▫️سالامات قال!

یولون سونونا گلدیک
بو سئوگی بوردا بیتر
یالوارما: گئری‌یه دؤن!
عوذرون گوناهدان بئتر

گؤزلریمین اؤنونده،
نه اَییل، نه ده آلچال!
آیریلدی یوللاریمیز.
من گئتدیم، سالامت قال!

بو بیر ایمتحان ایدی
حیات بیزی سینادی
گؤیلردن ائندیک یئره
سیندی عشقین قانادی

بو عشقین ذیروه‌سینه،
باجارسان یئنه اوجال
سنه اوغورلار اولسون
من گئتدیم، سالامات قال!

ایندی بیزه غم دولو،
خاطیره‌لر قالاجاق
بو طالع آجی‌سیندا
گؤزلریمیز دولاجاق

بو سئودانی اودوزدون
باشقا سئودانی قازان!
اونوت اولوب کئچه‌نی
من گئتدیم، سالامات قال!

اوره‌ییمله اوینادین
قدریمی سن بیلمه‌دین
حسرتیندن آغلادیم
گؤز یاشیمی سیلمه‌دین

سن ایدین بیر زامانلار،
هر شئیی ترسه یوزان.
الله بلانی وئرسین!
من گئتدیم، سالامات قال...!

#نصرت_کسمنلی
@SheirOcagi

▫️قوی اؤپوم یاناغیندان!،
یاناقلارین سئوینسین.
منه «سئویریم» سؤیله!،
دوداقلارین سئوینسین.

دئ هارا قاچاجاقسان!؟
یوللار قورتاران دئییل.
سنی گتیرن یوللار،
گئری آپاران دئییل.

قوی باخیم گؤزلرینه!،
دنیزی گتیر منه!
اوره‌یینی اووجوندا-
گول کیمی بیتیر منه...

گولومسه...! دوداقلارین-
گول آچسین، گول دریم من.
باخیشیمی کؤنلونه-
قوی ائلچی گؤنده‌ریم من...

#نصرت_کسمنلی
@SheirOcagi

‍ چاپیپ اؤز آتینی آغ آتلی گئتدی
آتلاری شیمشکدن قانادلی گئتدی
اوشاق یادداشیمی قاناتدی گئتدی
داها ناغیللارا اینانمیرام من...

ننه‌مین اینامی دردی ناغیللار
نامرده آلداتدی مردی ناغیللار
بیزی یوخولارا وئردی ناغیللار
داها ناغیللارا اینانمیرام من...

اوشاق اووتماغا بیر نوغول‌ایدی
سؤزلرده یاشایان بیر آغیل‌ایدی
یاخشی آداملاردا، بیر ناغیل‌ایدی
داها ناغیللارا اینانمیرام من...

"سیم- سیم"ی سؤزله یوخ، زورلا آچدیلار
تیلسیمی مین جوره یوللا آچدیلار
هیم- جیمی مؤهورلو قوللا آچدیلار
داها ناغیللارا اینانمیرام من...

"فاطما"لار آیاغی کندیرده قالمیر
خمیریمیز کوت گئدیر، تندیرده قالمیر
قارغالار تولکویه داها آلدانمیر
داها ناغیللارا اینانمیرام من...

آجی حقیقتلر بال دادیر ایندی
آریسی اولمایان بال ساتیر ایندی
کئچَلی ساچلیلار آلدادیر ایندی
داها ناغیللارا اینانمیرام من...

ائله یوخولاردا آتلار کیشنه‌‌دی
دیولری قازانا سالدیم پیشمه‌دی
گؤزله‌دیم گؤیلردن آلما دوشمه‌دی
داها ناغیللارا اینانمیرام من...

#نصرت_کسمنلی
@SheirOcagi

▫️عئينی شهـرده یاشایيریق،
نه اولسون؟!
سنی گؤره بيلمه‌یندن سونرا
نه فرقی،
یا قونشولوقدا اولاق،
یا هره‌ميز
دونيانين بير اوجوندا...؟!
آراميزدا بير حسرت دیواری وار.
من حسرتين بو طرفينده
سن حسرتين او طرفينده...

عئينی شهرده یاشایيریق،
نه اولسون،
عؤمروموزه عئينی سحر،
عئينی آخشام دوشور،
گونلریميز باليق کيمی سوروشور.
سنی گؤره‌بيلمه‌یندن سونرا،
ائولریميز حبس‌خانا کامئراسی،
لاپ ائله، بير آددیمدی آراسی...

