أهله كلهم ماتوا ، وفلوسه كلها ضااااااعت 💔!!!!
مييييين ده ؟؟!!!
ده كل واحد ضيع صلاة العصر .. سواء :
- ضيعها عشان بيشتغل ومش فاضي خمس دقايق يصلي ..!
- أو في دروسها وخافت الدرس يضيع عليها بس مش مهم لو الصلاة ضاعت
- أو صاحبنا اللي نام وقال مش مهم ابقى أصلي لما اصحى

في الحديث: ((الذي تَفُوتُهُ صَلَاةُ العَصْرِ، كَأنَّما وُتِرَ أهْلَهُ ومَالَهُ))
وُتر أهله وماله...يعني فقد أهله وخسر ماله

زي ما مصيبة فقد المال والأهل في الدنيا مصيبة كبيرة اووووي ....هتلاقي مصيبتك يوم القيامة عشان ضيعت صلاة العصر كبيرة اوووووي
ظبط صلاتك وحافظ عليها ورتب مواعيدك وحياتك كلها عليها
مافيش نوم أو شغل أو مذاكرة أو دروس .....في وقت الصلاة
قول لنفسك ....
الصلاة أولاً ....وبعد كدة كل حاجة تاخد وقتها

#كاريكاتير_رسايل

س/مش فاهم انتوا متشددين ليه كدة في موضوع الربا وفوايد البنوك ده ..
أنا بصلي على فكرة وبصوم كتيييير وبطلع صدقات كتيييير ...ماجتش على الفوايد يعني!!! ماعملتش ذنب كبير.. ربنا غفور رحيم
..............
ج/
_ فوايد البنوك مش احنا اللي نتشدد فيها أو مانتشددش ..
هو ربنا زي ماقالنا انه غفور رحيم قالنا كمان :
((يَا أَيُّهَا الَّذِينَ آمَنُوا اتَّقُوا اللَّهَ وَذَرُوا مَا بَقِيَ مِنَ الرِّبَا إِن كُنتُم مُّؤْمِنِينَ فَإِن لَّمْ تَفْعَلُوا فَأْذَنُوا بِحَرْبٍ مِّنَ اللَّهِ وَرَسُولِهِ))
ربنا توعد اللي بيتعامل بالربا بالحرب ومحق البركة

👈بتقول ..طب أنا بصلي وبصوم و....و....و.... وشايف إنك ماعملتش ذنب كبير
هقولك ....
طيب في الحديث الصحيح :
((دِرهمُ ربًا يأكلُه الرَّجلُ وهوَ يعلَمُ ؛ أشدُّ من سِتةٍ وثلاثين زَنْيَةٍ ))
شوفت بقى إنه مش ذنب صغير ولا حاجة ..
بالعكس ذنب كبير أكبر من ٣٦ زنية !!!!
الفوايد الربوية مصيبة كبيرة مش حاجة صغيرة والله
لو بتتعامل بالربا ...
⛔وقف أي تعامل فورًا وتوب لربنا واستغفر من الذنب الكبير ده وساعتها هقولك ...
ربنا غفور رحيم وهيقبل توبتك لكن .. تكمل في نفس الذنب من غير توبة وتقول ربنا غفور رحيم ...يبقى انت حقيقي غلطاااااااان وهتندم في يوم مش هينفعك فيه الندم

#كاريكاتير_رسايل

قال رسول اللهﷺ: "لا يَدْخُلُ الجَنَّةَ نَمَّامٌ"
النمام = ناقل الكلام بين الناس للإفساد
وعيد النبيﷺ للي بيوقع بين الناس وينقل الكلام عشان يفسد
ناخد بالنا ياجماااااعة ....
مش ذنب سهل والله
ده النبيﷺ قالنا إنه من أسباب عذاب القبر
وقالنا الوعيد الجامد في إنه لو مات من غير مايتوب من الذنب ده مش هيدخل الجنة من الأول
عشان كده عاوزين ناخد قرار
مافيش غيبة ولا نميمة تاااااني ❌❌
مش هنتكلم على الناس ولا نوقع بينهم أصلنا مش حمل العقاب ده👍

