#ኢትዮጵያ

ወደፊት ለሚቋቋመው “ የአደጋ ስጋት ምላሽ ፈንድ” ከመንግስት እና ከግል ተቋማት ሰራተኞች ደመወዝ መዋጮ እንዲሰበሰብ የሚያስገድደው የአዋጅ ድንጋጌ ተሰርዟል።

ዛሬ “የአደጋ ስጋት ስራ አመራር አዋጅ” በፓርላማ ፀድቋል።

ከመንግስት እና ከግል ተቋማት ሰራተኞች ደመወዝ መዋጮ እንዲሰበሰብ የሚያስገድደው የአዋጅ ድንጋጌ በሰራተኞች ላይ “ተደራራቢ ጫና እንዳያስከትል” በሚል ወጥቷል።

ባለፈው መጋቢት ወር መጀመሪያ ለተወካዮች ምክር ቤት የቀረበው ይኸው አዋጅ፤ የመንግስት እና የግል ተቋማት ከሚሰጧቸው 15 አይነት አገልግሎቶች “ለአደጋ ስጋት ምላሽ ፈንድ” ገቢ እንዲሰበሰቡ የሚያስገድድ ድንጋጌ በውስጡ ይዞ ነበር።

መረጃው የኢትዮጵያ ኢንሳይደር ነው።

@tikvahethiopia

የቀድሞው የኬንያ ጠቅላይ ፍርድ ቤት ፕሬዚደንት (chief justice) የነበሩት ክቡር ዴቪድ ማራጋ በፌደራል ጠቅላይ ፍርድ ቤት በመገኘት ጉብኝት አደረጉ
********
የቀድሞው የኬንያ ጠቅላይ ፍርድ ቤት ፕሬዚደንት (chief justice)የነበሩት ክቡር ዴቪድ ማራጋ በፌደራል ጠቅላይ ፍርድ ቤት በቀን 28/09/2017 ዓ.ም በመገኘት ጉብኝት አድርገዋል።

በጉብኝታቸውም ከፌደራል ጠቅላይ ፍርድ ቤት ፕሬዝደንት ክቡር አቶ ቴዎድሮስ ምህረት እና ምክትል ፕሬዝደንት ክብርት ወ/ሮ አበባ እምቢአለ ጋር በፌደራል ፍርድ ቤቶች የተጀመሩ የለውጥ ሂደቶች እና ከቴክኖሎጂ አንጻር እየተተገበሩ ያሉ መሰረተ ልማቶች ላይ በሰፊው ተወያይተዋል፡፡

ክቡር አቶ ዴቪድ ማራጋ የኬንያ ፍርድ ቤቶች የደረሱበትን የላቀ የቴክኖሎጂ ተጠቃሚነትን በማንሳት በኢትዮጵያ በተመሳሳይ ሁኔታ ፍርድ ቤቶችን በቴክኖሎጂ የታገዘ አገልግሎት ሰጪ እንዲሆኑ ለማድረግ እየተሰራ ያለውን ስራ በጉብኝታቸው ወቅት አድንቀዋል፡፡

የፌደራል ጠቅላይ ፍርድ ቤት ኮሚዩኒኬሽንና ስትራቴጅያዊ አጋርነት ዳይሬክቶሬት

#Update

የ13 ዓመቷ አያንቱ ቱና ላይ የግብረስጋ ድፍረት በፈጸም የተጠረጠረውና ከአካባቢው ተሰውሮ የቆየው ግለሰብ በቁጥጥር ስር ውሏል።

ቤተሰቦቿ " ድምፅ ስለሆናችሁን እናመሰግናለን ! " ብለዋል።

ቲክቫህ ኢትዮጵያ ከዚህ ቀደም በሲዳማ ክልል፤ ማዕከላዊ ሲዳማ ዞን፤ ሻፋሞ ወረዳ አያንቱ ቱና የተባለችን የ13 ዓመት ታዳጊ ላይ የግብረ ስጋ ድፍረት ወንጀል በመፈጸም የተጠረጠረው ወጣት በወቅቱ የወረዳዉ ፖሊስ አዛዥ በነበረ ግለሰብ አማካኝነት ከአከባቢው እንዲሰወር መደረጉን መረጃ አጋርቶ ነበር።