عئينی شهرده یاشایيریق،
نه اولسون‌،
عئينی هاوانی اودوروق،
عئينی سودان ایچيریک،
عئينی دایاناجاق‌لاردان کئچيریک؛
عئينی یولدا،
موختليف ایستيقامت‌لره قاچيریق.
سنی گؤره‌بيلمه‌یندن سونرا
نه فرقی
یا ایلان کيمی سورونوروک
یا قوش کيمی اوچوروق...؟!

عئينی شهرده یاشایيریق،
نه اولسون،
شهر بيزیم شهریميز دئييل
نه‌ ده بيز بو شهرینيک.
یاغان یاغيش بيزیمدی،
گؤی اوزونده سرگردان گزن بولود بيزیمدی.
بير، آرایا دوشن حسرت،
بير ده اوميد بيزیمدیر.
بو شهرده،
نه سن منيمسن،
نه من سنين.
ایچينده ایـتيـب باتـميـشيـق
غصّه‌نين،
غمين،
بيریميز هيجران،
بيریميز حسرت داشيـيـریق.
هره‌ميز دونيانين بير اوجوندایيق.

سنی گؤره بيلمه‌یندن سونرا
نه اولسون، عينی شهرده یاشایيریق...؟!

#نصرت_کسمنلی
@SheirOcagi

▫️قار کیمی

قار کیمی آغ گلدیم، لکه‌سیز گلدیم
سس‌سیزجه یاغمیشدیم یوللارینا من.
من سنین عؤمرونه «بلکه‌»سیز گلدیم
ییغیلدین گوج کیمی قوللاریما سن.

بیتدی باخیشلارین نغمه‌سی، سؤزو
سوکوت، قوللاریندا گزدیردی بیزی
سویوقدور قار کیمی... نه دئییم، دوزو-
بلکه بو سویوقلوق بئزدیردی بیزی.

ایندی خاطیره‌نله یاناجاغام من
گولسن، گولوشونه بورونه‌جه‌یم
قار کیمی اووجونا یاغاجاغام من،
قار کیمی اووجوندا ارییه‌جه‌یم.

حسرتین قلبیمده دینیر تار کیمی،
نغمه‌لر دنیزدیر، ووصالین قاییق.
سن‌ده آی سئوگیلیم! گئتدین قارکیمی،
قاییتسان، قار کیمی لکه‌سیز قاییت...!

#نصرت_کسمنلی
@SheirOcagi

▫️بو دا سونونجو گون

بو دا سونونجو گون، سونونجو ویداع
بو دا آیریلیغین سونونجو تینی
قوزوم! هر گؤروشون سون اوجو ویداع
گؤروردوم بو گونو،
سنینله گؤروشون بیرینجی گونو...

«یولون اوغورلو اولسون» دئییرم سنه
قارشیندا عؤمور-گون سیناغی دورور
نه دئییم؟! بلکه ده یولوندا یئنه،
منیم تک بیر سئودا قوناغی دورور

گئدیرسن... بو گونو ساخلا یادیندا
یادداشین من وئرن درسی پوزماسین
سن ائله آلیش کی سنین اودوندا،
اؤتری قوناقلار قوی قیزینماسین!

قارشیمدا نه چپر، نه ده کی باری
منیم ده عؤمرومه بئله‌جه گلدین
قلبینده بیر چینقی اود ساخلا باری!
بلکه بیر چیراغی یاندیرا بیلدین

اییل...! محبتین اؤنونده اییل!
بلکه بو دونیادان قوپارا سنی
طالعین ائستافئت آغاجی دئییل،
هره بیر منزیله آپارا سنی.

بیر گون ده سربست‌لیک تاختی دئوریلیب
عؤمرونه گلینلیک ایللری گلر
دونیانین بیر نامرد دوستا چئوریلیب
صاباح کندیرینی دوغرایا بیلر

بو دا سونونجو گون، سونونجو ویداع
بو دا آیریلیغین سونونجو تینی
قوزوم! هر گؤروشون سون اوجو ویداع
گؤروردوم بو گونو،
سنینله گؤروشون بیرینجی گونو‌...

