«پیرایه» اوچون یازیلمیش شعرلر 26

▫️گئجه، قار بیردن‌-بیره باسدیرمیش...
بم‌بیاض بوداقلاردان داغیلان قارغالارلا باشلادی صاباح.
گؤز آلا بیلدیگی قدر، «بورسا» چؤلونده قیش.
باشسیزلیق و سونسوزلوق گلیر عقله.

سئوگیلیم!
دَییشدی مؤوسوم،
چکیشن گلیشمه‌لردن سونرا بیر سیچراماقلا.
و قارین آلتیندا مغرور، هامارات*
سوروب گئدیر حیات...

#ناظیم_حیکمت
* چالیشقان، باجاریقلی
#شعر_اوجاغی
@SheirOcagi

▫️آغلاماق مسئله‌سی

نه تهر ائتمه‌لی ده آغلایا بیلمه‌لی،
باشا دوشمه‌دن؟
نه تهر ائتمه‌لی ده آغلایا بیلمه‌لی
عاییبسیز، آشیکارا، یاغمور میثالی؟

نئیلرسن، آلیشقانلیق.
ایچین قان آغلارکن، اوزون گولر،
دیکیلی‌داش کیمی یئرینده دورارسان یئنه.
یاوروم! یئتیشمک نه موشکول‌موش مگر-
آنالار کیمی آغلامانین ایگیدلیگینه؟

#ناظیم_حیکمت
#شعر_اوجاغی
@SheirOcagi

▫️یاشاماق شوخلوغا گلمز،
بؤیوک بیر جیدّیَت‌له یاشایاجاقسان،
بیر سینجاب کیمی مثلا!
یعنی یاشامانین دیشیندا و اؤته‌سینده هئچ بیر شئی گؤزله‌مه‌دن،
یعنی بوتون ایشین-گوجون یاشاماق اولاجاق!

#ناظیم_حیکمت
#شعر_اوجاغی
@SheirOcagi

▫️سن منیم هر شئییمسن.
و بو هر شئیدن بیر کیچیک ذرّه اسکیلسه،
من بوم‌بوش قالارام.‌

#ناظیم_حیکمت
#شعر_اوجاغی
@SheirOcagi

▫️گلمه‌یه‌جه‌یینی بیله-بیله گؤزله‌مک
عاواملیق دئییل،
عشق‌دیر.

#ناظیم_حیکمت
#شعر_اوجاغی
@SheirOcagi

▫️گئدرآیاق*

گئدرآیاق ایشلریم وار بیتیریله‌جک،
گئدرآیاق:
قورتاردیم جئیرانی اووچونون الیندن،
آما داها بایغین یاتار، آییلامادی.
قوپاردیم پورتاغالی دالیندان،
آما قابیغی سویولامادی.
اولدوم اولدوزلارلا حشیر-نشیر،
آما ساییسی بیر تامام ساییلامادی.
چکدیم قویودان سویو،
آما بارداقلارا قویولامادی.
گول‌لر دوزولدو سینی‌یه،
آما داشدان فینجان اویولامادی.
سئودالارا دویولامادی.

گئدرآیاق ایشلریم وار بیتیریله‌جک،
گئدرآیاق.

#ناظیم_حیکمت
* سون آندا، گئتمک اوزره‌یکن
#شعر_اوجاغی
@SheirOcagi

▫️بیر جزا ائوینده تجریدده‌کی آدامین مکتوبلاری 2

ائشیکده باهار گلدی، عزیز قادینیم! باهار.
ائشیکده، چؤللرده بیردن-بیره،
تزه تورپاق قوخوسو، قوش سسلری و سائیره...

ائشیکده باهار گلدی عزیز قادینیم، باهار.
ائشیکده چؤللرده پیریلتی‌لار...

و ایچریده آرتیق بؤجک‌لری‌یله جانلانان اوتوراجاق‌لار،
سویو دونمایان کوزه
و صاباحلاری سئمئنتین اوستونده گونش...
گونش،
آرتیق او هر گون، گون‌اورتا واختینا قدر،
منه یاخین، مندن اوزاق،
سؤنه‌رک، ایشیلدایاراق،
گئدر...
و گون ایکیندی‌یه دؤنر،
کؤلگه‌لر دوشر دووارلارا،
باشلایار قیزارماغا دمیرلی پنجره‌نین شوشه‌سی:
ائشیکده آخشام اولار،
بولودسوز بیر باهار آخشامی...
ایشده ایچریده باهارین ان پیس ساعاتی بودور اصلینده‌.

خولاصه،
او پول-پول ایشیلتیلی دریسی، آتشدن گؤزلری‌یله،
بالاخص باهاردا رام ائدر اؤزونه، ایچریده‌کی آدامی، حوریّت دئییلن عیفریت...
بو، بالتّجربه ثابیت؛ عزیز قادینیم!
بالتّجربه ثابیت...

#ناظیم_حیکمت
#شعر_اوجاغی
@SheirOcagi

▫️دنیزه قارشی بیر اوتوراجاقدا،
چیینینه باشیمی سؤیکه‌ییب-
سسیندن شعرلر دینله‌مک کیمی،
اوشاقجا ایستک‌لریم اولدو.
باغیشلا!

#ناظیم_حیکمت
#شعر_اوجاغی
@SheirOcagi

▫️حوریّت غوغاسی

یئنه
کیتابلاری، ماهنی‌لاری، بایراقلاری‌یلا گلدیلر،
دالغا-دالغا آیدینلیق اولدولار،
یورودولر قارانلیغین اوستونه،
مئیدانلاری اله گتیردیلر.
یئنه
«بایزید»ده شهید دوشن
سیلکینیب قالخدی قبریندن،
و الینده بیر گونش کیمی داشیییب یاراسینی،
ییخدی «شاهماران»ین ماغاراسینی.

