قصة كليم الله 2️⃣
مع ولادة سيدنا موسى...
كانت السنة اللي فرعون بيقتل فيها أي مولود ذكر
فخافت أمه عليه ومابقتش عارفة تتصرف ازاي لو حرس فرعون وصلوا له هيقتلوه أكيد
في الوقت ده ربنا ألهمها فكرة إنها تحطه في صندوق في البحر وماتخافش !!!
وتبدأ أم موسى تنفذ الإلهام اللي حصلها ده بس بعد ماترضع ابنها الأول وبعدها ترمي ابنها في صندوق في البحر وترمي معاه قلبها
ويمشي الصندوق في حفظ الله في طريق محدد عشان يوصل لبيت فرعون شخصيا
وياخد الحرس الصندوق العجيب اللي وصلهم
ويتفتح الصندوق في وجود زوجة فرعون اللي اسمها آسية
وبمجرد ماتشوف إن الصندوق ده في طفل تفضل تتحايل على فرعون إنه مايقتلوش وإنه يمكن يكون خير ليهم ويقولوا إنه ابنهم
وقدام المحايلات دي ...
يستسلم فرعون لرغبتها ويسيبه مايقتلوش وده كان تسخير من ربنا ليه عشان تحصل بعد كده الأحداث اللي ماكانش حد يتخيلها
بعد شوية يبدأ الطفل يصرخ فيدوروا على أي مرضعة ليه مايرضاش أبدااااا
فتيجي أخت سيدنا موسى اللي كانت مراقبة الموقف من بعيد وتدلهم على اللي هيرضى يرضع منها اللي هي أمه الحقيقية
أصله كان رضع منها قبل مايترمي وهم طبعا مايعرفوش
وفعلا رضع منها فتشترط بقى في اللحظة دي إنه يفضل معاها لو عاوزين هترضعه وإنها مش هتقدر تروح قصر الملك
والكل يوافق عشان مصلحة الطفل
وترجع أم موسى بيتها ومعاها ابنها عايشين من غير خوف ولا قلق زي ماربنا وعدها
لا وكمان يتدفع لها مرتب ع خدمتها دي
ايه اللي هيحصل بعد كده ...؟؟!!!
يتبع ...،،،،،

#قصة_موسى
#كليم_الله

قصة كليم الله 3️⃣
كبر سيدنا موسى في بيت عدوه وهو اللي رباه بنفسه
بس طبعا سيدنا موسى كان من بني إسر$ائيل اللي كانوا مستضعفين وكان القبط بستعبدوهم
القبط دول هم الطبقة العليا في الوقت ده واللي كان بيطلع منهم الوزراء وأصحاب المناصب
لكن وجود سيدنا موسى في قصر فرعون كان مخليه ليه قدر عالي حتى لو مش من القبط
وفي يوم من الأيام سيدنا موسى يلاقي اتنين بيتخانقوا
واحد من بني إسرا$ئيل اللي هم أهله وجماعته الأصلية والتاني من القبط أصحاب الدرجة الأولى في البلد
وبعد استغاثات الراجل ده
سيدنا موسى حاول يبعد الراجل اللي من القبط فلكمه بايده👊
لكن كان سيدنا موسى قوي وكانت اللكمة دي كفيلة إنه تقتل الراجل ده
تاني يوم نفس الراجل اللي من بني إسر$ائيل بيتخانق مع واحد تاني من القبط وبيستغيث بسيدنا موسى
سيدنا موسى قاله لا كده إنت اللي غوي مبين يعني كتير المشاكل وشديد الضلال
وساعتها الإسرائيلي ده افتكر إنه هيقتله وقاله إنت عاوز تقتلني زي ماقتلت الراجل امبارح
سمع الكلام ده الراجل اللي من القبط وطار الخبر في المدينة إن موسى قتل واحد من القبط
وكان سيدنا موسى خايف ومترقب ياترى إيه اللي هيحصل بعد الحادثة دي؟؟!!
يتبع....،،،