#نصرت_کسمنلی
کؤچوردو:
#شعر_اوجاغی
@SheirOcagi

▫️منیم بو شهرده کیمیم وار آخی؟!

منیم بو شهرده کیمیم وار آخی؟!
هر قاپی دؤیمه‌یه الیم گلمه‌ییر
اوزومو طالعه توتوب گئدیرم
طالع‌ ده همیشه اوزه گولمه‌ییر

آیاغیم آلتیندا، تانیش سکی‌لر
اؤنومده آچیلان منظره، بوزدور
چوخدان کؤهنه‌لیب‌دیر اَینیمده‌کی‌لر
نه قدر چیرپسام دا، یئنه ده توزدور

گؤزدن اوخویورام بیج تعریف‌لری
مقصدلی ساغلیق‌دیر حیرصیمی بوغور
کیمین‌سه باشلاییر حسد آغریسی
منیم‌چون تلفون هده‌سی دوغور

منیم بو شهرده کیمیم وار آخی؟!
طالعین وئردییی پایا، پاخیللیق
بویو کی من اؤزوم قازانمامیشام
آللاهین وئردییی بویا، پاخیللیق

منیم بو شهرده کیمیم وار آخی؟!
کؤهنه محبّتین قیز تانیشلاری
هر سحر گؤردویوم اویاق بیر یوخو
سالام تانیشلاری، اوز تانیشلاری

بیر ده ایلهامیمین تانیش نفسی
اونون دا کوسولو آنلاری چوخدور
هفته‌نین بئش‌گونلوک قازانج قفه‌سی
بس ائدیر... نفسیمین گؤزلری توخدور...

منیم بو شهرده کیمیم وار آخی؟!
بو عؤمرون سونونا گومانیم آزدیر
سیّاح آیاقلاریم، فهله اللریم
بیر ده کی دونیایا باخدیغیم گؤزدور

چیچکلری گؤرور، تیکانی گؤرمور
اوستونه فیرلانان سوکانی گؤرمور
اوشاق گولدورمه‌یه کؤکه آختاریر
الیندن آلینان تیکه‌نی گؤرمور.

یاخشیلار، یولوندا چیراق کیمی‌دیر
یامانلار تولکو تک پوسقودا دوروب
سئوینج‌ ده، بیر شوشه عاراق کیمی‌دیر
اونو دا وردیشلی عیّاشلار ووروب

سیزه گؤوه‌نیرم، یاخشی آداملار!
سیزین آدینیزا گلمیشم بورا
قارداش تک، اوغول تک، قورویون منی!
بیر اینسان عؤمرونو ووروم آخیرا...

منیم بو شهرده کیمیم وار آخی...؟!

#نصرت_کسمنلی
کؤچوردو:
#شعر_اوجاغی
@SheirOcagi

▫️اؤلومه طرف

گئدیریک دئیه-گوله
گئدیریک اؤلوم گیله
گئدر-گلمز یولدو بو
کیم قاییدا، کیم گله؟!
اؤلوم، قارشیلا منی!

پیادا...صبریمیز یوخ
ماشین قضاسی... نه چوخ!
حیات اوزوک ایچینده
هانسی طرفه قاچاق؟
اؤلوم، قارشیلا منی!

عؤمور، صینیف دفتری
سایلی‌دیر واراقلاری
الیمیز یئتمز اونا
تزه‌دن یازاق باری
اؤلوم، قارشیلا منی!

هله تئزدیر، ایگیدیم!
نه‌ییم وار، نه اویودوم؟
ایکی کؤرپه‌م گؤزله‌ییر
مؤهلت وئر قوی بؤیودوم!
گلیم، قارشیلا منی...!

#نصرت_کسمنلی
کؤچورمه:
#شعر_اوجاغی
@SheirOcagi

▫️اعتیراف

عؤمور-گون یولداشیما

فیکیرلی گلیرم، دالغین گلیرم
قایغیلی گؤزلرین، چکیر شکلیمی
بعضن گئج گلیرم، یورغون گلیرم
بیتیرسن قاپیدا بنؤوشه کیمی.

