(သစ်တောအုပ်အဖွဲ့ထံမှ သိမ်းဆည်းရရှိသော ဆိုင်ကယ်နှင့် ဖုန်းများ။ ဓာတ်ပုံ - Yoma GBK)

ကိုးကန့်ဒေသပြန်ထူထောင်ရေး ပြင်ပအလုပ်သမားများခေါ်ယူရာတွင် သူလျှိုများပါမလာရေး ကုမ္ပဏီများတာဝန်ယူရမည်ဟု MNDAA သတိပေး

မောင်မောင်/People’s Spring

ဒေသပြန်လည်တည်ဆောက်ရေးအတွက် အလုပ်သမားများနှင့် နည်းပညာရှင်အမြောက်အများ လိုအပ်ကြောင်း ကိုးကန့်တပ်မတော်(MNDAA)က ထုတ်ပြန်ခဲ့ပြီး ပြင်ပမှရောက်ရှိလာသော အလုပ်သမားများတွင် သူလျှိုနှင့် ရန်သူ့အေးဂျင့်များ ရောနှောပါဝင်မလာစေရေး စိစစ်ရန် အသိပေး ထုတ်ပြန်သည်။

အထူးဒေသ(၁) အုပ်ချုပ်ရေးကော်မတီမှ အလုပ်သမား ဝန်ဆောင်မှုကုမ္ပဏီများကို တည်ထောင်ဖွင့်လှစ်ရန် ခွင့်ပြုလိုက်ကြောင်း၊ ၎င်း ကုမ္ပဏီများမှ ပြည်ပအလုပ်သမားနှင့် နည်းပညာရှင်များ ခေါ်ဆောင်ပေးရန် တာဝန်ပေးလိုက်ကြောင်း ဖော်ပြထားသည်။

ကဏ္ဍအသီးသီးမှ လုပ်ငန်းရှင်များအနေဖြင့် အလုပ်သမားဝန်ဆောင်မှု ကုမ္ပဏီတွင် လိုအပ်သည့် အလုပ်သမား အမျိုးအစားကို သွားရောက်စုံစမ်းလေ့လာနိုင်ကြောင်း၊ ဒေသတွင်း၌ အလုပ်သမား စျေးကွက်များဖွင့်လှစ်ပြီး အလုပ်သမားဝန်ဆောင်မှုကုမ္ပဏီများ တည်ထောင်ဖွင့်လှစ်ရန် ကြိုဆိုကြောင်း MNDAAက ထုတ်ပြန်သည်။

အလုပ်သမားများအနေဖြင့် မိမိသဘောဖြင့် အလုပ်ရွေးချယ်ခြင်း သို့မဟုတ် အလုပ်သမား ဝန်ဆောင်မှု ကုမ္ပဏီများထံ ပွဲစားခပေးဆောင်ပြီး အကူအညီတောင်းခံနိုင်ကြောင်း ဖော်ပြသည်။

ဒေသအုပ်ချုပ်ရေးကော်မတီအနေဖြင့် လုပ်ငန်းပိုင်ရှင်မှ မိမိသဘောဖြင့် အလုပ်သမားများကို ခေါ်ယူခွင့်ပြုသော်လည်း ခေါ်လာသော အလုပ်သမားများအနက် ရန်သူသူလျှိုများတွေ့ရှိပါက ခေါ်ယူသော ကုမ္ပဏီသို့မဟုတ် လုပ်ငန်းပိုင်ရှင်များကို အရေးယူမည်ဖြစ်ကြောင်းလည်း MNDAAက သတိပေးထားသည်။

အလုပ်သမား ဝန်ဆောင်မှုကုမ္ပဏီများသည် အလုပ်သမားခေါ်ယူရေးဆိုင်ရာ စည်းကမ်းများကို တင်းကြပ်စွာ လိုက်နာရမည်ဖြစ်ပြီး အလုပ်သမားများ၏ နိုင်ငံရေးနောက်ခံကို အသေးစိတ် စစ်ဆေးပြီး ရန်သူ့အေးဂျင့်များ စိမ့်ဝင်ခြင်းကို အထူးကာကွယ်ရမည်ဖြစ်ကြောင်း ဖော်ပြသည်။

လက်ရှိတွင် MNDAA ထိန်းချုပ်ရာဒေသများ၌ MNDAAက တပ်သားသစ်စုဆောင်းခြင်း၊ ဖမ်းဆီးနှိပ်စက်ခြင်း၊ အချို့သတ်ဖြတ်ခံရခြင်း၊ နေရပ်ပြန်လုပ်သားများ၏ ဖုန်း၊ ကားနှင့် ငွေများကို သိမ်းဆည်းခြင်း၊ လူမျိုးရေး ခွဲခြားမှုကြုံရခြင်း အခြေအနေများ ရှိခဲ့ကြောင်း ကာယကံရှင်တွေကို ကိုးကားပြီး ရှမ်းမြောက်အခြေစိုက် ရွှေဖီမြေသတင်းဌာနက ဖော်ပြခဲ့သည့် သတင်းများ၌ တွေ့ရသည်။

အထူးသဖြင့် ဗမာလူမျိုးများကို MNDAAတပ်က စစ်ဆေးမှုများ ပြုလုပ်ခြင်း၊ ဖမ်းဆီးခြင်းများ ရှိကြောင်း ကိုးကန့်တပ် MNDAA သိမ်းပိုက်ထားသည့် သိန္နီဒေသမှ တိမ်းရှောင်လာသူ တစ်ဦးက ပြောပြသည်။

