▫️دردین دیزینین دیبینده،
اوتوروب فیکره دالمیشام.
ائله بیل یوز ایلدی بوردا،
دوشوب بوکولوب قالمیشام.

الیم نه آللاها چاتیر،
نه ده سسیم بنده‌سینه.
من اؤزومو سون گوجوم‌له،
بند ائتمیشم، بند، سسینه.

دردین دیزینین دیبینده-
یاشاماق ایسته‌ییم هئچدی.
بیر شاعیر الی جیبینده،
بیر آز اوّل بوردان کئچدی.

#ابوالفتح_مدداوغلو
#شعر_اوجاغی
@SheirOcagi

▫️دویورسان‌می؟ اوره‌ییم-
قفسده قوش کیمی‌دی.
سونونجو نفس ایله-
یئره دوشموش کیمی‌دی.

دویورسان‌می؟ گؤزلریم-
اؤله‌زیییر، کیچیلیر.
نورلا دولو پیاله،
سس-سمیرسیز ایچیلیر.

دویورسان‌می؟ اللریم-
بارماق-بارماق قورویور.
وارلیغیم اوزو سنه،
تک قورد کیمی اولویور.

دویورسان‌می؟ بیر سئوگی،
پاییزینا ییخیلیر.
دینله‌مه منی! قلبین-
دویورام کی، سیخیلیر.

#ابوالفتح_مدداوغلو
#شعر_اوجاغی
@SheirOcagi

▫️سن ایمکانین اولاندا،
یا دا کی ائله-بئله،
قوی تئلفونوم سکسنسین،*
هردن منه زنگ ائله!

ایسته‌ییرسن دانیشما،
تکی هنیرین گلسین!
منه ریشخند ائدن‌لر،
بیر-بیریندن شک‌لنسین.

من‌سه سیخیب کؤکسومه،
او تئلفونا «جان!» دئییم.
«سنینله بیرلیکده‌یم-
هر زامان، هر آن» دئییم.

بلکه ده چوخ گولونج‌دو،
آرزوم دا، امَلیم ده.
اینان، وارلیغین دورور،
سئوگیمین تمَلینده!

#ابوالفتح_مدداوغلو
* دیکسینمک (Səksənmek)
#شعر_اوجاغی
@SheirOcagi

▫️قالدیم اورتالیقدا، فیکریم قاریشیق،
نه قاپیم دؤیولور، نه ده پنجره‌م.
یوخوم دیدرگین‌دی، گؤزوم بولاشیق،
دردله دؤیوشده‌یم، غمه سنگرم.

داغدان ائنن دومان سیخیر گؤزونو،
چاتدیریب، اوستومه ییخیر اؤزونو.
منی تانییانلار آخیر سؤزونو-
صبیرله ساخلاییر، دؤزور- من گلم.

منه دوغما اولان دره- تپه‌نی،
یاخشی تانیییرام، حسرت چکنی.
هر آن گؤرمک اوچون روحوم اؤپَنی
اومیدیم چنه‌دی، اولوب چن، گلم.

اورادا فرق وارمیش یئرله گؤی قدر،
هامی ائیهام وورور- یانیرام هدر.
هر گون سئوه‌جه‌یم مجنوندان بئتر،
هر آن جهد ائده‌جم، سنه تن گلم.

#ابوالفتح_مدداوغلو
#شعر_اوجاغی
@SheirOcagi

▫️هئچ بئله اینجیمزدیم،
سنی تانیماسایدیم.
اؤتوب کئچیب گئدردیم،
یا دا بیر «ائه» ائدردیم-
سنه اینانماسایدیم.

هئچ بئله آغریمازدیم،
کؤنلومو وئرمه‌سه‌یدیم.
آراییب-آختارمازدیم،
سس‌له‌ییب چاغیرمازدیم،
ازلدن گؤرمه‌سه‌یدیم.

هئچ بئله یاشامازدیم،
من سنی سئومه‌سه‌یدیم.
اؤزومله باجارمازدیم،
بو قدر اوجالمازدیم،
سن منی سئومه‌سه‌یدین.

#ابوالفتح_مدداوغلو
#شعر_اوجاغی
@SheirOcagi

▫️سئوگی بیتدی.

بیتدی سنی آغریدان،
او آجی سئوگی بیتدی.
اورک سالدی تاختیندان-
او تاجی؛ سئوگی بیتدی.

گونو سپیب هدره،
بویون اَیدی قدَره.
یئددی قارداش کدَره-
بیر باجی سئوگی بیتدی.

سنه اولدو باش قاتماق،
اونو باشدان باشلاتماق.
«ابوالفتح»ی یاشاتماق-
علاجی، سئوگی بیتدی.

#ابوالفتح_مدداوغلو
#شعر_اوجاغی
@SheirOcagi

▫️سن بوتون اومیدلرین،
قاپیسین کیلیدله‌دین.
قوپموش ورق‌لرینی،
توپلادین، جیلیدله‌دین-
کدرین.

