▫️باخسانا!

یوخ! یوخ! بو آداملار اوّلکی دئییل،
بو اوزلر اوّلکی دئییل؛ باخسانا!
داغلار بیر-بیرینین خطرینه دَییر،
داشلار بیر-بیرینی یئییر، باخسانا!

اؤیولن اۇلاق‌دی، سؤیولن آت‌دی.
طایفا معرکه‌لر آبیر سۏیدورور.
هر کلّه بیر الده «حاجی موراد»دی،
هر ال بیر کلّه‌ده قیام اویدورور.

اؤتور شامانلارین شوران لایلاسی،
چادیر بولبوللری آرتیر، باخسانا!
منیم خالقیم! لارین خور کاپئللاسی،¹
خالقی خانالارا دارتیر² باخسانا!

طاماح دؤیَجله‌ییر³ بوش آداملاری،
گؤز گؤزه قایناییر، دیل دیله بیشیر.
گلیر ایش باشینا ایش آداملاری،
روشوَت نیکاح کیمی قانونی‌لشیر.

اوجوز بیتن‌لرین کولَشی باها،
چاپیر کورسولرده شؤهرت آجلاری.
شاعیرلر سؤزوندن آسیلمیر داها،
سارایدا یالمانیر⁴ دار آغاجلاری.

ارینمز ار سؤزه «ارن دره‌سی»،
دَییرمان یئرینده «جونون» آغلاییر.
سؤزون «کوراوغلو»سو، «صابیر» نعره‌سی،
سؤزون «فضولی‌»سی «مجنون» آغلاییر.

باخسانا! بو اوزلر اوّلکی دئییل،
بو سؤزلر اوّلکی دئییل، باخسانا!
داغلار بیر-بیرینین خطرینه دَییر،
داشلار بیر-بیرینی یئییر، باخسانا!

هله چوخ گوناهین یئری آغ قالیب،
هله کئف گؤیَردیر هر سؤنن اوجاق.
بو گونو گولن‌لر ائله چوخالیب،
بیلمیرم صاباحی کیم آغلایاجاق.

#رامیز_قوسارچایلی
¹- چالغیچی و چالغی آلتلریندن عیبارت اولان قروپ
²- زورلا چکمک
³- بیر شئیله دؤیمک- وورماق
⁴- باش اَیمک- یالتاقلیق ائتمک
#شعر_اوجاغی
@SheirOcagi

▫️بو یاز چیچک‌لمه، اریک آغاجیم!

نه گؤیَرت بو دردی، نه لکدن کئچیر،
سیلکه‌له، چالخالا، الکدن کئچیر!
داها گولدن کئچیب، چیچکدن کئچیب،
بو یاز چیچک‌لمه، اریک آغاجیم!

اویاتما، قوی یاتسین یاتان دردلری،
کؤز-کؤز اوره‌ییمی چاتان دردلری.
گؤردوم چیچه‌یینی آتام، دردلرین!
بو یاز چیچک‌لمه، اریک آغاجیم!

بو درد قایا-قایا، داش-داش گول‌لنیر،
داش-قایا اوستونده ساواش گول‌لنیر،
یییه‌سیز یورد یئری یاواش گول‌لنیر،
بو یاز چیچک‌لمه، اریک آغاجیم!

#رامیز_قوسارچایلی
#شعر_اوجاغی
@SheirOcagi

▫️آغلاما!

آغلاییرسان، ایندی آغلا،
منی اؤلنده آغلاما!
قبریم اوسته گوللر سولوب-
خزان گلنده آغلاما!

سیخیلما یاس ساخلایاندا،
گئییب قارا باغلایاندا!
آغلا دوشمن آغلایاندا،
دوستلار گولنده آغلاما!

گؤزل داوران، گؤزل اینله،
داریلما درد گؤزَلین‌له!
گؤز یاشینی اؤز الین‌له،
اؤزگه سیلنده آغلاما!

اؤز طامی وار، اؤز تهَری،
اؤلوم عؤمروم سون بهَری.
گیزله گؤزوندن قهَری،
گؤزون بیلنده آغلاما!

