مستهل وزن  نصارى
لمولاتنا الزهراء وزينب عليهما السلام
~~~
اسمعج والحزن خيـم عليه
ونـاتـج لعـد گلبـي شجيــه
ييـمه لا تـونيـن
والگلبـي تمردين
اعـايـن حالتچ وصفج بديـه
◾◾◾◾◾◾◾◾◾◾
اعاين والدمع من خدچ يسيـل
وسـهرانـه ابـد مانايـمه الليـل
وتـلوجيـن مـنـج زايـد الويـل
من حيلي يريت افديلج الحيل
عمري العمـرج افـدي
والصطره عله خدي
نـارج بـالگلب تحرگ سريـه

✍🏻 *الشاعـرة ام مـهدي العيـداني*
◾◾◾◾◾◾◾◾◾◾
عني وين رحتــــي شمعة البيت
ونه بعدج ييمــه اوحيده ضليت
اگضــــي العمر ابحضنج تمنيت
ولا كسر الضلوع ابعيني صديت
عليج الشبت النــار
حرگت عتبت الدار
وابگلبي تشب حد المنيه

*✍️الشاعر فالح العامري*
◾◾◾◾◾◾◾◾◾◾
نارج  بالكلب  يايمه  زادت
اشوف اليوم جن حالج ترادت
بتج يم حسن للموت رادت
ولابعدج ابد لحظات عاشت
اشوجنج تودعين
واولادج تعوفين
مااعرف دواج شلون بيـه
✍️ الشاعره ام محمد الساري
◾◾◾◾◾◾◾◾◾◾
افديلج عمري وكل سنيني
امي الغاليه يا بعد عيني
عليج انحب انه وزايد حنيني
يبعد الروح مايهده ونيني
زهره يالحنينه
جايمته تجينه
الج بالكلب انصب عزيه

الشاعره ام ✍🏻زين العابدين لمحمداويه
◾◾◾◾◾◾◾◾◾◾
نارج بالگلب يايمه تسعر.
على حالتچ  اگليبى تفطر
اهيم اعليج ماهيد او افكر 
بتچ يام حسن للموت تنطر 
عني وين رحتي.
تركتيني بغربتي 
اون اعليج وناتي خفيه 
✍️الشاعره ام البنين
◾◾◾◾◾◾◾◾◾◾
انصبلج عزا يالحره اليوم
وضل انحب عليج ابحزن للدوم
وعيوني  عليج مفاركه النوم
على مصابج يزهره الكلب مهموم
شلتي وين ما وين
يبعد الروح والعين
ييمه دمعتي لجلج دم جريه

الشاعره✍🏻 ام رحمه الگاظميه
◾◾◾◾◾◾◾



https://t.me/zainabiat88

مستهل وزن نصاري
لسان حال مولاتي زينب عليها السلام
~
لا تـونيـن يـازهره الزچيـه
من بعدج يايمه اشلون بيه
حالي اخلافج اشلون
لوغمضتي الاعيون
تضل روحي حزينه ابـكل مسيـه
◾◾◾◾◾◾◾
من بعدج اضل ادموعي تجري
يام طول الحلو يفداچ عمري
ياصبـري ونفذ ويـاج صبـري
يشچايـة هـمومي ابسري تـدري

ولليـلج ماتنـاميـن
اشوفچ بس تلوچـين

مـوجـوعه وتـديـر العيـن ليـه
✍🏻 *الشـاعـرة ام مهـدي العيـدانـي*
◾◾◾◾◾◾◾
صوابج بالضلع يمه عماني
هد حيلي يزهره ودولباني
من بعدج تره تكثر احزاني
غياب الوالده يغير الواني

يمه بحركة الباب
أيست من الاحباب

اخلافج يم حسن اصفك بديه
الشاعره✍🏻 ام حسين رنا
◾◾◾◾◾◾◾
دولبني الدهر من زغر سني
وخلاني مناحه وكثر وني
ييمه الدار اصدله انه كتلني
النوايب من وكت وليه ولني

كسر كلبي زماني
بعد شصبر وتاني

نار افراكج ابكلبي سريه
الشاعره ✍🏻ام رحمه الگاظميه
◾◾◾◾◾◾
اصوابج لسه ينزف ماله طيبه
