▫️گؤردوم

بو دونیادا نه‌لر گؤردو گؤزلریم!
قارانین ایچینده آغی‌دا گؤردوم.
یازین اورتاسیندا، باهار چاغیندا،
غونچاسی سارالمیش باغی دا گؤردوم.

عاریف‌لر گؤرموشم یولوندان آزیر
ساوادسیز گؤرموشم کیتابلار یازیر
یزیدی گؤروموشم محرابدا گزیر
مؤمنه اوخشایان یاغی دا گؤردوم.

شیشه‌نی گؤرموشم داشلاری ازیر
گؤزل‌لر گؤرموشم جانیندان بئزیر
کؤرلاری گؤرموشم قاشلارین بزیر
قناره دونوندا زاغی دا گؤردوم

آزقینلار گؤرموشم، یول نیشان وئریر
سورگونلر یئرلی‌یه، ائل نیشان وئریر
درویشلر ارمیشه فعل نیشان وئریر
بنّانی سووایان تاغی دا گؤردوم.

«کاتب اوغلو»! یاغلار یاوانا بنزیر
اؤردک قازا، سئرچه ترلانا بنزیر
تولکو قوردا، ساوسار اسلانا بنزیر
چرخی ترسه دؤنن چاغی دا گؤردوم...


#کاتب‌اوغلو
@SheirOcagi

▫️اؤزو گلسین...

آماندی قویمایین آچسین یارامی!
ال وورماسین طبیب، یار اؤزو گلسین!
چاره‌سیز دردیمه مرهم بولونماز
درد درماندان کئچیب، یار اؤزو گلسین!

نه بیلیر حکیم‌لر گؤنول یاراسین؟
آیریلیغین کیمسه بولماز چاراسین.
اغیار بیلمز دردین آغین-قاراسین
دردی جانان وئریب، یار اؤزو گلسین!

آچمایین یارامی، سالمایین دیله!
ایسته‌مم سیرریمی اؤزگه‌لر بیله.
گؤزومون یاشینی گرک یار سیله!
اجل یولو کسیب، یار اؤزو گلسین!

«کاتیب اوغلو»! یازیلاندا باش داشیم،
منه آغلاماسین دوستوم-یولداشیم!
قارا باغلاماسین قوهوم-قارداشیم!
قوی قارامی گئییب یار اؤزو گلسین...!

#کاتب‌اوغلو
@SheirOcagi

▫️نئیلیرم باهاری، نئیلیرم یازی،
عؤمور باغین شاختا ووراندان سورا؟
نه فرقی آغلاسام، نه فرقی گولسم،
درد کؤنلومده یووا قوراندان سورا؟

دؤنمز الدن گئدن هفته‌لر، ایل‌لر
نه فایدا آچسا دا غؤنچه‌لی گول‌لر؟
نئیلیرم الوانا بویانسا چؤل‌لر،
باشیمداکی قاردان، بوراندان سورا؟

یاخین اولماز بیر ده حسرت اوزاغی
ایسته‌مم شانسیمین یانسین چیراغی
چرخی ترسه دؤنموش، فلک بارماغی،
بختیمین قولاغین بوراندان سورا.

«کاتب‌اوغلو» بو نه حسرت، بو نه غم؟
بو نه بلادی، نه مؤحنت، نه سیتم؟
نه فایداسی قاچام، گؤزلردن ایتم،
اجل باشیم اوسته دوراندان سورا...؟

#کاتب‌اوغلو
@SheirOcagi

▫️اوتاغیمدا،
آغاجی چوروموش،
شیشه‌سی سینمیش بیر پنجره وار.
       
ایللردی او پنجره‌نین
بو تاییندا من،
او تاییندا...
اوجسوز-بوجاقسیز بیر یول.

نه زامان‌دیر ایکی گؤزوم،
یولچوسوز بو یولا تیکیلی قالدی.
هر کیم دئسه دوز دئییب:
اینتظار اؤلومون یولداشی‌دیر...
 
#کاتب‌اوغلو
@SheirOcagi

▫️بو گونلر

بیلمیرم باشیمین نه قضاسی وار،
هر نئیلیرم اوزوم گولمور بو گونلر.
نه دوداق ترپنیر، نه دیل دولانیر،
الیم گؤز یاشیمی سیلمیر بو گونلر.

اؤلو کیمی قالدیم ساغلار ایچینده،
گونوم باتیب قارا چاغلار ایچینده.
یاوان چؤرک کیمی یاغلار ایچینده،
چکدیییمی کیمسه بیلمیر بو گونلر.

گوناه منده‌‌دی، یا یازیب سیلنده؟
نئچه ایل آغلادیر بیر گون گولنده.
گؤزون یومور فلک دردی بؤلنده،
انصاف ایله دردی بؤلمور بو گونلر.

«کاتب‌اوغلو!» بلا دوشدو پاییما،
شاختا گلدی باهاریما، یاییما.
یامان گونده کیمسه گلمیر هاییما.
قارا گئجه‌م صاباح اولمور بو گونلر...

#کاتب‌اوغلو
@SheirOcagi

▫️ناز ائیلر.

سحر-سحر نازلی صنم اویاندی،
نازلی یاریم، نازلی چاغدا ناز ائیلر.
سانکی بولبول قوناق گلیب گولشَنه،
قیزیل لاله اونا باغدا ناز ائیلر.