#كاريكاتير_رسايل

كلهم بيصاحبوا ..
كلهم مرتبطين ...
كلهم بيحتفلوا بالفلانتين ..
كل دفعتي وأصحابي مرتبطين وبيتعملهم حفلات خطوبة في الكلية كمان ...
👈"كل دول بيعملوا كدة أكيد مش كل دول غلطانين وبيعملوا حاجة حرام ....مش كلنا هندخل النار يعني"..!!!

الحقيقة إن التفكير ده ممكن ينفع في الكلية مثلاً
اللي هو أكيد هينجحونا ومش هيكتبوا لم ينجح أحد يعني..
إنما في أحكام الدين ....لو الدنيا كلها عملت حاجة حرام هتفضل حرام برضو ..
الصداقة وعلاقات الحب اللي مالية الشوارع والجامعات ...مش هتخلي الحكم يتغير ويبقى مباح بدل حرام !
هيفضل حرااااام ...بس اللي هتثبت وتحافظ على نفسها وتتمسك بدينها أجرها هيزيد كتيييير
في الحديث :
((إِنَّ مِنْ ورائِكُم زمانُ صبرٍ ، لِلْمُتَمَسِّكِ فيه أجرُ خمسينَ شهيدًا منكم))

لكل واحد حاسس إنه غريب في وسط أصحابه اللي طول اليوم مش وراهم غير الكلام مع دي ودي ..
ولكل بنت حاسة إنها غريبة في وسط بنات دفعتها أصلها مش مرتبطة ....
اثبتوا فإنكم على الحق وأبشروا بالأجر الكبيييير

#الحب_وسنينه
#كاريكاتير_رسايل

نفسك ربنا يحبك ؟؟!!
نفسك تعمل حاجة من أحب الأعمال لله بعد الفرائض طبعا ؟؟!!
الحل في وصية النبي دي:
"أَحَبُّ الناسِ إلى اللهِ أنفعُهم للناسِ ، وأَحَبُّ الأعمالِ إلى اللهِ عزَّ وجلَّ سرورٌ تُدخِلُه على مسلمٍ ، تَكشِفُ عنه كُربةً ، أو تقضِي عنه دَيْنًا ، أو تَطرُدُ عنه جوعًا"

- انفع إخواتك المسلمين بأي حاجة تقدر عليها
- انفعهم بكلمة طيبة تفرحهم أو تخفف وجعهم
- انفعهم بأنك تحفظ طفل الفاتحة أو تشجعه على الصلاة ويفضل طول عمره في ميزانك
- انفعهم لو إنت طالب بإنك تفهم غيرك حاجة مش فاهمها أو تساعده بتلخيصات وماتقولش لا أنا أولى
- انفعهم بصدقة ولو بسيطة تقضي دين أخوك أو تسد جوع حد جعان
- خليك دايما بتعامل ربنا في علاقتك بالناس
مش بتعاملهم باللي يستاهلوه
ساعتها هترتاح وهتعمل الصح اللي يرضي ربك👍

