▫️تانیشلیق تاریخی

یاستیغیمدا باشینین یئری قالیب،
ایندی عؤمرو یاشاماق، او بوشلوغا ییخیلماقدی هر آخشام.
بئله سویوق تنهالیق‌لا یاتماق دا،
چارپایی‌یا اوزانماق یوخ، داغیلماقدی هر آخشام.

من هر گئجه اوستونو اؤرتمه‌ییمی،
ساچینی قورولاماغیمی گؤرورم یوخودا،
سن‌سه او قدر یوخسان کی:
قورویوب، مطبخه داغیتدیغین سو دا.

بیرجه ال‌-اوز دسمالیمدا دوداق ایزین قالمیشدی،
آسمیشدیم گولوشونون شکلی کیمی دیواردان.
داها او دا سیلینیب...‌دئیه‌سن داها گولمورسن
سیغینیرسان یورغون آخشام بیرجه قوجاق سؤزونه.

تانیشلیق تاریخی، گؤروش ساعاتی،
تئلئفون نؤمره‌سی، کؤینک اؤلچوسو،
هامیسی اونودولور، هامیسی ایتیر،
رقم‌لرله یاشاییب بؤیوین سئوگی‌لر
سوندا بیر سؤزله بیتیر.

اونودولور هر شئی، جیزگی‌لرین ده،
شراب ایچمه‌یین، یئمک یئمه‌یین ده،
بیر سؤز دئییم: اگر قالسایدین،
من سنی تانییاردیم
گئتمه‌مه‌ییندن...

#آقشین_ائورن
#شعر_اوجاغی
@SheirOcagi

▫️قادین تکلییی

او واخت یئل‌لندییین آغاج بوداغی
مکتوب صحیفه‌سی‌تک قاییدار سنه.

سونرا خاطیرلانار گولوش یئرلری...

دوروب آختارارسان اؤپوش یئرلرین
سیزیلدار الینده بیر دوداق سسی
پوزار سوکوتونو بیر اوزاق سسی
... و سنی اوشودر، ائله اوشودر
غفیل خاطیرلانان بیر قوجاق سسی.

ساچینین رنگینی دَییشرسن تئز
گوزگوده داراقلا دؤیوشرسن تئز
اوزون ده دَییشر، آمّا گؤزونده:
دوروب سنه باخار نهنگ اونسوزلوق

... و منفی سونسوزلوق، منفی سونسوزلوق

کیشی کؤینه‌یینه باخیب چاشارسان
غفیل بیر هؤنکورتو حاقلایار سنی.
من آلان عئینه‌یه ایلیشر تئلین
ساچین خاطیره‌یه باغلایار سنی.

بیرگه آغرییاریق... باخ ائله من ده:

واغزالدا چکدییین قاتار رسمینی
پئنجه‌یین جیبینه بوکوب قویموشام
باخ ائله او گوندن، آغریلی گوندن
اوره‌ییمدن قاتار کئچیر هر آخشام.

داها بارماقلاریم الیمه گلمیر...

بو یاریم گولوشدن، یاریم سئوینجدن
منه ده، سنه ده عؤمور دوزَلمیر.
یاخشی ایش تاپیرسان... گئییم سئچیرسن
آلینمیر، یئنه ده عؤمور دوزَلمیر.

توتدوغون الیمی آپارمیسان دا
بیر قولوم یانیمدا اودون تک‌لییی.
سنین ده عؤمرونون بیرجه آدی وار:
«بوشلوقلار ایچینده قادین تک‌لییی..‌.»

#آقشین_ائورن
#شعر_اوجاغی
@SheirOcagi

▫️الویداع... داریخیرام.

سوساندا ان یاخشی «اونوتماق» سوسار،
بیر نهنگ، یاشلی گؤز، وحشی آیریلیق،
سنی اوتاغینین کونجونه قیسار.

بلکه ده، خسته‌لیکدی داریخماق حیسّی
ان بؤیوک آغرییلا یاشاماق یوخ ائ،
واللاه، اؤلمک پیسدی... اؤلمک ده پیسدی.

هردن خاطیره‌لر آغریدار سنی،
کؤهنه مکتوبلاری آچیب باخارسان.
گلیب کیرپییینه دوزلو گؤز یاشین،
اؤزونو گئجه‌یه آتار بئله‌جه.
اونون هدییّه‌سی گوموش بویون‌باغی
سنی داریخماقدان آسار بئله‌جه.

ایچینه داش آلیب سوسار سول یانین،
باخیب اللرینه دونوب قالارسان:
«ایلاهی بس اونون اللری هانی؟»

باخارسان رسمینه: «عجب یاشلانیب
اؤزونه باخمیر هئچ، کؤکه‌لیب بیر آز
دئیه‌سن خسته‌دیر لعنته گلمیش
اینشاللاه بو ایله سالامات چیخماز!»

سونرا ائشیدرسن قوهوم‌-تانیشدان:
دئییرلر «کئچمیشین» یامان خسته‌دی.
سن ده دئیینرسن دوداق آلتیندا:
«منی باشا دوشدوک، ایت ظولمو وئردین
آی آللاه، بس اوندان سن نه ایسته‌دین؟!»

اووجوندا قیریشار خاطیره‌لرین
ایندی دؤزه بیلسن، دؤز اللرینه...
تسلّی وئررسن اؤز اللرینه:
«اشی خاطیره‌دیر ده‌ه، کئچیب گئده‌جک...»
سیخیب دیشلرینی قیمیلدانارسان:
«ایلاهی، بو آغری کؤچوب گئده‌جک؟!»

