▫️گؤزونه قوربان!

بو قدر باش وئرمه، سمندر، یازا!
دوشرسن آیاغا، باشینا قوربان!
یازیغام، عؤمرومو وئرمه گودازا،
غمزه‌لی گؤزونه، قاشینا قوربان!

بیر قارا بولودام اوجا گؤیلرده،
بو قارا باختیملا، بیزیم ائللرده.
سن نه‌چون آغلارسان، من دوران یئرده؟!
نرگیز گؤزلرینین یاشینا قوربان!

سینه‌ن بوللور کیمی، آلتیندا داش وار،
بیلمزسن کؤنلومده نه ایغتشاش وار.
نه قدر کی منیم گؤزومده یاش وار،
اولسون اوره‌یینین داشینا قوربان!...

#میکائیل_موشفیق
#شعر_اوجاغی
@SheirOcagi

‍ ▫️منیم بئش‌ایللیگیم

هر کس اؤز ایشینی سونا یئتیردی،
کیمسه بو دونیادا آرزو قویمادی‌.
کیمی یئر آلتیندان خبر گتیردی،
کیمی اوچدو گؤیه، یئنه دویمادی.
ائللر مورادینی آلدی زاماندان،
بیزه کؤنول سؤزو قالدی زاماندان.

گؤزل‌دیر بیر اوجا عمل بسله‌ییب-
بو عمل اوغروندا قان تره باتماق.
گؤزل‌دیر گونشی، آیی سسله‌ییب،
اونلاری دا بیزیم دسته‌یه قاتماق.
دؤوران‌لا ال-اله وئرمک یاخشی‌دیر،
هر باغدان بیر چیچک درمک یاخشی‌دیر.

گؤرمک‌چون اؤزونو هر کس ایلَرده،
بیر مقصد اوغروندا گؤستریر هونر.
چارپیشیب هاوادا، دنیزده، یئرده،
هر دؤیونن اورک بیر عمل بسلر.
حئییف، عؤمور قیسا، آرزو گئنیش‌دیر،
کیم بو قایغی ایله تیتره‌مه‌میشدیر؟!

بو وفاسیز عؤمور، بو جوشقون دره،
گرک بوش-بوشونا آخیب کئچمه‌سین!
بو گؤزل جاهانی سانیب پنجره،
هر گلن ساده‌جه باخیب کئچمه‌سین!
گلین، آرزوموزا چاتاق، آ دوستلار!
داغلاری داغلارا قاتاق، آ دوستلار!

آیریلیب آرزومون کشمکشیندن،
گیزلَنمه کؤنلومده سن ده، ائی ایلهام!
گاه باتان، گاه چیخان قیش گونشیندن،
درس آلیب- دایانما گئنده، ائی ایلهام!
نییه من ایسته‌ین اولماسین، نییه؟
منیم بئش ایللیگیم دولماسین، نییه؟...

#میکائیل_موشفیق
#شعر_اوجاغی
@SheirOcagi

‍ ▫️قارا گؤزلرین

نه گؤزل سوزولوز قارا گؤزلرین!
عجبا اونلاری سوزمک واختی می؟
دوروشون معنالی، باخیشین درین،
من بو درینلیکده بولدوم باختیمی.

سنین گؤزلرین می گنجلیک باغیندا،
یوخسا نرگیزلرین سایریشیب اوینار؟
یوخسا چیخیلمایان عشقین داغیندا،
عؤمرومون دیریلیک چئشمه‌سی قاینار؟

او قارا گؤزلرین دئییل پارلایان،
اولدوزلار ایچینده گئجه‌لریم‌دیر.
بلکه ده روحوما آیدینلیق یایان،
بیر سرین، ضیالی، یاز سحریم‌دیر.

قوی دئسین دونیانین ائل عاشیقلاری،
بو شؤوقو کیم منیم روحوما یایدی!
دوناردیم، گؤزونون شن ایشیقلاری،
قلبیمین جامیندا قیریلماسایدی.