#كاريكاتير_رسايل

انت ....أيوة انت 👀!!
عليك ديوووون كتيييير !!!....ناوي تسدهم امتى بقى؟...
هات ورقة وقلم نحسبهم مع بعض
✍مبدأيا كدة ...عليك كل يووووم ٣٦٠ صدقة تطلعها عن كل مفصل جسمك..يبقى كده عليك ديوون كاااام في الفترة اللي فاتت دي ؟!
وقبل ماتقول أصل مش معايا فلوس للصدقات وأجيب منين والكلام ده....أنا هجبلك الحل بس تسد ديونك أول بأول بقى
الحل عشان تسدد الديوون دي ...
((ركعتين ضحى ))
بس كده🤷‍♂️
ركعتين ضحى تصليهم وتاخد أجر إنك طلعت ٣٦٠ صدقة وسددت ديوونك اليومية عن مفاصل جسمك ..
قال رسول الله ﷺ :
((يُصبِحُ عَلى كُلِّ سُلامَى مِنْ أَحدِكُمْ صدقَةٌ: فَكُلُّ تَسبِيحة صدَقةٌ، وَكُلُّ تَحمِيدةٍ صَدَقَة، وكُل تَهليلَةٍ صدَقَةٌ، وَكُلُّ تَكبيرَةٍ صدَقةٌ، وأَمر بالمعْروفِ صدقَةٌ، ونهيٌ عنِ المُنْكَرِ صدقَةٌ، ويُجْزِئ مِن ذلكَ ركْعتَانِ يركَعُهُما مِنَ الضُّحَى))

#بشريات
#رسايل_في_حب_النبي ﷺ
#كاريكاتير_رسايل

"فلا تسوِّدوا وجهي "
✋الكلام ده ليك ع فكرة ...وصية ليك مخصوص من النبي ﷺ بيقولك فيها: ((ألا وإنِّي فرطُكُم علَى الحوضِ ، وأُكاثرُ بِكُمُ الأممَ ، فلا تسوِّدوا وجهي)) بيقولك هنتظرك على الحوض فلا تسود وجهي💔
تدي لنفسك كام في تطبيق الوصية دي بقى ....؟؟!!
_ بتتمسك بدينك وتحافظ عليه ...ولا بتبيعه عند أول محطه ....((مثلا ...شوية أغاني عشان افرح ، وشوية فوايد من الربا أصل هجيب منين !!!))
_بتتمسكي بحجابك وتحافظي عليه ولا الموضوع مش فارق معاكي؟؟!!
_بتتمسك بصلاتك في وقتها بالظبط زي ما ربنا أمرك ...ولا بتأخرها وتجمعها مع بعض عشان الشغل أو الماتش أو الدرس أو المحاضرة
النبي ﷺ تعب اووووي عشان الدين ده يوصلنا ..اتعرض لأنواع الأذى النفسي والبدني ....عشان في الآخر انت تتولد مسلم ...
بس مطلوب تكون مسلم بجد 💪 بيحافظ على دينه وبيتمسك بيه مهما كانت الابتلاءات حواليه
ماتنساش ..مكان المقابلة....👈على الحوض
والعلامة اللي النبيﷺ هيعرفك بيها..👈 آثار الوضوء
_فحافظ على وضوئك صح بدون استهتار في اركانه
_وحافظ على صلاتك صح بدون ماتأخرها عن وقتها
_واتمسك بدينك وخليك فاكر الوصية
《فلا تسوِّدوا وجهي》

#كاريكاتير_رسايل
#رسايل_في_حب_النبي

» هو أول واحد بتجري عليه عشان ينجدك وقت الشدة والمصيبة ..
» وهي أول واحدة بتسمع الزغرودة فتيجي تهني وتبارك في النجاح والأفراح ..
» ويمكن أقربلك من أهلك واصحابك..
هي جارتك .. هو جارك 😍

• ربنا لما أمرك بالتوحيد والعبادة ..
في نفس الآيه أمرك بالإحسان إلى الجار ..
قال تعالى : " وَاعْبُدُواْ اللّهَ وَلاَ تُشْرِكُواْ بِهِ شَيْئًا وَبِالْوَالِدَيْنِ إِحْسَانًا وَبِذِي الْقُرْبَى وَالْيَتَامَى وَالْمَسَاكِينِ وَالْجَارِ ذِي الْقُرْبَى وَالْجَارِ الْجُنُبِ "

وخصوصًا إذا كان جارك أخوك أو أمك وأبوك ..

