▫️اؤنَملی اولان «زامانا بوراخماق» دئییل،
«زامان‌لا بوراخماماق‌»دیر.

#ناظیم_حیکمت
#شعر_اوجاغی
@SheirOcagi

▫️چوخ آدام، هر شئیده آللاهین گوجونه اومید بسله‌ییر، آما من دوشونورم: آللاه اؤز رحمینی ساغا-سولا پایلامیر. یالنیز، اینسان باشقا بوتون یوللاری یۏخلادیقدان سونرا، یاردیم الینی اوزادیر.

📚 جین_ایر
#شارلوت_برونته
#شعر_اوجاغی
@SheirOcagi

«یالین یالاقدا قالدی،
بنک، ها بنک!
زینجیرین میخدا قالدی،
بنک، ها بنک!»
                      چوبان بایاتیسیندان

▫️بنَک¹

گئجه‌نین یاریسی گیرمیشم کنده،
اورک دؤیوندوکجه دؤیوکورم² من.
یاد ایتلر اوستومه تؤکولوشنده،
آلیب هنیریمی³ هایا گلمیسن،
بنک، ها بنک!

سن نئجه تانیدین بوغوق سسیمی؟!
دۇیۇب بو گؤروشو، هئچ یاتمامیسان.
چوخونون یادیندان چیخان بیر کسی،
بس نئجه اولوب کی، اونوتمامیسان؟
بنک، ها بنک!

بئش ایل‌دیر اوچموشام من اورا-بورا،
اوزون آیریلیغین داستانی بیتمیر.
یوردونا جان-باش‌لا باغلانمیش‌لارا،
قاپینین ایتی ده دؤنوکلوک⁴ ائتمیر،
بنک، ها بنک!

منیم بنک ایتیم، منیم یئتیگیم!⁵
بیز ده دؤشوموزو ایره‌لی گردیک.
اؤروشده⁶ قالاندا قومرال ایتیگیم،
بۏز قوردون یولونو قوشا کسَردیک.

اوزاقدان گؤردوک‌مو قودوز پلنگی،
سن آلیب یاتاردین من آتیلمامیش.
سن ائله اوندا دا ایندیکی تکی،
هاییما چاتاردین چاغیریلمامیش.

یان-یانا گزردیک یاشیل یایلانی،
آزمی دینله‌میسن چتَن⁷ نئییمی؟
من سنه وئرَردیم یاغلی یایما'نی،
آنام‌سا اؤیَردی چوخ یئمه‌ییمی.

بنه‌ییم! بعضاً ده اوزاق دوشموسن،
سایا سالمامیسان زینجیر دؤیَنی.
یاللی یالاقلاردان یان سۆرۆشمۆسن،
قاچیب قۏروموسان یوخسول دیه‌نی.⁸

بری گل، باشینی سیغاللاییم بیر،
بری گل کؤکَلسین کئفین-داماغین!
بلکه آیریلیغین بو گؤروشده‌دیر،
بلکه بیر گیلئی‌دی اوغولداماغین.

نییه ساریلمیسان آیاقلاریما؟
آخی دیله‌یین نه، اوماجاغین نه؟
هَیان اولا-اولا پیس چاغلاریما،
هله مینّت‌دارلیق ائدیرسن منه.

ائله بیل دئییرسن: «آ گئجیکَنیم!
منده گوج‌ قالماییب مئیدان آچماغا».
ائله بیل دئییرسن: «داها نه غمیم؟!
یئرینده چاتمیسان ویداعلاشماغا».

آرتیق من گؤرورم، سؤنور نفَسین،
اؤلورسن هر شئیی سن دۇیا-دۇیا.
گؤزونه سانجیلیر آیین شفقی،
باخیرام گؤزونده سون پاریلتی‌یا.

منیم بنک ایتیم، منیم ایگیدیم!
بو نئجه آیریلیق، نئجه گؤروشدو؟
باشینا گلَنی بیلیرمیش کیمی،
سن جان تاپشیراندا ایتلر هۆرۆشدۆ...