قارا قیش اوستومه تؤکر قارینی،
نرگیز گؤزلریندن منی آییرسان.
منیم اومیدیمین قاپیلارینی،
نئچون گاه آچیرسان، گاه قاپاییرسان؟

سنین گؤزلرین‌می گنجلیک باغیندا،
یوخسا نرگیزلرین سایریشیب اوینار؟
یوخسا چیخیلمایان عشقین داغیندا،
عؤمرومون دیریلیک چشمه‌سی قاینار؟...

#میکائیل_موشفیق
#شعر_اوجاغی
@SheirOcagi

‍ ▫️بیر ده باخسان منه...

باخیشین قلبیمی اینجیتمیشدیر؛
بو باخیشدان، بو دوروشدان ال چک!
بیر ده باخسان منه، ایش بیتمیشدیر،
بیر ده باخسان منه، فیکریم دؤنه‌جک.

یئنیدن اویخوسو قاچمیش گئجه‌لر،
سئوگی‌لر، فیرتینالار باشلاناجاق.
آیریلیق‌لار، قاریشیق بیلمه‌جه‌لر...
یاناجاق سیتمالی* روحوم، یاناجاق.

بو باخیشدان، بو دوروشدان ال چک!
یوخسا کؤنلومده‌کی قیزغین شیمشَک،
اوستونه اود سووورار هر یئردن.
اوردا دور، بوردا دایان، هئی بکله!
سنی طالع گونشیم گودمک‌له،
کئچمه‌سین قورخولو وادی‌لردن!...

#میکائیل_موشفیق

* قیزمالی

#شعر_اوجاغی
@SheirOcagi

‍ ▫️سنین گولوشلرین

قارشیمدا نازلانیب یئنه گولورسن،
بیلسن گولوشلرین نه‌یه بنزه‌ییر؟
من دئسم آرتیقدیر، اؤزون بیلیرسن،
لاله یارپاغیندا شئهه بنزه‌ییر.

سنین گولوشلرین بیر روزگار کیمی،
اسرکن آرزومون گولو آچیلیر.
گولسه دوداقلارین اولدوزلار کیمی،
روحوما بیر سرین ایشیق ساچیلیر.

سؤیله، گؤزل‌لرین دوداقلاریندان،
بو اویناق گولوشلر اومولموش‌مودور؟
سنین هر قهقهه‌ن آی کناریندان،
کئچن بولودمودور، اوچان قوش‌مودور؟

سنین گولوشلرین یاز سحریندن،
حیسّیمه، فیکریمه سانکی رنگ آلیر.
گول کی! شعیرلریم گولوشلریندن،
قیریلماق بیلمه‌ین بیر آهنگ آلیر.

سن گولدویون زامان بو شاد گونومده،
آچیلیر قارشیمدا، جانلانیر باهار.
بعضاً باش اوجومدا، بعضاً اؤنومده،
شیمشک‌لریم چاخار، سولاریم آخار.

جاهان کی سولمایان بیر باغچا-باغ‌دیر،
بوردا روامی‌دیر گولمه‌دن اؤلمک؟
یازیق او شخصه کی، قاراقاباق‌دیر،
نه قدر یاراشیر اینسانا گولمک!...

#میکائیل_موشفیق
#شعر_اوجاغی
@SheirOcagi

‍ ▫️یاغیش یاغارکن

یاغیش یاغیر، رقص ائیله‌ییر گور داملالار،
سیرا-سیرا، اینجی-اینجی نور داملالار.

گؤیده ایکی قارا بولود چاتیلاراق،
ایلدیریملار شاققیلداییر شاراق-شاراق.

قوشلار اوچور یوواسینا پیریل-پیریل،
شیریلداییر ناوالچالار شیریل-شیریل.