"လူတွေ့ရင်မေးတာ ဘာလူမျိုးလဲဆိုပြီး။ ငါကတော့ ကြောက်လို့ သူတို့လာရင် မတွေ့အောင် ရှောင်နေတာပဲ"ဟု ၎င်းက ပြောပြသည်။

MNDAA တပ်ဖွဲ့ဝင်အချို့ကမူ ၎င်းတို့ နေရပ်ပြန်လာစဉ် လေကြောင်းအန္တရာယ် ဂရုစိုက်ရန် ပြောကြားခြင်းပြုလုပ်ခဲ့ပြီး စစ်ဆေးမှု ပြုလုပ်စဉ် ချက်ပြုစားသောက်ရန် ရိက္ခာပေးသည်ဟု ဆိုသည်။ ၎င်း၏ အသိမိတ်ဆွေတစ်ဦး MNDAA ၏ ဖမ်းဆီးမှုခံရစဉ် MNDAA ရဲဘော်အချို့က အစားအစာပေးခဲ့သော်လည်း အရာရှိက မပေးရန်တားမြစ်ကြောင်း၊ တိုက်ပွဲဖြစ်ချိန်တွင် MNDAA တပ်ဖွဲ့ဝင်အချို့က အချုပ်ခန်းတံခါးဖွင့်ပေး၍ လွတ်မြောက်လာခြင်းဖြစ်ကြောင်းလည်း သိန္နီမြို့နယ်မှရှောင်လာသူ တစ်ဦးက ပြောပြသည်။

MNDAA တပ်ဖွဲ့ဝင်များ၏ လူ့အခွင့်အရေးချိုးဖောက်မှုဖြစ်စဉ် အချို့နှင့်ပတ်သက်ပြီး အဖွဲ့တာဝန်ရှိသူ လီကျာဝင်းထံ ဆက်သွယ်မေးမြန်းထားဆဲဖြစ်သည်။

MNDAA ထုတ်ပြန်ချက်တွင် အလုပ်သမားများကို အဓမ္မခိုင်းစေခြင်း၊ အလုပ်သမားများကို လိမ်ခေါ်ပြီး ဆန္ဒနှင့်မကိုက်ညီသည့် အလုပ်များစေခိုင်းခြင်း၊ ကလေး အလုပ်သမား အသုံးပြုခြင်းများကို လုံး၀ကန့်ကွက်တားမြစ်ကြောင်း ထုတ်ပြန်ခဲ့ပြီး တွေ့ရှိပါက ပြင်းထန်စွာအရေးယူမည်ဟု အသိပေးသည်။

လုပ်ငန်းရှင်နှင့် အလုပ်သမားများသည် ဆန္ဒ အလျောက် လုပ်ငန်းပုံစံနှင့် လစာစံနှုန်းများကို ဆုံးဖြတ်နိုင်ကြောင်း၊ အလုပ်သမား ဝန်ဆောင်မှု ကုမ္ပဏီ၏ ပွဲစားခ ကောက်ခံမှုများကို လုပ်ငန်း အမျိုးအစားအလိုက် အလုပ်သမားနှင့်အလုပ်ရှင်များအား ကြိုတင်ဖွင့်ဆို ရှင်းပြရမည်ဖြစ်ပြီး အလုပ်သမား လုံး၀တားမြစ်ကြောင်း ဖော်ပြသည်။

လုပ်ငန်းရှင်နှင့် အလုပ်သမားကြား လုပ်ငန်းခွင် အငြင်းပွားမှုဖြစ်ပါက သက်ဆိုင်ရာ ဥပဒေဌာနသို့ တရားစွဲခြင်း သို့မဟုတ် အလုပ်သမားဝန်ဆောင်မှု ကုမ္ပဏီထံအကူအညီတောင်းခံပြီး ညှိနှိုင်းဖြေရှင်းနိုင်ကြောင်း ထုတ်ပြန်သည်။

အလုပ်သမားအားလုံးသည် အထူးဒေသရဲတပ်ဖွဲ့ထံ လုပ်ငန်းကဒ် လျှောက်ရမည်ဖြစ်ပြီး လုပ်ငန်းကဒ်ရှိသူများသည် ဒေသအတွင်း ခေတ္တနေထိုင်ခွင့်ရှိသော်လည်း ရပ်ကွက်ကျော်ရွှေပြောင်း နေထိုင်ခြင်း မပြုရဟု MNDAAက တားမြစ်သည်။

(ကိုးကန့်ဒေသ၌ လုံခြုံရေးအဖြစ် လှည့်လည်နေသော MNDAAမှ ရဲဘော်များအား ဖေဖော်ဝါရီ ၁၅ရက်က တွေ့ရစဥ်။ ဓာတ်ပုံ - The Kokang)

နပခ အ​ခြေစိုက်​​သော အမ်းမြို့နယ်ရှိ ​ရှေ့တန်းစခန်း
နှစ်ခုကိုစစ်တပ်က မီးရှို့ ၍ တိုင်းစစ်ဌာနချုပ်သို့ထွက်ပြေး

