▫️نه واختدیر مینمیرم کهَر قاشقانی،
یولوم یئریسه ده، یوردا جالانمیر.¹
نئهرهنین نوباری، سبَتین شانی،
شانا بارماغیملا هئچ سونالانمیر.
نه واختدیر تارلادا طاماهیم قالیب،
قانقال بۇدامیرام²، سۆتۆل اۆتمۆرم.
قوردبوغان یایلاقدا های-هارای سالیب،
چوبان ایتلرینه کؤمک ائتمیرم.
قوی بو توخ گونلریم باش آپارماسین!
یادداشین کامانی یئرینده دیندی.
آرپا قووورغاسی، بیرینج یارماسی،
چتَنه قووودو ایستردیم ایندی.
نه واختدیر سینمیرم آتا قبرینه،
اؤزوم باشداشییام، گزَن قبیرم.
یونجالی گونئیده داریخان بینه!³
بو یورغون چاغیمدا قاپیندان گیرم!
چوبوق قابیرغالی آلچاق آلاچیق!
ساخلا چیراغیندا نؤیوت اییینی!
پیلته سونبولوندن سوزولن قیلچیق،
آرتیرسین گئجهنین گووَنلیگینی!
درهنی گیزلهین مۏروقلو مئشه!
بیز کی دوغما ایدیک- بئله دئییلدیک.
برهنین بندینه دوشن بنؤوشه!
بلگه گۏر ائوینده گؤروشه بیلدیک.
نه واختدیر باشیمدا چوماق چاتلامیر،
هانی چؤل سیناغی، قۏروق ساواشی؟
آنیمدان جانیما سرینلیک دامیر،
دَیینجه یاراما یادداشین داشی.
هانی یومشاق گیلئی، حلیمجه هنَک⁴؟
گؤر حیات نهلری چوخ گؤردو منه!
کاش ائله تپهمه تپَن⁵ دَیهنک،
بیچهنک اوستونده اولایدی یئنه!
نه واختدیر آرزومو آللاهی دؤیوب،
منمی سینیخمیرام، منمی سینمیرام؟
مارال اوتلارینی باش-باشا دۆیۆب،⁶
باللی کؤلگهلره هئچ سیغینمیرام.
چیرپین، آی اورهییم!... نه دئییم سنه؟
دونیانین دینجلیگی منه حاراممی؟
باخسام «آینا گؤل»ون آغ گوزگوسونه،
گؤرهسن اؤزومو تانییاراممی؟
#آغا_لاچینلی
¹- باغلانماق- چاتماق
²- آغاجین قورو و یا آرتیق بوداقلارینی کسمک، هرَس
³- کؤچَریلرین کنددن قیراقدا اوتراق ائتدیگی یئر
⁴- ظارافات
⁵- شیغییان، آتیلان
⁶- دویونلهمک
#آغا_لاچینلی
#شعر_اوجاغی
@SheirOcagi
یولوم یئریسه ده، یوردا جالانمیر.¹
نئهرهنین نوباری، سبَتین شانی،
شانا بارماغیملا هئچ سونالانمیر.
نه واختدیر تارلادا طاماهیم قالیب،
قانقال بۇدامیرام²، سۆتۆل اۆتمۆرم.
قوردبوغان یایلاقدا های-هارای سالیب،
چوبان ایتلرینه کؤمک ائتمیرم.
قوی بو توخ گونلریم باش آپارماسین!
یادداشین کامانی یئرینده دیندی.
آرپا قووورغاسی، بیرینج یارماسی،
چتَنه قووودو ایستردیم ایندی.
نه واختدیر سینمیرم آتا قبرینه،
اؤزوم باشداشییام، گزَن قبیرم.
یونجالی گونئیده داریخان بینه!³
بو یورغون چاغیمدا قاپیندان گیرم!
چوبوق قابیرغالی آلچاق آلاچیق!
ساخلا چیراغیندا نؤیوت اییینی!
پیلته سونبولوندن سوزولن قیلچیق،
آرتیرسین گئجهنین گووَنلیگینی!
درهنی گیزلهین مۏروقلو مئشه!
بیز کی دوغما ایدیک- بئله دئییلدیک.
برهنین بندینه دوشن بنؤوشه!
بلگه گۏر ائوینده گؤروشه بیلدیک.
نه واختدیر باشیمدا چوماق چاتلامیر،
هانی چؤل سیناغی، قۏروق ساواشی؟
آنیمدان جانیما سرینلیک دامیر،
دَیینجه یاراما یادداشین داشی.
هانی یومشاق گیلئی، حلیمجه هنَک⁴؟
گؤر حیات نهلری چوخ گؤردو منه!
کاش ائله تپهمه تپَن⁵ دَیهنک،
بیچهنک اوستونده اولایدی یئنه!
نه واختدیر آرزومو آللاهی دؤیوب،
منمی سینیخمیرام، منمی سینمیرام؟
مارال اوتلارینی باش-باشا دۆیۆب،⁶
باللی کؤلگهلره هئچ سیغینمیرام.
چیرپین، آی اورهییم!... نه دئییم سنه؟
دونیانین دینجلیگی منه حاراممی؟
باخسام «آینا گؤل»ون آغ گوزگوسونه،
گؤرهسن اؤزومو تانییاراممی؟
#آغا_لاچینلی
¹- باغلانماق- چاتماق
²- آغاجین قورو و یا آرتیق بوداقلارینی کسمک، هرَس
³- کؤچَریلرین کنددن قیراقدا اوتراق ائتدیگی یئر
⁴- ظارافات
⁵- شیغییان، آتیلان
⁶- دویونلهمک
#آغا_لاچینلی
#شعر_اوجاغی
@SheirOcagi
▫️چاغیر منی!
آیری دوشدوم، اوزاق اولدوم،
دوغما یوردوم، چاغیر منی!
یاد ائللرده یازیق اولدوم،
دوغما یوردوم، چاغیر منی!
قویما سندن اوزاقلاشیم،
هاییما چات بو چاغیمدا!
چاغیر گلیم، اوشاقلاشیم،
قۇزۇلاشیم قوجاغیندا!
چاغیر، گلیم گؤروشونه،
آت اوینادیم ساغا-سولا!
یئنه قونوم داغ دؤشونه،
چتن نئیی چالا-چالا.
دوغما یوردوم، سوچومدان کئچ!
دولاشسام دا دره-دره،
تا من جله قورمارام هئچ،
یئم آختاران سرچهلره.
تا گؤزومو قیییب-قیییب،
یووالارا داش آتمارام.
تا ساپاندی قۏلازلاییب¹
قیز-گلینی قورخوتمارام.
چاغیر گلیم- چیخسین آدیم،
دلیقانلی جاوان اولوم!
بره کسیم، بولاق گودوم،
دلی جئیران قووان اولوم.