سونرا اوتاغیندا وار‌-گل ائدرسن،
بئله‌جه یادیندان چیخار اللرین،
دوروب تئلئفونا آخار اللرین.
گؤتوروب نؤمره‌سین ییغارسان بیردن،
خطّین او باشیندان بیر قادین دئیر:
«ایندی بو بدبختین خوشبخت حیاتی،
احاطه داییره‌سی خاریجینده‌دیر»

دوروب دانلایارسان فیکیرلشمه‌یی:
«دونیادا بو قدر دونیا وار ایکن،
نییه گلیب گیریر منیم عاغلیما؟
آللاه، آغریلاری منه وئر، تکی
اونا آغریماغا آغری ساخلاما!»

«او»نسوز بو سوفره ده کم‌شیرین چایدی،
دوزسوز یئمک‌دی.
بو تابوت استول دا میزیلدانیر کی،
آیریلیق اؤلوم یوخ، اؤله بیلمه‌مکدی

ائه، بیر ده کوچه‌ده راستلاشماق وار ها:
اوره‌یین، باشینی چیرپار سینه‌نه
او، گؤز قاپاغینی تئز-تئز چیرپدیقجا،
سانارسان ایچینی سیخیر منگنه.
سینارسان... ایچینی سیخار منگنه...

بلکه‌ ده، سونونجو گؤز یاشلاریمی،
سونونجو گؤروشده دنیزه آتدیم.
گؤر ائ، عؤمرومو قارا ائتمک‌چون،
من بو ویجدانسیزین، قدیربیلمزین،
یولوندا ساچ آغارتدیم.»

اؤتوروب عؤمرومو چیخیب گئدرسن
گؤتوروب عؤمرومو چیخیب گئدرسن
سون مکتوبو یازیب ایترسن، بئله:
«سنی گؤرمک اوچون اوغلوما باخیرام
الویداع... داریخیرام...»

#آقشین_ائورن
#شعر_اوجاغی
@SheirOcagi

▫️یاش کؤینه‌یین فوتوسو

ایندی بوتون گؤزله‌مک‌لر قاپیندا اؤلوب.
دای او گلمیر دئیه،
پنجره‌ن کور قالیب
قاپین دا اؤلوب

ائله بیل ساچین دا اونو تاپماقچون اوزانیر هاراسا... هاراسا
گئدیر
سنین بدنینین یاریسی ائوده‌دیر،
گئیینیب یاریسی هاراسا
گئدیر

کؤینه‌یینی اوتوله‌ییرسن، الین اوشویور
آتیب گئتمک ایسته‌ییرسن،
آغریییر آیاق‌قابین
بیلیرسن، عؤموردن دوغما بیری گئدنده،
اوشویوب تئز ائوه گیرر چؤل قاپین...

هه، آساندی قاب یوماق... یئمک بیشیرمک
بیرجه همیشه اوتوردوغونوز سکامیا¹ ایندی بیر آز سویوق،
ایندی بیر آز کیرلی‌دی.
ایندی خاطیره‌لره توخونماق،
اونون یاش کؤینه‌یینی،
الکتریک خطّیندن آسماق کیمیدی...

بیر دفعه یئر کوره‌سینده،
گؤی قورشاغیندان آسیلمیش یئلله‌نه‌جک‌ده‌ییک
باشینی چیینیمه سؤیکه‌میسن
قولومو شرف کیمی دولامیشام‌ بوینونا
بیزدن بیر قدر آرالیدا،
یاییندان چیخمیش اوخون اطرافیندا فیرلانیر یئر کوره‌سی؛
آستا-آستا پارفوملو² کولک اسیر،
پینگوین‌لر بو سویوقلوقدان یورولوب
گونشه ساری تله‌سیر،
بوزلاقلار اریییب آفریقانین ایسته‌کانینا دولور،
چتیریمیزین اوستونه بالاجا ملک‌لر یاغیر،
اؤلو دنیز بالیق دوغور،
یاواش‌-یاواش چئرنوبیله یاییلیر اوکسیژئن‌لی هاوا
اوشاقلار آتوم‌لاری گیزله‌دیرلر.

-ماریان چؤکک‌لییی³-نده اُوزون (Ozon) دلییینی اؤرتورلر چرپلنگ‌له
بوتون دین‌لرین سوره‌لری عئینی‌دیر:
«اخلاق»

قوجالار ائوینده سوکوت، اوتاقلار بوش،
اوشاق ائولری اولوب-
«اویونجاق و اَیلنجه مرکزلری»
تئاترلاردا آنشلاق⁴...

بوتون دؤولت‌لرین آدی یئر کوره‌سی‌دیر،
بوتون بایراقلار گؤیرچین قانادی،
بوتون موسیقی‌لر کؤرپه گؤروشو،
بوتون الیفبالاردا، «خ،و،ش،ب،خ،ت،ل،ی،ک» کیمی‌دیر- حرفلرین دوزولوشو.
بیز ده بو‌ حرفلردن یاپیشیب یئل‌له‌نیریک.
نه موحاریبه وار،
نه گؤز یاشی، نه ده غم.
آستاجا پیچیلداییرام سنه:
عزیزیم، دوداغینی گتیر، سؤز دئییرم...!

