ချောင်းသာမှာ ‌ကလေးငယ်တဦး နဲ့ အမျိုးသမီး
တဦးသတ်ဖြတ်အလောင်းစွန့်ပစ်ခံရ

​မေ-၃၊၂၀၂၆။မိထက်/People's Spring

ဧရာဝတီတိုင်း၊ချောင်းသာကမ်းခြေဒေသမှာ ‌က
လေးငယ်တစ်ဦးနဲ့ အမျိုးသမီးတစ်ဦး သတ်ဖြတ်ခံရပြီးစွန့်ပစ်ထားတဲ့ရုပ်အလောင်းကိုဒေသခံတွေက တွေ့ရှိခဲ့ကြပါတယ်။

အသက်တစ်နှစ်အရွယ်ကလေးငယ်တစ်ဦးနဲ့ အသက်၂၀ကျော်အမျိုးသမီးတစ်ဦးရဲ့ ရုပ်အလောင်းကိုချောင်းသာ၊ ဆိပ်ကြီးကျေးရွာက
သစ်တောကြိုးဝိုင်းထဲမှာ ​ဒေသခံ​တွေကမေလ၂ရက်​နေ့မှာတွေ့ရှိခဲ့ကြတာဖြစ်ပါတယ်။

"ဓားနဲ့ထိုးပြီးသတ်ထားတဲ့အနေအထား မြင်ရတာ။ ဒေသခံတွေကစပြီးတွေ့လို့ သိရတာ။ သားအမိတွေလား ဘာလားတော့မသိဘူး။ တော်တော်လေးထူးဆန်းနေတယ်" လို့ ချောင်းသာကမ်းခြေမှာနေ
ထိုင်သူတစ်ဦးကပြောပါတယ်။

စစ်ကောင်စီတပ်နဲ့ရဲတပ်ဖွဲ့ဝင်တွေကရုပ်အလောင်းရှိရာနေရာကိုလာရောက်စစ်ဆေးခဲ့ပြီး ချောင်းသာဆေးရုံကိုပို့ဆောင်လိုက်တယ်လို့ သတင်းရရှိပါတယ်။ ဆိပ်ကြီးကျေးရွာနဲ့ သစ်တောကြိုးဝိုင်းပတ်ဝန်းကျင်က ဒေသခံတချို့ကို စစ်ဆေးနေပြီး ငါဦးထက်မနည်းကိုဖမ်းဆီးထားတယ်လို့လည်း သတင်းရရှိပါတယ်။

"အမှုကဘယ်လိုဖြစ်တယ်လို့မသိရသေးဘူး။ အဖမ်းခံရတဲ့သူတွေကတော့ သူတို့ကိုထောင်ချောက်ချဖမ်းဆီးပြီး စစ်မှုထမ်းထဲ ပို့မှာကိုကြောက်နေကြတယ်။လူငယ်တွေလည်းမနေရဲတော့ဘူးဖြစ်နေတယ်"လို့ဒေသခံတဦးကပြောပါတယ်။

စစ်တပ်အာဏာသိမ်းပြီးတဲ့နောက်ပိုင်း ဒေသအ
များစုမှာ တရားဥပဒေစိုးမိုးမှုကင်းမဲ့နေပြီး လူ
သတ်မှုတွေ၊ အလောင်းဖျောက်ဖျက်မှုတွေ၊ ဓားပြတိုက်လုယက်မှုတွေ မကြာခဏဖြစ်ပွားနေပါတယ်။ ပြီးခဲ့တဲ့လအနည်းငယ်ကလည်း ဧရာဝ
တီတိုင်း ရန်ကုန်-ဇလွန်လမ်းပိုင်းမှာ သေဆုံးနေတဲ့ ပိုင်ရှင်မဲ့ရုပ်အလောင်းတလောင်းတွေ့ရှိခဲ့ပါတယ်။

ဒါ့အပြင် ၂၀၂၅ ခုနှစ်ကလည်း ဖျာပုံမြို့နယ်ထဲမှာ အမျိုးသမီးနဲ့တစ်ဦးကိုသတ်ဖြတ်ပြီး ရုပ်အ
လောင်းဖျောက်ဖျက်မှု၊ ဟင်္သာတမြို့မှာ ဆရာဝန်လင်မယား သတ်ဖြတ်ခံရမှု၊ ပုသိမ်မြို့မှာကျောင်း
သားချင်းအုပ်စုဖွဲ့ရိုက်နှက်ပြီးလူသေဆုံးမှုတွေ ဖြစ်ပွားခဲ့ပါတယ်။

ချောင်းသာကမ်း​ခြေကို ၂၀၂၄ ​နွေရာသီက​တွေ့ရစဥ်။ ။ဓါတ်ပုံ-MOI

ဗန်းမော်ကိုစစ်ကူဖြည့်ဖို့စစ်တပ်ကရွှေကူမှာ အင်
အားထောင်ချီနဲ့ လှုပ်ရှားလာလို့ KIAနဲ့တိုက်ပွဲစဖြစ်

■KIA သိမ်းထားတဲ့မဘိမ်းမြို့ကို ထိုးစစ်ဆင်ဖို့ စစ်အင်အား ၂၀၀၀ ကျော်စုဖွဲ့ထားလို့ မကြာမီ တိုက်ပွဲပြင်းနိုင် စစ်ရေးသတင်းရင်းမြစ်ပြော

မေ-၃၊၂၀၂၆။ထားမြတ်/People’s Spring

ကချင်ပြည်နယ်၊ရွှေကူမြို့နယ်မှာစစ်တပ်က အင်
အား တစ်ထောင်ကျော်နဲ့ စစ်ရေးလှုပ်ရှားလာလို့ ကချင်လွတ်လပ်ရေးတပ်မတော်(KIA)နဲ့ မေလ ၂ရက်မှ စတင် တိုက်ပွဲဖြစ်ပွားနေကြောင်း ကချင်စစ်ရေးသတင်းရင်းမြစ်က ပြောပါတယ်။

“ကျွန်​တော်တို့နဲ့တိုက်ပွဲစဖြစ်နေပြီ။ မနေ့က တိုက်ပွဲ စဖြစ်နေပြီ။ သူတို့က တင့်ကားတွေနဲ့ပါ တက်လာတာဗျ။”လို့ စစ်ရေးသတင်းရင်းမြစ်က ရွှေကူဒေသမှာ KIAနဲ့ စစ်တပ် အကြားတိုက်ပွဲ စဖြစ်နေ
တာကို ​ပြောတယ်။

စစ်ကောင်စီဟာအင်အားထောင်ချီ စုဖွဲ့ပြီး KIAက မြို့သိမ်းစစ်ဆင်ရေး ဖော်ဆောင်နေတဲ့ဗန်းမောင်ကို စစ်အင်အားဖြည့်ဖို့ ကြိုးပမ်းနေတာလို့ သ
တင်းရကြောင်း သတင်းရင်းမြစ်က ပြောပါတယ်။

