𝑸𝒂𝒂𝒎𝒎𝒆𝒆 5 - 𝙂𝙪𝙮𝙮𝙖𝙖 𝘿𝙝𝙖𝙡𝙤𝙤𝙩𝙖𝙖
𝐈𝐭𝐨𝐨𝐩𝐡𝐢𝐲𝐚𝐚, 𝐁𝐢𝐲𝐲𝐚 𝐈𝐝𝐚'𝐚𝐦𝐚 𝐃𝐡𝐚𝐥𝐨𝐨𝐭𝐚𝐚!
***
𝗢𝗱𝗲𝗲𝗳𝗳𝗮𝗻𝗻𝗼𝗼 𝗗𝗮𝗯𝗮𝗹𝗮𝘁𝗮𝗮 𝗔𝗿𝗴𝗮𝗰𝗵𝘂𝘂𝗳!
𝑾𝒆𝒆𝒃𝒔𝒂𝒂𝒚𝒊𝒕𝒊𝒊: www.caffeeoromiyaa.org
𝑭𝒂𝒄𝒆𝒃𝒐𝒐𝒌: https://www.facebook.com/CaffeeO
𝑻𝒆𝒍𝒆𝒈𝒓𝒂𝒂𝒎𝒂: Https://t.me/CaffeeOromia
𝒀𝒐𝒖𝒕𝒖𝒃𝒆: www.youtube.com/@caffeeoromiyaa
𝐓𝐰𝐢𝐭𝐭𝐞𝐫: https://twitter.com/CaffeeOromiyaa
𝐇𝐨𝐫𝐝𝐨𝐟𝐚𝐚!

𝑸𝒂𝒂𝒎𝒎𝒆𝒆 6 - 𝑮𝒖𝒚𝒚𝒂𝒂 𝑾𝒂𝒍𝒐𝒐𝒎𝒂𝒂
𝐁𝐢𝐲𝐲𝐚 𝐒𝐚𝐛𝐝𝐚𝐧𝐞𝐞𝐬𝐬𝐮𝐦𝐦𝐚𝐚𝐧 𝐈𝐣𝐚𝐚𝐫𝐚𝐦𝐭𝐞!
****
𝗢𝗱𝗲𝗲𝗳𝗳𝗮𝗻𝗻𝗼𝗼 𝗗𝗮𝗯𝗮𝗹𝗮𝘁𝗮𝗮 𝗔𝗿𝗴𝗮𝗰𝗵𝘂𝘂𝗳!
𝑾𝒆𝒆𝒃𝒔𝒂𝒂𝒚𝒊𝒕𝒊𝒊: www.caffeeoromiyaa.org
𝑭𝒂𝒄𝒆𝒃𝒐𝒐𝒌: https://www.facebook.com/CaffeeO
𝑻𝒆𝒍𝒆𝒈𝒓𝒂𝒂𝒎𝒂: Https://t.me/CaffeeOromia
𝒀𝒐𝒖𝒕𝒖𝒃𝒆: www.youtube.com/@caffeeoromiyaa
𝐓𝐰𝐢𝐭𝐭𝐞𝐫: https://twitter.com/CaffeeOromiyaa
𝐇𝐨𝐫𝐝𝐨𝐟𝐚𝐚!

Seera uumaafi uumamaan dirqamanii, baatiiwwan dabareen wal jijjiiraa cehuumsa birraa dhugoomsu. Ganni waktiin roobaa wayita bahuuf jedhutti, dacheen magariisaan badhaatee birraa simachuuf yeroo itti qophooftu, Qaammeen baatii addaa, riqicha jijjiiramaa ta’uun, gannaafi faaya barii birraa gidduun mul’attee as baati.

Guyyoonni Qaammee, taateewwan gurguddoo bara keessa ceene kan nu yaadachiisan; mul’ata, hawwiifi abdii bara itti aanuuf qabnu qabannee, waktii haaraa mallattoo quufaafi ce’uumsaan beekamu birraa akka bakkalcha barii goobanee as bahu simanna.

