اومور گؤیلوم کوسور گؤیلوم آی آنا
دوسداقلانمیش اسیر گؤیلوم! آی آنا
آرزوسون قان قوسور گؤیلوم آی آنا
«بو دونیایا یولون دوشسه بیر ده گل»


روحو واختسیز اورلانمیش بیر بوستانام
کهنه درددن اوخونمامیش داستانام
چوخ داریخیر آیاغینا آستانام
«بو دونیایا یولون دوشسه بیر ده گل»

کئچدی عؤمور اؤتدو گونلر گلمه‌دین
قیز نه ایستر آناسیندان بیلمه‌دین
سوردوم آنا گلرمی‌سن؟! دینمه‌دین!!!
«بو دونیایا یولون دوشسه بیر ده گل!»

سن گئدندن حسرت ائدیر آنالیق
چابالاییر سودان ایراق بیر بالیق
گزدیریرم باشیمدا من هاوالیق
«بو دونیایا یولون دوشسه بیر ده گل»

شئه‌لی گؤزوم، اوره‌ک داغیم، داغ‌لادی
انتظارین داش باغریما باغلادی
یولا باخان پنجره‌ ده آغلادی
«بو دونیایا یولون دوشسه بیر ده گل»

#حکیمه_باباکشی‌_زاده«نغمه»
@SheirOcagi

بو گون، دوننیمین، گله‌جه‌ییدیر
قهر=qəhr ائتدیییم گونو، سرسم گزیرم
اؤز سرخوشلوغومدا دلی شاعیرم
دوننه قاییدیب من غم گزیرم.

عؤمور آغاجیمین کالی چیرپیلمیش
آیریلمیش بوداقدان هاچا یوللاریم
دینجلیک نوبارلیغین دادمامیش بئله
سانمادیم یئل آیاق قاچا یوللاریم

قوی دوشونوم بیراز... نه ائتمیشدیم من
یوللارین خوشونا گلمه‌میشدیم من!
قایالار اوچاندا دوشدویوم یولا
سو اولوب داشلاری دلمه‌میشدیم من

یانسین یولو بئله آنلامازلیغین
یول_یولاق بیلمه‌دیم ، آنلامادیم من
قوشولوب قاچاندا بو یول‌لا نییه
دلی قیز شاعیری دانلامادیم من

قایتاراجاق منی اؤزومه بو یول
بیلیرم اوستومه بیر آد قویاجاق
من یولونا قوربان اولدوغوم بو یول
پیرسیدیب اوزونو، دؤنوب، دویاجاق

من یولا وورغونام، یول ایسه منه...؟!
بئله محبتدن مرض آرتاجاق
سئوگیدن خولییا باشلاناجاقسا
بیر باشدان آیریلیق دنین دارتاجاق

یوخ! بو خیاللاری دوروم آیاغا
سویوندوروم اینین، آغا گئیینسین
گلین کؤچه بیلمز بو خیال بئله
آپاریم دردینی سویا دئیینسین

آییلدی بو یولسوز ... یول یولا دوشدو
من گئتدیکجه بئله گئتدیییم یولو
عؤمورون ایشیغی کؤزردی یولدا
بیر اوجدان باشلاندیم بیتدییم یولو

ایلاهی نو نئجه یولدور دوشموشم
یول کسن ده اؤزوم، یول گؤسترن ده
ایندی دولاشیبدیر آغلیمین اوجو
نه اولار آزغینا یول گؤسترنده...

#حکیمه_باباکشی_زاده«نغمه»
@SheirOcagi

گئجه‌م کئچیب دؤرد گوندوزو
یوخوم گؤزده توربالانیب
کؤکسوم اوسته آت چاپیشیب
اؤلوم اوسته نال قالانیب

کیم جان وئریر، کیم قان تؤکور...
درد بوینوزو قارین سؤکور
آستار اؤزون اوزه بوکور
تنیم ایچره روح دالانیب

یووارلانیر بیر شاعیره
بوجاقلانیر بیر داییره
یئردن گؤیه، گؤیدن یئره
داش آتیلیب، سو جالانیب

سینه‌مده کی قان_یاش گؤلو
قازارکن بیر اینسان دؤلو
یئرده قویدو بیرجه اؤلو
گور چاپیلیب، روح تالانیب

ایچیمده نار دنه‌لنیب
اوجاغیما سو چیله‌نیب
دویغولاریم گوه‌لنیب
دیلیم_دیلیم پارچالانیب

کؤنلومده بیر کیلکه‌لی قیز
منده گزن بیر دلی قیز
سونسوزلوقدا ازلی قیز
اؤلوم کیمی تک یارانیب

من گئدیرم هوشدان داها
یارانیشدان، باشدان داها
قیوراق اولوم قوشدان داها
بوینوما بیر
قول
دولانیب...