یئنه ده آی باتیر، اوزانیر گئجه،
یانیندا دورموشام الده دیه‌نک.
اوجا بیر تپه‌یه قالخیب ایندیجه،
چاغیرماق ایسته‌رم: بنک، ها بنک!
بنک، ها بنک!

#آغا_لاچینلی
¹- ایت آدی
²- چاشماق-اؤزونو ایتیرمک
³- یاواش سس
⁴- عهدینده، سؤزونده دورماماق
⁵- بلد- تانیش
⁶- مال-داوار اوتاریلان یئر- بؤیوک اوتلاق
⁷- قارغیدان دوزَلمیش
⁸- کوماجیق- آلاچیق (Dəyə)
#شعر_اوجاغی
@SheirOcagi

دیالوق

▫️- بیلمیردیم گؤیرچین‌لردن خوشون گلیر.
+ من دانیشمایان هر شئیدن خوشوم گلیر.

🎬 Sleepers
1996 آمریکا
#بری_لوینسون
#شعر_اوجاغی
@SheirOcagi

▫️یالنیزلیق، ظنّ ائتمه‌یین کی کیمسه‌سیز اولماق‌دیر.
اصل یالنیزلیق، کیمسه‌ن وارکن، کیمسه‌سیز قالماق‌دیر.

#ناظیم_حیکمت
#شعر_اوجاغی
@SheirOcagi

▫️یادیندامی‌دیر؟

ائی حُسنو مجسّم ملَکیم، نازلی نگاریم،
ای ایدولوم،¹ ای ایدئالیم، ای سئوگیلی یاریم!

یادیندامی‌دیر ماضی- او کئچمیش گؤزل ایّام؟
یاز فصلی، گؤزل بیر گئجه، نورانی بیر آخشام،

آی بدر ایدی اون دؤرد گئجه‌لیک، صاف سمادا،
آفاقا فرح‌بخش ایدی اشراق و ضیادا.

بیر پارچا بولود هردن ائدیب گردشِ شیرین،
آغوشا چکیردی قمرین قرصِ مُنیرین.

بیر لحظه آیین دؤورو یاریم‌ظلمت اولاردی،
سونرا چکیلیردی بولود، آی بیر ده چیخاردی.

ناز ایله باخاردی گوله‌رک، روی زمین'ه،
بنزَردی حیادان یاشینان² تازه گلینه.

یادیندامی‌دیر اول گئجه؟ هم‌ساغر و هم‌دوش،
اول منظره‌یه قارشی چمن اوسته هم‌آغوش،

یالنیز ایکیمیز یان-یانا اَیلشمیش ایدیک شاد،
بیر جنّتِ اعلادا غم و غصّه‌دن آزاد،

چاتمیشدی بوداق باش‌-باشا سرو و گل و شمشاد،
بیر چترِ طبیعی یدِ قدرت ائدیب ایجاد.

آی نورو یاشیل یارپاق آراسیندا فروزان،
سان تعبیه اولموشدو زُمرّدلا برلیان.

جان‌پرور ایدی چشمه‌ی صافین جریانی،
ذوق‌آور ایدی صفحه‌ی آیین لَمَعانی.

سئیر ائیلر ایدیک اول فرح‌افزا چمن اوسته،
آهسته اوخوردوق دخی رندانه شکسته.

هرچند کی، یوخ ایندی امیدیم او وصاله،
نئیلیم؟ گلیرم ناله‌یه، دوشدوکجه خیاله.

عکسِ رُخون اولموش دلِ غمدیده‌ده منقوش،
حاشا اولاسان دؤورِ زمان ایله فراموش!

گئتدین‌سه ده، گئتمز اوره‌ییمدن غمِ عشقین،
منجه ایکی دُنیایا دیَر عالمِ عشقین.