وقال رسول الله صلى الله عليه وسلم " ما زال جبريل يوصيني بالجار حتى ظننت أنه سيورثه"

• الإحسان للجار بأنك تلقي عليه السلام وتتلطف مع أولاده ..
وتساعده إذا احتاج ، وتشاركه أحزانه وأفراحه ..
لكن بدون تطفل وأسئلة وتدخل في خصوصياته ..
وتصفح عن زلاته وإن لزم الأمر تعاتبه بلطف 💚

⩥ ومش عاوز أجيب سيرة كيس القمامة اللي بترميه قدام بابه ..
وماراثون الجري والدبدبة فوق دماغه ولا عن تنفيض السجاد فوق غسيلهم الأبيض ..
والكبيرة بقى التجسس عليه وتتبع عوراته وفضح أسرار بيته 😮

• لو كنت بتعمل حاجة من دي استغفر ربنا بسرعة وصلح غلطتك ..
قيل للنبي -صلى الله عليه وسلم-: يا رسول الله! إن فلانة تقوم الليل وتصوم النهار وتفعل، وتصدق، وتؤذي جيرانها بلسانها؟ فقال رسول الله -صلى الله عليه وسلم-: ( لا خير فيها، هي من أهل النار)

قال النبي " والله لا يؤمن، والله لا يؤمن، والله لا يؤمن. قيل: ومن يا رسول الله؟ قال: الذي لا يأمن جاره بوائقه" أي شره وأذاه

#كاريكاتير_رسايل

مع رجوع المدارس والجامعات ....
بنات كتيييير بتحتار تعمل ايه في الصلوات اللي هتضيع عليها وهي بره البيت عشان مافيش مصلى نساء في الجامعة أو مافيش مكان تصلي فيه بين الدروس ..وعشان كدة البنات بقت تلجأ لحلين والاتنين غلط ❌

1️⃣الحل الأول ...إنها تأجل الصلاة وتصلي كل الفروض مع بعض جمع لما ترجع البيت .. وده طبعا غلط ❌
لأن ربنا قالنا :
(( إِنَّ الصَّلَاةَ كَانَتْ عَلَى الْمُؤْمِنِينَ كِتَابًا مَّوْقُوتًا))
يعني ليها وقت محدد ماينفعش تتأخر عنه وطبعًا ماينفعش تتقدم برضو غير لو على سفر ..
فماينفعش تصلي العصر مثلاً قبل دخول وقته طالما مش مسافرة

2️⃣الحل التاني ...إنها تصلي بره البيت وخلاص بس تصلي وهي قاعدة عشان ممكن الشباب يشوفوها ...وده برضو ماينفعش ❌
لإن القيام ركن في الصلاة مش هيسقط غير لو مريضة مرض يمنعك من الوقوف لأن ربنا قالنا ((وَقُومُوا لِلَّهِ قَانِتِينَ))

طيب الصح ايه 🤔؟؟!!
الصح ...إنك تحاولى تشوفي مصلى نساء ولو مالقتيش...ماينفعش تسيبي الصلاة تضيع عليكي ..هتشوفي أي ركن فاضي وتصلي صلاة عادية خااااالص بتقومي وتركعي وتسجدي ...وماتقلقيش حتى لو فيه شباب شافوكي الصلاة مش باطلة ولا حاجة زي ماناس كتير فاكرة
المهم تحافظي على صلاتك صحيحة في ميعادها ...
وربنا يتقبل منك💙

#كاريكاتير_رسايل

"هتبدأ بدرس هربت منه وياعالم هتخلص فين💔"
بكلمك عن رحلة الضياع
😥
لو عاوز تضيع نفسك بجد ..اهرب من الدروس
لو عاوزة تدمري مستقبلك ...اهربي من الدروس

مش ببالغ والله..
أكبر مصيبة ممكن تعملها في حق نفسكم إنكم تفهموا أهلكم إنكم رايحين الدرس وتاخدوا الفلوس تضربوها في جيبكم وتروحوا أي مكان
لإنكم ببساطة وقت الدرس ده هتقعدوه ع كافيه ولا مع اصحاب ربنا اللي عالم بيهم
وهتبدأ بعدها سكة ضياع
طب سيجارة، فيب،حشيش ، مخدرات، علاقات مش تمام بين الولاد والبنات
وكده خلاص ضعت