آخشام شری، سحر دانی،
سنینله بؤلدوم هر آنی.
سونونجو دفعه دونیانی،
یاری بؤلنده آغلاما!

#رامیز_قوسارچایلی
#شعر_اوجاغی
@SheirOcagi

▫️آ بنؤوشه‌م منیم!

او نه بویلانیشدی، دولموسان یئنه،
آ بنؤوشه‌م منیم، سۆسَنیم منیم!؟
اؤزو بو دونیانی سئودیریب منه،
اؤزو بو دونیادان کۆسَنیم منیم!

گؤر بولاق دره‌یه نه دیل آچدیریب!
تنها داشلارا دا کؤنول آچدیریب.
حسرتی گؤزومده گول-گول آچدیریب،
غؤنچه دوداغینی بۆزَنیم منیم.

گئجه‌لر رنگ آلیر قارا تئلیندن،
قارا منسیزلیگی دارا تئلیندن!
دوشوب اوره‌ییمه یارا تئلیندن،
تئل-تئل اوره‌ییمی اۆزَنیم منیم!

درده ده تک دؤزور جانیم، جان کئچیب،
غوروبا ائنیرسن دانیمدان کئچیب.
اۆز-اۆزه گلنده یانیمدان کئچیب
منی یوخولاردا گزَنیم منیم!

ائه... بو دا بیر عشقین آیری داغلاری،
اوشویور کؤلگه‌سی آیلی چاغلارین.
دۆزۆب ظولوم-ظولوم آیریلیقلاری،
اوستونده مئه کیمی اسَنیم منیم،
آ بنؤوشه‌م منیم، سۆسنیم منیم!

#رامیز_قوسارچایلی
#شعر_اوجاغی
@SheirOcagi

▫️وَ

و بو آغ قارالار،
و قارا آغلار...
و بو آغ اۇرالار،¹
و قارا تاغلار...

و بو آغ سرچه‌لر،
و قارا داملار...
و بو آغ گئجه‌لر،
و قارا شاملار...

و بو آغ هاله‌لر،
و قارا اوتلار...
و بو آغ ناله‌لر،
و قارا نوتلار...

و بو آغ دورنالار،
و قارا گؤیلر...
و بو آغ زورنالار،
و قارا زۆیلر²...

و بو آغ قویونلار،
و قارا باغلار...
و بو آغ اویونلار،
و قاراباغلار...

و بو آغ مامیرلار،
و قارا داشلار...
و بو آغ چادیرلار،
و قارا قیشلار...

و بو آغ بازارلار،
و قارا غوللار...
و بو آغ مزارلار،
و قارا دۇللار...

و بو آغ تالانلار،
و قارا ایزلر...
و بو آغ یالانلار،
و قارا اۆزلر...

و بو آغ قانونلار،
و قارا گوجلر...
و بو آغ نادانلار،
و قارا بیجلر...

و بو آغ قضالار،
و قارا قوتو...
و بو آغ فضالار،
و قارا لۏتو...

و بو آغ ریاست،
و قارا کۆتله...
و بو آغ سیاست،
و قارا کۆت‌لر...

و بو آغ آشاغیلار،
و قارا اتک...
و بو آغ اوشاقلار،
و قارا چؤرک...

و بو آغ اولدوزلار،
و قارا سئییر...
و بو آغ کاغیذلار،
و قارا شئعیر...

#رامیز_قوسارچایلی
¹- تره‌وزین، مئیوه‌نین ان آخیردا دریلَنی
²- چالینان هاوانی تکرار ائتمک
#شعر_اوجاغی
@SheirOcagi

▫️آزالیر قاپیدا ایت ساخلایانلار.

کوچوک‌لر یووایا یوووشمور داها،
ایتلر یوواسینی بوش ساخلاییرلار.
یالاق¹ ایتدن باها، یال² ایتدن باها،
آداملار بیر تهر باش ساخلاییرلار،
آزالیر قاپیدا ایت ساخلایانلار.

ایتلر عاغیللانیب، نه سؤی، نه قینا!
نه قاپی قورویور، نه دام ساخلاییر.
آداملار اوز توتور ایت قاپیسینا،
ایتلر قاپیسیندا آدام ساخلاییر،
آزالیر قاپیدا ایت ساخلایانلار.

