▫️گؤره‌سن بیر ده ساچلاریمی
یئلده دارایاجاغام‌می؟
گؤره‌سن بیر ده باغچالاردا بنؤوشه اکیب
شامدان گوللرینی،
پنجره‌نین آرخاسینداکی گؤیه قویاجاغام‌می؟
گؤره‌سن بیر ده لیوان‌لارین اوستونده دانس ائده‌جه‌یم‌می؟
گؤره‌سن بیر ده قاپینین زنگی، منی سسین اینتظارینا دوغرو آپاراجاق‌‌می...؟

#فروغ_فرخزاد
#شعر_اوجاغی
@SheirOcagi

▫️قورخورام

قورخورام؛
ایچیمده کی بو سوکوتدان.
ندن اؤلولردن قورخارلار، بیلیرسینیزمی؟
چونکو اؤلولر دانیشمازلار

قورخورام؛
چونکو اوشاق دئییلم آرتیق
آرتیق، کوچه‌لرده چؤپ‌ایله تکَر دیغیرلاتمیرام
قونشونون جامینا توپ آتمیرام آرتیق
بیرآز بؤیوموشم یعنی؛
و اینسان‌لار بؤیودوکجه قورخارلار.

قورخورام؛
چونکو عاشیق دئییلم
دوداق‌لاریندان یاقوت یاتاغی آختارمیرام داها
داها، سینه‌نده کی داغلارین آراسیندا گمی‌لریم غرق اولمور
عشقین گؤزل‌لییی بوراسیندادیر کی،
نه عقلی وار،
نه ده هوشو.
عشقین گؤزل‌لییی بوراسیندادیر کی،
سویون اوستونده یول گئدیر
آما،
غرق اولمور.

قورخورام؛
چونکو هر بیر زادیم وار
یعنی، ایکی الیم وار
ایکی آیاغیم وار یعنی.
آغزیمدا دیشیم وار،
یعنی، باشیم دا وار.
آما،
باشیمدا عاغلیم یوخ...

#چالقین
@SheirOcagi

▫️جنگی

بیر دلی نعره‌دن باتار قولاقلار
دوشمن اوره‌یینه خال دوشر بیردن
جنگی چالیندی‌می، سوسار بولاق‌لار
الدن قیلینج دوشمز، باشدان دبیلقه.

آتین دیرناغیندان نال دوشر بیردن
آغرینی، قورخونو قانی‌یلا یویوب
ییغیب سون گوجونو یارالی‌لار دا
کؤهلن‌ین یالینا یاتار تزه‌دن؛
آتین قامچیسینی کامانا قویوب
سونونجو اوخونو آتار تزه‌دن.

اوزاقدان‌می گلیر او نال سس‌لری؟
سونونجو آتلی دا اؤتوب کئچدی‌می؟
گئدن «کوراوغلو‌»مو، بیلمیرم، یوخسا
یئددی‌ مین‌ یئددی‌ یوز یئتمیش‌ یئددی‌می؟

بیر آنا فریادی ائندیرر گؤیو
بیر آتا حسرتی دیندیرر نئیی
کؤرپه‌لر ده چکر غیرتی بوردا
یارالی کؤکسوندن قیزیل قان دئیه،
یهره تؤکولر‌ «حئیراتی» بوردا.

قیلینج‌لار، نیزه‌لر یازار داشینی
یاریمچیق عؤمورلر ایسیدر یئری
جنگی چالیندی‌می، جنگی دیندی‌می،
قالدیریب چیینینه مزار داشینی،
اؤلن‌لر تزه‌دن قاییدار گئری.

هارداسا بیر قوجا بایاتی چالیر
بیر حسرت صداسی اوزور بایاقدان
کیشنه‌ییب دوزلَره های-هارای سالیر
بیر آت صاحیبینی گزیر بایاقدان.

مغرور بابالارین اود نفسینده،
جنگی بیر نغمه‌دیر ناغیل‌لار اوچون
جنگی صداسیندا، جنگی سسینده
مردلیک میراث قالیب اوغول‌لار اوچون...

#نوصرت_کسمنلی
کؤچوردو:
#شعر_اوجاغی
@SheirOcagi

▫️گورشاد تؤکدو، توفان اولدو
آراز داشدی، عومّان اولدو
قایالاری آل قان اولدو
او ساحیلده، بو ساحیلده.