አያንቱም አካላዊና ስነ ልቦናዊ ጉዳት ደርሶባት ከትምህርት ገበታዋ ተለይታ በጣሊታ የህፃናት ማቆያ ከ1 ዓመት በላይ እንድትቀመጥ መደረጉ ቅር እንዳሰኛቸው ቤተሰቦቿ ድምጻቸውን አሰምተው ነበር።

ከአንድ ዓመት በላይ ዱካው ጠፍቶ የሰነበተዉ ተጠርጣሪ በትናትናዉ ዕለት ፖሊስ ባደረገዉ ክትትል ከኦሮሚያ ክልል፤ ምዕራብ አርሲ ዞን፤ ኮኮሳ ወረዳ " ሀንገሳ " ተብሎ ከሚጠራዉ አከባቢ በቁጥጥር ስር መዋሉን የሻፋሞ ወረዳ ፖሊስ አዛዥ ኢንስፔክተር ሙሴ አወል ለቲክቫህ ኢትዮጵያ ተናግረዋል።

የሲዳማ እና ኦሮሚያ ክልል ፖሊስ ተጠሪጣሪዉን በቁጥጥር ስር በማዋል ረገድ በትብብር መስራታቸዉን የገለፁት አዛዡ የተጠርጣሪውን ወላጅ አባት ጨምሮ ተባባሪና ልጁን በመሸሸግ ሂደት ተሳታፊ የነበሩ የቤተሰቡ አባላትም በቁጥጥር ስር መዋላቸዉን ገልፀዋል።

" ብቸኛዋ እህቴ በግድ ተደፍራ ፍትህ ሳታገኝ ከ1 ዓመት በላይ በየቆችበት ወቅት ተረጋግቼ ትምህርቴን እየተማርኩ አልነበረም " ያለን ወንድሟ ጴጥሮስ ቱና " በልጁ መያዝ እኔም ሆነ ቤተሰቦቼ ደስተኛ ሆነናል፤ ከዚህ በኋላ ሙሉ ትኩረቴን ወደ ትምህርቴ አደርጋልሁ " ሲል ተናግሯል።

በቤተሰቡ ስምም " ድምጽ ስለሆናችሁን አመሰግናለሁ " ብሏል።

ቲክቫህ ኢትዮጵያ
ሀዋሳ
#TikvahEthiopiaFamilyHawassa

@tikvahethiopia

" የእስር ጊዜውን ሳይጨርስ በምህረት የወጣ እንደሆነ ማስረጃው ያመላክታል " - ፖሊስ

ጁስና ብስኩት ገዝቶ በማታለል በ8 ዓመት ህጻን ልጅ ላይ የግብረ ስጋ ድፍረት ወንጀል የፈጸመው ግለሰብ በ20 ዓመት ጽኑ እስራት መቀጣቱን የወላይታ ሶዶ ከተማ ፖሊስ ለቲክቫህ ኢትዮጵያ ገልጿል።

የወንጀል ድርጊቱ የተፈፀመው በወላይታ ሶዶ ከተማ " አራዳ  ቀበሌ " ነው።

ተከሳሽ ኤፍሬም ጪማ የተባለ ግለሰብ በወላይታ ሶዶ ከተማ የጉሩሞ ላዲሳ ቀበሌ ነዋሪ ሲሆን የካቲት 15 ቀን 2017 ዓ.ም አመሻሽ 12፡30 አካባቢ የ8 ዓመት ህፃንን ጁስ እና ብስኩት ገዝቶ በማታለል የግብረ ስጋ ድፍረት ወንጀል መፈጸሙ በሰው እና በሕክምና ማስረጃ ማረጋገጥ ተችሏል።

ይኸው ግለሰብ ከዚህ በፊት በነፍስ ግድያ ወንጀል ተባባሪ ሆኖ 14 ዓመት ፅኑ እስራት የተፈረደበትና የእስር ጊዜውን ሳይጨርስ #በምህረት የወጣ መሆኑን ማስረጃው ያመላክታል፡፡

የወላይታ ሶዶ ከተማ መጀመሪያ ደረጃ ፍርድ ቤት አራዳ ምድብ ችሎት በግንቦት 27 ቀን 2017 ዓ.ም በዋለው ችሎት አቶ ኤፍሬም ጪማ በ20 ዓመት ፅኑ እስራት እንዲቀጣ ውሳኔ አስተላልፏል፡፡

