلمه‌یه دیَر،
نه ده بیر کیمسه‌نین بو قدر سئومه‌یه حاقّی وار.

اؤزوموزو نه سانیریق؟ بیز نه‌ییک کی؟
سوس، جاواب وئرمه! تسلّی‌یه احتیاجیم یوخ.

سنی بو قدر سئومه‌نین جزاسینی اؤزومه چکدیره‌جه‌یم؛ گؤره‌جکسن.

#اومید_یاشار_اوغوزجان
#شعر_اوجاغی
@SheirOcagi

▫️تزه‌له‌ینده

آغاجلار اویانیب مئشه بویونجا،
دولوب بوداقلارین بوش دیمدیک‌لری.
قالین قار آلتیندا آچیلان غونچا،
نوبارا یئتیریب سرت گدیک‌لری.

سویوق گؤتورمه‌ییب گولون اییینی،
داغین داغ چیینیندن شله سوروشوب.
دویوب مئیدانینجا کیچیلدیگینی،
چووغون آغ آتیندان کؤنوللو دوشوب.

شفق ایلمه‌لنیب ایسینَن یئلده،
دومان‌الجک‌لی‌دی کولون اللری.
ییرغانان دنیزلر یارانان یئرده
طبیعت قوروتمور خیردا گؤل‌لری.

یوخ، یئنه چاشقینام... کؤمه‌ییمه چات!
چیلغینلار جوشدومو، اؤزونو بیلمیر.
یئنه چار-چارپاشیق، یئنه چات‌هاچات،
داغیلان دوزه‌لیر- اؤلن دیریلمیر.

دَییشیر دونیانین کؤهنه اؤرتویو،
دوشور قان ایشیغی آچیلان یولا.
گور سئللر آپاریر کؤکلو کؤتویو،
داشا چیرپا-چیرپا، کوی سالا-سالا.

سئلدن هارای آلیر اویانان سئلاب،
یئنی سس جارلانیر سویون دیلیندن:
قیش دا انقلاب‌دی، یاز دا انقلاب،
بیری اؤلدورن‌دی، بیری دیریلدن.

دَییشیر بویالار، دَییشیر گونده،
بس نییه قورتولمور قوربانلی ائللر؟
دونیا دؤنه-دؤنه تزه‌لنسه ده،
قالیر اؤز دؤورونده بوتون فصیل‌لر.

#آغا_لاچینلی
#شعر_اوجاغی
@SheirOcagi

▫️منی ائله سئو، اوره‌ییمده باشقا آرزوم قالماسین!

#نزار_قبانی
#شعر_اوجاغی
@SheirOcagi

دیالوق

▫️- قودرت، گوجسوزلویوموزو اورتایا چیخاران بیر وسیله‌دیر.

🎬 Dragon Blade
2015 چین
#دانیل_لی
#شعر_اوجاغی
@SheirOcagi