▫️آذر پوئماسی

...بیرینجی تاماشاچی:
بو، فقط شاعرانه بیر خولیا،
روحا اویغون سئویملی بیر رؤیا.

ایکینجی تاماشاچی:
چوخ گؤزل سؤیله‌دیکلرین؛ هئیهات!
هاردا، کیم سوردو اؤیله دادلی حیات؟

اوچونجو تاماشاچی:
باریشیب هپ سئویشسه میلّت‌لر،
بلکه آزجیق سوسار بو وحشت‌لر.

آذر: [آجی گولومسه‌ییشله]
اوَت، اینسان اولورسا اینسانلار،
شوبهه‌سیز، پارلاییب دا ویجدانلار،
سئوگی نوری‌یله کائیناتی بزر،
بوراخیب کینی، قورد قویونلا گزر.

بللی... تا اسکیدن بؤیوک‌باشلار،
صولح اوچون اوغراشیب چالیشمیشلار.
چیخاراق حربه قارشی هپ عورَفا،
ابدی صولح ایچینده تاپدی شفا.
کیمی «قان-قان» دئییب ده چیلدیراراق،
صولحه دوشمن کسیلدی، ایشده ماراق.

بیزجه کیم حاقلی؟ قان تؤکن‌لرمی-
ایمره‌نیب صولحه دیز چؤکن‌لرمی؟
او نه؟ هپ دالغا کئچدینیز*... عجبا-
هانکی خوش، هانکی چوخ تیکانلی، قابا؟
شوبهه یوخ، صولحه مئیل ائدر هر کس،
چونکی هر گؤزده پارلاییر بو هوس.

چوخ بؤیوک سلطنت‌سه درویشلیک،
اولامام من او خسته فیکره شریک.
اؤلو، میسکینجه عؤمره مین نیفرت!
سیزی من صولحه ائیله‌مم دعوت.
ابدی صولح اومیدی، حاقّی بوغار،
یاشاماقچون فقط موباریزه وار.

چارپیش، علمی بیر انقلاب ایله سن،
قهرمان اول، اؤج آل دا وحشتدن!
منلیگین ایندی اینله‌ییرسه، یارین-
غالبیّت‌له پارلاسین آلنین.
سنی یالنیز اؤیوندورور قووّت،
قووّتین وارسا، حاق سنین‌دیر، اوَت.

لاکین اینساندا یوخسا عقل و ذکا،
تکجه قووَتده یوخ ثمر اصلا.
الده معیار اولورسا عقلین اگر،
اؤلچولور چوخ قولایجا خئیر ایله شر.

دئدیلر: ظولمه قارشی دورما، اَییل!
دئدیلر: حربه قاچ، یا از، یا ازیل!
من دئدیم: هپسی لاف، اینانما، ساقین!
رهبر اولسون دا قووّتین، عاغلین.

یئری گلدیکده صولح اوچون چابالا،
اؤیله یئر وار کی، حربی آلقیشلا!
قوزو گؤردون‌مو، سئو! او، کین بیلمز،
جاناوار قارشی گلسه، پارچالا، از!
قووّت اوستونده وارسا عقلِ سلیم،
سنه هپ کائینات اولور تسلیم.

#حسین_جاوید
*کؤنول اَیلندیرمک، لاغا قویماق
#شعر_اوجاغی
@SheirOcagi
داوامی وار.

▫️سون‌باهاردا

کدرلی، سیسلی بیر آخشام‌دی، آغلاییردی سما،
بوتون اوفوقلری سارمیشدی مؤحتریز¹، محجوب-
بولودلار‌... ایشده او ماتم‌نیثار دمده منه-
اوزاتدی دستِ قضا چوخ آجیقلی بیر مکتوب.

او بیر کیتابه‌ی مقبردی²، ائیله‌یینجه نظر
گؤزوم قارالدی، تأثّورله مونفعیل، مبهوت،
دوشوندوم، آغلادیم آرتیق او شب صاباحا قدر،
گؤزومده دالغالانیب دوردو سوسلو بیر تابوت.

سنین او نورِ تبسّوم ساچان دوداقلارینی،
او نازلی چؤهره‌نی آندیقجا تیره اولدو خیال.
اینانماق ایسته‌میوردوم کی، گول یاناقلارینی،
اجل خزان کیمی چؤکسون ده، ائیله‌سین پامال.

