▌#TVB (AKA #老人台) 台慶月理應係王牌節目盡出，吸引觀眾回巢，奈何現實卻係壞消息不斷，除咗股價昨日(6/12)再創歷史新低(4.32元)外，劇集、綜藝收視亦進一步下跌。今期嘅綜藝節目分別係《#麻雀鬥室三決一》以及《#讀心專家》，根據1000部收視記錄儀嘅數據，兩者分別僅錄得11.5點及11點收視。至於台慶鉅獻劇集《#十月初五的月光》同《#拳王》就僅得19.3點及16.1點收視，比上星期更差。另外喺星期日播映嘅聲夢劇集《#青春本我》，則錄得16.8點收視，算係比近排同時段節目好少少。

▌《麻雀鬥室三決一》由 #喇叭牌正露丸 贊助，係以麻雀為題材嘅遊戲節目，即係唔係單純打麻雀，係以另類方式打麻雀或者拎啲麻雀玩遊戲，據知該節目係曾志偉同創作組開會時定案，創作組認為後生仔鍾意打麻雀，所以投票落實製作。不過，小編睇咗陣已經覺得啲遊戲同鏡頭好混亂，唔知做緊乜，可能各位觀眾都有同感，所以首週收視僅得11.5點，以近期TVB綜藝13-14點收視嚟比較，呢個成績直頭係差，但放心仲未墊底，因為播党姐選拔節目嗰排收視仲差(9-10點)。

▌《讀心專家》由 #象牙世家 贊助，根據TVB友好媒體《香港01》報導，呢個節目係TVB嘅撒手鐧，因為佢係由「亞洲讀心第一人」松明主持，佢喺中国同日本都有啲名氣，仲話操控過北野武嘅大腦，但咪睇佢叫松明，講廣東話又唔咸唔淡咁，其實佢係武漢人嚟嘅，操弄人心呢家嘢日本仔又邊夠中国嚟。呢個節目開播時有13.1點收視，不過上個禮拜就跌到得返11點，所謂嘅撒手鐧似乎變咗毒藥，恭喜01張姓記者成為燈神👏🏻

▌《青春本我》係由多位聲夢學員合拍嘅校園劇，該節目於首週取得16.8點成績，算係好過近期星期日同時段節目，但就同之前嘅《開心大綜藝》相約。作為TVB嘅王牌，《青春》有七個贊助商，似乎為本年劇集中最多，分別有中資 #銀迅控股、中国央企華潤 #怡寶、#Skechers、#日清食品、#海天堂、#海馬牌 及 #澳至尊，不過七個贊助商中只有波鞋品牌Skechers係新廣告商。

▌如果想定期接收類似趣聞，請追蹤我哋「思思TVB的二三事」
Instagram: https://www.instagram.com/sayno4tvb
Telegram: https://t.me/sayno4tvb

▌又係時候觀望上星期 #TVB (AKA #老人台) 大致收視表現，根據由1000部收視記錄儀得出嘅數據，除咗平日劇集《十月初五的月光》同周日綜藝《思家大戰》收視稍升之外，其餘節目幾乎全線下挫，當中由黎耀祥、張振朗主演嘅台慶劇《#拳王》更加跌至15.7點，有望排喺TVB「十大低收視劇集」第二名，如無意外，連同之前低收嘅《刑偵日記》(平均13.8點)、《大步走》(平均19.3點*)、《堅離地愛堅離地》(平均20.9點*)，今年起碼有四套劇集上榜。

*《大步走》同《堅離地愛堅離地》喺年初播放，當時仲用緊跨平台收視計算，如果單計電視直播收視，成績會更差。

▌今個禮拜一至五綜藝時段(2230)分別播出三款節目，分別係《#麻雀鬥室三決一》(9.6點)、《#讀心專家》(10.1點)、《#咁大件事點解冇人講》(11.2點)，之前講過近期嘅綜藝大致都有13-14點收視，所以呢三個節目成績係好差。當中收視較高、又係由 #喇叭牌正露丸 贊助嘅《咁大件事》，個名有啲貼近潮流，似乎係取自連登仔、試當真Fans成日講嘅「ＸＸＸ咁大件事無講？」不過節目內容就同兩者完全無關，因為佢係一個討論疫苗接種嘅資訊節目，年初播過一集講打唔打針，上個禮拜嗰集就講打唔打第三針。曾志偉喺接受訪問嘅時候表示，打唔打針作為一個全城熱議嘅話題，「點解咁大件事冇人講呢？」，於是就做個節目等大家吸收多方面資訊。就咁睇嚟，曾志偉同其他老牌廣告商一樣，都係求其執句「潮語」扮跟得上潮流而已。

▌至於以聲夢學員為賣點嘅周日劇集《#青春本我》，今週僅得14.6點收視，較上星期下跌2.2點，希望上星期讚完呢套劇集成績不俗、將最高收視當成收視咁報導嘅01邱姓記者唔會太失望。

