Пашпарт новай Беларусі: практычныя аспекты

Пашпартная кніжка ўяўляе сабой папяровы буклет з полікарбанатнай старонкай даных і пашпартным чыпам у вокладцы. Узор будзе прадстаўлены ў Еўракамісіі — і адтуль перададзены краінам-сябрам ЕС з прапановай разглядзець пытанне аб прызнанні дакумента.

Пасля прызнання канкрэтнай дзяржавай пашпарт будзе прымацца пры перасячэнні яе мяжы, для атрымання ўязной візы і іншых дзеянняў, уласцівых для звычайнага пашпарта.

Зараз з меркаванняў бяспекі праект арыентаваны пераважна на беларусаў замежжа. Мы не рэкамендуем беларусам унутры краіны звяртацца па атрыманне пашпарта. Варта чакаць, што ён будзе прызнаны рэжымам «экстрэмісцкім». Да дэмакратычных змен пашпарт будзе непрыдатны для паездак у Беларусь.

Прыём заяў на пашпарт будзе ажыццяўляцца сеткай офісаў, размешчаных у краінах замежжа з найбольшай колькасцю беларусаў. Вывучаецца магчымасць арганізацыі мабільных цэнтраў па дакументацыі, якія змогуць наведваць іншыя краіны па вызначаным графіку.

Пашпарты ўзору 1996 года і 2021 года адбірацца не будуць, каб захаваць магчымасць уезду ў Беларусь па іх.

Бяспека пашпартных даных будзе забяспечвацца ў адпаведнасці з заканадаўствам ЕС «General Data Protection Regulation (2016/679)» і ўнутранымі дадатковымі пратаколамі бяспекі.

Пашпарт будзе выдавацца на платнай аснове. Кошт сфарміруецца пасля завяршэння практычнага этапа працы па стварэнні сістэмы дакументавання.

Асноўная перавага для ўладальніка пашпарта – аўтаномнасць ад рэжыму. Асаблівае значэнне гэта будзе мець для беларусаў ва Украіне, якіх рэжым пакінуў без консульскай дапамогі.

Падрабязней пра пашпарт — па спасылцы.

@CabinetBelarus

Аб’яднаны Пераходны Кабінет заклікае беларусаў замежжа прыняць удзел у акцыях да Міжнароднага Дня салідарнасці з Беларуссю 9 жніўня

Кіраўніца Кабінета Святлана Ціханоўская выступіць з прывітальным словам на мітынгу на Кафедральнай плошчы ў Вільні, які пачнецца а 18-ай гадзіне. У мітынгу таксама возьме ўдзел намеснік кіраўніцы Кабінета Валер Кавалеўскі.

Намеснік кіраўніцы Кабінета Павел Латушка выступіць а 20-й гадзіне падчас акцыі ў Варшаве — на плошчы каля помніку Мікалаю Каперніку на вул. Кракаўскае Прадмесце.

Знайдзіце падрабязную інфармацыю пра гэтыя і многія іншыя акцыі, маршы і пікеты на спецыяльна створанай карце на сайце — і далучайцеся да ўдзелу!

Публікуйце фота і відэа з акцый, маршаў і мерапрыемстваў у сваіх сацсетках з хэштэгамі #standwithbelarus #freebelarus.

❗Наведвальнікам з Беларусі на сайт трэба пераходзіць толькі з уключаным VPN — у мэтах бяспекі.

@CabinetBelarus

Працягнуць ісці наперад з любоўю да тых, хто ідзе побач і з верай у тых, хто будзе пасля нас

Святлана Ціханоўская звярнулася да беларусаў і беларусак:

«Мінула тры гады. За гэты час нас спрабавалі пазбавіць мары. Пазбавіць блізкіх. Волі. Радзімы. Пазбавіць незалежнасці. Мы прапусцілі праз сябе шмат болю, але не страцілі спагадлівасць. Мы зазналі нянавісць, але захавалі міласэрнасць. Мы прайшлі праз выпрабаванні, але загартаваныя вынеслі з іх новы досвед. І працягваем рухацца.

Я разумею: гэта цяжка. І з кожным новым выклікам усё складаней захоўваць цвёрдасць крокаў. Але гэта толькі наш выбар: абясцэніць зробленае за тры гады, расчаравацца ў сабе і ў сваёй нацыі. Ці захаваць у памяці ўсе важныя моманты, зберагчы ў сэрцы тых, каго мы страцілі на гэтым шляху. І працягнуць ісці наперад з любоўю да тых, хто ідзе побач і з верай у тых, хто будзе пасля нас».