یازیق!... او یاشدا کیم اومّید ائدر کی، بؤیله سنین،
بهار حوسنون اولور زیبِ حجله‌گاه عدم؟
دوقوز یاشیندا اومولماز بیر افتراقِ حزین،
عجب! شوکوفه‌ی سئودامی‌سین، نه‌سین؟ بیلمم.

نئچون، نئچون سولو وئردین، زاواللی معصومه‌م؟!
یاراشمییور او کفن دوشِ نازنینینده.
نه‌دیر او چینِ مُؤبَّد³، قوزوم، جبینینده؟!
بو کائیناته نه‌دن کوسدون، ائی ملَک؟! بیلمم.

نه‌دن حیاتا گوجَندین؟ بیلینمییور سببی.
خودا'می گؤردو سزاوار قربِ رحمتینه؟
کیتابِ حوسنونو بیر شعرِ ناشنیده کیمی،
اوخور-اوخور، دویامازدیم اونون صباحتینه.⁴

آنار او دملری من ایندی موضطریب، دوشکون،
کمالِ یأس‌له طیفلانه آه و زار ائده‌رم.
سنینله، باخ، سنین آلامِ حسرتینله بو گون،
عنینِ⁵ ماتمه بنزر بوتون نشیده‌لریم.⁶

گؤزومده ایندی جهان بیر سرابِ گریه‌نُمود،
بوتون طبیعتی سارماقدا بیر ملال و کدر.
سئویملی، تازه چیچک‌لر اولوب خزان‌آلود،
او حسنِ نائمِ جاویده سانکی ماتم ائدر.

صاباح سنین کیمی اونلار دا هپ سؤنوب بیته‌جک،
بو گوندن ایشده او سولغون، ورم‌لی چؤهره‌لری.
صاباحکی لؤوحه‌ی ماتم‌گُزینی عرض ائده‌رک،
دئییر کی هر فرحین وار سونوندا بیر کدری.

اوَت، گؤزل مله‌ییم! هر صفا الم‌له بیتر،
بو بیر لطیفه‌ی قدرت، بو بیر حقیقت‌دیر.
فقط بهارِ شبابیندا بیر شوکوفه‌ی تر،
آچیلمادان سارالیب سولسا، موطلقا آجینیر.

بو نوکته، ایشده بودور روحومو معذّب ائدن،
دوشوندورن منی آنجاق بو...یوخسا اینله‌یه‌رک،
سؤنن حیاتِ بشر، ساده بیر تحوّولدن،
بیر انقلابِ حزیندن عبارت اولسا گرک.

#حسین_جاوید
¹- احتیاط‌لی
²- قبیر داشلاری اوزرینه قازیلمیش یازی
³- ابَدی
⁴- لطافت
⁵- اینیلتی، زاریلتی
⁶- ماهنی
#شعر_اوجاغی
@SheirOcagi

▫️هاردا پارلارسا حاق، شرف، ویجدان،
یاخشیلیق، دوغرولوق، گؤزللیک، اینان-
اوردا وار سئوگی، اوردا وار ایمان،
اوردا وار شوبهه‌سیز بؤیوک یارادان!

#حسین_جاوید
#شعر_اوجاغی
@SheirOcagi

▫️آذر پوئماسی

غربه سیاحت

ایلک‌باهارین سون گئجه‌سی...
دان اولدوزو گولومسرکن،
آذر ماراق ائدیب چیخدی،
غربه دوغرو سیاحته.
یورغون دنیزدن ساحیله،
بایغین روزگارلار اسرکن،
خولیا دولو آلتین شهر،
دالمیشدی استراحته.

آذر سحر هاواسینی،
نوش ائده‌رک صفا بولدو.
اطرافینی سئیر ائدرکن،
ترن گلدی، یولجو دولدو.
او دا آتش اوجاغینا،
ویداع ائدیب روان اولدو.
راست گلدی هپ یول بویونجا،
مین بیر چئشید قیافه‌ته.

گورولتولو واقون‌لاردا،
هر میلّتدن نومونه وار.
تانیشدیقجا، هر کؤنولده-
قارشیلیقلی سئوگی دوغار.
یاشاییشدان بحث ائدرکن،
بیری گولسه، بیری آغلار.
کیمی مسعود اولوب، کیمی-
اوغرامیش بیر فلاکته.