یئنه او قیز ناز ائلهسین،
منی گؤرجک دؤنسون یانا!
هؤرویونو کؤکهلسین،
سانجاقلاسین آغ بوینونا!
یئنه ایشه گئده-گئده،
«سهگاه» دئییم آرابادا.
یئنه آخیر چرشنبهده،
مکتوب آتیم بوش توربادا.
یئنه گزیم چاتیم-چاتیم،
بالدیرغانلی درهلری.
قوووشلارا قوووم قاتیم،
دَیمه-دوشر دلهلری.
دوغما یوردوم، اۇلۇ بینهم،
اؤزون چاغیر، آپار منی!
سن ایتیرسن، آی بیردنهم،
کیم آختاریب تاپار منی؟!
دئمه اوغلون کوسوب گئدیب،
داریخمیشام بو تکلیکده.
اللریمی بالینج ائدیب
بیر یاتایدیم چیچکلیکده.
بیر یاییلیب یاستیلارا،²
دئیهیدیم کی: اوخای-اوخای!
بیر جومایدیم صاف سولارا،
قولوم اوسته اوغلوم «اوقتای».
چاغیر گلیم، دوغما یوردوم!
من کی سنی آرخا سایدیم.
بیر دیلکله دؤزوب-دوردوم:
کاش قوینوندا اۇیۇیایدیم!
#آغا_لاچینلی
¹- قولونون گوجو چاتدیغی قدر اوزاغا توللاماق
²- سطحی دۆز اولان یئرلر
#شعر_اوجاغی
@SheirOcagi
آیری دوشدوم، اوزاق اولدوم،
دوغما یوردوم، چاغیر منی!
یاد ائللرده یازیق اولدوم،
دوغما یوردوم، چاغیر منی!
قویما سندن اوزاقلاشیم،
هاییما چات بو چاغیمدا!
چاغیر گلیم، اوشاقلاشیم،
قۇزۇلاشیم قوجاغیندا!
چاغیر، گلیم گؤروشونه،
آت اوینادیم ساغا-سولا!
یئنه قونوم داغ دؤشونه،
چتن نئیی چالا-چالا.
دوغما یوردوم، سوچومدان کئچ!
دولاشسام دا دره-دره،
تا من جله قورمارام هئچ،
یئم آختاران سرچهلره.
تا گؤزومو قیییب-قیییب،
یووالارا داش آتمارام.
تا ساپاندی قۏلازلاییب¹
قیز-گلینی قورخوتمارام.
چاغیر گلیم- چیخسین آدیم،
دلیقانلی جاوان اولوم!
بره کسیم، بولاق گودوم،
دلی جئیران قووان اولوم.
یئنه او قیز ناز ائلهسین،
منی گؤرجک دؤنسون یانا!
هؤرویونو کؤکهلسین،
سانجاقلاسین آغ بوینونا!
یئنه ایشه گئده-گئده،
«سهگاه» دئییم آرابادا.
یئنه آخیر چرشنبهده،
مکتوب آتیم بوش توربادا.
یئنه گزیم چاتیم-چاتیم،
بالدیرغانلی درهلری.
قوووشلارا قوووم قاتیم،
دَیمه-دوشر دلهلری.
دوغما یوردوم، اۇلۇ بینهم،
اؤزون چاغیر، آپار منی!
سن ایتیرسن، آی بیردنهم،
کیم آختاریب تاپار منی؟!
دئمه اوغلون کوسوب گئدیب،
داریخمیشام بو تکلیکده.
اللریمی بالینج ائدیب
بیر یاتایدیم چیچکلیکده.
بیر یاییلیب یاستیلارا،²
دئیهیدیم کی: اوخای-اوخای!
بیر جومایدیم صاف سولارا،
قولوم اوسته اوغلوم «اوقتای».
چاغیر گلیم، دوغما یوردوم!
من کی سنی آرخا سایدیم.
بیر دیلکله دؤزوب-دوردوم:
کاش قوینوندا اۇیۇیایدیم!
#آغا_لاچینلی
¹- قولونون گوجو چاتدیغی قدر اوزاغا توللاماق
²- سطحی دۆز اولان یئرلر
#شعر_اوجاغی
@SheirOcagi
▫️مندن پیسلیک گؤزلهمه!
چوخ یئرلری گزمیشیک،
یاخشی گونلر گؤرموشوک،
بو گؤینَملی دونیادا،
توی-دویونلر گؤرموشوک.
بیرلیگه دیل وئرمیشیک،
دردی اینلر گؤرموشوک.
بونلار سؤزه سیغیشماز،
گل هئچ بوردا سؤز دئمه!
او گونلری یادا سال،
مندن پیسلیک گؤزلهمه!
او ایللرین قوینونو
آدیمینلا دولان، گز!
اۇروات'ینی¹ اونوتدون...
.اوماجاغین نهدیر بس؟
آی یولوندان ساپانیم!
دئمهدیممی منجییَز:
«کؤروک²لهییب هر کینی،
اورکلری کؤزلهمه؟!»
بابالین اؤز بوینونا،
مندن پیسلیک گؤزلهمه!
هئچ بیلمیرم نه آلیب
بئله اویدون شئیطانا.
لاپ مایماقلیق ائلهدین،
قول دا چکدین بیر قانا.
کیمی کیمه توخودو-
سن قوردوغون بو هانا؟
یالانلارا یالمانیب³
اولموشلاری گیزلهمه!
من اؤزومدن دؤنمهرم،
مندن پیسلیک گؤزلهمه!
اوۆیۆتدۆیۆن چئینم'ی،
یوغوران دا چنهندی.
گؤزللیگی گؤرنده،
گؤزلرینه چن ائندی.
گئت بو یوللا گیرهلن،
گیرهوهندی، چَمیندی!
قازیدیغین قویونو،
هاپ-گۏپ ایله دۆزلهمه!
گومانلارا گووَنجهم،
مندن پیسلیک گؤزلهمه!
اونا-بونا یاریندین،
اینجیکلیگیم بیر اوندان.
سنی آلا بیلمهدیم،
توولاقچی'نین توروندان.
او دوز-چؤرک قان اولوب-
تؤکولمزمی بوروندان؟
بونلار اوزه وورولماز،
بونلاری هئچ اۆزلهمه!
آندیمیزا قوربان اول،
مندن پیسلیک گؤزلهمه!
#آغا_لاچینلی
¹- حؤرمت
²- آچیلیب قاپاندیقجا ایچیندهکی هاوانی اوفلهیهرک اودو جانلاندیران آلت
³- باش اَیمک، یالتاقلیق ائتمک
#شعر_اوجاغی
@SheirOcagi
چوخ یئرلری گزمیشیک،
یاخشی گونلر گؤرموشوک،
بو گؤینَملی دونیادا،
توی-دویونلر گؤرموشوک.
