☘تانرینین قیلینجی☘



تورکچولر غیرتلی انسانلاردیلار
چوخ ایگید، چوخدا دلی قانلاردیلار

حق دیکلدیب بونلاری پان قارشینا
حق سئون دوزگون مسلمانلاردیلار

سانمایین سیز بونلاری بیر درد کیمی
بلکه بونلار درده درمانلاردیلار

اسلامین کسکین قلینج آسلانلاری
کفره قارشی محکم ایمانلاردیلار

قورد کیمین، زنجیرلره باش قویمایان
تسلیم اولماز اؤزگور اوغلانلاردیلر

مظلومون قارشیندا سولماز بیر چیچک
ظالمین قارشیندا طوفانلاردیلار

آللادانماز قورتدوقانلار بونلاری
هر دیله واقیف سلیمانلاردیلار

گون به گون آرتیر بو حقین لشگری
چونکی بونلار سلم و تورانلاردیلار

بونلارین تا حشره‌جک مسکن‌لری
باشدا توران دیبده ایرانلاردیلار

ایرانین تاریخی یوخ تورک اولماسا
کیم دئییر ایراندا مهمانلاردیلار؟

ایرانی تهدید ائدن تورکلر دئییل
ایرانی محو ائیله‌ین پانلاردیلار

حق کسرایراندا پان فارسین کؤکون
چون بولار اسلامه عدوانلاردیلار

حفظ ائدر حق کؤلگه‌سینده تورکلری
چونکی حق پیمانلی آسلانلاردیلار

ائل بیلیر،عالم بیلیر،آللاه بیلیر
تورکچولر اسلامه قوربانلاردیلار

آذری آدلاندیرانلار تورک ائلین
اوزده یولداش دالدا دوشمانلاردیلار

قالدیرانلارعرشه عثمان کؤینه‌یین
طلحه لر تک خسته پیمانلاردیلار

شر سالان ایراندا میللت‌لر آرا
اجنبی یوووسونلو حیوانلاردیلار

فارس دیلین افضل توتانلار اؤلکه‌ده
انسانین جیلدینده شیطانلاردیلار

ایرانین میللت‌لری قارداشدیلار


هاممیسی بیر کؤکلو انسانلاردیلار
..........................................
#روزبه_صمدی_نیراوغلو
#شعر_اوجاغی





@text_turk
telegram.me/text_turk

سازلی سؤزلو شاعیریمیز موغان اوغلو جنابلارینا
......................................
من نه دئییم بختیارین سؤزوندن
سؤز دئییل کی جاندان قوپان کؤزدو بو
نه سؤیله‌ییم خزر تئللی سازیندان
دالغا دؤشلو، اینجی دولو سؤزدو بو
.......................................
دورنا گؤزلو قوشمالاری ایچمه‌لی
گرایلی‌سی اینجی کیمی سئچمه‌لی
ماهنی‌لاری دولوب دنه، بیچمه‌لی
گؤرون نه‌لر ائل ساپینا دوزدو بو
....................................
سانکی منیم ایچریمدن دانیشیر
قونانیمدان کؤچریمدن دانیشیر
صاباحیمدان کئچریمدن دانیشیر
ائله بیل کی اؤره‌ییمده گؤزدو بو
.....................................
کرم کیمی ناله چکیر دؤشوندن
آتیمش ایلدیر آسلانیبدی دیشیندن
خبریم وار امه‌ییندن ایشیندن
من بیلیرم درده نئجه دؤزدو بو
...................................
نئجه دویدوم خسته‌لنیب قارداشیم
اؤز سؤزومه باخمادی اؤز گؤز یاشیم
بو نه خبر، بو نه سؤزدو یولداشیم
دئمه بیرده، اوره‌ییمی اوزدو بو
...................................
آی «نیراوغلو» بو دونیا غمخانه‌دی
ائل اوغلونا اؤلوم بیر بهانه‌دی
گلدین گؤردون قارداشیوی دای نه‌دی
موغان اوغلو اؤلمویه‌جک دوزدو بو
.........................................

