▫️سنین آد گونونه قصدا گئجیکدیم.

آچدیم پنجره‌می عشق هاواسینا،
بیر «گون» دوغاجاقدی، دومان ساخلادی.
بؤیوک آرزولاردان پناه اولمادی،
منی بالاجا بیر گومان ساخلادی.

سن نییه گئجیکدین، هاردایدین، قادین؟!
هر گون دوداغیمدا آغلادی آدین.
عؤموردن بیر آزجا واخت اوغورلادیم،
سنه حصر ائتمه‌یه زامان ساخلادیم.

داش داشی اویوتدو*، او دن گئجیکدی،
روحو آپاردیلار بدن گئجیکدی.
سنین آد گونونه قصداً گئجیکدیم،
من سنی بیر آز دا جاوان ساخلادیم...

#علی‌زاده_نوری

* دییرماندا بوغدا، آرپا و... اونا چئویرمک (Üyütmək)

#شعر_اوجاغی
@SheirOcagi

▫️گؤیردی

یاغدی سئوگی یاغیشلاری -
جانیمدا بیر قیز گؤیردی.
او قیزا اوجاق قالادیم،
او گلمه‌دی، کؤز گؤیردی.

بو ائودی، یوخسا زیرزمی؟
ساحیلده داریخیر گمی.
چاغیردی "یانیق کرمی"،
دیواردا بیر ساز گؤیردی.

سئویب گلدیم یالقیزلاری،
او دوعالی آغیزلاری،
شوملادیم آغ کاغیذلاری،
دئدیم بلکه سؤز گؤیردی.

آی اوردا - آسدیغین یئرده،
اولدوزلار آزدیغین یئرده،
سن آیاق باسدیغین یئرده،
داش آغاردی، توز گؤیردی.

اومود دویورماز کی، آجی،
یوز دردیم وار، بیر علاجیم.
...الهی بو دار آغاجی-
نئیله‌دین کی، تئز گؤیردی؟!..

#علیزاده_نوری
@SheirOcagi

▫️گؤزوم اوره‌ییمله یولا گئتمه‌دی.

من اؤزوم اؤزومله قومار اوینادیم،
نه یاخشی اؤزومه اودوزدوم، آللاه!
گؤزوم اوره‌ییمله یولا گئتمه‌دی،
آخیردا گؤزومه اودوزدوم، آللاه!

سینسان، گؤره‌جکسن حلیم‌دی دونیا،
غورورو اولانا قنیم‌دی دونیا.
بیر آز دا دؤزسه‌یدیم، منیم‌دی دونیا،
دؤزمه‌دیم، دؤزومه اودوزدوم، آللاه!

آچیب عشق قوتوسون، نذیر گؤتوردوم،
بو شاه غم منی ده وزیر گؤتوردو.
دؤیوشدوک، سؤز منی اسیر گؤتوردو،
دؤیوشدوک، سؤزومه اودوزدوم، آللاه!

#علیزاده_نوری
#شعر_اوجاغی
@SheirOcagi

▫️قاریش-قاریش گز بو غمی!

عؤمور گولدن، تیکاندان‌دی-
نه‌دندی... تانری گؤندریب.
روحون تانری وئرن روح‌دو،
بدنی، تانری گؤندریب.

دؤرد طرفم، اوچوم سودو،
چؤلوم سودو، ایچیم سودو.
بو یاغیش بیر ایچیم سودو،
یا دن‌دی، تانری گؤندریب؟

کیم سئوه‌جک بس بو غمی؟
گؤتور لال-دینمز بو غمی!
قاریش-قاریش گز بو غمی!
وطن‌دی، تانری گؤندریب.

#علیزاده_نوری
#شعر_اوجاغی
@SheirOcagi

▫️بو اولدوزسوز گئجه‌ده

گؤره‌سن کیم قورخودوب-
اسیم-اسیم اسیر یئل؟
منه بیر یئر گؤسترین،
اوردان گؤرونمه‌سین یئر!