اؤلکه یاندی، وطن یاندی
قیزیل پول تک خیردالاندی
دؤولت گئتدی، وار تالاندی
او ساحیلده، بو ساحیلده.

بیر بیریندن جیدا دوشدوک
دیری گؤزلو، اودا دوشدوک
بیز یادلارا نئیله‌میشدیک
او ساحیلده، بو ساحیلده؟

اورک دوستاق، وطن محبس،
هانی بابک، جاوانشیر بس؟
حیات بوجور قالا بیلمز،
او ساحیلده، بو ساحیلده

«شب-ی هیجران یانار جانیم
تؤکر قان چشم-ی گیریانیم
اویادار خلقی افغانیم...»
او ساحیلده، بو ساحیلده

نه حسرت، نه هیجران اولسون
واحید آزربایجان اولسون
قوی بیرلشسین، بیر جان اولسون
او ساحیل ده، بو ساحیل ده...

#خلیل_ریضا_اولوتورک
کؤچوردو:
#شعر_اوجاغی
@SheirOcagi

▫️ایچیرم‌،
تانری‌لارین بیزی قورتارماماق اوچون اولان
ندن‌لرینین
ساغلیغینا...

#آنا‌_آخماتووا
#شعر_اوجاغی
@SheirOcagi

▫️نئجه اولدوغومو سورما!
منی باییرلاردا یاغیش گؤتوروب
و بو شهردن، پاسپورتاسین ایتیرمیش بیر یابانجی‌تک،
تلسیرم گئتمه‌یه.

نئجه اولدوغومو سورما!
سانکی ایچیمده اؤلومه گئدیر بیریسی
منده بیر نیسگیل
منده بیر اؤلن وار قیرخی چیخماییر.

نئجه اولدوغومو سورما!
منده بیر فراری یاشاییر
گاهدان گئجه‌لر بئینیمده‌کی داغلاردا، داشلاردا
آتیشیر؛
توتوشور؛
گاهدان یوخودان اویادیر منی،
سیقارا ایسته ییر.

منه ائی تاپیلمایان سرخوش!
منه ائی تاپیلمایان دوستوم!
بارداغیندان بیر قورتوم،
سیقاریندان بیر نفس ساخلا...!

#نادر_ازهری
@SheirOcagi

▪️بایرام عمی

نه سؤزده یاز دویولور دای نه سازدا بایرام عمی
فصیل- فصیل یوبانیبسان بو یازدا بایرام عمی

کئچن او قیتلیق ایلین‌ده یاغیش یاغیش دیله‌دیم
بو ایل دیزیم سو گتیردی نامازدا بایرام عمی

بو قارتیمیش قارا قارلاردی قورخودور گؤزومو
داغیلمامیش ساری اؤد تک بوغازدا بایرام عمی

خاچ ایسته‌ینده داش آتدی سینیرله شاختا بابا
بزه‌ندی قارقیزی قانلا بیرآزدا بایرام عمی

بیتیبدی آغری داغیندا مین آغریمین چیچه‌یی
باتیبدی بیر شهر آرزوم آرازدا بایرام عمی

گل آددیمینلا بو یوردو یاشیل یاشیل بئزه چک
کی سوسماسین ساری بولبول بو یازدا بایرام عمی

#زمان_پاشازاده
@SheirOcagi

▫️ساچین ساییندا آی گؤزل! غزل یارادمیشام، غزل.
گزیر شهرده ال به ال، غزل یارادمیشام، غزل.

سنین بوتون گؤزل‌لیین بو کلمه‌لرده گیزله‌نیب
شکیل کیمی سنه بدل، غزل یارادمیشام، غزل.

ائله گؤزل یارادمیشام بو کلمه‌لرده من سنی،
ائل ایچره اولموسان مثل، غزل یارادمیشام، غزل.

اوزونده یاز نیشانه‌سی، باخیش‌لاریندا یای دادی
ساچیندا باغ قویوب خزل، غزل یارادمیشام، غزل.

