ضروري الإنسان يكون مُدرك مكانته عند الأشخاص اللي بيتعامل معاهم، ضروري يكون فاهم أن مش كل الهيصة والدوشة معناها صحبة.. ضروري يكون عارف أن فيه ناس وجودها ما يزيدش عن الوقت اللطيف اللي كل حد خارج يفرج عن نفسه، وما تتعشمش بعد كده، وإن فيه ناس وجودها مصالح مشتركة، أو معارف لا يستدعي بالضرورة ما هو أكثر دفئا أو قربًا، وضروري جدا نكون مدركين للفئة اللي شايفاك شخص أو سفنجة لإمتصاص أحزانهم.. أما أحزانك لا تعني شيئًا، وأزماتك هي لك وحدك!
وبالتالي مش ضروري أبدا نفضل نتعامل بأخلاقنا وطبيعتنا مع الآخرين ونتغاضى عن سلوكياتهم، لأن ساعات بيكون ضروري أن يتم التعامل مع الآخر بنفس معاملته بالظبط.. كي تستقيم الحياة

على قدر المكانة بيتأثر الانسان، على قد ما بيغوص الواحد جوا الي قدامه وبيخربشه على قد ما بتتحول الخربشة لشرخ يوسع مداه بالوقت والسكوت.
مين قال ان الي بيخربش بيكون هو المعتدي مش يمكن دي خربشة دفاعية مش خربشة هجوم؟ مين قال ان الخربشة مبتوجعش ايد اللي بيخربش قد ما بتوجع اللي بيتخربش؟ مين قال ان السهل هو الاذى او على الاقل الاسهل من المواجهه هي التجاهل؟ عامة اللي قال اخر حاجة دا اصدق من كل اللي فاتوا..
التجاهل اسهل من المواجهة بس ياترى هيوصل لأيه؟ هنتناسى ونتغافل ف ايه؟ هيجرا ايه وهنتحول لأيه؟
اكيد مش لحاجة حلوة واكيد مش لشخصية سهلة ولينة وهادية وبسيطة. طيب ليه؟ والله ليه فعلاً يعني لا هو حل ولا هو عقاب ولا هو تسيير حال طب دا يتسمي ايه؟ فعل بيأذي الطرفين وبيبهدل نفسيتهم علي ولا حاجة ياريته حتى عقاب انما دا وضع ملوش ملامح، رمادي لا منه ساده ولا منه بالالوان!

التجاهل مش حلو ..

‏محدش بقى مُدرك عواقب الكلمة وإيه ممكن يكون تأثيرها في الشخص اللي قدامه وازاي ممكن تفضل مكملة معاه فترات طويلة من غير ما أي حد يبانله حاجة، الناس بقت قليلة الذوق بدون أي تأنيب ضمير والموضوع بقى بايخ ودمه تقيل، وفي الآخر بنستغرب الناس لما تاخد جنب من كل حاجة وتقرر تختفي خالص.

كل عام وانتم بخير جميعاً

الاكونت بتاعي على ثريدز
https://www.threads.net/@heyylazy_

اللي قرر إن ما ينفعش شاب يتجوز بنت أكبر منه

هو نفسه اللي قرر إنه ما ينفعش شاب يتجوز بنت أطول منه

هو نفسه اللي قرر إنه لازم شاب يتجوز البنت بيضا وحلوة ورفيعة وإلا تبقى معيوبة

هو نفسه اللي قرر إن البنت ما ينفعش تتجوز قبل أختها الكبيرة

هو نفسه اللي قرر في حاجة إسمها كليات قمة اللي دخلها ما جبتهوش ولادة حتى لو داخلها أصلا بفلوس أبوه

هو نفسه اللي قرر إن الرجل بريستيجه في شهادته وال Title بتاعه في الشغل ، حتى لو طموح وشاطر وحرك وشيك وبيكسب كويس

هو نفسه اللي قرر إن الشياكه بدله وجزمه بكعب

هو نفسه اللي قرر إن نيش السفرة ومحتوياته أهم من العريس نفسه

هو نفسه اللي قرر إن القايمة هي اللي هتحافظ على البنت من المرمطه

هو نفسه اللي قرر إن العريس لو شقته مش تمليك يبقى مايلزمناش

هو نفسه اللي قرر إن العروسه لازم تلبس فستان بآلاف الجنيهات لمدة ساعتين والعريس يلبس بيبيون يبقى هيموت منها عشان يبقى شكلهم حلو

هو نفسه اللي قرر إن الفرح لازم يبقى متكلف جدا والعريس والعروسه يقضوها رقص قدام الناس والا يبقى فرح وحش

هو نفسه اللي قرر إن الصالون بتاع الضيوف يبقى مساحته نص الشقه ومكتوب عليها ممنوع اللمس

هو نفسه اللي قرر إننا ما ينفعش نتجوز وفي شوكه ناقصه في البيت

هو نفسه اللي قرر إن كل ما تجيلك فلوس حوشيها واشتري دهب وألماظ ولو سافرتي وإتبسطي بيها تبقي هبله ومش عارفه مصلحتك