“ရွှေကူကနေတောင်ဘက်ငအိုးဆိုတာရှိတယ်။
ငအိုးရွာမှာ အခုရောက်နေတဲ့ စစ်ကြောင်း စစ်အင်
အား တစ်ထောင်ကျော်လောက်ရှိပြီ။ဒီကောင်တွေက အခု ရွှေကူဘက်ကိုစလှုပ်ရှားလာတယ်။ မနေ့က ရွှေကူဘက်တက်လာတာ။ ရွှေကူနဲ့ ငအိုးကြား
မှာ တိုက်ပွဲဖြစ်နေတာမနေ့ကနေ။ အခု သူတို့က
ငအိုးဘက်က တက်လာတဲ့ စစ်ကြောင်းအင်အား တထောင်ကျော်နဲ့ ရွှေကူမှာရှိနေတဲ့ စစ်ကြောင်းနဲ့ ပေါင်းပြီးမှ ဗန်းမော်ဘက် တက်လာမယ်လို့သ
တင်းရတယ်။ ဒီလမကုန်ခင် စင်းခန်းရအောင်လုပ်မယ်လို့ အဲဒီလို ကြားတာပဲ။”လို့ကချင်စစ်ရေးသ
တင်းရင်းမြစ်က ပြောပါတယ်။

ဒါကြောင့် ရှေ့ဆက် တိုက်ပွဲတွေ ပြင်းပြင်းထန်
ထန်ဖြစ်လာနိုင်တယ်လို့ သူကသုံးသပ်ပါတယ်။

“ရွှေကူကနေသူတို့ အထက်ကို ဆက်ပြီးတက်လာရင် တိုက်ပွဲက အကြီးအကျယ်ဖြစ်မှာ။ ရွှေကူမှာ ရှိတဲ့ တပ်တွေနဲ့ သူတို့ ပေါင်းရင် အင်အား ၂၀၀၀ ကျော်လောက်ရှိသွားမယ်။မင်းအောင်လှိုင်ကတော့ရက် ၁၀၀ အတွင်းလက်လွှတ်လိုက်ရတဲ့ နယ်မြေတွေအကုန်လုံးပြန်ရအောင်ယူဆိုပြီးမှ ညွှန်ကြားထားတယ်ဆိုတော့ သူတို့ကတော့ လုပ်မှာပဲ။ ထိုးမှာပဲ။” လို့ သတင်းရင်းမြစ်က ပြောပါတယ်။

KIA ဟာ ၂၀၂၄ ဒီဇင်ဘာမှာ ဗန်းမော်မြို့သိမ်း စစ်
ဆင်ရေးကို စတင်ခဲ့ရာ ၂၀၂၅ နှစ်ဆန်းပိုင်းမှာ စစ်ကောင်စီရဲ့ တပ်ရင်းဌာနချုပ်တွေအပါအဝင် စခန်း
နဲ့ တပ်စွဲရာ နေရာအများအပြားကို သိမ်းပိုက်ထားနိုင်ခဲ့ပြီး စကခ(၂၁) အပါအဝင် လက်ကျန်တပ်စခန်းတွေ သိမ်းပိုက်နိုင်ဖို့ ကြိုးပမ်းရာမှာ ကြန့်
ကြာနေတာဖြစ်ပါတယ်။ စစ်တပ်က လေကြောင်းအပြင်းအထန်ခုခံတာ ၊ လေကြောင်းကနေ စစ်အင်အားခဲယမ်းဖြည့်တင်းတာ၊ ရေကြောင်းမှ သင်္ဘောတွေနဲ့ စစ်အင်အားခဲယမ်းတွေ ဒရုန်းတွေ ဖြည့်တင်းတာကြောင့် မြို့သိမ်းတိုက်ပွဲ ကြန့်ကြာနေတာဖြစ်ပါတယ်။

ဒါအပြင် စစ်တပ်က KIA သိမ်းထားတဲ့ရှမ်းမြောက် မဘိမ်းမြို့ ပြန်ရဖို့လည်းစစ်ပြင်နေကြောင်းစစ်​ရေး
သတင်းရင်းမြစ်က ပြောပါတယ်။

“မိုးမိတ်မှာလည်း အခုရောက်နေတဲ့ စစ်အင်အားကနှစ်ထောင်ကျော်ပြီ။မိုးမိတ်ကို ရောက်နေတဲ့ မဘိမ်းကိုသိမ်းမယ်လို့ သတင်းကြားနေတယ်။ မ
ဘိမ်းဘက်မှာ ဒီအတောအတွင်း နှစ်ရက်သုံးရက်အတွင်းတိုက်ပွဲအကြီးအကျယ် ဖြစ်လာနိုင်တယ်။”
လို့ ကချင်စစ်ရေး သတင်းရင်းမြစ်က ပြောပါတယ်။

မိုးမိတ်ဟာ တအာင်းတပ်မတော်(TNLA)နဲ့မဟာမိတ်​တွေသိမ်းပိုက်ထားတဲ့မြို့ဖြစ်ပါတယ်။ တရုတ်အစိုးရ ကြားဝင်မှု ဖိအားပေးမှုကြောင့် စစ်ကောင်စီနဲ့ TNLA တို့ ၂၀၂၅ အောက်တိုဘာမှာ အပစ်ရပ်စဲရေးလုပ်ဆောင်ခဲ့ရာ မိုးကုတ်နဲ့ မိုးမိတ်ကို စစ်ကောင်စီထံ ပြန်လွှဲပေးခဲ့ရတာဖြစ်ပါတယ်။ အဲဒီလို လွှဲပေးခဲ့ပေမယ့် မိုးကုတ် မိုးမိတ်ဒေသတွေမှာ KIA၊ PDF တပ်တွေနဲ့ စစ်တပ်အကြား တိုက်ပွဲဖြစ်ခဲ့တာတွေရှိပါတယ်။

KIA အနေနဲ့ ၂၀၂၄ မတ်လကစတင်ခဲ့တဲ့ ထိုးစစ်မှာ စစ်ကောင်စီ တပ်ရင်းဌာနချုပ် အများအပြားနဲ့ မြို့တွေကို သိမ်းပိုက်ထားနိုင်ခဲ့တာဖြစ်ပါတယ်။ တပ်စခန်းရာချီ မြို့ပေါင်း ၁၀မြို့ကျော် ကို KIA
သိမ်းပိုက်ခဲ့တာဖြစ်ပြီး စစ်ကောင်စီအနေနဲ့ အခုအချိန်ထိ ပြန်လည်သိမ်းပိုက်နိုင်တဲ့ အခြေအနေမရှိသေးဘဲ ကချင်ဒေသ နေရာအများအပြားမှာ တိုက်ပွဲတွေ ဆက်လက်ဖြစ်ပွားတာ၊စစ်ရေးတင်း
မာတာတွေရှိနေပါတယ်။

ပြီးခဲ့တဲ့ ရက်ပိုင်း KIA သတင်းပြန်ကြားရေးဌာနရဲ့ ဖော်ပြချက်အရ KIA တပ်မဟာ နယ်မြေ ၁၁ခု ရှိတဲ့အနက် ထက်ဝက်ကျော်မှာ စစ်ကောင်စီက စစ်ရေးပြင်ဆင်လှုပ်ရှားလာလို့ စစ်ရေးတင်းမာနေကြောင်း အသိပေးထားပါတယ်။

ဗန်း​မော်မြို့သိမ်းတိုက်ပွဲမှာ ၂၀၂၅ ခုနှစ်အတွင်းမြင်​တွေ့ရတဲ့KIA နဲ့မဟာမိတ်တပ်ဖွဲ့ဝင်​တွေ။ ဓါတ်ပုံ-CJ