Недапушчэнне абмежаванняў у легалізацыі беларусаў, падтрымка дэмакратычнай супольнасці, пагрозы для Літвы з боку рэжыму

– Святлана Ціханоўская і яе намеснік па Кабінеце Валер Кавалеўскі сустрэліся з прэзідэнтам Літвы Гітанасам Наўседам

Сустрэча адбылася ў прэзідэнцкім палацы ў Вільні на гадавіну сфальсіфікаваных выбараў у Беларусі.

На сустрэчы таксама прысутнічалі галоўны дарадца Офіса Святланы Ціханоўскай Франак Вячорка і дарадца па пытаннях дыпламатыі Офіса Дзяніс Кучынскі.

Сярод абмеркаваных пытанняў:

▪️ немэтазгоднасць ураўноўвання ў Літве абмежаванняў супраць беларусаў і расіян;

▪️ пашырэнне спісу персанальных санкцый супраць памагатых рэжыму, закрыццё шчылін ва ўведзеных санкцыях; 

▪️ захаванне гуманітарных калідораў на выпадак закрыцця Літвой пунктаў пропуску на мяжы з Беларуссю;

▪️ пагрозы, якія сыходзяць ад групы вагнераўцаў, што знаходзіцца ў Беларусі, і магчымыя сцэнарыі дзеянняў пры эскалацыі сітуацыі;

▪️ абранне дэмакратычнымі сіламі на канферэнцыі «Новая Беларусь 2023» шляху да сяброўства ў ЕС, што стане стратэгічным прыярытэтам працы дэмакратычнага руху; 

▪️ праект новага беларускага пашпарта, які мусіць дапамагчы беларусам, што ў выніку дзеянняў рэжыму засталіся без дакументаў і знаходзяцца пад пагрозай пазбаўлення грамадзянства.

@CabinetBelarus

Намеснік кіраўніцы Кабінета Валер Кавалеўскі — пра атрыбутыку новага нацыянальнага пашпарта

«Новы пашпарт – не толькі стратэгічна важны, практычна карысны, але і сімвалічны праект Кабінета. Дакумент будзе падкрэсліваць суб’ектнасць і ідэнтычнасць прадстаўнікоў беларускага народу.

Ва ўмовах расійскай агрэсіі і пагрозы для існавання Беларусі для нас важна дэманстраваць свету, што мы шануем нашыя атрыбуты і сімвалы.

Пасля 2020 г. для вялікай колькасці людзей стала непрымальным мець дакумент, у якім выкарыстоўваюцца сімвалы рэжыму і гвалту.

Узор новага пашпарта распрацавала Геральдычная Рада, у якую ўвайшлі спецыялісты розных профіляў: гісторыкі, філолагі, дызайнеры, геральдысты і іншыя. Яны зрабілі шмат, каб вобраз пашпарта адпавядаў нашым нацыянальным каштоўнасцям і паказваў, што Беларусь належыць да еўрапейскай сям’і. На чырвонай вокладцы, традыцыйнай для еўрапейскіх краін, размешчаны ўзор слуцкага пояса, які будзе выкананы серабрыстым цісненнем.

У пашпарце выкарыстоўваюцца беларуская і англійская мовы. Прычым беларуская прадстаўленая кірыліцай і лацінкай, што паказвае гістарычную прыналежнасць Беларусі да еўрапейскай цывілізацыі. Захаванне англійскай транслітарацыі прозвішча неабходнае для пераемнасці з сінімі пашпартамі, каб пазбегнуць юрыдычных складанасцей.

У пашпарце змешчаны выявы герба «Пагоні» часоў ВКЛ, БНР і РБ, каб падкрэсліць багацце гісторыі нашай дзяржаўнасці. На старонках шмат выяў помнікаў архітэктуры, у тым ліку цэркваў, касцёлаў, сінагог, мячэцяў – гэтым мы паказваем канфесійную і нацыянальна-этнічную разнастайнасць Беларусі, талерантнасць яе жыхароў.

Таксама ў пашпарце мы змясцілі гімн БНР, першай беларускай незалежнай дзяржавы. Але гэта не палітычнае рашэнне зрабіць яго гімнам новай Беларусі, а сімвалічны крок.