ရွှေပြည်စိုး/People's Spring

အ​နောက်​ပိုင်းတိုင်းစစ်ဌာနချုပ် (နပခ)ရှိရာ ရခိုင်ပြည်နယ်၊ အမ်းမြို့နယ် ရှိ ပွိုင့် (၄၀၂) နှင့် ပွိုင့် (၄၀၈) ကုန်းမှ စစ်ကောင်စီတပ်ဖွဲ့ဝင်များသည် ယနေ့ညနေပိုင်းတွင် စခန်းအား မီးရှို့ ထွက်ပြေးသွားကြောင်း ရက္ခိုင့်တပ်တော် AAက သတင်းထုတ်ပြန်သည်။

အမ်းမြို့နယ် ဟင်းခ​ရော်ကိုင်းကျေးရွာ အ​နောက်ဘက် ၂ ကီလိုမီတာ​​ကျော်ရှိ ပွိုင့် (၄၀၂) နှင့် ပွိုင့် (၄၀၈) ကုန်းမှစစ်ကောင်စီတပ်ဖွဲ့ဝင်များသည်ယနေ့(ဖေဖော်ဝါရီ ၁၈ ရက်) ညနေ ၅ နာရီ ခွဲ အချိန်ခန့်တွင် ၎င်းတို့၏ တပ်စခန်းကို ၎င်းတို့ကိုယ်တိုင်မီးရှို့၍ စစ်ရဟတ်ယာဉ်များဖြင့်အမ်းမြို့ရှိ အနောက်ပိုင်းတိုင်းစစ်ဌာနချုပ်(နပခ) သို့ တိမ်းရှောင်ထွက်
ပြေးသွားခဲ့ကြသည်ဟု AA က အသိ​ပေးထားသည်။

လက်ရှိအချိန်တွင် ထိုစခန်းမှာမီးဟုန်းဟုန်းတောက် လောင်လျက်ရှိနေကြောင်း ရုပ်သံမှတ်တမ်းနှင့်အတူ AAက​ဖော်ပြထားသည်။

ရက္လိုင့်တပ်​တော်က ရခိုင်ပြည်နယ်တွင် ​မြောက်ဦး ၊​ပေါက်​တော ၊​မြေပုံ ၊ မင်းပြား ၊​ကျောက်​တော် မြို့များနှင့် ပလက်ဝ​ဒေသတစ်ခုလုံးကိုသိမ်းပိုက်ထားသည်။ ထိုအပြသ် ရ​သေ့​တောင် ၊ရမ်းဗြဲ ၊ မအီ ၊ ​မောင်​တော၊​ကျောက်ဖြူ စ​သောမြို့နယ်များရှိ စစ်​ကောင်စီတပ်စခန်းများကို သိမ်းပိုက်ရန် ထိုးစစ်ဆင်​နေသည်။

ရုပ်သံ-AA Info Desk

ပုလဲမြို့နယ်ရှိ ပျူစောထီးရွာနှစ်ရွာမှ ပြည်သူ ၂၃ ဦး ထပ်မံထွက်ပြေးလာ

အောင်ဇေယျ/People's Spring

စစ်ကိုင်းတိုင်း၊ ပုလဲမြို့နယ်ရှိ စစ်ကောင်စီတပ် လက်အောက်ခံ ပျူစောထီး ကျေးရွာနှစ်ရွာမှ ပြည်သူ ၂၃ဦး ထပ်မံထွက်ပြေးလွတ်မြောက်လာကြောင်း သတင်းရရှိသည်။

ဖေဖော်ဝါရီ ၁၆ရက်က ဇီးဖြူကုန်းပျူစောထီးရွာမှ ခုနစ်ဦး၊ ဖေဖော်ဝါရီ ၁၇ရက်တွင် အင်မထီးပျူစောထီးရွာမှ ၁၆ဦး ထပ်မံထွက်ပြေးလွတ်မြောက် လာကာ အလင်းဝင်ခိုလှုံခွင့်တောင်းခံလာကြောင်း ပုလဲ(ပအဖ)အဖွဲ့ တာဝန်ရှိသူက ပြောသည်။

စားနပ်ရိက္ခာအခက်အခဲနှင့် ဖိနှိပ်မှုများကြောင့် ပျူစောထီးရွာများမှ ရွာသူ၊ ရွာသားများ ခပ်စိတ်စိတ် ထွက်ပြေးလာရာ ယခုအကြိမ်မှာ အများဆုံးထွက်ပြေးလွတ်မြောက်လာခြင်းဖြစ်သည်။

"နို့စို့အရွယ်ကနေ အသက် (၈၀)လောက်အထိ ပါတယ်။ အထဲမှာ အခက်အခဲပေါင်းစုံနဲ့ရင်ဆိုင်နေရတော့ ရောက်အောင်ထွက်ခဲ့တဲ့အခြေအနေပါပဲ။"ဟု ပုလဲ(ပအဖ)အဖွဲ့ လူသားစာနာတာဝန်ခံက ပြောသည်။

ပုလဲ(ပအဖ)အဖွဲ့က အလင်းဝင်လာသူများအား စစ်ဆေးမေးမြန်းပြီး စစ်တပ်၊ပျူစောထီးများနှင့် ဆက်သွယ်သတင်းပေးခြင်း၊ သူလျှိုဒလန်ပြုလုပ်ခြင်း၊တော်လှန်ရေးအင်အားစုများကို ထိခိုက်နစ်နာစေမည့်အပြုအမူများ ပြုလုပ်ခြင်းများ လုံးဝမပြုလုပ်ရန် ခံဝန်ထိုးခိုင်းခဲ့သည်။

