ထိုင်းနယ်စပ် မြန်မာစစ်ရှောင်တွေကို ကူညီမယ့်
ယူရို ၁၅ သန်းတန် စီမံကိန်းကို EU စတင်

ဧပြီ-၂၃၊၂၀၂၆။People's Spring

ထိုင်းနိုင်ငံနဲ့ နယ်စပ်ဧရိယာတွေမှာ ခိုလှုံနေတဲ့ မြန်မာ ဒုက္ခသည်တွေနဲ့ စစ်ရှောင်ပြည်သူတွေကို ကူညီမယ့် ယူရို ၁၅ သန်းတန် စီမံကိန်း တစ်ခုကို
ဥရောပ သမဂ္ဂ (EU)က စတင် အကောင်အထည် ဖော်နေကြောင်း သိရပါတယ်။

Supporting Thailand’s Transition to Self-Reliance & Inclusionလို့ နာမည်ပေးထားတဲ့ ပရောဂျက်ကို EU သံအမတ်ကြီး လူဝီဆာ ရက်ဂါနဲ့အတူ ကုလသမဂ္ဂ ဒုက္ခသည်များဆိုင်ရာ အေ
ဂျင်စီ (UNHCR)၊ နိုင်ငံတကာ ကြက်ခြေနီ ကော်
မတီနဲ့ Expertise Franceတို့လို မိတ်ဖက် အဖွဲ့အစည်းတွေ ပူးပေါင်းပြီး ဧပြီ ၂၀ ရက်နေ့က ထိုင်းနိုင်ငံ ဘန်ကောက် မြို့တော်မှာ လက်မှတ်ရေးထိုးခဲ့ပါတယ်။

ယူရို ၁၅ သန်း၊ တစ်နည်းအားဖြင့် ထိုင်းဘတ်ငွေ သန်း ၅၇၀ ခန့် ၊အ​မေရီကန်​ဒေါ်လာနဲ့ဆို ​ဒေါ်လာ ၁၇ သန်းသန်းခွဲ​ကျော် တန်ဖိုးရှိတဲ့ ပရောဂျက်ဟာ ထိုင်းနိုင်ငံရဲ့ နယ်စပ်ပြည်နယ်တွေဖြစ်တဲ့ မယ်ဟောင်ဆောင်၊ တက်ခ်၊ ကန်ချနာဘူရီ၊ ရတ်ချာဘူရီတို့မှာ ရှိနေတဲ့ မြန်မာ ဒုက္ခသည်စခန်း ၉ ခုကို ထောက်ပံ့ကူညီဖို့ ရည်ရွယ်ထားပါတယ်။ ဒါ့အပြင် တက်ခ်ပြည်နယ်ထဲမှာ ရောက်နေတဲ့ တခြားစစ်ရှောင်တွေကိုလည်း ကူညီပေးဖို့ စီစဉ်ထားကြောင်း ဥရောပပြင်ပကူညီရေးဌာန (EEAS)ကဆိုပါတယ်။

ဒီစီမံကိန်းရဲ့ ၂၀၂၆ ခုနှစ်အတွက် လျာထား ဘတ်ဂျတ်ကို ယူရို ၁၂ သန်းကနေ ၁၅ သန်းဆီ တိုးမြှင့်ခဲ့တာ ဖြစ်တယ်လို့လည်း ထိုင်းနိုင်ငံခြားရေး ဝန်
ကြီးဌာနရဲ့ နိုင်ငံတကာ ပူးပေါင်းဆောင်ရွက်ရေး ထိပ်တန်း သံအရာရှိ တစ်ဦးဖြစ်သူ ပင်ဆူဒါ ဂျာယန်နာမာက ပြောကြားခဲ့ပါတယ်။

EUက ထောက်ပံ့ပေးမယ့် ငွေကြေးတွေထဲက ယူရို ၁၀.၅ သန်းဟာနိုင်ငံတကာကယ်ဆယ်ရေး ကော်မ
တီ (IRC)ရဲ့ ကွပ်ကဲမှု အောက်ကို ရောက်ရှိမှာဖြစ်ပြီး ဒုက္ခသည် စခန်းတွေမှာ နေထိုင်တဲ့ မိသားစုတွေ အလုပ်အကိုင် ရရှိစေရေးလို အခွင့်အလမ်းတွေ ဖန်တီးပေးဖို့ ရည်ရွယ်ထားပါတယ်။ ပြီးတော့ Save the Childrenနဲ့ တခြားထောက်ပံ့ရေးအဖွဲ့အစည်းတွေနဲ့လည်း ပူးပေါင်း ဆောင်ရွက်မှာပါ။