ဖားကန့် - ကာမိုင်းလမ်းပိုင်းမှာ အရပ်သားကားကိုစစ်တပ်က ထပ်မံပစ်ခတ်လို့ ၃ဦး ဒဏ်ရာရ

မေ-၃၊၂၀၂၆။ဇော်ရမ်း/People's Spring

စစ်တပ် စစ်ကြောင်းတွေရှိနေလို့ ကချင် လွတ်လပ်ရေးတပ်မတော် (KIA)က လုံခြုံရေးသတိပေးချက်နဲ့ ဖြတ်သန်းသွားလာခွင့်ပိတ်ထားတဲ့ ဖားကန့် - ကာမိုင်းလမ်းပိုင်းမှာ စစ်တပ်က အရပ်သားကားကို ထပ်မံပစ်ခတ်လို့ ၃ဦးဒဏ်ရာရခဲ့တယ်လို့ ဒေသခံတွေက ပြောပါတယ်။

ကချင်ပြည်နယ်၊ ဖားကန့်ဒေသက တံတားညီနောင်ဂိတ်နဲ့ ပျားအုံကျေးရွာကြားမှာ မနေ့ကမေလ၂ရက် နေ့လည်ပိုင်းမှာ အရပ်သားကားတစ်စီး ပစ်ခတ်ခံရတာဖြစ်ပါတယ်။

"အဲဒီနေရာမှာ လောလောဆယ်တိုက်ပွဲဖြစ်မနေဘူး။ စစ်တပ်စစ်ကြောင်းတွေက လမ်းနဲ့အနီးဆုံးမှာရှိနေတယ်။ ပစ်တာကလည်းစစ်တပ်ဘက်ကလှမ်းပစ်ဖြစ်တာ။ ဗုံးသီးနဲ့ ပစ်တာ။ ဒါကိုဒေသခံတွေကောင်းကောင်းသိတယ်"လို့ အဲဒီလမ်းပိုင်းကိုဖြတ်သန်းခဲ့သူတစ်ဦးက ပြောပါတယ်။

အဲဒီဖြစ်စဉ်မှာ အမျိုးသား နှစ်ဦး၊ အမျိုးသမီးတစ်ဦး ဒဏ်ရာရရှိခဲ့ပြီး လက်ရှိမှာ ဆေးကုသမှုခံယူနေကြရပါတယ်။

စစ်တပ်အင်အားဖြည့်တင်းနေတဲ့ ဖားကန့်- ကာမိုင်းလမ်းပိုင်းကိုလည်း ဧပြီ ၂၂ရက်ကစပြီး ယာယီပိတ်ထားမယ်လို့ KIAက သတင်းထုတ် ပြန်ထားပါတယ်။

ယခုဖြစ်စဉ်ဟာ ကာမိုင်း-ဖားကန့်လမ်းပိုင်းမှာ အရပ်သားကားထိခိုက်မှု နှစ်ကြိမ်မြောက်ဖြစ်ပါတယ်။

ဧပြီ၂၄ရက်ကလည်း ဖားကန့်- ကာမိုင်းလမ်းပိုင်းမှာ ခရီးသွားကားတစီးကို စစ်တပ်က သေနတ်နဲ့ပစ်ခတ်လို့ အမျိုးသမီးတစ်ဦး သေဆုံးခဲ့ပါတယ်။

ဖားကန့်ဒေသမှာ ဧပြီလ၂ရက်ကစတင်ပြီး တိုက်ပွဲတွေဖြစ်တာပါ။

လုံးခင်းကျေးရွာအုပ်စုကို စစ်တပ်ကထိန်းချုပ်ထားပြီး အဲ့ဒီနေရာတွေကို KIA၊KPDFက ဒရုန်းနဲ့ ဗုံးကြဲတိုက်ခိုက်နေပါတယ်။

စစ်တပ်က လက်နက်ကြီးနဲ့ ပစ်ခတ်နေသလို မြေပြင်စစ်ကြောင်းတွေက အရပ်သားတွေကို ပစ်ခတ်သတ်ဖြတ်တာ၊ လုယက်တာတွေ လုပ်နေပါတယ်။

လုံးခင်းကျေးရွာအုပ်စုမှာ လတ်တလောစစ်ရေးအခြေအနေအရ လုံခြုံရေးစိတ်မချရတဲ့အတွက် လူမှုကယ်ဆယ်ရေးအသင်း‌အချို့က သွေး၊အောက်စီဂျင်နဲ့ အရေးပေါ်ကူညီမှုလမ်းကြောင်းတွေ ယာယီရပ်နားထားပါတယ်။

■ရသစာတမ်းငယ်

“အနမ်းရယ် တော်လှန်ရေးရယ် တော်လှန်ရေးသမားတယောက်ကိုမှ ချစ်ခဲ့မိတဲ့ မမနီရယ်”

■ လွန်းညီ

(၁)

အနမ်းဟာ နှစ် နှစ်ဆယ့်တသန်းရှိခဲ့ပြီလို့ သိပ္ပံ ပညာရှင်တွေ ဖော်ထုတ်ကြသတဲ့။ မောင်တို့ အနမ်းဟာ ဘယ်လောက်ကြာခဲ့ပြီလဲ မမနီ။ အခုတော့ လေးကျော့ပြန် အာဏာသိမ်းအပြီး ‌ခြောက်နှစ်ထဲရောက်ခဲ့ပါပြီ။ မောင့်ကို နမ်းမိတာ ရက်ပေါင်းတရာ့ငါးဆယ်သာသာပါ။ စပါးပင်တွေက ရေအသောက်ဆုံးသီးနှံဆိုရင် မေတ္တာတွေကို ငတ်မွတ်နေသူ လူသားတယောက်ဟာ မမနီရဲ့မောင် ပေါ့။ သဝန်တိုခြင်းတွေ မပေါ်ခင်က ဗာရာဏသီပြည်ကြီးလည်း မရှိသေးဘူးဆိုရင် ပန်းသီးတွေ မြေပေါ်ကြွေတာကိုလည်း ဂရုမစိုက်တတ်သေးဘူး။ တခါတလေ လူတွေဟာ ကိုယ်နဲ့မသက်ဆိုင်တဲ့ အရာတွေကြောင့် အလုပ်တွေ ထပ်ရှုပ်ကြရတယ်မလား။

( ၂ )

ရွှေတကျပ်သား သိန်းတရာပြည့်တော့မည်။ အဲ့ဒီသတင်းနဲ့ပတ်သက်လို့ ကျနော်တော့ စိတ်ညစ်စရာတွေ ထပ်မရှိခဲ့လို့ စိတ်ညစ်နေမိတယ်။ ရွှေဆိုင်တွေ လူကြိတ်ကြိတ်တိုးနေတဲ့ထဲ ကျနော်မပါဘူး။ ဘဏ်တွေရှေ့ ငွေထုတ်ဖို့တန်းစီနေတဲ့ လူအုပ်ကြီးထဲ ကျနော်မရှိဘူး။ ကျနော်တို့ လူ‌ငယ်တွေ လူအုပ်ကြီးရဲ့ရှေ့မှာ အလံအလက်တွေနဲ့ ရှိခဲ့ကြတာကို သတိရတယ်။ ကျနော့်မှာတော့ တခါတလေ အမှတ်တရတွေကို မှတ်မိနေတတ်ပါတယ် မမနီ။ ရွှေဈေးတွေ ဈေးကြီးလာတာ မဆိုင်သလိုနေနိုင်ခဲ့ပေမယ့် အရက်ဈေးတွေကြည့်ရင်း မသောက်ဘဲမူးရတဲ့ ခေါင်းတွေကို ရိုက်ခွဲပစ်ချင်တယ်။ စိတ်ညစ်လို့ အရက်သောက်ဖို့တောင် အရက်သောက်ဖို့ ငွေမရှိလို့ စိတ်ပြန်ညစ်ရတဲ့ အသက်နှစ်ဆယ်ကျော်အရွယ်တွေ များလာတယ်။