#قصة_موسى
#كليم_الله
#رسايل

قصة كليم الله4️⃣
في الوقت اللي كان فيه سيدنا موسى خايف ومترقب اللي هيحصل بعد خبر قتله للقبطي ...
جاله راجل من آخر المدينة بيجري ومعاه الخبر اليقين
قاله إن فرعون وجنوده في حالة استنفار تام عشان يقتلوك ولازم تخرج من مصر حالا
سيدنا موسى خرج من مصر مش عارف يروح فين عمره ماخرج منها
فضل يمشي ويبعد ولازالت عمليات البحث عنه جارية
وبعد مدة ربنا يعلمها وصل سيدنا موسى لمكان اسمه مدين
وهناك ...
لقى مجموعة من الناس بيسقوا غنمهم لكن كان فيه بنتين بيبعدوا غنمهم عن الناس
سيدنا موسى صاحب المرؤة سألهم عن سبب إنهم حاجزين أغنامهم عن الناس وكان الرد
إنهم ضعاف وأبوهم شيخ كبير في السن فبينتظروا الناس تمشي عشان أغنامهم تشرب
وكان رد الفعل الفوري من كليم الله إنه أخد أغنامهم وسقاها وسابهم
وراح تحت شجرة يرتاح من تعب المشي ومن تعب قلة الأكل
ورفع إيديه للسماء وقال: "رب إني لما أنزلت إلي من خير فقير" يارب محتاجك
وصل البنتين لأبوهم وحكوا له اللي حصل فبعت واحدة منهم لسيدنا موسى تقوله إنه عاوز يحاسبه على المعروف اللي عمله معاهم
وبالفعل ..
سيدنا موسى راح والشيخ الكبير ده طمنه وقاله إنك هنا في مدين بره مكان سيطرة الناس اللي انت خايف منهم
وعرض عليه إنه يتجوز واحدة من بناته بس يشتغل هو أجير لمدة 8 أو 10 سنوات وده مهرها
وافق سيدنا موسى على العرض ع طول
وفي نفس الليلة اللي رفع ايديه للسماء وهو جعان وخايف وتعبان وبيقول يارب فقير لخيرك
في نفس الليلة بات مطمن شبعان وكمان متجوز وعنده شغل
كل ده بكرم الكريم سبحانه
لكن لسه ماخلصتش قصته ...هيحصل ايه بعد كده؟؟!!
يتبع....،،،،

#قصة_موسى
#كليم_الله
#رسايل

قصة كليم الله5️⃣
انتهت العشر سنوات بالتمام والكمال
وهي دي المدة الأطول اللي كان سيدنا موسى اتفق عليها
وفي الوقت ده ..
سيدنا موسى كان عاوز يروح يزور أهله في مصر وخرج فعلا في طريقه لمصر
لكن كانت الدنيا ظلمة وبرد اوووي
وفجأة عند جبل الطور ....
سيدنا موسى لمح من بعيد نار 🔥
فقال لأهله اللي كانوا معاه هروح أجيب من النار اللي هناك أي شعلة تدفينا وتنور طريقنا
وصل سيدنا موسى لمكان النار في وادي اسمه طوى
وهناك سمع نداء عمره ماسمعه قبل كده
سمع " إِنِّي أَنَا رَبُّكَ فَاخْلَعْ نَعْلَيْكَ إِنَّكَ بِالْوَادِ الْمُقَدَّسِ طُوًى وَأَنَا اخْتَرْتُكَ فَاسْتَمِعْ لِمَا يُوحَى"
سيدنا موسى خاف جدا من الموقف الغريب اللي عمره ماخطر على باله
لكن لسه..الجاي أغرب
ربنا سأل سيدنا موسى ع الحاجة اللي في ايده ؟؟!!
سيدنا موسى قال ان دي العصاية اللي بيهش بيها الغنم وبيتسند عليها
ربنا قاله ارميها...اه ارميها وماتخافش!!!
سيدنا موسى اتفاجأ بالعصاية اتحولت لحية كبيرة..
سيدنا موسى خاف واتخض جدا
ربنا قاله ماتخافش ..
ده كمان حط ايدك في فتحة القميص وطلعها
سيدنا موسى عمل كده طلعت ايده بيضاء بلون القمر
كل دي كانت آيات مخصوص لسيدنا موسى
عشان هيتبعت في مهمة رسمية لفرعون شخصيا !!
لكن كان لسيدنا موسى شوية طلبات قبل بداية الرحلة دي
ايه هي ..؟!!
يتبع ...،،،،،