ယူရို ၂ သန်းကတော့တက်ခ်ပြည်နယ်ထဲက ကျန်း
မာရေး စောင့်ရှောက်မှု ပရောဂျက်တွေအတွက် လျာထားပြီး Expertise Franceနဲ့ တခြားအဖွဲ့အစည်းတွေက အဓိက တာဝန်ယူပါမယ်။ယူရို ၂.၅ သန်းကတော့ UNHCRရဲ့ ကွပ်ကဲမှု အောက်ကနေ ကလေးသူငယ် စောင့်ရှောက်ရေးနဲ့ တခြား အကူ
အညီပေးရေး အစီအစဉ်တွေအတွက် အသုံးပြုမှာ ဖြစ်ပါတယ်။

ထိုင်းဟာ နယ်စပ်ဒုက္ခသည် စခန်းတွေမှာ မြန်မာဒုက္ခသည်ပေါင်း ၈၀,၀၀၀ ကျော်ကို ကာလရှည်
ကြာ လက်ခံပေးထားပါတယ်။

ကိုးကား-Brussels Times

ထိုင်း-မြန်မာ နယ်စပ်တစ်​နေရာက မြန်မာစစ်​ဘေး​ရှောင်ပြည်သူ​တွေရဲ့စခန်း ၁ ခုကို ၂၀၂၃ ခုနှစ်မှာ​တွေ့ရစဥ်။ဓါတ်ပုံ-The Guardian

လက်ပံတန်းမှာ စစ်တပ်လေကြောင်းဗုံးကြဲမှုကြောင့် ဒေသခံ ၄ ဦးသေဆုံး၊ ၆ ဦးဒဏ်ရာရ

ဧပြီ-၂၃၊ ၂၀၂၆။ ဒလပန်း/People's Spring

ပဲခူးတိုင်း၊ လက်ပံတန်းမြို့နယ်မှာ စစ်တပ်က လေကြောင်းကနေ ဗုံးကြဲတိုက်ခိုက်ခဲ့တာကြောင့် ဒေသခံ ၄ဦး သေဆုံးခဲ့တယ်လို့ ဒေသခံတွေက ပြောပါတယ်။

ဧပြီ ၂၂ ရက် မနေ့ မနက် ၁၁ နာရီခွဲအချိန်မှာ စစ်တပ်က လက်ပံတန်းမြို့နယ်၊ ဝါးရုံပင်ဇင်းအုပ်စု၊ သဲကောဆည်အနီး၊ ဝန်ကလေး(ဆားချောင်း)ရွာအတွင်းကို ဂျက်ဖိုက်တာ နှစ်စီးနဲ့ ဗုံးသီး(၁၀)လုံးထက်မနည်း ကြဲချတိုက်ခိုက်ခဲ့တာလို့ ဆိုပါတယ်။

"ထိခိုက်သေဆုံးခဲ့တဲ့သူတွေက ငါးရှာ ထင်းရှာလုပ်တဲ့ ပြည်သူတွေပါ"လို့ လက်ပံတန်းမြို့နယ် ပ ကဖ အထူးတိုက်ခိုက်ရေးတပ်ဖွဲ့ တာဝန်ရှိသူတစ်ဦးက ပြောပါတယ်။

စစ်တပ်ရဲ့ ဗုံးကြဲတိုက်ခိုက်မှုကြောင့် အသက် ၁၅နှစ်၊ ၁၆နှစ်၊ ၁၉နှစ်နဲ့ အသက် ၂၀ အရွယ် အမျိုးသား ၄ ဦး သေဆုံးခဲ့ကြောင်း လက်ပံတန်းမြို့နယ်၊ ပြည်သူ့ကာကွယ်ရေးအဖွဲ့က ထုတ်ပြန်ထားပါတယ်။