▌最後都講吓好消息結尾喇，《#十月初五的月光》今個禮拜收視升至20點，較上週高0.7點，只要結局篇收視再好啲，就有望將平均收視拉至20點，排喺「十大低收視劇集」第四名。另一個收視稍升嘅節目係由李思捷主持嘅周日綜藝《#思家大戰》，錄得17.5點收視，創該節目新高，幾乎可以同《開心大綜藝》末期媲美。講住咁多先，完。

補充資料：無綫電視劇集收視列表
https://zh.wikipedia.org/wiki/無綫電視劇集收視列表

▌三台收視昨日出爐，根據1000部收視記錄儀嘅數據，TVB兩套新劇喺禁堂食令催谷下，成績都只係平平，王祖藍熱愛嘅帶貨節目仍然低收，另外，#李思捷 有望成為《愛回家》、《東張西望》班底以外嘅「#新收視福將」。

▌由 #億世家 贊助嘅懷舊劇集《#青春不要臉》上週首播，講述TVB喺80年代嘅風光時刻，該劇係上年初開拍，唔知係咪曾志偉上場後嘅旨意。本身以為呢套賣情懷嘅劇集可以吸引到好多喺80年代成長嘅觀眾，點知首週收視只有21.1點，相信管理層都跌晒眼鏡。順帶一提，今次我認為 #海馬牌 嘅植入式廣告真係做得好好，因為佢終於可以融入返所屬嘅年代。

▌由 #馬百良 贊助嘅《#鐵拳英雄》，第二個禮拜收視跌0.5點至20.4點，編者雖然唔係好認真睇，但呢套真係膠劇嚟，之前提過佢哋要將對白嘅美國修正為「M國」、美國軍官莫名地出現喺泰國同陳展鵬對打，尋晚睇到一集啲人被手榴彈嘅碎片同衝激波炸中，竟然係完整無缺地，以打關斗形式彈開，令人覺得似笑片。另外，呢套劇嘅道具、建築全部新簇簇，亦令人覺得道具組非常馬虎，連舊化都懶得做。

▌帶貨(直播營銷)節目《#識貨2》，開播至今收視未超過10點，禁堂食令都幫佢唔到，藝人喺節目hard sell返自己同事呢樣嘢上輯俾人鬧完，今集繼續發生，慶幸呢個節目有大量金主，包括大灣區青年基金、#髮再生、#屈臣氏寵物藥妝、#美心食品 等。另一套綜藝，非精密科學節目《#新春開運王》上週收視雖然回落至13.5點，但對比起之前嗰啲10-12點貨仔，已經算係唔差。

▌禮拜六就無咩好講，都係播 #象牙世家 贊助嘅電影。禮拜日嘅聲夢劇集《#青春本我》打回原型跌返落14.6點，所以收視擔當就落喺李思捷身上，佢同晴朗（拍微電影抹黑連登嗰個）監製嗰套《#思家大戰》好似抽扭蛋咁，不斷喺14-19點收視徘徊，但成績已經算係綜藝MVP，叫佢做「新收視福將」都不為過。

▌結語，TVB似乎都拎唔出咩好牌奪回收視，《超級綜藝》、《無綫節目巡禮2022》雷聲大觀眾少，以聲夢班底劇集《青春本我》為例，作為TVB僅有嘅王牌，但咁耐以嚟最高收視都係得16.8點，實在可悲，如今撐起TVB半邊天嘅責任落喺《#愛回家》、《#東張西望》身上，就更加可悲。不過，只要限聚措施持續，相信TVB收視都唔會差得過之前嘅，呢幾個禮拜都仲未使擔心住。

就是老土。

#就是青春 #青春本我 #青春不要臉
#TVB #老人台 #曾志偉 #香港開電視 #余詠珊

《關於Skechers嘅四件事💙》31 May

1.［派嬲／派Like］自己揀😡👍🏻
2.［留言］話畀商家聽你會否幫襯💬🛍️

【Skechers】
https://www.facebook.com/skechers.hongkong
https://pili.app/pg/Uzjq9J1A

▌近年國際企業不斷迎合西方政府，喺國際上迫害我哋中国，藍朋友可以買嘅波鞋越嚟越少，等我哋今日介紹吓 #Skechers 畀大家：

1️⃣ Skechers係第一個同 #建華集團 PR（又稱 #荃灣威威、#豬肉檔AK）合作嘅品牌；
2️⃣ Skechers新簽嘅代言人係TVB藝人、《潮甚麼》系列主持 #梁芷珮；
3️⃣ Skechers係聲夢劇集《#青春本我》其中一個贊助商；
4️⃣ Skechers被法國政府迫害，被指控涉及對維吾爾人嘅強迫勞動 🥺

我哋提供嘅資訊係咁多，如有遺漏歡迎留言補充，撐定反自己揀！

———————————————
【‼#TVB 廣告商名單‼】
https://bit.ly/TVBAdData 👈🏻