بلکه مین سوچومو بیلمیسن منیم
بیرینی اوزومه وورمامیسان هئچ
ایهاملا اوزومه گولموسن منیم
بیرجه یول اوزومه دورمامیسان هئچ

هر کس طالعی‌له گلیر حیاتا
دئمیرم اوره‌یی یومشاق اولموشام
دجل اوشاقلارا مولاییم آتا
سنینچون ان دجل اوشاق اولموشام

سنسن داغلار کیمی صبرله دؤزن
بلکه تردّودله، چوخ دؤیوشموسن
ایستی بیر سئوگیدن یازمیشام بعضن
سویوموش چاییمی سن دَییشمیسن

اوزومده کدردن بیر ایز گؤرنده،
شیرینیم اولموسان، آجیم اولموسان
قوهومدان، تانیشدان پیس اوز گؤرنده،
سن آنام اولموسان، باجیم اولموسان.

بیر کؤورک شعریمدن گؤزلرین دولوب
نه دئییم، اؤزگه‌دن چوخ یازیب قلم
نه قدر دویونلو گونوموز اولوب
دویونلو قاشینی گؤرمه‌میشم من

بیر الین مطبخده، قابدا- قاشیقدا
بیر گؤزون ایستیده، توستوده اولوب
بیر الین بئشیکده، اوغول-اوشاقدا
بیر گؤزون همیشه اوستومده اولوب

یوللار چارپاز-چارپاز، یوللار قاریشیق
گئجه یول گئدیرم قولاغی سسده
بیزیم پنجره‌دن سوزولن ایشیق،
گؤزونون نورو دور یولومون اوسته

فیکیرلی گلیرم، دالغین گلیرم
قایغیلی گؤزلرین چکیر شکلیمی
بعضن گئج گلیرم، یورغون گلیرم
بیتیرسن قاپیدا بنؤوشه کیمی...

#نصرت_کسمنلی
@SheirOcagi

▫️سن منی گؤره‌جکسن

منه درد وئریب گئتمه!
دردیمدن اؤله‌جکسن.
هارا باخسان قارشیندا،
سن منی گؤره‌جکسن.

بو پئشیمان یول‌لاردا،
آخیب گئدن سولاردا،
هر گئجه یوخولاردا،
سن منی گؤره‌جکسن.

غم دولو اوتاغیندا،
قوروموش دوداغیندا،
او منسیز یاتاغیندا‌،
سن منی گؤره‌جکسن.

دن دوشر قارا تئله.
گؤزیاشین دؤنر سئله.
گؤزونو یومسان بئله،
سن منی گؤره‌جکسن.

تویدا گولمه‌یه‌جکسن.
کؤنول وئرمه‌یه‌جکسن.
بَیی گؤرمه‌یه‌جکسن.
سن منی گؤره‌جکسن...

#نصرت_کسمنلی
@SheirOcagi

▫️یاشادی

بو سئوگی‌نین عؤمرو بئله قیسایمیش،
بنؤوشه‌تک بیرجه هفته یاشادی.
سئوینمه‌یه صبری بئله چاتمادی،
نه یاشادی، غم طرفده یاشادی.

بو تر غؤنچه آچیلمادان سولارمیش،
بو محبّت هانسی سمته یول‌ آلمیش؟
سئون‌لرین گونو قارا اولارمیش،
گؤرن کیملر سئویب کئفده یاشادی؟

او اورکدن گولدویوموز گون هانی؟
صداقتدن دانیشدیغین دیل هانی؟
بو سئوگینین سهو می دوشدو عونوانی؟
اؤز عؤمرونو ائله سهوده یاشادی...

#نصرت_کسمنلی
@SheirOcagi

▫️دئییل کی

اونوتمادی گؤزلرینی گؤزلریم،
منیم گؤزوم سنین گؤزون دئییل کی.
او یئرلری ناخیشلاییر ایزلریم،
منیم ایزیم سنین ایزین دئییل کی.

یالانلارا اؤیرتمه‌دیم دیلیمی،
منیم دیلیم، سنین دیلین دئییل کی.
هر یئته‌نه اوزاتمادیم الیمی،
منیم الیم سنین الین دئییل کی.

اوچوب گئتدین، سازاق دوشدو کؤنلومه،
منیم قلبیم، سنین قلبیم دئییل کی.
سن گولوش‌چون یارانیبسان، اینله‌مه!
منیم غمیم سنین غمین دئییل کی.

سن قارالتدین، من آغارتدیم ساچیمی،
منیم ساچیم، سنین ساچین دئییل کی.
ائشیدنلر باغیشلاییر سوچومو،
منیم سوچوم سنین سوچون دئییل کی.