بیرلیگه دیل وئرمیشیک،
دردی اینلر گؤرموشوک.
بونلار سؤزه سیغیشماز،
گل هئچ بوردا سؤز دئمه!
او گونلری یادا سال،
مندن پیسلیک گؤزلهمه!
او ایللرین قوینونو
آدیمینلا دولان، گز!
اۇروات'ینی¹ اونوتدون...
.اوماجاغین نهدیر بس؟
آی یولوندان ساپانیم!
دئمهدیممی منجییَز:
«کؤروک²لهییب هر کینی،
اورکلری کؤزلهمه؟!»
بابالین اؤز بوینونا،
مندن پیسلیک گؤزلهمه!
هئچ بیلمیرم نه آلیب
بئله اویدون شئیطانا.
لاپ مایماقلیق ائلهدین،
قول دا چکدین بیر قانا.
کیمی کیمه توخودو-
سن قوردوغون بو هانا؟
یالانلارا یالمانیب³
اولموشلاری گیزلهمه!
من اؤزومدن دؤنمهرم،
مندن پیسلیک گؤزلهمه!
اوۆیۆتدۆیۆن چئینم'ی،
یوغوران دا چنهندی.
گؤزللیگی گؤرنده،
گؤزلرینه چن ائندی.
گئت بو یوللا گیرهلن،
گیرهوهندی، چَمیندی!
قازیدیغین قویونو،
هاپ-گۏپ ایله دۆزلهمه!
گومانلارا گووَنجهم،
مندن پیسلیک گؤزلهمه!
اونا-بونا یاریندین،
اینجیکلیگیم بیر اوندان.
سنی آلا بیلمهدیم،
توولاقچی'نین توروندان.
او دوز-چؤرک قان اولوب-
تؤکولمزمی بوروندان؟
بونلار اوزه وورولماز،
بونلاری هئچ اۆزلهمه!
آندیمیزا قوربان اول،
مندن پیسلیک گؤزلهمه!
#آغا_لاچینلی
¹- حؤرمت
²- آچیلیب قاپاندیقجا ایچیندهکی هاوانی اوفلهیهرک اودو جانلاندیران آلت
³- باش اَیمک، یالتاقلیق ائتمک
#شعر_اوجاغی
@SheirOcagi
▫️ایلاهی، سن منی او کنده یئتیر!
ایلاهی، سن منی او کنده یئتیر،
او کندین دیلهیی دیلده گؤیهرن.
او کندین یؽغوالی¹ اوغولدان یئتیم،
او کندین قیزلاری قارغیش اَییرن.
قوجاسی بورونوب هیس چوخاسینا،
قاریسی آه چکیب قاپیدا بیتیر.
ایلاهی، باغیشلا ائل دوعاسینا،
ایلاهی، سن منی او کنده یئتیر!
باغیشلا دهرهنین پاسلی یاسینا،
باغیشلا جهرهنین غم هاواسینا،
باغیشلا کؤهلَنین یاتان تیسینا،
باغیشلا محلهنین تور هاناسینا!
باغیشلا، باغیشلا بو اکیلمیشی،
باغیشلا بوجاغین بوش قالماسینا!
باغیشلا یوللارا باخیش اکمیشین-
قاریییب-قورویوب داش اولماسینا!
ایلاهی، جۏش گله من باغریداشا،
بورونهم بیر آخشام یاغیش کندیره!
یایلاق یالوارسینا، بولاق باریشا،
دوشم دان یئریندن دده کندینه!
یا دا دیلکلرین قولو آچیلا،
قایغی بوخچاسینی بیریوللوق آتام.
آریلار تئل وورا بو آریچییا،
عوذور کاغیذینی اوزومه توتام.
گئدم ائشیتمهدن هده-هدیانی²
مالیمی ماراللا اوتارا بیلم!
«قولو»نون قورد یئمیش دلی مادیانی،
قایانین قاشیندان قایتارا بیلم.
سؤکوله جانیمین آغری سیریغی،
دویغوم بۏزالاشا کۏبۇد عاغیللا
یئتیمی-یئسیری، کؤنلو سینیغی،
یئدیردیب-ایچیردم نوغول-ناغیللا.
قاییدا دونیانین بو دولاشانی،
وارلیغیم یوخلوغون دیبیندن چیخا!
چیخاردام آغزیمدان چۇللۇ دووشانی،
ناللی قاریشقا دا جیبیمدن چیخا.
چیخا خورجونومدان چیت'ین باهاسی،
بزهنه بیر ائوین کؤهنه کفرَمی³.
باجی-قارداشیمین بئچه بالاسی،
قۏمارا بیر آندا باللی سوفرهمی.
ایلاهی، الیمه گیرهوه دوشه،
آیریلیق کۆلۆنۆ یوللارا سپم!
سؤیکهییب آلنیمی آنا گؤیروشه،⁴
گؤروشلو آنلاری گؤزومه تپم.
ایلاهی، کؤمهیین گؤر نئجه ایتیر!
ایلاهی، سن منی او کنده یئتیر!
یئتیر بیچیلهسی بیچهنهیینه،
یئتیر گون قوووران بۏز گونئیینه،
یئتیر بولاقداکی آخشام نئیینه،
یئتیر دان یئلینه، چای کولهیینه،
یئتیر قیش قار'ینا، یاز چیچهیینه،
یئتیر کۏم اولدوزون گؤبهلهیینه،
یئتیر جان هاوالی یان توتهیینه،
یئتیر یال-یاماجین گؤی ایپهیینه،
یاشیل بلهیینه، آغ بلهبینه،
گولونه، گؤلونه، داها نهیینه!
ایلاهی، سن منیم ایزیمی یئتیر،
داغیلمیش قبیرین سون کؤمهیینه!
آغساققال چاغیمدا اؤزومو یئتیر،
آغلایان بیر ائوین آغبیرچهیینه!
ایلاهی، سن منی او کنده یئتیر،
ایلاهی سن منی او کندده بیتیر!
#آغا_لاچینلی
¹- جمعیت
²- اساسسیز سؤز- سؤیوش
³- میتیل
⁴- ون آغاجی
#شعر_اوجاغی
@SheirOcagi
ایلاهی، سن منی او کنده یئتیر،
او کندین دیلهیی دیلده گؤیهرن.
او کندین یؽغوالی¹ اوغولدان یئتیم،
او کندین قیزلاری قارغیش اَییرن.
قوجاسی بورونوب هیس چوخاسینا،
قاریسی آه چکیب قاپیدا بیتیر.
ایلاهی، باغیشلا ائل دوعاسینا،
ایلاهی، سن منی او کنده یئتیر!
