#الحاجات اللي تزيد ادرار الحليب عند الام المرضع ..

- الخضراوات والفواكه والحليب ومشتقاته ..

- شرب الماء بكميات كافية ..

- الابتعاد عن الحلويات والسكريات والمنبهات زي القهوة ..

- الابتعاد عن المشاكل والضغوط النفسية ..

-#الحبوب هادم ممتازة جدا فيهم هلبا اعشاب وفيتامينات زي

- الحلبة وممتازة جدا لادرار الحليب وتقوية الدم ..

- اليانسون .. ممتاز لادرار الحليب وينزل مع الحليب يهدي الطفل

#حبة مرتين ف اليوم قبل الاكل ..

وماتنسيش تراجعي دكتورة النساء لو تعاني من مشاكل مرضية

د زياد عبدالله ..

#للتذكير ..

- القمل ليس دليل ع عدم نظافة الطفل

- القمل هو عدوى زيه زي اي عدوى اخرى وتنتقل للطفل سواء كان نظيف او غير نظيف ..

#علاج القمل بكل بساطة ..

- ترش البخاخ ع الشعر ونخلوه نص ساعة..

- نمشطو الشعر باش يتنحى القمل الميت ..

- وبعدين نخلو المحلول ع الشعر 8 ساعات او طول الليل والصبح نغسلو الشعر بشامبو عادي ..

- للاطفال والبالغين بعد عمر السنتين ..
#القمل عند الاطفال ..

عدوى تصير في فروة الراس متاع الاطفال وحتى الكبار وينتقل هلبا بين الاطفال في المدارس ..

#القملة الواحدة البالغة تعيش اسابيع .. وتضع 10 بيضات تقريبا كل يوم في راس الطفل ... والبيض يفقس بعد اسبوع ويطلعو صغار ويكبرو وهكذا .

#غالبا القمل غير مضر صحيا .. لكن يسبب حكة فروة الراس والقلق عند الاطفال ..وطبعا القمل يتغذى من دم الراس ..وممكن يسبب فقر دم في

#الوقاية والعلاج .

1 * لازم تعلمو الطفل مايشاركش اي شي مع زملائه في المدرسة

2 * لازم نغسلو الوسايد والفراشات القبعات والاوشحة ولازم تنعزل حوايج الطفل عن باقي خوته .د.

#سرة المولود ...

1 * السرة غالبا تطيح في 10 ل 14 يوم ..

2 * لو قعدت 4 اسابيع وماطاحتش لازم تشوف دكتور ..

3 * ديما الحفاظ يكون تحت السرة مش تسكريه فوق الصرة لانه مرات يوصلها بول البيبي وتتلوث وتلتهب ..

4 * الكحل وكمون الحوت هادا ممنوع استعماله للسرة ..

5 * غالبا السرة تقعد منتفخة وصايرلها بعج ماندوروهاش ولانستعملو اي شي ..تبدا ترجع بروحها مع عمر 6 شهور للعامين ..

6 * وبعد تطيح ادفنيها .. والشرع يقول الدفن افضل لكن مافي شي لو لوحتيها في الكناسة ..

7 - فكرة تبرا متاع سرة ولدي نلوحها قدام مستشفى باش يطلع دكتور ولا قدام مدرسة باش يطلع معلم ...غير صحيحة وشكرا

د زياد عبدالله ...

وصفة لزيادة وزن الطفل ..

تاخد التمر وتهرسه كويس ..

وتضيف عليه السمسم المطحون ..

وتعطيه لطفلك بعد عمر 6 شهور ..

#النتيجة ..
طفل بوزن ممتاز وت يتحقق حلم الجدة اخيرا ..

وسلمتو ..

- طفلك مايتكلمش اعطي اوميقا 3 ..

- طفلك تركيزه ضعيف وحفظه ضعيف اعطي اوميقا 3 ..

- طفلك ماياكلش اعطي اوميقا 3 ..

- طفلك مناعته ضعيفة اعطي اوميقا 3 ..

