‍ ‍ ▫️یادیما دوشوبدو.

او داغلارسیز باغریم شان-شان اولوبدو،
چمن، چیچک، چؤل یادیما دوشوبدو.
«قروَند یوردو»، «ممّداؤلن»، «سؤیودلو»،
«نووروز دوشَن گؤل» یادیما دوشوبدو.

پای آپاریم، چانتاسینی دولدوروم،
خان‌چوبانا بیر بایاتی چالدیریم.
آخشام‌اوستو غضب‌لنن ایلدیریم،
شاققیلدایان سئل یادیما دوشوبدو.

اینجه بئلده پاریلدایان آغ سنَک،
یاشیللیقدا یوز رنگ چالان کپنک،
بوزلو قوزئی، چیه‌لک‌لی بیچه‌نک،
گؤبلک‌لی یال یادیما دوشوبدو.

آی وورولموش! آیاق یالین، قول آچیق-
او دره‌ده نه گزیرسن؟ بئله چیخ!
آنام منی چاغیردیغی آلاچیق،
شیلله‌له‌ین ال یادیما دوشوبدو.

آی «شوجاعت»! گئج آنمازدی یار آنان،
ایلاهیدن گؤزل-گؤیچک یارانان.
سحر-سحر بولاق اوسته دارانان،
بیر عطیرلی تئل یادیما دوشوبدو...

#شوجاعت_کلبجرلی
#شعر_اوجاغی
@SheirOcagi

▫️منی تانیماز.

گئری دؤنسه جاوانلیغیم، مات قالار،
هؤنکور-هؤنکور آغلار، منی تانیماز.
دانیشارام، درد آلیشار دیلیمده،
او بختوَر چاغلار منی تانیماز.

اؤیرَشمیشم، هر عذابا دؤزه‌رم،
کول اولموشام، بیر ده چتین کؤزه‌رم.
بولبول کیمی نغمه دئییب گزه‌رم،
گول باغچالار، باغلار منی تانیماز.

کؤورَلمیشم، گؤزومده نم گلمیشم،
قوجالمیشام، قلبیمده غم گلمیشم.
آند ایچسم کی، «شوجاعت»ام، گلمیشم،
آتام-آنام، داغلار، منی تانیماز.

#شوجاعت_کلبجرلی
#شعر_اوجاغی
@SheirOcagi

▫️منیم خوشبخت‌لیگیم

منیم خوشبختلیگیم اونونلا گئدیب،
بیر ده بو یئرلره گله... گلمه‌یه.
من قان آغلاییرام آیری دوشندن،
ووصال گؤزلریمی سیله... سیلمه‌یه.

اؤزگه‌یه قوینونو آچان سعادت،
الیمدن قوش کیمی اوچان سعادت،
مندن ایللر بویو قاچان سعادت،
تزه‌دن اوزومه گوله... گولمه‌یه.

بیلمیرلر حیاتیم اولوب دربه‌در،
دئییرلر، گئجه‌یه دؤز گوندوز قدر!
بیچاره «شوجاعت» او واختا قدر،
کیم بیلیر، آی ائللر! اؤله... اؤلمه‌یه؟

#شوجاعت_کلبجرلی
#شعر_اوجاغی
@SheirOcagi

▫️قاییت گل!

یامان چتین ایمیش سنسیز یاشاماق،
کؤنلوم گئجه-گوندوز آغلار، قاییت گل!
سئوه‌نی بیر گونده یوز یول اؤلدورر،
یارسیز اؤتوب کئچن چاغلار، قاییت گل!

دئمه کئچن کئچیب، اولان اولوبدو،
واخت اولوب بوشالان بیر ده دولوبدو.
سن گئدندن سارالیبدی، سولوبدو،
گول آچمیر باغچالار-باغلار، قاییت گل!

حسرتین عؤمرومون سارایین سؤکور،
قلبیم هارای چکیر، گؤزوم قان تؤکور.
«شوجاعت» وطنده غریبلیک چکیر،
غوربته دؤنوبدو داغلار، قاییت گل!

#شوجاعت_کلبجرلی
#شعر_اوجاغی
@SheirOcagi

▫️کیمی

کاش رسّام اولایدیم، ائله رسّام کی،
چکه‌یدیم بختیمی اولدوغو کیمی!
یازماق‌لا نه اولسون؟ اوندا گؤره‌یدیم،
آرزومو-عشقیمی اولدوغو کیمی.

عشقیمین توفانین، بورانین، یازین،
سولموش چیچک‌لرین، یوخ اولموش ایزین،
چکه‌یدیم گؤزلرین سئودیگیم قیزین،
سوزولوب خیالا دالدیغی کیمی.

«شوجاعت»، معنالی یاشا، یارات، آن!
وفاسیزا آغری گیزلَت، یارا دان!
سالماسین هئچ کسی بیر ده یارادان-
منی نظریندن سالدیغی کیمی!

#شوجاعت_کلبجرلی
#شعر_اوجاغی
@SheirOcagi

▫️من اولایدیم!

سینمایایدی قانادلاریم،
قوش یئرینه من اولایدیم.
اوچایدیم دوز «دلی‌داغ»ا،
کاش یئرینه من اولایدیم!

عؤمور تالان، حیات یالان،
درده دوشسون درده سالان!
او داغلاردا مغرور قالان،
داش یئرینه من اولایدیم!