باغیشلا دهرهنین پاسلی یاسینا،
باغیشلا جهرهنین غم هاواسینا،
باغیشلا کؤهلَنین یاتان تیسینا،
باغیشلا محلهنین تور هاناسینا!
باغیشلا، باغیشلا بو اکیلمیشی،
باغیشلا بوجاغین بوش قالماسینا!
باغیشلا یوللارا باخیش اکمیشین-
قاریییب-قورویوب داش اولماسینا!
ایلاهی، جۏش گله من باغریداشا،
بورونهم بیر آخشام یاغیش کندیره!
یایلاق یالوارسینا، بولاق باریشا،
دوشم دان یئریندن دده کندینه!
یا دا دیلکلرین قولو آچیلا،
قایغی بوخچاسینی بیریوللوق آتام.
آریلار تئل وورا بو آریچییا،
عوذور کاغیذینی اوزومه توتام.
گئدم ائشیتمهدن هده-هدیانی²
مالیمی ماراللا اوتارا بیلم!
«قولو»نون قورد یئمیش دلی مادیانی،
قایانین قاشیندان قایتارا بیلم.
سؤکوله جانیمین آغری سیریغی،
دویغوم بۏزالاشا کۏبۇد عاغیللا
یئتیمی-یئسیری، کؤنلو سینیغی،
یئدیردیب-ایچیردم نوغول-ناغیللا.
قاییدا دونیانین بو دولاشانی،
وارلیغیم یوخلوغون دیبیندن چیخا!
چیخاردام آغزیمدان چۇللۇ دووشانی،
ناللی قاریشقا دا جیبیمدن چیخا.
چیخا خورجونومدان چیت'ین باهاسی،
بزهنه بیر ائوین کؤهنه کفرَمی³.
باجی-قارداشیمین بئچه بالاسی،
قۏمارا بیر آندا باللی سوفرهمی.
ایلاهی، الیمه گیرهوه دوشه،
آیریلیق کۆلۆنۆ یوللارا سپم!
سؤیکهییب آلنیمی آنا گؤیروشه،⁴
گؤروشلو آنلاری گؤزومه تپم.
ایلاهی، کؤمهیین گؤر نئجه ایتیر!
ایلاهی، سن منی او کنده یئتیر!
یئتیر بیچیلهسی بیچهنهیینه،
یئتیر گون قوووران بۏز گونئیینه،
یئتیر بولاقداکی آخشام نئیینه،
یئتیر دان یئلینه، چای کولهیینه،
یئتیر قیش قار'ینا، یاز چیچهیینه،
یئتیر کۏم اولدوزون گؤبهلهیینه،
یئتیر جان هاوالی یان توتهیینه،
یئتیر یال-یاماجین گؤی ایپهیینه،
یاشیل بلهیینه، آغ بلهبینه،
گولونه، گؤلونه، داها نهیینه!
ایلاهی، سن منیم ایزیمی یئتیر،
داغیلمیش قبیرین سون کؤمهیینه!
آغساققال چاغیمدا اؤزومو یئتیر،
آغلایان بیر ائوین آغبیرچهیینه!
ایلاهی، سن منی او کنده یئتیر،
ایلاهی سن منی او کندده بیتیر!
#آغا_لاچینلی
¹- جمعیت
²- اساسسیز سؤز- سؤیوش
³- میتیل
⁴- ون آغاجی
#شعر_اوجاغی
@SheirOcagi
▫️گلنده آغرینی اؤزونله گتیر!
گلنده آغرینی اؤزونله گتیر!
سنه بیر سؤزوم وار اینجهدن اینجه.
تکلیگی تک قویوب جان ائویمه گیر!
کؤنلومه یولداش اول کؤچوم گئدینجه!
آللاه چوخ گؤرمهسین آغ گونلرینی،
گتیر قایغینی دا قارا دۆیۆنده!
بسلهرم من سنین درد گوللرینی،
قانیملا سولانان جان دیبچهیینده.
دردی ده اؤلدورن درد کؤتهییدی،
دردینه درد اولوم... چوخ دا اوزولمه!
چوخ دا کی اورهیین اود پتهییدی،
آتیب اورهیینی یانیما گلمه!
سنی دۇیا-دۇیا دئییرم بونو،
گؤزونون گؤلو ده گؤزلدی، گؤزل.
تزه گئییمینی، تزه دۏنۇنۇ،
تزه داغ-دۆیۆنله دۆیمهلهییب گل!
اؤزونو تانیماز دردینی دانان،
بیر ده اولانینا بئله یوخ دئمه!
آی منی دوست بیلیب باشا دولانان،
گیزلی یارانی دا مندن گیزلهمه!
یا دردی یاری بؤل، یا دا اۆزۆلۆش،
قوی عؤمرون خالچاسی اؤنه سریلسین!
دۇزلۇ گؤز یاشییلا بال سیزان گولوش،
بیرلیک خمیرینه قوی اَندهریلسین!
قایغی بوستانیندا هر دیلک بیتیر،
وئریب قازانجینی یانا چکیلمه!
گلنده آغرینی اؤزونله گتیر،
سندن اینجییهرم، الی بوش گلمه!
#آغا_لاچینلی
#شعر_اوجاغی
@SheirOcagi
گلنده آغرینی اؤزونله گتیر!
سنه بیر سؤزوم وار اینجهدن اینجه.
تکلیگی تک قویوب جان ائویمه گیر!
کؤنلومه یولداش اول کؤچوم گئدینجه!
آللاه چوخ گؤرمهسین آغ گونلرینی،
گتیر قایغینی دا قارا دۆیۆنده!
بسلهرم من سنین درد گوللرینی،
قانیملا سولانان جان دیبچهیینده.
دردی ده اؤلدورن درد کؤتهییدی،
دردینه درد اولوم... چوخ دا اوزولمه!
چوخ دا کی اورهیین اود پتهییدی،
آتیب اورهیینی یانیما گلمه!
سنی دۇیا-دۇیا دئییرم بونو،
گؤزونون گؤلو ده گؤزلدی، گؤزل.
تزه گئییمینی، تزه دۏنۇنۇ،
تزه داغ-دۆیۆنله دۆیمهلهییب گل!
اؤزونو تانیماز دردینی دانان،
بیر ده اولانینا بئله یوخ دئمه!
آی منی دوست بیلیب باشا دولانان،
گیزلی یارانی دا مندن گیزلهمه!
یا دردی یاری بؤل، یا دا اۆزۆلۆش،
قوی عؤمرون خالچاسی اؤنه سریلسین!
دۇزلۇ گؤز یاشییلا بال سیزان گولوش،
بیرلیک خمیرینه قوی اَندهریلسین!
قایغی بوستانیندا هر دیلک بیتیر،
وئریب قازانجینی یانا چکیلمه!
گلنده آغرینی اؤزونله گتیر،
سندن اینجییهرم، الی بوش گلمه!