ترن، کئچیلمز یوللاری،
اوراق کیمی کسیب بیچدی.
قارشی گلدیکجه یار-قایا،
بیر اوخ کیمی دلیب کئچدی.
بیر گون آذر، یئنی دوغان-
گونشدن بیر خبر سئچدی:
«اورتا غربه واریلمیش دا،
یول چاتمادا نهایته.»

هر کؤنولده اوشاقجا بیر،
ماراق آلوولانیب دوردو.
پنجره‌لر قارشیسیندا،
سئیر ائدن‌لر حلقه ووردو.
هر طرفدن یاشیللیقلار،
نظرلری اوخشاییردی.
دالغالی گول باغچالاری،
عوصیان ائدردی جنّته.

سۆسلۆ کندلر، ترن‌لری-
قارشیلاردی آرا-سیرا.
هر گوشه بیر گلین کیمی،
گولومسردی یولجولارا.
امک پریسی مونیس‌دی،
هر گنجه، هر اختیارا.
ایشسیز قالانلار، شوبهه یوخ،
محکوم ایدی سفالته.

ارکک-قادین هپ چالیشیر،
آری کیمی قایناشاراق.
دالغالاندیقجا تارلالار،
آلتین کسر الماس اوراق.
دولغون اؤکوزلر، اینک‌لر،
بنزردی گؤزلردن ایراق،
شهرلرده دریسینه،
سیغمایان اهلِ ثروته.

ایشده غربین شن گؤبه‌یی!...
ترن دوردو، آذر ائندی.
پنجره‌لردن فیشقیران،
چیچک‌لره چوخ ایمرَندی.
هر صحنه‌نی سوزوب گزدی،
آز گؤروب ده چوخ اؤیرندی.
مفتون اولدو گؤزلرده‌کی،
جدیّته، نزاکته...

#حسین_جاوید
#شعر_اوجاغی
@SheirOcagi
داوامی وار.

▫️آذر پوئماسی

...بیر گون چیچک باغچاسیندا،
بیر گنج اونا دوغرو قاچدی،
سئوینجیندن هوپلایاراق،
ایرماق کیمی داشیب جوشدو:
«آوروپانین هر صحنه‌سی،
هر جیلوه‌سی اونجا خوشدو.
باخ -دئدی- راست گلدین‌می هئچ،
بیر بؤیله عزم و هیمّته؟!

گؤزل‌‌لیکده اؤرنک آلمیش،
کند شهردن، شهر کنددن.
هر یئر سانکی بیر رسّامین،
صنعتی‌دیر همن-همن.
وارلی-یوخسول بیر موسیقی،
دینلر، اوَت، هر قلبه شن.
هر کؤنولده بیر هوس وار،
اینجه‌لیگه، نظافته.

هر اوجاقدا، هر بوجاقدا،
بیلگی، هونر معبدی وار.
هر اوزده روح یوکسک‌لیگی،
هر گؤزده بیر ذکا پارلار.
چلیک¹ عصبلر دورمادان،
هپ یئنی بیر ظفر آرار.
هر قافادا بیر ایمان وار،
امکده‌کی سعادته.

گؤزل!... بو نشئه‌لر دولو،
حشمت دونیاسی چوخ گؤزل.
حوریّت ایزله‌ین گئنیش،
ساغلام هاواسی چوخ گؤزل!
یئر دئییل، گؤیلری سارسان
ییلماز دهاسی چوخ گؤزل.
بؤیوک-کیچیک هپ تاپینیر،
آنجاق و آنجاق قووّته.

بو یئرلرده یالان، غرض،
قایغیسیزلیق دا یوخ دئییل.
کؤلگه‌لی ویجدانلار دا چوخ،
ظاهیرده چوخ کیبار، اصیل.
سوسلر ایچینده قیوریلان،
گؤیرچینلر ده وار: سفیل...
فقط یئنه هپ اوستون‌دور،
فضیلت عشقی ذیلّته.

ایشچیلری چوخ دینله‌دیم،
تاپیلدیقجا بیر آرادا.
هر گون یئنی چکیشمه وار،
معدنلرده، فابریکادا.
آغیرلیقدان، سیخینتیدان،
کسکین چیخیشلار اولسا دا،
زورلا-خوشلا هپسی یئنه،
جلب اولونور اطاعته.