စစ်တပ်ဗုံးကြဲတိုက်ခိုက်မှုကြောင့် နေအိမ်သုံးလုံး ပျက်စီးခဲ့တဲ့အပြင် ထိခိုက်ဒဏ်ရာရရှိသူ (၆)ဥ်ီးရှိခဲ့ပြီး အဲ့ဒီထဲက အမျိုးသားတစ်ဦးနဲ့ အမျိုးသမီးတစ်ဦးတို့ စိုးရိမ်ဒဏ်ရာ ရခဲ့တယ်လို့ ဖော်ပြပါတယ်။ ကျန် ဒဏ်ရာရသူ ၄ဦးမှာ ကလေး(၂)ဦး၊ နဲ့ လူကြီး(၂)ဦးတို့ ဖြစ်တယ်လို ဆိုပါတယ်။

စစ်တပ်လေကြောင်းတိုက်ခိုက်ခဲ့တဲ့ ဒေသဟာ တိုက်ပွဲဖြစ်ပွားတာမရှိတဲ့အပြင် တော်လှန်ရေးအင်အားစုတွေ နေထိုင်တာမျိုးလည်းမရှိဘူးလို့ ဒေသခံတွေဆီက သိရပါတယ်။

စစ်တပ်က ပြည်သူတွေကို ပစ်မှတ်ထားပြီး လေကြောင်းတိုက်ခိုက်နေတာကြောင့် ပြည်သူတွေအနေနဲ့ လေကြောင်းအန္တရာယ် အထူးဂရုပြု သတိထားကြဖို့ တော်လှန်ရေးအဖွဲ့တွေက အသိပေးထားပါတယ်။

နေပြည်တော်က စစ်တပ်ခြေမြန်တပ်ရင်းရဲ့ စခန်းကို တော်လှန်ရေးတပ်တွေ သိမ်းပိုက်

◾️ခမရ(၄၁၁)တပ်ရင်းက ဗိုလ်မှူးထွန်းထွန်းလင်းအပါအဝင် ၁၀ဦးထက်မနည်းသေဆုံးပြီး ဒုဗိုလ်မှူးကြီးသန်းညိမ်း ထွက်ပြေးသွား၊ လက်နက်အချို့ သိမ်းရ

ဧပြီ-၂၃၊၂၀၂၆။မိုမို/People's Spring

စစ်ကောင်စီရဲ့ နေပြည်တော်ကောင်စီနယ်မြေအတွင်းက မက်စ်ဘိလပ်မြေစက်ရုံ(Max Cement)အနီးမှာ တပ်စွဲထားတဲ့ အမှတ်(၄၁၁)ခြေမြန်တပ်ရင်း(ခမရ-၄၁၁)ရဲ့ ပူးပေါင်းတပ်စခန်းကို တော်လှန်ရေးတပ်တွေက တိုက်ခိုက်သိမ်းပိုက်လိုက်ပါတယ်။

မနေ့က(ဧပြီ ၂၂ ရက်) မနက် ၅နာရီက နေပြည်တော်အပြည်ပြည်ဆိုင်ရာလေဆိပ်နဲ့ (၁၈)မိုင်ဝန်းကျင် အကွာ လယ်ဝေးမြို့နယ်ရဲ့ အရှေ့တောင်ဘက်ခြမ်းမှာ ခမရ(၄၁၁)တပ်ရင်း တပ်စွဲထားတဲ့ အောင်ချမ်းသာရွာသစ်မှာ တပ်စွဲထားတဲ့ တပ်စခန်းကို ကရင်အမျိုးသားလွတ်မြောက်ရေးတပ်မတော်(KNLA)၊ကရင်အမျိုးသားကာကွယ်ရေးအဖွဲ့(KNDO)၊ ကရင်နီအမျိုးသားများကာကွယ်ရေးတပ်(KNDF)နဲ့ သံတောင်မြောက်ပိုင်းအထူးတပ် ပူးပေါင်းတပ်တွေက ဝင်ရောက်တိုက်ခိုက်သိမ်းပိုက်ခဲ့တာလို့ သိရပါတယ်။