یوخدور هوَسیم سرو و گل و لاله‌یه سنسیز،
بلبل کیمی دائیم گلیرم ناله‌یه سنسیز.

#عباس_صحت
¹- تاپینیلان، اؤرنک آلینان، ان چوخ حئیرانلیق دویولان کیمسه
²- یاد کیشیلره گؤرونمه‌مک اوچون اۆزۆنۆ اؤرتوب گیزله‌مک (Yaşınmaq)
#شعر_اوجاغی
@SheirOcagi

▫️منیم آنجاق دیلیم ایشله‌ییر، یاخشی سؤزلر دانیشیرام، خوش خیاللار قورورام؛ آما اصلینده هامینیزین جهنّم اولماغینی ایسته‌ییرم.

📚 یئرآلتیندان قئیدلر
#فئودور_داستایئوسکی
#شعر_اوجاغی
@SheirOcagi

▫️آیریلیق

بؤیوک قۏرخوندایدی آیریلیق،
بیردن-بیره قاپین آچیلار کیمی،
بیری‌لرینه آنسیزین سئودالانماق.
اویسا منی سئویرسن،
آما بونون فرقینده دئییلسن؛
آیریلیق بونو فرق ائتمه‌ییشینده‌یدی سنین.
آیریلیق قورتولموشدو یئرچکیمیندن،
آغیرلیغی یوخ ایدی؛
«توک کیمی‌یدی» دئیه‌مم،
توکون ده آغیرلیغی وار؛
آیریلیغین آغیرلیغی یوخ ایدی آما،
اؤزو وار ایدی.

#ناظیم_حیکمت
#شعر_اوجاغی
@SheirOcagi

▫️اؤزومو آتیلمیش، ترک ائدیلمیش بیری کیمی حیسّ ائتدیم. بیلیم‌آداملاری «پلوتون»ون گزه‌گن یوخ، بیر توپا کوسمیک* زیر-زیبیل اولدوغونا قرار وئرنده، پلوتون اؤزونو نئجه حیسّ ائدیردی‌سه، من ده اؤزومو تام ائله حیسّ ائدیردیم.

📚 ائله توند گؤی کی...
#هالی_شیندلر
*فضایا عایید اولان، فضایی
#شعر_اوجاغی
@SheirOcagi

دیالوق

▫️- اینسانلار همیشه یئکه-یئکه دانیشدیغیم اوچون منه گولورلر؛ آما دوشونجه‌لرین بؤیوک اولاندا مجبورسان یئکه کلمه‌لر ایشله‌ده‌سن، بئله دئییل‌می؟

🎬 Anne of Green Gables
#ایسائو_تاکاهاتا
#شعر_اوجاغی
@SheirOcagi

▫️کندلی منلیگی

اوغلو تعطیلده گلدی،
طلبه یولداشی‌یلا.
اوغلو «منلیک» ایپی‌یله،
اؤز ایچیندن آسیلدی،
آلووونا یاغ تؤکدو،
اۇددۇغو گؤز یاشی‌یلا.

اوغلو نیگاران اولدو،
ایچین-ایچین قوورولدو:
«گؤره‌سن یازیق آنام،
نه قویاجاق سوفره‌یه؟!
جامیش اتلیگه گئدیب،
قیسیر قالیب مور دۆیه.
گؤره‌سن ایش آشارمی،
یاوان یارما آشی‌یلا؟»

آتا اؤز بالاسینی،
باشا سالدی باشی‌یلا.
آتا دئدی: داریخما،
ایندی بوللوق اولاجاق؛
یارماچانی¹ چملی قوی،
تئز گورلانسین گور اوجاق!

آتا پاسلی قمه‌نی،
ساطیلدا ایتی‌له‌دی.
اوتاردیغی سۆرۆدن،
شیشمانجا بیر شیشه‌یی²،
اورتایا ایته‌له‌دی؛
کسدی، سویدو، دوغرادی،
شیشلیک اولدو بیر شیشَک.