صوبحون کیرپیگینده‌کی،
شئهی منه قوروتدون.
نه‌لر یاشاتدیغینی،
بیله-بیله اونوتدون-
کدرین.

باخدیم، اؤلچدوم، دوشوندوم،
گؤزوم یولدا بوزاردی؛
من حسرتدن اوشَندیم.
یاناقلاری قیزاردی-
کدرین.

بو سئوگینین هر آنی،
منی آلدی قوینونا.
یئرده قویما بو قانی،
سن اونو ییخ بوینونا-
کدرین!

#ابوالفتح_مدداوغلو
#شعر_اوجاغی
@SheirOcagi

▫️آللاهیم! یورولدوم داها،
دینجَلمک کئچیر ایچیمدن.
ییر-ییغیش ائیله‌ین روحوم-
ساکیتجه کؤچور ایچیمدن.

آللاهیم! سسیم ده قیریق،
دیلیم دیشیمه دولاشیر.
دیدیلمَکدن یاخام جیریق،
دیرناغیما قان بولاشیر.

آللاهیم! اوزومده‌کی قان،
قورویور گؤزوم دیبی‌تک.
سنیندی بو سئودالی جان،
آلیب گؤتور، اؤزونه چک!

#ابوالفتح_مدداوغلو
#شعر_اوجاغی
@SheirOcagi

▫️منی آهینا تاپشیر،
سون گوناهینا تاپشیر!
اوزاق، اوزاق توتاجاق،
سن لاپ یاخینا تاپشیر-
اوزونو گؤره بیلیم!

منی غضبینده بوغ،
سئوگی عذابیندا بوغ!
کوسمه‌رم، اینجیمه‌رم،
تکی من هامیدان چوخ-
گؤزونو گؤره بیلیم.

سن آغریت، من ده دؤزوم،
کؤزون یاندیرسین کؤزوم!
ایمکان وئر آخشام، سحر،
گؤزونه باخسین گؤزوم-
اؤزومو گؤره بیلیم!

#ابوالفتح_مدداوغلو
#شعر_اوجاغی
@SheirOcagi

▫️گئتدی عؤمور.

ایللرین اله‌یینده
اریدی گئتدی عؤمور.
بیر آغری بله‌یینده،
کیریدی گئتدی عؤمور.

الی اله یئتمه‌میش،
اوزوندن سو گئتمه‌میش،
اوشاقلیغی بیتمه‌میش،
یئریدی، گئتدی عؤمور.

یار دیلین اؤیره‌ننده،
اؤزونه اؤیره‌دنده،
سئوگیسین گؤیَردنده،
چورودو گئتدی عؤمور.

#ابوالفتح_مدداوغلو
#شعر_اوجاغی
@SheirOcagi

▫️دوروب اوزو دان یئرینه،
اونوت نه‌ قدر کی درد وار!
اونوت، بیل کی بو دونیادا،
سئوینمک اوچون ده شرط وار!

یاخانی آچ شفق‌لره،
نورا بله‌نیب نوردان کئچ!
دوشون امتحان وئریرسن،
نئچه مینینجی توردان کئچ!

دؤزومون اومید بؤیوتسون،
اؤزون اؤزونه مایاک* اول!
حسرت بیرآز فورصتچی‌دی،
سن اؤز سئوگینده اویاق اول!

#ابوالفتح_مدداوغلو
* دنیز فنری
#شعر_اوجاغی
@SheirOcagi

▫️من گون ایشیغی کیمی،
گؤزله‌ییرم تر دردی.
نم‌دیسه، کیرپیگیندن،
گتیر گولوم، سر دردی!

دیش-دیرناق‌لا قازیرام،
سینه‌مه آد یازیرام.
اوووتماغا حاضیرام-
کورلوک* ائدن هر دردی.

ائله سئو، هامی بیلسین!
اوو، اللریم ایسینسین!
عؤمروندن تانری سیلسین-
قادا، بلا، شر دردی!

#ابوالفتح_مدداوغلو
* شیلتاق‌لیق (Kürlük)
#شعر_اوجاغی
@SheirOcagi

▫️بیر سئوگینین قورونو،
صبریم‌له تونقال سایدیم.
کیرپیک‌له اود گؤتوروب
سینه‌می مانقال سایدیم.

دؤزوب دوردوم عینادلا،
اوچدوم سینیق قانادلا.
قویمادیم کی قانادا،
دردلری یونقار* سایدیم.

عؤمره ایشیق چیله‌دیم،
گونو گونه بله‌دیم.
ساچیما دن اله‌دیم،
اونو دا سون قار سایدیم.

