میزان - کـوردستان

🔵 #شێعر_و_وەرگیڕان

هەڵەبجە و مافی مرۆڤ!

زاڵمانی دەور خوێنڕێژانی پەست
بۆ کوشتاری کورد پیلانێکیان بەست

بۆ هێزی‌کوشتن بۆمی کیمیاوی
کورد دەسنیشان بوو لە پیر و لاوی

هووشەی ماف‌ مرۆڤ ‌لای هێزبەدەستان
بەجوانی ڕوون بوو لەبۆ کوردوستان

لەلایەن سەددام بێغیرەت و پەست
بۆمی کیمیاوی لە فڕۆکەیان بەست

تیشکی خۆرەتاو جوانتر لە ڕۆژان
پەنجەی کێشا بوو بۆ هەڵەبجەی جوان

سروەی بای شەماڵ، هێور لەسەرخۆ
ناز گوڵی دەدا و گیا و کەژ و کۆ

لە دەشتاییەکان دەوروبەری‌ شار
گوڵەنەورۆزە بۆ هاتن بەهار

دیمەنی شاریان جوان کردبوو
بەڵام داخەکەم ئاگایان نەبوو

خوێنڕێژێ زاڵم لەو دەم بەهارا
کیمیاوی دەکا بەسەر ئەو شارا

خەڵک بۆشناخ و جوان چاوەڕێی بەهار
لەناکاو گرمەی فڕۆکە لە شار

زرمەی بۆم یەکسەر شاری کردە تۆز
دیاری دوژمن بوو بۆ ڕۆژی نەورۆز!!

قەرەباڵغ لە خەڵک شەقام و کۆڵان
لەلای هیچکەسێ نەکرابوو تەیمان

هەل ڕێکەوتبوو، دوژمن بێشەرەف
خەڵک بەبێ چەک و شاریان بە هەدەف

فەرماندەر زاڵم، فڕۆکەوان نامەرد
بۆم کیمیاوی پیس درا لە شار و هەرد

قیژە و زریکەی خەڵکی بێپەنا
دڵ دار و بەردی هەژاند لە دونیا

پیاوان لە بازاڕ هەڵهاتن بۆ ماڵ
کە فریاڕەس بن بۆ ژن و مناڵ

بەڵام داخەکەم هەڵ نەهات هەنگاو
ژەحر باری‌ بوو تاریک بوو بەرچاو

ئەژنۆیان شکا لە شەقام کەوتن
بۆ هەتاهەتا بەوشێوە خەوتن

لەگەڵ منداڵان زۆرێک لە ژنان
کەوتن لە حەوشەو لەناوی کۆڵان

منداڵ لە بێشکە فریای نەکەوت کەس
بەبێ کەس مابوون چاوەڕوان بێکەس!

بەردەرگا و حەوشە و شەقام و کۆڵان
مەرگ جەولانی بوو لەبۆ گیانکێشان

دایکێ مردەبوو منداڵ لە باوەش
کیژێ بێگیان‌بوو بە چاوانی گەش

خوشکێ‌ تر شەهید، دەس لە دەس برا
چارەنووس ئاخۆ بۆ کوێیان ئەبا؟

باوکێ خۆی کردە تەیمان مناڵەکەی
"عومەرخاوەر" بوو لە بەر ماڵەکەی

گیانی لەدەس دا زۆر بە هەژاری
سەوقات حاکمی گرت بۆ بەهاری!!

بێگیان بوون باوک و منداڵ دووبەدوو
چ فایدە ناویان بخرێتە مێژوو؟

کارەسات کام شوێن وا دڵتەزێن بوو؟
ئاخۆ چۆن باسی بکەن لە مێژوو؟

پڕ لە مەیتیان کرد شەقام و کۆڵان
هەڵەبجەی جوانیان کردە گۆڕستان

"عەبابەیلێ کز" "کانی ئاشقان"خەم
تووی مەرگ پژاوە لە هەرد و لە چەم

حەپەسا، زەرد بوو، باخی جوانی سێو
تارای ڕەش لەسەر شاخ و کەژ و کێو

دڵیان پڕخوێن بوو باخانی هەنار
بۆ مەرگ شەهیدان لە وەرزی بەهار

ئەوەی تۆسقاڵێ هێزی لێ مابوو
بەرەو کێو و دەشت وەڕێ کەوتبوو

ئاوارەی شاخ و چیا و دەشت‌ودەر
نە پێڵاو لە پێ، نە سیپاڵ لەبەر

خەڵکی بێچارە سەرلێ‌شێواو بوون
ماڵ و خزم‌وکەس وا بە توونا چوون

گریانی منداڵ بێباب و دایە
بەڕای من بۆ کەس لە باسی نایە

هاژەی لافاوی نەمابوو سیروان
لەو شارە بیبا ژەحری دڵپیسان

ئەوانەی کەوا لەو خەڵکە مابوون
ئاوارە، نەخۆش، جەستەسووتاو بوون

حەق هەڵەبجەیان چۆن سەند لە سەددام؟
پەتیان لە مل کرد بە سووکێ ئێعدام !!!

بووکی کوردستان، هەڵەبجەی ڕەشپۆش
تاسان تۆ و خەڵکت نابێ فەرامۆش

ئەو شەهیدانەی لە تۆ بە جێ ما
بەڕێز و بەرزن لای خەڵک و خودا

کوڵەی دڵ "نادم" داییم لەبۆ تۆ
جەرگ و هەناوی کردۆتە بۆسۆ

📖نادم_سنە

👇👇👇👇👇👇👇👇

╭─┅═ঈ🌺ঈ═┅─╮
🌐 T.me/Mizankurdi
╰─┅═ঈ🌺ঈ═┅─╯