بلکه ده جریمه‌نی،
عؤمرویله اؤده‌یه‌جک.

#آغا_لاچینلی
¹- کسیلمک اوچون ساخلانیلان حئیوان (Ətlik)
²- یاریلمیش، ایکی‌یه آیریلمیش اودون پارچالاریندان هر بیری
³- 2-4 یاشلاردا اولان ائرکک قویون (Şişək)
#شعر_اوجاغی
@SheirOcagi

▫️بیزه ان بؤیوک پیسلیک ائدن‌لر، حقیقتی بیزدن گیزلتمه‌یه چالیشانلاردیر.

📚 بئش بالاجا دونوز
#آگاتا_کریستی
#شعر_اوجاغی
@SheirOcagi

اؤیکوجوک

▫️اوچ سؤزجوک، تک قورشون

اوندان، سؤیله‌مک ایسته‌دیگینی آچیقجا و ایکی سؤزجوک‌له سؤیله‌مه‌سینی ایسته‌دیم.
- «ایکی سؤزجوک یئتمز» دئدی.
- «اولسون، اوچ» دئدیم.
- «اونو اؤلدورمک ایسته‌ییرم» دئدی.
- «نه ایسته‌ییرسن؟» دئدیم.
- «منه بیر قورشون وئر!» دئدی.
اونا بیر تک قورشون وئردیم.

- سونرا نه ائتدی، بیلمیرم. اونو بیر داها گؤرمه‌دیم.

#فرید_ائدگو
کؤچورن: سؤز کانالی
@a_z_soz
@SheirOcagi

▫️دونیادا هر بیر کس اوچون سؤزدن بؤیوک یادیگار یوخدور. زیرا کی، مال-مولک تلف اولور گئدیر، آمّا سؤز قالیر.

#جلیل_ممدقولوزاده
#شعر_اوجاغی
@SheirOcagi

▫️آرا وئرمک ایسته‌ییرم، حیات!
صبر ائتدیکجه اوستومه گلیر کیمیسن.

#ناظیم_حیکمت
#شعر_اوجاغی
@SheirOcagi

▫️سن بیر بولودسان بیر یاغمورون ایچینده،
من قورو بیر چؤلم بیر قومون ایچینده...
سن بیر رؤیاسان بیر گئرچه‌یین ایچینده،
من بیر یارایام، بیر بیچاغین ایچینده.

#بایزید_بسطامی_کئچه‌لی
#شعر_اوجاغی
@SheirOcagi

▫️نه واخت‌دیر مینمیرم کهَر قاشقانی،
یولوم یئریسه ده، یوردا جالانمیر.¹
نئهره‌نین نوباری، سبَتین شانی،
شانا بارماغیملا هئچ سونالانمیر.

نه واخت‌دیر تارلادا طاماهیم قالیب،
قانقال بۇدامیرام²، سۆتۆل اۆتمۆرم.
قوردبوغان یایلاقدا های‌-هارای سالیب،
چوبان ایتلرینه کؤمک ائتمیرم.

قوی بو توخ گون‌لریم باش آپارماسین!
یادداشین کامانی یئرینده دیندی.
آرپا قووورغاسی، بیرینج یارماسی،
چتَنه قووودو ایستردیم ایندی.

نه واختدیر سینمیرم آتا قبرینه،
اؤزوم باش‌داشی‌یام، گزَن قبیرم.
یونجالی گونئیده داریخان بینه!³
بو یورغون چاغیمدا قاپیندان گیرم!

چوبوق قابیرغالی آلچاق آلاچیق!
ساخلا چیراغیندا نؤیوت اییینی!
پیلته سونبولوندن سوزولن قیلچیق،
آرتیرسین گئجه‌نین گووَنلیگینی!