#آغا_لاچینلی
#شعر_اوجاغی
@SheirOcagi
▫️گل اویون اوینایاق!
گل دردی آخیداق سئوینج سئلینه،
گل اویون اوینایاق ائله بو یاشدا!
گولهشک، گولوشک، ملهشک یئنه،
گونوموز سۆد امَن گۆنلۇ یاماجدا!
من اؤلوم، گل یئنه بیر آغیز دئیَک،
آغرییا ایچیردک شادلیق بالینی!
دادلی تیکهمیزله یئنه یئملهیک،
یووادا یالواران اتجه بالانی!
گؤللرده قاز اولاق، چؤللرده گونش،
قاتاق دووشانی دا زاغا دامینا!
پاییزین کۆرکۆندن یولونان کولش،
آلوودان دۏن بیچسین یاز بایرامینا!
دَییشسین عؤمورون آغری قابیغی،
قایغی سۆنگولری قلبدن سۆرۆشسۆن!
قیشین بۇز گؤزلویو، سیرسیرا بیغی،
اوجاق هاواریندا اریییب دوشسون!
ائشیت اورهییمین جیزهاجیزینی!
چۇللو چوبوغو دا چاپاق یوز یئره.
اویون جیغیرینی، اویون جیزینی،
بیر چیدار¹ ائلهیک قاچان عؤموره!
مین ایل یاشاساق دا، کۆت اوشاقلاریق،
پای-بؤلوش اوماریق دونیا بابادان.
گل اویون اوینایاق نئجه کی واریق،
شیرینه شیرنیکسین² آجینی دادان!
ایللر بیچاغینی چپینه چرتیب،
جاندا جیزیلتی وار، قاندا ولوَله.
باشیمیز، آی قارداش، چوخ اویون چکیب!
بعضی اویوندان دا قورخورام هله.
او «گیزلن-پاچ»دان دا قورخورام آرتیق،
گل اویون اوینایاق قلبه دَیمهدن!
دؤیوله-دؤیوله جیزدان چیخمیریق،
آخی نه دانیشیم «دیره-دؤیمه»دن³؟!٫
چیلینگی سینماسین «چیلینگ-آغاج»ین،
هله «سۆدلۆ-سۆمۆک»⁴، سودلوجه گئجه.
«بئش-داش»دا توققوشان بئش قوهوم داشین،
یولو یولوموزا بنزهدی نئجه.
نئجه ده سۆرۆشدۆ عؤمور بالیغی،
گل دردین باشینی اویونلا قاتاق!
کفنی یئللنن قیش قوجالیغی،
یازا یووارلاداق، یاشیلا توتاق.
گل ماهنی کؤپوردک ساخسی کۆپهده،
گل اووو قاچیرداق- گؤرن گولوشسون!
تاجی اوجاق اولان قارلی تپهده،
سۏیۇغۇن آغ گؤزو توستویه دوشسون!
بیز بو دَییرمانین قۇرۇ دنیییک،
قوی سئوینج اوولاتسین چالیب-اوخوماق.
اونسوز دا هرهمیز بیر آز دلیییک،
بیر آز عاغیللیییق، بیر آز دا آخماق.
اونسوز دا باغلیدی چیخیش یوللاری،
گل قۏدۇ⁵ گزدیرک قارا یاغیشدا!
گل یادا سالمایاق چوخ سؤاللاری،
گل اویون اوینایاق بو یاری یاشدا!
#آغا_لاچینلی
¹-بوخوو
²- آلیشماق- اؤیرشمک
³- کوتلهوی اوشاق اویونلاریندان بیرینین آدی
⁴- کوتلهوی اوشاق اویونلاریندان بیرینین آدی
⁵- کئچمیشده، آراسی کسیلمهدن یاغیش یاغدیقدا کند اوشاقلارینین توپلاشیب حیَط-حیَط گزهرک نغمه اوخوما مراسیمی و بو مراسیمده اوخونان نغمهنین اؤزو.
#شعر_اوجاغی
@SheirOcagi
گل دردی آخیداق سئوینج سئلینه،
گل اویون اوینایاق ائله بو یاشدا!
گولهشک، گولوشک، ملهشک یئنه،
گونوموز سۆد امَن گۆنلۇ یاماجدا!
من اؤلوم، گل یئنه بیر آغیز دئیَک،
آغرییا ایچیردک شادلیق بالینی!
دادلی تیکهمیزله یئنه یئملهیک،
یووادا یالواران اتجه بالانی!
گؤللرده قاز اولاق، چؤللرده گونش،
قاتاق دووشانی دا زاغا دامینا!
پاییزین کۆرکۆندن یولونان کولش،
آلوودان دۏن بیچسین یاز بایرامینا!
دَییشسین عؤمورون آغری قابیغی،
قایغی سۆنگولری قلبدن سۆرۆشسۆن!
قیشین بۇز گؤزلویو، سیرسیرا بیغی،
اوجاق هاواریندا اریییب دوشسون!
ائشیت اورهییمین جیزهاجیزینی!
چۇللو چوبوغو دا چاپاق یوز یئره.
اویون جیغیرینی، اویون جیزینی،
بیر چیدار¹ ائلهیک قاچان عؤموره!
مین ایل یاشاساق دا، کۆت اوشاقلاریق،
پای-بؤلوش اوماریق دونیا بابادان.
گل اویون اوینایاق نئجه کی واریق،
شیرینه شیرنیکسین² آجینی دادان!
ایللر بیچاغینی چپینه چرتیب،
جاندا جیزیلتی وار، قاندا ولوَله.
باشیمیز، آی قارداش، چوخ اویون چکیب!
بعضی اویوندان دا قورخورام هله.
او «گیزلن-پاچ»دان دا قورخورام آرتیق،
گل اویون اوینایاق قلبه دَیمهدن!
دؤیوله-دؤیوله جیزدان چیخمیریق،
آخی نه دانیشیم «دیره-دؤیمه»دن³؟!٫
چیلینگی سینماسین «چیلینگ-آغاج»ین،
هله «سۆدلۆ-سۆمۆک»⁴، سودلوجه گئجه.
«بئش-داش»دا توققوشان بئش قوهوم داشین،
یولو یولوموزا بنزهدی نئجه.
نئجه ده سۆرۆشدۆ عؤمور بالیغی،
گل دردین باشینی اویونلا قاتاق!
کفنی یئللنن قیش قوجالیغی،
یازا یووارلاداق، یاشیلا توتاق.
گل ماهنی کؤپوردک ساخسی کۆپهده،
گل اووو قاچیرداق- گؤرن گولوشسون!
تاجی اوجاق اولان قارلی تپهده،
سۏیۇغۇن آغ گؤزو توستویه دوشسون!