#قصة_موسى
#كليم_الله
#رسايل

قصة كليم الله6️⃣
بعد ماربنا نادى سيدنا موسى في جبل الطور
وآراه الآيات لتحول العصا لتعبان وتحول لون إيده للأبيض
جه الأمر بإنه يروح لفرعون يدعوه لعبادة الله الواحد الأحد
سيدنا موسى أول ماسمع الأمر قال إنه كان قتل حد منهم قبل كده وكمان عنده لدغة في لسانه من أثر الجمرة اللي لمسها لسانه وهو صغير
فطلب من ربنا أنه يشرح صدره ويبعد عنه الحزن وييسر له أمره ويفك عقدة لسانه
وكمان..يرسل معاه أخوه هارون عليه السلام ويجعله نبي ووزير معاه عشان يساعدوا بعض
وبالفعل...استجاب الله تعالى لسيدنا موسى وبشره
"سَنَشُدُّ عَضُدَكَ بِأَخِيكَ وَنَجْعَلُ لَكُمَا سُلْطَانًا فَلَا يَصِلُونَ إِلَيْكُمَا"
خلاص وعد ربنا إنهم مش هيتمكنوا منهم وخلاص بقى معاه سيدنا هارون نبي ودي كانت أكبر خدمة عملها أخ لأخوه اللي عمله سيدنا موسى
وكمل سيدنا موسى رحلته لمصر بس المرة دي رايح برسالة لفرعون شخصيًا
وصل بالفعل وقال لفرعون إنه رسول من رب العالمين وان كل المطلوب منه أنه يعبد الله الواحد الأحد
وكمان يحرر بني إسرا$ئيل ويسمح لهم يعبدوا ربنا ويديهم حريتهم
طبعا فرعون فضل يكابر ويقوله ازاي ليك إله غيري ويقول لوزيره هامان لازم تبني لي بناء عالي عشان أشوف إله موسى ويقول للناس
ده عاوز يبعدكم عن دين أبائكم وأنا الإله اللي أملك مصر والأنهار بتجري من تحتي
سيدنا موسى قاله بس أنا معايا معجزات تثبت إني نبي
فرمى سيدنا موسى العصاية فبقت ثعبان كبييير
وأخرج إيده من جيبه فبقت بيضاء منورة
فرعون قال : خلاص يبقى ده سحر ودي لعبتنا بقى سهله😊
عمل فرعون اعلان بالنفير العام لكل السحرة اللي في مصر يتجمعوا يوم العيد ويواجهوا سيدنا موسى قدام الناس كلها
وكانت المفاجأة...؟؟!!!!
يتبع ....،،،

#قصة_موسى
#كليم_الله
#رسايل

قصة كليم الله7️⃣
وفي يوم الزينة ...
كان الموعد المتفق عليه لأكبر مناظرة بين موسى عليه السلام وسحرة فرعون
واجتمع الناس من كل مكان عشان يشوفوا مين اللي هينتصر
طبعا الساحر ده كائن وصولي فالسحرة حبوا يستغلوا الموقف وقالوا لفرعون:
يعني لو انتصرنا هيبقى لينا ايه؟؟!!
فرعون قالهم ليكم المناصب والفلوس والوجاهة ..بس نخلص من الورطة اللي احنا فيها😄
أما سيدنا موسى أول ماشاف السحرة قالهم أوعوا تفتروا على ربنا الكذب وخوّفهم من عقاب الله
السحرة أول ماسمعوا الكلام ده اترددوا وبعدين جمعوا نفسهم وقالوا:
مين هيلقي سحره الأول احنا ولا انت؟؟!!
سيدنا موسى قالهم : ألقوا إنتم الاول
وبالفعل رمى السحرة العصيان بتاعتهم وبقت بسبب تخييلهم وسحرهم لعيون الناس تعابين
سيدنا موسى حس بالخوف لما شاف المنظر بس ربنا طمنه وقاله :
"لا تَخَفْ إِنَّكَ أَنْتَ الْأَعْلَى وَأَلْقِ مَا فِي يَمِينِكَ تَلْقَفْ مَا صَنَعُوا"
يعني ارمي العصاية وهتبتلع كل اللي انت شايفه قدامك
وهو ده اللي حصل بالفعل..
سيدنا موسى رمى العصاية اتحولت لثعبان كبير جدااا بلع كل الحيات بتاعة السحرة
السحرة شافوا اللي حصل وفي ردفعل تلقائي من غير أي ترتيب
نزلوا كلهم يسجدوا ويقولوا ده مش سحر آمنا برب هارون وموسى
فرعون شاف المنظر اتجنن وقال :
مستحييييل يكون ده حقيقي ، أكيد متفقين عليا
أكيد ده الكبير بتاعكم اللي معلمكم السحر مع انه متربي في بيته وبعدها كان بره مصر🤭
وفضل فرعون يتوعد للسحرة:هقتلكم وهصلبكم على الشجر وهعذبكم
لكن السحرة كانوا اخدوا قرار نهائي وقالوا اعمل اللي تعمله احنا ثابتين على ديننا
"رَبَّنَا أَفْرِغْ عَلَيْنَا صَبْرًا وَتَوَفَّنَا مُسْلِمِيْنَ"
طبعا فرعون مش هيسكت ..
ايه اللي هيحصل بعد كده ؟؟!!!
يتبع ...،،،