سئوگی بهانه ایمیش-
هر گون داریخماق اوچون.
ایللر پیلله‌کان اولدو،
اؤلومه چیخماق اوچون.

یول دا یوخدو گئتمه‌یه،
یولا سال، منی یولا سال!
الهی! بو ظولمتده،
نئیله‌یه‌جک یول‌آزان؟!

...بو اولدوزسوز گئجه‌ده،
آی اولماق ایسته‌میرم.
آللاه گیریب یوخوما،
آییلماق ایسته‌میرم.

#علیزاده_نوری
#شعر_اوجاغی
@SheirOcagi

▫️قوشلار دن‌له‌یه‌جک گؤیده سسیمی!

ایندی شر واختی‌دیر، نئیلر شر منه؟
گئت او گؤی آغاجدان اومید در منه!
حالال اولسون دئیه بو کدر منه،
کبینه-طالاغا بوکورم اونو.

بیر جان ایسته‌دیلر سؤز عوَضینه،
گؤز یاشی وئردیلر گؤز عوضینه،
اؤلدو بو قلم ده... بئز عوَضینه-
بو کفن واراغا بوکورم اونو.

سسیمی دن‌له‌ین قوشلار جمع اولا،
سسیم آج قوشلارا بیر انجام اولا.
قورخورام کی، بالام ستَلجم اولا،
بو قارا تورپاغا بوکورم اونو.

#علیزاده_نوری
#شعر_اوجاغی
@SheirOcagi

▫️ان بؤیوک رقم ده «بیر»دی دئییرم.

سنی گؤرمک اوچون سوسادیم هر گون،
منیم اوره‌ییمده هر گون یای ایمیش.
سنین اوره‌یینی وورا بیلمه‌دی،
منیم ده اوره‌ییم سولاخای ایمیش.

ایسته‌دیم دردیمی سویا دانیشیم،
گؤردوم کی، یارالی آراز اوسته‌یم.
بدخواه ائله بیلدی ییخیلمیشام من،
آنجاق بیلمه‌دی کی، ناماز اوسته‌یم.

یئر اوزو ال آچیب سجده ائله‌سین،
گؤی اوزو ان اوجا پیردی، دئییرم.
یارادان بیردی، بیر؛ اونا گؤره‌ من،
ان بؤیوک رقم ده «بیر»دی، دئییرم.

#علیزاده_نوری
#شعر_اوجاغی
@SheirOcagi

▫️اوینایان اؤلوم

بو اؤلوم منی ده یولدان چیخاردی،
گؤزویله، قاشی‌یلا اوینایان اؤلوم.
بالامی الیمدن آلیب آپاردی،
گؤزومون یاشی‌یلا اوینایان اؤلوم.

مین آدام ایچینده منی ساغ تاپان،
آختاریب منه ده «دار اوتاق» تاپان،
باغریمین باشیندا «اویونجاق» تاپان،
باغریمین باشی‌یلا اوینایان اؤلوم.

امانت وئریلن، ابدی اولماز،
عؤمور، غم یوکلَنن دوه‌دی، اولماز.
هئچ کسین «تویونا» دعوتی اولماز،
گلیب اؤز خوشویلا اوینایان اؤلوم.

#علیزاده_نوری
#شعر_اوجاغی
@SheirOcagi

▫️بو عشق حسرت ایله گؤزَلدی بلکه.

ایلاهی، «سؤز» آدلی داش-قاشی* گؤندر!
گؤندر کی، دفینه بیر شعیر یازیم.
ایلاهی، گؤیلری گؤی واراق ائیله!
سنین شرفینه بیر شعیر یازیم.

یوخوشا دیره‌نیب یولوم، ایلاهی!
بو یولو من نئجه یوروم، ایلاهی؟!
بو عشقه بیر هئیکل یونوم، ایلاهی!
بو عشقین نفعینه بیر شعیر یازیم.