Bacaqiin gannaas qooree, roobnis qaqal’atee, uumamni booqaa birraa arguuf, ililiin birraas daraaree asheetuun dachee faaya addaan badhaasa.

Carraaqqata jiruufi jireenyaati; dukkanni ifaan, doofummaan barnootaan, jibbi jaalalaan, garaagarummaan waloomaan, hammeenyummaan dhiifamaafi gaarummaa dalaguun bakka wal buusee bara haaraa simachuuf qophii irratti argama. Ummata keenyaa waliin, gurmuu tokkummaa tokko jalatti hiriiruun, waan karoorsine waliin raawwannee, imala badhaadhina Oromiyaafi biyyaa mirkaneessuuf hojii qabatamaa keessa jirra.

Galmoota cehuumsa naannoofi biyyaa dhugoomsan qabannee, hojii bara darbe hojjechaa turreen, gaaffiiwwan misoomaaf xiyyeeffannoo addaa kennuun, hojiiwwan nageenyaafi ijaarsa sirnaa, cehuumsa diinagdeefi hariiroo diiplomaasii keenya cimsuuf hojjetamaa turan, utubaalee gurguddoo mul’ata biyyaafi naannoo keenyaa dhugoomsan ta’anii argamu.

Keessaahuu, ijaarsa sirna dimokiraasii dagaagsuu, bulchiinsa gaarii mirkaneessuun, dhiibbaa jijjiirama qilleensaa dandamannee misooma ariifataafi walitti fufiinsa qabu galmeessuuf inisheetiivota addaa addaa jiruufi jireenya hawaasaa jijjiiruu danda'an bocuun hojiin bara darbe itti milkoofne, bara kanaaf ammoo, muuxannoo ta’ee bu’aa caalmaaf kan nu onnachiisuufi qormaatilee imala keenya keessatti nu qunnamaniif dawaa ta’ee tajaajila.

Dantaa dhuunfaafi garee muraasaa kan sabaa fakkeessuun, dheebuu aangoof qaban qaxxaamuraan milkeessuuf, abjuu maseene qabatanii gamaa gamanaa sabaafi amantaa dahoo godhachuun kan socho’an gareewwan finxaaleyyii, dhugaa waloo waliin qabnu cinaatti dhiisanii, hawaasa nagaafi tasgabbii dhorkuun daandii furmaataa kan isaanitti fakkaatee, ergama diigumsa biyyaa qabatanii sochii taasisaa jiran qolannee, obbolummaa dagaagsinee, walqixxummaafi tokkummaan biyya waloo ijaaraa jirra.

Mootummaan Naannoo Oromiyaa, karoora addaa dameewwan misoomaa hunda irratti qabatee jiru dhugoomsuuf xiiqiin hojjechuu irratti argama. Safartuun milkaa’ina hojii keenyaas, saffisa ittiin hojjennu dabaluun, kalaqaafi tekinoloojii fayyadamnee, baay’inaafi qulqullinaan oomishuun jiruufi jireenya ummata keenyaa boqonnaa itti haaraatti ceessisuuf, bara haaraa kanatti humnaafi tooftaa haaraan karaa qindoomina qabuun hojjennee warra waan karoorse waliin raawwatee, injifannoos waliin dhandhamatu ta’uuf bakka jirrutti qooda keenya gumaachuutu nurraa eegama.

Caffeen Oromiyaas, galmoonni misoomaa roga maraan qabaman akka milkaa’aniif, bara darbe hordoffiifi to'annoo hirmaannaa hawaasaan deeggaramuun taasisaa tureen bu’aan argame olaanaadha. Itti gaafatamummaa Heeraafi ummataan kennameef giddu gala godhachuun jijjiiramni bu’uuraa gama diinagdeen, hawaasummaafi siyaasaan, akkasumas, misoomni haqa qabeessaafi ariifataan naannicha keessatti akka dhugoomuuf fayyadamummaa ummataa mirkaneessuuf xiyyeeffannoo kennee hojjechuun waadaa ummata isaaf gale bahachuu irratti argama.

Ummanni keenyas, akkuma kaleessaa hirmaannaa isaa daangaa hin qabneen mootummaa isaa cinaa dhaabbatee utubuu akka qabu carraa kanaan ibsa.