چاخناشمادا گؤی اوزونده ایلدیریملار،
بیر-بیرینه دَیدی، باخین، قالدیریملار!

دؤنمه‌لرده دورانا باخ، قاچانا باخ!
قالدیریمدا او بالاجا اوغلانا باخ!

اؤز دؤشوندن یئنی سؤزلر توخویاراق،
آیاغینی شاپپیلدادیر اوخویاراق.

گوله-گوله بیر قیز قاچیر او سکیدن،
اورک‌جیگی خالی دئییل سکسَکی‌دن.

یانیندا بیر گنج ده قاچیر،
یاغیش یاغیر، اونو آچیر.

ائی گنج، دورما! قولتوقلاماق زامانی‌دیر.
طبیعتین ان شوخ، چاقراق زامانی‌دیر.

یاغ، یاغیشیم، یاغ سئل اول، یاغ!
سیرما-سیرما، تئل-تئل اول، یاغ!

چؤزول، سن کی کؤلگه‌لی بیر یار ساچیسان،
باغری‌یانیق صحرالارین علاجیسان.

یاغ، یاغیشیم، سئلله‌نه‌رک،
سیرمالانیب تئلله‌نه‌رک!

زومزومه‌نله شیرین-شیرین دیل‌لن، یاغیش،
کوچه‌لرده اوشاق کیمی وئل‌لن، یاغیش!

بونلار کئچر، چارپین، سما، کؤکسوم کیمی!
ائی ایلدیریم، سس وئر منه، سسیم کیمی!
یاغ، ائی یاغیش، فیکریم کیمی، حیسّیم کیمی!

اوزاق، یاخین چؤللره یاغ،
اؤلکه‌لره، ائل‌لره یاغ!...

یاغیش یاغیر، رقص ائیله‌ییر گور داملالار،
سیرا-سیرا، اینجی-اینجی نور داملالار...

#میکائیل_موشفیق
#شعر_اوجاغی
@SheirOcagi

▫️اولدوزلار

بعضاً تیتره‌شه‌رک پارلاییرسینیز،
گؤیلر باغچاسیندا لاله‌لر کیمی.
بعضاً یاش تؤکه‌رک آغلاییرسینیز،
لاله‌لر اوستونده ژاله‌لر کیمی.

باخارکن سوزولن گؤزلرینیزه،
دئییرلر: نه قدر سیز یوووقسونوز!
حقیقتده ایسه بیر-بیرینیزه،
سیز چوخ ایراقسینیز، سیز سویوقسونوز.

فقط بیز -او گؤزل سئوگیلیم‌له من-
اوزاقدان-اوزاغا تانیش دئییلکن،
نه قدر یاخینیق، اؤیرن‌سه‌یدینیز.

شیرین صؤحبتلردن اوزاق دا اولساق،
اوزون ایللر بویو آیری دا قالساق،
عئینی دویغولارلا وورور قلبیمیز...

#میکائیل_موشفیق
#شعر_اوجاغی
@SheirOcagi

▫️منیم عشقیم

نه آغیردیر منیم عشقیم، نه آغیر!
بو آغیر ثیقلَتی چکمز دیولر.
ائی کؤنول! بوردا تحمّول گؤستر،
نه هارای چک، نه آجیقلان، نه باغیر!

ایلدیریم چاخدیراجاق هر یاندان،
آزاجیق دولسا بولودلارلا سما.
بو دنیزلر ده چوجوق‌دور، باخما!
سارسیلیر هر قوپاجاق توفاندان.

من فقط کندیمی حیسّ ائتدیم شاد،
چکمه‌دیم عشقین الیندن فریاد‌،
بو دا هر داورانیشیمدان بیلینیر.

گؤزلرین، آه او قارانلیق گؤللر!
بو گؤزل گؤللره چوخ دالسام اگر،
هر آغیرلیق اوره‌ییمدن سیلینر...