လမ်းပေါ်မှာ လမ်းပြင်ပြ‌ကြောင်း အသိပေးရင်း တောင်းရမ်းမှုတွေများလာတယ်။ ပြီးတော့ အသည်းကွဲနေတဲ့ အိမ်ထောင်သည်တွေလည်း များလာခဲ့တယ် မမနီ။ ဘာလို့လဲဟင်။ နွေးထွေးမှုလား၊ ငွေလား။ ခေတ်လား၊ စစ်လား၊ ချစ်မေတ္တာလား။ မပြည့်စုံခြင်းတရားဆိုပေမယ့် ဝေးကွာခြင်းတွေက နည်းလမ်းမမှန်ပါ။ မမနီရဲ့ကောင်လေးတယောက်ဟာ ဆိုရှယ်ဒီမိုကရက်တယောက်ပေါ့။ ဒါပေမယ့်လေ လေပေါ်မှာလွင့်နေတဲ့ တိမ်တွေကရော ကြည်လင်နေတဲ့ စားဝတ်နေရေးအတွက် ပြေလည်အောင် ဖန်တီးနိုင်ကြပြီလား။ မမျှတတဲ့ ကုန်သွယ်ရေးကြောင့် ကူးလူးဆက်ဆံမှုတွေ ခက်ခဲရသတဲ့။ မမနီရင်ခွင်ကို ပြန်လည်ခိုဝင်ဖို့ အချိန်တွေကို ‌စောင့်ဆိုင်းနေရတာ ပင်ပန်းလှပါတယ် ‌မမနီရယ်။

(၃)

မစင်ကို ဆေးအဖြစ် အသုံးပြုကြတဲ့သတင်း မမနီ ဖတ်လိုက်မိလား။ ဘဝမှာ အသုံးမဝင်တဲ့အရာဆိုလို့ အိမ်ပြန်လမ်းကိုလှမ်းဖို့ပြင်ဆင်နေတဲ့ မောင့်ရဲ့ခြေထောက်တွေပဲ ရှိလိမ့်မယ်။ ကားတစီးဟာ မိသားစုတခုကို တင်ပြီး မြစ်တစင်းပေါ်မှာပဲ မြို့တမြို့စာလောက် သယ်ဆောင်နေတဲ့ စက်လှေတွေရော စိတ်ပင်ပန်းနေမလား မမနီ။ စစ်နိုင်ရင် အားလုံးနိုင်မလား မသိပေမယ့် စစ်ရှုံးခဲ့ရင်တော့ အားလုံးဆုံးရှုံးရတာပဲ မဟုတ်လား။ မမနီနဲ့ကျနော်ကတော့ အသံတွေ တိမ်ဝင်တဲ့အထိ လေးနက်စွာ နမ်းမိတာပါပဲ။ အဲ့ဒီနောက်ထပ်ရက်ပိုင်းတခုရဲ့ ခရီးအသွားမှာ ဖြတ်သန်းမောင်းနှင်လို့ရခဲ့တဲ့ မြို့တမြို့လေ၊ အပြန်လမ်းမှာတော့ အဲ့ဒီမြို့ကို ကွေကွင်းခဲ့ရတာပေါ့။ မြို့ထဲကို ရန်သူတွေ ပြန်ရောက်နေပြီမို့လေ။ အို သိပ်ခက်ပါတယ် မမနီရယ်။ မချစ်သော်လည်း အောင့်ကာနမ်းနေမိပြီလား။

(၄)

လကွယ် ညတညက ကျနော်သဘောကျတဲ့ ပိုးစုန်းကြူးလေး တွေအကြောင်းပြောပြတာကို မမနီ သတိထားမိသလား။ ပိုးစုန်းကြူးလေးတွေကို မြင်တွေ့ရမှာက ကျနော်တို့ကနောက်ဆုံး မျိုးဆက်ဆိုရင် ဒီတော်လှန်ရေးကာလမှာ မမနီကို အချစ်ဆုံးတယောက်က ကျနော်ပဲ ဖြစ်မှာ။ တခါတလေ ရှုပ်ရှုပ်ထွေးထွေးလူတွေကြားထဲမှာပဲ အမှတ်မရှိ ချစ်မိသလိုမဖြစ်ပါနဲ့ မမနီ။ အကြွေးတောင်းတတ်တဲ့သူက အကြွေးပိုရသတဲ့။ သဘောထားကြီးသူကို အနိုင်ကျင့်ချင်ကြသူတွေ ဆက်ရှိနေဆဲ လူ့အဖွဲ့အစည်းမှာ လိုတာထက်ပိုပြောတတ်မှ အလုပ်ပိုဖြစ်မယ်လို့ ထင်နေတတ်တဲ့လူတွေလည်း ရှိနေတတ်တယ်။ ဟန်တွေ၊ အမူအရာတွေ၊ ရာထူး၊ ဂုဏ်ဒြပ်တွေက လွယ်ကူပါတယ်။ ရိုးသားခြင်းကို ရှာဖွေဖို့ ကျနော် လှေကား ဘယ်နှထစ် ဆင်းခဲ့ရမလဲ မမနီ။ ကျနော်ဟာ နိုင်ငံရေးအရ လူပျို ပြန်မဖြစ်နိုင်တော့ပါဘူး။ ကျနော်လိုချင်တာကတော့ "ငြိမ်းချမ်းရေးအတွက် တိုက်ပွဲရှိရမယ်"ဆိုသလိုပေါ့ "တိုက်ပွဲရယ်၊ ငြိမ်းချမ်းရေးရယ်၊ မမနီရယ်"။

(၅)

အတိုင်ပင်ခံကောင်စီ များစွာရှိတဲ့ တိုင်းပြည်မှာ စိတ်ညစ်စရာ ကိစ္စရှိတိုင်း မမနီကို တိုင်ပင်ချင်တယ်။ ချစ်ခင်ရသူတွေက စစ်ဘုရင်ဖြစ်လာမှာကို မမြင်ချင်ဘူး။ သုံးပွင့်ဆိုင်အချစ်ကြောင့် ဘုံဆိုင်လေးကို မေ့သွားကြပြန်တယ်။ အို သုံးပွင့်ဆိုင် စစ်ဆိုရင်တော့ အမြတ်ထွက်သူက ရန်သူ အရှုံးဟာ ပြည်သူပေါ့။ မမနီရယ် ကျနော်တို့ မှတ်ပုံတင်အစစ်တွေ ပြန်ကိုင်ရတဲ့အချိန် စေတီတွေ ကျန်ပါဦးမလား။

