▫️من عالمه منّت چكيرم يار هوسينده
ياريم سا گزير شوقيله اغيار هوسينده

بيلمم بو نئجه سیرردير-حكمتدير ازلدن
بولبول گوله مايیل، گول اولور خار هوسينده

مئی اوخشاماسا لبلرينه قيرميزيليقدا،
بير كيمسه تاپيلماز مئی گولنار هوسينده

هر گون اوزونو گؤرمه‌یه حسرت چكير عالم
گول فصلی اولار، ائل هامی گولزار هوسينده

بيلمم نه گؤروب زولفده مجنون كيمی كؤنلوم
سرگشته دير او طرّه‌ی طرّار هوسينده

عاشیق سئوير او شوخی، تعججوبلی بو دور كی
يوزلرجه گؤزللر ده اونون وار هوسينده

«واحید!» يئنه قيمت چوخاليب يوسف شعره
گؤوهر ساتيلار، اولسا خريدار هوسينده...

#علی‌آغا_واحید
@SheirOcagi

▫️ائی عاشق بیچاره!

مجنونه دئین یوخدور «ائی عاشق بیچاره
لیلی‌له نه کارین وار قویسون سنی آواره؟!»

عشق عالمی عشّاقه بیر وادی محنت دیر
فرهادی سالیب داغه، منصوری چکیب داره

پایان غمِ عشقی تفسیره نه حاجت وار؟!
گؤر بیر نئجه پروانه شوقیله یانیر ناره!

دونیا اوقدر لیلی-مجنون یئتیریبدیر کی
سایسان نه قدر گؤیده وار ثابت و سیّاره

هر لاله‌رخ عشقینده، اؤز باغرینی قان ائتمه!
هر دردی چکر بولبول، گول قسمت اولار خاره

بی مهر گؤزل‌لردن، عالمده وفا اومما!
مئیلین سالاجاق بونلار آخر یئنه اغیاره.

«واحید» بیز اؤلوب گئتدیک مهریله، محبّت‌له
دونیا دؤنه‌جک بیر گون بیرصفحه‌ی گولزاره...

#علی‌آغا_واحید
@SheirOcagi

▫️نئیله‌یه بیللم؟!

طالع منه یار اولماسا، من نئيله‌یه بيللم؟
ذؤوقومجه نيگار اولماسا، من نئيله‌يه بيللم؟

بير آهو باخيشلى گؤز‌َله چوخدان اسیرم،
آهیملا شیکار اولماسا، من نئيله‌يه بيللم؟

ميخانه‌ده همدم منه مئى جامى الينده،
بير لاله‌عوذار اولماسا، من نئيله‌يه بيللم؟

مردليک‌له، صداقتله گؤزل دوست يولوندا،
بير جان كى نثار اولماسا، من نئيله‌يه بيللم؟

يوز ايل ياشاييب، بيرجه گون عؤمرومده فلكدن،
كاميمجا مدار اولماسا، من نئيله‌يه بيللم؟

من بير گول اوچون یالواریرام خاره همیشه،
گولدن او کنار اولماسا، من نئيله‌يه بيللم؟

مهپاره‌لرین جؤورونو چکمک‌لیگه «واحید!»
کؤنلومده قرار اولماسا، من نئيله‌يه بيللم؟....

#علی‌آغا_واحید
@SheirOcagi

▫️سئوگینی یاشایا بیلمه‌دیم سنسیز
عؤمور اؤتوب گئدیب مندن خبرسیز.
#نایل_زئینی‌یئو

بو شعری ده یازدیم الویداع کیمی،
باخ ائله بو سطریم سون ویداع کیمی.
#قشم_نجف‌زاده

سنی اونوداردیم یقین بیر آخشام،
بوتون اونودانلار اونودولسایدی.
#ذوالفوقار_روفت‌اوغلو

بیر دوشون، بیر داشین، گؤتور-قوی ائله
منی اونوتماغا تلسمه هله.
#علی_اوسط_سالداش

گئدن چیخار‌ گئدر، نه کوس، نه داریخ،
گلر بیر اؤزگه‌سی توتار یئرینی.
#فیردووسی_رسول

او خوش آرزولاردان الیمی اوزدوم،
یاشاسام دا بیردی، اؤلسم ده بیردی.
#آنار_حبیب‌اوغلو

بیر گون، گؤزه‌لیم، قبریمین اوستن اؤتوشرسن،
دردیندن اؤله‌ن عاشقینی باشه دوشرسن.
#علی‌آغا_واحید

بلکه مندن سنه بیر قورو حسرت،
بلکه سندن منه یالان قالاجاق.
#مممد_ایسماییل

آغریلار سونونجو منزیله قالماز،
ایچر گؤز یاشینی، بیر گیله قالماز
#طالعه_مانصور

🎬 فیلم: #پارک
#شعر_اوجاغی
@SheirOcagi