¹- (روسجا) اوستونده اوتورماق اوچون دایاقلار اوزرینده دوزلدیلمیش سؤیکنه‌جکلی کورسو
²-عطیر- اودکلون
³- ساکیت اوکئانین(اقیانوس آرام) غربینده یئرلشن اوکئانیک درین سولو چؤکک‌لیک
⁴- (آلمانجا) تئاتردا، کینودا، سیرکده و... بیلئتلرین ساتیلیب قورتاردیغینی بیلدیرن اعلان

#آقشین_ائورن
#شعر_اوجاغی
@SheirOcagi

▫️بو گون آلین یازیمدان 2 آلمیشام

«باکی‌»نین آغ بولودلاری ساچلارینا ایلیشیب، آتا!
جییه‌ریمه ییغیلان سو،
هر «آتا، سنینله نفس آلیرام» دئدیکجه فیرلانیب گؤزلرینه دولوب
گوزلرین دولوب.
سینوپتیک‌*لر بیلدیریر کی، طالئعیمه دولو گؤزله‌نیلیر...
آتا، عؤمرونون ائپیلوقو*
هر اؤولادین «گؤز TV»‌سینده بؤیوک‌ اوزونتو ایله ایزله‌نیلیر‌...
تری‌اومف* تأخیره سالیندی،
چونکی شاهیم دئوریلیب
ایندی کادر اؤنونده مات قالمیشام.
باغیشلا آتا، بو گون آلین یازیمدان 2 آلمیشام.

اؤلوم‌-ایتیم دونیاسی‌دیر،
اؤلوم اولما، راضی‌یام ایتین اولارام.
دئییرلر، ایتلرین صداقتی داها گوجلو،
داها ساغلامدیر.
تورپاق هامی اوچون دؤشه‌مه اولسا دا،
اؤلولر اوچون دام‌دیر.
باشیمیز او قدر داشدان-داشا دَییر کی،
سوندا بیزه باش‌داشی قویورلار
تکجه اؤلنده صافلاشیریق، آتا!
اوندا دا جسدیمیزی بو دونیانین چیرکلی سویویلا یویورلار...
هر سوکوتدا دار آغاجی ایپ‌لرینی سازیما کؤکله‌ییب
اؤلوم مارشیمی چالمیشام.
باغیشلا آتا،
بو گون آلین یازیمدان 2 آلمیشام.

سن اؤلوم آیاغیندا اولارکن،
من ده اؤلومون آیاقلارینا دوشدوم یالوارماق اوچون.
اجل، عزیزلریمی مزارا طرف قووارکن،
یالنیز آرخادان یالوارماغا چاتیر گوجوم‌.
«ایچ اوغوز»لا «دیش اوغوز» یولوندا
ساچ آغاردیب دیش‌تؤکن قوجا «قورقود» کیمی،
اوجا «قورقود» کیمی، ان یوکسک یول‌لا آلچالمیشام.
باغیشلا آتا،
بو گون آلین یازیمدان 2 آلمیشام.

باشینا قاریشقا یوکو قدر دن دوشور،
ساچلارین آغاریر،
سن هئچ غم یئمه..‌.!
ظن‌ّ ائت کی، بو بیاضلیق آغ اون‌دور؛
تانری اؤز روزیسینی باشیندان تؤکور.
مجلّه، بئله یازیلیب ازلدن:
«تورپاقدان یارانانی یاواش‌-یاواش
تورپاق دا اؤزونه چکیر»
تسلّینی ترس الینله ایته‌له‌مه!
من بو یاشا تسکینلیک‌لرله اوجالمیشام.
باغیشلا آتا،
بو گون آلین یازیمدان 2 آلمیشام.

56 یاشیندا، شخصیّتین 5 قیمت آلسا دا،
بئلین 6 رقمی کیمی بوکولوب...
نظرلرینی تورپاغا سانجان حیات،
سنی تورپاغا اؤیرشدیریب
و منیم اؤیرندیییم درس اوتاغیمدا
سن آدلی بیر مقبره سؤکولوب...
بوتون ریاضی حئسابلامالاری حلّ ائتسم ده،
سنین قالان عؤمرونو حئسابلایا بیلمیرم.
اوچ‌بوجاقلار دوداق بوزور،
«پیفاقور*» مأیوس‌دور،
چونکی حئساب فنّیندن صینیفده قالمیشام.
باغیشلا آتا،
بو گون آلین یازیمدان 2 آلمیشام...

* سینوپتیک= (یونانجا) هاوانین نئجه اولاجاغینی قاباقجادان خبر وئرن موتخصّص
* ائپیلوق= (یونانجا) اوپئرادا سون پرده
* تری‌اومف= (لاتینجا) پارلاق ظفر
* پیفاقور= فیثاغورث

#آقشین_ائورن
کوچوردو:
#ج_محمدنژاد
@SheirOcagi

‍ ▫️بیر قوجاقلیق جانین وار.

ائله داريخيرام كى،
آز قالير ائودن چيخيب
سنين آرخانجا گلسين
منيم آياق ايزلريم.
آى بالاجا خانیميم!
من سن بويدا سئومه‌یى
آخى هاردا گيزله‌ديم؟!

واللاه، قلبين غريبه‌دی
نه قیفيل دوشور، نه آچار.
گل، منله سؤز گولَشديرمه!
بير قوجاقليق جانين وار.

ائله گولومسه‌دين كى،
بوتون بو آغلاماقلار
دوداق‌لاريمدا ايتدى.
هه، بالاجا خانیميم!
سنله موقايیسه‌ده،
خوشبخت‌ليك چوخ بسيطدى.

دوروب سندن باخاندا،
آغريماق دا گؤزلدی.
اؤزومدن قاچان حيسلريم،
سنه چاتيبب گؤزله‌دى.

گؤزله‌دى كی، ياپيشيب
توتاسان بارماغيمدان.
«سنى سئويرم» سؤزون
بئله‌جه بير اؤپوش‌له
آلاسان دوداغيمدان.