Для нас вельмі важна мець уяўленне аб колькаснай патрэбе беларусаў у такім дакуменце, таму я заклікаю прайсці кароткае апытанне. Нагадваю, што гэтае апытанне, як і валоданне такім пашпартам пакуль можа быць небяспечным для тых, хто застаецца ў Беларусі»

@CabinetBelarus

Павел Латушка выступіў на мітынгу ў Варшаве ў Міжнародны дзень салідарнасці з Беларуссю

«Ці маем мы права не мець волю, каб змагацца за іх свабоду? Я перакананы, што не маем. Мы павінны змагацца. І гэты станоўчы імпульс з дзясяткаў гарадоў па ўсім свеце — у Еўропе, у ЗША, у Канадзе — мы дасылаем нашым беларусам і беларускам: мы не здаёмся»

Відэа з поўнай прамовай — па спасылцы.

@CabinetBelarus

Святлана Ціханоўская выступіла ў Вільні на мітынгу да Міжнароднага дня салідарнасці з Беларуссю

«Мы можам ганарыцца сваім народам. Наш народ прадэманстраваў волю да свабоды. І за тры гады гэта воля нікуды не дзелася. Нягледзячы на рэпрэсіі. Нягледзячы на масавую вымушаную эміграцыю.

Усе, хто мяне сёння слухае і чуе, – у Мінску і Гомелі, Брэсце і Беластоку, Гродне і Варшаве, Віцебску і Вільні, Магілёве і Кіеве, па гэты ці па той бок Атлантыкі, – усе мы дзеці адной краіны. І гэтая краіна належыць нам, а не ўзурпатарам і акупантам.

І нашым ворагам я хачу сказаць: мы нікуды не сыдзем. Нас нішто не спыніць, пакуль мы не вернем сабе нашу краіну»

@CabinetBelarus

Апытанне на платформе «Голас» аб нацыянальным пашпарце Беларусі працягнецца яшчэ два дні

Яго можна прайсці па спасылцы да 16 жніўня (да 23:00), каб дапамагчы ацаніць аб’ём запыту на новы беларускі пашпарт і запланаваць адпаведны вытворчы працэс.

З меркаванняў бяспекі праект арыентаваны пераважна на беларусаў замежжа. Беларусам унутры краіны звяртацца па атрыманне пашпарта пакуль не рэкамендуецца.

❗Удзел у галасаванні для тых, хто знаходзіцца ў Беларусі, можа быць небяспечным.

Падрабязная інфармацыя аб новым пашпарце — на сайце.

@CabinetBelarus

«Свабоду Беларусі ніхто не падорыць. Мы павінны дамагчыся яе самастойна»

Аляксандр Азараў, прызначаны каардынатарам па плане «Перамога» і падпольным руху пры Аб’яднаным Пераходным Кабінеце, распавёў пра этапы падрыхтоўкі плана, колькасць яго ўдзельнікаў і гарантыі бяспекі іх асабістых даных:

«Мы шкадуем аб тым, што раскол, які здарыўся ўнутры «Байпол», даставіў радасць нашым ворагам. Але крызіс у нашай арганізацыі два месяцы таму і змены ў яе складзе не паўплывалі на бяспеку ўдзельнікаў плана. Асабістыя даныя надзейна абароненыя, уцечка інфармацыі немагчымая.

Наша справа — рэалізацыя плана для звяржэння дыктатуры ў Рэспубліцы Беларусь і вызвалення нашай краіны ад фактычнага паглынання Расійскай Федэрацыяй.

Частка таго, што мы ўжо зрабілі: 

▪️зарэгістравалі 200 000 заявак у чат-боце плана «Перамога»;

▪️апрацавалі больш за палову заявак удзельнікаў, якія прайшлі рэгістрацыю; 

▪️правялі падрыхтоўчую працу з 10 000 з іх;

▪️прызначылі кіраўнікоў атрадаў і вызначылі раёны засяроджвання сіл;

▪️арганізавалі надзейную сувязь і каардынацыю;

▪️арганізавалі ўзаемадзеянне і абмен інфармацыяй па сітуацыі ў Беларусі з дэмакратычнымі дзяржавамі-партнёрамі;

▪️рэалізавалі шэраг спецыяльных аперацый у Беларусі, у тым ліку аперацыю па пашкоджанні расійскага самалёта А-50.

Удзел у плане «Перамога» заўсёды быў і застаецца добраахвотным. Далучыцца да яго можна толькі праз арыгінальны чат-бот. Тыя, хто вырашыў выйсці з плана і адпісацца ад чат-бота, могуць зрабіць гэта паводле інструкцыі ад «Кіберпартызан».