#حکیمه_باباکشی_زاده«نغمه»
@SheirOcagi

سن ائله بیر سورغو وئریرسن کی من...
بیلمیرم آغلاییم یوخسا گولوم
دانیشمیرمی گؤزوم، ائشیتمیرمی سن؟!
داها سووال وئرمه نه اولار گولوم!

دئییرسن؛ دینمیرسن، دانیشمیرسان سن!
داشدان سسمی گلر، مندن سس گله؟!
قوی عزیزیم بئله سوکوت دانیشسین
بلکه لال دیلیمده سسیم دینجه‌له

آه گولوم‌مو دئدیم؟! گول نه گول آخی!
هر بوداغیندا یوز تیکان جوجریر
آغاجی درد ایچیر، یارپاق ائنله‌نیر
گولون گول آغزیندان، قان اییسی گلیر.

بیز بیر باغین قونشو گولو اولمادیق
بیزی چؤللرده داش، آلاق تانیدی
بیزیم سسیمیزده چاخماق سسینی
داغدا داش اوره‌ک داش... قولاق تانیدی

بیلن اولمادی کی اوفاق اوفاق بیز
هر پاییز گؤروشون داددیق اووولدوق
ورته کؤنوللو...درد_درد توخوملوق...
سپیلدیک یئنیدن... بیز داش دوغولدوق.

#حکیمه_باباکشی‌_زاده «نغمه»
@SheirOcagi

گونلر او بویادا دئییللر
هئچ گئجه‌لرده.
بیری رنگین آتیر
بیری سوزالیر
بوجاقلارا سیغینان یئتیم کیمی،
گؤزلرینده یوخو دیکسینیر،
اوره‌یینده قفیلدن
سینار سسی گلمیش یئتیمدیلر گئجه_گوندوز
دئمه گون سنه دیرسکله‌نیب قالخیرمیش
حضورون گئجه‌یه هوپورموش
یوخلوغون قان دامیر آنلارین اوره‌یینه
اؤدو یاریلیر دان یئری سؤکولدوکده
قابیقدان چیخیر گئجه
ایلان آغزینی آچدیقدا سحر.
دئمه خئییرلی اللرینین
گیزلین یئری وارمیش کؤینه‌یینین اتیینده
دئمه حیات تاخما آدینیمیش سئوگی‌جان!


روزها به رنگ همیشگی نیستند
شبها هم.
یکی رنگ میبازد
یکی نحیفتر میشود
مثل یتیمی که به گوشه پناه میبرد
در چشمهایش خواب یکه میخورد.
یتیم‌یست شب و روزها
که ناغافل
از درونش صدای شکستنی می آید.
نگو خورشید از پهلو به تو تکیه میداده و در میامده است
نگو آرامشت را شبها به جان کشیده بودند
نبودنت خون میچکد بر قلب لحظه‌ها
زهره‌اش میترکد سپیده دم
پوست می‌اندازد شب
وقتی که سحر دهان افعی اش را باز میکند
نگو که دست به‌خیرت
جای پنهانی در آستینت داشته
نگو که حیات اسم مستعارت بوده عشق‌جان!


#حکیمه_باباکشی_زاده«نغمه»
@SheirOcagi

داغیلیر هر سحر آخشام نئچه کؤنلوم یوواسی
بیر تاوان‌سیز خیالی کاش سئچه کؤنلوم یوواسی

بیچیلیب اینینه دوستاق روحومون دار بدنی
کئشگه بیر جوت قانادا گؤی بیچه کؤنلوم یوواسی

ها قان ایچدیم عطشیم سوسمادی دیلسیز یارامی
بیر ایچیم قان قانی سسسیز ایچه کؤنلوم یوواسی

یئرلی‌‌یئرسیزدی منیم تنهالیغیمدان اوره‌ییم
کئشگه یئرسیزلییه یئردن کؤچه کؤنلوم یوواسی


اتجه‌لیکدن قانادیم سئلبه دادیب باغ-بره‌ده
کاش آغاجلار بوداغیندان کئچه کؤنلوم یوواسی

کئچیر الدن اله رببیم بئله جیسمانی دیلکلر
قویما کؤچسون داها هئچدن هئچه کؤنلوم یوواسی

#حکیمه_باباکشی‌_زاده«نغمه»
@SheirOcagi

▫️گولله‌لر یاغدی مین اللی کی چیچکلندی یارام
اوره‌ییمدن وورولوب مرمی لچکلندی یارام

مخملی دویغومو بیر سسلی‌حوزون جیرمالادی
حسرتین اود چاغینا یاندی ایپکلندی یارام

آرزولار آرخاسی بوشدان دولو بیر بوشلوق ایدی
رؤیالار فخرینه سؤیکندی، کوره‌کلندی یارام

اوره‌ییم آلدی گؤزومدن گؤروشون پای وطنین
ساغالیب گؤر هیجانلا نه اوره‌کلندی یارام!