"စစ်ကောင်စီတပ်ရဲ့ အထိုင်ချစခန်းတခုကို မနက်အစော ၅နာရီလောက်မှာ အလစ်အငိုက်ဝင်ရောက်တိုက်ခိုက်သိမ်းပိုက်တာဖြစ်ပါတယ်။KNDF တပ်ရင်း(၂၉) ပါတယ်။ မဟာမိတ်တပ်တွေနဲ့အတူပါ" လို့ ကရင်နီအမျိုးသားများကာကွယ်ရေးတပ်(KNDF)တာဝန်ရှိသူက လူထုနွေဦးကို ပြောပါတယ်။

အဲဒီစခန်းကနေ MA အမျိုးအစား ၄လက်ကို သိမ်းဆည်းရရှိပြီး တိုက်ပွဲအတွင်း ခမရ(၄၁၁)တပ်ရင်းက ဗိုလ်မှူး ထွန်းထွန်းလင်းအပါအဝင် ၁၀ဦးထက်မနည်းသေဆုံးပြီး ဒုဗိုလ်မှူးကြီးသန်းညိမ်းဟာ ထွက်ပြေးသွားတယ်လို့ သံတောင်မြောက်ပိုင်းအထူးတပ်က ပြောပါတယ်။

အဲဒီစခန်းကို ခမရ(၄၁၁)တပ်ရင်းနဲ့ ပူးပေါင်း အင်အား ၄၀ခန့်နဲ့ တပ်စွဲထားတာဖြစ်တယ်လို့ နေပြည်တော်အခြေစိုက်စစ်ရင်းသတင်းရင်းမြစ်က ပြောပါတယ်။

"နေပြည်တော်၊ပဲခူးနဲ့ ကရင်အစပ်မှာရှိတဲ့ စခန်းလို့ပဲ ပြောရမယ်။ဂိတ်ရော တပ်အထိုင်ချထားရော ရှိတယ်။ပြီးခဲ့တဲ့ ၂နှစ်လောက်ကတည်းက"လို့ သူက ပြောပါတယ်။

လက်ရှိမှာ စစ်တပ်က အင်အားဖြည့်ပြီး တန်ပြန်စစ်ကြောင်းထိုးနေတာကြောင့် တိုက်ပွဲ ဆက်ဖြစ်နိုင်တယ်လို့လည်း သံတောင်မြောက်ပိုင်းအထူးတပ်က ပြောပါတယ်။

" ခု ရေနီအရှေ့ဘက်ဗျူဟာလမ်းမကြီးအတက်ကို စစ်တပ်က ဆက်လက်လိုက်လာလို့ စစ်ရေးပိုမိုတင်းမာပြီးစစ်ဆိုင်နေပါတယ်"လို့ သံတောင်မြောက်ပိုင်းအထူးတပ်က ပြောပါတယ်။

ပြီးခဲ့တဲ့ အပတ်ကလည်း မက်စ်ဘိလပ်မြေစက်ရုံအနီးမှာ တိုက်ပွဲတွေ ဖြစ်ခဲ့ပါသေးတယ်။

ဖလမ်းမြို့အနီး ချင်းပူးပေါင်းတပ်နဲ့ စစ်တပ် တိုက်ပွဲပြင်းထန်

စစ်တပ်က မြို့အတွင်းဝင်နိုင်ဖို့ လေယာဉ်အလွန်အကျွံသုံးထိုးစစ်ဆင်နေပေမယ့် ခုခံနေဆဲဟု CNDFပြော

ဧပြီ ၂၃၊ ၂၀၂၆။ထားမြတ်/People’s Spring

ချင်းပြည်နယ်၊ ဖလမ်းမြို့အနီးဝန်းကျင်မှာ ချင်းတော်လှန်ရေးပူးပေါင်းတပ်နဲ့ စစ်တပ်တို့ ဒီကနေ့ ဧပြီ ၂၃ရက်မှာ တိုက်ပွဲပြင်းထန်နေတယ်လို့ ချင်းညီနောင်အဖွဲ့ဝင် ချင်းအမျိုးသားကာကွယ်ရေးတပ်(CNO/CNDF) ပြောရေးဆိုခွင့်ရှိသူ ဆလိုင်းတင်မီက ပြောပါတယ်။