بو یارپاق دیریلمیش خزل‌دی، بلکه،
بو عشق حسرت ایله گؤزَلدی بلکه.
دئییرم، بو دونیا دوزَلدی بلکه،
اَیری طرفینه بیر شعیر یازیم.

#علیزاده_نوری
* قیمتلی داشلار، جواهرات (Daş-Qaş)
#شعر_اوجاغی
@SheirOcagi

▫️ایندی ده شکلیندن آیریلیرام من.

گئتدین اؤگئی عشقین آناسی اولدون،
ایندی خیال‌لاردا دوغماسان منه.
من سنی گؤزومده اوجالتمادیم کی-
چیخیب یوخاریدان باخاسان منه.

بلکه ده هئچ سنین گوناهین دئییل،
بلکه ده اودوزدوم عاغیلدا سنه.
من سنی گؤزومده ائله بؤیوتدوم،
گؤزلریم دار گلدی آخیردا منه.

ایندی ده شکلیندن آیریلیرام من،
بو دا سئوگیدندی، نیفرتدن دئییل.
اوزونو اؤزگه‌سی اؤپن بیر قیزین،
شکلینی اؤپمک ده غئیرتدن دئییل.

#علیزاده_نوری
#شعر_اوجاغی
@SheirOcagi

▫️مین نغمه نوتو وار بیر قوش سسینده..

نه غملی اوخویور بو بولبول، آللاه!
مین نغمه نوتو وار بیر قوش سسینده.
بلکه ده عؤمرومده بیر شیرین آن وار،
یقین او دا گلر سون نفَسیمده.

اؤلوم مله‌یینین قارا اللری،
سئیرک ساچلاریم‌لا اَیله‌نیر، آنا!
سولاردا اوزمه‌یی اؤیره‌نن آدام،
هم ده بوغولماغی اؤیره‌نیر، آنا!

قورخورام بو یاغیش ایسلادا منی،
او قیز دا الینده چتیر گلمه‌یه.
سئوگینین دادینی بیلمه‌یه آدام،
اؤلمک ده آداما چتین گلمه‌یه.

#علیزاده_نوری
#شعر_اوجاغی
@SheirOcagi

▫️اولمادی.

یوز دفعه اؤلدوم-دیریلدیم،
بو آدام، آدام اولمادی.
چیراق اولدوم، ایشیغیمی-
سالماغا بیر دام اولمادی.

سسله‌دیم، حاق «لالام» دئدی،
«کئچمه، چتین یولام» دئدی.
یوزو منه «بالام» دئدی،
هئچ بیری آنام اولمادی.

بو یاش مندن نه‌لر چکدی!
بو توی مندن نمَر* چکدی.
سئوینج، آخشام گله‌جکدی،
گؤزله‌دیم، آخشام اولمادی.

دوست الینده گوللـه توتدوم،
گوللـه‌سینی گوله توتدوم.
اؤلومو چوخ دیله توتدوم،
ظالیم اوغلو خام اولمادی.

#علیزاده_نوری
* خالق عادتینجه تویدا، نیشاندا پایلانان شیرنی، پول و...
#شعر_اوجاغی
@SheirOcagi

▫️اوتوروب سحردن ایچیرم ائله.

وطن قفسینه دوشموشم اسیر،
قفسه سالماغا قوشون یوخدومو؟
باشیما دوشمه‌یه داشین منتظر،
ائویمی هؤرمه‌یه داشین یوخدومو؟

اوتوروب سحردن ایچیرم ائله،
غم سوزن قهردن ایچیرم ائله،
وئردیگین زهردن ایچیرم ائله،
وئردیگین زهره نوشون یوخدومو؟

منم، یئلین اسسه، بیر نانه اولان،
سؤنموش شامینا دا پروانه اولان،
بو منم، دردیندن دیوانه اولان،
منی تانیمادین. هوشون یوخدومو؟!