آجیلار امدییینی قوسدو زهر سانجیلاریم
گؤروشون بال وه‌ده‌سی قاندا پتکلندی یارام

چیچک آچمیشدی یارام ایضطیراب ایچره لالاسی
سوورولوب درد باشینا بیر ده لچکلندی یارام

#حکیمه_باباکشی‌_زاده«نغمه»
@SheirOcagi

▫️بالا باتمیش بوداغی شاندا اوتوز بئش مین آغاج
گؤرر اویناق یئری جئیران دا، ... اوتوز بئش‌مین آغاج!

کؤنلومه قان تؤکولور، گؤیده گؤیرچین اوچوشون
یئنه وورهای اکیلیر قاندا اوتوز بئش مین آغاج

سن دئیردین کی سوجاق یئرده اکین مؤو یا سؤیود
کؤکؤ گؤزدن یاش آخیر جاندا اوتوز بئش مین آغاج

سنه لبئیک دئیه‌جک، یازدا یاشیللیق روحونا،
یووا اولموش قوشا اورماندا اوتوز بئش‌مین آغاج

سره‌جک کؤلگه‌سینی خاطیره‌لردن تپه‌یه
چالاجاق باغلاما هریاندا اوتوز بئش مین آغاج

سنی آختارمادا تبریز یولو «توحید» دئیه‌رک
تاپاجاق ایپ اوجو حئیراندا اوتوز بئش مین آغاج

سازینین سیزلاماسین خوش دیل ایله خوش دیله‌یر
مئشه‌لردن او اول əvəl باندا اوتوز بئش مین آغاج

خییاوین چای قیراغیندا، حتم‌ین باغ مئشه‌سی
چاتدیرار سس سنه، جان جاندا اؤتوز بئش مین آغاج

#حکیمه‌_باباکشی‌_زاده«نغمه»

#توحید_نوروزی‌_نین_شرفینه
@SheirOcagi

▫️کؤرپه دویغوم، آنا سئوگیم و همن ناز باخیشین
یئترایمیش بو کؤنول وارلیغینا سؤز باخیشین

یاشاییر گیزلی خییوو روحلو محبت بو اوره‌ک،_
قانی آخماز یارا...، مرحم منه تبریز باخیشین!

چیرکابین تهلوکه‌سین پوزماغا جان آتدی گؤزون
مصلحتدیر دئیه یاخمیش آجی بیر دوز(duz) باخیشین

اوره‌ییمله باخیشیمدان خبرین اولمایاراق
یئنه اینصافسیز اؤتوب سوزدو یاواش گؤز باخیشین

اورتا یاشلی قادینین سرت باخیشیندان ایرلی
سئچمک اولماز دئمه‌ سن، بیر قادینین قیز باخیشین

دئمه‌دیم گؤزلرینی زحمته سال، یوخ، قاداسی
خیالیم تاخجاسینا بیر سیرالیق دوز(düz) باخیشین

آسیلی کؤرپودو سانکی اوجو باغلی گؤزونه
بیر طرفدن دیره‌نیبدیر یاخاما دوز باخیشین

دوندورار، مین هیجانلا آچیلان سؤزلو دیلی،
کؤنول آدلی قوشو یالقیز یووادا، بوز باخیشین


#حکیمه‌_باباکشی‌_زاده«نغمه»
@SheirOcagi

▫️من سنی سئویردیم، سئچمیشدیم آخی
آلمایایدین کئشگه اؤزونو دوستوم
او حؤرمته نئجه یومدون گؤزونو
نئجه یومدون نئجه گؤزونو دوستوم

نئجه قییدین منه، قییدین دوستلوغا
من کی جان دئییردیم، جانیمی آلدین
دئدیم آل اوره‌یی، آلیب سیندیردین
گؤزومه ده بئله یاخشی آغ سالدین..!

سینان قلبیمه یوخ، ووقاریما یوخ
ازیلن ایناما حئیفسه‌نیرم
غرورلا گزدیییم زیروه‌نی ایندی
شماتتله پئشمان پئشمان ائنیرم

نه دئمیرم نییه ایمام دئییردیم...!
نه ده دانلامیرام اوره‌ییمی من!
اللریندن آلیب آتا بیلمه‌دیم
بو محبت آدلی گره‌ییمی من!

آند ایچردیم سنین باشینا بیر گون
ایندی ده ایچیره‌م آغری_آجینی
گل آل سوپوردویوم سینیقلاریمی
سئچ گؤتور باشیمدان دوشن تاجینی


ایندی نه دئییم من، نه دئییم دوستوم؟!
ووردوغون یارایا، دئدییین سؤزه
چیخارتدیغین گؤزه، کسدییین باشا
بورونون دا کسیب آتدیغین اوزه
سن سؤیله نه دئییم، نه دئییم دوستوم؟!