بیز بو دَییرمانین قۇرۇ دنیییک،
قوی سئوینج اوولاتسین چالیب-اوخوماق.
اونسوز دا هرهمیز بیر آز دلیییک،
بیر آز عاغیللیییق، بیر آز دا آخماق.
اونسوز دا باغلیدی چیخیش یوللاری،
گل قۏدۇ⁵ گزدیرک قارا یاغیشدا!
گل یادا سالمایاق چوخ سؤاللاری،
گل اویون اوینایاق بو یاری یاشدا!
#آغا_لاچینلی
¹-بوخوو
²- آلیشماق- اؤیرشمک
³- کوتلهوی اوشاق اویونلاریندان بیرینین آدی
⁴- کوتلهوی اوشاق اویونلاریندان بیرینین آدی
⁵- کئچمیشده، آراسی کسیلمهدن یاغیش یاغدیقدا کند اوشاقلارینین توپلاشیب حیَط-حیَط گزهرک نغمه اوخوما مراسیمی و بو مراسیمده اوخونان نغمهنین اؤزو.
#شعر_اوجاغی
@SheirOcagi
▫️شهرلی آغاج
شهرلی آغاجی آغ بیچاق سویار،
بوشقو دا یئریکلر اوجا بویونا.
کولک آغ کاغیذدان کفن دولایار،
بئلی بوکولموشون ساپلاق بوینونا.
دینمزجه قۇرۇشار یول قیراغیندا،
اوزونه توپورَر پالچیقلی تکر.
بار'یندان اوست-باسا بویاق یاغاندا،
بوداغی بالتالار شیللهییب-تؤکر.
اسن یارپاقدان دا قورخو ساللاشار،
قوشلار سیغناجاغی قوش اولار بیردن.
یارالی-یارالی مایاللاق آشار،
یاراق آنبارینین اوستونده بیتن.
تانکلار چینارین دا باغرینی یارار،
قان دامار سؤیودون اۇن آغلیغینا.
گلمه آکاسیالار¹ تیکان باتیرار،
یئرلی قوواقلارین یومشاقلیغینا.
شهرلی آغاجلار بیج-بیج اؤسکورر،
ساغا گؤز گزدیرَر، سولا ماریتلار.
بویلانیب ائولرده گؤزللیک گؤرر،
بالدیری اَهَنگلی² قوجا پالیدلار.
قیشدا باشقالاشار یازین اویونو،
باشلانار کاکتوسون دیبدن ائشیمی.
هر گلن بیر یئرده بیتیرَر اونو،
بیزیم بۇیرۇق غولو باشچیلار کیمی.
شهرلی آغاجلار یامان داریخار،
قیرین دار بوخووو قیریلار یئنه.
شهرلی آغاجلار چپردن چیخار،
قاچار اؤز یئرینه، اؤز مئشهسینه.
#آغا_لاچینلی
¹- آغاج آدی- اقاقیا
²- کیرج- آهک
#شعر_اوجاغی
@SheirOcagi
شهرلی آغاجی آغ بیچاق سویار،
بوشقو دا یئریکلر اوجا بویونا.
کولک آغ کاغیذدان کفن دولایار،
بئلی بوکولموشون ساپلاق بوینونا.
دینمزجه قۇرۇشار یول قیراغیندا،
اوزونه توپورَر پالچیقلی تکر.
بار'یندان اوست-باسا بویاق یاغاندا،
بوداغی بالتالار شیللهییب-تؤکر.
اسن یارپاقدان دا قورخو ساللاشار،
قوشلار سیغناجاغی قوش اولار بیردن.
یارالی-یارالی مایاللاق آشار،
یاراق آنبارینین اوستونده بیتن.
تانکلار چینارین دا باغرینی یارار،
قان دامار سؤیودون اۇن آغلیغینا.
گلمه آکاسیالار¹ تیکان باتیرار،
یئرلی قوواقلارین یومشاقلیغینا.
شهرلی آغاجلار بیج-بیج اؤسکورر،
ساغا گؤز گزدیرَر، سولا ماریتلار.
بویلانیب ائولرده گؤزللیک گؤرر،
بالدیری اَهَنگلی² قوجا پالیدلار.
قیشدا باشقالاشار یازین اویونو،
باشلانار کاکتوسون دیبدن ائشیمی.
هر گلن بیر یئرده بیتیرَر اونو،
بیزیم بۇیرۇق غولو باشچیلار کیمی.
شهرلی آغاجلار یامان داریخار،
قیرین دار بوخووو قیریلار یئنه.
شهرلی آغاجلار چپردن چیخار،
قاچار اؤز یئرینه، اؤز مئشهسینه.
#آغا_لاچینلی
¹- آغاج آدی- اقاقیا
²- کیرج- آهک
#شعر_اوجاغی
@SheirOcagi
▫️یازدیغین کاغیذ
یاراما ساریقدی یازدیغین کاغیذ،
یازدیغین کاغیذین گلیشی گؤزل.
یازدیغین کاغیذدا یاخشی دیل-آغیز،
یازدیغین کاغیذدا کؤنول یاپان ال.
یازدیغین کاغیذدا مونجوق دۆزۆمۆ،
حرفلر قولبویون، سؤزلر سؤکولمز.
یازدیغین کاغیذین آندی دۆزدۆمۆ؟-
بونو سن بیلرسن، باشقاسی بیلمز.
یازدیغین کاغیذی، دوعالار اۆفلَر،
دیل آچان دیلک ده جان دیرهییدی.
اۆسکۆکلۆ* حرفلر، شان-شان حرفلر،
دویغو یوواسیدی، بال پتهییدی.
یازدیغین کاغیذین آدی اوتانجاق،
یازدیغین کاغیذین یانغیسی درین.
کؤنلوم آراسیندا اویویور، واللاه،
یورغانلی-دؤشَکلی آلت-اوست سطیرین.
او نؤقطه خاللارین، کاغیذیندا وار،
کاغیذین شکلیندی- بیلمیر چوخوسو.
کؤنلو دۏیۇزدۇرار، کینی یومشالدار،
کؤینَکلی کاغیذین نرگیز قوخوسو.
سنین قلمینین گؤز یاشی قارا،
قارا گول بیتیریب قاپقارا یاغیش.
سؤز گولو اکمیسن بو کاغیذ قارا،
بس نئجه اولوب کی، قار آلیشمامیش؟!
داغ-دۆیۆن دئمهرم یازی جیزگینه،
ویرگوللر سون قویماز تکلیک یاسینا.
اوشونن اورهییم سیغینار یئنه،
یازدیغین کاغیذین سؤز یوواسینا.
#آغا_لاچینلی
* بیر چیچک آدی- اوسکوک اوتو- بارماق اوتو
#شعر_اوجاغی
@SheirOcagi
یاراما ساریقدی یازدیغین کاغیذ،
یازدیغین کاغیذین گلیشی گؤزل.