بوردا اصلا دیلنچی یوخ،
مرحمت یوخ چونکی اونا.
یان باخیلیر عاجیز، سفیل،
اؤلو، جاهیل بیر اینسانا.
شرقین بؤیوک بیر شاعیری،
اودور کی چاتسا هر یانا،
آمان بیلمز، غربی هر گون-
دعوت ائدر مرحمته.»

آذر همن گولومسه‌دی،
«اوَت -دئدی- چوخ حاقّی وار،
هپ سئوگیدن ذؤوق آلیرلار،
اؤیله ظریف اختیارلار.
چوخدان بری شرقین سازی،
هپ بو روحدا اینلر، آغلار.
ساقین! قولاق وئریر سانما،
حریص باشلار او دعوته!»

هیندین ازیلمیش منلیگی،
ائتسه هر سؤزده مؤعجوزه،
سویوق قانلی غرب آلیشمیش،
گؤز سوزه، یا دوداق بوزه.
مظلوم ائللر اوچون آنجاق،
بیر یول وارسا: موباریزه.
اونسوز، شوبهه یوخ، چاتاماز،
شرق عالمی حوریّته.

اوَت، آنجاق موباریزه،
منلیک وئریر هر میلّته.
نشئه سرپن یالنیز اودور،
هر شخصه، هر جمعیّته.
هر یوردو چاتدیران اودور،
اؤزله‌دیگی سعادته.
اودور آنجاق قوووشدوران،
اینسانلاری محبّته.»

#حسین_جاوید
#شعر_اوجاغی
@SheirOcagi
داوامی وار.

▫️آذر پوئماسی

آزاد اسیرلر

مؤحتشم بیر سالون...
آهنگِ شَطارَت‌له¹ گولر-
باده‌لر، زومزومه‌لر، شعشعه‌لر، دبدبه‌لر.
سانکی آلماس‌لا بزَنمیش هر یئر،
ایشده بوللور کۆره‌جیک‌لر و سوتونلاردا دؤنر،
بیر ییغین رنگی ایله نور.
چاغلایانلار کۆره‌لردن داشاراق،
سوزولن گؤزلری اوخشار و اؤپرکن...شاقراق،²
اینجه بیر شعر اوخونور.

دَییشیب مجلیسین اوّلکی بدایع رنگی،
موسیقی اینله‌یه‌رک باشلادی رقص آهنگی.
هر کؤنول کندینه بیر ائش بولاراق،
قویولوب رقصه همن، ذؤوق ایله، سرمست اولاراق،
بوکولوب قیوریلاراق،
ساردی شن گؤزلری، بایغین بیر حال؛
چالغیلار اینجه‌له‌رک، سؤندو ایشیقلار درحال،
دوغدو بیر باشقا شفق.
ساچیلیب قومرال اوفوقدن پارلاق،
بیر ییغین اولدوزا بنزر یارپاق،
اوچدولار گیزلی قونان بوسه‌لر اوستونده بیر آز،
اولاراق محرم راز.
سونرا بیر قاز³ کسیلیب هر دیوار،
عرض ائدیب دوردو بیر ائشسیز گولزار.
ساچدی فوّاره‌لر اطرافا چیچک، رنگ و ضیا،
بو دئییل بیر رؤیا...

او گؤزل منظره بیردن سولدو،
موسیقی سوسدو، قدح‌لر دولدو.
اولدو اولفت و محبّت دمساز،
سرپه‌رک عیشوه و ناز.
چؤکدو بیر اینجه قارانلیق... یالنیز،
پارلاییب صحنه‌ده شن بیر اولدوز،
تاتلی، جاذیب سسی جلب ائتدی ماراق،
چیرپینیب سیزلایاراق...

#حسین_جاوید
¹- شوخلوق- شنلیک
²- شن، نشه‌لی
³- یاریم‌شفاف ایپک پارچا.
#شعر_اوجاغی
@SheirOcagi
داوامی وار.

▫️آذر پوئماسی

ائشسیز بیر یووانین یاشیل قوینوندا،
اؤپردی روحومو بایغین نفس‌لر.
آلداتدی، آه! اوَت، منی آلداتدی،
یالدیزلی* سئوگی‌لر، خائین هوَس‌لر.