بو تانری قیتلیغیندا من اورک-اورک، باخیش-باخیش
یارادمیشام سنی هوبَل، غزل یارادمیشام، غزل

#محمدنوین_باراز
@SheirOcagi

▫️من اونو سئویردیم، هئچ کس بیلمیردی
سئون اوره‌ییمی غم اوخو دلدی
گیزلین سئودییمی الدن وئرمیشم
باغیشلا اوره‌ییم! ایش بئله گلدی...

#حاتم_احمدی
@SheirOcagi

▫️عشق گئرچک دیرسه، اونونلا ائله ایلگی‌لن سانکی بیر بیتکی‌له ایلگی‌له‌نیرسن. اونو بسله! یئلین-یاغیشین اؤنونده‌ قورو!

آنجاق عشق گئرچک دئییل‌سه، ان یاخشی ایش، اونو ائهمال ائتمک‌دیر، سولانا قدر....

#هیرومی_کاواکامی (۱۹۵۸ دوغوملو)
ژاپونیالی یازیچی
#شعر_اوجاغی
@SheirOcagi

▫️گؤبلک کیمی آتاسیز-آناسیز دوغولمادیم...
گؤبلک کیمی بؤیودوم. آنجاق گؤبلک کیمی تئز ییخیلمادیم. هر یئرده بیر شئه وار ایدی اؤزومه چکدیم. منی سووارماغا کیمسه اولمادی...
بؤیودوم... اییده آغاجی کیمی اَیری-اویرو و آز سویا راضی،
و اولدوم آزربایجان کندلرینین اؤیرتمنی. آتام دئییر: ایرانی، ایرانلی‌لار آراسیندا بؤلسه‌نیز، سنین پایینا بوندان آرتیق دوشمز....

#صمد_بهرنگی
چئویری
#شعر_اوجاغی
@SheirOcagi

▫️دلی

هر بیر درده دؤزن آدام،
هئچ بیر شئیدن دلی اولور.
اؤزو ده خبر توتمادان،
غفیلدن گولمه‌لی اولور.

دوز یولدا چاشیر آیاغی
قاریشدیریر سولو-ساغی
و بو ایشده نه آللاهین،
نه بنده‌نین الی اولور.

بئینینی گمیرن زلی،
دئییرکی: «دلی سن، دلی.»
هر یاندان اوزولور الی
و آدام اؤلمه لی اولور...

#رامیز_رؤوشن
@SheirOcagi

▫️دؤوران همشه بیر دورومدا قالمیر، گوندوزو-گئجه‌سی وار. ایشیغی وار، قارانلیغی وار. آزی وار، چوخو وار.
داها قیشدان بیر شئی قالماییب، قوتاراجاق. یاز گله‌جک...

#محمود_دولت‌آبادی
#شعر_اوجاغی
@SheirOcagi

▫️«اولان اولوب، کئچدی» دئییب
سنی یئنه باغیشلادیم.
سنی سئودیم بیرجه کره
دؤنه-دؤنه باغیشلادیم.

باغیشلادیم سنی یئنه
باغیشلادیم دؤنه-دؤنه
سنی تانری وئرن گونه،
سئون گونه باغیشلادیم.

بیر یئرلرده کئچدیییمیز،
دیللندی او جیغیر، او ایز.
بیر یئرده آند ایچدیییمیز،
آیا-ایله باغیشلادیم.

دوغما، عزیز بیر کوچه‌یه،
سنسیز اؤتن هر گئجه‌یه،
بوینو بوکوک بیر چیچه‌یه،
سولان گوله باغیشلادیم.

بو دونیادا اونو بیل کی:
سن عشقیمین سونو، ایلکی
سندن باشقا کیمیم وار کی؟!
سنی، سنه باغیشلادیم؛
سنی، سنه باغیشلادیم...

#بابا_وزیراوغلو
@SheirOcagi

▫️سئرچه‌لری اوقدر آلداتدیق کی،
بوغدالاردان دا نیفرت‌لندیلر؛
عؤمور بویو قوش‌سوز قالدی دووارلاریمیز...

#ائلچین_حسن‌زاده
@SheirOcagi

▫️دونیانین، صاباح داغیلاجاغینی بیلسم بئله، یئنه من آلما آغاجیمی اکه‌جه‌یم...