ဟင်္သာကိုးသောင်းပုံပြင်ကို ရုပ်ရှင်တွေ ရိုက်ကြတော့မယ်။ မြေအောက် ဆေးရုံ၊ မြေအောက်စာသင်ကျောင်း၊ မြေအောက် ဟိုတယ်၊ ရန်သူ့အန္တရာယ်နဲ့ သစ်ပင်အောက်မှာပဲ လွတ်လွတ်လပ်လပ် ချစ်လိုက်ချင်တယ်။ အို ဖြစ်ချင်တာတွေ ဖြစ်ပါစေတော့မမနီ။ အနမ်းရယ် တော်လှန်ရေးရယ် ပိုင်ဆိုင်ခဲ့တဲ့ တော်လှန်ရေးသမားတယောက်ကတော့ မမနီ ပြုံးရယ်နေတာပဲ ‌မြင်နေချင်တော့တယ်။ အခုလို လွမ်းဆွတ်ရာသီကို ကြေကွဲစွာ မကျော်လွန်မီပေါ့လေ။

-အညာဒေသတနေရာ
-၂၀၂၆နှစ်ဦးကာလ

ကိုးကားသတင်း-ဓါတ်ပုံများ

(The Call -ခေါ်သံ"အွန်လိုင်းမဂ္ဂဇင်းမှာ'လွန်းညီ'
ရေးဖွဲ့တဲ့ "“အနမ်းရယ် တော်လှန်ရေးရယ် တော်လှန်ရေးသမားတယောက်ကိုမှ ချစ်ခဲ့မိတဲ့
မမနီရယ်” ရသစာတမ်းငယ်ကို People's Spring ကပြန်လည်​ဖော်ပြ​ပေးတာဖြစ်ပါတယ်။အနုရသကဲပြီးတော်လှန်​ရေးအတွက်အ​ထောက်အကူပြုတဲ့ စာ​ပေကဏ္ဍမျိုးစုံကို "The Call - ​ခေါ်သံ" အွန်လိုင်းမဂ္ဂဇင်းရဲ့ ​Facebook Page ဖြစ်တဲ့ https://www.facebook.com/profile.php?id=100087677882749... မှာလည်းသွား​ရောက်ဖတ်ရှုနိုင်ပါတယ်)

ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံး လုံး၀လွတ်မြောက်တဲ့အထိ တောင်းဆို တိုက်ပွဲဝင်ပေးကြဖို့ NLD ထပ်မံတိုက်တွန်း

သမ္မတဦးဝင်းမြင့်ကို မိသားစုနဲ့တွေ့ဆုံစေတာ၊ ဒေါ်အောင်ဆန်းစုကြည်ကို နေရာရွှေ့ပြောင်းတာ တွေဟာ စစ်အုပ်စုရဲ့နိုင်ငံရေးလှည့်စားချက်ဟု ထုတ်ပြန်

မေ ၃၊ ၂၀၂၆။ ထားမြတ်/People’s Spring

နိုင်ငံတော်ရဲ့အတိုင်ပင်ခံပုဂ္ဂိုလ်၊ အမျိုးသားဒီမိုကရေစီအဖွဲ့ချုပ်(NLD) ဥက္ကဌ ဒေါ်အောင်ဆန်းစုကြည် အပါအဝင် နိုင်ငံရေးအကျဥ်းသားများလွတ်မြောက်စေဖို့တောင်းဆိုနေကြတဲ့ ပြည်တွင်း၊ပြည်ပ မြန်မာနိုင်ငံသားတွေကိုကျေးဇူးတင်ကြောင်း NLDက ဒီကနေ့ မေလ ၃ရက်မှာ ထုတ်ပြန်ခဲ့ပြီး လုံး၀ လွတ်မြောက်တဲ့အထိ တောင်းဆိုတိုက်ပွဲဝင်ပေးကြဖို့ထပ်မံ တိုက်တွန်းလိုက်ပါတယ်။

လူမှုကွန်ရက်တွေနဲ့မြေပြင်မှာ ဓါတ်ပုံ၊ ဗွီဒီယိုများ၊ အမှတ်တရစကား၊ မွေးနေ့ဆုတောင်းများ၊ အင်္ကျီပြာဝတ်လှုပ်ရှားမှုများ၊ သက်ရှိထင်ရှား ရှိနေကြောင်း သက်သေပြရန်လှုပ်ရှားမှုများ စတဲ့ ဆန္ဒပြု တောင်းဆိုနေမှုများကို NLDက အသိအမှတ်ပြု ကျေးဇူးတင်ကြောင်း ဖော်ပြကာ အခုလို တောင်းဆိုခဲ့တာပါ။

ဒေါ်အောင်ဆန်းစုကြည်အပါအဝင် နိုင်ငံရေးအကျဥ်းသားများလွတ်မြောက်စေဖို့ အစဥ်တစိုက် ထပ်ခါတလဲလဲ တောင်းဆို သတင်းထုတ်ပြန်ခဲ့ကြတဲ့ ကုလသမဂ္ဂ အထွေထွေ အတွင်းရေးမှူးချုပ်အပါအဝင် ကမ္ဘာ့နိုင်ငံများ ( ဗြိတိန် ၊ အမေရိကန် ပြည်ထောင်စု၊ ကနေဒါ ၊ နော်ဝေ၊ ဂျာမနီ အပါအဝင် ဥရောပသမဂ္ဂ အဖွဲ့ဝင်နိုင်ငံများအားလုံး ၊ သြစတေးလျ၊ နယူးဇီလန်၊ စင်္ကာပူ၊ ထိုင်း ၊ ဖိလစ်ပိုင်,အင်ဒိုနီးရှား၊ ဘရူနိုင်း၊အရှေ့တီမော အပါအဝင် အာဆီယံ အဖွဲ့ဝင်နိုင်ငံများ၊ နှင့် ဂျပန် ) ကို ကျေးဇူးတင်အသိအမှတ် ပြုကြောင်းလည်း ဖော်ပြထားပါတယ်။

ဒါ့အပြင် ဒေါ်အောင်ဆန်းစုကြည်ရဲ့ အခြေအနေများကို အစဥ်တစိုက်စောင့်ကြည့်လျှက်ရှိပြီးကာလရှည်ကြာ မိတ်ဆွေတဦးအဖြစ် ဖေါ်ပြပေးသော တရုတ်နိုင်ငံရဲ့ သဘောထားကို ကျေးဇူးတင်အသိအမှတ်ပြုဟု ထုတ်ပြန်ပါတယ်။

" နိုင်ငံရေးအကျဥ်းသားတစ်ဦး ရှိနေသည် ဆိုခြင်းက ပင် များလွန်းလှသည်” ဟု ဒေါ်အောင်ဆန်းစုကြည်က ၂၀၁၂ နိုဗယ်ဆုချီးမြှင့်ခြင်းအခမ်းအနားမှာ ပြောဆိုချက်ကို NLD ရဲ့ ထုတ်ပြန်ချက်မှာ ပြန်လည်ကိုးကားဖော်ပြထားပါတယ်။ လက်ရှိနိုင်ငံရေး ယုံကြည်ချက်နဲ့ ဒီမိုကရေစီ လိုလားမှုကြောင့် အကျဥ်းကျခံနေရသူ ထောင်ပေါင်းများစွာရှိနေဆဲဖြစ်တဲ့ မြန်မာနိုင်ငံဟာ စစ်မှန်လွတ်လပ်သော ဒီမိုကရေစီ အသွင်ကူးပြောင်းရေးကို ဦးတည်နေသည်ဟု ယူဆရန် ဝေးကွာလွန်းနေကြောင်း လည်း ထပ်မံဖော်ပြထားပါတယ်။

