‍ ▫️تکی سنین اوزون گولسون!

منیم اوزوم گولن دئییل،
تکی سنین اوزون گولسون!
منی گؤرسه «عمی» دئییب-
اوغلون گولسون، قیزین گولسون!

من کی سنه یاراشمادیم،
سؤز دئمه‌دیم، دالاشمادیم‌.
اولدوزوموز باریشمادی،
قوی یئنه اولدوزون گولسون!

یوز ایل قوجالما، قاریما!
بیر سحر چیخیب یولوما-
دوز سپسن کؤهنه یاراما،
یارام گولسون، دوزون گولسون!...

#رامیز_رؤوشن
@SheirOcagi

▫️یارپاق

اؤتدو-گئتدی جاوان یاشیم،
چاتدیم عؤمرون یاریسینا.
یاواش‌-یاواش ائنیر باشیم،
اوره‌ییمین آغریسینا.

باشیم اوسته دان سؤکولور،
داغیلیر گئجه‌نین کولو.
بو دونیانین اوزو گولور،
اغی چیخیر قاراسینا.

ساچیمین دا آرتیر آغی،
اسیر عؤمرومون بوداغی.
چئوریلیرم بیر یارپاغین،
یاشیلیندان ساریسینا.

بیر سحر گؤرسم اؤلومو،
الیمدن سالسام قلمی،
یارپاق کیمی قویون منی،
یارپاقلارین آراسینا!

#رامیز_رؤوشن
@SheirOcagi

▫️گؤرونمه‌دین بیر کیمسه‌یه،
چتین من ده تاپیم سنی.
قانادیم یوخ اوچوم گؤیه،
گؤی اوزونده تاپیم سنی.

بیر بولودون اوستونده‌می،
گؤیه قالخان توستوده‌می،
مسجیدده‌می، کیلسه‌ده‌می،
هانسی دینده تاپیم سنی؟

من بو آللاهسیز اؤلکه‌ده،
آزمیشام یولو بلکه ده.
هانسی دالاندا، دؤنگه‌ده،
هانسی تینده تاپیم سنی؟

کیم بیلیر، نئجه‌سن، نئجه.
کیم بیلیر، بلکه بو گئجه،
سن ایدین قاپیمدان کئچن،
تانیمادی قاپیم سنی...

#رامیز_رؤوشن
#شعر_اوجاغی
@SheirOcagi

▫️فیکیر ایچینده

بو شهرده هئیکل‌لرین،
هامیسی فیکیر ایچینده.
بوست‌لرین* یاریسی یوخدو،
یاریسی فیکیر ایچینده.

هئیکل‌لرین دونوق گؤزو،
یوخاریدان سوزور بیزی.
جاوانی، قوجاسی، قیزی،
قاریسی فیکیر ایچینده.

باش آچمادیق بو نه سیردی-
بیزی بورا کیم گتیردی.
نه قیسا بیر عؤمور سوردوک-
بیر اوزون فیکیر ایچینده!...

#رامیز_رؤوشن
* اینسان بدنینین بئلدن یوخاری حیصّه‌سینین هئیکلی (Büst)
#شعر_اوجاغی
@SheirOcagi

▫️دلی

هر بیر درده دؤزن آدام،
هئچ بیر شئیدن دلی اولور.
اؤزو ده خبر توتمادان،
غفلتاً گولمه‌لی اولور.

دوز یولدا چاشیر آیاغی،
قاریشدیریر سولو-ساغی.
و بو ایشده نه آللاهین،
نه بنده‌نین الی اولور.

بئینینی گمیرن زلی،
دئییر کی «دلی‌سن، دلی.»
هر یاندان اوزولور الی،
و آدام اؤلملی اولور...

#رامیز_رؤوشن
#شعر_اوجاغی
@SheirOcagi

▫️الی آللاه اته‌یینده.

الی آللاه اته‌یینده،
گوناهی وار مله‌یین ده‌
سئوگینی قیز اوره‌یینده،
اکن کیمدی، درن کیمدی؟!

مین گوناها باتا-باتا،
عؤمرونو سورور هر آدام.
کیمدی یانیمیزدا یاتان،
یوخوموزا گیرن کیمدی؟!