ቲክቫህ ኢትዮጵያ
ሀዋሳ
#TikvahEthiopiaFamilyHawassa

@tikvahethiopia

#ExitExam

የቅድመ-ምረቃ መርሐግብር ተማሪዎች የመውጫ ፈተና ከነገ ሰኔ 2 ቀን 2017 ዓ.ም ጀምሮ እስከ ሰኔ 10 ቀን 2017 ዓ/ም ድረስ ይሰጣል።

ከ190 ሺህ በላይ ተፈታኞች የመውጫ ፈተናውን በ51 ዩኒቨርሲቲዎች በተዘጋጁ 87 የፈተና ማዕከላት ይወስዳሉ፡፡ ከእነዚህ ውስጥ 88 ሺህ የሚሆኑት ዳግም የመውጫ ፈተናውን የሚወስዱ ናቸው።

የመውጫ ፈተናው በ238 የትምህርት መርሐግብሮች በበይነ መረብ ነው የሚሰጠው።

የተከለከሉ ነገሮች ምንድናቸው ?

➡️ የማይፈቀዱ የሂሳብ ማሽኖች (በአንዳንድ ፕሮግራሞች #ካልኩሌተር ማምጣት ይፈቀዳል፡፡ ሆኖም ግን ስልክ፣ ስማርት ዋች፤ ታብሌትና ተመሳሳይ ቁሶችን እንደ ካልኩሌተር መጠቀም ፈፅሞ አይፈቀደም። ሥራ ላይ የሚውሉ ካልኩሌተሮች የተራቀቁ እንዲሁም ፕሮግራመብል እንዳይሆኑ ተገቢውን ጥንቃቄ ማድረግ ይገባል)፣
➡️ ተንቀሳቃሽ ስልክ፣
➡️ ሜሞሪ ያለው የእጅ ሰዓት፣
➡️ የተጭበረበሩ ሰነዶች፣
➡️ የራስ ያልሆነ መታወቂያ፣
➡️ አጫጭር ማስታወሻዎች፣
➡️ ማንኛውንም ዓይነት የጦር መሣሪያ ይዞ መገኘት ክልክል ነው።

በተጨማሪም ፦
⚠️ አደንዛዥ ዕጽ ተጠቅሞ መምጣት፣
⚠️ ከፈተና አስፈጻሚዎች ጋር አሉታዊ ተጽእኖ ያላቸው ውዝግቦችን መፍጠር፣
⚠️ያለመታወቂያ ካርድ ወደ ፈተና ማእከል መሄድ፣
⚠️ ያለፈቃድ ፈተና ማዕከል መገኘት፣
⚠️ ለሌላ ሰው መፈተን ፍጹም የተከለከሉ የዲሲፒሊን ጥሰቶች ናቸው።

ተፈታኝ ተማሪዎች ፈተናው ከመጀመሩ ከ30 ደቂቃ ቀድመው በተመደቡበት የፈተና ክፍል መገኘት የሚኖርባቸው ሲሆን ፤ ከተመደቡበት ክፍል ውጪ መፈተን ውጤት ያሰርዛል።

✅ ተፈታኞች የፋይዳ መታወቂያ መያዝ ይኖርባቸዋል።

መያዝ የሚፈቀደው የፋይዳ መታወቂያ ፦
- በኢትዮ ቴሌኮም ወይም የኢትዮጵያ ፖስታ አገልግሎት አማካኝነት የታተመ የፋይዳ መታወቂያ፣
- ከ "Fayda ID" ሞባይል መተግበሪያ ፣ ከቴሌብር ሱፐር አፕ፣ እንዲሁም ሲቢኢ ብር ሞባይል መተግበሪያ ላይ #QR_ኮድ በማውረድ እና በወረቀት በማሳተም መያዝ ይቻላል።

📵 ዲጂታል የፋይዳ መታወቂያ ኮፒ በስልክ ይዞ መገኘት አይቻልም።

✅ በሌላ ሰው ስም፣ User Name እና Pasword መፈተን አይቻልም፡፡

ከላይ የተዘረዘሩ የፈተና ስርአቶችን የጣሰ ተፈታኝ ውጤቱ ተሰርዞ በዲሲፒሊን ጥሰት የሚጠየቅ መሆኑ ተገልጿል።

ቲክቫህ ኢትዮጵያ ለመላው ተፈታኞች መልካም እና በውጤቱም የምትደሰቱበት የልፋታችሁን ፍሬ የምታዩበት የተሳካ ፈተና እንዲሆን ይመኛል።

ቲክቫህ ኢትዮጵያ
#TikvahEthiopiaFamily❤

@tikvahethiopia