یئره دوشدو اودلو سؤزوم، کؤزَردی،
منیم سؤزوم، سنین سؤزون دئییل کی.
قارشیلاشدیق، دیل سوسدو، اوز قیزاردی،
منیم اوزوم سنین اوزون دئییل کی.

سن یولونو دَییشدیردین بیر سحر،
منیم یولوم، سنین یولون دئییل کی.
بو هیجرانا دؤزه‌جه‌یم بیر تهر،
دؤزه‌جه‌یم، هیجران اؤلوم دئییل کی...

#نصرت_کسمنلی
@SheirOcagi

▫️دلی کیمی سئودیم گؤزل دلینی،
ال وئردیم، یاندیریب یاخدی الیمی.
سئچیب جومله‌لرین ان گؤزلینی،
تیتره‌ییب سؤیله‌دیم سؤزومو سنه،
سئودیره بیلمه‌دیم اؤزومو سنه.

حسرتی، ووصالی قوشا سئودیردیم،
اوشویَن اَینیمی قیشا سئودیردیم،
یالین آیاغیمی داشا سئودیردیم.
تانیدا بیلمه‌دیم ایزیمی سنه،
سئودیره بیلمه‌دیم اؤزومو سنه.

آلیشیب یاناردیم کؤز ایسته‌سه‌یدین،
بیر نغمه اولاردیم سؤز ایسته‌سه‌یدین.
منی گؤرمک اوچون گؤز ایسته‌سه‌یدین-
کور قالیب وئرردیم گؤزومو سنه،
سئودیره بیلمه‌دیم اؤزومو سنه.

سنه هر مکتوبو یازدیم قانیملا،
روحوملا، حیسّیمله، هَیجانیملا.
سئوینجله اؤلردیم، اگر بونونلا-
باغیشلاسایدیم من عؤمرومو سنه.
سئودیره بیلمه‌دیم اؤزومو سنه...

#نصرت_کسمنلی
@SheirOcagi

▫️بیزیم گؤروشوموز

سؤزلر نییه بئله قلبه دَییرلر؟
اورَکسیز گؤروشدن دویموشوق داها.
«فیل‌لر اؤلومونو دویور» دئییرلر،
بیز ده آیریلیغی دویموشوق داها.

گؤروش یئریمیزده یاشیل بورونن-
او آغاج، جیلدینی قوش‌تک اوچوردو.
سون ایکی یارپاغی بیز ایدیک دونن،
بیزی ده محبّت پاییزی ووردو.

کولک یارپاقلاری گزدیریر وئییل،
کؤهنه یورد یئری‌می گؤروش یئریمیز؟
تؤکولن یارپاق‌می؟... یوخ، یارپاق دئییل،
یاغیر اوستوموزه گیلئی‌لریمیز.

چوخدان اوخوموشوق گؤزلریمیزی،
گؤزلر ایسته‌یینی آزدیرا بیلمیر.
بوز کیمی سویوموش سؤزلریمیزی-
اودلو دوداقلار دا قیزدیرا بیلمیر.

بیز گؤروش یئرینه آیاق دؤیوروک،
هارداسا سئوگینین قیریلیب سسی.
بازار ائرته‌سینه «آغیر» دئییریک،
هر گؤروش بیزیمچون بازار ائرته‌سی.

سؤزلر نییه بئله قلبه دییرلر؟
اورکسیز گؤروشدن دویموشوق داها.
«فیل‌لر اؤلومونو دویور» دئییرلر،
بیز ده آیریلیغی دویموشوق داها‌...

#نصرت_کسمنلی
#شعر_اوجاغی
@SheirOcagi

▫️باغلایا بیلسن!

دئ، کیم ساخلایاجاق منی بو یولدان؟!
باغلا یوللاریمی، باغلایا بیلسن!
ال آچیب محبّت دیلَنمه‌دیم کی،
باغلا قوْللاریمی، باغلایا بیلسن!

بو سئوگی کؤهنه‌دیر، بو اولفت یئنی،
بال بیلیر، سن وئرن غوصّه‌نی، غمی.
اؤلدورسن، روحوم‌ دا سئوه‌جک سنی.
باغلا دیللریمی، باغلایا بیلسن!