گؤی اوزو آیلی-اولدوزلو،
آللاه باخیر گیزلی-گیزلی.
بلکه بیر آللاه تمیزدی؟
گؤرن کیمدی؟... بیلن کیمدی؟...

#رامیز_رؤوشن
#شعر_اوجاغی
@SheirOcagi

▫️تانری بیزه عؤمور وئردی،
چیخدیق ظولمتدن ایشیغا.
تانری بیزه عؤمور وئردی،
اؤزگه‌لره دانیشماغا.

بیزه سوسماغا دیل وئردی،
قیفیل آسدی دیلیمیزدن.
قالخدیق، باسدی بئلیمیزدن.
نه آلدی‌سا الیمیزدن،
عوضینده صبیر وئردی.

چوخ عؤمور تویا دؤندردی،
کیمینی آیا گؤندردی.
بیزی ده سویا گؤندردی،
الیمیزه خلبیر وئردی...

#رامیز_رؤوشن
@SheirOcagi

▫️اَییلدیم سولارا باخدیم،
آختاردیم جاوان اوزومو.
سولار آخدی، سولار آخدی،
آپاردی جاوان اوزومو.

قاچدیم، داش-قایا بیلمه‌دیم،
قاچدیم، حاقلایا بیلمه‌دیم.
توتوب ساخلایا بیلمه‌دیم،
سولاردا آخان اوزومو.

اوز-گؤزوم قیریشدی، آنام!
بو نه توردو، دوشدوم، آنام؟!
اؤلَنه‌جن قورتارمارام،
داها بو توردان اوزومو...

#رامیز_رؤوشن
#شعر_اوجاغی
@SheirOcagi

‍ ▫️چیچک‌لر دوغولور بو یاز گئجه‌سی.

چیچک‌لر دوغولور بو یاز گئجه‌سی،
بو یاز گئجه‌سینده سئومه‌یه نه وار؟!

درسم گول‌لرینی بو گلن یازین،
ساللانیب یئلله‌نسم بوداقلاریندان،
ائشیتسم آدیمی سئون بیر قیزین-
هله اؤپولمه‌میش دوداقلاریندان،
بو یاز گئجه‌سینده اؤلمه‌یه نه وار؟!

چیچک‌لر دوغولور بو یاز گئجه‌سی،
اوزاق خسته‌خانا اوتاقلاریندا.
باشینی دیبچَکدن اوزادیب باخیر،
یاتان خسته‌لرین هر بیریسینه.
هله قورخاق عطری، اوتانجاق عطری،
قاریشیر اوتاغین یاد ایی‌سینه،
درمان ایی‌سینه، یود ایی‌سینه...

چیچک‌لر دوغولور بو یاز گئجه‌سی،
چیچک‌لر آچیلیر گوللـه سسینه،
گوللـه آچیلیر.
آغ- آغ کؤینک‌لرین یاخالیغیندا،
ساغ- ساغ اورک‌لرین یاخین‌لیغیندا.
گوللر آچیلیر،
گوللـه‌لر آچیلیر، گول‌لر آچیلیر.

چیچک‌لر آچیلیر بو یاز گئجه‌سی،
چیچک‌لر دوغولور بو یاز گئجه‌سی،
پاریسده، تبریزده، حیَطیمیزده.
بو یاز گئجه‌سینده چیچک‌له‌یه‌جک،
بلکه دردیمیز ده، حسرتیمیز ده.

چیخاجاق یوللارا چیچک‌لی قیزلار،
نه باخماغا گوج وار، نه گؤز یومماغا.
نه چیچک وئرمه‌یه بیر کسیمیز وار،
نه بیر کیمسه‌میز وار چیچک اومماغا...

... درسم گول‌لرینی بو گلن یازین،
ساللانیب یئلله‌نسم بوداقلاریندان،
ائشیتسم آدیمی سئوَن بیر قیزین-
هله اؤپولمه‌میش دوداقلاریندان،
بو یاز گئجه‌سینده‌ اؤلمه‌یه نه وار؟!

#رامیز_رؤوشن
@SheirOcagi

▫️تانیییر...

موسیقی:
#توحید_نوروزی
شعر:
#رامیز_رؤوشن
@SheirOcagi

‍ ▫️قارغیش

لاپ بئشیکده، بلَکده،
ائشیتدیک بو قاغیشی:
«گزمه‌یه غوربت اؤلکه،
اؤلمه‌یه وطن یاخشی».