واللاه، من اؤيرشميشم
قوجاقلاييب ساچينى،
گئجه‌لر تك ياتماغا.
نئيلیرم بير اويانماغى،
گئجه‌لر بير ياتماغى؟
منه بيرجه ال لازيمدى
ال‌لريندن توتماغا.

آى بالاجا خانیميم!
نه‌یه لازیم ائودارليق؟
لاپ يئمك دوزلو اولسون،
سويوق چاى، ايستى ياتاق.
نئيليرسن بو داش-قاشى،
بو ايستى خز پالتونو؟
گئيين کؤهنه چكمه‌نى،
گل گئدك خوشبخت اولاق...!

#آقشین_ائورن

سس: Kamran M.Yunis
@SheirOcagi

▫️اونوتماغین رئسئپتی¹

هردن اونون توخوندوغو یئرلر قوپار بدنیندن،
حیصٌه‌-حیصٌه یوخا چیخارسان هردن.
هردن «قاییت...اؤلورم!» کیمی اوخونار
اونا یازدیغین بیرجه «سالام، نئجه‌سن؟»

سیخیلارسان...
بیلمزسن هارا قویاسان بو نهنگ آیریلیغی.
گؤررسن ساچلارین اونون چیینی اوچون داریخیر.

آیریلیق سئوگی‌یه یوخ، اؤلومه داخیلدی قیزیم!
بونو دا اؤیرنمیشدین اوشاقلیق پالتاریندان.
گؤر آیریلیغین اوستوندن نئچه پاییز کئچیب ائ!
اونون قوخوسو هله ده چکیلمیر پالتاریندان.

هردن اووولوب گئدرسن...
بورنونون اوجو گؤینه‌یر تانیش قوخودان اؤترو.
یاغیش یاغار، گؤررسن کی،
آلتیندا بیر بوش یئر قالیب الینده‌کی چتیرین.

هردن بوینونو اوشودر اونون آلدیغی شرف² ده،
بارماقلارین اللریندن سیرسیرا تک ساللانار‌.
بوش کوچه‌ده اؤسکورر خاطیره‌لر آستاجا
جدوَل‌لرده یازیلار: «منفی سنسیز درجه»

هردن هئچ نه دَییشمز
بیر گؤروش یئری بویدا بوشلوق قالار ایچینده
هردن بودره‌یرسن‌..‌. ییخیلارسان.
خاطیره‌لرین یانیندان کئچنده...

#آقشین_ائورن

1- نوسخا (Resept)
²- بویون شالی (Şərf)
@SheirOcagi

▫️دونیا یاشیل اولاندا

گؤی قورشاغیندان آسیلمیش یئل‌لنه‌جکده‌ییک،
باشینی چیینیمه سؤیکه‌ییبسن،
قولومو شرف(Şərf) کیمی دولامیشام بوینونا.
بیزدن بیر قدر آرالیدا،
یاییندان چیخمیش اوخو اطرافیندا فیرلانیر یئر کوره‌سی:
آستا-آستا پارفوملو کولک اسیر،
پنگوئن‌لر بو سویوقلوقدان یورولوب گونشه ساری تله‌سیر.
بوزلاقلار اریییب آفریقانین استکانینا دولور،
چتریمیزین اوستونه بالاجا ملک‌لر یاغیر،
اؤلو دنیز بالیق دوغور،
یاواش-یاواش چئرنوبیله یاییلیر اوکسیژن‌لی هاوا،
اوشاقلار آتوملاری گیزله‌دیرلر «ماریان چؤکک‌لیگی»نده
اوزون(Ozon) دلیگینی اؤرتورلر چرپلنگ‌له.
بوتون دینلرین سوره‌لری عئینی‌دیر:
«اخلاق»
قوجالار ائوینده سوکوت، اوتاقلار بوش.
اوشاق ائولری اولوب «اویونجاق و اَیلنجه مرکزلری» 
تئاترلاردا آنشلاق*
بوتون دؤولتلرین آدی «یئر کوره‌سی‌»دیر،
بوتون بایراقلار گؤیرچین قانادی،
بوتون موسیقی‌لر کؤرپه گولوشو،
بوتون الیفبالاردا «X.O.Ş.B.Ə.T.L.İ.K» کیمی‌دیر حرفلرین دوزولوشو:
بیز ده بو حرفلردن یاپیشیب یئل‌لنیریک.
نه موحاریبه وار،
نه گؤز یاشی، نه ده غم.
آستاجا پیچیلداییرام سنه:
عزیزیم، دوداغینی گتیر، سؤز دئییرم!

#آقشین_ائورن
* بیلئتلرین ساتیلیب قورتولدوغونو بیلدیرن اعلان (Anşlaq)
#شعر_اوجاغی
@SheirOcagi

▫️زئن! بیشیردیگین کئکه داراشمیش قاریشقالار دا اؤلدو،
داها سندن هئچ نه قالمادی بو شیکست ائوده.
داها من اؤیرندیم کی تاریخ، اوشومه‌یی قوجاقلاشماق‌چون، سئوگینی‌سه بیر عؤمور اوزاقلاشماق‌چون یارادیب.

اوشاقلیقدان، گنجلیکدن، قوجالیقدان باشقا بیر ده اونسوزلوق دؤورو اولور اینسان عؤمرونون.
یالاندی، زئن!... یالاندی،
اینسانی قوجالیق یوخ، اونسوزلوق دؤورو اؤلدورور.