План «Перамога» — шлях да звяржэння дыктатуры. Свабоду Беларусі ніхто не падорыць. Мы павінны дамагчыся яе самастойна».

Падрабязней пра актуальны стан плана «Перамога» глядзіце ў новым відэа.

@CabinetBelarus

«Мы ўражаныя запытам: больш за 57 000 пашпартоў»

Валер Кавалеўскі распавёў пра вынікі апытання аб новым нацыянальным пашпарце Беларусі, якое праходзіла на платформе «Голас»:

«Трохі больш за тыдзень таму мы прэзентавалі праект новага нацыянальнага пашпарта Беларусі. Мы ўражаныя запытам: за такі кароткі тэрмін удзельнікі апытання выказалі намер атрымаць больш за 57 000 пашпартоў. Тысячы з іх пазначылі, што плануюць звяртацца па пашпарт не толькі для сябе, але і разам з чальцамі сваіх сямей.

Такое жаданне выказалі беларусы з розных куткоў свету, у тым ліку з ЗША, Канады і іншых дзяржаў. Нас асабліва натхніла, што больш за траціна ўдзельнікаў апытання зараз пражываюць у Беларусі, хоць мы і акцэнтавалі ўвагу на тым, што з меркаванняў бяспекі праект пакуль арыентаваны на беларусаў замежжа. Уражвае, што самай папулярнай прычынай патрэбы ў новым пашпарце апытаныя назвалі непрыняцце рэжыму і яго акупацыйных сімвалаў.

Разам з тым, амаль палова ўдзельнікаў апытання пражываюць у Еўрасаюзе. І прадказальна, што іншымі, больш прагматычнымі прычынамі згодна з апытаннем сталі заканчэнне тэрміну дзеяння пашпарта і цяжкасці з абменам дакумента ў рэжымных консульствах. Апытанне паказала, што мінімум 2 тысячы чалавек маюць патрэбу ў аднаўленні пашпарта ўжо зараз. Гэта можа быць «вярхушкай айсберга».

Гэты вынік таго, што ўстановы рэжыму не выконваюць сваіх абавязкаў перад грамадзянамі, якія жывуць у замежжы. Таму мы бяром частку функцый па дакументацыі беларускіх грамадзян на сябе. Нездарма ў апытанні найбольш важнай перавагай новага пашпарта беларусы назвалі свабоду ад кантролю дыктатуры, якую ён дае ўладальніку.

Дзякую ўсім, хто прыняў удзел у апытанні. Вы дапамаглі нам ацаніць аб’ём запыту на новы беларускі пашпарт, гэта нам спатрэбіцца таксама і ў працы па дасягненні міжнароднага прызнання пашпарта. Хачу таксама падзякаваць Паўлу Ліберу і камандзе платформы «Голас», якія камунікацыйна падрымліваюць гэты праект, спадзяюся, гэта супрацоўніцтва працягнецца ў выкананні гэтай задачы».

@CabinetBelarus

«Марафон адбудзецца толькі тады, калі людзі атрымаюць дапамогу»

Прадстаўніца Кабінета па сацыяльнай палітыцы, ініцыятарка марафону салідарнасці Вольга Гарбунова распавяла пра перавод грошай на рахунак фонду і заключэнне першых дамоў з арганізацыямі, якія будуць аказваць дапамогу:

«Шмат каму здаецца, што марафон адбыўся і асноўная праца зроблена, але праўда ў тым, што актыўная праца ў дзень марафону толькі пачалася.

Вельмі радуе ўцягнутасць і матывацыя ўсіх прадстаўнікоў, якія ўвайшлі ў Наглядальную раду, як і актыўнасць фондаў і ініцыятыў.

Грашовыя сродкі ўчора былі пераведзены на рахункі дабрачыннага фонду падтрымкі «21 траўня» са Stripe і PayPal.

На дадзены момант мы знаходзімся на стадыі падпісання дамоў з арганізацыямі — і ў хуткім часе пералічаныя сродкі будуць першым траншам размеркаваны сярод фондаў і арганізацый, якія далучыліся да марафону.

Многія думаюць, што марафон ужо адбыўся, але марафон адбудзецца толькі тады, калі людзі атрымаюць дапамогу. Калі ўсе сродкі, сабраныя ў яго рамках, дойдуць да сваіх атрымальнікаў — палітзняволеных і іх блізкіх».