کورسو آیاغیندا، زنجیر دؤشونده،
کؤپوکلو سؤزلردن ایت اییی گلیر.
آداملار محو اولور یال دؤیوشونده،
ایتلرین آغزیندان ات اییی گلیر،
آزالیر قاپیدا ایت ساخلایانلار.

دری آداملارین، دیش کؤپک‌لرین،
کیمه اؤز لئشیندن روزی قالاجاق؟
آدام بوغوشدورور تازی‌لار ایندی،
تازی‌لار اؤزوندن راضی قالاجاق؟!
آزالیر قاپیدا ایت ساخلایانلار.

مینیب بیر-بیرینی سۆرۆر آداملار،
آداملار هر ایته، تولا'یا قالیب؟!
آغاجا، اولدوزا هۆرۆر آداملار،
آداملار اولایا-اولایا قالیب.
آزالیر قاپیدا ایت ساخلایانلار.

هارین‌لار³ هوَسله سوموک سانادیر،
مئیدان آدامینا، کوچه ایتینه.
دونیا، اؤزو بویدا ساللاق‌خانادیر،
نئچه آدامینا، نئچه ایتینه.
آزالیر قاپیدا ایت ساخلایانلار.

گؤر کیمین کئفینه قوراشدیریبلار،
یاری آداملاری، یاری ایتلری!
وطن! نه جانینا داراشدیریبلار،
بو قارا ایتلری، ساری ایتلری.
آزالیر قاپیدا ایت ساخلایانلار.

قاپیب بیر-بیرینی توتور آداملار،
بو خسته آداملار، قۏتور آداملار.
آرتیر ایمانینا ایت باغلایانلار،
آزالیر قاپیدا ایت ساخلایانلار.

#رامیز_قوسارچایلی
¹- ایته یال تؤکمک اوچون چوخور یئر و یا قاب
²- ایته وئریلن هوررا حالیندا یئمک
³- قودورغان- آزغین
#شعر_اوجاغی
@SheirOcagi

▫️بو آدام نه یامان آجدی، ایلاهی!

بو آدام نه یامان آجدی، ایلاهی!
آجدی، گؤزو آجدی، قولاغی آجدی،
ایلیگی، سومویو، دالاغی آجدی،
گؤوده‌سی، توخومو، جالاغی آجدی،
بو آدام نه یامان آجدی، ایلاهی!

ائوده آروادینین بالاغی¹ آجدی،
قاپیدا ایتینین یالاغی آجدی،
داناسی، دۆیه‌سی²، اولاغی آجدی،
بو آدام نه یامان آجدی، ایلاهی!

قیشلاقدا قیشلاییر، یایلاغی یئییر،
یایلاقدا یایلاییر، اویلاغی یئییر،
اؤروشو، مئشه‌نی، چایلاغی یئییر،
بو آدام نه یامان آجدی، ایلاهی!

سوروب داغ چایینی آرانا گئدیر،
آرانی دؤندَریب ویرانا... گئدیر،
مینیب وظیفه‌نی «تیران»ا گئدیر،
بو آدام نه یامان آجدی، ایلاهی!

او دامدان قووورسان، بو داما گیریر،
بو دامدان قووورسان، او داما گیریر،
بو آدام نه یامان آداما گیریر،
بو آدام نه یامان بیجدی، ایلاهی!
بو آدام نه یامان آجدی، ایلاهی!

#رامیز_قوسارچایلی
¹- اتک، تومان، شالوار...ین آیاغا دوشن طرفی (Balaq)
²- ایکی یاشدا اولان دیشی اینک و یا جامیش
#شعر_اوجاغی
@SheirOcagi

▫️بَی

قان دئدیگین سو ایمیش،
قارغا دا بیر قو ایمیش،
وطن ائله بو ایمیش،
میلّت ائله بودور، بَی!

یاد الینده کونده‌سن،
بیلیرم نه گونده‌سن،
ائوینده سورگونده‌سن،
غوربت ائله بودور، بی!