داها گون او گون دئییل،
توپلانیب بۆرمه‌لنمه‌سین بایراقلار!
قولاق آسین،
ائشیتدیگینیز چاققال‌لارین اولوماسی‌دیر!
سیخلاشدیرین صف‌لری، اوشاقلار!
بو غوغا فاشیزمه قارشی،
بو غوغا حوریّت غوغاسی‌دیر.

#ناظیم_حیکمت
#شعر_اوجاغی
@SheirOcagi

▫️فیکیر دئدیگین شئی...
او، شاهلانمیش* بیر دؤیوش آتی،
قالین قبضه‌لی بیر ساواش قیلینجی‌دیر.
بو آت'ا، آتلایاجاق اورک
و بو قبضه‌یه بیلَک گرک.

#ناظیم_حیکمت

* آت، اؤن آیاقلارینی یئردن قالخیزاراق آرخا آیاقلاری اوستونده دورماق
#شعر_اوجاغی
@SheirOcagi

▫️بیر فوتوقرافا

آه،
قارشیمداسان ایشده!...
منه باخماسان دا، اوراداسان،
گؤرورم سنی.
آه، منیم سئوداسیندا من‌جیل،
اوره‌یینده ساغلام سئودیگیم!
قلبیمه باسدیردیم سؤزلریمی،
جسارت تورباسی اولدو اوره‌ییم.
نفَسیمین کسیلدیگی او آن،
الیمی هارا قویاجاغیمی شاشیردیغیم او آن ایشده،
فیکریمدن او قدر چوخ شئی کئچدی کی، دالینی توتامادیم.
اللریم بوشلوقدا، من داردا قالدیم.
اللریم بۇز کیمی، من هاردا قالدیم.
بیر سمفونی وار ایدی قولاغیمدا چالینان،
بیتدی آرتیق هامیسی.

ایچیمه چکیلدیم، او هپ قالدیغیم کۇنجۇمه.
باخیشیم بللی اولدو یئنه.
گئریده قالان، گئدن‌لرین آرخاسیندان باخار.
بیر اسینتی اولاجاق روزگاریم داها قالمادی منیم.
داغلارا چیرپیلدیم هر اسدیگیمده.
یوللاری یامانلادیم هر گئدیشینده.

دئمیشدیم سنه خاطیرلارسان:
اؤنَملی اولان «زامانا بوراخماق» دئییل،
«زامان‌لا بوراخماماق‌»دیر.
ایندی منه، کئچن او زامانین اونودولماز سانجیسی قالار.

گئدن منم‌سه، سؤیله منه، کیمدن گئتدیم؟!
سنده یوخ ایدیم ذاتاً من،
من یئنه منده بیتدیم.

#ناظیم_حیکمت
#شعر_اوجاغی
@SheirOcagi

▫️آه، منیم سئوداسیندا من‌جیل،
اوره‌یینده ساغلام سئودیگیم!
عاغلیما گلیشینی سئویم!
نه گؤزل ده دارمادومان ائدیرسن منی!

#ناظیم_حیکمت
#شعر_اوجاغی
@SheirOcagi

▫️نه گؤزل شئی خاطیرلاماق سنی،
بو قدر قالابالیقدا
و بو قدر یورغونلوق‌لاریمین ایچینده!

#ناظیم_حیکمت
#شعر_اوجاغی
@SheirOcagi

▫️ائی منیم سئوگیلیم!
قارلی بیر چام اورمانیندا نفس آلمانین بختیارلیغینا بنزر،
سنی سئومک.

#ناظیم_حیکمت
#شعر_اوجاغی
@SheirOcagi

▫️جیبیمده یوخ ایدی،
اوره‌ییمدن وئردیم.

#ناظیم_حیکمت
#شعر_اوجاغی
@SheirOcagi

▫️اؤنَملی اولان «زامانا بوراخماق» دئییل،
«زامان‌لا بوراخماماق‌»دیر.

#ناظیم_حیکمت
#شعر_اوجاغی
@SheirOcagi

▫️یالنیزلیق، ظنّ ائتمه‌یین کی کیمسه‌سیز اولماق‌دیر.
اصل یالنیزلیق، کیمسه‌ن وارکن، کیمسه‌سیز قالماق‌دیر.

#ناظیم_حیکمت
#شعر_اوجاغی
@SheirOcagi

▫️آیریلیق

بؤیوک قۏرخوندایدی آیریلیق،
بیردن-بیره قاپین آچیلار کیمی،
بیری‌لرینه آنسیزین سئودالانماق.
اویسا منی سئویرسن،
آما بونون فرقینده دئییلسن؛
آیریلیق بونو فرق ائتمه‌ییشینده‌یدی سنین.
آیریلیق قورتولموشدو یئرچکیمیندن،
آغیرلیغی یوخ ایدی؛
«توک کیمی‌یدی» دئیه‌مم،
توکون ده آغیرلیغی وار؛
آیریلیغین آغیرلیغی یوخ ایدی آما،
اؤزو وار ایدی.

#ناظیم_حیکمت
#شعر_اوجاغی
@SheirOcagi

▫️آرا وئرمک ایسته‌ییرم، حیات!
صبر ائتدیکجه اوستومه گلیر کیمیسن.

#ناظیم_حیکمت
#شعر_اوجاغی
@SheirOcagi