قوجاقلادیغیم بوتون قادینلاری بیرلشدیریب
اؤزومه بیر آنا دوزَلده بیلمه‌دیم.

بعضاً بو نهنگ عؤمور بیرجه سؤزدن عیبارت اولور: «گلمه‌دی».

زئن! قادینی ان چوخ آتاسی اونودور.
ان چوخ خاطیره‌لر خسته‌لندیریر آدامی،
ایشتاهین اولمور یئمک یئمه‌یه، یاشاماغا... گلمه‌یه.

نه‌دن‌سه مئترو چیخیشلاریندان هئچ واخت «او»نا طرف چیخمادیق،
هئچ واخت تاپا بیلمه‌دیک اونوتماغین رئسئپتینی.*
الیمیزده اونو آختارماق اؤلدو، آیاغیمیزدا چیخیب گلمک.
سنه گولمک گتیره‌جم، قیزیم! دویونجا گولمک.

داها بوروق ساچلار اونوتماسین،
سن ده اونوتما، زئن! سن ده اونوتما!:
آیریلیق حاقّیندا دئییلمیش ان گؤزل سؤز، آیریلماماق‌دی.

#آقشین_ائورن
* نوسخه
#شعر_اوجاغی
@SheirOcagi

▫️اؤیرندیکجه قوجالیرام.

شئیطانین غدّار حؤکمونه
داغیلمایان سدّ چکمه‌یی،
خوشبختلیکدن محروم اولوب
گئجه-گوندوز درد چکمه‌یی،
اؤیرندیکجه قوجالیرام.

اوره‌ییمه قیفیل‌لانمیش
محبّت عذابلارینی،
هر سطیری عومّان اولان
حقیقت کیتابلارینی،
اؤیرندیکجه قوجالیرام.

یئره چؤکدوکجه دیزلریم،
حاقّا اومید باغلاماغی،
اوشاقلیغین حسرتیندن
کؤرپه کیمی آغلاماغی،
اؤیرندیکجه قوجالیرام.

مودریک‌لشمیش درویش کیمی
آغ سوکوتدا کارلاشماغی،
نقش ووران نقّاش کیمی
اوستالاشیب کورلاشماغی،
اؤیرندیکجه قوجالیرام.

عئلمیم، عاغیلیم، ایدراکیم‌لا
ذیروه‌لره اوجالماغی،
قارتلاشمیش تر یارپاق کیمی
جاوان ایکن قوجالماغی،
اؤیرندیکجه قوجالیرام.

مین دوندان مین دونا گیرن
ملَک جیلدلی شئیطانلاری،
دیلینده یالان بسله‌ین
ایکی‌اوزلو اینسانلاری،
اؤیرندیکجه قوجالیرام.

خیانته اوغرادیقجا
فیطراً، روحاً اؤلمه‌یی ده،
ساختاکارین فیتنه‌سینه
ریشخند ایله گولمه‌یی ده،
اؤیرندیکجه قوجالیرام.

بصیرت ببک‌لریم‌له
گله‌جه‌یی گؤرمه‌یی ده،
اوستاد، داهی بنّالار تک
اوچلو معبد هؤرمه‌یی ده،
اؤیرندیکجه قوجالیرام.

چیرکه باتمیش موردارلارین
خیصلتیندن اییرنمه‌یی،
تانیدیغیم هر اینساندان
بیر کرامت اؤیرَنمه‌یی،
اؤیرندیکجه قوجالیرام.

#آقشین_ائورن
#شعر_اوجاغی
@SheirOcagi

▫️دانیشیر یئر کوره‌سی.

پلاستیک مانکن، «گوجی» مارکالی سئحیرلی خلعته بورونوب،
ویترین اؤنونده ویبراسیون سیستئمینه کئچید آلیب.
سومالینین‌ کیبریت کؤرپه‌سی،
ایری گؤزلری دیزلرینین گؤزلری کیمی سورونور عبا‌ بویونجا؛
ایستک‌لری موز قابیغیندا سوروشوب چیرپیلیر بشریّتین اوزونه:
«اییو کییو‌ بابا، منه مارسدان بیر چارخ، بیر ده اینسانلیق گتیرَرسن»!

دونیانین قفس اولدوغونو، یئر کوره‌سینی هؤرموش مئریدیان¹ و مدارلار داها آیدین گؤستریر.
ایستیوا خطّی ماوی شالواری ساخلایان کمردیر.
یئر کوره‌سی، آستا دؤور ائت، کمر دوشر بئلیندن!
قانلی کؤینه‌یین کیمی، شالوارین دا چیخار اَینیندن، 
روسوای اولارسان.

گونش یئر مدارینی چئینه‌دیکجه، نفَسی اییله‌نیر،
قووّه‌یه مینه‌رک اینسانلاری مینیب-چاپان تخمین.
«دونیامیزی محو ائدیر آتموسفئره بوراخیلان گازلار»
حالبوکی، دؤورانیمیزدان اؤنجه، غازلار روما'نی خیلاص ائتمیشدی.
او واخت دونیا یاشیل ایدی.
و بلکه ده،
مارس شوکالادینین شیرینلیگی ایدی، آجی دونیامیزدان قوپوب مارسدا حیات آختارماغیمیزین سببی.