@CabinetBelarus

Намеснік кіраўніцы, прадстаўнік па замежных справах Кабінета Валер Кавалеўскі пракаментаваў закрыццё Літвой двух пунктаў пропуску на мяжы з Беларуссю

«Мы разумеем логіку дзеянняў Літвы, прадыктаваных інтарэсамі яе нацыянальнай бяспекі. Пункты пропуску закрытыя ў сувязі з прысутнасцю групы вагнераўцаў у Беларусі, а таксама з мэтай супрацьстаяння кантрабандзе і спробам рэжыму абысці ўведзеныя супраць яго санкцыі.

Разам з тым мы падкрэсліваем: народ Беларусі і памагатыя лукашэнкаўскай дыктатуры — гэта не адно і тое ж. Беларусы — не вагнераўцы. На нядаўняй сустрэчы кіраўніцы Кабінета Святланы Ціханоўскай з прэзідэнтам Літвы Гітанасам Наўседам мы абмяркоўвалі неабходнасць захавання гуманітарных калідораў, каб мінімізаваць шкоду інтарэсам грамадзян Беларусі, якія ў пераважнай большасці настойваюць на аднаўленні дэмакратыі ў нашай краіне.

Мы будзем імкнуцца абараніць інтарэсы людзей, але павялічыць ціск на рэжым праз адпаведныя абмежаванні на мяжы з Еўрасаюзам. Бо ў гэтай сітуацыі, як і ў гістарычнай перспектыве, Літва — наш саюзнік. Калі нашыя дзеянні будуць скаардынаваныя, мы зможам дамагчыся вызвалення Беларусі ад дыктатуры і расійскага кантролю і аднаўлення бяспекі на мяжы Беларусі з нашымі еўрапейскімі суседзямі»

@CabinetBelarus

Намеснік кіраўніцы Кабінета Павел Латушка накіраваў украінскаму боку дакументы з абгрунтаваннем увядзення санкцый супраць 8 беларускіх прадпрыемстваў ВПК

У Нацыянальнае агенцтва па прадухіленні карупцыі Украіны накіраваны ліст са спісам 8 прадпрыемстваў ваенна-прамысловага комплексу Беларусі, якія ажыццяўляюць пастаўкі тавараў для арміі і ваеннай прамысловасці Расіі, з абгрунтаваннем накладання на іх санкцыйных абмежаванняў.

На падставе гэтага ліста назвы дадзеных прадпрыемстваў размешчаныя на спецыялізаваным сайце «Вайна і санкцыі». Таксама, паводле Нацыянальнага агенцтва па прадухіленні карупцыі Украіны, пералік прадпрыемстваў будзе накіраваны ў Службу бяспекі Украіны для вывучэння і далейшага ўвядзення ў іх дачыненні санкцый.

Раней у Нацыянальнае агенцтва па прадухіленні карупцыі Украіны былі накіраваныя спісы з імёнамі 24 суддзяў, 15 прапагандыстаў і 16 чыноўнікаў структур Саюзнай дзяржавы Беларусі і Расіі, на якіх прапануецца накласці персанальныя санкцыі.

Павел Латушка падкрэсліў: «Мэтай нашай санкцыйнай палітыкі ў ваенна-прамысловай сферы з'яўляецца паслабленне магчымасці рэжыму Лукашэнкі садзейнічаць расійскай агрэсіі супраць Украіны і вырабляць узбраенні для патрэб Расійскай Федэрацыі.

Мы знаходзімся ў пастаянным узаемадзеянні з украінскім бокам. І гэтае ўзаемадзеянне выйшла на новы, больш дзейсны ўзровень пасля нашага апошняга візіту ў Кіеў, у тым ліку ў пытаннях санкцыйнага ціску на рэжым Лукашэнкі, які з'яўляецца саўдзельнікам расійскай агрэсіі супраць незалежнай Украіны».

@CabinetBelarus

«Фільмы маюць сілу ўздзеяння мацнейшую за бомбы»

Прадстаўніца па нацыянальным адраджэнні Аб’яднанага Пераходнага Кабінета Аліна Коўшык выступіла на адкрыцці першага нефармальнага з'езду беларускіх кінематаграфістаў, які праходзіць у гэтыя дні ў Варшаве:

«У 2019 годзе прайшоў апошні беларускі кінафорум «Лістапад». Сёння, у 2023 годзе, адбываецца гістарычная падзея — першы нефармальны з’езд беларускіх кінематаграфістаў.

За гэты час прайшла поўная пераарыентацыя кінасферы. І ў вас вялікая задача — стварыць беларускую кінаіндустрыю нанова. Фільмы маюць сілу ўздзеяння мацнейшую за бомбы.