بیر غوربت اؤلکه گزمک،
دوشمه‌دی پاییمیزا.
بو وطنی کفن‌تک،
اؤلچدولر بویوموزا.

قایچی‌تک آرازی دا،
آرالیغا قاتدیلار.
بو کفنی بیر آز دا،
کسدیلر، قیسالتدیلار.

کیمین الی چیخدی‌سا،
کیمین دیلی چیخدی‌سا
بو کفنین آلتیندان،
الینی ده کسدیلر،
دیلینی ده کسدیلر،
بو وطنین آدیندان...

بو کفنی بیر آچ، باخ،
هله دیری‌ییک، آللاه!
بو کفندن آغ‌آپپاق،
بیزه کؤینک تیک، آللاه!

بیز ده بنده‌نیک آخی!
بیزه نه درد، نه غم وئر!
اؤلمه‌یه یوخ، ایلاهی،
یاشاماغا وطن وئر!

#رامیز_رؤوشن
#شعر_اوجاغی
🎙سالار موغانلی
@SheirOcagi

▫️اومید یئری

قولاق ائشیتمیرسه آغیز دئیَنی،
نئجه دانیشاسان، ائشیدیله‌سن؟
نه یاخشی هئچ کسین خبری یوخدو،
هئچ کس ده بیلمیر کی ساغسان هله سن.

دونن دؤرد یانینی کسن‌لر بئله،
ایندی ائله بیلیر، سن داها یوخسان.
دونن سندن قورخوب اسن‌لر بئله،
ایندی ائله بیلیر، سن داها یوخسان.

آما نه یاخشی کی، سن هله وارسان،
سن هله دیریسن بو یئر اوزونده.
اومیدین هر یئردن اوزولنده ده،
بیر اومید یئری‌سن بو یئر اوزونده.

دونیادان سن نئجه بئزه‌سن آخی؟!
هله یازیلمایان واراقلارین وار.
بیر قوجا آغاجا بنزرسن آخی!
هله بار گتیرن بوداقلارین وار.

گؤرموسن، گووه‌نیب یارپاقلارینا-
کؤلگه‌نده اوزانیب یاتانلاری دا.
سونرا دا اویانیب، بوداقلارینا
یئردن داش گؤتوروب آتانلاری دا.

آمّا بار وئرمکدن بئزمیرسن یئنه،
هئچ کسدن اینجیییب-کوسمورسن یئنه.

آدام، بارماغینا تیکان باتاندا،
چیچکدن کوسورمو، سن ده کوسه‌سن؟
آغاج، بوداغیندان یارپاق قوپاندا،
کولَکدن کوسورمو، سن ده کوسه‌سن؟

سن بیر آغاج کیمی بوداق-بوداقسان،
کیمینه آچیلان یاشیل قوجاقسان.
کیمینین ائوینده یانان اوجاقسان.

فرقی یوخ، لاپ الی بالتالی اولسون،
کیم سندن نه قیریب آپاراجاقسا،
قوی ائله بو باشدان حالالی اولسون!

#رامیز_رؤوشن
#شعر_اوجاغی
@SheirOcagi

‍ ▫️بیز سئوگیدن دوغولانلار دئییلیک.

دئییرلر کی هر آدام،
اوخونمامیش کیتابدی.
اگر آداملاری کیتابلار کیمی ییغا بیلسه‌یدیک رف‌لره،
قادینلار آیری، کیشیلر آیری،
خالالی، بیبی‌لی، عمی‌لی، دایی‌لی...
بابالار، ننه‌لر،
جیلدی تؤکولموش، واراقلاری یارپاق-یارپاق تؤکولموش کیتابلار کیمی.
بالالار، نوه‌لر،
اوستونه قشنگ شکیللر چکیلمیش کیتابلار کیمی.

آرابیر گؤتوروب واراقلاسایدیق،
هانسینی‌سا اوّلیندن سونونا،
هانسینی‌سا سونوندان اوّلینه-
گؤرَردیک هامیسی نئجه اوخشاییر بیر-بیرینه.
هامیسینین اوّلی ده عئینی، سونو دا عئینی،
اورتاسی قارماقاریشیق.
بیلمک اولمور،
کیم کیمه دوشمن‌دی،
کیم کیمه عاشیق.

