‍
▫️سندن کوسمه‌رم

من شیرین نغمه‌لی بیر بولبولم کی،
گول‌لردن کوسه‌رم، سندن کوسمه‌رم.
منی اؤز جانیندان آرتیق ایسته‌ین،
ائل‌لردن کوسه‌رم، سندن کوسمه‌رم.

گؤزلرین میثال‌دیر آخان چایلاردان
کیپرییین اوخلاردان، قاشین یایلاردان
قارشیمیزا گلن اوزون آیلاردان-
ایللردن کوسه‌رم، سندن کوسمه‌رم.

ائل ایچینده بیزه دئیرلر «صیادلی»
ترلان اووچوسویام، روحوم قانادلی
ایلهام پری‌سینین آچدیغی دادلی-
دیللردن کوسه‌رم، سندن کوسمه‌رم...

#میکاییل_مشفق
@SheirOcagi

▫️یازمارام اوره‌ییم سیزی آنماسا،
سیزین عشقینیزله آلوولانماسا.
بورداجا ائل گلیب مندن سوردو کی:
«گؤزدن یاش چیخارمی اورک یانماسا؟»

غؤنچه آچیلارمی، باهار اولماسا؟
شؤعله تیتره‌یرمی، روزگار اولماسا؟
بو نغمه روحومدان قوپارمی؟ بیلمم،
منه ایلهام وئرن دوستلار اولماسا...

#میکاییل_مشفق
@SheirOcagi

▫️قوربان اولدوغوم

بیلمم منی نئچون آتمیش، اونوتموش،
جور و جفاسینا قوربان اولدوغوم؟
یوخسا اؤزگه‌سینه اوزونو توتموش،
یئنی سئوداسینا قوربان اولدوغوم؟

دیلبری سوروشدوم گلیب-گئدندن،
دئدیلر «باریشماز، کوسوبدور سندن.»
من ایلتفات ائتدیم، او قاچدی مندن،
قاچقین اداسینا قوربان اولدوغوم.

او منیم سئوگیلیم، او منیم آنام،
اونسوز اوزوم گولمز، آچیلماز آینام.
بیلمم هاردا قالدی او نازلی دورنام،
او خوش صداسینا قوربان اولدوغوم.

آیریلیق اودونا کؤنول دایانماز،
عشق اودونا یانان، بیر داها یانماز،
چکدیگیم ناله‌دن نئچون اویانماز،
شیرین رؤیاسینا قوربان اولدوغوم؟..‌

#میکاییل_مشفق
#شعر_اوجاغی
@SheirOcagi

▫️کؤنول! سنده یئنه هیجان‌‌می وار؟
اوچوب قالخمادیغین آسمان‌‌می وار؟
سؤیله، سنین کیمی بو آسماندا،
توفان رقّاصه‌سی بیر ترلان‌‌می وار؟

هر طرفده قوران توی-بوساط منم،
اولدوزلارلا ائدن اختلاط منم.
منیم آزادلیغیم قوجاغا سیغماز،
یئر منم، گؤی منم، کائینات منم.

یازمارام، اوره‌ییم سیزی آنماسا،
سیزین عشقینیزله آلوولانماسا.
ائل کسیب قارشیمی بورداجا سوردو:
گؤزدن یاش چیخارمی، اورک یانماسا؟

غؤنچه آچیلارمی، باهار اولماسا،
شؤعله تیتره‌یر می، روزگار اولماسا؟
بو نغمه روحومدان قوپارمی، بیلمم،
منه ایلهام وئرن دوستلار اولماسا؟!

#میکاییل_مشفق
#شعر_اوجاغی
@SheirOcagi

▫️من گنجم، بیلیرم، ایستقبالیم وار،
هله بدر اولمامیش بیر هیلالیم وار.
یئلکنیم آچیلیر، قارا یئل، اسمه!
منیم بو دریادا بیر صاندالیم* وار...

#میکاییل_مشفق
*قاییق
#شعر_اوجاغی
@SheirOcagi

▫️بو سووئت ائللری ایندی بیزیم‌دیر.
گولشنین گوللری ایندی بیزیم‌دیر.
دوستوم، آچ سینه‌نی، نفس آل داها!
اسن دان یئللری ایندی بیزیم‌دیر...

#میکاییل_مشفق
#شعر_اوجاغی
@SheirOcagi

▫️بو سونسوز فضالار بیزیم‌دیر، ائی دوست!
بو درین دریالار بیزیم‌دیر، ائی دوست!
سمادا اولدوزلار، یئرده چیچک‌لر،
عطیرلر، ضیالار بیزیم‌دیر، ائی دوست!...

#میکاییل_مشفق
#شعر_اوجاغی
@SheirOcagi

▫️داغیدین دونیانی‌ساران سیس‌لری،
بو موخنّث‌لری، بو ایبلیس‌لری!
ووروشوب دؤیوشمک زامانی‌دیر بو،
ائی اینسان قلبینین موهندیس‌لری!...

#میکاییل_مشفق
#شعر_اوجاغی
@SheirOcagi

▫️بشر بیر-بیری‌یله قانلی بیچاق‌دیر،
آزادلیق آنادیر، دونیا اوشاق‌دیر.
سفیل اؤولادینی بو آنا بیر گون،
اؤز ایستی قوینوندا اوخشایاجاقدیر...

#میکاییل_مشفق
#شعر_اوجاغی
@SheirOcagi

▫️نه‌دیر حاکیم اولوب کؤکس داغلاماق،
اللره، قوللارا زنجیر باغلاماق؟!
یاسلی بیر آنانین ساچلاری کیمی،
نه‌دیر محکوم اولوب سسسیز آغلاماق؟!

#میکاییل_مشفق
#شعر_اوجاغی
@SheirOcagi