دنیزم، دالغاما برَن دوشوبدو،
ساچلارین کمنددیر، گؤرن دوشوبدو،
گوللریم باغچامدا پرَن دوشوبدو.
باغلا گوللریمی، باغلایا بیلسن!

گون گلر، عینادیم هئی یورار سنی،
حسرت منیم کیمی سولدورار سنی،
کوْر اولسام، اللریم آختارار سنی.
باغلا اللریمی، باغلایا بیلسن!

سئوگی‌سیز بیر اورک، ائوسیز یئتیم‌دی،
سنسیز یاشاماغیم منه چتین‌دی،
بو دونیا اوّلدن اؤلوم-ایتیم‌دی.
آغلایارسان منه، آغلایا بیلسن!...

#نصرت_کسمنلی
@SheirOcagi

▫️من سنی

یازیمی گؤروبسن، قیشیمی گؤرمه!
گؤزلریمله اوشودَرم من سنی.
گول‌تک اسمه‌یینه اوره‌ییم دؤزمز،
نفسیمله ایسید‌َرم من سنی.

گیرمه بو دریایا، گمین باتاجاق!
غملریم ایچینده غمین باتاجاق.
پیچیلدا آدیمی، سسین چاتاجاق،
اوره‌ییمله ائشیدرم من سنی.

دردین نئچه اوزو وارسا بیلیرم،
کدریمین آجیغینا گولورم.
ائله بیلمه من دردیندن اؤلورم!
مین بیر درده توش ائدرم من سنی.

دوستا اوجاق، دوشمنیمه آیازام،
سؤزوم بیتمز، ها سؤیله‌یم، ها یازام.
من ائله بیر قاسیرغالی پاییزام،
باهارینی قیش ائد‌رم من سنین...

#نصرت_کسمنلی
@SheirOcagi

‍ ▫️باغلایا بیلسن!

دئ، کیم ساخلایاجاق منی بو یولدان؟!
باغلا یوللاریمی، باغلایا بیلسن!
ال آچیب محبّت دیلَنمه‌دیم کی،
باغلا قوْللاریمی، باغلایا بیلسن!

بو سئوگی کؤهنه‌دیر، بو اولفت یئنی،
بال بیلیر، سن وئرن غوصّه‌نی، غمی.
اؤلدورسن، روحوم‌ دا سئوه‌جک سنی.
باغلا دیللریمی، باغلایا بیلسن!

دنیزم، دالغاما برَن دوشوبدو،
ساچلارین کمنددیر، گؤرن دوشوبدو،
گوللریم باغچامدا پرَن دوشوبدو.
باغلا گوللریمی، باغلایا بیلسن!

گون گلر، عینادیم هئی یورار سنی،
حسرت منیم کیمی سولدورار سنی،
کوْر اولسام، اللریم آختارار سنی.
باغلا اللریمی، باغلایا بیلسن!

سئوگی‌سیز بیر اورک، ائوسیز یئتیم‌دی،
سنسیز یاشاماغیم منه چتین‌دی،
بو دونیا اوّلدن اؤلوم-ایتیم‌دی.
آغلایارسان منه، آغلایا بیلسن!...

#نصرت_کسمنلی
@SheirOcagi

‍ ▫️بو سئودا

ناحاقدان دویموشام، من حاق گزیرم،
باشیما بیر بلا، گوناه گزیرم.
من کی محبّتدن اوزاق گزیرم،
هاردان اوره‌ییمه دولدو بو سئودا؟!

درده اَییلمزدیم، عشقه اَییلدیم،
بو عشقی تانرینین جزاسی بیلدیم.
من کی بو سئوگی‌یه حاضیر دئییلدیم،
گول کیمی الیمده سولدو بو سئودا.

یئنه من اولمادیم اولفتی قیران،
سئودیم‌می، عشقیمده اؤلونجه وارام.
کدری بیر دونیا، سئوینجی بیر آن،
منی بلالارا سالدی بو سئودا.

تک‌لییه سن نئجه دؤزوردون، آللاه؟!
بو عشق‌له قبریمی قازیردین، آللاه!
اؤزونه شریک‌می گزیردین، آللاه؟!
سنه ایسته‌ییمی بؤلدو بو سئودا...

#نصرت_کسمنلی
#شعر_اوجاغی
@SheirOcagi