Нам, беларусам, сёння як ніколі патрэбныя нашы героі і новыя беларускія міфы. Наша гісторыя поўніцца такімі падзеямі, асобамі і творамі. Як казаў Бернарда Берталучы: «Людзі прыходзяць у кінатэатр, каб падзяліць адну і тую ж мару». І сёння яна ў нас сапраўды адна.

Гэта складаны для нас час — час выклікаў. Злачынцы пазбавілі нас краіны, але не пазбавілі мары і магчымасці дзейнічаць: ствараць культуру новай Беларусі ўжо сёння. Шукаць партнёраў і збіраць найлепшы сусветны досвед. Ладзіць калабарацыі, адкрываць новыя крэатыўныя формы.

Я хачу, каб мы, беларусы, неўзабаве атрымалі наш першы «Оскар». Жадаю вам плённай працы на форуме».

Арганізатар з’езду — Belarusian Filmmakers’ Network — нефармальная ініцыятыва, накіраваная на развіццё беларускага незалежнага кіно, яго прасоўванне ўнутры і па-за межамі краіны, а таксама ўключэнне айчынных аўтараў у глабальны індустрыяльны кантэкст.

@CabinetBelarus

Дыскусія з дэпутатамі Вярхоўнай Рады, сустрэчы з парламентарыямі і замежнымі дыпламатамі ў Кіеве, перадача дапамогі беларускім добраахвотнікам

— Пачынаецца працоўны візіт намесніка кіраўніцы, прадстаўніка па замежных справах Кабінета Валера Кавалеўскага ва Украіну

У візіце таксама бяруць удзел дарадца Святланы Ціханоўскай па парламенцкім супрацоўніцтве і канстытуцыйнай рэформе Анатоль Лябедзька і кіраўнік Місіі дэмакратычнай Беларусі ў Кіеве Генадзь Манько.

Падчас паездкі запланаваныя:

▪️абмеркаванне з дэпутатамі Вярхоўнай Рады і некаторых еўрапейскіх парламентаў стану беларуска-ўкраінскіх адносін;

▪️сустрэчы з афіцыйнымі асобамі і прадстаўнікамі дыпламатычнага корпусу ў Кіеве;

▪️перадача гуманітарнага грузу для беларускіх добраахвотнікаў ва Украіне;

▪️сустрэчы з дэпутатамі Вярхоўнай Рады Украіны;

▪️сустрэча з прадстаўнікамі беларускай дыяспары ў Львове.

«Мы абмяркуем праблематыку беларуска-ўкраінскіх адносін і перспектывы іх далейшага развіцця. Неабходна надаць новую ўвагу пытанням, з якімі сутыкаецца беларуская супольнасць ва Украіне. Кіеў — месца актыўнай міжнароднай палітыкі, што вызначае важнасць супрацоўніцтва з дыпламатычным корпусам ва Украіне», — распавёў Валер Кавалеўскі.

@CabinetBelarus

«Мы гатовыя садзейнічаць грамадскаму дыялогу паміж беларусамі і літоўцамі»

Прадстаўніца па нацыянальным адраджэнні Аб’яднанага Пераходнага Кабінета Аліна Коўшык пракаментавала антыбеларускія выказванні ў медыйным полі Літвы:

«Я, як і вялікая колькасць дэмакратычна настроеных беларусаў, удзячная Літоўскай Рэспубліцы за падтрымку беларускага пратэсту ад самага яго пачатку. Але немагчыма не заўважыць, што некаторыя літоўскія палітыкі і іншыя лідары меркаванняў усё часцей дэманструюць негатыўнае стаўленне да беларусаў. На жаль, яно небяспечнае найперш для нашых аднадумцаў, арыентаваных на шлях еўрапейскага і мірнага развіцця. Для тых, хто знайшоў у Літве палітычны прытулак і застаецца ўдзячным яе народу за гасціннасць.

Такое стаўленне – адказ, накіраваны не таму адрасату. Бо негатыўных ацэнак заслугоўвае злачынны лукашэнкаўскі рэжым: за ролю расійскага памагатага ў вайне ва Украіне, за незаконнае размяшчэнне расійскай ядзернай зброі і тысяч наймітаў з ПВК «Вагнер», за міграцыйны крызіс.