فاوعوا تهربوا من درس
مدرس مش بتفهموا منه😤
شوف غيره لكن ماتضربش الفلوس في جيبك وتهرب من الدرس مهما حصل عشانك إنت

#كاريكاتير_رسايل

👈لكل بنت بتقول هو ايه المشكلة إني أحط صورتي على السوشيال ..
اهو ده بالظبط اللي بيحصل في صورتك على السوشيال
أي حد فعليا يقدر ياخد الصورة ويعمل زوووم زي ماإنتي شايفة
فماتقوليش ما انا بمشى في الشارع والناس كلها شايفانى كده ايه الفرق ؟!
لا في فرق طبعا
وانتي ماشية في الشارع ماحدش هيوقفك ويفضل يدقق في شكلك براحته .. وإنتي اكيد مش هتسمحى بده !
بس للاسف انتي بالصورة اللي بتنزليها على السوشيال بتسمحى بده جداا
وبيبقى أوبشن لأى حد .. أي حد إنه يعمل كده
وطبعًا الأصل إنك ربنا بيأمرك بالستر عمومًا بجميع أشكاله ، ووضع صورتك منافي للأمر ده ، وفيه إعانة على فعل محرم تاني وهو عدم غض البصر ..
🤚وماتقوليش أصل أنا بحط صورة واتساب بس وكل الأرقام بنات ...لأنها عادي جدا تتاخد اسكرين
وماتقوليش أصل أكونت إنستا برايفيت ولا أصل أنا قافلة أكونت فيس ولا أصل ده جروب بنات بس
لإن كل الحاجات دي مش مضمونة
ماتضمنيش الاسكرين اللي هتتاخد
ولا تضمني مين اللي هيشوف الصورة من اللي عندك في الأصدقاء
وطبعًا طبعًا...أساسي ماتضمنيش خالص أي جروب إنه بنات بس
فاوعي تسيبي صورة ليكي على السوشيال

لو ليكي أي صورة احذفيها حالاً ...لأنك أغلى من أن حد يركز في شكلك كده👍

#كاريكاتير_رسايل

قال رسول اللهﷺ "إن اللهَ تعالى إذا أنعَم على عبدٍ نعمةً ، يحبُّ أن يرى أثرَ النِّعمةِ عليه ، ويكره البُؤسَ والتَّباؤسَ"
لما ربنا يديك نعمة (جواز ،فلوس ،ولاد ،صحة ...)
بلاش تفضل تشتكي كل شوية أنا مكتئب
بلاش تفضلي تشتكي من ولادك ومن جوزك😤
بالعكس ربنا يحب مننا إننا نشوف النعمة دي بقلوبنا ونشكر المنعم سبحانه عليها
بس إنتوا عارفين المشكلة فين ؟؟!!
👈المشكلة إننا بنمد عنينا برة مع إن ربنا قالنا:
"وَلَا تَمُدَّنَّ عَيْنَيْكَ"
بنمد عينينا واحنا بنقارن ولادنا بولاد غيرنا
بنمد عنينا واحنا بنقارن حياتنا بالبلوجرز والتيك توكرز ونقول دول الناس اللي عايشة
فنحبس نفسنا في دايرة مقارنة ضيقة مع إن رزق ربنا واسع
وعشان كده الحل....
✋مانمدش عينينا بره تاني❌
- الغوا متابعة اليوتيوبرز والبلوجرز اللي كل شغلتهم يعرضوا حياتهم ع السوشيال
- بصوا دايما للنعمة اللي ربنا مديهالكم ولما تيجوا تقارنوا نفسكم في أي حاجة في الدنيا قارنوا بالأقل منكم مش بالأعلى
عشان تشكروا ربنا بلسانكم وبقلبكم وباستعمال كل نعمه في اللي يرضيه