#مارتین_لوترکینگ
#شعر_اوجاغی
@SheirOcagi

▫️هر باغین، هر باغچانین، بیر بولبول شیداسی وار
هر دویان قلبین، عزیزیم! گیزلی بیر سئوداسی وار

روحو اوخشار، قلبی اوخشار، اینجه بیر جانان سسی
گاه گولر، گاه آغلایار، هر دمده بیر معناسی وار

جان آلان هر نغمه‌نین معناسی یالنیز عشق‌دیر
گؤز گؤروب ال چاتمایان اولدوزلو بیر دونیاسی وار

درد هیجران گون‌لریله عؤمرو اودلاردان کئچر
هر کؤنول بیر کاروان‌دیر، بیر سوسوز صحراسی وار

بؤیله بیر سؤز وارکی «وورغون» ایندی بیر مجنون اولوب
شعر و صنعت آدلانان نازنده بیر لیلاسی وار...

#صمد_وورغون
@SheirOcagi

▫️اینسان، قادینین نئجه بیر تسکین‌وئریجی اولدوغونو، ان درین شکیلده آنلامالی‌دیر...

#فریدریش_نیچه
#شعر_اوجاغی
@SheirOcagi

▫️گئجه هر نه قدر اوزون اولسا دا
سحر آچیلاجاق، گونش دوغاجاق
بو سؤز داها بو گون افسانه دئییل
ایشیق، قارانلیغی بیر گون بوغاجاق...

#حبیب_ساهر
@SheirOcagi

▫️سئوگیلیم! یارانان سئوگی عالمی،
نه سنی ساخلادی، نه منه قالدی
کؤنلومون آتشی، گؤزونون نمی،
نه سنی ساخلادی، نه منه قالدی

سئون اوره‌ییمین یاراسی درین
مرحمیم اولمادی قارا تئللرین
الیمدن اوزولن ایستی اللرین،
نه سنی ساخلادی، نه منه قالدی

گئدیش یول‌لارینا تیکیلدی گؤزوم.
دؤندو آغیت اولدو سئوگیسل سؤزوم.
قلبیمدن قلبینه دولاشان دؤزوم،
نه سنی ساخلادی، نه منه قالدی.

مندن اوس ایسته‌مه! اولموشام دلی
مجنونام، کرمم، سنی سئوه‌لی
حسرتی پای وئرن گؤروشون الی،
نه سنی ساخلادی، نه منه قالدی.

باخمادین "ائلدار"ین اودلو آهینا
دئدین: "یانمالیسان اؤز گوناهینا"
یالواریش، یاخاریش عشق آللاهینا،
نه سنی ساخلادی، نه منه قالدی...

#عقیل_مرادی
@SheirOcagi

▫️گئجه نغمه‌لری

بلکه احتیاجدان دوغولدوغوندان
هر نغمه کؤکسونده، بیر ایستک یاتمیش
قورخوب ماغارانین لال سوکوتوندان
ایلک اینسان نغمه‌نی هایان یاراتمیش

بعضن حلیم اولوب، بعضن کسرلی
سانارسان بیر دویان اورک‌دی نغمه
گوندوزلر هامی‌یا اومید، تسلّی
گئجه‌لر هامیدان کؤورک‌دی نغمه.

گئجه نغمه‌لردن اود آل، قار ایسته!
یانسان، اوره‌یینه آخار سو کیمی
آی دا بیر نغمه‌دیر دالغالار اوسته
بیر دنیز قیزینین مکتوبو کیمی.

دنیزلر دوشرلر دالغا بحثینه
بولاق‌لار دانیشار، بولاق‌لار دینر
گئجه‌ قاییق‌لارین آوار سسینه،
بالیق‌لار ییغیشار، بالیق‌لار گلر.

کیم ایدی اوخودو بئله اینتیظار؟
گؤرن محبّته کیم اسیر اولوب؟
سورونن بولودلار، آخان اولدوزلار،
بلکه کؤمه‌یینه تله‌سیر اونون.

سیز ده آی چینارلار، موغامات اولون!
نغمه‌یله تیتره‌یین، نغمه‌یله اسین!
گئجه اولدوزلاردان موغایات اولون،
قوپوب دنیزلره سپه‌لنمه‌سین...!

#نوصرت_کسمنلی
کؤچوردو
#شعر_اوجاغی
@SheirOcagi