#علیزاده_نوری
#شعر_اوجاغی
@SheirOcagi

▫️یاندیم، اوره‌ییمده او قیز دا یاندی.

بو عؤمرو‌ کاغیذا کؤچورموشم من،
من آدام کولویم یا کاغیذ کولو؟
یاندیم، اوره‌ییمده او قیز دا یاندی،
بیر آز اؤز کولومَم، بیر آز قیز کولو.

گئجه وار بیر اوزون عؤموردن اوزون،
اؤلومله اویناییب عؤمور اودوزور.
هر آخشام یاندیریر آیی-اولدوزو،
تانری سحر ییغیر آی-اولدوز کولو.

غم چاخماق داشی‌دی، داشدان یانمیشام،
آیاقدان اود آلیب، باشدان یانمیشام.
ایلاهی، نه یاخشی عشقدن یانمیشام!
باها ائله‌میشم بو اوجوز کولو.

#علیزاده_نوری
#شعر_اوجاغی
@SheirOcagi

▫️اؤزونو آسماغا ایپ تاپا بیلمز.

اودوزار، اویوندان چیخار آستاجا،
باش آچماز دونیانین قوماریندان او.
تانییار غملری ایلک تماسداجا،
تانییار هر غمی توماریندان او.

دیلی کسیلسه ده دیل‌لنیب گئدر،
تک گؤیه ال آچار، دیله‌نیب گئدر.
یولون یوخوشونا دیره‌نیب گئدر،
ییخیلار بو یولون هاماریندان او.

دوستو عزرائیل‌دی، اؤزو کیمدی بس؟
قورو بیر بوداقدا سولغون بیر نفَس.
اؤزونو آسماغا ایپ تاپا بیلمز،
آسار اوره‌یینین داماریندان او.

#علیزاده_نوری
#شعر_اوجاغی
@SheirOcagi

▫️اؤلوب بو دونیادان قیصاص آلاسان،
لاپ آتیب گئده‌سن بو یئر اوزونو.
سونونجو نغمه‌نله قاتیب باشینی،
آلدادیب گئده‌سن بو یئر اوزونو.

بو بویدا دونیادا عؤمور نه قیسا!
بو قیسا دونیادا حسرت نه اوزون!
گئدیب بیر وفالی اؤلوم تاپاسان،
قاچاسان الیندن بو وفاسیزین!

گلیر کؤلگه کیمی، قارالتی کیمی،
ائله کؤلگه کیمی سوووشور آدام.
دوروب عؤمرو بویو گؤزله‌دیگینه،
بیر آنین ایچینده قوووشور آدام.

نه قدر وفاسیز اولسا دا دونیا،
سئوه‌سن، سئوه‌سن یئنه سن اونو.
چیخیب گئدنده ده بو یئر اوزوندن،
آللاها تاپشیریب گئده‌سن اونو.

#علیزاده_نوری
#شعر_اوجاغی
@SheirOcagi

▫️گؤیلره باخماقدان گؤزوم سارالدی.

یوخسا پریشاندی حالی گؤیلرین،
بو یاغان یاغیشلار نییه لیل دوشور؟
او قدر باخدیم کی، دوشدو بیر اولدوز،
گؤرن من ظالیما نئچه ایل دوشور؟

چوخدان چالینمایان بو سیم، سارالدی،
گله‌نیم اولمادی، ایزیم سارالدی،
گؤیلره باخماقدان گؤزوم سارالدی،
گؤیدن ده غم دولو بیر زنبیل دوشور.

باخ! بو قورخاق کولک- تیتره‌ین، اسن،
گؤرورسن بیزی ده قورخودور بعضاً.
ایلاهی! سن هر گون اوره‌ییمده‌سن،
سنین ده یادینا بو طیفیل دوشور؟

#علیزاده_نوری
#شعر_اوجاغی
@SheirOcagi