#روزبه_صمدی_نیراوغلو
#شعر_اوجاغی
27/8/95


🌍دونیا تورک شاعیرلرینین سئچیلمیش شئعیرلری

┏━━━━📝━━━━┓
🆔 @text_turk 👈
┗━━━━📝━━━━┛

telegram.me/text_turk

▫️چیرکین فوتبال

فوتبال‌ دا سیاست تورونا دوشدو، پوخ اولدو
قانون دولانیب، هر نه‌ییمیز سوخ ها سوخ اولدو

تبعیضلر الیندن ائلیمیز زینهارا گلدی
حقّ اؤلدو، حقیقت‌ ده، عدالت‌ ده یوخ اولدو

بیز هر نه قول آتدیق تورا، آفساید حساب اولدو
داور ده جیبین دالدادا دولدوردو، توخ اولدو

تهرانلیلارین کینه‌سی مئیداندا گول آچدی
بیز حق‌ ده دئدیک، دؤولته زهر ایله اوخ اولدو

پنچرله‌دیلر، قالدی گئنه دالدا تیراختور
تهران‌ تیمینین سورعتی جئتدن ده چوخ اولدو

قورقور قوخویور لئش کیمی ایرانداکی فوتبال
موردار کیمی ورزیش‌ ده، بورون‌لاردا قوخ اولدو

بوندان بئله دای فوتبالا باخماز بو «نیراوغلو»
فوتبال‌ دا سیاست تورونا دوشدو، پوخ اولدو.

#روزبه_صمدی_نیراوغلو
@SheirOcagi

‍ ▫️«دؤلت وکیللری»نه:


بئله کی شیللاق آتیر کاتدا حسن،
اولاجاق تورکو دانیشماق قدغن.

حئیرانام دؤلتینین کینه‌سینه.
نه دئییم من بئله کابینه‌سینه؟!

گونده بیر نقشه چکیرلر بیز اوچون؛
اردبیل، اورمیه، خوی، تبریز اوچون.

آنادیللر، گؤزونه بیر اوخ اولوب.
آنا قانون، ائله بیل کی یوخ اولوب.

گؤتوروب اسرائیلین نقشه‌لرین،
سالدیریب مدرسه‌لردن گوذرین.

بیلمسه فارسینی گر تورک اوشاغی،
اولاجاق روتبه‌ده ایتدن آشاغی.

بو خاخامدیر یا مسلمان؟ نه بیلم!
بوندا وار ذرّه‌جه ایمان؟ نه بیلیم!

چون کوروش دان آغانین نیسبتی‌وار،
ایرانی، فارس ائله‌مک نیّتی‌وار.

بیر سؤزوم واردی نماینده‌لره:
هوپ توتون! یوخسا گلرسوز نظره.

مجلیس، اوغلان - دَلی قانلار یئری‌دی.
اولو ستّار کیمی سردار یئری‌دی.

دئییرم من سیزه: «دؤلت وکیلی»
چون یاراشمیر سیزه «میلّت وکیلی»

آی «نیراوغلو»! بو قدَر کی قانیریق،
چیخاجاق جیزدیغیمیز، چون یانیریق...

#روزبه_صمدی_نیراوغلو
12/خرداد/ 98
@SheirOcagi

▫️اؤز اؤزومو یئییرم

من ایللردی بو زینداندا اؤز اؤزومو یئییرم
بیر بوشقابدا، بیر لیواندا، اؤز اؤزومو یئییرم

فرق ائله‌میر یا زینداندا، یادا چؤلده، یا ائوده
هر مکاندا، هر زاماندا، اؤز اؤزومو یئییرم