#ابوالفتح_مدداوغلو
* تاختالار یونولارکن میشارین آغزیندان تؤکولن نازیک تاختا پارچالاری، میشار کپه‌یی
#شعر_اوجاغی
@SheirOcagi

▫️دردی یاخین بوراخیب
فیکیر ائله‌مه، گولوم!
هر آددیمی نیّت‌له،
ذیکیر ائله‌مه، گولوم!

حسرت سینه‌مده چاخیب،
قانیم سو کیمی آخیب.
سنه بیر دلی باخیب،
شوکور ائله‌مه، گولوم!

روحومداکی هر ذرّه،
هم خئییرله، هم شرله،
بیرلشیب سن بشرله.
فیکیر ائله‌مه، گولوم!

#ابوالفتح_مدداوغلو
#شعر_اوجاغی
@SheirOcagi

▫️من بیر آز اؤزومو سئودیم،
اوندان بیر آز آرتیق، سنی.
اؤزومو سئویب قورتاردیم،
سن اولدون روحون وطنی.

نه آغ، نه قارا سئچمه‌دیم،
نئجه وار، ائله گؤتوردوم.
چکدیم بولودو باشیما،
هر گون ایلدیریم اؤتوردوم.

تاپدیم روحومون سؤزچوسون،
بیر گؤزل اوفوق آچیلدی.
ایتیردیم یولون اؤلچوسون،
اوره‌ییم سنه قاچیردی.

#ابوالفتح_مدداوغلو
#شعر_اوجاغی
@SheirOcagi

▫️سن بو شهرده ایدین،
من بو شهره گلدیم.
بو، آلین یازیم ایمیش،
من اوزومه آچیلان،
نورلو صاباحا گلدیم.

سن بو شهرده ایدین،
گلمیشدین مندن اؤنجه.
بو، آلین یازیم ایمیش،
یولومو گؤزله‌ییرمیش،
منیم بوردا بیر غؤنچه.

سن بو شهرده ایدین،
اوره‌یینده‌کی اودلا.
بو، آلین یازیم ایمیش،
سئوگیندن دلی اولوب-
تانینماغیم بو آدلا.

سن بو شهرده ایدین،
من ده گلدیم، تام اولدوق.
بو، آلین یازیسی‌یدی،
بیر اورکده ایکیمیز،
مشعل اولدوق، شام اولدوق.

#ابوالفتح_مدداوغلو
#شعر_اوجاغی
@SheirOcagi

▫️اؤزون اؤزونه، گولوم،
چوخ اولسا دا دوست-تانیش،
هردن مندن ده دانیش،
یادیندا تزه‌لنیم!

سؤیله اوزومه، گولوم،
منم سنین قادان دا!
شیرین تیکه داداندا،
دادیندا تزه‌لنیم.

کاش کی اؤزوم ده، گولوم،
قلبه ایشیق‌تک دولان،
سئوگیمه آنا اولان،
قادیندا تزه‌لنیم!

#ابوالفتح_مدداوغلو
#شعر_اوجاغی
@SheirOcagi

▫️آچیلان سحر اوچون،
دوعا ائتدیم- ال آچیب.
بو آچیلان سحرده،
بیر اومیدیم دیل آچیب.

دویغولاریم ائله بیل،
یاز شئهینه بله‌نیب.
گونش شوعاعلاری‌تک،
اوست-باشیما اله‌نیب

کؤنلومده حیات عشقی،
بیر اومیددن اود آلیب.
بو اومید، آچیلاجاق-
سحرلره اود سالیب.

#ابوالفتح_مدداوغلو
#شعر_اوجاغی
@SheirOcagi

▫️سارماشیب بیر-بیرینه،
دوغمالاشیب گول-چیچک.
آریلار آمان وئرمیر،
گول-چیچه‌یه ال چکک-
اوخشایاق.

آل-الوان کپنک‌لر،
یامان چاشدیریر بیزی.
گیزله‌ییر قانادلاری،
گؤرونمور گولون اوزو-
اوخشایاق.

سرگی آچیب اؤزونه،
بو تالادا گؤزل‌لیک.
آچیلان بو سرگینی،
گؤزوموزده اوزرلیک-
اوخشایاق.

#ابوالفتح_مدداوغلو
#شعر_اوجاغی
@SheirOcagi

▫️اوتورموشوق، کیمینسه
گوناهینی چؤزوروک.
گوناهلارین یئرینه،
اؤزوموزو اوزوروک،
بوداقدان یارپاق کیمی.

گاه چؤهره‌میز دَییشیر،
گاه سسیمیزین تونو.
بوتون اوزونتولرین،
بللی‌دیر بیزه سونو،
بیر اوووج تورپاق کیمی.

کیمینسه گوناهیندان،
دانیشیب کوسوشوروک.
سئوگیمیزین آهیندان،
اوتانیب بوزوشوروک،
سارالان یارپاق کیمی.

#ابوالفتح_مدداوغلو
#شعر_اوجاغی
@SheirOcagi