ထို့နောက် ထိုရွာသူရွာသားများအား ပုလဲပအဖအဖွဲ့က ထောက်ပံ့ငွေများနှင့် မိုးကာများ ပေးအပ်ခဲ့သည်။

ဖေဖော်ဝါရီ ၁၄ ရက်ကလည်း ဇီးဖြူကုန်း‌ပျူစောထီးရွာနေ ရွာသူ၊ရွာသား ၆ ဦး ပုလဲ(ပအဖ)အဖွဲ့ထံ အလင်းဝင်လာခဲ့သည်။

အာဏာသိမ်းကာလအတွင်း ပုလဲမြို့နယ်တွင် ပျူစောထီးအားကောင်းရာ အင်မထီးရွာနှင့် ဇီးဖြူကုန်းရွာတို့မှ စုစုပေါင်း ရွာသူ၊ရွာသား ၈၀ ကျော် ပုလဲမြို့နယ်ပြည်သူ့အုပ်ချုပ်ရေးအဖွဲ့ထံ အလင်းဝင်လာခဲ့ကြောင်း သတင်းရရှိသည်။

အလင်းဝင်ခိုလှုံလာသော ပျူစောထီးရွာများမှဒေသခံများအား တွေ့ရစဥ်။ ဓာတ်ပုံ - ပုလဲ(ပအဖ)

စစ်ကိုင်းနဲ့ တနင်္သာရီတိုင်းမှာ စစ်အာဏာရှင်ဆန့်ကျင်ရေး လှုပ်ရှားမှုတွေ ပြုလုပ်

သုည/People's Spring

စစ်ကိုင်းနဲ့ တနင်္သာရီတိုင်းမှာ သပိတ်အဖွဲ့တွေ၊ ဒေသခံပြည်သူတွေက စစ်အာဏာရှင်ဆန့်ကျင်ရေးသပိတ်တွေ ဒီနေ့ (ဖေဖော်ဝါရီ ၁၈) အသီးသီး ချီတက်ဆန္ဒပြခဲ့ပါတယ်။

စစ်ကိုင်းတိုင်း ယင်းမာပင်မြို့နယ်မှာ အောင်လံလွှင့်မည်ဒေါင်းသွေးနီ သပိတ်စစ်ကြောင်းက ဦးဆောင်၍ ဒေသခံပြည်သူတွေနဲ့ ပူးပေါင်းကာ စစ်အာဏာရှင်ဆန့်ကျင်ရေး ညသပိတ် ဆင်နွှဲခဲ့ပါတယ်။

ယင်းမာပင်မြို့နယ်မြောက်ခြမ်း ကျေးရွာတစ်ရွာရှိ စာသင်ကျောင်းတစ်ကျောင်းမှာလည်း ရွာပေါင်းစုံ သပိတ်ကော်မတီက ဦးဆောင်ကာ စစ်အာဏာရှင် ဆန့်ကျင်ရေး လူထုနိုင်ငံရေးတရား ဟောပြောပွဲ ပြုလုပ်ခဲ့ပါတယ်။

ပုလဲမြို့နယ် ကျေးရွာတစ်ရွာမှာလည်း လူထုသပိတ်ဦးဆောင်ကော်မတီက ဒေသခံပြည်သူတွေကို The Way အပါအဝင် တော်လှန်ရုပ်ရှင်တွေ ပြသခဲ့ပြီး လူထုနိုင်ငံရေးတရား ဟောပြောပွဲခြင်းကိုလည်း ပြုလုပ်ခဲ့ပါတယ်။

တနင်္သာရီမြို့နယ်မှာလည်း ကျောင်းသားများသမဂ္ဂ (ဗကသများအဖွဲ့ချုပ်)က ဒေသတွင်းလူထုအား ဖက်ဆစ်တပ်ရဲ့ လေကြောင်းတိုက်ခိုက်မှု အန္တရာယ် ကာကွယ်ခြင်း နည်းလမ်းတွေကို ဆွေးနွေးတင်ပြခဲ့ပြီး ပန်းဖလက်တွေ ဖြန့်ဝေကာ အသိပညာပေးလှုပ်ရှားမှုတစ်ရပ် လုပ်ဆောင်ခဲ့ပါတယ်။

ဓာတ်ပုံ - ရွာပေါင်းစုံသပိတ်၊ ဗကသများအဖွဲ့ချုပ်

▪︎အ​တွေးအမြင်​ဆောင်းပါး

"ချစ်ရဲဘော်များသို့ ပေးစာ"

-ရေဆန် (​​​ခေါ်) ပဒိုမန်းရှာလားဖန်း

ဒီစာမှာတော့ တော်လှန်ရေးခေါင်းဆောင်ကောင်း တစ်ယောက် ဖြစ်ဖို့ အခြေခံအားဖြင့် ဘာတွေ လိုအပ်ပါသလဲ၊ တော်လှန်ရေး ခေါင်းဆောင်ကောင်းတစ်ယောက်ကို ဘယ်ပေတံနဲ့ တိုင်းတာမလဲဆိုတဲ့ပြဿနာကို ဆွေးနွေးသုံးသပ်ကြည့်လိုပါတယ်။ ဘာ့ကြောင့်လဲဆိုရင် ကရင်လူ့အဖွဲ့အစည်းမှာ ခေါင်းဆောင်ကောင်းအများအပြားလိုနေလို့ပါပဲ။ အထူးသဖြင့်ကရင့်တော်လှန်ရေးကြီးအတွက် ခေါင်းဆောင်ကောင်းတွေ အထောင်အသောင်း လိုအပ်နေလို့ပါပဲ။