دره‌نی گیزله‌ین مۏروق‌لو مئشه!
بیز کی دوغما ایدیک- بئله دئییلدیک.
بره‌نین بندینه دوشن بنؤوشه!
بلگه گۏر ائوینده گؤروشه بیلدیک.

نه واخت‌دیر باشیمدا چوماق چاتلامیر،
هانی چؤل سیناغی، قۏروق ساواشی؟
آنیمدان جانیما سرینلیک دامیر،
دَیینجه یاراما یادداشین داشی.

هانی یومشاق گیلئی، حلیم‌جه هنَک⁴؟
گؤر حیات نه‌لری چوخ گؤردو منه!
کاش ائله تپه‌مه تپَن⁵ دَیه‌نک،
بیچه‌نک اوستونده اولایدی یئنه!

نه واخت‌دیر آرزومو آللاهی دؤیوب،
من‌می سینیخمیرام، من‌می سینمیرام؟
مارال اوتلارینی باش-باشا دۆیۆب،⁶
باللی کؤلگه‌لره هئچ سیغینمیرام.

چیرپین، آی اوره‌ییم!... نه دئییم سنه؟
دونیانین دینجلیگی منه حارام‌می؟
باخسام «آینا گؤل»ون آغ گوزگوسونه،
گؤره‌سن اؤزومو تانییارام‌می؟

#آغا_لاچینلی
¹- باغلانماق- چاتماق
²- آغاجین قورو و یا آرتیق بوداقلارینی کسمک، هرَس
³- کؤچَری‌لرین کنددن قیراقدا اوتراق ائتدیگی یئر
⁴- ظارافات
⁵- شیغییان، آتیلان
⁶- دویون‌له‌مک
#آغا_لاچینلی
#شعر_اوجاغی
@SheirOcagi

▫️عشق بیزی گؤیلره قالدیرا بیلر، جهنّمه آتا بیلر، لاکین هئچ واخت اوّلکی یئریمیزده قویماز.

📚 ریو پئدرانین ساحیلینده اوتوردوم و آغلادیم.
#پائولو_کوئیلو
#شعر_اوجاغی
@SheirOcagi

▫️هر کس کیمی

کؤنلوم‌له باش-باشا دوشوندوم دمین:*
آرتیق بیر سئحیرسیز نفس کیمیسن.
ایندی تا ایچینده بوم‌بوش قلبیمین،
یانسیماسی سؤنن بیر سس کیمیسن.

کئچمیشه قاریشیب سئودا یمینیم،
بیر آندا اونوتدوم سنی- امینم.
قلبیمده قلبینه یوخ بئله کینیم،
منجه آرتیق سن ده هر کس کیمیسن.

گؤزلریم گؤزونده عشقی سئچمه‌ییر،
اونلاردان قلبیمه سئودا کئچمه‌ییر.
من یوردوم روحومو، بیرآز دا سن یور!
چونکی منجه ایندی هرکس کیمیسن.

یولونو گؤزلرکن داها دون گئجه،
بوگون ده قاچیرام سندن گیزلیجه.
قلبیمه باخدیم دا ایشده ایییجه،
آنلادیم کی سن ده هر کس کیمیسن.

بوس‌بوتون اونوتدوم سنی- امینم،
کئچمیشه قاریشدی ایندی یمینیم.
قلبیمده سنینچون یوخ بئله کینیم،
منجه سن ده ایندی هرکس کیمیسن.

#ناظیم_حیکمت
* بیر آز اؤنجه
#شعر_اوجاغی
@SheirOcagi

▫️بوغازاجان چیرکاب ایچینده اولان سیزلر الینیزی گؤیلره آچیب سمادان مرحمت دیله‌ییرسینیز.
هانی ائله بیر شیمشک کی، خیصلتینیزده‌کی اسکیک‌لیگی یاندیریب کوله دؤندرسین، روحونوزو نورا بله‌سین؟

📚 زردوشت بئله دئییردی.
#فردریش_نیچه
#شعر_اوجاغی
@SheirOcagi