هو نفسه اللي قرر إن المطلقة أو الارملة مواطن درجة تانية ملهاش نفس حقوق الأولى وسهل الاستغناء عنها والتلاعب بمشاعرها

هو نفسه اللي قرر إن الشارع بتاع السايس وان ال Tips من حق البياع والا تبقى بخيل ومن حقهم يشتموك

إحنا بقينا بنلبس ونتجوز وندرس ونشتغل عشان أحلام وقرارات وطموحات ناس غيرنا

تابلوهات لو الأجيال الجديدة مش هتغيرها وتطلع بره الصندوق هيفضل اللي بيسموه "المجتمع" أو "العرف" ده ياخد قرارات لحد ما يوصلك تبقى إنسان آلي ممسوخ بتتجوز وتعيش بالريموت كونترول

أفكار مريضة .. اعمل اللي تحبه .. وسيبك من المجتمع المريض.

غيرت لينك الجروب واللي مش عارف فكرة الجروب هي المشاركة يعني لو حد حابب يحكي حاجة مضايقاه ل Strangers او مشاكل بتواجهه
ولو حد يقدر يساعد بحاجة او حتى يكون Good listener دا هيبقى عظيم
https://t.me/+lV_7m5p1SW4xOGU0

صدمات كتير بتمر بيها وبتأثر عليك لكن في الآخر بتقدر بفضل الله تتخطاها وتقف على رجليك.. لكني أزعم إن فيهم على الأقل صدمة واحدة الزمن من بعدها واقف.. ما بيتحركش.. كل الحاجات شبه بعضها.. الأيام.. المشاعر.. الأشياء.. حتى أنت واقف مكانك ما بتتحركش وكأن رجليك مكلبشة عند الموقف ده واللحظة دي بالذات.

أكتر جملة مؤذية :
" دي جدعة مايتخافش عليها "
و لأنها جدعة محدش بيهتم بيها ولا حد بيحارب معاها !
و بتفضل طول عمرها تواجه كل مشاكلها بنفسها لأنها جدعة و بميت راجل
لأنها ايه؟؟؟ جدعة
بس "الدلوعة" الكل بيخاف عليها و بيداري غلطاتها و يساعدها عشان يا حرام مش بتعرف تعمل حاجة لوحدها.
و بتلاقي الجدعة على حافة الإنهيار نفسياً و صحياً و إقتصادياً
لأن الكل متكل على جدعنتها اللي هي مع الوقت بتكره الميزة دي فيها و في شخصيتها.

اللي اتعود على العلاقات المريضة مبيعرفش يستقبل العلاقة السوية بمرونة، ودايماً بيكون عنده حالة إرتياب وشعور بالمؤامرة، فلو انت الطرف اللي داخل حياة الشخص دا ياريت تكون عارف كويس اوي أنك مش دكتور، وأنك مش مطالب تعالج حد عشان يقدر يكون صالح للدخول في علاقة سوية من جديد.. لأن مش من السهل خالص أنك ترجع لحد الشعور بالإستقرار النفسي والأمان والراحة وكل حاجة تخليه عارف يتحكم في مشاعره وقادر يديك حاجات زي ما هو طول الوقت بياخد منك، فياريت متسمحلوش يكون هو الطماطماية البايظة اللي اتحطط في قفص أنت موجود فيه وفجأة تلاقي نفسك خارج من علاقة مريضة ومش عارف تستقبل اي علاقة سوية بعد كدا بمرونة، ويسيطر عليك حالة إرتياب وشعور دائم بالمؤامرة، ودايرة وبتدور، ويا عالم مين جاي بعدك مكانك، ومين عليه الدور..

الإنسان لما بيتعرض لصدمة أو صدمات متتالية ومايعبرش عن غضبه بأي شكل فهو بينتج رد فعل سلبي تجاه الصدمة دي، زي مثلاً أنه واجه مشكلة كبيرة في شغله فيبطل يشتغل، واجه أزمة عاطفية فيبطل يحب، خانه صديق فيقطع علاقته ببقية الأصدقاء، بيتعرض للضغوط المادية فيقتصد و يزهد في استخدام الفلوس لدرجة صعبة.
الإنسان المصدوم يحتاج للمساعدة و الحب والدعم حتى لو بيكابر وبيقول أنه كويس ومش محتاج حاجة من حد، حتى لو مش بيبكي ولا بيزعق ولا بيعبر عن غضبه، أغيثوا بعضكم، وتراحموا.