من یوخودا اؤزگه‌سیله گؤرسم نازلی سئوگیلیم_
قدم وورور خیاواندا، اؤز اؤزومو یئییرم

سؤز توخانیب اوره‌ییمه گوزگو کیمی سینمیشام
یئییتمه تک، دیشیم جاندا، اؤز اؤزومو یئییرم

سنسیز، گولوم! جهنّمین بیر ایلی‌دیر بیر گونوم
بولبول کیمین بو هیجراندا اؤز اؤزومو یئییرم

گل ساچینی سار بوینوما، ایسته‌سنده دارا چک!
سن بیله‌می سایمایاندا، اؤز اؤزومو یئییرم

سنسیز فلک نه یه گرک؟! گرگیمسن سئوگیلیم!
سندن اوزاق بو اورماندا اؤز اؤزومو یئییرم

ائلیمیزده بیر مثل وار «قورد نه گزر؟ دومانلیق»
قوردوم اؤلوبدور دوماندا، اؤز اؤزومو یئییرم

یاغیش یاغمیر قوراقلیقدا، الیم بوشا چیخیبدیر
آج - یالاواج، بیاباندا اؤز اؤزومو یئییرم

«نیراوغلو»نون ان سئویملی توکَنمه‌یَن ایسته‌یی‌!‌‌‌‌‌‌‌
سن هارداسان، من هایاندا؟ اؤز اؤزومو یئییرم...

#روزبه_صمدی_نیراوغلو
9/آبان/97
@SheirOcagi

▫️وزیرلر داریخیر

آی جماعت، یئمه یین! چونکو وزیرلر داریخیر
باهالیقدان دئمه یین! چونکو وزیرلر داریخیر

امر ائدیبلر بیزه چین خلقی کیمین آزجا یئیَک
تویوق اولمازسا، پیشیک، عقرب، ایلان صرف ائله یک

یوخسا یئرده نه قالار اوغرولارین چال_چاپینا؟
بیز یازیق میلّتی، دؤولت سارییبدیر ساپینا

عورضه‌سی یوخدو وطن ساخلاماغا، خلقی چاپیر
تندیرین ایستی گؤروبدور کی، بو جور هر نه یاپیر

بیزی آللاه یارادیب دونیادا غم چکمک اوچون
دایماً برده کیمین ظولم و ستم چکمک اوچون

بیز آج اولدوق، آغالار قویدو اتی آغ لاواشا
عؤمروموز موفته یئره دَیدی داشا، چیخدی باشا

آی «نیراوغلو»! باشینی آت یئره، یات، بی خیال اول
نه گؤزلدیر اؤله سن، یا اولاسان دونیادا خُل

21/خرداد/98
#روزبه_صمدی_نیراوغلو
@SheirOcagi

▫️به دئدیم سن گلدین...

قاپی تیققیلدادی بیردن؛ به دئدیم سن گلدین
سئوگی داشلاندی اورکدن، به دئدیم سن گلدین

تئز دورارکن قاپینین ایشگیله‌سین ردّ ائله‌دیم
قاپیدان قاچدی دومان-چن، به دئدیم سن گلدین

یئنه آغ کؤرپه‌لرین ساچلاریما دوزدو بولود
جوم-جولوق اولدو بو خرمن، به دئدیم سن گلدین

باغدا یارپاقسیز آغاجلار یئنیدن گول‌لندی
اولدو کؤیشن یئنه گولشن، به دئدیم سن گلدین

غم-کدر قالمالدی، باشلاندی بو باغریمدا سئوینج
گولشنه چؤندو بو کؤیشن، به دئدیم سن گلدین

سن دئدین بایراما گللم ، نئچه بایرام کئچدی
ائله بایراملادی بهمن، به دئدیم سن گلدین

ساچلارین دوشدو منیم بوینوما، ظولمت قویودا
گولدو روحومدا کی بیژن‌، به دئدیم سن گلدین

بیر زامان درده دَیر، ساخلا «نیراوغلو»ن گؤزلیم!
قاپی تیققیلدادی بیردن، به دئدیم سن گلدین...

