▫️یاغیش یاغدی، هئچ قویمادی-
گوز آچیب گؤرم یوخومو
ایسلاندی، اوشودو؛ گرک-
گونئی‌ه سرَم یوخومو.

سنسیزلیک سلقه‌می قاتیب،
یوخوم زیر-زیبیله باتیب.
گلسن گرک بیرده یاتیب-
سیلم-سوپورم یوخومو...

#نادر_الهی
@SheirOcagi

▫️ﻗﺎﻧﻮﻥ

ﻣﺤﮑﻤﻪ ﻗﻮﺭﻭﻟﻤﻮﺵ، ﯾﺌﺮ ﺩﺍعوﺍﻟﯽﺩﯼ،
ﻗﺪﯾﻢ ﺩﺍعوﺍﻻﺭﯾﻦ ﯾﺌﻨﻪ ﺩﺍﻟﯽﺩﯼ.
ﯾﺌﻨﻪ ﯾﺎﻏﻠﯽ-ﯾﺎﻭﺍﻥ، ﺍﻭﺯ-ﺍﻭﺯﻩ ﺩﻭﺭﻣﻮﺵ،
ﺑﯿﺮ ﯾﺎﻧﺪﺍ ﺑﯿﺮ ﺍﯾﺸﭽﯽ ﺍﻟﯽ ﻗﺎﺑﺎﺭﻟﯽ،
ﺑﯿﺮ ﯾﺎﻧﺪﺍ ﺑﯿﺮ ﺍﺭﺑﺎﺏ ﺩﺅولتلی-ﻭﺍﺭﻟﯽ.

ﻗﺎﺿﯽ ﺳؤﺯﻩ ﮔﻠﯿﺮ: ﺁ ﮐﯿﺸﯽ! ﺁﺩﯾﻦ؟
-ﻗﻮﺭﺑﺎﻥ! ﻧﺆﮐﺮﻭوﻥ ﺁﺩﯼ ﭘﻮﻻﺩ ﺩﯼ.
ﻗﺎﺿﯽ ﮔﻮﻟﻮﻣﺴﻪ‌ﯾﯿﺮ ﺑﺎﺧﯿﺮ ﺍﺭﺑﺎﺑﺎ:
ﮐﯿﺸﯽ! ﺁﺩ ﺗﺎﭘﻤﺎﺩﯾﻦ؟ ﺑﻮ ﻧﺌﺠﻪ ﺁﺩ ﺩﯼ؟

ﺑﯿﺮ ﺁﻥ ﺳوﮑﻮﺕ ﺩﻭﺷﻮﺭ، ﺳوکوﺕ ﺁﻏﯿﺮﺩﯾﺮ.
ﺍﯾﺸﭽﯽ ﺩﺍﻧﯿﺸﻤﺎﻏﺎ ﺭوﺧﺼﺖ ﺁﻟﻤﺎﻣﯿﺶ-
ﺩﺭﺩ ﺍﻭﻧﻮ ﯾﺎﺭﺍﻟﯽ شئر ﺗﮏ ﺑﺎﻏﯿﺮﺩﯾر:

-ﺁﯼ ﻗﺎﺿﯽ! ﺑﺎﺷﯿنﭼﻮﻥ، ﺑﻮ ﯾﺌﺮ منیم‌دﯾﺮ
ﺑﺎﺧﯿﻦ ﺍللرﯾﻤﻪ! ﻗﺎﺑﺎﺭ-ﻗﺎﺑﺎﺭﺩﯼ...
ﻭﺍﺧﺖ ﺍﻭﻟﻮﺭ ﻗﺎﻧﻮﻥ ﺩﺍ حاقّا قنیم دﯾﺮ،
ﺁﺧﯽ ﺍﺭﺑﺎﺑﯿﻦ ﺩﺍ ﮐﺎغیذﯼ ﻭﺍﺭﺩﯼ.

ﻗﺎﻧﻮﻥ ﺣﺎﻕ ﯾﻮﻟﻮﻧﺪﺍﻥ ﯾﺌﻨﻪ‌ﺩﻩ ﺁﺯﯾﺮ
ﻗﺎﺿﯽ ﻗﻠﻤﯿﻨﯽ ﮔﺆﺗﻮﺭﻭﺭ ﯾﺎﺯﯾﺮ:
«ﺍیشچی‌نین ﺳﻨﺪﯼ ﺍوﺧﻮﻧﺎﻕ ﺩﺋﯿﯿﻞ
ﺍﻭﻧﻮﻥ ﺩﺋﺪیک‌لرﯼ ﺍصلا ﺣﺎﻕ ﺩﺋﯿﯿﻞ»