ဒါ့အပြင် လူထုရွေးကောက်တင်မြှောက်ထားတဲ့ နိုင်ငံတော်သမ္မတကြီး ဦးဝင်းမြင့်ကို ဧပြီ ၁၇ရက်မှာ မိသားစုနဲ့ ပြန်လည်ဆုံခွင့်ရစေတာ၊ ဒေါ်အောင်ဆန်းစုကြည် ကို လျှို့ဝှက်နေရာတွင် ဖမ်းဆီးထားရာမှ တည်နေရာမဖေါ်ပြ သော နေရာသို့ နေအိမ်အကျယ်ချုပ်အဖြစ် ပြောင်းရွှေ့ထားကြောင်း ဧပြီ ၃၀ရက်မှာ စစ်အုပ်စုဘက်က ကြေညာတာတွေဟာ နိုင်ငံရေးအရအပြုသဘောဆောင်သော လမ်းစသို့ ချဥ်းကပ်လာတာမဟုတ်ဘဲ လှည့်စားချက်သာဖြစ်ကြောင်းလည်း ထုတ်ပြန်ပါတယ်။

“မတရားဖမ်းဆီးခံ နိုင်ငံရေးအကျဥ်းသားများကို ထောင်ဒါဏ်လျှော့ပေါ့ ခြင်း၊ နေရာရွှေ့ပြောင်းပေးသည်ဟု သတင်းထုတ်ပြန်ခြင်းများ သည် အသွင်ကူးပြောင်းရေး၊ ပြန်လည်ကုစား နိုင် ရေး အတွက် လုံလောက်သောသက်သေပြချက်လုံးဝမဟုတ်သကဲ့သို့ ကုစားရေးနှင့် အသွင်ကူးပြောင်းရေး လုပ်ဆောင်လာမည်ဟု ယူဆနိုင်သော နိုင်ငံရေးလုပ်ငန်းစဥ်ခြေလှမ်းအဖြစ် မှတ်ယူနိုင်ရန် မလုံလောက်ပါ။” လို့ NLD ရဲ့ ထုတ်ပြန်ချက်မှာ ပါရှိပါတယ်။

စစ်ခေါင်းဆောင် မင်းအောင်လှိုင်ရဲ့ အတုအယောင်ရွေးကောက်ပွဲကတဆင့် နိုင်ငံရေးအရတရားဝင်မှု ရယူလိုတဲ့ ဟန်ပြလုပ်ရပ်တွေသာဖြစ်လို့ အာဆီယံအပါအဝင် နိုင်ငံတကာအသိုင်းအဝိုင်းအနေဖြင့် ဆောလျှင်စွာ ထိတွေ့ဆက်မှု့များပြုလုပ်ခြင်းဖြင့် မြန်မာနိုင်ငံကို ပိုမိုရှည်လျားသော နက်ရှိုင်းသည့်ပဋိပက္ခနွံတွင်းသို့ တွန်းပို့ခြင်း မပြုမိရန် ရှောင်ရှားသင့်ကြောင်း အကြံပြုထားပါတယ်။

ဒါ့အပြင် မြန်မာနိုင်ငံမှာ ဘက်စုံအကြပ်အတည်းများ ဆိုက်ရောက်နေသောကာလအတွင်း ရင်းနှီးမြှုပ်နှံမှုများ ပြုလုပ် ထားတဲ့၊ ပြုလုပ်ရန်ကြံစည်နေကြတဲ့ မိတ်ဆွေနိုင်ငံတွေ၊ အနေဖြင့် လွတ်လပ်ပြီး တရားမျှတတဲ့ ရွေးကောက်ပွဲတွေဟာ ပြည်သူလူထုရဲ့ ရွေးချယ်ခံအစိုးရတွေကသာ ပြည်ပရင်းနှီးမြှုပ်နှံမှုတွေကို ဥပဒေနဲ့ အညီ ပြည့်ဝစွာအကာအကွယ်ပေးနိုင်မည်ဖြစ်ပြီး ဘုံအကျိုးစီးပွားကိုဖြစ်ထွန်းစေရေး အာမခံချက် ရှိကြောင်း သတိပြုကြဖို့လည်း အကြံပြုထားပါတယ်။

(အမေရိကန်နိုင်ငံ၊ နယူးယောက်မြို့ Foley Square မှာ ပြည်ပရောက် မြန်မာတွေ စုပေါင်းပြီး နိုင်ငံတော်ရဲ့အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် နိုင်ငံရေးအကျဉ်းသားအားလုံး လွတ်မြောက်ရေးနဲ့ ဒေါ်အောင်ဆန်းစုကြည် သက်ရှိထင်ရှားရှိကြောင်း ခိုင်လုံတဲ့အထောက်အထားပြသဖို့ (Proof of Life) လှုပ်ရှားမှုကို ဒီကနေ့ (မေ ၃)မှာ ပြုလုပ်နေစဉ်။ ဓာတ်ပုံ - Kyaw Soe Latt)

ကဆုန်လပြည့်နေ့စစ်ကောင်စီလွတ်ငြိမ်း နိုင်ကျဥ်း ၈ဦးသာ လွတ်မြောက်

မေ-၃၊ ၂၀၂၆။ဟာနာဆန်/People's Spring

ကဆုန်လပြည့်နေ့က စစ်ကောင်စီရဲ့လွတ်ငြိမ်းမှာ နိုင်ငံရေးအကျဥ်းသား ၈ဦးသာ လွတ်မြောက်ခဲ့ကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)ရဲ့ ဦးဆောင်ကော်မတီဝင် မရောင်နီလင်းက ပြောပါတယ်။

စစ်ကောင်စီက ကဆုန်လပြည့်နေ့ လွတ်ငြိမ်းပေးရာမှာ အကျဥ်းသားပေါင်း ၁၅၀၈ ဦးလွှတ်မယ်လို့ ဆိုခဲ့ပေမဲ့ ကျိုက်မရောအကျဉ်းထောင်က အမျိုးသမီး နိုင်ငံရေးအကျဉ်းသူ ၁ဦး၊ ရွှေဘိုအကျဉ်းထောင်က အမျိုးသား နိုင်ငံရေးအကျဉ်းသား ၃ ဦး၊ အင်းစိန်ထောင်က နိုင်ကျဥ်း ၂ ဦးနဲ့ ဒါရိုက်တာ ၂ ဦး စုစုပေါင်း ၈ ဦးသာ လွတ်မြောက်ခဲ့တယ်လို့ PPNMရဲ့ ဦးဆောင်ကော်မတီဝင် မရောင်နီလင်းက ပြောပါတယ်။

"တစ်ရာခိုင်နှုန်းတောင် မရှိဘူး။ ဒီတခေါက်လွတ်ငြိမ်းဟာ လွတ်မြောက်လာတဲ့နိုင်ကျဥ်းတွေကလည်း လွတ်နီးနဲ့(လွတ်ရက်နီးလို့)လွတ်မြောက်လာကြတဲ့သူတွေပဲ ဖြစ်တယ်။ လွတ်နီးတွေကိုပဲ လွှတ်ပေးတဲ့သဘောဖြစ်တယ်။ ဒါကြောင့် ပြစ်မှုပြစ်ဒဏ်ရှိတဲ့ အကျဥ်းသားအကျဥ်းသူတွေကိုပဲ အဓိကလွှတ်ပေးတဲ့လွတ်​ငြိမ်းလို့ ပြောချင်ပါတယ်"လို့ ၎င်းက ပြောပါတယ်။