#روزبه_صمدی_نیراوغلو
@SheirOcagi

▫️بایراملیق

دونقوز گئدیر، سیچان گلیر
خورتدان گئدیر، خوخان گلیر

کئچن ایل چوخ یامان اولدو
بوغدا سپدیک، سامان اولدو

آیی گئتدی، قابان گلدی
سئل گئتمه‌میش، دومان گلدی

ائولر اوچدو زلزله‌دن
اؤلوم یاغدی ولوله‌دن

کیبریت ووردو بیر دلیمیز
اوددا یاندی جنگلیمیز

بئنزین اولدو اوچ مین تومن
هئچ بیلمه‌دی کاتدا حسن

باهالیقدان قیرغین اولدو
یازیق وطن غمه دولدو

آلچاق اولدو دیواریمیز
شهید اولدو سرداریمیز

الدن گئتدی نئچه جاوان
طیاره‌میز دوشدو یامان

تحریف‌لردن دای نه دئییم،
عؤمور اولدو ضای، نه دئییم؟!

ظولوم چکدیک بیر ایل اینان
سون گون‌لرده کورونادان.

رحم ائیله‌سین آللاه بیزه
تا گلمه‌یک یامان گؤزه

پیس گون‌لری داش ائیله‌سین
یئنی ایلی خوش ائیله‌سین

یوردوم ائلیم شاد یاشاسین
آغزی دولو داد یاشاسین

قان‌سوران‌لار بئکئف اولسون
«نیراوغلو» دا کئفه دولسون...

#روزبه_صمدی_نیراوغلو
@SheirOcagi

‍ ▫️سئوگی قوربانی

گئنه‌ده بیر خبر ایچیمی یاخدی
ائله بیل باشیمدا داش سیندیردیلار
بیر یئنی گول آچمیش داغ بنؤوشه‌سین
یازین قوجاغیندا یاش سیندیردیلار.

هله‌ده، هله‌ده بیزیم بو یئرده،
چوخ یول آنلامازلیق غیرت ساییلیر
آیاق آلتدا قالیر قانون، دیانت
دانقاز تعصّب‌لر عزّت ساییلیر.

جان-جان یازیق بالا، سئوگی قوربانی!
توی-بوساط گؤرمه‌دن قانا بلشدین
آتانین کور اولدو ندن ویجدانی؟
گؤره‌سن اوره‌یی تاپارمی تسکین؟

هله‌ده چوخ زامان بیزیم اؤلکه‌ده،
حاقسیز ساییلیرلار یازیق قادینلار
نه قدَر جهل وار بو یئر اوزونده،
گئنه عقله سیغماز ایشکنجه‌لر وار.

آتا جهل اوراغین چکدی سونبوله
اینسان جان جییارین نه‌جور اؤلدورر؟
لیلی‌سیز مجنون دا دوشدو چؤللره
آرتیق یاشاسا دا نه‌جور گون گؤرر؟

گئنه‌ده غم کدر چؤکدو داغلارا
«نیراوغلو»ن آغلاتدی بو درد، بو غوصّه
گئنه چور داراشدی گوللو تاغلارا
یانیرام بیر کیمسه مظلوم اؤلنده...

#روزبه_صمدی ( نیراوغلو)
7/خرداد/99
@SheirOcagi

‍ ▫️قلم
طنز
#قلم_گونو مناسیبتینه

بیز یازان سؤزلره ارزیش قویولور هاردا، قلم؟!
عالیمه، علمه باخان یوخ، دَییرسن کاردا قلم!

ایندی اینسانلارا ارزیش گتیرن پولدو فقط
بوش جیبیشدانلارا ارزش قویولور هاردا، قلم؟!

کیمدی ارزیش وئرن ایراندا قلم صاحیبینه؟
سیندیریبلار سنی‌ ده کوچه و بازاردا، قلم!