#الاوميقا 3 نلقوها في الحاجات هادم ..

#الأسماك والمأكولات البحرية خاصة السلمون والتونة والسردين .

#المكسرات زي جوز عين الجمل ..

#اللبن والحليب ومشتقاته ..

حاول تركز ع الحاجات الطبيعية اللي فيهم اوميقا .. وتقدر تعطي شراب ..

#بعد عمر السنة
5 ملي يوميا لمدة من 1 ل 3 شهور ..

بعد ال 3 سنوات ..
5ملي مرتين يوميا لمدة من 1 ل 3 شهور ..

وسلمتو ..

د.زياد عبدالله ..

اختي الام .. تقدري تديري كشف لطفلك ف الحوش ..

المنشور هذا حيخليك طبيبة لطفلك ..

1 #اول شي حطي يدك ع راس طفلك وتحسسي فتحة اليافوخ ... ( لازم تكون مفتوحة وحجمها كويس ومفروض تتسكر من عمر 6 شهور ل عام ونص ) ..

2 #الوجه ..
شوفي عيونه مافيهمش احمرار او زبط او يدمعو هلبا.
خدوده مرات فيهم حساسية .امنعي البوس ونظفي بمية وامسحي بكلنكس جاف .. ومرات نستعملو مرهم مرطب ..

3 #الانف ..
لو مسكر او في اي شي مفروض يتنظف ..بقطرة الاملاح والشفاط ..

4 #الفم ..
يكون نظيف ومافيشي طبقات بيضاء .. وتنظفي بشاش مبلل .. وتأكدي انه مافيش اي انتفاخ او لسانه مربوط من تحت ..

5 #الرقبة ..
تكون طبيعية ومفروض يرقد يمين ويسار ( يعني مش شادها يمين بس او يسار بس .. ) ويتحكم فيها رقبته بعد عمر 4 شهور ..ومافيش كيس او انتفاخ ..

6 #الصدر ..
لو مولود .. مرات تلقيه منفوخ(نتيجة تاثيرات هرمومات الام ) ممنوع تعصريه لانه يلتهب ( ياخد وقته ويمشي ) ..
مفروض يتنفس براحته بدون مايبانو عليك الضلوع ..

لو البنية كبيرة شوي يعني من 6 شهور وطالع .. تأكدي انه مافيش كبر واضح في حجم الثدي لانه مرات صاير بلوغ مبكر وتلخبيط في الهرمونات

7 #السرة ..
تكون جافة ومافيش حوالينها احمرار او مادة .. تطيح من 10 ل 14 يوم ..

8 #الحوض .
مايكونش في تطقطيقة ( كل مفاصل الطفل تطتطق وهادا شي طبيعي لانها ف مرحلة نمو الا مفصل الحوض لو فيه طقة لازم كشف مرات خلع ) ..
لما يبكي او يكح تاكدي انه مافيش بعج ( انتفاخ يطلع في المنطقة الاربية يعني في زاية الفخد .. ومافيش انتفاخ فوق السرة يطلع ويختفي ..)

9 #المناطق الحساسة ..
- الخصيتين .. يكونو نازلين في الكيس .. ومافيش انتفاخ او احمرار او وجع .
- العضو الذكري .. تكون فتحة القضيب ف مكانها .. ويكون حجم العضو طبيعي يعني ( الولادة 2 سم تقريبا ) (ومن شهرين ل 5 شهور يكون 3 سم واكتر) ..( ومن 6-12 شهر يكون 4 ل 5 سم ) ...
(من 1 ل 2 سنة يكون 5 ل 6سم ) ..( ومن 3-4 سنوات يكون 6 ل7 سم ) . وطبعا تقدر تقيس بمسطرة عادية ..

10 #الرجلين ..
تفتشيهم وخاصة بين الاصابع مرات ف فطريات او شعره لافة ع صبعه ...
وحتى يبانو لو فيهم تقوس كبييير .. لانه التقوس البسيط غالبا يتعدل بروحه وخاصة لو عمره قبل السنتين ..

