‍ تقدیم به استاد #لک‌امیر
🌹🌹🌹🌹

ایواره وختی ، ژه مال دام و دَر
تاگه روژی‌تر ، من بِدَم وَ سر

و حال خراوی ، ري‌می گرت‌و وَر
روی ار بیستوین ، دل کیشاتی پَر

تا دیده ام کت او بالای پولادی
سرم نیا و سرِ ، سَرو شمشادی

هوشم بی هوش بی ،ژه عطر اعطاری
خوشحال و سرمست، دیدار رخساری

سرم خواو بِرده،سرم که نیاوه
اسیران آسا ، روحِم کِریاوه

و روی موج اُور ،هامه هاواوه
برز تر ژَ بالای ، بالا اه کاوه

خمان داشت ژَ دل ، جیا مِیاوه
امان وَ دنگی ، خواووِم زِریاوه

گیژ و وِریِزیا من اژ ای خواوه
وَ مِنئی دَنگا ، پِلیامه لاوه

دیم ک دو داوال هوساسه پاوه
راز و گلی یان ، پر تب و تاوه

یه پیر سخن ران ، پر افسون‌گری
زووان آوار و ، شعر فسونکری

سر سوز و پِر بَر ، سَر پَل و وَری
بووش فره زان ، گپ و گور دَری

تک دای وَ لا او دوسه مخاری
پایتی ار لشه، تور تیشه داری
ــــــــــــــــــــــــــــــــــــــــــ

سردار سرفراز،سهم سنگینکم
نامی نام آور و ، نام رنگینکم

کُتلچی مقام ، برز بلینکم
وژ کلیل‌دار و دل کُلینکم

نازار آواختی بی ناز نویزکم
اِی دویزه کَتی، وژ بی‌ دویزکم

میهمان نواز و روی خوش وازکم
نازکیش نازاران ، فرهاد سازکم

بِرا چو پشت و دم تیخ تیژکم
کس بی کسان و بی کس کویژکم
ـــــــــــــــــــــــــــــــــــــــــــــــــــــــــ
سینه‌م چوی سلول‌ ، نفس هم بنیش
هوشو گوش وَشون حکیم پر کنیش

دیم زووان لکی ‌، زووان جارسی
چنین ده ساله ، هر یه کارسی

حفظ اصالت وَ پندار سی
عشق و محبت ، ژه گفتارسی

آزادی خلقان ، ‌ار کردارسی
فردوسی آسا ، باخ پر بارسی

داد و هاوارش وَ وینه‌ی جارکیش
اَر پی باوانِ ، جور و جفاکیش

کویان و دشتان ، گرت و داوریش
کِش مات دایر یک، پیغام آوریش

کَردش بیستوین وَ همرازِ خویش
تا سَر خَم‌آری ، ار درگاش وَ پیش

وو اشعار رنگین،چوی الماس وه
وو سوز و صدای ، پر احساس وه

سختیش دا وَ دس ، خود شمال وه
ار کول هفت اُروم ، نیشته بال وه

آگر وا کَردش ، وَ سر یال وه
وت وو بیستوین،پی چه لال وه ؟

حق لکل نکه ، وَ ژیر شال وه
افشا که سِّران ، هزار سال وه

ارا لکستان ، هر ویمه رومه
مر صاو ملک نین،چوی هانه کومه؟

اه لومه بو ای ، قو کیشِ شومه
ارا وی طوره ، در حال هجومه

بیستوین پاچا ، سردارانم کو ؟
کور و کوررزا ، اسیرانم کو ؟

هاتین چین خانَل،دیوانخانم کو
بزم میهمانی ، لَامیردانم کو

قیل‌وقاج کردن ، سوارانم کو
جمنیش و جمجاخ ، شاوارانم کو

مخمل کوی ارا ، کراس دریاسی؟
ارا چن ساله خلات کس نیاسی؟

چکه‌ل زلیخا ، کوچیل رمیاسی!؟
کتی داوار ار ، دور مل پیچیاسی!؟

مَپل دی مَپل،هرده جار نیه
گیانش تزیه و تا کِر پِل چیه

سیمره کوون ،اَ لش چوی‌ماره؟
ای کی توریایه ‌و هر نادیاره؟
ـــــــــــــــــــــــــــــــــ
بیستوین آخر ، وَ برزای قامت
سرش خم هاورد وَ رسمِ طاعت

وت اوسای ادو ، باخِ پِر ثَمر
ژئیل و ژان تَوَر، کار ارن مَکر

فرهاد و تیشه‌ی تیژ و گُل دمی
پی عشق شیرین،ار جثه‌ م کنی

هزار هت و چی،هر کام و پنی
و باوه میلش ، دس وژی شنی

هر کام و قصدی ، سازی لیم ژنی
دشمن وَ جݩگ‌آ ، دوس وَ ریشخنی

لحن پر سوزِت ، چوینای ملهمی
نیشت‌ار زامان و ، پی دل مرهمی

ماووَرِم وَ جا ، شکر یزدانم
فردوسی وَشی، زاد لکستانم

لک و لک زاده‌ و فردوسی مقام
ار میدان اَدو ، و وینه‌ی ضرغام

هزاران درود ، پی وژ باوانت
بلاووِن ایلل ، لکی زووانت
ــــــــــــــــــــــــــــــــــــــ
هر چوی سازنِی، مقام بزانی
ساز ژنی ار بَزم ، بازی وازانی

اَر سویر و سماع و سَملی‌سمانی
اَر زاما رووی و بووئی بَرانی

اَر خوار و ژاری کُرل دل داری
کِز کوری دِتیَل ، هراتی لاری

چوی بَش دِریا گِ ،دیده واز بویتی
راس و دغلی ، کُل اه چییَم دویتی

پوس می ار وَر ، گُرگَل کنیتی
چیت و چِلَگه ، ظلم اور چنیتی

آگر آتشگال ، اِی نو گیسانی
اِیلل یک ار یک وَ نظم لاوانی

لکل چِریتی ، ژَ یک رسانی
طلسم دیو و دد ، اَر جا شکانی

ظلمِ ظالمین ، بِن کُل نِمانی
ریشی تفرقان اژ بیخ رمانی

بیه هلهله و ، هولَه‌ل جِمانی
خلق خَوَردار بین اژ بین باوانی

فهله‌وویاتِش ، پا نیا و میدان
لکی تازه کرد پی گویشوران

بیدار بین لکل وَ دعوت آرمان
لاشه سیمره ، ژه او بی درمان

ژه نو آباد بی ، دره‌ی مهرگان
هاوردِش او ویر،چوپی و چوگان

وو پیره باوه بی ، نامِ لڪستـان
تا گ بدروشی وَ نام راس ایران
ــــــــــــــــــــــــــــــــــــــ

🖊 #شهرام‌فتاحی‌دارشیرخانی
( #خادم‌لکستان)
ـــــــــــــــــــــــــــــــــــــ
۲۵ اردیبهشت سالروز بزرگداشت #فردوسی‌حکیم را به تمام ایران دوستان و علاقمندانه دنیای شعر و هنر، مخصوصا خدمت شاعر بزرگ و دوست داشتنی #لک‌زبان ، #استادلــــڪ‌امیـــر ( #فردوسی‌لـڪستان ) تبریک عرض میکنم 🌹