وحشی گوللر قارشیمدا دیز چؤکَردی،
قومرولار آرخامجا بویون بوکردی.
هر گون ایچیمده بیر شفق سؤکردی،
اوخشاردی کؤنلومو سئودالی سسلر.

گولومسرکن منه چوبان اولدوزو،
سانیردیم اؤزومو گؤیلرین قیزی.
عؤمرومده دۇیمازکن اینجه بیر سؽزی،
قیردی قانادیمی آلتین قفسلر.

#حسین_جاوید
* اوزرینه قیزیل و یا گوموش سویو وئریلمیش- ظاهیری پارلاقلیق
#شعر_اوجاغی
@SheirOcagi
داوامی وار.

▫️آذر پوئماسی

...قاپانیب پرده، همن جوشدو پرستش، آلقیش.
رقصه دعوت ائده‌رک چالغی سسی،
یئنیدن پارلادی هر چؤهره‌ده سئودالی باخیش.
یئنیدن دوغدو ساریلماق هوَسی،
یئنیدن دولدو قدح‌لر. هر کس-
آزاجیق آلدی نفس.
صحنه‌دن پارلادی خوش بیر مهتاب،
وئردی هر قلبه جاواب.
جانلی هئیکل‌لر...
او هر سۆسدن اوزاق، صاف، عوریان،
گول بدن‌لر وئرییور روحا قیدا.
موسیقی معبدینین تانریسی دلبر قیز دا،
دوشونور اورتادا حئیران-حئیران.
«بو نه صنعت، نه ظرافت، نه ملاحت!» درکن،
پرده‌لر ائندی همن.
چیخدی هر کس، آزاجیق مؤحتریس¹ اینسان قالدی.
مجلیس آرتیق یئنی بیر رنگ آلدی.

سوزولدو نشئه‌لی گؤزلر،
کؤنوللر آچدی چیچک.
بئش-اون «آمئرکا»لی زنگین ده سونرادان گله‌رک،
ساچیلدی آلتین‌لار.
دمین² عوریان دوران پریلر ده،
سۆس‌لنیب قوندولار بیرَر ماسایا.
هر قدح تاپدی چاره بیر درده،
کیمسه دونیانی آلمییوردو سایا.

نشئه‌دن دؤندو مؤحتریس قافالار،
چیلغین ائشلر چکیلدی لوژالارا.
پرده‌لردن دویولدو قاه‌قاهالار،
داها محرم‌جه ذؤوقه گلدی سیرا.

ساچیب دا اورتایا مغرور آمئرکا ثروتینی،
امَردی عیشوه‌لی آوروپانین بکارتینی.
فقط بو سوسلو تاماشایا قارشی «آذر»ده،
اویاندی نیفرت‌لر.
یاخیندا رنگی سولوق اوچ قادین گلیب درده،
آچیلدی صؤحبت‌لر:...

#حسین_جاوید
¹- اؤزونو قورویان- اؤزونو ساخلایان
²- بیرآز اؤنجه- بایاق
#شعر_اوجاغی
@SheirOcagi
داوامی وار.

▫️آذر پوئماسی

...بیرینجی قادین:
«منیم قیزیم داها گنج...ایشده قالدیق اتمک‌سیز¹،
نه ائدرسن، تیکانلی بیر یاشاییش!
بو کیرلی جنّته گلدیک، قارالدی گؤزلریمیز،
قیزی ساپدیردی² بیر ییغین آلقیش.»

ایکینجی قادین:
«منیم ده غوغادا محو اولدو قارداشیم‌لا اریم،
ایکی قیز قالدی، بیر ده یوخسوق‌لوق.
(بیر لوژانی گؤستریر):
نه ایش تاپیلدی، نه ائش...
آه! بو نادیر اینجی‌لریم،
ایندی هر ذؤوقو اوخشایان مخلوق».

اوچونجو قادین:
«منیمکی ایشده بو آل پرده‌دن گولوب ده منه،
«بیر آز دا گؤزله!» دئییر.
نه چاره؟! گؤزله‌رم، آز-چوخ نه آغجا گلسه اونا،
منیم‌له صرف ائله‌ییر.»