گؤرَردیک کی، عؤمور بویو سن دئمه ننه‌میز بابامیزی سئومه‌ییب، بابامیز ننه‌میزی.
آما دونیایا بیر قوشون جولما-جوجوق گتیریبلر،
ایچینده ده بیزی.

بیز سئوگیدن دوغولانلار دئییلیک،
اونونچون ده پیس اوغلانلار دئییلیک.
قوزو کیمی فاغیریق،
بیزیم های-کویوموز یوخ.
بیزیم دجل‌لیگیمیز،
ارکؤیونلوگوموز یوخ.
قوزو کیمی دوزا گئدنلَردنیک؛
لاپ بیچاغین آلتینا دا،
اؤزو گئدنلَردنیک.

بئله‌جه گئده‌جه‌ییک،
دریمیز سویولاناجان.
جیلدی قوپموش کؤهنه بیر کیتاب کیمی،
رفه قویولاناجان.

#رامیز_رؤوشن
#شعر_اوجاغی
@SheirOcagi

▫️شهرلره اوخشاییر آداملار.

شهرلره اوخشاییر آداملار.
ایللاه کی آخشاملار ایشیقلار کئچنده،
خاطیره‌لر کوچه-کوچه اویانیر ایچینده.

تراموالار، ماشینلار کئچیر او کوچه‌لردن،
تانیش اوزلر بویلانیر سنه پنجره‌لردن.
هامیسی گئدیر، ایتیر،
کوچه‌نین‌ لاپ‌ اوزاق بیر دؤنگه‌سینده.

کوچه‌نین او باشینداکی آغاجین کؤلگه‌سینده،
بیر قیزلا بیر اوغلان اؤپوشور ایندی.
اما آغاج اؤزو یوخدو،
آغاج اؤزو کسیلیب نئچه ایلدی...

شهرلره اوخشاییر آداملار.
قوجالار، جاوانلار،
کیمیسی «گنجه» کیمی کؤهنه،
کیمیسی «سومقاییت» کیمی تزه.
کیمیسی کوره‌یینی داغا سؤیکه‌ییب،
کیمیسی آیاقلارینی ساللاییب دنیزه.
بیر اوجدان تیکیلَنی ده وار،
بیر اوجدان سؤکولَنی ده.

من شهر دئییلم هله،
بیر بالاجا قصبه‌یم.
بلکه ده بونا گؤره،
حیرصلی‌یم، عصبی‌یم.

قصبه ده دئییلم، یوخ، باپ‌بالاجا بیر ائوم.
یوخ، هئچ ائو ده دئییلم،
خیردا بیر آکواریومام بیر ائوده،
یا دا آکواریومدا لاپ خیرداجا بیر بالیق...
قوی خطرینه دَیمه‌سین،
«کور»ون ده، «خزر»ین ده،
اوزمک ایسته‌ییرم، اوزمک،
دونیا دنیزلرینده.
سونرا آیاق آچیب
دونیانی گزمک ایسته‌ییرم.
داها نه‌لر ایسته‌ییرم، نه‌لر!...

شهرلره اوخشاییر آداملار.
من ده شهر اولماق ایسته‌ییرم، شهر،
«باکی»دان داها بؤیوک،
«پاریس»دن داها گؤزل.

#رامیز_رؤوشن
#شعر_اوجاغی
@SheirOcagi

▫️عؤمرون ایکی طرفی

ایکی طرفی وار هر عؤمرون...ایکی:
گؤروندویون طرف، گؤردویون طرف.
هانسینا دوشه‌جک، نه بیله‌سن کی-
عؤمرون آخیریندا اؤلدویون طرف؟
بلکه ده، سنی بو طرفده آسدیراجاقلار،
سونرا او طرفده باسدیراجاقلار.

بیر قیز سئوه‌جکسن سن بو طرفده،
اونا دئیه‌جکسن: - دونیادا تکسن.
سونرا او طرفده بیر پینتی ائوده،
بیر قادینلا عؤمور چوروده‌جکسن.

نه قلبین یاناجاق هیجران اودوندا،
نه ده سئودیگین قیز یادین اولاجاق.
چونکی ائله او قیز دا، او قادین دا،
هر ایکیسی عئینی آدام اولاجاق.