စစ်တပ်က ချင်းညီနောင်နဲ့မဟာမိတ်တွေ သိမ်းပိုက်ထားတဲ့ ဖလမ်းမြို့ကို ပြန်ရဖို့ မြေပြင်နဲ့ လေကြောင်း တိုက်ခိုက်မှု အင်အားအလုံးအရင်းနဲ့ ပြုလုပ် ထိုးစစ်ဆင်နေတာ နှစ်ဝက်ကျော်ကြာမြင့်နေပြီဖြစ်ကာ လက်ရှိမှာတော့ ဖလမ်းမြို့နဲ့ အနီးဆုံးကျေးရွာ အထိရောက်ရှိနေတယ်လို့ ဆိုပါတယ်။

" မြို့ထဲတော့ မဝင်သေးဘူး။ Congheng ရွာနား ရောက်နေပြီ။ဗားရ်ကနေ တက်လာတဲ့ စစ်ကြောင်းက။ ဒီနေ့ကတော့ တကယ် လေယာဉ်လည်း လေကြောင်းလည်း အင်အားအလွန်အကျွံသုံးတယ်။ ဒီနေ့ မဝင်မဖြစ် ဝင်လို့ရအောင် ဆိုတဲ့ ပုံစံလုပ်ထားတဲ့ သဘောတော့ရှိပါတယ်။ ဒါပေမဲ့ မြို့ထဲတော့ ခုထိ ဝင်လို့မရသေးပါဘူး ခုခံနေဆဲပါ"လို့ ဆလိုင်းတင်မီက ပြောပါတယ်။

တိုက်ပွဲဟာမြို့နဲ့ နီးကပ်နေသလို စစ်ကောင်စီက ဒီကနေ့ မြို့ကို ဝင်နိုင်ဖို့ ရည်မှန်းထားပုံရတယ်လို့လည်း ပြောပါတယ်။

" ဗားရ်ကနေ တက်လာတဲ့ စစ်ကြောင်းက ဖလမ်းကနေ ဆင်းလို့ရှိရင် ပထမဆုံးတွေ့တဲ့ရွာကို ရောက်ပါပြီ။ ဆိုတော့ အနီးတော်တော်ကပ်ပြီလို့ ပြောလို့ရပါတယ်။ ဒါပေမဲ့ ကျနော်တို့ဘက်က တက်နိုင်သလောက် ခုခံနေဆဲ အခြေအနေမှာရှိပါတယ်။ လေကြောင်းတော့ ဒီနေ့ မြို့ထဲ ဝင်လို့ရအောင် တော်တော်လေး ပြင်းပြင်းထန်ထန် သုံးပါတယ်။ လေကြောင်းရော လက်နက်ကြီးရော အကုန်လုံးပေါ့။ သုံးနိုင်တဲ့ဟာ အကုန်လုံးသုံးတာပဲ။ တော်တော်လေးကို ပြင်းပြင်းထန်ထန် သူတို့ဘက်ကနေ သုံးပါတယ်”လို့ ဆလိုင်းတင်မီက ပြောပါတယ်။

ဒါ့အပြင် စစ်တပ်ဟာ ဖလမ်းမြို့နယ် ဆူရ်ဘုန်လေဆိပ်ကို သိမ်းနိုင်ဖို့လည်း ဦးတည်နေကြောင်း ပြောပါတယ်။

“စစ်ကြောင်းက လေဆိပ်ဘက်ကို တကြောင်းရယ် နောက်ပြီးတော့ မြို့ထဲကို တကြောင်းရယ် ပုံစံမျိုးနဲ့ လာပါတယ်။ အစကတည်းက စစ်ကြောင်းသုံးကြောင်းပေါ့။ ဘေးက နှစ်ခုရယ်နောက်ပြီးတော့ အလယ်ကနေ တခု အဲဒီလို ပုံစံမျိုးနဲ့လာပါတယ်” လို့ ဆလိုင်းတင်မီက ပြောပါတယ်။