یازدیغین کاغیذدا یاخشی دیل-آغیز،
یازدیغین کاغیذدا کؤنول یاپان ال.
یازدیغین کاغیذدا مونجوق دۆزۆمۆ،
حرفلر قولبویون، سؤزلر سؤکولمز.
یازدیغین کاغیذین آندی دۆزدۆمۆ؟-
بونو سن بیلرسن، باشقاسی بیلمز.
یازدیغین کاغیذی، دوعالار اۆفلَر،
دیل آچان دیلک ده جان دیرهییدی.
اۆسکۆکلۆ* حرفلر، شان-شان حرفلر،
دویغو یوواسیدی، بال پتهییدی.
یازدیغین کاغیذین آدی اوتانجاق،
یازدیغین کاغیذین یانغیسی درین.
کؤنلوم آراسیندا اویویور، واللاه،
یورغانلی-دؤشَکلی آلت-اوست سطیرین.
او نؤقطه خاللارین، کاغیذیندا وار،
کاغیذین شکلیندی- بیلمیر چوخوسو.
کؤنلو دۏیۇزدۇرار، کینی یومشالدار،
کؤینَکلی کاغیذین نرگیز قوخوسو.
سنین قلمینین گؤز یاشی قارا،
قارا گول بیتیریب قاپقارا یاغیش.
سؤز گولو اکمیسن بو کاغیذ قارا،
بس نئجه اولوب کی، قار آلیشمامیش؟!
داغ-دۆیۆن دئمهرم یازی جیزگینه،
ویرگوللر سون قویماز تکلیک یاسینا.
اوشونن اورهییم سیغینار یئنه،
یازدیغین کاغیذین سؤز یوواسینا.
#آغا_لاچینلی
* بیر چیچک آدی- اوسکوک اوتو- بارماق اوتو
#شعر_اوجاغی
@SheirOcagi
▫️غریب آخشاملار
بوردا غم ایچیرم. غریبم، غریب.
یول آچیق اولسا دا، دیل آچیق دئییل.
اوستومه اؤرتولن بو کؤلگه قلیب،
آتا یوردونداکی آلاچیق دئییل.
دونیا گؤز اووودان، آدام اۏتاران،
پایینا نه دوشور یئری گئنیشین؟
کفنی ساری تۆل، تابوتو تۏران،
قبیری گؤی ائودی باتان گونشین.
بو دا اوزاقلارین اۆزه دورماسی،
کولک ده گمیشر¹، گلمه² گولونجه.
غریب آخشاملارین کؤچکۆن دورناسی،
چکر قاطارینی دان سؤکولونجه.
آخشامین آلنیندا سولغون پاریلتی،
بولوددا الهنر توتقونجا شاملار.
نییه سۇماغیدی، نییه پالیدی،
نییه ده قارادی غریب آخشاملار؟
غریب آخشاملارین غمی بیر شله،
یئنه یورد آغیسی³ کؤمهیه گلر.
آیاغین ایلیشسه بو شاخ-شَوهله،⁴
اوتلار دا اوستونه بارماق سیلکهلر.⁵
یولون قۇیۇلانار مئشه قوینوندا،
تکلیگین توش اولار آسیب-کسَنه.
کۏل قابان دۏنۇندا، آیی دۏنۇندا،
کؤتوک قورد دونوندا گؤروکر سنه.
غریبلیک گۆوهسی گۆمانی یئیر،
یوردونا گرَکسن عؤمور داشییلا
بیر قیز سیغالییلا دوغمالاشان یئر،
آتیلیر بیر ائلین چاغیریشییلا.
اؤدَنجی اؤدَنمیر گئدیب ایتَنین،
یالانا بوکولدو غریب ایسمارؽج.⁶
قوجانی سئومهین او عیفریتهنین،
ایلک پایی قۏغالدی⁷، سون پایی قاخینج.
گؤرورم، سنین ده جیزداغین چیخیر،
ییغوال⁸ دَییشیرمی یئر دَییشنده؟
اورک سینیق اولور، دیلک قیوریخیر،
عؤمور اوجوزلاشیر غریب دۆشنده.
اوف! نئجه دؤنوکدو، نئجه قورخونج دو!
کؤتهیی پولسوزدو، کؤمهیی جیبلیک.
حالالجا حاقّیما دئییر کی «بورجدو»،
اوف! سایماز غریبلیک، قییماز غریبلیک.
اوچموشام. گلمیشم. قونموشام اونا.
آدی شَعبَدهلی، یولو شوشهلی.
اوزانیر گۆن دونلو او گۆندۏغانا،
غریب آخشاملارین اوشویَن الی.
#آغا_لاچینلی
¹- شیغیماق
²- اؤزگه یئردن، کناردان گلن- غریب
³- یاسدا آوازلا سؤیلهنن یانیقلی سؤزلر(Ağı)
⁴- آغاج قیرینتیلاری- کۏلکۏس
⁵- هدهلهمک- قورخوتماق
⁶- تاپشیریق- سفارش
⁷- سودلو گیرده چؤرک- کؤکه
⁸- «اقبال» سؤزونون تحریف اولونموش فورماسی
#شعر_اوجاغی
@SheirOcagi
بوردا غم ایچیرم. غریبم، غریب.
یول آچیق اولسا دا، دیل آچیق دئییل.
اوستومه اؤرتولن بو کؤلگه قلیب،
آتا یوردونداکی آلاچیق دئییل.
دونیا گؤز اووودان، آدام اۏتاران،
پایینا نه دوشور یئری گئنیشین؟
کفنی ساری تۆل، تابوتو تۏران،
قبیری گؤی ائودی باتان گونشین.
بو دا اوزاقلارین اۆزه دورماسی،
کولک ده گمیشر¹، گلمه² گولونجه.
غریب آخشاملارین کؤچکۆن دورناسی،
چکر قاطارینی دان سؤکولونجه.
آخشامین آلنیندا سولغون پاریلتی،
بولوددا الهنر توتقونجا شاملار.
نییه سۇماغیدی، نییه پالیدی،
نییه ده قارادی غریب آخشاملار؟
غریب آخشاملارین غمی بیر شله،
یئنه یورد آغیسی³ کؤمهیه گلر.
آیاغین ایلیشسه بو شاخ-شَوهله،⁴
اوتلار دا اوستونه بارماق سیلکهلر.⁵
یولون قۇیۇلانار مئشه قوینوندا،
تکلیگین توش اولار آسیب-کسَنه.
کۏل قابان دۏنۇندا، آیی دۏنۇندا،
کؤتوک قورد دونوندا گؤروکر سنه.