یاپیشمادین ریادان،
یاریمادین حیادان،
نه‌لر چکدین ضیادان،
ذیلّت ائله بودور، بی!

تکنه‌نده* اۆزۆن قارا،
دیلینده دۆزۆن قارا،
توی قارا، حوزون قارا،
ظولمت ائله بودور، بی!

چوخ دایازلار دیبده‌دی،
چوخ بوغازلار ایپده‌دی،
حاقّ-عدالت جیبده‌دی،
دهشت ائله بودور، بی!

#رامیز_قوسارچایلی
* درین طاباق (Təkne)
#شعر_اوجاغی
@SheirOcagi

▫️آتامین خاطیره‌سینه

گؤزوندن اؤلمه‌یه باشلادی آتام،
گؤزوندن دوشمه‌یه باشلادی دونیا.
سارالدی گؤزونون آغ چیچک‌لری،
گلیب گؤزلرینده قیشلادی دونیا.

اؤلومو نار کیمی سیخدی گؤزونه،
گؤزونون ایچینده نار چیچک‌له‌دی.
اؤپدو گؤزلریندن اؤلوم مله‌یی،
گؤزونون اودوندا قار چیچک‌له‌دی.

گؤردوم کی سۏیویور حیط-باجا دا،
گوردوم بوز ساللانیر گول تاغلاریندان.
باغین باشینداکی قۏز آغاجی دا،
آسیلیب قارغانین آیاقلاریندان.

پنجره اؤنونده گیلاس آغاجی،
هامیدان گیزلیجه تک آغلاییردی.
قورو بوداقلاری قارا ال کیمی،
دیوارین اۆزۆنۆ جیرماقلاییردی.

گؤزلری چیخمیشدی حدقه‌سیندن،
سانکی کیرپیگینده داغ دولاشیردی.
حیات گؤزلرینده اؤزگه‌لشیردی،
گؤزلری اؤلوم‌له دوغمالاشیردی.

گؤز-گؤز اوخشاییردی اؤلومو آتام،
اوخشایا-اوخشایا نه‌لر دانیشدی!
گؤزلری اؤلومه سیغمادیغیندان،
اؤلندن سونرا دا یومولمامیشدی.

دونیانین شکلیندن قاچیب گؤزلری،
اؤلومون شکلینی چکیردی او گون.
اؤلومون شکلینی اولدوغو کیمی،
ایلک دفعه آتامین گؤزونده گؤردوم.

گؤزویله دونیانین آراسینداکی،
ایشیقلی نه وارسا اوچوراجاقدی،
ائله یاپیشمیشدی گؤزو اؤلومدن،
ائله بیل الیندن قاچیراجاقدی.

اؤلمه‌یه هئچ نه‌یی یوخ ایدی او گون،
نفَسی یوخ ایدی، دیلی یوخ ایدی.
ائله نازلانیردی گؤزونده اؤلوم،
او گون اوندان گؤزل اؤلو یوخ ایدی.

گؤزونه دیکیلن گؤزلردن قاچیب،
گؤزونه تؤکولن سسلردن قاچیب،
گؤزونه چکیلن بیزلردن قاچیب،
گؤزویله اؤپوشدو یئتیملیگی‌یله،
گؤزویله اؤپوشدو یاوانلیغی‌یلا
گؤزویله اؤپوشدو اوشاقلیغی‌یلا،
گؤزویله اؤپوشدو جاوانلیغی‌یلا.
اؤپمک ایسته‌مه‌دی قوجالیغینی،
گؤزلری اۆزۆنۆ یانا چئویردی.

یولو ایمان یولو، یولو جان یولو،
گئتدی اؤز یولویلا، ایزی‌یله گئتدی.
گؤزوندن قبرینه اوزانان یولو،
آتام بیزدن قاباق گؤزویله گئتدی.

#رامیز_قوسارچایلی
#شعر_اوجاغی
@SheirOcagi

▫️یولا وئردیم.