သာမန်ခေါင်းဆောင်ကောင်းတစ်ယောက် ဖြစ်ဖို့ဆိုတာ မလွယ်ဘူး။ တော်လှန်ရေး လှုပ်ရှားမှုတစ်ရပ်ကို ဦးဆောင်မှု ပေးနိုင်စွမ်းတဲ့ တော် လှန်ရေး ခေါင်းဆောင်ကောင်းတစ်ယောက်ဖြစ်ဖို့ဆိုတာ သာပြီးတောင် ခက်ခဲပါတယ်။ အထူးသဖြင့် အဆုံးအဖြတ်သဘောဆောင်တဲ့ သမိုင်း ကာလတစ်ခုမှာ တော်လှန်ရေးကို ဦးစီးခေါင်းဆောင်နိုင်စွမ်းရှိတဲ့ တော် လှန်ရေးခေါင်းဆောင်ကောင်း တစ်ယောက်ဖြစ်ဖို့ အခက်ခဲဆုံးပါပဲ။ တော်လှန်ရေးတစ်ရပ်မှာ ဒီလိုခေါင်းဆောင်မှုမျိုး ရရှိထားပြီဆိုရင် လည်း အလွန်တန်ဖိုး ရှိပါတယ်။ များသောအားဖြင့် လူတွေဟာ တန်ဖိုး ကြီးမားလှတဲ့ တော်လှန်ရေး ခေါင်းဆောင်ကောင်းတစ်ယောက်ကို လက်လွတ် ဆုံးရှုံးသွားပြီး နောက်မှသာ ဒီခေါင်းဆောင်ကောင်းရဲ့တန်ဖိုး ကြီးမားမှုကို သိကြပါတယ်။

ကရင့်တော်လှန်ရေးခေါင်းဆောင်ကြီး စောဘဦးကြီးရဲ့ သမိုင်းဖြစ်စဉ်ကို သေသေချာချာ ကြည့်ရင် ဒီအချက်ကိုမြင်နိုင်တယ်။ ကျွန်တော်တို့ဟာတော်လှန်ရေးကြီး ရှည်ကြာလာလေလေ၊ တော်လှန်ရေး အခက်အခဲများနဲ့ ကြုံရလေလေ၊ စောဘဦးကြီးရဲ့ အခြေခံမူတွေ စောဘဦးကြီးရဲ့ဂုဏ်ကျေးဇူးတွေ တန်ဖိုးကြီးမားမှုတွေကို ပိုပြီး သိမြင် လာလေလေပါပဲ။ ပွင့်လင်းဖြောင့်မတ်ခြင်းနှင့် သစ္စာစောင့်သိမှုဟာ တော်လှန်ရေးသမား တစ်ယောက်၊ တော်လှန်ရေးခေါင်းဆောင်ကောင်းတစ်ယောက်ရဲ့ မုချရှိရမည့် အရည် အချင်းတွေပါပဲ။

သမိုင်းမှာတွေ့ရတဲ့ တော်လှန်ရေးခေါင်းဆောင်ကောင်းတွေဟာ ဒီ အရည် အချင်းမျိုး ကိုယ်စီရှိကြတယ်။ ဒီအခြေခံအရည်အချင်း မရှိဘူးဆိုရင် ဘယ်လောက်ပဲ ပညာတတ်တတ်၊ ဘယ်အကြောင်းကြောင့်ပဲ တော်လှန်ရေးခေါင်းဆောင်ဖြစ်နေနေ၊ တော်လှန်ရေးကို ဆုံးခန်းတိုင်ခေါင်းဆောင်နိုင်မှာ မဟုတ်ဘူး။ ပြည်သူအပေါ်၊ မိမိ အမျိုး သားများအပေါ်၊ မိမိ ရဲဘော်ရဲဘက်များအပေါ်၊ ပွင့်လင်းဖြောင့်မတ်ခြင်းနဲ့ သစ္စာရှိခြင်း တို့ဟာ တော်လှန်ရေးခေါင်းဆောင်ကောင်းတို့ရဲ့ ထူးခြားချက်နဲ့ ဂုဏ်အရည်အသွေး တို့ပဲ ဖြစ်တယ်။

ဒုတိယအချက်ကတော့ ကိုယ်ကျိုးစွန့်အနစ်နာခံခြင်း ပါပဲ။ ပဓာနမထားဘဲ ကိုယ်ကျိုးစွန့် အနစ်နာခံလေ့ရှိပါတယ်။ သူတို့ဟာ မိမိအမျိုးသားအကျိုး၊ မိမိပြည်သူ များရဲ့အကျိုး၊ မိမိတော်လှန်ရေးရဲ့အကျိုးကို ဦးထိပ်ပန်ဆင်လေ့ ရှိပါတယ်။ တော်လှန် ရေး အကျိုးနဲ့ ပတ်သက်လာရင် မိမိတို့ အသက်ကိုပင် စွန့်ရဲသူများဖြစ်ပါတယ်။

