“Овозларингизни Набийнинг овозидан баланд қилманглар” — Ҳужурот сурасининг юқоридаги 2-ояти нозил бўлгач, Собит ибн Қайс розияллоҳу анҳу Расулуллоҳ саллаллоҳу алайҳи васалламнинг давраларидан ўзларини тортиб қўйдилар. Буни Сарвари олам дарҳол пайқадилар ва:
“Собит ибн Қайс қаерда? Мен уни кўрмаяпман” — дея бир ансор саҳобани хабар олишга юбордилар.

Пайғамбаримиз саллаллоҳу алайҳи васаллам давраларида кўринмай қолган саҳобаларни сўраб турдилар, агар бемор бўлсалар — ўзлари бориб йўқлардилар. Саодат асри тарихида ҳазратнинг кўп саҳобаларни номма-ном сўраб излаганликлари битиб қолган.

Эслайсизми?
“Билол қаерда?” — дедилар.
“Бетоб”, — дейишди, у зот ўзлари бориб кўрдилар.
“Абу Ҳурайра қаерда?” — дедилар.
“Илм билан банд”, — дейишди. Ҳаққига дуо қилдилар.
“Саъд ибн Муоздан хабар олдингизларми?” — дедилар.
“Ҳолати оғир”, — дейишди. Ҳузурларига бордилар.

Бу каби ўрнаклар бисёр. Эътиборимни тортган жиҳати шуки, Пайғамбаримиз саҳобаларнинг фақат қудратли ёки бадавлатларини эмас, балки мискин ва ожизларини ҳам сўратардилар. Улардан кўпроқ хабар олардилар.

Ғазотга чиқмаган Каъб ибн Моликни, уйлангач кўринмай қолган Абдураҳмон ибн Авфни ҳам сўраб йўқлатганлари маълум.

Шу йўқловлар ичра бир йўқлов бор, шу изланганлар ичра бир излов бор:
У — масжидни супурувчи қора, қари аёл эди. У вафот этди. Саҳобалар унинг вафотини аҳамиятли санамадилар, ўзлари дафн этдилар.

Расулуллоҳ саллаллоҳу алайҳи васаллам уни ҳам эсладилар, кўринмагани учун сўрадилар. Ҳодисани баён этишди.
Шунда у зот:
“Айтсангиз бўлмасмиди?” — деб оғриндилар ва қабр тепасига бориб, қайта жаноза ўқидилар.

Бу воқеаларни не учун эсладим?
Бир ибрат истадим.

Эй, давраларнинг гултожи бўлиб ўтирган инсон! Атрофингизга боқинг, кимлар бор эди, кимлар кўринмаяпти? Нечук кўринмаяпти? Сизнинг ҳузурингизда камнамолигига сабаб нима?

Нима мушкуласи бор? Ҳузурингизга нега келмаяпти? Муҳаббати камайдими, маблағими ё вақтими? Эҳтимол, бемордир.

Бир марта сўранг, бир марта йўқланг, бир марта чорланг.
“Фалончи қаерда?”, “Фалончи кўринмаяпти?” — деб қўйинг.

Фурсат кетмасин.
Эҳтимол, у инсон биттагина йўқловга, биттагина имога, биттагина ишорага маҳталдир. Балки шу нарсалар уни сиздан тўсгандир.

Вақт — беаёв душман.
Бугун даврамизда кўринмаганларни эртага дунёдан ҳам топиб бўлмаслиги мумкин.

Уларни вақтга бой берманг.
Кейин “Айтсангиз бўлмасмиди?” деманг.
Зеро, биз айтдик…

2soat salovot
https://t.me/ziyomadrasasi

#eslang_eslating

Juma kuni ko’p salovat aytishning fazilati!

✍️ @toliblarga_nasihat
🎙️ @toliblarga_ovozli