Dhumarrattis, har’a jala bultii bara haaraa guyyaa ‘Waloomaa’ irratti argamna. Tokkummaan keenya, faajjii injifannoofi birmadummaa keenyaa waan ta’eef, waliin taanee waan karoorsine hunda raawwachuun warra baranaa, bara dhuftu injifannoon warra deebi’ee wal argu akka taanu ibsaa, carraa kanaan, ummata naannoofi biyya keenyaan BAGA BARA HAARAA 2016n NAGAAN WALIIN NU GAHE jechaa barri haaraa dhufu kan nagaa, gammachuu, injifannoofi badhaadhinaa akka nuuf ta'u hawwiin qabu ibsa.

Sa'aadaa Abdurahmaan
Afyaa'ii Caffee Oromiyaa
Qaammee 06/2015

Manneen Maree Ummataa sadarkaan jiran, gurmaa’ina qaamolee mootummaa sadeen keessaa tokko. Dimokiraasii dagaagsuu, bulchiinsa gaarii mirkaneessuun misooma ariifachiisaafi ummanni irraa fayyadamu dhugoomsuu keessatti qoodni qaamni kun qabu olaanaadha.

Sirni walhordofuufi to'achuu cimaan qaamolee mootummaa gidduutti yoo jiraate fayyadamummaan ummataa ni mirkanaa’a. Kanaaf, Manneen Maree Aanaa, Magaalaafi Gandaas qaama ummatatti dhiyaachuun hojii bakka bu’ummaa hojjechaa jirtan waan ta’eef, sadarkaa gaaffiifi fedhiin misoomaa ummata keenyaa irra qaqqabee jiruun qaama ergama isaa qixa sirriin bahachuu danda’u ijaaruufi cimsuun barbaachisaadha.
Waggoota lamaan dabarsinetti, Manneen Maree keessatti jijjiirama qabatamaa fiduuf karoorfannee hordoffiifi deeggarsa barbaachisaa ta’e taasisaa turreerra. Keessaahuu, hojiin qaama kanaan hojjetamu hubannoofi beekumsa irratti karaa hundaa’een raawwatamuu waan qabuuf, humna namaa ergama kana fudhatee raawwachuu danda’u gahoomsuu irratti xiyyeeffachuun hojjetamaa ture.
Gurmaa’inaafi hojimaata kaleessa ture irra deebiin sakatta’uun, bu’aa caalmaafi jijjiirama bu’uuraa galmeessuuf kan onnachiisu waan ta’eef, gaaffii yeroo dheeraa Manneen Maree Aanaalee, Magaalotaafi Gandootaan walqabatee ka’aa ture deebisuuf, Caasaafi Dambiin Keessoo Gurmaa’ina, Adeemsa Hojiifi Naamusa Miseensota Mana Maree Aanaa, Magaalaafi Gandaa qoratamaa ture xumuuramee akka hojiirra ooluuf gadi bu’ee jira.
Manneen Maree sadarkaan jirtanis, hojiin gara fuulduraatti isin eeggatu guddaa ta’uu hubattanii itti gaafatamummaa ulfaataa Heeraafi Ummataan isinitti kenname gahuumsa olanaaan bahachuun amanaa ummanni keessan isinitti kennateefi isinis waadaa ummata keessaniif galtan xiiqiifi kutannoo olaanaan hojjechuutu isinirraa eegama.
Kanaaf, karoorri akka mootummaatti qabannee hojjechaa jirru, hundaa’ol, qindoominaafi tumsa waloo qaamolee mootummaafi hirmaannaa ummataa waan gaafatuuf, bakka bu’oonni ummataas qooda olaanaa qabaachuu keessan hubattanii itti gaafatamummaa dachaa qabdan sirnaan bahachuutu isirraa jiraata.
Barri haaraan jalqabnes, bara itti hojjennee jijjiirama qabatamaa galmeessuun cehuumsa biyyaafi naannoo keenyaa itti dhugoomsinu nuuf haa ta’u carraa kanaan hawwiin qabu ibsa.