#میکائیل_موشفیق
#شعر_اوجاغی
@SheirOcagi

▫️کؤنول‌اوغورلایان بیر آدی واردیر،
ملک دئییل، آما قانادی واردیر.

سیاه قاشلارینین کؤلگه‌لیگینده،
دائیما چیرپینیر ایکی گؤیرچین.
قوناراق کؤنلومون بوداقلارینا،
هر گون شعر اوخویور اونلار منیمچون.

ایندی اؤز-اؤزومه اینانمیشام من،
نه قدر بختیار اینسانمیشام من!

ساچلاری آندیریر زرّین سولاری،
تؤکولوب آخدیقجا اوموزلارینا.
اوخشاییر بدنی، بیاض اندامی،
کؤلگه‌ده بسلَنمیش قوزئی قارینا.

آمان‌دیر اسمه‌سین توفان یئللری!
سولار عشقیمیزین غؤنچه گوللری.

#میکائیل_موشفیق
#شعر_اوجاغی
@SheirOcagi

▫️منیم بئش‌ایللیگیم

هر کس اؤز ایشینی سونا یئتیردی،
کیمسه بو دونیادا آرزو قویمادی.
کیمی یئر آلتیندان خبر گتیردی،
کیمی اوچدو گؤیه، یئنه دویمادی.
ائللر مورادینی آلدی زاماندان،
بیزه کؤنول سؤزو قالدی زاماندان.

گؤزل‌دیر بیر اوجا امل بسله‌ییب،
بو امل اوغروندا قان تره باتماق.
گؤزل‌دیر گونشی، آیی سسله‌ییب،
اونلاری دا بیزیم دسته‌یه قاتماق.
دؤوران‌لا ال-اله وئرمک یاخشی‌دیر،
هر باغدان بیر چیچک درمک یاخشی‌دیر.

گؤرمَکچون اؤزونو هر کس ایلَرده،
بیر مقصد اوغروندا گؤستریر هونر.
چارپیشیب هاوادا، دنیزده، یئرده،
هر دؤیونن اورک بیر امل بسلر.
حئییف! عؤمور قیسا، آرزو گئنیش‌دیر،
کیم بو قایغی ایله تیتره‌مه‌میش‌دیر؟!

بو وفاسیز عؤمور، بو جوشقون دره،
گرک‌ بوش-بوشونا آخیب کئچمه‌سین!
بو گؤزل جهانی سانیب پنجره،
هر گلن ساده‌جه باخیب کئچمه‌سین!
گلین، آرزوموزا چاتالیم، دوستلار!
داغلاری داغلارا قاتالیم، دوستلار!

آیریلیب آرزومون کشمکشیندن،
گیزلنمه کؤنلومده سن ده، ائی ایلهام!
گاه باتان، گاه چیخان قیش گونشیندن،
درس آلیب دایانما گئنده، ائی ایلهام!
نییه من ایسته‌ین اولماسین، نییه؟
منیم بئش‌ایللیگیم دولماسین، نییه؟

#میکائیل_موشفیق
#شعر_اوجاغی
@SheirOcagi

▫️کؤنلومو

شیمشک کیمی بولودلاری قوواراق،
وئردیم پارلاق چیچک‌لره کؤنلومو.
گونش کیمی قارانلیغی بوغاراق،
وئردیم اودلو دیلک‌لره کؤنلومو.

جاوان عؤمروم بیر موم کیمی سؤنرکن،
یوکسک‌لردن آلچاقلارا ائنرکن،
امل‌لریم بیر سرابا دؤنرکن،
چاخیب وئردیم شیمشک‌لره کؤنلومو.

او زامان کی صاحیب اولدوم قانادا،
بیر قوش کیمی نظر سالدیم حیاتا.
ائتدی منی گنجلیک شؤوقوم احاطا،
وئردیم سرخوش کولک‌لره کؤنلومو.