سالامون معبدی دومینو داشلاری تک اوچولاندا،
میناره‌لر کؤکه‌لیب بولودلارا سانجیلاندا،
موزدلو راهیبه‌لرین باکیره‌لیگی آچیلاندا،
سما گزه‌گنینی گؤندریب پیچیلدادی:
«باشینا داش دوشسون، جناب یئر کوره‌سی!»
دونیا آغزینا سو آلیب اوتوردوقجا،
آفریقادا سوسوزلوق حؤکم سورور.
ترافیک چیراغینین یاشیلینی گؤزله‌مه‌دن دئییرلر  گونش دوغاجاق.
هامی غریبه بیر تلاشدا،
هامی خسته اوتاغینین اؤنونده گؤزلَمه‌ده،
حکیمین سون سؤزو ایسه آرتیق بللی‌دیر:
«روشئیم² تلف اولدو».
آرتیق «آزادلیق» هئیکلی ده الینی گؤیه قالدیریب تسلیم اولوب،
«آتش آچمایین، من سیلاحسیزام!» دئیَرجه‌سینه.
بو دونیادا قانون «قان» و «-ون» سنتئزینین خمیریندن بیشیریلن آجی چؤرک،
حاکیمیّتین منصبی خالقدیر
آنا یاسادا مادّه‌لر روحدان ازل
گؤی بیلیمچیلیگینین آستاریندا تیکیش‌لر دینسیزدیر.
نوستراداموس³ سئحیرلی خالچادا ناماز قیلدیقجا،
آتوم صدالاری کؤرپه قیغیلتیسینی پولسوز آلدیقجا،
فوکوشیما کوکورد توپوره‌جک دونیایا گونش اؤلکه‌سیندن.
گؤی آداسیندا ان بؤیوک اولدوز هالیووددیر.
«عدالت» آدلی گزه‌کن آختاران اوزای گمیمیز آیسبئرگه دوغرو ایناملا ایلرله‌ییر،
هر کس سوکون'دادیر،
واتیکان سوسور،
یونیسئف ده سوسور،
اوچوروما گئدیریک،
رادیودالغالار قایالارا دَییب خیشیلداییر:
«دانیشیر یئر کوره‌سی،
دانیشیر یئر کوره‌سی
سوکانی⁴ بئله ساخلایین!»

#آقشین_ائورن
¹- یئر کوره‌سینین ایکی قوطبونو بیر-بیرینه یاپیشدیران خیالی خط، نصف‌النّهار
²- نوطفه، جنین
³- فرانسه‌لی گؤی بیلیمچیسی
⁴- یؤنَلتج، سُکّان
#شعر_اوجاغی
@SheirOcagi

▫️دویغولارین فؤوقونه قالخاق!

کوچه‌نی یالاییر یانوار کوله‌یی،
اوشوسن، اؤزونو بورو تئلینه!
نبضینی دوندورسا قار دنه‌لری،
الیمی الجک‌تک گئیین الینه!

گؤیه قیرمانج* وورور گوموش شیمشک‌لر،
ظولمته سیغینیب بوز توتموش گونش.
سنه بوز سمانی روا گؤرمه‌رم،
چکینمه عزیزیم، قلبیمده اَیلش!

سنلی خاطیره‌لر اوزانیب گئدیب،
ساچیم‌تک کؤک سالیب باشیمدا منیم.
قوی کلّه سومویوم تابوتون اولار،
اونسوز دا چیخمیرسان باشیمدان منیم.

ییغاراق هاوادان قار ذرّه‌لرین،
سنه بیاض قاردان گلینلیک هؤروم،
بئله‌جه، عؤمور-گون یولداشی اولاق!
راضییام یولوندا داش اولسون عؤمروم.

اوّل اوره‌ییمه یاتمیشدین، خانیم!
ایندی یاتاغیمدا، سول یانیمدا یات!
گیرسین آرامیزا گول اوزلو کؤرپه،
او سنی اویاتسین، سن منی اویات!

#آقشین_ائورن
* قامچی، شاللاق
#شعر_اوجاغی
@SheirOcagi

▫️سون زنگ

زنگ وورولدو: بئش دقیقه‌لیک تنفّوس

بیز الیفبانی، سئوگی مکتوبو یازماقچون اؤیرنمیشدیک.
بونو اوچونجو صینیفده اوخویارکن آنلادیم.
دفتریمدن قوپاردیغیم ورقه ایکی سؤز یازمیشدیم:
«سنین آدین...منیم آدیم».

رسم درسینده اورک شکلی چکیردیک بایراق‌لا میلّی دامغا عوَضینه.
اوره‌ییمیز سوموک بئشیگینده یئنیجه گولوردو اوندا.
اوندا هله اؤیرنمه‌میشدیک رقم‌لرین اسکیناس اولدوغونو.
اوندا بیلمیردیک کی، دؤردبوجاق چکه بیلمه‌ین دوستوموز دؤرد دیوارا دوشه‌جک.
بیلمیردیک «آمپرمتر»دن 5 آلان قیز جریاندان اؤله‌جک.
بیلمیردیک کی، هر شئی بوش چوخلوق‌دور.
بو یادداش کیتابچاسیندا آدام اؤز اللرینی اونودور.
یاخین اوتور!
بیر آز اعتراف ائده‌جم،
یاخین اوتور، عزیز موعلّیمه‌م!

آزربایجان دیلی درسینده «اونوتماق» فعلینی
شخصه و کمیّته گؤره دَییشیردیک،
و من همیشه بیرینجی شخصین تکینده یالان دانیشیردیم،
چونکی من اونوتمامیشدیم.

بیولوژییا، بیزدن گیزلَتمیشدی کی،
گؤزلرین ایکی فونکسییاسی¹ وار:
آغلاماق و دانیشماق.
اصلینده، اوره‌یین دیلی ایمیش باخیشلار.

