▌因為低收視而被砍走5集嘅《#雙生陌生人》終於播完，不過接棒嘅《#十八年後的終極告白 2.0》同樣低收，首週收視14.7點（約95.5萬觀眾），相信係TVB劇集史上，首週收視第三低嘅劇集[1]。

▌《終極告白》第一輯喺2020年錄得26.5點 #七天跨平台收視，所以喺第二輯開播前，曾被寄予挽救收視、對撼ViuTV等厚望，但好遺憾，《2.0》較第一輯跌咗差唔多12點收視，而且僅僅係比《雙生陌生人》高1.2點收視，不過，《2.0》都仲高過ViuTV《#冥冥之中》嘅3.3點收視，如果咁講可以令TVB高層比較開心嘅話...

《終極告白2.0》冠名贊助為 #moraz，植入式贊助商又係 #海馬牌。moraz呢隻護膚牌子其實好勵志，以前佢只係出沒喺《宣傳易》時段，但之後慢慢有能力冠名贊助深宵重播劇集，而家仲可以出現喺黃金時段，相信絕對係落TVB廣告令moraz多咗人幫襯，而唔係贊助TVB劇集嘅門檻越嚟越低。

【 moraz HK 】
https://www.facebook.com/moraz.hk
https://pili.app/pg/18QTy9yy5

▌至於綜藝時段，梁芷珮主持嘅《#東南歐潮甚麼》緊急取代咗《#日日媽媽聲》，將之前8.9點嘅收視救返上11.1點，避免咗另一宗悲劇。《東南歐》係由經常被消委會點名嘅 #億世家 贊助。

▌《#聲生不息》收視繼續企穩於17點左右水平，可見呢套「#湖南版流行經典五十年」確實有啲市場，不過AfterClass喺三缺一下已經唔知去咗邊。

▌收視點並不完全反映節目質素，TVB觀眾質素是高是低、識唔識欣賞好嘅節目，大家心照，不過見TVB高層咁鍾意揸住點數嚟自high，小編咪拎嚟講吓，今日寫住咁多先，無咩事我返去睇Netflix同Disney+。

———————————
[1] 首週收視最低嘅係2021年劇集《智能愛人》(12.3點)，但當時收視受東京奧運影響，第二低嘅係《雙生陌生人》(13.5點)。