#كاريكاتير_رسايل

لما تيجي تتوضا ركز في الكام حاجة دول وحاول تطبقهم
- اغسل أعضاء الوضوء كويس وطبعا مافيش حاجة اسمها أمسح ع الكم حتى لو بره البيت أو مش عارف/ة تشمري ولازم كمان تشيلي المانيكير ماينفعش تتوضي وهو موجود

- بعد ماتخلص وضوء قول الدعاء ده "أشْهَدُ أنْ لا إلَهَ إلَّا اللَّهُ وأنَّ مُحَمَّدًا عبدُ اللهِ ورَسولُهُ"
وممكن تكمل كمان "اللهم اجعلني من التوابين واجعلني من المتطهرين"
وساعتها مبرووووك عليك أبواب الجنة التمانية مفتوحة ليك مخصوص اختار اللي انت عاوزه منها🤝

قال رسول اللهﷺ
"ما مِنكُم مِن أحَدٍ يَتَوَضَّأُ فيُبْلِغُ، أوْ فيُسْبِغُ الوَضُوءَ ثُمَّ يقولُ: أشْهَدُ أنْ لا إلَهَ إلَّا اللَّهُ وأنَّ مُحَمَّدًا عبدُ اللهِ ورَسولُهُ؛ إلَّا فُتِحَتْ له أبْوابُ الجَنَّةِ الثَّمانِيَةُ يَدْخُلُ مِن أيِّها شاءَ"

#كاريكاتير_رسايل

✋نصيحة لكل البنات والشباب
الصداقة والعلاقات بين الشباب والبنات مؤذية جدا ليكم والله
مؤذية لدينك ولدنيتك حتى
👈مؤذية لدينك لأنها حرام حتى لو لقيت الجامعة كلها كابلز هتفضل حرام
👈ومؤذية لدنيتك
- لأنك كشاب.. لو صادق في العلاقة دي فهتبقى علقت قلبك بحاجة غالبا مش هتطولها وتبقى بتعذب نفسك
ولو مقضيها زي الأغلب فأنت حرام عليك لأنك بتظلم البنت وهيتردلك اللي عملته

- أما البنت فالعلاقة دي مؤذية لأنها بتكسر قلبك وتضيع مشاعرك في علاقة محكوم عليها بالفشل وإنتي أكتر واحدة هتحاسبي ع الفاتورة دي وماتقوليييش احنا اصحاب بس
- أولا لأن ده مش موجود في ديننا صداقة بين الولاد والبنات ولا يحكوا لبعض اللي مضايقهم ولا يقفوا مع بعض في جامعة أو يخرجوا في أي حتة
- وثانيا لإنك مهما أنكرتي بيحصل تعلق لقلبك حتى لو بس هتنتظري يسأل عليكي والذي منه
- وثالثا إنتي عارفة وبتنكري إن أغلب علاقات الارتباط بتبدأ بصداقة وغصب عنكم هتتطور لأن دي فطرة كل إنسان

اقفلوووا الباب ده وماتتغرووش بإن كتير بيعملوا كده لأن...
"وَكُلُّهُمْ آتِيهِ يَوْمَ الْقِيَامَةِ فَرْدًا"

#كاريكاتير_رسايل

فيه شغلانه يمكن من أكتر الوظايف اللي مليانة حاجات حرام ممكن حد يعملها وهي...
ميك أب أرتيست وهيرستايلست💇‍♀️💅
واللي تحتها حاجات كتيييير النبي حذرنا منها وعاوزين ناخد بالنا منها سواء اللي بيشتغلوا فيها أو البنات اللي بتعمل الحاجات دي:
- أول حاجة الضوافر الأكريليك والهارد جيل واللي بتمنع دخول مياة الوضوء أو الغسل طول المدة المتركبة فيها...فمايتقبلش للي حاطاها وضوء ولا صلاة ..وطبعا هي هتاخد الذنب وانتي ساعدتيها فهتاخدي برضو