قارا قاشی سایه سالیر گؤزونه،
سیاه ساچلار دوشور بیاض اوزونه.
آغزین آچیر بالی قاتیر سؤزونه،
سانکی سوغان قاینار یاغدا ناز ائیلر.

دوداق دئییر گؤزه: دایان، دولانما!
گؤزلر دیله دئییر: دانیش، یوبانما!
ووصال واختی گلدی، نازا اینانما!
شیرین، فرهاد گؤرسه داغدا، ناز ائیلر.

«کاتب اوغلو» باهار قیشا قاریشیر،
آیریلیق ووصالا قارشی یاریشیر.
گؤزلری گاه کوسور، گاه دا باریشیر-
بیری سولدا، بیری ساغدا ناز ائیلر...

#کاتب‌اوغلو
@SheirOcagi

▫️دوشمه‌سین

بير دیله‌ییم واردیر سندن، آی آللاه!
یئتیمین گؤزلری سولو دوشمه‌سین!
غئیرتلی، آجیندان اؤلسه ده، اؤلسون،
مینّتلی سوفرایا یولو دوشمه‌سین!

مردین سیررین سالما ائلین دیلینه!
مؤحنتی یوکله‌مه یوخسول بئلینه!
شیّادین تورونا، ظالیم الینه،
آللاهین چاره‌سیز غولو دوشمه‌سین!       

داغلاسا کؤنلونو، حسرت داغلاسین!
آغلاسا مؤحنتدن، قویون آغلاسین!
باغلاسا گؤزَلین بختین، باغلاسین،
بوینونا چیرکینین قولو دوشمه‌سین!

گزدیرمه‌ سن باغدا، چؤلده، چمنده،
توتساق ائت سن قاردا، دوماندا، چنده!
ایگیدی یاندیرسان، یاندیر وطنده،
یادلار اوجاغینا کولو دوشمه‌سین!

«کاتب‌اوغلو» گؤزو نم اولسا، اولسون،
فله‌یین باخیشی کم اولسا، اولسون،
جانلی-جانلی قوردا یئم اولسا، اولسون،
کافتارین دیشینه اؤلو دوشمه‌سین!...

#کاتب‌اوغلو
@SheirOcagi

▫️هجران گئجه‌سی

اوزون گئجه بیتمز سنسیز،
بیر سلام سال، صاباح اولسون!
شیرین دانیش، دوداقلاردان-
تؤکولسون بال، صاباح اولسون!

قلم، دردی منه یازمیش،
حسرت، عقلی مندن آلمیش.
انصاف ائیله، باغلی قالمیش-
قاپيمى چال، صاباح اولسون!

چوخ چکیرم آجی، محنت،
باشا یئتمیر  شبِ فرقت.
سنی تانری، ائتمه منّت،
بو گئجه قال، صاباح اولسون!

«کاتب‌اوغلو» سنی اؤزلر،
گئجه-گوندوز یولون گؤزلر.
سنین اوچون آغلیر گؤزلر،
کؤنلومو آل، صاباح اولسون!

#کاتب‌اوغلو
@SheirOcagi

▫️گؤزلرین

حئیرانام  ایشینه، نقّاشِ ازل-
نه گؤزل چکیبدی قارا گؤزلرین!
طبیبه نه حاجت؟! ایسترسه ائدیر-
عالمین دردینه چارا، گؤزلرین.

کیپریگین محرابدی، قاشلارین طاغی.
گؤزونده یارانیب جنّتین باغی.
باخیشین شیطانی ائدیبدی یاغی.
قؤیمور سجده قیلا یارا، گؤزلرین.

رحمه گلیر خمار باخاندا، شدّاد.
چؤلده مجنون، داغدا حئیراندی فرهاد.
گاهدان اولور کافر کیمی بیر جلّاد،
چکیر عاشقلری دارا گؤزلرین.

کیپریگین چاتاندا قاشین تئلینه،
توتور ساقی کیمی شراب الینه.
«کاتب‌اوغلو» آلسا آدین دیلینه،
یامان سالار منی نارا گؤزلرین!

#کاتب‌اوغلو
@SheirOcagi

▫️گلسین!

قاطار-قاطار گویده اوچان دورنالار!
گئدین یارا دئیین ایمانا گلسین!
چوخدان اوزاق گزیر ائلدن، اوبادان،
دانماسین ایلقاری، پئیمانا گلسین!

دئیین: یادا سالسین گولشنی، باغی،
یاندیرسین کؤنلومده سؤنن چیراغی!
ذیروه‌سی دومانلی او قارلی داغی،
بولود کیمی آشیب بویانا گلسین!

تؤکمه‌سین عاشقین ناحاق قانینی،
باغیشلاسین گوناهینی، جانینی!
گونش باشلاداندا  ایشیق دانینی،
قوشولسون یولداکی کروانا گلسین!

«کاتیب‌اوغلو» دئییر: یالوارین یارا،
ائیله‌سین درمانسیز دردیمه چارا!
چاتاندا زیمیستان گؤزل باهارا،
قاییتسین اوبایا، گولشنه گلسین!
         
#کاتب‌اوغلو
@SheirOcagi