#قصة_موسى
#كليم_الله
#رسايل

قصة كليم الله8️⃣
بعد ظهور معجزة سيدنا موسى وتأكد نبوته قدام الناس جميعا
بدأ فرعون يعذب السحرة اللي آمنوا ويعذب بني إسرائيل عشان الكل يخاف يؤمن
ولكن وصل الإيمان جوه قصر فرعون وآمنت زوجة فرعون نفسها وربنا جعلها قدوة لأي حد بيعتذر بالأسباب اللي مانعاه انك مش هتلاقي أصعب من جوه قصر فرعون
وآمنت كمان ماشطة بنت فرعون (هيرستايلست يعني😅)
طبعا فرعون عذبهم وقتلهم لكنهم انتصروا في النهاية الحقيقية ببيوت ومكانة عظيمة في الجنة على صبرهم ده

في الوقت ده ...
ربنا بعت لفرعون وقومه آيات تانية غير اللي شافوها مع سيدنا موسى
فسلط عليهم مرة المطر الغزير اللي أهلك كل الثمار عندهم
ولما شافوا ده بيحصل راحو يجروا على سيدنا موسى ادع لنا ربك لو كشف عنا العذاب ده هنؤمن
سيدنا موسى يدعي ربنا فيصرف عنهم العذاب فيرجعوا تاني لطغيانهم ويقولوا أصلا عادي🙃
كان ده دايما بيحصل مع آباءنا ومالهاش علاقة بموسى
فربنا يسلط عليهم جراد ياكل كل الزروع وسوس يدخل للحبوب والغلة اللي سايبنها وحشرات تيجي في شعرهم
فيروحوا لسيدنا موسى ويتكرر نفس الموقف
فيسلط عليهم الضفادع تدخل في كل أكلهم وشربهم ويحكى ان بس اللي يفتح بوقه كانت تدخل فيه الضفادع
ويكرروا تااااني ومايتعظوش
فربنا يحول كل المياه اللي يشرب منها اللي على دين فرعون لدم
لكن اللي اتبع سيدنا موسى يشربها مياه صافية نقية
آيااااات كتييير كتيييير لكن مااتعظوش
وكل مرة كانوا يروحوا لسيدنا موسى ويدعيلهم ربنا فيصرف عنهم وبرضو العمى ملا قلوبهم
ساعتها سيدنا موسى رفع إيده ودعا عليهم:
"رَبَّنَآ إِنَّكَ ءَاتَيْتَ فِرْعَوْنَ وَمَلَأَهُۥ زِينَةً وَأَمْوَٰلًا فِى ٱلْحَيَوٰةِ ٱلدُّنْيَا رَبَّنَا لِيُضِلُّواْ عَن سَبِيلِكَ ۖ رَبَّنَا ٱطْمِسْ عَلَىٰٓ أَمْوَٰلِهِمْ وَٱشْدُدْ عَلَىٰ قُلُوبِهِمْ فَلَا يُؤْمِنُواْ حَتَّىٰ يَرَوُاْ ٱلْعَذَابَ ٱلْأَلِيمَ"
وأجيبت دعوة سيدنا موسى اللي كان سيدنا هارون بيأمن عليها معاه🤲
وأصبح العذاب مسألة وقت بقى
هيحصل امتى وازاي ؟؟!!!
يتبع ...،،،

#قصة_موسى
#كليم_الله
#رسايل

قصة كليم الله9️⃣
"قَدْ أُجِيبَتْ دَعْوَتُكُمَا"
كان ده الرد على دعوة موسى وهارون عليهما السلام
لمااشتد أذى فرعون وجنوده على المؤمنين وانقطع الأمل في إيمانهم
ولكن لحد ماينزل العذاب ربنا أمر المؤمنين بإنهم يخلوا بيوتهم هي أماكن الصلاة بدل المساجد ويفضلوا يبشروا بعض بإن نصر ربنا قريب
وفي ليلة من الليالي ربنا أذن لسيدنا موسى إنه يخرج ببني إسرائيل فخرجوا في طريقهم للشام وكان خروجهم بالليل عشان ماحدش يحس بيهم
لكن فرعون وجنوده وصلهم الخبر
وعلى الفور فرعون جمع كل جيشه وخرج وراهم ووصلهم فعلا وقت شروق الشمس
أصحاب سيدنا موسى شافوا خلاص جنود فرعون وراهم والبحر قدامهم خافوا وقالوا لسيدنا موسى إنا لمدركون !!
الحقنا خلاص ماعدش فيه حل قدامنا
لكن سيدنا موسى قالهم بكل يقين "كَلَّا ۖ إِنَّ مَعِيَ رَبِّي"
كان واثق لن ربنا مش هيضيعه
في الوقت ده ربنا أمره إنه يضرب البحر بالعصاية بتاعته
وحصلت المعجزة!!!
اتشق طريق جوه البحر والمياه كانت واقفه حوالين الطريق ده زي الجبال كده
ودخل سيدنا موسى ودخل وراه بني إسرائيل
والكل مش مستوعب اللي بيحصل
ووصل فرعون وشاف البحر اتشق في موقف يعجز عنه أي قدرة بشرية
لكنه وبكل عمى قلب قالهم شوفتوا البحر عمل ايه في اللي تمردوا عليا ، ادخلوا وراهم الحقوهم!!!
وبدل مايقف حتى يفكر لا..دخل فرعون وجنوده في الطريق المعجزة
هيحصل ايه بعد كده؟؟!!
يتبع ...،،،،،