بو کندچی‌دی، کند ایچی‌دی،
یولا وئردیم.
بو قونشودو، اودو-بودو،
یولا وئردیم.
بو قونشونون تانیشی‌دی،
یولا وئردیم.
بو تانیشین خانیشی‌دی،
یولا وئردیم.
بو خانیشین خواهیشی‌دی،
یولا وئردیم.
بو قوهوم‌دو، یاد توخوم‌دو،
یولا وئردیم.
بو قایین‌آتا، بو قایین‌آنا،
باش قوشمادیم بیر اویونا،
یولا وئردیم.
بو قارداش‌دی، قارا داش‌دی،
یولا وئردیم.
بو باجی‌دی، دیل آجی‌دی،
یولا وئردیم.
بو قاییندی، هر قیلیغی بیر اویون‌دو،
یولا وئردیم.
بو بالدیزدی، بالی دوزدو،
یولا وئردیم.
بو یئزنه‌دی؛ هر اوزونه‌‌دی،
یولا وئردیم.
باجاناقدی؛ شیرینی یوخ، آجی ناغددی،
یولا وئردیم.
بو خالادی، اؤز قؤومونه بیر بلادی،
یولا وئردیم.
بو بیبی‌دی؛ یوز عملی، بیر جیبی‌دی،
یولا ويردیم.
بو دایی‌دی، سرچه بویدا اوره‌یی وار،
ائله بیلیر بیر آییدی،
یولا وئردیم.
بو عمی‌دی،
«عمی‌یه قالان، دمیه* قالار» بیر زمی‌دی،
یولا وئردیم.
دوست‌دو، کۆسدۆ،
یولا وئردیم.
دوشمن قصدی،
یولا وئردیم.
طعنه‌سینی، ائیهامینی یولا وئردیم.
من هامینی یولا وئردیم،
بیر اؤزومه یول وئرمه‌دیم.

#رامیز_قوسارچایلی
* سوواریلمایان اکین، دیم
#شعر_اوجاغی
@SheirOcagi

▫️منظره

بو قاری، مال ساخلامیر،
یاغدان، کره‌دن قاچیر.
تندیره بئل باغلامیر،
اوددان، کوره‌دن قاچیر.

دؤرد دیواردی، بیر کیلیم،
یوخوسو دیلیم-دیلیم،
قوش‌اپپَیی، جینجیلیم،-
اوتدان، تره‌دن قاچیر.

هانی ارلر، ارن‌لر،
بیر واخت کؤنول وئرن‌لر؟
یوز قاپیدان گیرن‌لر،
بیر پنجره‌دن قاچیر.

عؤمور بیر خیرمان؛ سووور!
لمبه¹-سامان بیر هووور².
قوووان تپه‌دن قووور،
قاچان دره‌دن قاچیر.

صبری سو'دور الَکده،
دونَنی داش بلَکده.
دؤزمه‌ییب لاپ فلک ده،
بو منظره‌دن قاچیر.

#رامیز_قوسارچایلی
¹- کولَش
²- لحظه
#شعر_اوجاغی
@SheirOcagi

‍ ▫️سنی گؤزله‌یه‌جم.

بلکه، گلمه‌سن یاخشیدی،
گئجه... سنی گؤزله‌یه‌جم.
اؤزون بیلمه‌سن یاخشیدی-
نئجه سنی گؤزله‌یه‌جم.

بیر گؤزَلسن، پیر دئییلسن،
داها منه سیر دئییلسن.
بیر بدنده بیر دئییلسن،
نئچه سنی گؤزله‌یه‌جم.

چوخ آیریلیق اسدی بیزدن،
اوشودولر ایستیمیزدن.
داغ یئرییه اوستوموزدن-
کئچه... سنی گؤزله‌یه‌جم.

گؤزلر دولوب سئل‌له‌نه‌جک،
قوم دا آچیب گول‌له‌نه‌جک.
تنبل-تنبل یئل‌له‌نه‌جک-
کوچه... سنی گؤزله‌یه‌جم.

سۇز گؤیلری، دؤن مله‌یه!
یاغیش یویا، گون بله‌یه.
یاز آدیمی سون بله‌یه!
هئچه... سنی گؤزله‌یه‌جم.

#رامیز_قوسارچایلی
🎙سالار موغانلی
#شعر_اوجاغی
@SheirOcagi