တတိယအချက်ကတော့ တော်လှန်ရေး ခေါင်းဆောင်ကောင်းတွေဟာ သူတို့ ရဲ့ ပြည်သူ၊ သူတို့ရဲ့အမျိုးသား၊ သူတို့ရဲ့ရဲဘော်ရဲဘက်တွေအပေါ်မှာ အထူးပင် ချစ်ခင် လေးစားကြတယ်။ တန်ဖိုးထားကြတယ်။ သူတို့ဘဝမှာ ပြည်သူသာအမိ၊ ပြည်သူသာ အဖဖြစ်တယ်။ တော်လှန်ရေးသာအမိ တော်လှန်ရေးသာအဖ ဖြစ်တယ်။ မိမိ ပြည်သူ၊ မိမိအမျိုးသား၊ မိမိတော်လှန်ရေးကို မွန်မြတ်စွာ အလုပ်အကျွေးပြုတတ်ကြတယ်။ ဒီ အချက်ကြောင့်လည်း သူတို့ရဲ့ဦးဆောင်မှုနောက်ကို ပြည်သူတွေ ရဲဘော်တွေက လိုက် ပါကြတာပါပဲ။

စတုတ္ထအချက်ကတော့ တက်တက်ကြွကြွ ဆည်းပူးလေ့လာခြင်းနှင့် တက် တက်ကြွကြွ အလုပ်လုပ်တတ်ခြင်းပါပဲ။ တော်လှန်ရေးကို လျှမ်းလျှမ်းတောက်ဦးဆောင် ပေးနိုင်သူများဟာ ကြားစရာတွေ၊ သင်စရာတွေ၊ မြင်စရာတွေဆီမှာပဲဖြစ်ဖြစ်၊ စာအုပ် စာပေများမှာဖြစ်ဖြစ်၊ လက်တွေ့အလုပ်ထဲမှာဖြစ်ဖြစ်၊ စိတ်ထားနှိမ့်နှိမ့်ချချနဲ့ လေ့လာ ဆည်းပူးလေ့ရှိကြတယ်။ ဝီရိယရှိစွာ လေ့လာဆည်းပူးလေ့ရှိပါတယ်။ လေ့လာရင်း လုပ်၊ လုပ်ရင်းလေ့လာလေ့ရှိတယ်။ အသက်ပါပါ လေ့လာဆည်းပူးလေ့ရှိပါတယ်။ တစ်နည်းအားဖြင့် သဘောတရားရေးနဲ့ လက်တွေ့ကို ပေါင်းစပ်လေ့ရှိတယ်။ အကန်း နဲ့ တူတဲ့ သဘောတရားရေးမပါတဲ့ လက်တွေ့သက်သက်မျိုး၊ အမြုံနဲ့တူတဲ့ လက်တွေ့ မပါတဲ့ သဘောတရားရေး သက်သက်မျိုးကို ဆန့်ကျင်လေ့ရှိတယ်။ ဒီလို အသက် ပါပါ ဆည်းပူးလေ့လာရင်း လက်တွေ့အသုံးချနိုင်ကြလို့ သူတို့ဟာ လက်တွေ့လုပ်ငန်း တာဝန်များကို အခြေအနေနဲ့အညီ ချမှတ်ကျင့်သုံးနိုင်ကြတယ်။ လေ့လာမှုကောင်းလို့ ဉာဏ်ပညာအရာမှာ၊ ဆင်ခြင်တုံတရားအရာမှာ ရန်သူထက် သာလွန်ကြပါတယ်။ တချို့ တော်လှန်ရေးခေါင်းဆောင်များဟာ ဒီလို ဉာဏ်ပညာကြီးမားကြလို့ သူတို့ရဲ့ရန်သူတွေ ကတောင် လေးစားချီးကျူးကြရတဲ့အထိ အလွန်ကြီးကျယ် ခန့်ညားသူတွေဖြစ်ကြ တယ်။

ပဉ္စမအချက်ကတော့ သူရသတ္တိနဲ့ ယုံကြည်စိတ်ရှိခြင်းပဲ။ တော်လှန်ရေး ခေါင်းဆောင်ကောင်းတွေဟာ အမှန်တရားနှင့် တရားမျှတမှုကိုလည်းကောင်း၊ မိမိ အမျိုးသားနှင့် မိမိပြည်သူတွေကိုလည်းကောင်း၊ မိမိကိုယ်ကိုယ်လည်းကောင်း၊ မိမိတော် လှန်ရေး လှုပ်ရှားမှုကိုလည်းကောင်း၊ ထူးထူးခြားခြား ယုံကြည်စိတ် ရှိကြတယ်။ ဒီလို ယုံကြည်စိတ်ကို အခြေပြုပြီး ထူးထူးခြားခြားကို သူရသတ္တိတွေရှိကြပါတယ်။ မိမိကိုယ်တိုင်ရဲ့ အမှားတွေ၊ ချို့ယွင်းမှုတွေ၊ ချို့တဲ့