သာယာဝတီ၊ မြင်းခြံနဲ့ မုံရွာအစရှိတဲ့ အခြားအကျဉ်းထောင်အသီးသီးက နိုင်ငံရေးအကျဉ်းသားတွေမှာမူ လွတ်မြောက်လာခြင်း မရှိဘဲ ထောင်ပေါင်းများစွာသော နိုင်ငံရေးအကျဉ်းသားတွေဟာ အကျဉ်းထောင်တွေအတွင်း ဆက်လက် ဖမ်းဆီးထိန်းသိမ်းခံထားရဆဲ ဖြစ်ကြောင်း PPNMက အသိပေးပါတယ်။

စစ်ကောင်စီရဲ့ လွတ်ငြိမ်းခွင့်ဟာ မှန်ကန်မှုမရှိတာကို မီးမောင်းထိုးပြနေပြီး ပြည်သူလူထုရဲ့ အာရုံစိုက်မှုကို လွှဲပြောင်းဖို့နဲ့ နိုင်ငံရေးဖိအားတွေကို လျှော့ချဖို့အတွက် ရည်ရွယ်တဲ့ ဟန်ပြစာရင်းသာဖြစ်ကြောင်း၊ အမှန်တကယ် လွတ်မြောက်ဖို့ လိုအပ်နေသူတွေကတော့ သံတိုင်တွေနောက်မှာ ဆက်လက်ကျန်ရစ်နေဆဲဖြစ်ကြောင်း မြန်မာနိုင်ငံလုံးဆိုင်ရာနိုင်ငံရေးအကျဉ်းသားများကွန်ရက် (PPNM)က အသိပေးထားပါတယ်။

အာဏာသိမ်းစစ်တပ်ဟာ အင်းစိန်အကျဥ်းထောင်ကနေ အကျဉ်းသား၊သူ ၉၀၀ ကျော်ကို လွှတ်ပေးခဲ့ပြီးအဲဒီလွတ်လာသူ အများစုဟာ လောင်းကစားမှု၊ ခိုးမှု နဲ့ လွတ်ရက်စေ့တွေ များတယ်လို့ အင်းစိန်အကျဥ်းထောင်ရှေ့မှာ လာရောက်စောင့်ဆိုင်းနေသူတစ်ဦးက ပြောပါတယ်။

ပြီးခဲ့တဲ့ နှစ်ဆန်းတစ်ရက်နေ့ လွတ်ငြိမ်းတုန်းကလည်း အကျဥ်းသားပေါင်း လေးထောင်ကျော် လွှတ်မယ်လို့ ကြေညာထားပေမဲ့ လက်တွေ့မှာ ၁,၆၀၀ ကျော်သာ လွတ်မြောက်လာပြီး နိုင်ငံရေးအကျဥ်းသား ၂၈၀ ကျော်သာ ပါဝင်ခဲ့တယ်လို့ PPNMက သတင်းထုတ်ပြန်ခဲ့ပါတယ်။

အခုတစ်ကြိမ်လွတ်ငြိမ်းမှာ စစ်အာဏာသိမ်းမှုကိုဆန့်ကျင်တာတွေနဲ့ပတ်သက်ပြီး ဖမ်းဆီးအကျဉ်းချခံရတဲ့ နိုင်ကျဥ်းတွေမပါဝင်ဘဲ ရာဇဝတ်ပုဒ်မတွေနဲ့ ထောင်ချထားသူအများစုသာပါဝင်လာတာတွေ့ရပါတယ်။

နိုင်ငံတော်အတိုင်ပင်ခံပုဂ္ဂိုလ် ဒေါ်အောင်ဆန်းစုကြည်အပါအဝင် လက်ရှိအကျဉ်းထောင်အသီးသီးမှာ မတရားဖမ်းဆီးခံထားရတဲ့ အပြစ်မဲ့ပြည်သူအမြောက်အမြား ကျန်ရှိနေသေးပြီး စစ်တပ်က သူတို့ရဲ့ နိုင်ငံရေးအမြတ်ထုတ်မှုအတွက်သာ အကျဉ်းသားလွှတ်ပေးတယ်ဆိုပြီး ပုံဖော်နေတာလို့ တော်လှန်ရေးအင်အားစုတွေက ပြောပါတယ်။

(ကဆုန်လပြည့်နေ့က လွတ်ငြိမ်းပေးလို့ ရန်ကုန်မြို့အင်းစိန်အကျဉ်းထောင်ရှေ့မှာ စောင့်ဆိုင်းနေတဲ့ ပြည်သူတွေကို တွေ့ရစဉ်။ ဓာတ်ပုံ - PS)

NUG ဝန်ကြီးချုပ်မန်းဝင်းခိုင်သန်း၊ ဦးမင်းကိုနိုင်၊ ပြည်ထဲရေးဝန်ကြီး၊ကာကွယ်ရေးဒုဝန်ကြီးနဲ့ PDF တပ်မှူးအချို့ပဲခူးတိုင်းကမြို့ပေါ်တနေရာမှာ လမ်းလျှောက်ထွက်

မေ-၃၊ ၂၀၂၆။ထားမြတ်/People’s Spring

အမျိုးသားညီညွတ်ရေးအစိုးရ(NUG) ၊ပြည်
ထောင်စုဝန်ကြီးချုပ် မန်းဝင်းခိုင်သန်း၊ NUG ဝန်ကြီးအချို့၊ PDF တပ်မှူးအချို့နဲ့ ဦးမင်းကိုနိုင်တို့ဟာ တော်လှန်ရေးတပ်​တွေက စိုးမိုးထိန်းချုပ်ထားတဲ့​ဒေသမှာအတူ လမ်းလျှောက်ထွက်တဲ့ ရုပ်သံမှတ်တမ်းကို တော်လှန်ရေးသတင်းရင်းမြစ်အချို့က​ပေးပို့ပါတယ် ။

​နေရာ​ဒေသ နဲ့ အချိန်ကာလကိုဖော်ပြမထားပေမယ့် ဝန်ကြီးချုပ် မန်းဝင်းခိုင်သန်း၊ ဦးမင်းကိုနိုင် ပြည်ထဲရေးဝန်ကြီး ဦးလွင်ကိုလတ်၊ ကာကွယ်ရေးဒုဝန်ကြီးနိုင်ကောင်းရွက်၊ အမှတ်(၂) စစ်ဆင်ရေးနယ်မြေ စစ်ဆင်ရေးမှူး ရဲဘော်တင်ဦးနဲ့PDFတပ်မှူးအချို့ဟာ မြို့ပေါ် လူနေရပ်ကွက် အခုမှာ အရပ်ဝတ်တွေနဲ့ သက်တောင့်သက်သာ အနေအထားနဲ့ လမ်းလျှောက်နေကြတာ တွေ့ရပါတယ်။

မိနစ်ဝက်ခန့်သာရှိတဲ့ ရုပ်သံမှာ စစ်ဆင်ရေးမှူး ရဲဘော်တင်ဦးက အခု နေရာဟာ ပဲခူးတိုင်းအတွင်း စိုးမိုးထားတဲ့နေရာလို့ ပြောပါတယ်။

“ငါ့အကိုလည်းတောထဲမှာမဟုတ်တော့ဘူး။ ငါ့အကိုလည်း မြို့ပေါ်မှာ မြို့သားကြီး ပြန်ဖြစ်သွားပြီ”လို့ ရှေ့ဆုံးက နေကာမျက်မှန်နဲ့ လမ်းလျှောက်နေတဲ့ ဦးမင်းကိုနိုင်ကို ရဲဘော်တင်ဦးက စနောက်နေတာကိုလည်း ရုပ်သံမှာတွေ့ရပါတယ်။