Мне бачацца штучна створанымі канфлікты, справакаваныя фэйкамі пра небяспеку так званага радыкальнага «літвінізму», які з’яўляецца нічым іншым, як аналагам «рускага міру». Дэмакратычныя сілы Беларусі ніколі не выказвалі і не выкажуць прэтэнзій да тэрытарыяльнай цэласнасці Літвы і зацікаўленыя ў трывалых, добразычлівых і ўзаемавыгадных адносінах з суседзямі. Гэта асабліва важна і для мяне асабіста, дэмакратычнага палітыка, гісторыка і гарадзенкі, для якой мае значэнне спадчына Вялікага Княства Літоўскага і наша цяперашняе і будучае добрасуседства.

Мы гатовыя садзейнічаць грамадскаму дыялогу паміж беларусамі і літоўцамі і шчыра вітаем ініцыятывы грамадзянскай супольнасці, незалежных медыя, культурніцкіх устаноў, вучоных па яго арганізацыі. І заклікаю беларусаў і літоўцаў працягваць абмен інфармацыяй адзін пра аднаго – поўнай, дакладнай, аб’ектыўнай і, што, на мой погляд, вельмі важна, экспертнай»

@CabinetBelarus

«Таталітарызм – пагроза міжнароднай бяспецы, а для беларусаў – пагроза незалежнасці краіны»

Прадстаўніца па нацыянальным адраджэнні Кабінета Аліна Коўшык выказалася з нагоды Дня памяці ахвяр таталітарных рэжымаў:

«23 жніўня ў свеце адзначаецца Дзень памяці ахвяр таталітарных рэжымаў, прымеркаваны да падпісання ў 1939 годзе пакта Молатава – Рыбентропа. Згодна з сакрэтнымі пратаколамі, заходнія вобласці Беларусі і Украіны, якія ўваходзілі ў склад Польшчы, Латвія, Эстонія, Фінляндыя, а таксама Бесарабія трапілі ў сферу ўплыву СССР. Лёс гэтых краін быў вырашаны без удзелу народаў, якія ў іх пражывалі.

Жорсткім, бесчалавечным палітычным рэжымам, якія не ўлічваюць ніякіх законаў, міжнароднага права, няма месца ў сучасным свеце. У 2020 годзе беларусы рашуча выказаліся за свабодную і дэмакратычную краіну.

Таталітарныя рэжымы, якія сістэматычна парушаюць правы чалавека ва ўласных краінах, часцей развязваюць войны і супраць іншых дзяржаў ці становяцца саўдзельнікамі агрэсіі. Сёння таталітарызм – пагроза міжнароднай бяспецы, а для беларусаў – пагроза незалежнасці краіны.

У выніку Другой сусветнай вайны нацызм быў пераможаны. Сёння гэтая ідэалогія забаронена і пераследуецца, а яе гістарычная спадчына асуджаецца.

У той жа час камунізм, асабліва найгоршая яго праява – сталінізм, не атрымаў належнай ацэнкі. Народы Усходняй Еўропы, у тым ліку беларусы, сталі ахвярамі бесчалавечнай палітыкі як нацыстаў, так і камуністаў. Аб’яднаны Пераходны Кабінет у заяве да Дня памяці ахвяр палітычных рэпрэсій асудзіў камунізм, таталітарныя і імперскія ідэалогіі.

Я веру, што беспакаранае зло вяртаецца. Расійская Федэрацыя не толькі не асудзіла камуністычную таталітарную спадчыну, але і пачала яе ўсяляк апраўдваць і, урэшце рэшт, тыражаваць.

Пасля паразы Расіі ў вайне неабходна асудзіць культ Пуціна і рэжым Лукашэнкі і давесці іх да трыбуналу, як гэта было зроблена ў дачыненні да нацысцкай Германіі пасля 1945 года».

@CabinetBelarus

Вашая барацьба за сваю свабоду – натхняе ўвесь свет. І я ганаруся тым, што вам дапамагаюць беларусы

У Дзень незалежнасці Украіны Святлана Ціханоўская звярнулася да ўкраінцаў:

«Шаноўныя ўкраінцы і ўкраінкі, 
прэзідэнт Зяленскі!

Прайшло ўжо паўтара года ад поўнамаштабнага ўварвання Расіі ва Украіну. Увесь гэты час вы бароніце сваю незалежнасць са зброяй у руках і агнём у сэрцы. Мы схіляем галаву перад вашай мужнасцю і стойкасцю. Вашая барацьба за сваю свабоду – натхняе ўвесь свет.