غریبلیک گۆوهسی گۆمانی یئیر،
یوردونا گرَکسن عؤمور داشییلا
بیر قیز سیغالییلا دوغمالاشان یئر،
آتیلیر بیر ائلین چاغیریشییلا.
اؤدَنجی اؤدَنمیر گئدیب ایتَنین،
یالانا بوکولدو غریب ایسمارؽج.⁶
قوجانی سئومهین او عیفریتهنین،
ایلک پایی قۏغالدی⁷، سون پایی قاخینج.
گؤرورم، سنین ده جیزداغین چیخیر،
ییغوال⁸ دَییشیرمی یئر دَییشنده؟
اورک سینیق اولور، دیلک قیوریخیر،
عؤمور اوجوزلاشیر غریب دۆشنده.
اوف! نئجه دؤنوکدو، نئجه قورخونج دو!
کؤتهیی پولسوزدو، کؤمهیی جیبلیک.
حالالجا حاقّیما دئییر کی «بورجدو»،
اوف! سایماز غریبلیک، قییماز غریبلیک.
اوچموشام. گلمیشم. قونموشام اونا.
آدی شَعبَدهلی، یولو شوشهلی.
اوزانیر گۆن دونلو او گۆندۏغانا،
غریب آخشاملارین اوشویَن الی.
#آغا_لاچینلی
¹- شیغیماق
²- اؤزگه یئردن، کناردان گلن- غریب
³- یاسدا آوازلا سؤیلهنن یانیقلی سؤزلر(Ağı)
⁴- آغاج قیرینتیلاری- کۏلکۏس
⁵- هدهلهمک- قورخوتماق
⁶- تاپشیریق- سفارش
⁷- سودلو گیرده چؤرک- کؤکه
⁸- «اقبال» سؤزونون تحریف اولونموش فورماسی
#شعر_اوجاغی
@SheirOcagi
▫️آیریلیق گونونه آزجانا قالیر.
آیریلیق گونونه آزجانا قالیر،
منه گوج گلهجک مندن قوچاقلار.
یاغاجاق عؤمرونه تکلیگین قاری،
دوشهجک یادینا کیمسهلی چاغلار.
آغی دؤیهجکسن یالدا-یاماجدا،
کؤنلونو سیخاجاق ائو آدلی پتک.
کؤزو باش قالدیران کؤهنه یانلیشدا،
گیزلی یاناجاقسان گۏر ائوینهدک.
هرهنین سئوگیسی بیرینه باغلی،
آغریلار سئوینجه بورونوب گلمیش.
سونرا بیلهجکسن... دایان، سن جانین!
بیزیم قایغیلار دا قارا دئییلمیش.
سونرا گؤرهجکسن... آ قاشقاباقلی!
بیزیم سئوگیمیزی صافلیق سووارمیش.
تاخچاسی بوش اولان یوخسول کۇمانین،
سیرالی دیلَکدن دیرهیی وارمیش.
وارمیش یووامیزین بالا قوشلاری،
قویمازدیق بیر گول ده بیزدن اینجییه.
آلاندا بوینونا بو اولموشلاری،
وارلیغین هوپاجاق لال دوشونجهیه.
یانغین بوی وئرهجک یالقیز آنیندا،
کیمسهلی چاغلاری چوخ آناجاقسان.
دوداغیم قوخولو استکانین دا-
نزیک دوداغیندان ماچ آلاجاقسان.
دردین یئللنهجک بئلهدن-بئله،
توستو اَییرهجک کؤنول اوجاغین.
چرچیوه سیغناقلی دوغما شکیله-
اومیدلی اولاجاق سون اوماجاغین.
گئجهن گوندوزونو سونرا یامسیلار،
یوخونا تیکیلر تیکانلی قایغین.
تکلیک یاستیغینی گؤز یاشین سولار،
باتار دۇز چاییندا ایستک قاییغین.
هله قاباقدادی سورغو-سؤاللار،
نییه آغلاییرسان آخی، آی دلی؟!
یئنه ده کسیشَر کۆسۆلۆ یوللار،
یاخینا گلهرم اوزاق گئدهلی.
اؤلوم گؤروشو وار عؤمرون سونوندا،
آخی قالاسییام یادیندا سنین.
بیر آغاج دونوندا، چیچک دونوندا،
یئنه بیتهسییم یانیندا سنین.
#آغا_لاچینلی
#شعر_اوجاغی
@SheirOcagi
آیریلیق گونونه آزجانا قالیر،
منه گوج گلهجک مندن قوچاقلار.
یاغاجاق عؤمرونه تکلیگین قاری،
دوشهجک یادینا کیمسهلی چاغلار.
آغی دؤیهجکسن یالدا-یاماجدا،
کؤنلونو سیخاجاق ائو آدلی پتک.
کؤزو باش قالدیران کؤهنه یانلیشدا،
گیزلی یاناجاقسان گۏر ائوینهدک.
هرهنین سئوگیسی بیرینه باغلی،
آغریلار سئوینجه بورونوب گلمیش.
سونرا بیلهجکسن... دایان، سن جانین!
بیزیم قایغیلار دا قارا دئییلمیش.
سونرا گؤرهجکسن... آ قاشقاباقلی!
بیزیم سئوگیمیزی صافلیق سووارمیش.
تاخچاسی بوش اولان یوخسول کۇمانین،
سیرالی دیلَکدن دیرهیی وارمیش.
وارمیش یووامیزین بالا قوشلاری،
قویمازدیق بیر گول ده بیزدن اینجییه.
آلاندا بوینونا بو اولموشلاری،
وارلیغین هوپاجاق لال دوشونجهیه.
یانغین بوی وئرهجک یالقیز آنیندا،
کیمسهلی چاغلاری چوخ آناجاقسان.
دوداغیم قوخولو استکانین دا-
نزیک دوداغیندان ماچ آلاجاقسان.
دردین یئللنهجک بئلهدن-بئله،
توستو اَییرهجک کؤنول اوجاغین.
چرچیوه سیغناقلی دوغما شکیله-
اومیدلی اولاجاق سون اوماجاغین.
گئجهن گوندوزونو سونرا یامسیلار،
یوخونا تیکیلر تیکانلی قایغین.
تکلیک یاستیغینی گؤز یاشین سولار،
باتار دۇز چاییندا ایستک قاییغین.
هله قاباقدادی سورغو-سؤاللار،
نییه آغلاییرسان آخی، آی دلی؟!
یئنه ده کسیشَر کۆسۆلۆ یوللار،
یاخینا گلهرم اوزاق گئدهلی.
اؤلوم گؤروشو وار عؤمرون سونوندا،
آخی قالاسییام یادیندا سنین.
بیر آغاج دونوندا، چیچک دونوندا،
یئنه بیتهسییم یانیندا سنین.
#آغا_لاچینلی
#شعر_اوجاغی
@SheirOcagi