အဲဒီလိုအင်အားအလုံးအရင်းထိုးစစ်ဆင်လာတဲ့ စစ်ကောင်စီတပ်ကို ချင်းညီနောင်ကာကွယ်ရေးတပ်တွေနဲ့အတူ ချင်းပြည်ကောင်စီ ကာကွယ်ရေးတပ်တွေလည်း အတူပူးပေါင်းခုခံတိုက်ခိုက်နေတာဖြစ်ပါတယ်။
အာဏာသိမ်းစစ်တပ်ဟာ သူတို့ ဆုံးရှုံးထားတဲ့ နယ်မြေတွေ ပြန်ရဖို့ကြိုးပမ်းရာမှာ ပြည်သူလူထု အသက်အိုးအိမ်တွေကိုကိုမရှောင် လေကြောင်း တိုက်ခိုက်မှုတွေ လုပ်ဆောင်နေတယ်လို့ ဖလမ်းတိုက်ပွဲမှာ စစ်ကောင်စီတပ်ကို ခုခံတိုက်ခိုက်နေတဲ့ ချင်းပြည်ကောင်စီ အဖွဲ့ဝင် ချင်းအမျိုးသားတပ်မတော်(CNF/CNA) ပြောရေးဆိုခွင့်ရှိသူ ဆလိုင်းထက်နီက ပြီးခဲ့တဲ့ရက်ပိုင်းမှာ ပြောပြထားပါတယ်။

“ဖလမ်းမြို့နယ် စစ်ရေး အခြေအနေက အခုက ခြောက်လ ကြာပြီပေါ့။ ၇လထဲတောင်ဝင်တော့မယ်။ အတက်နိုင်ဆုံး ခုခံကာကွယ်မှု လုပ်ခဲ့တယ်။..။ဒါပေမဲ့ သူတို့ရဲ့ အားသာချက်ကတော့ လေကြောင်း တော်တော်လေးအသုံးပြုတယ်။ လေကြောင်းက အသုံးပြုတဲ့ အခါ ပြည်သူကိုလည်း မရှောင် အိုးအိမ်ကိုလည်း မရှောင် အဲဒီလိုပဲ လုပ်နေတာ။ ကျနော်တို့က ပြည်သူ့အားနဲ့ တော်လှန်ရေးတိုက်ပွဲဝင်နေတာ။ ကျနော်တို့က ရတဲ့နည်းနဲ့ အတက်နိုင်ဆုံး ကျနော်တို့က ပြန်ပြီးတော့ ခုခံတွန်းလှန်ရုံပဲရှိပါတယ်” လို့ဆလိုင်းထက်နီက ပြောပါတယ်။

ဖလမ်းမြို့တိုက်ပွဲ ကာလအတွင်း ချင်းတော်လှန်ရေးပူးပေါင်းတပ်ရဲ့ တိုက်ခိုက်မှုကြောင့် စစ်ကောင်စီတပ်ဖွဲ့ဝင် သေဆုံးထိခိုက်သူစုစုပေါင်း ၅၀၀ကျော်ရှိနိုင်ကြောင်းလည်း ဆလိုင်းထက်နီက ခန့်မှန်းပါတယ်။ ဒါ့အပြင် ခုခံတိုက်ပွဲအတွင်း ချင်းတော်လှန်ရေးရဲဘော် ၅၀ ကျော်ကျဆုံးခဲ့ရသလို ဒဏ်ရာရသူတွေလည်းရှိခဲ့ပါတယ်။

ချင်းညီနောင်ကာကွယ်ရေးတပ်တွေဟာ ဖလမ်းမြို့ကို ၂၀၂၅ ဧပြီ ဒုတိယပတ်မှာ သိမ်းပိုက်နိုင်ခဲ့ရာ စစ်ကောင်စီက ၂၀၂၅ အောက်တိုဘာမှာ စစ်အင်အားအလုံးအရင်းနဲ့ ပြန်လည်ထိုးစစ်ဆင်ခဲ့တာဖြစ်ပါတယ်။

(ဖလမ်းမြို့သိမ်းတိုက်ပွဲအပြီးတွေ့ရတဲ့ တော်လှန်ရေးရဲဘော်တွေ။ ဓာတ်ပုံ - Chinworld)

တကောင်းမှာ စစ်တပ်စစ်​ကြောင်းကို PDF တွေ​​ကပြောက်ကျားဗျူဟာနဲ့တိုက်လို့စစ်သားသုံးဦးသေဆုံးပြီး စစ်သုံ့ပန်းအချို့ပါဖမ်းမိ