‏بالوقت هتفهم إن الناس مبترتاحش غير في الأماكن اللي بتقبلها زي ما هي، محدش هيرتاح مع حد بيحاول يغيّره، محتاجين نتعلم نقبل الناس زي ما حبيناهم، اللي عايز يغيّر من حاجة عشان المركب تمشي يغيّرها من نفسه مش بالعافية أو بالإجبار ، وساعتها المركب هتمشي ، ‏مع كل مرة خليت حد يغيّر حاجة بالإجبار ف انت خسرت جزء جواه مش هيرجع زي الأول.. وبالوقت ومع التغييرات اللي بتجبر اللي قدامك عليها هتخليه بني آدم تاني على مزاجك.. بس مش على مزاجه هو، أول لما يحس إنه متكتف هيسيبك ويمشي، الناس فطرتها بتدور على الحرية والسلام، محدش هيتكتف وهيفضل متأقلم.

عمر ماحد بيكرهك هيشوفك كويس ولا حد بيحقد عليك هيشوفك تستحق اللي أنت فيه، اتشقلب بقى كن أنتيم لأولياء الله الصالحين بردو مش هيحبك وهيكدب كل الشواهد دي عشان يرضي إحساسه الداخلي تجاهك، درب من دروب الجنون إنك تسعى لإرضاء أي شخص في العالم فما بالك لما تشغل نفسك بإنك تلقى استحسان حد ما بيحبكش، اليوم فيه 24 ساعة ومش مكفي ننجز فيهم اللي المفروض ننجزه عشان نعيش بس فبتلاقوا منين تدوروا على كسب رضا الناس، وجو الحلو هيثبت نفسه ومصيره هيعرف اني كويس ماتشغلش بالك بردو ما عنه ما عرف إني كويس هستفيد أيه لما يعرف هيختم لي ورقي عشان أدخل الجنة مثلا

قدسية العلاقات هى في كونها خاصة بين الأشخاص وألا تكون مشاعاً للجميع يتابعون تفاصيلها، المؤسف في عالمنا الافتراضي أن اظهار المشاعر أصبح وسيلة لجذب الأنظار والاعجابات وربما التعاطف أو السخط، وهنا تفقد العلاقات قدسيتها وتتحول إلى وسيلة لاشباع الرغبة في الظهور أو الشهرة أو إرضاء النفس بأنك شخص جيد تحب من تربطك به علاقة أو أنك صديق جيد لا تخذل صديقك وقت الشدة أو انك زوج حنون متعاون قد تكون كذلك فعلا لكنك مع الوقت تجد نفسك تلهث وراء الاطراء والشهرة بدلاً من فعلك لتلك الاشياء من أجل من تربطك به علاقة، من أجله فقط، فتجعل له شركاء، ومع الوقت يصبح من تحب هو الوسيلة للحصول على الاطراء .

‏اشتغل على نفسك من غير م تعرف الناس إنك بتشتغل على نفسك، إشتغل عشان خاطرك انت مش عشان خاطر حد، حتى لو محدش خد باله من تغييرك إفضل مكمل زي ما انت، مش كل الناس عندها السلام النفسي اللي يخليها تيجي تقولك انك بقيت أحسن ، مش كل الناس هتحب تشوفك أحسن أصلاً ، حتى لو كانوا أقرب الناس ليك ، ‏ولأن الناس اللي حواليك سبب كبير جداً من تكوينك وطريقة تفكيرك ، ف أنسب حل تخليك في نفسك ودافِع لنفسك، حتى لو كانوا ناس كويسيين ، بردو متتعودش تربط دوافعك بوجود حد، الناس دايماً بتروح وتيجي.. مهما كانوا قريبيين منك النهاردة ممكن متلاقيهمش بكرة.

القوة الحقيقية إنك تكون قادر ترد، وتجرح، وتضر بس ماتعملش ده.. تبقى فاهم بس تستغبى.. تسمع الكذبة لكن تسكت وتعمل مصدقها عشان ماتحرجش اللي بيقولها.. تكون متأكد إن السبب الفلاني اللي بيتقال ما هو إلا حجة خايبة بس تمام هبلعها مادام اللي قدامي اعتبر اللف والدوران منهج..
عقولنا فاهمة، وذكاءنا عمره ما خيب ظننا، ولساننا يقدر بسهولة يكون سكينة بس إحنا بنقرر إن لأ.. فكرة إنك تنتصر لأخلاقك وتربيتك أصعب بكتير من العكس..
في النهاية كل واحد عارف كويس هو مين، عمل إيه، وغيره مين.. السكوت في أوقات كتير بيبقى نعمة.. مش سكوت الضُعاف لكن سكوت النُضاف.

كل عام وكلكم طيبين وبخير رمضان كريم عليكم

كل عام وأنتم بخير بمناسبة عيد الفطر المبارك، أعاده الله عليكم باليمن والبركات

ببساطة؛ ميكيافلي شايف إن الانسان بطبعه أناني وجشع ومنافق وعنده شراهة للحصول على الربح، ومش بس كدا، هو شايف كمان إن البشر كلهم طغاة، بس الفرق بين الشخص الطبيعي و الطاغي، إن الطاغي عنده الصلاحيات والوسائل اللي بتمهد له الطريق انه يكون كدا، لكن الشخص الطبيعي -أو اللي انت بتشوفه كويس- معندوش الصلاحيات دي.