#حکیمه_باباکشی_زاده«نغمه»
@SheirOcagi

◽قوجاغیم آچیقدیر
ای منی اؤپمه‌یه جان آتان کدریم
بوتون هیجانلارینی بوخچالا اود هدیه‌لییینه
گل قوتلایاق بیرگه‌لییمیزی
بو آخشام ماساسینا بیر جوت
دوپ دورولوق آلمیشام گؤزه
سیخ اللریمی
یالوار ال چکمه‌دن اسکی‌دن آرخامجا گزدیردییین کؤلگه‌ن کیمی،
باشلا تپه‌دن دیرناغا سووورماغا
قوور قانیمی
قوی دریم اود توتسون
دوداغیندا گتیردییین آلیشیقلارا.
یومروغوم بویدا بیر قوربانلیق کسه‌جه‌یم آیاغینا
اوتاغیمین قارانلیق ساعاتیدیر گؤروشه کئچن دقیقه‌لریمیز
قاپینی چالمادان فیرلات آچارینی
تاخیل اوره‌ییمین باشینا
اوتور آدینا آلدیغین اؤزل یئرینه
آل الینه شاهلیغینی
آت ایمضانی سؤزلشمه واراغینا؛
بیتمه‌سین ازلدن باشلامیش بو گیزلی ائولیلیک
اوخو؛
دوشسون داغلارا آهین...

#حکیمه_باباکشی‌_زاده«نغمه»
#شعر_اوجاغی
@SeirOcagi

◽حیاتدا یالنیز ائنیش یوخوشدان دئییل
شاشدیریلماغیمیز.
شاشقینلیق بارماغی
حیاتین هامار یولونون
غفیل چالا چؤکک‌لریندندی
دیشیمیز آراسیندا...

قیزیلی قان ایچینده
یارامیزدا دئییل
بم-بیاض، گؤزل-گؤیچک، پارلاق دریمیز آلتیندا
سیزلایان آجیدیر
گیزلی سیرّیمیز.

غفیل اولایلار چاغی
چاشقینلیقدا چالیقلامامیز،
آنلاماز اوشاغین هوشونو گلیشدیرمک اوچون
الینه وئریلمیش اویونجاقدیر سانکی
عؤمور پازئلیمیز.

گله‌جک گلمه‌یینجک
یارانیشین دارک(dark) آدلی آدلانان حیصّه‌سیدیر
او قدر وار
او قدر یوخ
او قدر دانیلماز
او قدر گؤرولمز
او قدر آندی ایچیلمز وارساییم...

حیات الی بیچاقلی شرطچی‌لر الینده
کسیلمه‌میش قارپیزدیر
اؤز بوستانچیلیغینا گؤونسن ده بئله،
بعضاً
ایچینین اولامیشلیغی‌یلا
اؤزوندن اوزونه آچار شوبهه یولونو.

هر شئی بو قدر حیاتدیر حیاتدا دئمه‌لی...

#حکیمه_باباکشی‌_زاده«نغمه»
#شعر_اوجاغی
@SheirOcagi

◽بیر چتین درس کئچیریب سیندی سیناقلار آدامی
دنگه‌لوش ساندی باشین یاردی قیناقلار آدامی

دویغولار باشقانی‌ ایمیش دئمه سن درد آدامی
مملکتمیش!، ایچ ایچه مین بیر اوتاقلار آدامی

یئتیره‌ر شاه دامارین تک سنه قان، عطری شفا...
گؤرمه‌سن ده یاخینیندیر بو اوزاقلار آدامی

نه یازیق آمما کی دونیا دونونون آغ بویاسین
لکه‌سیز قویمادیلار اصلا دوزاقلار آدامی

پریشان احوالی سهمان ائده بیلمم دئیه‌رک
اوخشادی سوچ تئلینی گیزلی داراقلار آدامی.

دؤورانین دؤورو دؤنوب بیر دؤنمه چاتماسا دا
تلسیک اؤز نفع‌ینه دؤندو واراقلار آدامی

آمما دونیا اومودا باغلی بشر دوغمادادیر
مولا چکدی یاراسین هئی بو سوواقلار آدامی

آرزویا کئشگه دئییب، گؤزله‌دیلر قورتارانی
گوزگویه باخمادیلار گؤیده اوچاقلار آدامی

سوررئال بیر یوخودان کال اویانار، قویار گلر
بیر قاطار جمهورونو یولدا دوراقلار آدامی.

#حکیمه_باباکشی‌_زاده«نغمه»
#شعرـاوجاغی
@SheirOcagi