#میکائیل_موشفیق
#شعر_اوجاغی
@SheirOcagi

▫️آند اولسون!

شاعیرلری قانادیندا بسله‌ین،
اینسانلارین حیاتینی سوسله‌ین،
اینجی روحلو ملک‌لره آند اولسون!

بوینونداکی دالغا-دالغا تئللره،
قاشلارینین آلتینداکی سئللره،
قلبینده‌کی ایستک‌لره آند اولسون

گول اوزونده یئنی-یئنی آچیلمیش،
خوش ایییسی اوره‌ییمه ساچیلمیش،
قوخلادیغیم چیچک‌لره آند اولسون!

قومرولارین یاتاغینی اوخشایان،
پیشیک کیمی آیاغینی اوخشایان،
سالخیم-سالخیم کولک‌لره آند اولسون!

بولودلاردان ایلدیریملار چاخدیران،
گؤی اوزونده چیراقبان‌لار* یاخدیران،
آلا گؤزلو شیمشک‌لره آند اولسون!

هپ سنینله گؤروشمک‌دیر دیله‌ییم،
اوغوروندا گئجه-گوندوز چکدیگیم،
زحمت‌لره، امک‌لره آند اولسون!

گنجلیگیمه قاناد وئرن، روح وئرن،
هر دقیقه آیری جیلوه گؤسترن،
ال‌ایریشمز دیلک‌لره آند اولسون!

بو حیاتین فرقی یوخدور دنیزدن.
ایشده اونون اوزَرینده رقص ائدن،
قانادلانان اورک‌لره آند اولسون!

سنسن منیم حیاتیمین مئحوَری،
سنسن منیم گنج عؤمرومون رهبری،
تاپیندیغیم فلک‌لره آند اولسون!

#میکائیل_موشفیق
* بایرام و شنلیک‌لرده چوخلو چیراق یاندیرما، ایشیقلارلا بزه‌مه
#شعر_اوجاغی
@SheirOcagi

▫️اؤیره‌نیش

«حیات نه‌دیر؟» سؤال وئردیم اؤزومه،
معناسینی چیچک‌لردن اؤیرندیم.
یاشادیقجا چارپیشماغی، سئومه‌یی،
قلبیمده‌کی دیلک‌لردن اؤیرندیم.

بیر یای آلدیم چیخماق اوچون شیکارا،
توش گلدیم بیر آهو گؤزلو نیگارا.
نیشان آلیب اوخ آتماغی، نه چارا
داش اورک‌لی ملک‌لردن اؤیرندیم.

سولار کیمی کؤپوکله‌نیب داشماغی،
ائللر کیمی اوجا داغلار آشماغی،
مین بیر امل آرخاسینجا قوشماغی،
دورلو-دورلو اورک‌لردن اؤیرندیم.

خبر اولسون هر تازه‌یه، هر گنجه:
اینسان‌ جوجوق، حیات اونا اَیلنجه.
من گورولتو قوپارماغی ایلک اؤنجه،
آلوو گؤزلو شیمشک‌لردن اؤیرندیم.

«حیات نه‌دیر، اؤلوم نه‌دیر؟» بوش سؤال،
«سئودا نه‌دیر، هیجران نه‌دیر؟» بیر خیال.
من بونلارین اساسینی ایشده، آل:
هپ چکدیگیم امک‌لردن اؤیرندیم.

#میکائیل_موشفیق
#شعر_اوجاغی
@SheirOcagi

▫️گزدیگیم یئرلر

عصیرلردن بری، ایللردن بری،
دردینه قالدیغیم یئردیر بو یئرلر.
بیلییور ساچلاری قیزیل بیر پری،
قوربانی اولدوغوم یئردیر بو یئرلر.

بو گؤزل عالمی گزدیکجه داغ-داغ،
اولدوم سئوینجینه، غمینه اورتاق.
ائی سؤیودلو دره، ائی دومانلی داغ!
صفایا دالدیغیم یئردیر بو یئرلر.