- ميكروبلييدنج والتاتو الدائم أو اللي بيقعد 6شهور ده من الوشم اللي النبي حذر منه وقال إن اللي بتعمله واللي بيتعملها مطرودين من رحمة ربنا

- الاكستنشن اللي بتركبيه للبنات حرااام عشان وصل وعشان برضو الحتة اللي بيتلزق منها هتمنع مياة الغسل والوضوء

صحيح انتي ممكن بتعملي ذنوب كتير وكل حاجة بس بلاش الذنب اللي بيطردنا من رحمة ربنا
في الحديث :
"لعن اللَّهُ الواصِلَةَ والمُسْتَوْصِلَةَ، والواشِمَةَ والمُسْتَوْشِمَةَ."

#كاريكاتير_رسايل

هو الشباب والبنات اللي على التيك توك دول هيعملوا ايه في فيديوهاتهم بعد موتهم ؟!!
هي الأغاني اللي على الاكونت بتاعك مين هيحذفها بعد موتك ولا هتسيبها صدقة جارية عنك 🙄؟!!
هي صورك اللي من غير حجاب أو بحجابك الغريب ده اللي ع الانستا كل يوم هتعملي فيها ايه لما الموت يجيلك!!
هو الشات اللي بينكم كشباب وبنات والعلاقات المحرمة...مين هيمسح الشات ده ومين هيمسح الذنوب اللي اخدتوها منه !!

🚫الموت ياشباب مالوش سن ولا ليه وقت
الموت مش هيجي لك يقولك استعد ...انت اللي لازم تكون جاهز للموت
_جاهز بانك بتسيب المعاصي والذنوب
_وكمااااان بانك توقف عداد السيئات الجارية اللي مش هتلحق تمسحها لما يجيلك الموت فجأة

✋بلاش تسيب بعد موتك سيئات جارية
خاف من الذنوب وسيبها فورااااااااا أصل
اللي بيعيش علي شئ بيموت عليه.... وانت مش ضامن الموت جاي امتى
فخليك مستعد

#كاريكاتير_رسايل

مجرد سلام 🤝
مجرد إنك تقابل أخوك المسلم في الشارع وتسلم عليه بس سلام بجد بالإيد مش تشاور من بعيد ... مجرد ماتعمل كده ...كل الذنوووب اللي كنت شايلها تطير زي ماورق الشجر بيطير مع الهوا
في الحديث الصحيح: "إنَّ المؤمنَ إذا لقِيَ المؤمنَ فسلَّمَ عليه وأخذ بيدِه فصافحَه تناثرَتْ خطاياهما كما يتناثرُ ورقُ الشَّجرِ"
الكلام ده طبعا للبنات كمان لما تسلم على أختها المسلمة
شوفتوا بقى بنضيع فرص كتييييير ازاي ؟؟!!
كل المطلوب منك وانت رايح شغل ، جامعه ، مسجد أي مكاااان ..سلم على أخوك المسلم سلام حقيقي مش بس تشاور من بعيد ..
بس ركز الله يسترك 😎
الأجر ده لما تسلم بالايد على الرجال بس ...لكن ماينفعش تسلم ع نساء 😊
هنا بقى العكس
هنا بقى النبي ﷺ بيقولك《 لَأنْ يُطعَنَ في رأسِ رجلٍ بِمِخْيَطٍ من حديدٍ خيرٌ من أن يمَسَّ امرأةً لا تَحِلُّ له》
مافيش سلام على بنت مش من محارمك ❌
بنت خالتك، بنت عمتك ، طنط اللي في مقام مامتك 😊، زوجة اخوك، اخت زوجتك ....كل دووووول مش محارم ...حراااااام تسلم عليهم بالإيد ❌
فركز كدة الله يسترك