ایکی طرفی وار هر عؤمرون... ایکی.
هر ایکی طرفده یئری اولمایان،
نفَسی گلسه ده، دیری اولمایان،
سنین کیمیلری او قدَردی کی.

سن او فرسیزلرین سیراسینداسان،
نه فرقی، بئشینجی، یا اونونجوسان.
خۏردا اوخویانلار آراسینداسان،
ان آرخا جرگه‌ده، ان سونونجوسان.

نه‌دیر اوخودوغون؟ بیلمیرسن... حئییف!
بیر ده کی، هئچ سیزی دینله‌ین‌می وار؟
نه چوخدو او خۏردا بیر سؤز دئمه‌ییب
یالاندان آغزینی آچیب-یومانلار!

نه فرقی، باشداسان، یوخسا آخیردا؟
هامیدان بیریسن سن ده او خۏردا.
هامیدان بیریسن،- نه پیس، نه یاخشی،
آمّا یوخ، ناشوکور اولماغا دَیمز.
شوکور، هر شئیین وار-
ائوین-ائشیگین، آرواد-اوشاغین،
بیر ده کی، ایچینده گیزله‌دیگین سس.

بو ایللر اۇزۇنۇ بو جور، گیزلیجه،
نئجه ساخلامیسان او سسی- نئجه؟
او سس نه صاف قالؽب سنین ایچینده!
صاف قالؽب- بو قدر حیرصین، آجیغین،
آغرینین، آجینین، غمین ایچینده.
زیلی ایچینده‌دی، بمی ایچینده.

او سس‌دی هامیدان گیزله‌دیگین سیرّ،
او سسدن قیمتلی آخی نه‌یین وار؟
آرواددان، اوشاقدان خلوت، آرابیر،
او سس‌له زومزومه ائله‌مه‌یین وار:

«عزیزیم، اولو داغلار،
چئشمه‌لی، سولو داغلار،
بوردا بیر غریب اؤلوب،
گؤی کیشنر، بولود آغلار.»

#رامیز_رؤوشن
#شعر_اوجاغی
@SheirOcagi

▫️هوشسوزلوق

بو سنین چیخدیغین سونونجو قاپی،
آرخانجا بویلانان سون پنجره‌دی.
سنین اوخودوغون او سون کیتابین،
یادیندا قالیب‌می، آدی نئجه‌دی؟

هر شئی اونودولوب، چیخیبدی یاددان،
هر شئیی توز باسیب... ایللرین توزو.
سنین یادداشین دا قالیب توز آلتدا،
ایللر هوشسوزوسان، ایللر هوشسوزو.

چوخدان بیر-بیرینه قاریشیب، ایتیب،
کؤهنه حادیثه‌لر، کؤهنه صیفت‌لر،
عاغلینی باشیندان آلان سئوگی‌لر،
ایچینی یاندیران او کؤهنه دردلر.

عؤمور توستو کیمی اوچوب، اریییب،
بیر آز گؤزلرینده قالیب آجیسی.
آیلاری، ایللری کسیب دوغراییب،
آتیب زیبیل‌لیگه واختین قایچیسی.

باریش بو حالین‌لا... اینجیمه واختدان!
بلکه هوشسوزلوق‌دو عؤمرون شنلیگی.
ال چک یادداشینی قوردالاماقدان،
بوراخ زیبیل‌لیکده ائشه‌لنمه‌یی!

داها یادداش سنین نه‌یینه گرک؟
باخما اؤتن عؤمره طامارزی کیمی.
هر کؤهنه سئوگیدن قالان خاطیره،
یئییلمیش کونفئت'ین* کاغیذی کیمی.

یئییلیب، یاشانیب، بوشالیب عؤمور،
کیم بیلیر نه قالیب عؤمرون دیبینده؟
بلکه عؤمرون سونو ائله بو گون‌دور،
چیخ، گز، آوارالان الین جیبینده!

قوی هئچ نه اومماسین بیر کیمسه سندن،
سن ده ائله بونا سئوین کی، ساغسان!
هانسی سینیقلاری جالایاجاقسان؟!
هانسی ییرتیقلاری یامایاجاقسان؟!