စစ်အုပ်စုဘက်ကတော်လှန်ရေးခေါင်းဆောင်တွေကို နိုင်ငံခြားမှာနေထိုင်ကြသူတွေလို့ဝါဒဖြန့်တိုက်ခိုက်​​​လေ့ရှိကြပေမယ့် ခေါင်းဆောင်တွေ
ဟာ မြေပြင်မှာရှိနေတာကို တွေ့နေရတယ်လို့ ရုပ်သံပေးပို့တဲ့ သတင်းရင်းမြစ်က ပြောပါတယ်။

“မအလ ရက် ၁၀၀ လုပ်မနေနဲ့ ဒီမှာက ရပ်ကွက်တွေထဲ လျှောက်သွားပြီ။ နေပြည်တော်ရောက်တော့မယ်”လို့လည်းသတင်းရင်းမြစ်က တော်
လှန်ရေးခေါင်းဆောင်တွေ ရဲ့ မြေပြင်ကွင်းဆင်းနေတဲ့ အခြေအနေကို ပြောပါတယ်။

NUG ယာယမ္မတ ဒူဝါလရှီးလ၊ ဝန်ကြီးချုပ် မန်းဝင်းခိုင်သန်း၊ ကာကွယ်ရေး ဝန်ကြီး ဦးရည်မွန်၊ ပြည်ထဲရေးဝန်ကြီး၊ ပြည်ထောင်စုဝန်ကြီးချုပ်ရုံးဝန်ကြီး ဒေါက်တာဇော်ဝေစိုး တို့ အပါအဝင် ဝန်
ကြီး ဒုဝန်ကြီးတွေ မြေပြင်ကွင်းဆင်းတာ၊ တော်လှန်ရေးအင်အားစုတွေနဲ့ တွေ့ဆုံတာ၊ ရှေ့တန်းစခန်းတွေ သွားရောက်တာ၊ စစ်မြေပြင်ဒေသတွေ သွားရောက်တာ စတဲ့ မှတ်တမ်းတွေကိုလည်း ထုတ်ပြန်ခဲ့ဖူးပါတယ် ။

ရုပ်သံ-​YNLP

ရေးမြို့နယ်မှာ စစ်ကြောင်းထိုးလာတဲ့စစ်တပ်ကို တော်လှန်ရေးတပ်တွေစုပေါင်း တိုက်ခိုက်

မေ-၃၊၂၀၂၆။မိုမို/People's Spring

မွန်ပြည်နယ်၊ ရေးမြို့နယ်မှာ အင်အား၁၀၀ဝန်းကျင်ပါတဲ့ စစ်တပ်စစ်ကြောင်းကို ကြားဖြတ်တိုက်ခိုက်ခဲ့တယ်လို့ Ye Guerrilla Force-ရေးပြောက်ကျားတပ်က ဒီကနေ့ မေလ၃ရက် ညပိုင်းမှာ ထုတ်ပြန်ပါတယ်။

စစ်တပ်ရဲ့ ခြေမြန်တပ်ရင်း ခမရ(၅၈၈)၊ခြေလျင်တပ်ရင်း ခလရ(၁၀၆)နဲ့ အမြောက်တပ် (အမတ-၃၁၇)တပ်ရင်းတွေ စုပေါင်းပြီး ရေးမြို့နယ်မြောက်ပိုင်း စစ်ကြောင်းထိုးလာတာကြောင့် ဧပြီ ၂၈ရက်မှာ တိုက်ပွဲဖြစ်ခဲ့တယ်လို့ ဆိုပါတယ်။

စစ်တပ်စစ်ကြောင်းကို မွန်ပြည်တော်လှန်ရေးတပ်(MSRF)၊ရေးပြည်သူ့ကာကွယ်ရေးတပ်(YPDF)၊ရာမညမွန်တပ်တော်(RMA)၉၀၁တပ်ရင်း၊KNLA တပ်ရင်း၂၇ နဲ့ အတူ လက်ဦးမှုရယူပြီး အောင်သာယာကျေးရွာအနီးမှာ တိုက်ခိုက်ခဲ့တာလို့ အသိပေးပါတယ်။

၁၀မိနစ်ဝန်းကျင်သာကြာတဲ့ ထိတွေ့တိုက်ပွဲအတွင်း စစ်တပ်က လေးဦးသေဆုံးပြီး ၁၀ဦး ဝန်းကျင် ထိခိုက်ဒဏ်ရာ ရရှိခဲ့ပြီး ဆုတ်ခွာထွက်ပြေးသွားခဲ့တယ်လို့ ဖော်ပြပါတယ်။စစ်တပ်ရဲ့ ထိခိုက်သေဆုံးမှုကို လူထုနွေဦးက သီးခြားအတည်မပြုနိုင်သေးပါဘူး။

"အောင်သာယာရွာက အမှတ်(၈)လမ်းမကြီး(ရန်ကုန်-ထားဝယ် ပြည်ထောင်စုလမ်း)ပေါ်ရှိတယ်။အောင်သာယာကို လမိုင်းမြို့အရှေ့ဘက် မော့ကနင်းရွာ စစ်တပ်အခြေစိုက်တပ်တွေက စစ်ကြောင်းထိုးတာ။သိပ်မဝေးဘူး"လို့ ရေးမြို့နယ်စစ်ရေးသတင်းရင်းမြစ်က ပြောပါတယ်။

တိုက်ပွဲဖြစ်စဥ်နဲ့ စစ်တပ်စစ်ကြောင်းရဲ့ လတ်တလောအခြေအနေကို Ye Guerrilla Force-ရေးပြောက်ကျားတပ်ထံ လူထုနွေဦးက ဆက်သွယ်မေးမြန်းထားဆဲ ဖြစ်ပါတယ်။

ရေးမြို့နယ်မှာ စစ်တပ်ရဲ့ အမှတ်(၁၉) စစ်ဆင်ရေးကွပ်ကဲမှုဌာနချုပ်(စကခ-၁၉)နဲ့ လက်အောက်ခံ တပ်ရင်းတွေဖြစ်တဲ့ ခလရ(၆၁)၊ ခလရ(၁၀၆)၊ခလရ(၂၉၉)၊ ခမရ(၃၄၃)၊ ခမရ(၅၈၆)၊ ခမရ (၅၈၈)၊ ခမရ(၂၈၇)၊ အမြောက်တပ်ရင်း အမှတ်(၃၁၆)နဲ့ (၃၁၇)တပ်ရင်း တွေရှိပါတယ်။

စစ်တပ်က ရေးမြို့နယ်အပါအဝင် ရန်ကုန်-ထားဝယ် အမှတ်(၈) ပြည်ထောင်စုလမ်းပိုင်းကို ထိန်းချုပ်ဖို့ ကြိုးစားနေတာကြောင့် ပြီးခဲ့တဲ့ ၂၀၂၅ကစပြီး ဒေသတွင်း တော်လှန်ရေးတပ်ဖွဲ့တွေနဲ့ မကြာခဏ တိုက်ပွဲတွေ ဖြစ်နေပါတယ်။

(Ye Guerrilla Force-ရေးပြောက်ကျားတပ်က ရဲဘော်တွေကို တွေ့ရစဉ်။ ဓာတ်ပုံ - Ye Guerrilla Force)