#كاريكاتير_رسايل

❌ماتاخدش/ماتاخديش حد على جنب تقوليلها كلمتين ع جنب طالما قاعدين مع حد تالت❌
وصية النبيﷺ اللي قالها لنا عشان مانضايقش الناس وندخل بينا الشيطان فقالنا:
"إذا كنتم ثلاثةً فلا يتناجى اثنان دونَ الثالثِ إلا بإذنِه فإنَّ ذلك يُحزنُه"
مركز في معنى "فإن ذلك يُحزنُه"؟؟!!
لمجرد إن ده ممكن يزعل وممكن التالت يحس إنه مش مرغوب في وجوده
أو إن الشيطان يدخل ويقنعه إنكم بتتكلموا عليه مثلا
مجرد ده بس ...سبب لتحذير النبيﷺ من الفعل ده
شوف بقى وشوفي كاااام مرة زعلنا الناس واحنا قاصدين
بلمزهم والتنمر عليهم
أو بإنك تاخد حد ع جنب وتسيب التالت إلا طبعا لو استأذنته في الحالة دي ينفع
أو..او...
عاوزين نخلي وصية النبيﷺ دي قدامنا ومن النهارده نجبر الخواطر بدل مانكسرها بحاجات النبيﷺ حذرنا منها👌

#كاريكاتير_رسايل

❌ماينفعش تصلي الفرض في العربية
خدوا بالكم لما نكون مسافرين أو هنركب مواصلات وماصليناش فرض
❌ماينفعش أقول هصليه في العربية لأن استقبال القبلة شرط في الصلاة
❌ وماينفعش كمان لو بنت ع الطريق مع أهلها وهيوقفوا العربية تصلي ...ماينفعش هي تستقبل القبلة بس تصلي وهي قاعدة أو تسجد وهي قاعدة لأن القيام ركن في الصلاة وهيئة السجود ضروري تتعمل صح حتى لو فيه رجال ممكن يشوفوا المرأة ده مش هيبطل الصلاة ولا حاجة

👈 خدوا بالكم إنك لو ع سفر تقدر تصلي الظهر والعصر أو المغرب والعشاء جمع وقصر في وقت أي صلاة فيهم
❌بس ماتصليش أي فرض منهم في العربية
أما السنن فتقدر تصليهم في العربية براحتك لأن النبيﷺ كان بيصلي السنة على راحلته

⛔ملحوظة
لو راكب قطر أو طيارة مدة طويلة ينفع تصلي الفرض فيهم لو هيخرج وقته ومش هتلحق تصليه حتى مع رخصة الجمع والقصر

#كاريكاتير_رسايل

اي رأيك لو قولتلك ع فكرة تخلي اكلك بدل ماهو حاجة عادية بتعملها يكون هو وقت الحسنات وربنا يغفر لك ذنوبك🥰؟؟!
....
كل اللي تعمله إنك تقول بسم الله أول الأكل وتاكل من قدامك وبايدك اليمين
وسيبكم بقى من كلام الاتيكيت اللي بتقولك الشوكة في الشمال والسكينة في اليمين
احنا الاتيكيت بتاعنا النبيﷺ علمهولنا في حديث:
"يا غُلَامُ، سَمِّ اللَّهَ، وكُلْ بيَمِينِكَ، وكُلْ ممَّا يَلِيكَ"
والكلام ده كان لطفل صغير ..عشان كده عاوزين نعلم الكلام ده لولادنا
ومانقولش دول صغيرين وبكرة يكبروا ويعرفوا لوحدهم

👈 طيب خلصت أكل بألف هنا ماتنساش تحمد ربنا بس وبكدة =مبروووك مغفرة ذنوبك
لحديث:" من أكل طعامًا ثم قال : الحمدُ للهِ الذي أطعمَني هذا الطعامَ ورزقنِيهِ من غيرِ حولٍ مني ولا قوةٍ غُفِرَ له ما تقدَّمَ من ذنبِه"

وتبقى أكلت وشبعت وفي نفس الوقت اخدت حسنات كتيييير😍

#كاريكاتير_رسايل