وجرحج بيش اشده يالنجيبه
وكلبي اعليج مابطل نحيبه
ومن دونج اضل انه غريبه

من بعدج اسيره
زينب الاميره

وبتالي العمر امشي سبيه
✍️الشاعرة ام عراق الشمري البصره
◾◾◾◾◾◾◾
لمصابج ييمه
الكلب مالـوم
علـه دارج يشفجه هجموا الكـوم
ولا هابـوج لا هابـو القيـوم
دمعي اعليج يجري مانشـف دوم

يـالحلوه مـعانيـچ
يمه بروحي انه افديج

من بعدج بقيت انه اباذيه
الشاعره ام كريم
طرفي
◾◾◾◾◾◾◾
اشلون انساچ یاامی الحنینه
یل رحتی وبعد ماضن تجینه
ييمه فرگتچ مره وحزینه
یلگبرچ خفی وماندری وینه

روحی اتریدچ الیوم
علیچ الگلب مالوم

اون اعلیچ والونه شجیه

✍🏻خادمة الزهراء ام قاسم حزباوي
◾◾◾◾◾◾◾
كسراني الدهر يايمه كسره
كلبي يالحنينه اشلون اصبره
اصد للباب دم عيوني تجره
على مصابج تضل ابصدري عبره

مجانج صبح خالي
ياعزي ودلالي

صفت دارج من بعدج خليه
الشاعره ✍🏻ام زين العابدين لمحمداويه
◾◾◾◾◾◾◾

https://t.me/zainabiat88

بعدغـيرك يخويـه احسين ماريـد
يـالفــراگك دليــل وروح مـاريــد
وحـدي الـداركم يحنــين ماريـد

اشضلي هنـاك ياروح الزچيـــه


✍🏻 *الشاعـرة ام مهـدي العيـداني*

وزن التجليبه
العنوان
(★اللحضات الاخيره★)

ياحـادي النـوگ مـرونه عله الوالـي٠٠٠٠
راح انشيـل وهــذا افراگه للتـالـي٠٠٠٠
★_

ياحـادي النـوگ ماترحم بعد بينـه٠٠٠٠
اخذنـه اهناك للشاطي دوديــنه٠٠٠٠

★___
ضل مـرمي البطل عبـاس ابو الغيـره٠٠٠٠
ويدريـنه نضل اخـلافـه ابحيـره٠٠٠٠
★____

ومـر بينـه نشوف اليشـبه الهـادي٠٠٠٠
شـباب النـوم مالايـگ عله اولادي٠٠٠٠
★_

والعريـس جاسم بالدمه محنـه٠٠٠٠٠
ياحادي النــوگ بالله عليك عطلنـه٠٠٠٠٠
★____

اشـوف ام الرضيـع اتلوچ بالحسـره٠٠٠٠٠
لبـنهه الماوصـل فوگ السبع عمـره٠٠٠٠٠
★____
اشمالك ماتـحن وتـرحم اعليـنه٠٠٠٠٠٠
حرم وأطـفال بعـد احسين ضلينـه٠٠٠٠٠
★___

يحادي النوگ مر بينه اعله اهالينـه٠٠٠٠٠
يحادي النوگ مربينه اعله اهاليـنه٠٠٠٠٠

✍🏻 *الشاعـرة ام مهـدي العيـداني*

https://t.me/zainabiat88

ابوذيات
ولادة مولاتي زينب عليها السلام

★_★_★_★_★_★_★_★

لم عون
فرحنـه واليحبنـه اليـوم لـم عـون
وجينـه انهنـي دار العود لـم عـون
نطـش اورود ويـه اليـاس لـم عـون

لم عيـن الوسيـعه الهاشميــة

✍🏻 *الشاعـرة ام مهـدي العيـداني*

🌺👑🌺

فرحت إلها

الزچيـه ابـيــوم صـارت فـرحت إلــها
وآيـه مــن المحنــه فــرحت إلــهـا
الانس والجــن نزلت فـرحت إلــها

تهـنئ الـفاطـم وحيــدر سويــه

✍🏻 *الشاعـرة ام مهـدي العيـداني*

🌺👑🌺

اخت الحسين

الخلگ والنـاس فرحت لخت الحسين
تبـارك بـالتـهانـي لخـت الحسيـن
يشامت لونــي منك لخت الحسين