ဧပြီ-၂၃၊၂၀၂၆။ဇော်ရမ်း/People's Spring

တကောင်းမြို့ကိုပြန်ထိန်းချုပ်ထားတဲ့ စစ်တပ်
စစ်ကြောင်းတချို့ကို ပြည်သူ့ကာကွယ်ရေးတပ်ဖွဲ့တွေက ပြောက်ကျားစနစ်နဲ့တိုက်ခိုက်မှုအတွင်း စစ်တပ်ဘက်က သေဆုံးသူတွေရှိသလို သုံ့ပန်းအချို့ကိုလည်းဖမ်းမိထားတယ်လို့ မြေပြင်စစ်ရေးသတင်းရင်းမြစ်အချို့က ပြောပါတယ်။

တကောင်းမြို့ကို ပြီးခဲ့တဲ့မတ်လမှာ စစ်တပ်ကပြန်လည်ထိန်းချုပ်ခဲ့ပြီးတဲ့နောက် မြို့ထဲနဲ့ မြို့နယ်ပတ်ဝန်းကျင်မှာ စစ်တပ်စစ်ကြောင်းတွေတပ်စွဲထားတာပါ။

PDF ​တွေကဧပြီလ ၁၇ရက်နေ့မှာ စစ်သား​တွေကို​ပျောက်ကျားစစ်ဗျူဟာနဲ့ တိုက်ခိုက်မှုမှာ စစ်ကောင်စီတပ်ဖွဲ့ဝင်သုံးဦးသေဆုံးပြီး စစ်သားအချို့ကိုစစ်သုံ့ပန်းအဖြစ် ဖမ်းမိခဲ့တယ်လို့ PDFတဦးကပြောပါတယ်။

၁၀၂၇ စစ်ဆင်​ရေးနဲ့အတူ​​ဖော်​ဆောင်ခဲ့တဲ့ ရှမ်းမန်းစစ်ဆင်​ရေးမှာ ၂၀၂၄ သြဂုတ် ၁၁ ရက်မှာ သိမ်းပိုက်ခဲ့ပါတယ် ။စစ်တပ်က တရုတ်နဲ့ ရုရှားအကူအညီ စစ်မှုထမ်းဥပ​​ဒေ​ကြောင့် လူငယ်​တွေကို အဓမ္မစစ်သားသစ်စု​ဆောင်းပြီး ၂၀၂၅ ကစတန်ပြန်ထိုးစစ်ဆင်ခဲ့ရာမှာ တ​ကောင်းမြို့ကိုလည်း
ပြီးခဲ့တဲ့မတ်လမှာ ပြန်ထိန်းချုပ်နိုင်ခဲ့ပါတယ်။PDF ၊ပကဖ ​နဲ့​တော်လှန်​ရေးတပ်​တွေ တစ်နှစ်ခွဲ​ကျော်ထိန်းချုပ်ထားတဲ့ တ​ကောင်းမြို့ကိုပြန်လက်လွတ်ခဲ့ရပါတယ်။

PDFနဲ့မဟာမိတ်တွေက ဆုတ်ခွာခဲ့ချိန်မှာ စစ်တပ်စစ်ကြောင်းတွေက နေရာယူထားပါတယ်။အဲဒီစစ်​ကြောင်း​တွေကို PDF ​တွေက ပျောက်ကြားစစ်ဗျူဟာနဲ့ ပြန်လည်တိုက်ခိုက်​ခဲ့တာဖြစ်ပါတယ်။

"​ေးစစ်ကြောင်းနဲ့ PDF ထိပ်တိုက်တွေ့ပြီး ချတာ။လက်နက်တော့မရလိုက်ဘူး" လို့ တော်လှန်ရေး ရဲဘော်တစ်ဦးကပြောပါတယ်။

တကောင်းမြို့ပေါ်လက်ရှိအခြေအနေနဲ့ပတ်သက်လို့မြို့ခံတစ်ဦးက"မြို့ကိုတော့မမွှေသေးဘူး။ အ
လင်းဝင်အောင်မက်လုံးပေးပြီးစည်းရုံးနေတယ်။ ပြီးရင်တော့ လိုက်ဖမ်းလိမ့်မယ်။ တကောင်းကို သူတို့ ထိန်းထားပေမယ့် ပြောက်ကျားတိုက်ပွဲရှိနေတယ်။ သူတို့အပြည့်အဝ မထိန်းနိုင်သေးပါဘူး" လို့ မြို့ခံတစ်ဦးကပြောပါတယ်။