اوندا تاریخ «تورقوت اؤزال» دئییلدی،
«جورج بوش» دئییلدی.
اوندا هله اکیز قوللـه‌لر، باشینی آشاغی سالمامیشدی،
اوندا اکیز قوللـه‌لرین باشی گؤیه دَییردی.

فیزیکا، چین ایشگنجه‌سی ایدی.
بیرجه، «عوموم‌دونیا جاذیبه قانونو»نو،
سنی قوجاقلایارکن باشا دوشدوم.
«نیوتون»ون باشینا آلما دوشمه‌میشدن قاباق، سن منیم اوره‌ییمه دوشموشدون،
بو، ایلاهی جذب‌ائتمه ایدی.

یئر کوره‌سینی قوجاقلایان مدارلار تک،
سنی قوجاقلامیشدی بو قوللار.
اوندا بیلمیردیم کی، یئرین‌ نووه² قاتیندان باشقا، نووه سیلاحی دا وار.

عزیز موعلّیمه‌م!
ایندی حیات فنّیندن، کسر امتحانینا گلمیشم،
دفتریمی یوخلایین،
داورانیشیما قیمت وئرین!
ایسته‌ییرسیز والدئینیمی چاغیریب ایجلاسدا شیکایت‌لنین!
آما خواهیش ائدیرم، مندن «سئومه‌»یی سوروشمایین!
چونکی «سئومک»، یادیمدان چیخیب ائوده قالیب.

#آقشین_ائورن
¹- فونکسیون، تابع(ریاضیاتدا)
²- هسته
#شعر_اوجاغی
@SheirOcagi

▫️منیم سئوگیلیم، گوناه

آرخئولوق‌لار¹ آشکار ائدیبلر کی،
اینسانلار بیر میلیون ایل اوّل،
سنه اطاعت ائدیردیلر.
یعنی سن هم ایلاهه‌سن،
هم ده اعجازکار بوت...
قانونسوز سئوگیمه گؤره منی باغیشلاما!
بیلیرسن آخی،
بنده‌نین تانریسینی سئومه‌سی چوخ بسیط.

گؤزلریمی هله ده آچمیرام،
باخیشلارینی گؤز قاپاغیمین‌ آلتیندا توتوب ساخلامیشام.
اووجوما قویدوغون قیزیل تئلین‌له ده،
قلبینی قلبیمه سیخیب باغلامیشام.

طالعیمیز توکدن آسیلی،
بو ظولمتده قوپوب ایکیمیز ده آغ گونه چیخاجاغیق،
یعنی، سن بیرینین قادینی اولوب گئیینه‌جکسن آغ گلینلیک...
آما سندن بیر ریجام وار:
گلینلیکدن منه بیر پارچا وئررسن،
چوخ یوخ، عزیزیم!
چوخ یوخ، بیرجه کفنلیک!
رنگلر بیزی بیرلشدیرسه‌ ده،
طالع آییرار.

یا گل، من قارا گونه چیخیم، سن ده آغ گونه!
یعنی من قارا بَیلیک قیافه‌سینده،
سن ده آغ گلینلیکده،
قدم قویاق بیزی دویونله‌ین دویونه.
رنگلر بیزی آییرسا دا طالع بیرلشدیرر.
اوره‌ییمه گیرمیشدین، ایندی ده قولوما گیر، سئنیوریتا!

یا دا نه‌یه گرک بو سئنتیمئنتال‌لیق²؟!
اونوت همین سئحیرلی گونو، اونوت!
سانکی هئچ گؤروشمه‌دیک،
دانیشیب خاطیره‌لری، اورکدن گولوشمه‌دیک...
سانکی تیترک بارماقلاریم ساچلاریندا ایتمه‌دی،
سانکی دونموش اللرینی نفسیم ایسیتمه‌دی،
سانکی بونلاری سانماق چوخ آسان‌دیر.

گئجه‌لر شام یئمه‌یینده بوشقاب، دولو قاب اولور،
ایچینده بیر اوووج خاطیره، سنین عطرین و ابدی هیجران...

یاستیغینی قوجاقلا، یات، عزیزیم!
نه سن مندن نیگاران قال،
نه من سندن نیگاران!

#آقشین_ائورن
¹- آنتیک‌چی، باستان‌شناس
²- دویغوسال‌لیق
#شعر_اوجاغی
@SheirOcagi

▫️موقدّس وارفولومئی¹ گئجه‌سی

من هاردان باشلاییم، هاردان؟ بیلمیرم.
باشلاییم لاپ ائله آیاقلاریندان.
دئییرلر، جنّتدی، نه‌دی اوردادیر،
واللاه موهوم دئییل حوری-ملک زاد،
سن اؤز جورابینی قالین ائت بیر آز!
قالانی دوزه‌لر، واللاه دوزه‌لر!
واخت گلر... واخت گلر آللاه دوزه‌لر.

بیر آغ قوجا گؤردوم ائله بو آخشام
دوزموشدو عیسانین اؤنونه آغ شام.
دئدیم کی، «نه تونقال، نه یاندیریلماق؟
عیسا هئچ چارمیخا چکیلمه‌میشدی،
هر ایکی قولونو یانا آچمیشدی.
بؤیوک بشریّتی قوجاقلاماقچون،
نه بؤیوک سبب‌میش بو آغلاماقچون؟»

ائله آتام کیمی هؤنکوردو قوجا،
اصیل آدام کیمی هؤنکوردو قوجا.
دئدیم کی «سن آللاه ترسلیکدن ال چک!
وئر بو آغ شاملاری، آپاریم ائوه!
اوشویور سئوگیمین جنّت آیاغی.
بیزیم اورالاردا آخشام تاپیلمیر،
و بو آخشاملاری آپاریم ائوه»

آغیردی... کیلسه‌نین زنگی آغیردی،
باییردا اوخ کیمی یاغیش یاغیردی.
تؤوبه حوجره‌سینده اؤپوردو راهیب،
مارییا آنانین شوخ دؤشلریندن.