اینجه بیر یاش گؤروندو گؤزلرده،
آجی بیر ایز بوراخدی آذرده.
دوشوندو: بلکه... -دئدی-
بیر زامان بلکه دۆنکو آسیادا،
اسکی قافقازدا، وحشی آفریقادا
قیزی جبراً ساتیب آلیرلارمیش؛
اونا آوروپا خالقی «پک فاحیش³
بیر فلاکت» دئمیش ده هایقیرمیش،
تابلو یاپمیش، رسیملر آلدیرمیش.
گولموش، اَیلنمیش، ائیله‌میش حئیرت،
بسله‌میش بلکه بیر ییغین نیفرت.
فقط بو حال نه ایدی؟!
بونو گؤرمزمی اینجه گؤزلوک‌لر؟!
ساتیلیر بوردا قیزلار آزاده،
هم طبیعی بیر ایش قدر ساده.
آنا بیر یاندا تیتره‌ییب بکلر.
مدنیّتده چیرپینان وحشت،
داها یالدیزلی، شاعیرانه، اوَت.
بوردا اؤز ایسته‌یی‌له جاریه‌لر،⁴
سنه شاقراقجا⁵ نیننی‌لر⁶ سؤیلر.
بیر قفس خوشدور، آلتین اولسون دا،
آج گؤیرچین‌لر اَیلنیر اوندا...

«بوراخ، بوراخ، یئتیشین! بیتدیم، آه، آمان، ایمداد!»
«نه‌دیر بو سس؟» دئر ایکن، قوپدو سیسلی بیر فریاد،
همن بیرینجی قادین قاچدی کندی یاوروسونا:
«ملک قیزیم، -دئدی- کیملر مسلّط اولدو سانا؟!»

ایپَکلی پرده آچیلدیقدا غؤنچه سولموشدو،
سبب جینایته، بیر کیرلی شهوت اولموشدو.
او شن سالوندا فقط دالغالاندی حزن و سکوت،
سکوت ایچینده گولومسردی سوسلو بیر تابوت...

#حسین_جاوید
¹- چؤرک- اکمک
²- دوغرو یولدان چیخارماق- پیس یولا سالماق
³- حددن آرتیق- چوخ
⁴- خیدمتچی قیز
⁵- نشه‌لی
⁶- بئشیک ماهنیسی- لایلا
#شعر_اوجاغی
@SheirOcagi
داوامی وار.

▫️آذر پوئماسی

رسّامین قیزی

چیچکلی بیر باغچادا، قوس-قوجا بیر یاپینین¹،
گئنیش سالونلاریندا مینلرجه ارکک-قادین،

قاپدیرمیشدی صنعته بوتون خیالی، حیسّی،
هنوز گؤرولمه‌میشدی بؤیله رسیم سرگیسی.

اینجه-دیلبر تابلولار، پارلاق-زنگین لؤوحه‌لر،
ماراقلا سئیره دالمیش نظرلری جذب ائلر.

سالونلاری کئچدیکجه پارلار یئنی منظره،
هر لؤوحه عرض ائدردی کئچمیشدن بیر خاطیره.

باش سالوندا گؤزلری اوخشاردی بیر «مادوننا»
«رافائل»ین ال ایشی... حئیراندی هر کس اونا.

هفته‌لرجه، آیلارجا بو اورجینال اثرین،
قارشیسیندا دالمیشلار رسّاملار درین-درین.

بیر آز سولا ساپینجا² سؤندو بوتون لؤوحه‌لر،
جانلی بیر لؤوحه ساچدی کؤنوللره نشه‌لر.

«ائلزا»، «بوهئمیا»لی بیر آدلی رسّامین قیزی،
ماوی تۆله بورونموش او بیر ایلهام اولدوزو.

تصویره یئلته‌نیردی³ اونو اوچ فیرچا بیردن،
قیز خبرسیز کیمی‌یدی حوسنونده‌کی تأثیردن.

اونون سوزگون و مغرور آهو باخیشلاریندا،
گولومسردی مؤحتشم، حزین بیر رنگی-سئودا...

#حسین_جاوید
¹- بینا، تیکینتی (Yapı)
²- دوز یولدان چیخیب ساغا و یا سولا دؤنه‌رک باشقا بیر یولا گیرمک (Sapmaq)
³- چالیشماق، جان آتماق (Yeltənmək)
#شعر_اوجاغی
@SheirOcagi
داوامی وار.