ابزويـه من الـولادة الزينبـيــه

✍🏻 *الشاعـرة ام مهـدي العيـداني*

🌺👑🌺

★_★_★_★_★_★_★_★

https://t.me/zainabiat88

مجموعة ابوذيات الي عقيلة بني هاشم
🌹🌹🌹🌹
الحسن هاليوم بالمولد فرحلاچ
اجاج افلهفه متعنــــي فرحلاج
نظر لعيونج وشــــاهد فرحلاج

قويه وصابره الحد المنيـــــــه
🌺🌺🌺🌺🌺🌺
عقيلة هاشم الگنيه وسمهـــــه
زينب والفخر بيـهه وسمــهـــه
ابهلاهـل لليضدوها وسمهـــــه

وسمهم بالتـهاني الجعفريـــــه
🌺🌺🌺🌺🌺🌺
زينب لو ردت تنشد لسمهـــــــه
اذهب والماس مايوصل لسمهه
لطش أورود والزينــــــه لسمهه

النواصب واليحـبون الاذيــــــه
🌺🌺🌺🌺🌺🌺
ملك جبريل نــازل طش وردلج
اذا ساعــــه صعد عـنج ورد لـج
اسمعــــه يلقن ويلهـج ورد لج

دعاء العـفه والغيره سويـه
🌺🌺🌺🌺🌺🌺
الملامح والوصف حيدر شملهه
زيـنب هـاي يالتنـشد شملـهـــه
عطر فواح من خدهه شملـهــه

وضل طابع عطرها ابچف اديـه
🌺🌺🌺🌺🌺🌺🌺
✍🏻 *الشاعـرة ام مهـدي العيـداني*

https://t.me/zainabiat88

الشاعرة ام مهدي العيـداني


وزن الميمر

العنوان

﴿﴿﴿ سامحني مولاي ﴾﴾﴾

الجربه صـاحت والهمـوم اثجيلـه
خجــلانـه منـك ياكفـيـل الـعيـلـه


٠٠٠سامحني مولاي٠٠٠٠

ياسيّــد المـاي ابعـجل تــدرينـي
مـاخيـبـت ضنـك وجيك اكحيـله

٠٠٠٠سامحني مولاي ٠٠٠

وسمـع تـنــادي زينـب الحـوريــه
شـوف الطفل ياخويـه ذاب ادليـلـه

٠٠٠٠سامحني مولاي ٠٠٠٠

كلتلــهه عـونـج يـم طهـر بشريـني
هســه النهــر ورگاب الــچ افديـله

٠٠٠٠سامحني مولاي ٠٠٠٠

بيــدك شلـتنـي وللـنــهـر طرينـــه
عن الحنين ويـه الخـيم تحجـيلـه

٠٠٠٠سامحني مولاي ٠٠٠٠٠

ردينـه وانـا علـه الظـهـر ماليـني
وسهـام عـدوانــك كـثـر تـهليـله

٠٠٠٠سامحني مولاي ٠٠٠٠

نـفس السـهم صابـك واليـه اتعـده
ومايي خبط وي دمك الي اتسيـله

٠٠٠سامحني مولاي ٠٠٠٠

وعذرنـي مـاوفيــت الـك يالغـالي
وانـا الابـد مافـارگـيتـــك ليـلــه

٠٠٠٠سامحني مولاي ٠٠٠٠

عبـدالله ضامـي مـن العطش دلالـه
والـمي تـبــده ومــاروالــه اغليــله

٠٠٠٠سامحني مولاي ٠٠٠٠

خليـنـي يـمـك مــاارد خليـنــي
ويـاك امـوتـن ماگـدرت اوفيــله

سامحني مولاي٠٠ سامحني مولاي

✍🏻 *الشاعـرة ام مهـدي العيـداني*



https://t.me/zainabiat88

وزن النصارى
﴿جبل شامخ﴾


زينـب يالـردت تعـرف خبـرها
صبـر ايـوب ماواصـل صبـرها

هاي اخـت اليسـمونه الفـراس
اخت اللو غضـب يفـني أثـرها

اذكر موقـف إلها الشيب الرأس
بيوم الطـبت المجلس كفـرها

صاحـت بالكـفـر لا ماتگــدرون
آن تـمحـون للشـيعه ذكـرهـا

ابخطبطها العقليـه هزت الكـون
ثـوره وعمـت الدنيـا ابكبـرها