ﺍﯾﺸﭽﯽ ﻫﺎﯼ-ﮐﻮﯼ ﺳﺎﻟﯿﺮ، ﺁﻏﺰﯾﻦ ﺑﺎﺳﯿﺮﻻﺭ
ﺩﺍﻫﺎ ﺩﺍﻧﯿﺸﻤﺎﻏﺎ ﻫﺌﭻ ﺑﯿﺮ ماجاﻝ ﯾﻮﺥ
ﻗﺎﻧﻮنون ایپی‌له حاقّی ﺁﺳﯿﺮﻻﺭ
ﻫﺎﺭﺍﯾﯽ ﺑﻮﻏﻮﺭﻻﺭ، ﺩﺍﯼ ﻗﯿﻞ و ﻗﺎﻝ ﯾﻮﺥ...

ﺯﻣﺎﻧﻪ ﭼﺎﯾﻼﻏﯽ، ﺩﺅوﺭﺍﻥ ﭼﺎﯾﻼﻏﯽ،
ﺳﯿﻠﺪﯾﺮﯾﻢ ﺩﺍشلاﺭﯼ ﻗﻮﻣﺎ ﺩﺅﻧﺪَﺭﯾﺮ.
ﭘﻮﻻﺩ ﺗﮏ ﺍﯾﮕﯿﺪﯼ، ﭘﻮﻻﺩ ﺗﮏ ﺩﺍﻏﯽ،
ﺍﻟﺪﻩ ﺍﻭوﻭﺷﺪﻭﺭﺏ، ﻣﻮﻣﺎ ﺩﺅﻧﺪﺭﯾﺮ...

#نادر_الهی
@SheirOcagi

▫️آماندی، بیر ده بو گولدان یازا یئریکلمه‌سین!
یئتر...، یئتیم یارامیز دای دوزا یئریکلمه‌سین!

اگر...اگر ایکی جانلی گئجه‌م گونش دوغمور،
آیا یئریکلمه‌سین، اولدوزا یئریکلمه‌سین.

ائلین عاشیقلاری آلما دئییل...کی کرپیچ آتیر
گلین گرایلی‌لاریم دا، سازا یئریکلمه‌سین.

اوغول‌لاری یئل آپاردی، گلین جیغازلارینین-
ساچیندان آسدیغی یویرَ‌ک، قیزا یئریکلمه‌سین.

هانی...؟ هانی او بولاق، او بولاق‌اوتو، دادلیم؟
یوخون دا دای نانایا، یارپیزا یئریکلمه‌سین.

قارا گیله‌م! نه او خرمن، نه ده او چرچی قالیب
دئ کندلی گؤیلونه، آغ ساققیزا یئریکلمه‌سین!

یئریکله‌دی، اوره‌یی پارچا-پارچا سیندی، یئتر...
یازیقدی، بیر ده بو گولدان یازا یئریکلمه‌سین...

#نادر_الهی
@SheirOcagi

▫️یامان توتولوب!

بو داغ باشیندا نه وار بیلمیرم، یامان توتولوب!
بو داغ باشیندا یئنه بیر تالا دومان توتولوب.

نه یازدی؟! قولتوغونا گیرمه‌سم آشیر... قیناما!
چینار-چینار بالاسی هارداسا گومان توتولوب.

باهار توتولدو، اونون اللرینده بیر سله گول
پاییز دا... اوندان آخی بیر سبد سامان توتولوب.

یامان یاغیشلی‌دی بو باش ساری تئلین هاواسی
آه اولما ساز توتولوب، اولمایا کامان توتولوب!

بولاق باشیندا یئنه دیزلرین قوجاقلاییب، آه!
بو داغ باشیندا نه وار بیلمیرم، یامان توتولوب...!

#نادر_الهی
@SheirOcagi

▫️یاغیش یاغدی هئچ قویمادی،
گوز آچیب گؤرَم یوخومو.
ایسلاندی، اوشودو؛ گرک-
گونئی‌یه سرَم یوخومو.

سنسیزلیک سلقه‌می قاتیب،
یوخوم زیر-زیبیله باتیب.
گلسن گرک بیرده یاتیب-
سیلَم-سوپورم یوخومو...

#نادر_الهی
@SheirOcagi

▫️بعضن آغلاماق دا اولمور،
گولور، درددن گولور آدام.
سؤکولور-تؤکولور، آمّا،
ایچری تؤکولور آدام.

اولور بیر یییه‌سیز یییه،
«گؤزوم-گیله‌م!» دئیه-دئیه،
گؤزدن دوشور، دئمیر «نییه؟»
بیلدییینی بیلیر آدام.