11 #اخر حاجة .
* اي لون ازرق يطلع ع الفم والشوارب واللسان اثناء الرضاعة او البكاء او المجهود البسيط .. لازم كشف لانه مرات مشكلة في القلب ..

#أي دوخة مفاجئة .. او كثرة تبول وكثرة شرب الماء ونزول الوزن فجأة مرات الطفل مصاب بالسكر ..

#أي حركة غير طبيعي زي قلبة العيون او خضة او شي لازم كشف ..

#الطريقة هادي انتي مش ام بس .. انتي تديري في شغل دكتور اطفال .. ومستحيل تفوت حاجة عليك .

وربي يحفظكم ..

د زياد عبدالله ...

القمل عند الاطفال

المانجا للاطفال ..

امتى مسموح للطفل والام الحامل ركوب الطيارة

طريقة البحث عن اي منشور سألتكم بالله حاولو تساعدونا في البحث مش كل شي أسئلة مكررة

الاكل عند الاطفال  ..

* اهم موضوع في حياة الطفل هي مرحلة ادخال الاكل ..وهدا حيقرر هل هوا حيكون طفل ياكل كويس او شادها حلو بس ..

* وقبل مانبدو ماتنساش ..
الماء نعطوه للطفل من عمر 4 شهور للي يرضع صناعي
ومن عمر 6 شهور للي يرضع طبيعي ..

                  .. امتى نبدو الاكل للطفل ؟ ..

* منظمة الصحة العالمية قالت يا امهات ابدو الماكلة لصغاركم  من بعد الشهر السادس ..

وفي هلبا اكاديميات قالت ابدو الاكل من عمر 4 شهور ..

- باهي يا دكتور كيف ندير .. هل نبدا من بعد 4 شهور ولا بعد 6 شهور ؟ ..

* بسيطة يا ماما ..

لو لقيتي الحاجات هادم في طفلك معناها راهو يقدر ياكل ..

1 - لو يقيم في راسه كويس ويتحكم فيه ..
2 - لو لقيتيه يتحفز ويفرفش ويمطق في ريقه ويخبط لما يشوف في الاكل او لما يشوف فيكم تاكلو معناها مستعد ياكل ..
3 - لو وزنه فوق 5 كيلو معناها مستعد ياكل ..

* باهي شفنا الشروط هادم ولقيناهم ينطبقو ع طفلي ..كيف نبدا ف ادخال الاكل ؟ ..

اول شي راك تنسى ...  الطفل من الولادة وحتى عمر 4 شهور مفروض ياخد حليب فقط فقط فقط .

                       ( من عمر 4 شهور )

*طبعا يفضل انه نبدو من بعد 4 شهور وخاصة اللي يرضعو رضاعة طبيعية فقط .. لانه حليب الام فيه حديد يكفي فقط من 4 ل 6 شهور وغالبا لو قعد ع الحليب الطبيعي فقط ل 6 شهور حيخش ف فقر دم ( لدلك مفروض نبدو الاكل باش يحصل حليب او لو مايقدرش ياكل مفروض ياخد قطرة حديد ) ..

* اول شي نبدو بيه الخضرا .. لانه لو بدينا بحاجة حلوة الطفل حيتعود ماكلة الحلو بس ويشدهالك شكاليط وحلوه بس .

1 * القرعة الحمرا والكوسا والسفناري ..

- تطبخ وتهرس القرعة وتخليها تبرد وتعطي الطفل بالشوي .. 3 ايام لو ماصارتش حساسية طفح جلدي اسهال ترجيع اي مشاكل معناها القرعة كويسة .. اول 3 ايام وجبة واحدة فقط

- رابع يوم حندخل النوع التاني هو الكوسا ..نمشي 3 ايام وجبتين ف اليوم ( وحدة قرعة والتانية كوسا )

لو مافيش تحسس معناها نكمل للنوع الثالث الجزر ( السفناري ) نكمل 3 ايام .. ممكن نعطي وجبتين وممكن حتى 3 لو الطفل متقبل وماعنداش مشاكل

2 * الارز ...  الفواكه ( تفاح كمثرى موز .. الخ )

الفراولة في هلبا كلام عليها لانها تسبب تحسس لدلك فوتوها افضل لعمر السنة ..