كلمـن شافـها حيـدر عـلي صاح
خـيرهم رجـف واخـر طفــرها

اذا رايـد بــعد احجيـلك ابـزود
جبـل شامـخ بقـت محـد كسرها

هيـبة حيـدره ونضرات الحسيـن
وشـجاعة حـامـي الخـدر گمـرها


✍🏻 *الشاعـرة ام مهـدي العيـداني*


https://t.me/zainabiat88

لم الحسن ٠ونيت والطم على الرأس
وذكر ضلعها العاب والدمهه لنداس
❉❉------❉❉------❉❉------❉❉

لم الحسن٠ هـلروح ماتبرد ابيـوم
وطول العـمر بالآه ارثيـهه للدوم

❉❉-------❉❉-------❉❉-------❉❉

لم الحـسن ياناس دم تجري الاعـيون
دفعو عليها الباب عصروها الامـتون
❉❉-------❉❉-------❉❉-------❉❉

لم الحسن حسرات مو حسره وتروح
الضـلت ثلـث ايـام محدبـه وتنـوح
❉❉-------❉❉-------❉❉-------❉❉
لـم الحـسن وحسيـن حيل العگل صاح
ومن طاحت عله الباب چن الگلب طاح
❉❉-------❉❉-------❉❉-------❉❉

لم الحسن دگـيت صـدري ولطمتـه
لمحـسن وگـع علگاع وبالي شفـته
❉❉-------❉❉-------❉❉-------❉❉

لم الحسـن هالكون يبـجي الدمع نار
المر عليهـا هـواي من گــوم الاشـرار
❉❉-------❉❉-------❉❉-------❉❉

لم الحســن عبرات حرگتـني ويـلاه
صب الدمع نـيران والجفنـي حرگاه
❉❉-------❉❉-------❉❉-------❉❉

لم الحسن٠ وحسين مايفتر ابچاي
علتـها علـت مـوت ماينفـع الـداي

❉❉-------❉❉-------❉❉-------❉❉
لم الحسـن٠ لاداي لاطـبه ليـهـه
ماتت وحدهه اتلوج والحسـرهه بيهه

❉❉-------❉❉-------❉❉-------❉❉
لم الحسن تاريـخ بـي كم ضحيـه
بي محسـن الزهراء وبـيه الزچيـه

❉❉-------❉❉-------❉❉-------❉❉
لم الحسـن تاريـخ مـن اول الكـون
بي يحجي كل الصار لمن يهجمون
❉❉-------❉❉-------❉❉-------❉❉

✍🏻 *الشاعـرة ام مهـدي العيـداني*

https://t.me/zainabiat88

وزن التجليبه
قصيدة
بعنوان
﴿﴿موت سيده الچنان﴾﴾

للزهراء عليها السلام

چوادر لم حسن ياناس نصبوها
والصرخات والهوسـات علوهـا
❉❉-------❉❉-------❉❉-------❉❉

ماعـدهـم رحــم مــن دارو عليـها
عصروها وصگـط بالبـاب غاليــها
ومچتوف ابوصيه الحيد واليها

واحد صـاح للـثاني أو تـولــوها
❉❉-------❉❉-------❉❉-------❉❉
مهظومـه مشـت والعين تلفــانــه
وديـن الله انهـدم هاليـوم بنيـانـه
وقرانـه تطــشر ضــاع عـنـوانــه

وصوت النايحه ابكل دار خلوهـا
❉❉-------❉❉-------❉❉-------❉❉
ماتت والضـلع ماجــابر اصوابــه
وبي ريحـت حرك دخان مـن بابـه
ولسه العيـن حمره وسوده جن غابه

عليـهه اورود مـو تربـان هلــوهاا
❉❉-------❉❉-------❉❉-------❉❉
الطمو عله الصدر للراحت ابدمـهـه
الجنه اشلون ارض المگبره اطمــهه
ويـاشجرة علي وياوردتـه الشمـهـه

وشـدو احـزام والونـات زيدوها