ایستیرم شعری آتان تک، سنی‌ ده گؤزدن آتام
قاچیرام، یوخدو وفا ایندیکی دیلداردا، قلم!

من اؤلوم مندن اوزول آرواد-اوشاق صاحبی‌یم!
قورخورام بوینومو بیرگون هؤره‌سن داردا، قلم!

من نه ایدیم ائلیمین دردینی تکلیکده چکم؟
سن قودورتدون منی، سالدین اودا انظاردا، قلم!

قالمیشام آرواد-اوشاق دانلاغینین آلتدا بوگون
لاپ جاوانکن باشیمی قویلامیسان قاردا، قلم!

اؤزگه‌لر پول قازانیب، من ده کتاب باغلامیشام
ائو یوخومدور، یاتیرام چوخ گئجه بولواردا، قلم!

چوخ دا قرآن‌دا بیزی وصف ائله‌ییب آللاه اؤزو
دوشموشوک تورپاغا ایران‌دا کی آماردا، قلم!

ساتیرام، بلکه الیندن قوتارا خسته جانیم
قویموشام شکلینی اینترنته «دیوار»دا، قلم!

منه یوخ، خئیرین اگر وارسا آپار اؤزگه‌یه وئر!
یازدیغیم چوخلو کیتابلار قالیب آنباردا، قلم!

آمما نئیلیم کی هؤرولموش جانیمیز بیر-بیرینه
ایستمزدن بئله یازدیم سنی اشعاردا، قلم!

سن یازیق، من‌ ده یازیق، کیم بیزه جان یاندیراجاق؟
گل‌گیلن غملری دوز دفتره، منقاردا، قلم!

عیبی یوخدور، بئله‌دیر طالعیمیز، نئیله‌ملی؟
قوی یئتیشسین باشا اعمالیمیز ایثاردا، قلم!

بیز اؤلندن سورا هیکل تؤکه‌جکلر بیز اوچون
پخش اولار آگهیمیز درگیده اخباردا، قلم!

توتدوغوم یولدا گؤزل، چوخلاری تک قویدو منی!
سن «نیراوغلو»ن باری تک قویما بو یوللاردا، قلم!

#روزبه_صمدی_نیراوغلو
14/ 4 / 99
@SheirOcagi

طنز شعر

▫️ایمام زامان شهری

قوربان اولوم بو دؤولتین هوشونا،
قیزیل تؤکور میلّتینین آشینا.

میلّتیمیز آرخاییندی، کئف چکیر،
سون قویوبلار گؤزوموزون یاشینا.

بختورلیک گؤر نه قدر چوخالیب،
یول چکیرلر ساوالانین باشینا!

چیخماق اوچون ساوالانین باشینا،
بوندان بئله مینه‌جه‌ییک ماشینا.

باخاجاغیق ساوالاندان دونیانین-
باهارینا، پاییزینا، قیشینا.

نه گؤزلدیر بیزیم عزیز اؤلکه‌میز!
داش دَیمه‌سین تویوغونا، قوشونا!

اؤلکه‌لرین عاغیللیسی، روتبه‌ده-
چاتا بیلمز یوردوموزون چاشینا.

اوغورلوق یوخ، دوغرولوق، یوخ بو یئرده،
یالان سؤزدو دئییرلر بوش-بوشونا.

بیزیم اؤلکه ایمام زامان شهری‌دی،
دن دوشمه‌سین ساققالینا، قاشینا!

بیز نه اوچون گرک کؤچک خاریجه؟
دونیا گرک بیزیم یوردا داشینا.

کئشکه عؤمور مین اولایدی بو یئرده
آللاه باخسین میلّتین «ائی کاش»ینا.

آی «نیراوغلو!» دوغرودان بو اؤلکه‌نین
قوربان اولوم دؤلتینین هوشونا...

#روزبه_صمدی_نیراوغلو
@SheirOcagi