#قصة_موسى
#كليم_الله
#رسايل

قصة كليم الله🔟
وفي منتصف البحر ...
وفي الوقت اللي كان فيه فرعون بيمشي بجنوده على الطريق المعجزة اللي اتشق مخصوص لسيدنا موسى والمؤمنين
كان المؤمنين خلاص عدوا البحر وربنا قال لسيدنا موسى يسيب البحر زي ماهو مش هيضربه تاني
لكن وفي اللحظمة الحاسمة دي ربنا أمر البحر بإنه يرجع تاني زي ماكان فاندمجت مياة البحر تاني
وبقى كل اللي كان ع الطريق ده في وسط امواج البحر ومعاهم
الفرعون طبعا..اللي في وسط الموج ده قال خلاص خلاص آمنت أنه لا إله إلا الذي آمنت به بنو إسرائيل
متخيل بيموت وفي وسط البحر وقال عدد كلمات قد ايه مع انه كان أسهل يقول آمنت بالله
لكن الكبر اللي منعه يؤمن هو نفسه اللي منعه يقولها
سيدنا جبريل بيحكي للنبي انه في الوقت ده كان بياخد من طين البحر ويحط في بوقه لأنه خايف ان رحمة ربنا تشمله وسيدنا جبريل والملايكة كلهم طبعا كانوا بيمرهوه أصله ده قال أنا ربكم الأعلى ماقالش كلمة عادية
وهسيبك تتخيل رحمة ربنا اللي سيدنا جبريل يعرفها
لكن ربنا قال "آلْآنَ وَقَدْ عَصَيْتَ قَبْلُ وَكُنْتَ مِنَ الْمُفْسِدِينَ"
خلاص خلصت كل فرصك في إنك تدخل دار السعادة وهتموت غريق
وأخيراااا...
غرق فرعون في البحر وربنا أمر البحر يخرج جثته على الشاطئ وعليها الدرع بتاعه اللي بيلبسه
عشان يكون آية لكل الناس في وقته وبعده لحد يوم القيامة
الكلام ده كله بقى حصل يوم عاشوراء اللي بنصومه حبا لنبي الله موسى
وشكر لله إن ربنا نجاه لأننا نحب كل الرسل ونؤمن بيهم
ودلوقتي بعد غرق فرعون بمعجزة رهيبة ..
بني إسر$ائيل أكيد هيثبتوا خلاص ده شافوا حاجة عمرهم ماتخيلوها
هل ده حقيقي ؟؟!!!
يتبع ....،،،،