چوخ سوسومور، چوخ آجیخمیر.
«اؤلوم» سؤزو جانین سیخمیر.
آدام اؤلوب یاددان چیخمیر،
یاددان چیخیر، اؤلور آدام...

#نادر_الهی
@SheirOcagi

‍ ▫️داغدان گلیر، باشیندا-
بولود لچه‌یی گلیر.
باغدان گلیر، دؤشونده-
گونش چیچه‌یی گلیر.

گؤزونده بولاق کیمی،
بولاق اوتو یوخوسو.
گؤیلونده کهلیک کیمی،
کهلیک اوتو قوخوسو.

باخمیر زمی بیچیلیب،
باخمیر بوستان اورلانیب.
نئچه‌-نئچه شاعیرین،
گؤزوندن اوغورلانیب-

گلیر یوخودان یونگول،
گلیر رؤیادان اینجه.
قورویوب قورتاریرام،
او بو یولو گلینجه.

قاباغینا قویماغا،
چاییم یوخ، چؤره‌ییم یوخ.
اوره‌ییمه باخیر او،
منیم کی اوره‌ییم یوخ.

اوره‌ییم یوخدورسا، بس-
اونون باخدیغی نه‌دیر؟
دئییب اورک‌له‌نیرم،
بس اوره‌ییم کیمده‌دی؟

باخمیر جولاز اَینیمه،
باخمیر قولای حالیما.
قونور ساغ-سول چیینیمه،
یعنی ساغ‌-سول قولوما.

هوسدن، هیجاندان،
قورو جانیم داشلانیر.
ایکی قول، ایکی میصراع،
یعنی شعر باشلانیر.

غم چکمه، درد ائله‌مه،
آی منیم آغاج آنام!
من قوشلار شاعیری‌یم،
کیم دئییر قوش قووانام...؟

سس و شعر:
#نادر_الهی
@SheirOcagi

▫️دارتدیلار
قولاغینی،
بورنونو.
یئریندن قوپارتدیلار
کسدیلر
اته‌یینی،
الینی،
دوداغینی، دیلینی،
بیر آزجا دا ائنینی،
بیر آزجا دا بویونو آلچاتدیلار،
بیر آزجا دا سسینی...

بئله‌سینی قایتاردیلار اوستونه...

یازیق شاعیر
ها باخدی،
تانیمادی اؤز دوغما نغمه‌سینی...

#نادر_الهی
@SheirOcagi

▫️بعضن آغلاماق دا اولمور،
گولور، درددن گولور آدام.
سؤکولور-تؤکولور، آمّا،
ایچری تؤکولور آدام.

اولور بیر یییه‌سیز یییه،
«گؤزوم-گیله‌م!» دئیه-دئیه،
گؤزدن دوشور، دئمیر «نییه؟»
بیلدییینی بیلیر آدام.

چوخ سوسومور، چوخ آجیخمیر.
«اؤلوم» سؤزو جانین سیخمیر.
آدام اؤلوب یاددان چیخمیر،
یاددان چیخیر، اؤلور آدام...

#نادر_الهی
#شعر_اوجاغی
@SheirOcagi

سن آللاه، یوخوما قاییت ...
شعر و سس:#استاد_نادر_الهی
حاضیرلایان : کبری میرحسینی
@naderelahi

▫️سن آللاه یوخوما قاییت!

من سنی یوخودا گؤردوم،
دوم آغ، دادلی-دوزلو قاردین.
بیر تیکه لچک‌لی بولود،
بیر دون چیچکلی باهاردین.

قاردین، آمّا قانی ایستی،
قاردین، آمّا سویو شیرین.
یاغانمازدین یوخوسونا،
یوخسا بو‌ دلی شاعیرین.

یوخومون هاراسینداسا،
قوشلار سس-سسه وئرمیشدی.
بیر بولاق دا سنه باخیب،
آخیب یوخوما گیرمیشدی.

منیم او شیرین رؤیامدا،
سن هله ده اوتانجاقدین.
آخی من یوخو گؤروردوم،
آمّا سن اوردا اویاقدین.

الینی الیمه آلدیم،
اوتاندی الین، اریدی.
بیردن من سنی ایتیردیم،
بیردن قوشلار دا کیریدی.

اویاندیم؛ منی اویادان،
بلکه قوردوغوم ساعاتدی.
سن آللاه یوخوما قاییت!
اللریم چوخ ناراحاتدی...‌

#نادر_الهی
#شعر_اوجاغی
@SheirOcagi

▫️کوچه

سن گلدین، من کوچه اولدوم،
کوچه-کوچه سئودیم سنی.
سن مندن آی عؤمروم-گونوم!،
کئچه-کئچه سئودیم سنی.