အားနည်းချက်တွေကို တွေ့ရှိရရင် သတ္တိ ရှိရှိ ပြုပြင်ရဲကြသူတွေ ဖြစ်တယ်။ သူတို့ဟာ အမှန်တရားတွေ၊ ပြည်သူတွေ၊ မိမိ အမျိုးသား တော်လှန်ရေးတွေနဲ့ပတ်သက်လာရင် သူတို့ရဲ့ဦးခေါင်းတွေမှာ သွေးချင်းချင်းနီနေသည့် တိုင်အောင် ဘယ်သောခါမှ ဦးညွှတ်လေ့မရှိဘူး။ အထူးသဖြင့် တော်လှန်ရေးရဲ့ အခက် ခဲဆုံး၊ အကြမ်းတမ်းဆုံး ကာလများမှာ ပြည်သူတွေရဲ့ ရှေ့ဆုံးတန်းက မားမားမတ်မတ် ရပ်တည်ပြီး ဦးဆောင်မှုတာဝန်တွေကို မမှိတ်မသုန် ထမ်းဆောင်လေ့ရှိကြပါတယ်။

ဆဋ္ဌမ အချက်ကတော့ စည်းကမ်းနဲ့ စည်းစနစ်ရှိခြင်းပါပဲ။ ၁၉ ရာစုခေတ် အစကနေ ယနေ့အထိ နှစ်၂ဝဝ ခန့် အတွင်းမှာ ပေါ်ပေါက်ခဲ့တဲ့ အထူးချွန်ဆုံးသော တော်လှန်ရေးခေါင်းဆောင်များဟာ သူတို့ရဲ့နေထိုင်မှု၊ သူတို့ရဲ့လုပ်ငန်းလုပ်ဆောင်မှု တွေကိုကြည့်ရင် စည်းကမ်းနဲ့ စည်းစနစ်ကြီးသူများ ဖြစ်ကြပါတယ်။ သူတို့ရဲ့ နေထိုင် ဆောင်ရွက်ချက်တွေဟာ အမှုမဲ့ အမှတ်မဲ့ မဟုတ်ဘူး။ ပေါ့ပေါ့ပျက်ပျက် မဟုတ်ဘူး။ အပေါ်ယံကြော မဟုတ်ဘူး။ နေချင်သလိုနေ၊ ပြောချင်သလိုပြော၊ လုပ်ချင်သလိုလုပ် သူများဟာ တော်လှန်ရေးခေါင်းဆောင်ကောင်း ဖြစ်မလာနိုင်ဘူး။ မိမိချမှတ်တဲ့ လမ်းစဉ် အတိုင်းလုပ်မှ၊ စည်းကမ်းအတိုင်းလုပ်မှ၊ အများဆုံးဖြတ်ချက်အပေါ်လုပ်မှ၊ အများ တကာရဲ့ လေးစား ယုံကြည် အားကိုးမှုကို ခံရတဲ့ တော်လှန်ရေး ခေါင်းဆောင်ကောင်း တစ်ယောက် ဖြစ်လာနိုင်မှာ ဖြစ်တယ်။
သတ္တမအချက်ကတော့ တာဝန်ခံမှုပါပဲ။ တော်လှန်ရေးခေါင်းဆောင်ကောင်း တွေဟာ မိမိအဖွဲ့အစည်း မိမိပြည်သူ၊ မိမိအမျိုးသား၊ မိမိလမ်းစဉ်နှင့် လုပ်ငန်းစဉ်တွေ ကို တာဝန်ခံလေ့ရှိကြတယ်။ မိမိချို့ယွင်းချက်နဲ့ အားနည်းချက်တွေ အမှားတွေကို ရဲဝံ့စွာ တာဝန်ခံကြတယ်။ ဒီအမှားတွေ ချို့ယွင်းအားနည်းချက်တွေကို ရိုးရိုးသားသား ပြုပြင်တတ်ကြတယ်။
ရဲဘော်တို့...
သာမာန် အရပ်သားတစ်ယောက်ကနေ တော်လှန်ရေးသမားတစ်ယောက် ဖြစ်လာဖို့ဆိုတာ လွယ်ကူတဲ့ကိစ္စ မဟုတ်ဘူး။ တော်လှန်ရေးခေါင်းဆောင်ကောင်း တစ်ယောက် ဖြစ်လာဖို့ဆိုတာ သာလို့တောင် လွယ်ကူတဲ့ကိစ္စ မဟုတ်ဘူး။ ကြီးမားတဲ့ စွန့်လွှတ်မှုတွေ၊ ပေးဆပ်မှုတွေကို လုပ်ကြရတယ်။ လေ့လာမှုနဲ့ လက်တွေ့အတွေ့အကြုံ လိုတယ်။ သစ္စာရှိမှု၊ သတ္တိရှိမှု၊ စည်းစနစ်ရှိမှု၊ တာဝန်သိမှု၊ တာဝန်ခံမှုတွေ လိုတယ်။ ဒါတွေရှိမှ စမ်းသပ်စိန်ခေါ်မှုမျိုးစုံကို ခံနိုင်ရည်ရှိတဲ့ တော်လှန်ရေး ခေါင်းဆောင်တွေ ဖြစ်လာနိုင်တယ်။
ကရင်အမျိုးသားများဟာ လူမျိုးတစ်မျိုးအဖြစ် လုံခြုံစွာရပ်တည်နိုင်ဖို့ အခြား အမျိုးသားများနည်းတူ နိုင်ငံရေးအရ ကိုယ့်ကံကြမ္မာကိုယ်ဖန်တီးခွင့်ရှိဖို့ လိုအပ်တယ်။ ဒီအခွင့်အရေးကို ရရှိဖို့ရာ တော်လှန်ရေးဆိုတဲ့ ကာလတစ်ခုကို အခြားအမျိုးသားများ နည်းတူ မလွဲမသွေ ဖြတ်သန်းနေကြရတယ်။ သမိုင်းမှာ တော်လှန်ရေးဆိုတာကို မဖြတ်သန်းဘဲ ကိုယ့်ကံကြမ္မာကိုယ်ဖန်တီးခွင့်ကို လွယ်လွယ်ကူကူရခဲ့တဲ့ သာဓကမျိုး မရှိဘူး။ ကမ္ဘာကိုစိုးမိုးခဲ့ကြတဲ့ အင်္ဂလိပ်လူမျိုးတွေတောင် ၁၆ရာစုက Glorious Revolution ဆိုတဲ့ တော်လှန်ရေးကာလကို ဖြတ်သန်းခဲ့ရတယ်။ လောလောဆယ် ပြိုင်ဘက် မရှိ၊ တစ်ခုတည်း ကျန်ရှိနေတဲ့ ကမ္ဘာ့ဗိုလ် အမေရိကန်ပြည်ထောင်စုတောင် ၁၇၇၆ ခုနှစ်က အမေရိကန်တော်လှန်ရေး American Revolution ဆိုတာကို ဆင်နွှဲ ခဲ့ရတယ်။ UN ရဲ့လုံခြုံရေးကောင်စီ အမြဲတမ်းအဖွဲ့ဝင် ပြင်သစ်လည်း ၁၉ရာစု အတွင်း မှာ ပြင်သစ်တော်လှန်ရေးဆိုတာကို လုပ်ခဲ့ရတယ်။ အာရှ၊ အာဖရိကနှင့် လက်တင် အမေရိကတိုက်မှာရှိတဲ့ နိုင်ငံအားလုံးက လွတ်လပ်တဲ့နိုင်ငံများဟာ တော်လှန်ရေးကို လုပ်ခဲ့ကြ၊ လုပ်နေကြရပါတယ်။
တော်လှန်ရေးဆင်နွှဲကြရာမှာ၊ တော်လှန်ရေးဆိုတဲ့ ထူးခြားတဲ့သမိုင်းကာလ တစ်ခုကို ဖြတ်သန်းကြရာမှာ တော်လှန်ရေးခေါင်းဆောင်ကောင်းတွေ လိုအပ်ပါတယ်။ သူတို့ဟာစိတ်ဓာတ်အရ၊ တွေးခေါ်မှုအရ၊ နိုင်ငံရေးအရ၊ စည်းရုံးရေးအရ၊ အလံကိုင်တွေ ဖြစ်ကြတယ်။ ဆရာမြသန်းတင့်ရဲ့ စကားနဲ့ဆိုရင် သူတို့ဟာ ဓားတောင်တွေကို ကျော် ပြီး မီးပင်လယ်ကို တွေဝေခြင်း အလျှင်းမရှိ၊ ဖြတ်ရဲကြသူတွေ ဖြစ်တယ်။ တော်လှန်တဲ့ စာရေးဆရာကြီးဗန်းမော်တင်အောင်ရဲ့ စကားနဲ့ဆိုရင် သူတို့ဟာ မုန်တိုင်းထဲက လူတွေ ဖြစ်တယ်။ ကရင့်တော်လှန်ရေးခေါင်းဆောင်ကြီး စောဘဦးကြီးရဲ့ စကားနဲ့ဆိုရင် Surrender is out of Question သူတို့ရဲ့ခေါင်းထဲမှာ၊ အဘိဓမ္မာထဲမှာ လက်နက်ချ အညံ့ခံရေး ဆိုတဲ့စာလုံး လုံးဝ မရှိသူတွေ ဖြစ်တယ်။