3 * البشكطي ..  فيه متاع 4 شهور وفي متاع 6 شهور

                       ..(من عمر 6 ل 8 شهور )..

هنايا يبدا ادخال البروتين ..

1 - الدجاج ..
2 - اللحوم الحمراء ( في يقول لبعد السنة .. بس اخر كلام يقولك اعطي من بعد الشهر السادس )
3 - السمك ..
4 - مشتقات الحليب نعطو الزبادي ويفضل الزباي الصادة من غير سكر ..
الجبنة مش كويسة قبل عمر السنة لانه ماعندناش انواع كويسة وكلها زيوت نباتية مهدرجة وهادا ضار بالطفل

5 - صفار البيض ويكون مطبوخ افضل من مقلي
مقلي بزيت الزيتون من بعد 6 شهور
مقلي بالزبدة من بعد 9 شهور  ..
* الشوفان ... السحلب ..

                    .. الممنوعات قبل عمر السنة ..

1 - السكر ممنوع لعمر العامين والملح ممنوع لعمر السنة ..

2 - زيت الزيتون بكميات كبيرة ممنوع ( كمية بسيطة جدا عادي )
3 - المكسرات ممنوعة لبعد 3 سنوات ( لو مضطر تعطيه لازم تكون مطحونة بعد السنة ولو مضطر هلبا ممكن بعد 8 شهور لانها صعبة الهضم ) ..
4 - ممنوع السكريات والشكاليط والحلويات والحاجات الملونة والشيبس والمشروبات الغازية والسنتوب والشاهي والقهوة
ع الاقل لعمر 6 سنوات ..

5 - حليب الابقار والباكو وحليب الابل وحليب السعي كله ممنوع قبل السنة ..
* حليب الماعز ممكن نعطوه ف حالات خاصة زي حساسية بروتينات البقر ( ف بعض الحالات يمشي معاهم ) لكن لازم نضيفو حبة فوليك اسيد مرة كل اسبوع لانه يسبب فقر دم ..

                       .. ( فوق عمر السنة ) ..
* نقدر نضيف الملح بكميات بسيطة ..
* نقدر نعطي حليب الباكو وحليب الوردة ..
* نقدر نعطي الفراولة والخبز والعسل وهلبا حاجات تانية ..

طبيا بعد عمر السنة نقدر نعطي كل شي بس يكون بدون سكر


                     ..  نصائح قبل الاكل    ..

1- اهم نقطة لازم نعرف الوجبة هل يقدر يبلعها الطفل او لا .

*  اقل من 9 شهور .. لازم تكون سائلة او شبه سائلة ..
* اكبر من 9 شهور .. لازم نزيد قوام الوجبة بالتدريج ..

2 * مفروض عنده سواني وكواشيك خاصة بيه وتكون بلاستيك افضل من النحاس والالومنيوم ..

3 * لازم ياكل وهو مقعمز او متسطح بزاوية 45 درجة .( لو عمره اقل من 5 شهور ) ...

4 * اطبخي الماكلة كويس وعادي لو بتخففيها بشوية ماء .

5 * ماتخلطيش الماكلة بالعسل او الملح او السكر .

6 * ماتحطيش بهارات ومقبلات للماكلة ..

7 * ماتغصبيش العيل ع الماكلة غصب لانه الشهية عنده متقلبة وماتعيطيش عليه ( وجو كول سم والجو الليبي اللي نعرفوه ) لانه حيبدا الاكل عنده زي العقوبة ..

8 * ماتعطيش الماكلة بالمرضعة .. اعطيه بالكاشيك البلاستيك باش يتعود ..