«گؤرورسن -دئییرم- بوش شئی‌دیر جنّت،
اساس جورابینی قالین گئیین سن!
قالانی دوزه‌لر، واللاه دوزه‌لر،
گون گلر... گون گلر آللاه دوزه‌لر.

قوجانین گؤزوندن آخیردی «آمور»،
دئدی فیکیر وئرمه، آغلامیرام من،
بو کؤهنه کیلسه‌نین تاوانی دامیر.
اساس جورابینی قالین گئیین سن!
دئییرلر جنّت‌دی، نه‌دی اوردادیر.
قالانی دوزه‌لر، واللاه دوزه‌لر!
بیر گون آللاه اوزو یولا دوزه‌لر.

چوخداندیر گلمیردیم بو نم کیلسه‌یه،
اینان واخت یوخدور باش قاشیماغا دا،
اشی واخت یوخدورئ یاشاماغا دا!
چؤلو یالاییردی یانوار کوله‌یی،
حرف تانیمیردی ساغ چییین مله‌یی.
دئدی کی «یازمیرام، من پهریزده‌یم»
ائله دانیشدی، لاپ اتیم تؤکولدو.

ائله بیل اوزانیب عیسانین اوسته،
اونون قوجاغیندا خاچا چکیلدیم.
عئینک اؤز قولپونا قوجا تاخمیشدی،
قوجانین تضییقی یامان قالخمیشدی.
کیلسه‌نین هاواسی اؤلوم هاواسی:
آتموسفئر تضییقی یامان قالخمیشدی.
دَییشکن بولودلو، نسبی رطوبت،
616 جیوه سوتونو،
«یئر»ه سانجیلمیشدی عیسا سوتونو.
بولود قیزجیغاز تک چوخ تئز بوشالدی،
او گئجه گؤی اوزو یاغیش یاغمادی،
«یئر»ه توپوردو.

او گئجه یاتاقدا سنین ساچلارین،
خیال قیریقلارین منیم عؤمرومدن،
گؤیه سوپوردو.

یامان جان سیخیردی نسبی رطوبت،
بو کیلسه زنگلری آغریلی سسدی،
دیکسینیب تورونا قاچدی هؤرومچک.
راهیبه یانیمدا یئل کیمی اسدی،
گلیب تئز سؤندوردو آغ شاملاری او
گلیب تئز یاندیردی آخشاملاری او.
دئدی «یاندیرمایین! پول یازیر سایغاج.²
جناب یئپینسکوپ'ون گؤستریشی وار».

قوجا میزیلداندی دوداق آلتیندا:
«اؤپوب سوووراسان دوداق آلتیندا،
دیشله‌ییب دیده‌سن بو دول قادینی!»
سونرا ائشیتمه‌دیم سؤزون آردینی.

راهیبین بدنی و لوت ماریبا.
تؤوبه حوجره‌سینده اینیلتی، آهلار،
دوروب تاماشایا گلدی آللاهلار.
«سیچووول»³ دیکسینیب یووایا قاچدی،
اوندا آنلادیم کی حئیوانلار پاک‌دی.

بو کیلسه زنگلری، کیلسه زنگلری،
یامان آغیر ایدی، آغریلی ایدی!
قوجانین کیلسه‌ده ائتدیگی دوعا،
یاریمچیق احتراص ناغیلی ایدی.
قوجانی قولپوندان چیخاردی عینک،
قوجا کؤکس اؤتوردو ائله قوجاتک:
«یاخشی کی آغلادیم...عئینکین چیرکین-
گؤزومون یاغی‌یلا، یاشی‌یلا یودوم.
بیلیرسن بو گئنیش، نهنگ دونیادا،
بیر آنا بطنینده راحات اویودوم.»

اؤزگه قادینلارین قوجاغی دا دیب،
بس بو یئر کوره‌سی هایانا گئدیب؟
گله‌جک، صبر ائله، واللاه، گله‌جک!
آللاه دا دئییر کی، آللاه گله‌جک.
سن اؤز جورابینی قالین ائت اساس!

#آقشین_ائورن

¹- فرانسه‌ده دینی موحاریبه‌لرین نتیجه‌سینده ۲۳ آگوست (اوت) 1572-جی ایلده پاریسده باش وئرمیش حادیثه. وارفولومئی گئجه‌سی ایفاده‌سی بیر چوخ خالقلارین دیلینه داخیل اولاراق، منفی چالار قازانمیش و موقاویمته گوجو چاتمایان گوناهسیز اینسانلارین کوتله‌وی حالدا قتله یئتیریلمه‌سی معناسینی آلمیشدیر.
²- کنتور
³- چؤل سیچانی
#شعر_اوجاغی
@SheirOcagi

▫️بوتون الفبالاردا «X.O.Ş.B.Ə.X.T.L.İ.K» کیمی‌دیر حرفلرین دوزولوشو:
بیز ده بو حرفلردن یاپیشیب یئلله‌نیریک.
نه موحاریبه وار،
نه گؤز یاشی، نه ده غم.
آستاجا پیچیلداییرام سنه:
عزیزیم، دوداغینی گتیر، سؤز دئییرم!

#آقشین_ائورن
#شعر_اوجاغی
@SheirOcagi