တကောင်းမြို့ဟာ မန္တလေးတိုင်းထဲမှာပါဝင်ပြီး စစ်ကိုင်းတိုင်းထဲကထီးချိုင့်မြို့နဲ့ဆက်စပ်နေပါတယ်။ထီးချိုင့်မြို့ဟာပြည်သူ့ကာကွယ်ရေးတပ်ဖွဲ့တွေထိန်းချုပ်ထားတဲ့အင်းတော်မြို့နဲ့ဆက်စပ်နေပါတယ်။စစ်တပ်စစ်ကြောင်းတွေကအင်းတော်မြို့ဘက်ကိုလည်း တပ်ဖြန့်ထားပြီး မြို့နယ်အတွင်းနဲ့အနီးပတ်ဝန်းကျင်နေရာတွေမှာ တိုက်ပွဲအချိန်မရွေးဖြစ်ပွားနိုင်တာကြောင့် သတိပြုကြဖို့ ဒေသခံတွေကို အင်းတော်မြို့နယ်ပြည်သူ့ကာကွယ်ရေးအဖွဲ့ကသတိပေးချက်ထုတ်ပြန််ထားပါတယ်။

၂၀၂၄ တ​ကောင်းမြို့သိမွးတိုက်ပွဲတိုက်ခဲ့စဥ်က
PDF ​တွေက PDF အလံ​တော်လွှင့်ထူစဥ်။
ဓါတ်ပုံ-PDF

ဝက်လက်က စာသင်ကျောင်းကို စစ်ကောင်စီက အသေခံဒရုန်းနဲ့ ဗုံးကြဲ၊ ကျောင်း‌သား၊ကျောင်းသူနဲ့ ဆရာမ ၁၀ဦးထက်မနည်း ဒဏ်ရာရ

ဧပြီ-၂၃၊၂၀၂၆။ဇော်ရမ်း/People's Spring

စစ်ကိုင်းတိုင်း၊ ဝက်လက်မြို့နယ်က မုဆိုးခြုံကျေးရွာ စာသင်ကျောင်းကို စစ်ကောင်စီက အသေခံဒရုန်းနဲ့ ဗုံးကြဲတိုက်ခိုက်လို့ ကျောင်း‌သား၊ကျောင်းသူတွေနဲ့ ဆရာမတွေ ၁၀ဦးထက်မနည်း ဒဏ်ရာရခဲ့ပါတယ်။

ဒီနေ့ ဧပြီ ၂၃ ရက် မနက် ၁၁နာရီခန့်မှာ အသေခံဒရုန်းနဲ့ ဗုံးကြဲတာလို့ ဒေသခံတစ်ဦးက ပြောပါတယ်။

ကျောင်းသား သုံးဦး၊ ကျောင်းသူခုနစ်ဦး၊ဆရာမ တစ်ဦးဒဏ်ရာရရှိခဲ့ပြီး သုံးဦးရဲ့အခြေအနေကစိုးရိမ်ရတယ်လို့ ဒေသခံသတင်းရင်းမြစ်က ပြောပါတယ်။။

" စာသင်ကျောင်းဟာ စစ်ရေးပစ်မှတ်မဟုတ်ပါဘူး ။စစ်ခေါင်းဆောင်မင်းအောင်လှိုင်ဟာ အရပ်သားအစိုးရပုံစံပြောင်းသွားပေမဲ့ ကျောင်းသားပြည်သူတွေကို နည်းလမ်းမျိုးစုံ ပုံစံမျိုးစုံနဲ့ ဖိနှိပ်နေတုန်းပါပဲ "လို့ အညာဒေသမှာစစ်ဘေးရှောင်တွေကိုအကူအညီပေးနေသူတစ်ဉီးက လူမှုကွန်ရက်မှာ ဖော်ပြထားပါတယ်။

စစ်ကောင်စီဟာ ယခုရက်ပိုင်းမှာ နေပြည်တော်နဲ့ရန်ကုန်တိုင်းကလွဲလို့ ကျန်တဲ့ဒေသတွေကို လေကြောင်းကနေဗုံးကြဲတိုက်ခိုက်မှုတွေ၊ ဒရုန်းအသုံးပြုဗုံးကြဲမှုတွေနဲ့ လက်နက်ကြီးပစ်ခတ်မှုတွေဆက်တိုက်လုပ်ဆောင်နေပါတယ်။