«شوجاعت»ی اونوتما سن!
حسرتین‌دی منی دیدن.
یاناغیندان آخیب گئدن،
یاش یئرینه من اولایدیم!

#شوجاعت_کلبجرلی
#شعر_اوجاغی
@SheirOcagi

▫️کاش اولمایایدی!

اؤلومه نه وار کی؟ بیر دفعه‌لیک‌دی،
سئویب آیری دوشمک کاش اولمایایدی!
نغمه‌لر قوش کیمی قانادلاناندا،
گؤزلردن سوزولن یاش اولمایایدی!

منیم قلبیم کیمی اینله‌مز کامان،
ایلک عشقی ایتیرمک یاماندی، یامان.
کؤنوللر اودلارا قالانان زامان،
اورک‌لر برکیییب داش اولمایایدی.

من سنی سئویرم؛ سن واری، پولو،
گؤر هاردان دوشوبدو عشقیمین یولو!
نه منیم اوره‌ییم بیر بئله دولو.
نه سنین اوره‌یین بوش اولمایایدی!

سیلینمز سینه‌مدن بو دوگون، بو داغ،
گزدی گنجلیگیمی غم بوداق-بوداق.
حسرتدن، مؤحنتدن تیتره‌ین دوداق،
کدردن چاتیلان قاش اولمایایدی!

«یار» دئییب آغلاییر کؤنلومون سازی،
بیر گونده یوز دفعه یانیرام آزی.
«شوجاعت!» هئچ کسین باهاری، یازی،
دؤنوب بیردن-بیره قیش اولمایایدی!

#شوجاعت_کلبجرلی
#شعر_اوجاغی
@SheirOcagi

▫️گلمه‌یه‌یدیک...

آنا داغلار! دیله گلیب-
آغلایایدین، گلمه‌یه‌یدیک!
بیردن اوچوب یولوموزو،
باغلایایدین، گلمه‌یه‌یدیک!

بوردا هر گون، بوردا هر آی،
«یوردوم» دئییب چکیر هارای.
هره‌میزدن بیر عزیز پای،
ساخلایایدین، گلمه‌یه‌یدیک.

«شوجاعت»ام، ائللر کیمی،
اینله‌یه‌رم تئللر کیمی.
چایلار کیمی، سئللر کیمی،
چاغلایایدین، گلمه‌یه‌یدیک!

#شوجاعت_کلبجرلی
#شعر_اوجاغی
@SheirOcagi

▫️ایندیدن آغلا!

دوغولاندا آللاه بیزه دئییر کی،
سونراکی حالینا ایندیدن آغلا!
بو شیرین حیاتین سونو زهَردیر
غوغانا، قالینا ایندیدن آغلا!

سن اوشودون... دومانا نه، چنه نه؟
سن اود توتدون... اود اله‌ین گونه نه؟
قیفیللی دیلینه، داغلی سینه‌نه،
قانداللی قولونا ایندیدن آغلا!

باخما تانیشین دا، دوستون دا چوخدور!
کیمین نه وئجینه کیم سنی ییخدی؟
بودره‌سن، باخارسان بیرجه‌سی یوخدور،
ساغینا، سولونا... ایندیدن آغلا!

عونوانین ایته‌جک، ایزین ایته‌جک،
اوجاغین ایته‌جک، اودون ایته‌جک،
یاخینین ایته‌جک، یادین ایته‌جک،
اوبانا، ائلینه ایندیدن آغلا!

دونیا دا گؤزل‌دیر، دئمیرم ال چک،
آنجاق عمل‌لرین قالاجاق بیر تک.
اودلاردان کئچه‌جک، داشدان کئچه‌جک-
یولونا، ایزینه ایندیدن آغلا!

#شوجاعت_کلبجرلی
#شعر_اوجاغی
@SheirOcagi

▫️بیلمه‌دیم

درد سینه‌مده داشا دؤندو،
آللاه! اریده بیلمه‌دیم.
قان آغلایان اوره‌ییمی،
بیر یول کیریده بیلمه‌دیم.

یولدا، ایزده قالدی گؤزوم،
بوزا دؤندو اودوم، کؤزوم،
چوخ چالیشدیم؛ آی دوز سؤزوم!
سنی یئریده بیلمه‌دیم.

«شوجاعت!» سولدو باغ‌لاریم،
قورودو بوز بولاق‌لاریم.
آز-چوخ بختوَر چاغلاریم،
قالدی گئریده؛ بیلمه‌دیم.

#شوجاعت_کلبجرلی
#شعر_اوجاغی
@SheirOcagi

▫️قاییت گل!

یامان چتین ایمیش سنسیز یاشاماق،
کؤنلوم گئجه-گوندوز آغلار. قاییت گل!
سئوَنی بیر گونده یوز یول اؤلدورَر-
یارسیز اؤتوب کئچن چاغلار. قاییت گل!

دئمه کئچن کئچیب، اولان اولوبدو!
واخت اولوب بوشالان بیر ده دولوبدو.
سن گئدندن سارالیبدی، سولوبدو،
گول آچمیر باغچالار، باغلار. قاییت گل!

حسرتین عؤمرومون سارایین سؤکور،
قلبیم هارای چکیر، گؤزوم قان تؤکور.
«شوجاعت» وطنده غریبلیک چکیر،
غوربته دؤنوبدو داغلار. قاییت گل!

#شوجاعت_کلبجرلی
#شعر_اوجاغی
@SheirOcagi