🔻 اوستاد محمد منزوی زنجانی

(۱۳۰۴-  ۱۳۸۲ ش)


شهریارا سلام

بیرینجی بؤلوم

🔸سلام اولسون سنه جانیم شهریار،

نه تک سن‌سن ایران ایچین افتخار،

اورتا شرق‌ین خلقی سنی آلقیشلار،

سن‌سن بیزیم شوکتیمیز، شانیمیز،

سن‌سن بیزیم آدیمیز لا سانیمیز


🔸شهریاریم، شهریاریم سن‌سن، سن،

ائو، ائشیگیم هر نه واریم سن‌سن، سن،

«آی ال موزدوم» ، «ایل زوماریم» سن‌سن، سن،

سن‌سن منیم طایفام، ائلیم، تباریم،

سن‌سن منیم دونیادا هر نه واریم.

🔸سن اؤلکه‌مین اَن ایشیقلی آیی‌سان،

آللاهیمین اَن بیر بؤیوک پایی‌سان،

سن «سعدی»مین، «حافظ»یمین تایی‌سان،

قربان اولوم سنین کیمی آیا من،

شکر ائیله‌رم سنین کیمی پایا من.

🔸سالمیشدیلار تورک بوینونا چاتی‌نی،

سن اویناتجاق تورک شعری‌نین آتی‌نی،

دیریلدیبسن تورک ادبیاتی‌نی،

یئری واردیر زنگانلی ‌دا شاد اولسون،

زنگان‌دان دا تورک ایچینده آد اولسون.

🔸«انسان اولان خنجر بئلینه» ساشماز،

انسان ایچین یالان دئمک یاراشماز،

یالان سؤزدن هامی بیلیر کار آشماز،

دوغرو سؤزون بازاری گر سویوق‌دور،

یالانین ‌دا منزلی چوخ یووق‌دور....

دوامی وار....

#زنگان_شاعیرلری
#شهریار_و_زنگان_شاعیرلری
#زنگان_پلاس

❇️ لطفا پست‌لاری، قایناق ایله پایلاشین.

https://t.me/zanganplus

🔻 اوستاد محمد منزوی زنجانی

(۱۳۰۴-  ۱۳۸۲ ش)


شهریارا سلام

ایکینجی بؤلوم

🔹یالان دگیل آللاه بیلیر بو سؤزوم،

اینانماسا هئچ کس، ایناننام اؤزوم،

شهریارا قربان‌دیر ایککی گؤزوم،

ایسته‌میرم بو گول سارالسین، سولسون،

یالان دئسم منیم دیلیم لال اولسون.

🔹سن‌دن اولوب تبریز بهشتِ برین،.

چوخ اوجادیر فکرین، گومانین درین،

سن یاراتدین «حیدربابا» اثرین،

غم‌لر سنی قوجالتماسین شهریار،

«بوش سؤز»سنی گیجالتماسین شهریار.

🔹دئمه‌گینن «شیطان بیزی آزدیریب»،

«محبتی اورک‌لردن قازدیریب»،

«قره گونون سرنوشت‌ین یازدیریب»،

اَل وئر منه گئچمیش‌لری اؤتورک،

قره گونو اؤلکه‌میزدن گؤتورک.

🔹سن دئیرسن «ایگیت امک ایتیرمز»،

«نامرد اولان عؤمرو باشا یئتیرمز»،

«آما نئیلیم سؤز کی اثر بیتیرمز»،

مرد اوغولا دونیا قارا زیندان ‌دیر،

نامرد ایچین گولوستان‌ دی، بوستان ‌دیر.

دوامی وار....

#زنگان_شاعیرلری
#شهریار_و_زنگان_شاعیرلری
#زنگان_پلاس

❇️ لطفا پست‌لاری، قایناق ایله پایلاشین.

https://t.me/zanganplus

🔻 اوستاد محمد منزوی زنجانی 🔻

(۱۳۰۴-  ۱۳۸۲ ش)


شهریارا سلام

اۆچونجو بؤلوم

🔹من دئییرم هر آش بیر دادلیق ایستر،

قفس‌ده‌کی قوش‌لار آزادلیق ایستر،

غم‌لی اولان اورک‌لر شادلیق ایستر،

اما حیف غم‌لریمی بیلن یوخ،

گؤزلریمین قان یاشینی سیلن یوخ.

🔹شهریاریم «سنین کؤنلون شاد اولسون»،

«عؤمرون وارکن، آغزین دولو داد اولسون»،

وطنداش‌ین همیشه آزاد اولسون،

دئسین، گولسون داماق‌لاری چاغ اولسون،

یاتاق‌لاری گولشن اولسون، باغ اولسون.

🔹«بختیار»ین اگر «پژمان» واریدی،

زنگانین ‌دا «حکیمیان » واریدی،

تبریزین بیر بؤیوک انسان واریدی،

آدی حسین، تخلّصی شهریار،

«بیر عؤموردور غم اوستونه غم قالار».

🔹مشهد ائدر «عماد»ینا افتخار،

شیراز دئیر من‌ده «حمیدی»لر وار،

تبریز دئیر منیم بالام شهریار،

ایشیقلی‌دی گون‌دن، اولدوزدان، آی‌دان،

دئدیکلری جوشغون‌دو، جوشغون چای‌دان.

🔹جوشغون دئدیم «جوشغون» دوشدو یادیما،

یاخشی یئتدی او شاعر فریادیما،

اونون کیمی دئیرم اوستادیما،

«سن شعر عالمی‌نین سازی، سؤزوسن»،

«سن شعرین معناسی، شعرین اؤزوسن».


دوامی وار....

#زنگان_شاعیرلری
#شهریار_و_زنگان_شاعیرلری
#زنگان_پلاس

❇️ لطفا پست‌لاری، قایناق ایله پایلاشین.

https://t.me/zanganplus