کیمین‌سه یوکونو چکمه‌یه، سنین-
نه هئیین، نه گوجون، نه تابین قالیب.
بو جیندیر دونیانی تیکمه‌یه، سنین-
نه داشین، کرپیجین، نه ساپین قالیب.

هر نغمه‌ن- قلبینده یاتان سیرّ ایدی،
آچدیغین سیرلرله دولویدو عؤمرون.
بنّایدین؟ درزی‌یدین؟ یا شاعیر ایدین؟
بیر اوستا عؤمرویدو سنین بو عؤمرون.

بو عؤمرون سونونا چاتیرسان، نه غم؟!
سون دفعه ال ائله گؤیده آیا دا!
چوخدان کؤهنه‌لیبدی جنّت، جهنّم،
بیر اوستا لازیم‌دی او دونیایا دا.

#رامیز_رؤوشن
* شیرنی
#شعر_اوجاغی
@SheirOcagi

‍ ▫️هئچ بیلمیرم من سنی،
هاچان، هاردا ایتیردیم.
یاغیش یودو،
یوخسا کی، کولَک آپاردی سنی؟
بو سئوگی ناغیلینی،
من بیر یوللوق بیتیردیم.
آختارمیرام،
آختارسام، یقین تاپاردیم سنی.

دونیادا بیرجه قورخوم،
سنی ایتیرمک ایدی.
سن یوخسان،
بو دونیادا داها منه قورخو یوخ.
آما سنسیز ائله بیل،
هر شئی شیکست‌‌دی ایندی.
ساعاتیمین عقربی،
چاینیکیمین قولپو یوخ.

یئل ووردوقجا یئل‌لَنیر،
پئنجه‌ییمین اَته‌یی.
پئنجه‌ییمین سونونجو-
دویمه‌سی‌تک قوپموسان.
باری چوخدان سووولموش-
آغاجین اوستونده‌کی-
ان سونونجو، ان شیرین-
مئیوه‌سی‌تک قوپموسان‌.

«دردلی‌لر اؤز دردینی،
سویا دئیر» دئییبلر.
یاخشی کی، سو دا گلدی،
دردیمدن آزاد اولدوم.
«آرمودون یاخشیسینی،
آیی یئیر» دئییبلر.
گئتدین هانسی آیینین،
داماغیندا داد اولدون؟!

سنسیز ائله بیلمه‌ کی،
کئفه باخیرام، کئفه!
سن یادیما دوشنده،
داریخیرام هر گئجه‌.
اوشاق واختی هاچان‌سا-
عؤمرومده بیرجه دفعه،
پیشی‌ییمیز ایتَنده،
داریخمیشدیم بئله‌جه.
داها اوشاق دئییلم،
هر ایتَنه آغلایام.
راحات یاتیرام داها،
یوخوم دئو یوخوسودو.

...کیمدی بو گئجه یاری،
قاپیمی جیرماق‌لایان؟
بو نه سس‌دی؟
دئیه‌سن،
پیشیک مییولتوسودو.

#رامیز_رؤوشن
🎙 سالار موغانلی
@SheirOcagi

▫️دیلین یانسین دیل یییه‌سی!
سؤز دئمه‌یه دیلیم گلمز.
بو نه سیردی، سیر یییه‌سی،
گئدن گئدر، گلن گلمز؟!

دونیا، یوللارین یورولسون،
سولارین آخسین، دورولسون!
ائو ییخان، قاپین وورولسون،
بو قاپییا گلین گلمز.

گؤیده بولود دولار گئدر،
قوشلار قاناد سالار، گئدر،
اوغوللاری آلار گئدر،
آتالارا اؤلوم گلمز.

#رامیز_رؤوشن
#شعر_اوجاغی
@SheirOcagi

▫️کیرپیک گؤزه یییه دورماز،
آغیز سؤزه یییه دورماز،
دونیا بیزه یییه دورماز،
دونیانین دا یییه‌سی وار.

دردیمیز-سریمیز بیردی،
هر دردین جانی صبیردی،
هر عؤمرون سونو قبیردی،
داها بونون نییه‌سی یوخ.

بو عؤمرو بیزه کیم بیچدی؟
فله‌یین فئلینه دوشدوک؛
بیر درزی الینه دوشدوک،
قایچیسی وار، ایینه‌سی یوخ.

#رامیز_رؤوشن
#شعر_اوجاغی
@SheirOcagi