#قصة_موسى
#كليم_الله
#رسايل

قصة كليم الله 11

انتهت حكاية أكبر طاغية على وجه الأرض
الفرعون اللي قال أنا ربكم الأعلى غرق بشوية مياه وفضلت جثته عظة لكل واحد
بني إسر$ائيل شافوا المشهد كااااامل وكملوا طريقهم للشام زي ماربنا أمر سيدنا موسى
لكن وبمجرد مامشوا في طريقهم شافوا ناس بيعبدوا عجل
وأول ماشافوهم راحوا لسيدنا موسى يقولوله اعمل لنا إله زيهم !!!
إله !!! طب وكان فين الإله ده والبحر قدامكم وماعندكوش مخرج🙃
الإله اللي نجاكم يومها هو ده بس الإله اللي يستحق العبادة
أنهى سيدنا موسى مع بني إسرائيل طلبهم بالرفض الحاسم ومشوا في طريقهم للشام
وهناك ربنا أمرهم إنهم يدخلوا الأرض المقدسة ويحاربوا الجبارين اللي فيها
بنوإسرائيل كانوا لسه شايفين قدرة ربنا وإنه أهلك أكبر طاغية قدام عينيهم
ومع ذلك قالوا لا احنا خايفين أصلهم فيها ناس جبارين
وسيدنا موسى يحاول معاهم وكمان رجلين منهم ينصحوهم فكانت النتيجه إنهم قالوا:
"إِنَّا لَنْ نَدْخُلَهَا أَبَدًا مَا دَامُوا فِيهَا فَاذْهَبْ أَنْتَ وَرَبُّكَ فَقَاتِلَا إِنَّا هَاهُنَا قَاعِدُونَ"
منتهى سوء الأدب مع نبيهم ومع ربهم
فصدر العقاب الإلهي بمنعهم منعا نهائيا باتًا من دخول الأرض المقدسة لمدة 40سنة
هيفضلوا تايهين طووول المدة دي لحد مايموت الجيل ده ويجي جيل تاني يعرف قيمة الأرض دي
وهو ده اللي حصل بالفعل
الكل تاه والكل اتحكم عليه بالحرمان من دخول الأرض المقدسة
ياترى هيحصلهم ايه في الفترة دي؟؟!!!
يتبع...،،،

#قصة_موسى
#كليم_الله
#رسايل

قصة كليم الله 11

انتهت حكاية أكبر طاغية على وجه الأرض
الفرعون اللي قال أنا ربكم الأعلى غرق بشوية مياه وفضلت جثته عظة لكل واحد
بني إسر$ائيل شافوا المشهد كااااامل وكملوا طريقهم للشام زي ماربنا أمر سيدنا موسى
لكن وبمجرد مامشوا في طريقهم شافوا ناس بيعبدوا عجل
وأول ماشافوهم راحوا لسيدنا موسى يقولوله اعمل لنا إله زيهم !!!
إله !!! طب وكان فين الإله ده والبحر قدامكم وماعندكوش مخرج🙃
الإله اللي نجاكم يومها هو ده بس الإله اللي يستحق العبادة
أنهى سيدنا موسى مع بني إسرائيل طلبهم بالرفض الحاسم ومشوا في طريقهم للشام
وهناك ربنا أمرهم إنهم يدخلوا الأرض المقدسة ويحاربوا الجبارين اللي فيها
بنوإسرائيل كانوا لسه شايفين قدرة ربنا وإنه أهلك أكبر طاغية قدام عينيهم
ومع ذلك قالوا لا احنا خايفين أصلهم فيها ناس جبارين
وسيدنا موسى يحاول معاهم وكمان رجلين منهم ينصحوهم فكانت النتيجه إنهم قالوا:
"إِنَّا لَنْ نَدْخُلَهَا أَبَدًا مَا دَامُوا فِيهَا فَاذْهَبْ أَنْتَ وَرَبُّكَ فَقَاتِلَا إِنَّا هَاهُنَا قَاعِدُونَ"
منتهى سوء الأدب مع نبيهم ومع ربهم
فصدر العقاب الإلهي بمنعهم منعا نهائيا باتًا من دخول الأرض المقدسة لمدة 40سنة
هيفضلوا تايهين طووول المدة دي لحد مايموت الجيل ده ويجي جيل تاني يعرف قيمة الأرض دي
وهو ده اللي حصل بالفعل
الكل تاه والكل اتحكم عليه بالحرمان من دخول الأرض المقدسة
ياترى هيحصلهم ايه في الفترة دي؟؟!!!
يتبع...،،،

