▫️من آلچاقدان ییخیلدیم،
هوندور گرک اولمادی.
جان آتدیغیم اوجالیق،
ایندی گرک اولمادی.

قبریم دار ایدی، قازدیم،
آدیم یوخویدو، یازدیم.
اؤزومو سؤزدن آسدیم،
کندیر گرک اولمادی.

دونیا، چئویر زرلری!
سیل اوستوندن ارلری!
آچیلان سحرلری،
سؤندور!...گرک اولمادی.

#رامیز_قوسارچایلی
#شعر_اوجاغی
@SheirOcagi

▫️هر گون‌اورتام بیر قضادی،
آخشامدان آللاه ساخلاسین!
نه شام شئعیر چیچه‌یی‌دی،
نه شامدان،...آللاه ساخلاسین!

یارپاق درده داغ بوکولور،
ساریسینا باغ بوکولور،
سسیمدن تورپاق تؤکولور،
دوعامدان آللاه ساخلاسین!

سون‌بئشیگم دینیم کیمی،
ثاوابلاریم قنیم کیمی.
آللاهی دا منیم کیمی-
آدامدان آللاه ساخلاسین!

#رامیز_قوسارچایلی
#شعر_اوجاغی
@SheirOcagi

▫️نه سنده حیس وار ایمیش،
نه منده عاغیل، گولوم!
بو دا بیر ماجرایمیش،
بو دا بیر ناغیل، گولوم!

گئت، عهدینی پوزوب گئت!
گوناهینی سوسوب گئت!
هئچ اولماسا کوسوب گئت!
داغ اوستدن داغ اول، گولوم!

یول سنین، چاپار سنین،
نه‌ییم وار، آپار، سنین!
روحوم تئز تاپار سنی،
من اؤلدوم، ساغ اول، گولوم!

#رامیز_قوسارچایلی
#شعر_اوجاغی
@SheirOcagi

▫️یازینا گول اکیرم،
قیشین سوواریر منی.
کیرپیگینه دوزولن،
یاشین سوواریر منی.

بیر اوزده غم یئری‌یم،
بیر سؤزده شام یئری‌یم،
بیر اورک شوم یئری‌یم،
خیشین سوواریر منی.

آه!...یئنه تک‌لنمیشم،
سوکوتلا یوک‌لنمیشم،
روحونا کؤک‌لنمیشم،
هوشون سوواریر منی.

#رامیز_قوسارچایلی
#شعر_اوجاغی
@SheirOcagi

▫️او گئجه قار یاغمیشدی ها،
او قار ایندی ارییَرمی؟
بیز دولاشان جیغیرلاری،
بیر ده او قار بورویَرمی؟

او گون تئلین یووشان ایدی،
آه، نه حزین آخشام ایدی!
هر یان گول-گول، شان-شان ایدی،
آری کؤنلوم کیرییَرمی؟

گؤیه اولدوز باغلامیشدیق،
یئره یارپیز باغلامیشدیق،
حئیرتدن بوز باغلامیشدیق،
بوز آدام دا یئرییَرمی؟!

#رامیز_قوسارچایلی
#شعر_اوجاغی
@SheirOcagi

▫️شکلینی چکدیم گؤزومه،
توخونسان کور اولاجاغام.
دونیایا سیغمایان جانیم!
من سنه دار اولاجاغام.

داها درددن یایینمیرام*
سندن اولدوز، آی اوممورام.
گؤز یاشیندا یویونمورام،
جادار-جادار اولاجاغام.

گل، داشا توت بو اوره‌یی!
سوکوت دیلیمین الجه‌یی،
تئللرینده نار چیچه‌یی،
اوستده ده قار اولاجاغام.

#رامیز_قوسارچایلی
* قاچماق، بویون قاچیرماق
#شعر_اوجاغی
@SheirOcagi

▫️گل، بیر طالع شکلی چکک!
تورپاق نارین، شوم دورودو.
دنیز یویور گؤزل‌لیگین،
دالغا شیرین، قوم دورودو.

چیچک چکه، ال اوزانا،
توخوناسان، جان قیزینا!
بال بولاشیب گول توزونا،
شان پریشان، موم دورودو.

تئل بورولوب اوزدن کئچیر،
غم دوشدویو ایزدن کئچیر،
«عشق» دئدیگین گؤزدن کئچیر،
عشقین یاشی دوم‌دورودو.

#رامیز_قوسارچایلی
#شعر_اوجاغی
@SheirOcagi

▫️بو چای او باشدان باتیب،
مجرا منیم دئییل کی.
اوستونده شیطان یاتیب،
حوجره منیم دئییل کی.

نه ایل، نه ده بورج آنلار،
خوروز گون‌اورتا بانلار.
دولاشیرام نادانلار-
ایچره، -منیم دئییل کی.

دولو بوش، بوش یئگین‌دی،
عاغیل دا بوش شئی ایندی.
بئش-آلتی ائششه‌یین‌دی،
دونیا منیم دئییل کی.

#رامیز_قوسارچایلی
#شعر_اوجاغی
@SheirOcagi

▫️بو سئودایا لکه دوشدو،
قارا سندن، ساری مندن.
بو حسرته یول اوزاندی،
یاری سندن، یاری مندن.

اوزلو غمیم قاریمادی،
سببینی آرامادیم.
هئچ اؤزوم ده یاریمادیم،
نئجه دئییم: یاری مندن؟

بیر زمی‌یم دن باغلاماز،
سونبوللریم دن ساخلاماز،
گونوم سنه گون آغلاماز،
یوللان گونه ساری مندن!

#رامیز_قوسارچایلی
#شعر_اوجاغی
@SheirOcagi

▫️باخیب بیر آز دا اوخشا،
هله وئرمه شکلیمی!
سورت حیرصینه، قاناسین،
ائله وئرمه شکلیمی!

یاندیر، یاریدا سؤندور،
یامان یانمالی گون‌دور.
کولونو منه گؤندر،
یئله وئرمه شکلیمی!

فله‌یین داشی بس‌دی،
داشین دا یاشی بس‌دی
گؤزونده داشی! بس‌دی،
اله وئرمه شکلیمی!

#رامیز_قوسارچایلی
#شعر_اوجاغی
@SheirOcagi