❝
ရဲဘော်တို့ ...
တော်လှန်ရေး ခေါင်းဆောင်ကောင်းဆိုတာ ရေစုန်မှာ လှေကြုံ လိုက်ပါလာ တဲ့သူတွေ မဟုတ်။ ရေစီးကို ဆန်တက်ရဲကြတဲ့သူတွေသာ ဖြစ်တယ်။ တိုက်စစ်မှာ ရှေ့ဆုံးတန်းက နေတတ်ကြသလို ခံစစ်မှာလည်း သံမဏိကတုတ်ကြီးတွေ ဖြစ်တတ် ကြတယ်။ လက်ရှိ ကရင့်တော်လှန်ရေးရဲ့ ဂန္တ၀င်
တိုက်ပွဲကာလမှာ ကရင်ပြည်သူတွေ ရဲ့အကျိုးကို ကြည်ဖြူစွာထမ်းဆောင်ကြမည့် သံမဏိသူရဲကောင်း အထောင်အသောင်း လိုအပ်နေတယ်။ ကရင့်တော်လှန်ရေးသမိုင်းရဲ့လိုအပ်ချက်ကို ဘယ်ပုံဘယ်နည်း ဖြည့် ကြမလဲ။ ရဲဘော်တို့ လွတ်လွတ်လပ်လပ် ဆုံးဖြတ်ကြ။ အဖြေပေးကြ။

-ရေဆန်