آغلامیرام ایچین-ایچین،
یاغیشلی کوچه‌یم، کئچین!
سنین مندن گلین کؤچون-
کؤچه-کؤچه سئودیم سنی.

آی تورشا شیرین چییه‌لک!
آی شیطان...! یوخ، شیطان ملک!
آی جانیمدا اسن کولک!
هئچه-هئچه سئودیم سنی...

#نادر_الهی
@SheirOcagi

▫️بو گون‌لر ده کئچدی بلکه...


موسیقی- آرانژمان: #توحید_نوروزی
اوخویور: #گول‌یاز_محمداووا
سؤز: #نادر_الهی
@SheirOcagi

▫️دلی‌لر چیخدی گئتدی،
بو دلی‌خانا قالدی.
بو خارابا ائو-ائشیک،
خاطایا-قانا قالدی.

یورد قارا یاتاق اولدو،
درد اوتاق-اوتاق اولدو‌.
سؤندو ایگید چیراقلار،
ائو یانا-یانا قالدی.

اوخودولار اذانی،
آسدیلار یاس قازانی.
قازانج اولو یووانا-
قبیرقازانا قالدی.

سوپورگه گؤتوردولر،
هر شئیی سوپوردولر.
بیر سویوق مزار داشی،
بیر دلی آنا قالدی.

سازلاری آسدیردیلار،
قوشلاری سوسدوردولار‌
بوندان بئله بیزیمکی،
کور ایت اوچانا قالدی...

#نادر_الهی
#شعر_اوجاغی
@SheirOcagi

▫️دئدی: قاییت اوشاق اول،
قاییت، بیر ده «تات» ائله!
سونرا بیر آزجا بؤیو،
بیر آغاجی آت ائله!

قوی لاپ باش دا آپارسین!
مینیب آغاج آتینی،
ائله چاپ، تای-توشونون-
آل گؤزونون اوتونو!

قاییتدیم، آمّا گؤردوم،
حیات، او حیات اولمور.
من او اوشاق اولورام،
بو آغاج، او آت اولمور...

#نادر_الهی
#شعر_اوجاغی
@SheirOcagi

▫️یاز قدرینی بیلمه‌دیم، یازیمدان اولدوم،
بیر دسته چیچک کیمی نازیمدان اولدوم.

«چوخ»دان ساری، چوخ جان آتیب اَللشدیم من،
آمّا چوخا چاتماییب «آز»یمدان اولدوم...

#نادر_الهی
@SheirOcagi

▫️یاغیش یاغدی، هئچ قویمادی-
گؤز آچیب گؤرم یوخومو.
ایسلاندی، اوشودو؛ گرک-
گونئیه سرَم یوخومو.

سنسیزلیک سلقه‌می قاتیب،
یوخوم زیر-زیبیلده باتیب.
گلسن، گرک بیر ده یاتیب-
سیلَم، سوپورم یوخومو.

#نادر_الهی
#شعر_اوجاغی
@SheirOcagi

‍ ▫️اؤز دیلیمده اؤلورم.

بو دا منیم سون نفسیم،
ائله بیل داغ آشیرام.
سون بورجوم‌دو، بو دونیایا
وئریب حالال‌لاشیرام.

یانیندا منه یئر ساخلا!
گلیرم، گؤزله آنا!
تورپاق قوجاغینا قوربان!
قوجاغینی آچسانا!

بلکه ده من بو دونیانین،
سینه‌سینده‌کی داغ ایدیم.
چیراق ایتیرن یولچو یوخ،
یول ایتیرن چیراق ایدیم.

یورولدوم داها، یورولدوم؛
اوره‌ییمدن وورولدوم.
گؤز یاشیم قانا قاریشدی،
من ده بئله دورولدوم.

بو دا منیم سون نفسیم،
آنا، گؤزله، گلیرم.
اؤز دیلیمده یاشامادیم،
اؤز دیلیمده اؤلورم.

شعر و سس:
#نادر_الهی
#شعر_اوجاغی
@SheirOcagi

▫️«مملکت قانونسوز دئییل»
دئدیلر، تلَسدیلر.
دونن چؤره‌یینی،
بو گون الینی ده کسدیلر.

چالیب چاپدیغی نه ایدی،
ال بویدا یاوان چؤرک.
قیش‌دی،
داها اللری یوخ،
جیبلری اوشویه‌جک.

بیر ال-آیاق اوغروسونون،
کسدیلر آج الینی.
الینین ایچین قاشیدی،
اونون تزه گلینی.

کسدیلر آرین-آرخایین،
یاتدیلار باش اوغرولار.
داها بو لال مملکتده،
نه آج وار، نه اوغرو وار.

#نادر_الهی
#شعر_اوجاغی
@SheirOcagi