قاپیلدیم بو یئرده اَیلنجه‌لره،
آنلامیش هر ایرماق، بیلمیش هر دره
یا دالیب دیقّت‌له دوشونجه‌لره،
یا ایلهام آلدیغیم یئردیر بو یئرلر.

#میکائیل_موشفیق
#شعر_اوجاغی
@SheirOcagi

▫️یادیما دوشدو.

کئچن گونلریمی ورق‌له‌ییرکن،
سئودالی دیللرین یادیما دوشدو.
خیالین قارشیمدا جانلاندی بیردن،
گؤیرچین اللرین یادیما دوشدو.

دئییلدیر عشق اودو منی یاندیران.
روحومون شهرینی ایشیقلاندیران،
پوزغون شفقلری منه آندیران،
ضیالی تئللرین یادیما دوشدو.

او گون ده بیر گوندو، ائی اوزو دؤنموش!
ساندیم ایچینده بیر قاپلان دؤیونموش،
بیر آندا کؤپورموش، بیر آندا سؤنموش.
خیرچین* عمل‌لرین یادیما دوشدو.

#میکائیل_موشفیق
* عینادکار (Xırçın)
#شعر_اوجاغی
@SheirOcagi

▫️اوخو!

اوخو، سئودیجه‌ییم، اؤز هوَسینله!
ایلهام قانادلانیر سنین سسینله.
نغمه‌نده اویناسین سئل‌لرین سسی،
دان یئریندن اسن یئل‌لرین سسی!

گول‌لری قوخلایان بیر روزگار کیمی،
قوملاری اوخشایان دالغالار کیمی،
تیتره‌ین، چاغلایان نغمه‌ن اولایدیم،
اوره‌ییندن قوپان سس من اولایدیم!

اوخو! قووّت گلسین شعره، صنعته،
کؤنلومون قوشونو گتیر حئیرته!
نه قدر بنزه‌ییر، واردیم فرقینه-
عؤمرومون آهنگی سنین شرقینه!

اورک کؤورک‌لشیر سن اوخویاندا،
سن ده دینله‌سه‌یدین من اوخویاندا!
اوخو، سئودیجه‌ییم، اؤز هوَسینله!
ایلهام قانادلانیر سنین سسینله.

#میکائیل_موشفیق
#شعر_اوجاغی
@SheirOcagi

▫️کولک‌لر

هر سحر، هر آخشام...هر آخشام، هر سحر،
چوخ زامان سرسری کولک‌لر بی‌خبر،
بیر یاخین دوست کیمی، قاپیمی دؤیرلر.
کولک‌لر، کولک‌لر، بسته‌کار کولک‌لر،
دونیانی دولاشان بختیار کولک‌لر!

بعضینیز قورخولو، بعضینیز قورخوسوز،
بعضینیز دویغولو، بعضینیز دویغوسوز،
بعضینیز اویخولو، بعضینیز اویخوسوز،
کولک‌لر، کولک‌لر، ائی سرین کولک‌لر!
سیزده وار قوخوسو هر یئرین، کولک‌لر!

ائی چیلغین کولک‌لر، نشه‌نیز داشارکن،
باغلارین شئهیندن مئی سوروب جوشارکن،
نال‌قیران داغلاری آتلاییب آشارکن،
منی ده آلانیز، اوچاییم داغلارا،
کؤنلومده نه وارسا، آچاییم داغلارا!

گورلایین، ایلهامیم، صنعتیم گورلاسین،
فیرتینام، قاسیرغام، قودرتیم گورلاسین،
شیمشه‌ییم پارلاسین، ظولمتیم گورلاسین!
ائی منی سرآزاد بسله‌ین کولک‌لر،
بیر داغین باشیندان سسله‌ین کولک‌لر!

#میکائیل_موشفیق
#شعر_اوجاغی
@SheirOcagi