#قصة_موسى
#كليم_الله
#رسايل

قصة كليم الله 12

وفي صحراء سيناء...
اللي دخلها بني إسر$ائيل بعد مااتحرموا من دخول الأرض المقدسة واتحكم عليهم ب40 سنة يفضلوا تايهين في الصحراء
في المكان ده سيدنا موسى قسمهم ل 12 مجموعة كل مجموعة ليها رئيس
وربنا أمر سيدنا موسى إنه يضرب بالعصاية بتاعته الحجر فاتفجر منها 12عين مياه لكل جماعة عين يشربوا منها
وكمان أنزل ليهم حاجة حلوة زي العسل كده
وطيور زي السمان تجيلهم لحد عندهم فيصطادوها وياكلوا من غير أي تعب
وبما إنهم في صحراء فالجو حر لكن رحمة ربنا بيهم جعل ليهم السحاب يضلل عليهم من حر الصحراء دي عشان حتى وهم في العقوبة يكونوا في تكريم وتجيلهم رحمة ربنا
بعد كل النعم دي تفتكر كان رد بني إسرائيل ايه شكروا النعمة؟؟!!!
استغفروا وتابوا عن رفضهم أمر ربنا بدخول الأرض المقدسة؟؟!!
ماحصلش ولا حاجة من دي
بالعكس قالوا لنبيهم موسى عليه السلام احنا زهقنا من الراحة والاكل الحلو ده عاوزين ناكل بصل وتوم والذي منه🙃
سيدنا موسى استغرب جدا
قالهم بقى تستبدلوا الأكل اللي طعمه جميل باللي أقل منه
البصل والعدس والتوم موجود في أي بلد من البلاد
طبعا ده كان بطر على النعمة وتعنت وعدم شكر فالأرجح إنهم لم يجابوا لطلبهم ده
لكن ربنا قالنا ان بسبب سوء أدبهم مع ربنا اتفرض عليهم الذل وغضب الله عليهم وهو ده حال أي حد يتعنت مع أوامر ربنا
ولكن فضل برضو باب التوبة مفتوح للي يتوب منهم وربنا قالهم
"وَإِنِّي لَغَفَّارٌ لِمَنْ تَابَ وَآمَنَ وَعَمِلَ صَالِحًا ثُمَّ اهْتَدَى"
ياترى هيستجيبوا ويتعلموا من أخطائهم ويتوبوا ؟؟!!
يتبع ...،،،

#كليم_الله
#قصة_موسى
#رسايل

قصة كليم الله 13

وأخيراااا..
سيدنا موسى على وعد بلقاء ربه بعد ماكان كلمه أول مرة من غير معاد
سيدنا موسى كان الشوق مالي قلبه للقاء ده
ربنا قاله إن المعاد بعد 30يوم اللي كانوا شهر ذي القعدة
وعدوا 30يوم وموسى عليه السلام ينتظر
لما خلصوا ربنا قاله هتكتمل المدة ب 10أيام كمان اللي هم عشر ذي الحجة واللي احنا كمان بنفتكر فيهم شوق سيدنا موسى وشوقنا للقاء الله
وأخيراااا....
عدى 40 يوم بالتمام والكمال
وراح سيدنا موسى للقاء ربه وترك هارون عليه السلام خليفة بداله على قومه
وبدأ كليم الله يسمع كلام الله تعالى مباشرة ..
كان تكريم ماحصلش لحد من الأنبياء قبله أبداااا
لكن مشاعر الشوق اللي كانت مالية قلب سيدنا موسى لما سمع كلامه زادت أكتر فأحب إنه يشوف ربنا
أحب يشوف اللي بيناجيه واللي نصره على فرعون واللي أيده بالمعجزات
فقال: "رَبِّ أَرِنِي أَنْظُرْ إِلَيْكَ"
لكن ربنا قاله إن مش هيقدر يشوفه في الدنيا ولكن يبص على الجبل إذا اتحمل رؤية الله تعالى هيشوفه
وأول ماظهر جزء بسيط جدا للجبل اتهد الجبل وسيدنا موسى اتخض وأغمى عليه
وأول مافاق قال: "سُبْحَانَكَ تُبْتُ إِلَيْكَ وَأَنَا أَوَّلُ الْمُؤْمِنِينَ"
أنزهك يارب عن كل نقص وأنا أول المؤمنين بك
وفي اللقاء ده ربنا أعطى لسيدنا موسى التوراة وفيها كل الأحكام اللي فرضها عليهم وأمرهم إنهم يقوموا بيها كلها
وانتهى لقاء موسى عليه السلام مع ربه بس ربنا أخبره عن مصيبة عملها بني إسرائيل في غيابه
ياترى عملوا ايه تاني ؟؟!!!
يتبع ..،،،