Я ганаруся тым, што ў гэтай барацьбе дапамагаюць беларусы. Ганаруся Палком Каліноўскага і нашымі ваярамі-добраахвотнікамі, якія здзяйсняюць подзвіг за подзвігам. Я ганаруся нашымі валанцёрамі, якія аднаўляюць гарады, дасылаюць інфармацыю ў «Беларускі Гаюн». Медыкамі, што ратуюць жыцці. Ганаруся ўсімі вольнымі беларусамі, якія данацяць на ўкраінскую армію і набліжаюць перамогу Украіны.

Мы адновім добрыя адносіны паміж нашымі народамі, а тыя, хто ўвязаў нашую краіну ў вайну – абавязкова панясуць адказнасць.

Дарагія ўкраінцы, жадаю вам сустрэць наступны Дзень незалежнасці ў мірнай і свабоднай Украіне. 

Слава Україні!
Жыве Беларусь!»

Прадстаўнікі Кабінета, Офіса Святланы Ціханоўскай, Палка Каліноўскага, дэпутаты Вярхоўнай Рады, парламентарыі 20 краін ЕС
— у Кіеве адбылася сустрэча па тэме беларуска-ўкраінскіх адносін

Намеснік кіраўніцы, прадстаўнік па замежных справах Кабінета Валер Кавалеўскі пракаментаваў сустрэчу:

«Мы абмяркоўвалі стан нашых адносін, праблемы, перспектывы і крокі, якія мусім зрабіць, каб дасягнуць гэтых перспектыў. Вельмі важна і каштоўна, што ў нас была, як і заўсёды, адкрытая размова — і мы гатовыя з павагай ставіцца да ўсіх меркаванняў, у тым ліку і крытычных. Пра тое, што магло было быць зроблена, але не зроблена, пра тое, што мы абавязкова будзем рабіць. Будзем працаваць далей над ініцыятывамі, якія былі агучаныя. Такія сустрэчы дазваляюць нам выбудаваць узаемны давер, пазначыць новыя кірункі і ідэі, якія дапамогуць дасягнуць нашай агульнай мэты — вызвалення нашых краін. Каб яны сталі сапраўды дэмакратычнымі, вольнымі і еўрапейскімі».

Разгорнуты каментарый глядзіце па спасылцы на YouTube-канале Кабінета.

@CabinetBelarus

Намеснік кіраўніцы Кабінета Павел Латушка павіншаваў украінскі народ з Днём Незалежнасці

«З Днём Незалежнасці, моцная, рашучая, нязломная Украіна! З Днём Незалежнасці, мужны, свабодны, нязломны ўкраінскі народ!

Вы паказалі ўсяму свету, што значыць быць сапраўднымі патрыётамі і ваярамі.

Перамога будзе за Украінай. І гэтая перамога зменіць свет. Бо змагаючыся за сваю незалежнасць сёння, Украіна змагаецца і падае прыклад усім народам і краінам, якія пацярпелі ад рускага імперыялізму. Перамога Украіны — гэта шанец з ім скончыць. Шанец скончыць з гэтай імперыяй.

У лютым 2022 года беларусы выйшлі на антываенныя акцыі. Ведаючы, чым гэта пагражае. Бо прарасійскі рэжым ад самага пачатку ўдзельнічае ў вайне на баку Расіі супраць волі беларускага народа.

Нават тысячы новых арыштаў і прысудаў за антываенныя пратэсты не спынілі беларускіх рэйкавых партызан, якія перашкаджалі руху расійскіх вайсковых эшалонаў. Не спынілі падполле, якое перадавала і працягвае перадаваць інфармацыю аб перамяшчэннях расійскіх войскаў у Беларусі. Не спынілі дыверсантаў, якія вывелі са строю расійскі самалёт навядзення. Не спынілі тысячы беларускіх валанцёраў.

Не спынілі нашых герояў-добраахвотнікаў, якія з першых дзён сталі плячо да пляча са сваімі пабрацімамі-ўкраінцамі і разам б’юць акупантаў, абараняючы Украіну ў шэрагах ЗСУ.

І мы, беларусы, працягнем падтрымліваць Украіну, працягнем змагацца да Перамогі. За вашу і нашу свабоду.

Веру, упэўнены, што сваю 33-ю гадавіну незалежнасці Украіна сустрэне цалкам вызваленай, у сваіх законных межах.

Слава Украіне! Героям слава! Жыве Беларусь!»

Зварот цалкам глядзіце па спасылцы на YouTube-канале Кабінета.

@CabinetBelarus