#قصة_موسى
#كليم_الله
#رسايل

قصة كليم الله 14

لما سيدنا موسى ترك قومه وراح لمعاد لقاء ربه
ترك سيدنا هارون عليه السلام خليفة ليه على بني إسر$ائيل
وكان بني إسرائيل لما خرجوا من مصر معاهم دهب أخدوه من القبط
يقوم بقى واحد اسمه السامري يقولهم الذهب اللي معاكم ده فلوس حرام فهنرميه في النار يسيح عشان نتخلص منه
ويقولهم انه معاه تراب من أثر الفرس اللي كان عليه سيدنا جبريل يوم مانزل لاغراق فرعون
فيحط التراب على الدهب اللي ساح من النار ويتشكل معاه عجل فتنة واختبار ليهم
وزيادة في الفتنة ليهم كان الريح لما يعدي جوه العجل يطلع صوت
السامري أقنعهم إن هو ده إلهكم وهو ده إله موسى اللي راح يقابله بس هو نساه
سيدنا هارون بقى في موقف صعب اوووي
بني إسرائيل صدقوا السامري وعبدوا العجل
وفي نفس الوقت هو مستخلف عليهم ومش عارف يصدهم عن الغلط اللي بيعملوه ومهما ينصحهم ويوعظهم مستمرين في الغلط
وفضلوا على حالهم لحد مارجع سيدنا موسى من لقاء ربه واول ماشافهم من الصدمة وقعت منه ألواح التوراة اللي فيها كلام ربنا
وقال لهارون عليه السلام ازاي ماخلتهمش يوقفوا الجهل اللي بيعملوه ده
سيدنا هارون قاله انه حاول معاهم كتير ومالقاش استجابة
أما سيدنا موسى فمسك العجل ده وحرقه الأول في النار وبعدها خد الرماد بتاعه ورماه في البحر
وقال للسامري إن عقابك إنك مش هتلمس حد ولا حد هيلمسك لحد ماتموت ده عقاب الدنيا ولسه عقاب الآخرة

وانتهت قصة العجل بس لسه بني إسرائيل مش عارفين يتوبوا ازاي من الكبيرة دي عشان ربنا يغفر لهم
ياترى هتكون توبتهم ازاي؟؟!!
يتبع ...،،،،

#كليم_الله
#قصة_موسى
#رسايل

قصة كليم الله 15

عبد بنو إسرائيل العجل في غياب نبي الله موسى
وجه الوقت عشان يتوبوا من الذنب العظيم ده
وكان طريقة التوبة من أصعب الحاجات اللي ممكن تتخيلها وهي إنهم عشان تقبل منهم التوبة يقتلوا بعض😧
اه يقتل اللي ماعبدش العجل أي حد من اللي عبده سواء أخوه ، ابنه أي حاجة
ابقى افتكر ده بقى وإنت بتستصعب التوبة اللي ربنا سهلها لنا وخلاها بس مجرد إنك تقول يارب وتسيب ذنبك وماتكسلش عن التوبة تاني

وأخيرا...قبلت توبتهم من عبادة العجل
وسيدنا موسى أخد أحسن 70راجل منهم عشان يعتذروا لربنا من عبادتهم العجل
لكن وكعادة بني إسرائيل في التعنت....
قالوا لسيدنا موسى لا مش مصدقين عاوزين نشوف ربنا
وساعتها نزل عليهم صاعقة وماتوا كلهم
وفضل سيدنا موسى يناجي ربه ويقول:"رَبِّ لَوْ شِئْتَ أَهْلَكْتَهُمْ مِنْ قَبْلُ وَإِيَّايَ أَتُهْلِكُنَا بِمَا فَعَلَ السُّفَهَاءُ مِنَّا"
فربنا أحياهم تاني بعد الصاعقة اية ومعجزة جديدة لسيدنا موسى
وعاش سيدنا موسى مع قومه اللي فضلوا طول الوقت في تعنت لأوامر الله لدرجة إن ربنا رفع لهم الجبل فوقهم
وإما إنهم يستجيبوا لأوامر الله أو يقع الجبل عليهم
ويقولوا هنسمع الأوامر ويرجعوا تاني لنفس أفعالهم
لحد ماجه الوقت اللي ربنا جعله لوفاة نبيهم موسى عليه السلام وهم ع نفس الحال
وكانت النهاية لما وصل ملك الموت لنبي الله موسى فضربه في عينه فرجع ملك الموت لربنا وقاله يارب أرسلتني إلى عبد لا يريد الموت،
ربنا قاله: ارجع إليه فقل له يضع يده على متن ثور، فله بما غطت يده بكل شعرة سنة،
يعني هيزيد في عمره سنة مقابل كل شعرة يبقى كده هيزيد الاف السنين
بس سيدنا موسى قال: أي رب ثم ماذا؟ قال: ثم الموت.
قال: فالآن.
ولكن طلب من ربنا إنه يقربه شوية من الأرض المقدسة اللي كان نفسه يدخلها في حياته لكن كان الحرمان بسبب تعنت قومه
وقبض ملك الموت روح النبي الكريم كليم الله في فترة التيه بعد حياة مليانه معجزات وتضحيات وجهاد لدين ربنا
فنشهدك ياربنا أنا نحب سيدنا موسى الكليم ونرجو أن تجمعنا معه ومع الأنبياء جميعا في الفردوس الأعلى

النهاية..،،،

#كليم_الله
#قصة_موسى
#رسايل