❉❉-------❉❉-------❉❉-------❉❉
وشـدو احـزام للشالت ولا ترجــع
ابليـل اضلم نعشهه وبلخفه اتشـيع
وهـاي ام المحنـه اگلوبنــه تفچـع

اتعطـلوو بالجنـازه ولااتشيعـوهـا

✍🏻 *الشاعـرة ام مهـدي العيـداني*


https://t.me/zainabiat88

الوزن نصاري

(( العنوان ندم واعتذار ))


وين انطي الوجه ندمان أنه هواي
يبو اسكيـنـه العـذر يمك شمرتــه



مو بـيدي وحگ صـدرك والاضلوع
اجيـت وبالرمل جرحـك رشگـتـه

حاولت ابتعـد من كل جهه وصوب
وأبــد مالـي قصـد بـيه ولچمــتـه

ومن حرورت الـگاع شتعل نار
هبيت وعلى وجهـك حركتــه

مااعرف شكول وشحچي هاليوم
دخان الخـيـم طافي وشعلتــه

وچم طفلـه وطفل لاذو عله اكتار
وبالتــربان والعـجه خنگـتــه


وسامحنـي بعد فوگ الجـره عليك
ستر ام الخـدر بالطـف رعبتـه


كون ويـاك اصيرن حيـل فشلان
ورد العايـل ابنـحره ضربـتـه


اصيـرلك درع مااخلـي لرجـاس
الچبـدك والنحر توصل نبلتــه


عچاجـه وانگلب وعميها الاعيون
وشحده الـگرب الگطـع رگبتــه

وشگـفها السهام ونبلت الشوم
ولا تطـفي لعد طفلك ضحگتــه



✍🏻 *الشاعـرة ام مهـدي العيـداني*

https://t.me/zainabiat88

شالت غـفـل بالليـل امنـه الحنينـه
بعد الخذاها المـوت مااضن تجينـه

سار ابنعشـهـه وراح حيــدر وليـهـا
ومن دم دموعـه اتسيل صبا عليها

كون احنه هم انشيل وياها هليوم
ماينحـمل الفـراگ لو صار للـدوم

ضلينه بس اننـوح مثـل الحمامه
ومودعـه الله ويــاج يمه ابسلامه

ومودعـه الله ويــاج يازهـرة صحنه
يايمـه ضلـمه الدار يـرهب تعبـنه

يايمه بعدچ ضـال محـد يطبــها
ضلت خليـه عليـچ تـرهب تربـها


ترهبنـه حيـل اشلــون بعدچ خلـيه
عين العمه ولانشـوف ذيچ المسـيه

صارت صدك والبيـن طشر شملنـه
مسرعه خذاج وراح مايـرحم النـه

ماينحمـل الوداع بيــن ام وابنـهه
اشگد صلف يامـوت بعدتـه عنـهه

✍🏻 *الشاعـرة ام مهـدي العيـداني*

https://t.me/zainabiat88

بسم الله الرحمن الرحيم
اللهم صل على محمد وآل محمد وعجل فرجهم..

بعد حمد الله والثناء عليه وببركة مولاتي الزهراء ( عليها السلام ) وذريتها الأطهار سيصدر قريباً لشهر محرم الحرام لسنة ١٤٤٥ه‍-٢٠٢٤م-
ديوني الجديد بجزءه الاول ( عاشوري) يحمل أسم الصديقة فاطمة ( يختص بالهلال والمسير والعليلة والعباس والقاسم والاكبر والرضيع والامام الحسين واضفت كم قصيدة للسبي)   ويتضمن قصائد ثقيلة ومنوعة وفزاعيات ونعي وهوسات..
لاضع بين ايديكم قصائدي التي تحمل الحزن والآلم واللوعة التي مرت على أهل بيت الرسالة ( عليهم الصلاة والسلام )

اسأل الله التوفيق والقبول

خادمة الزهراء وخادمتكم
الشاعرة أم علي الحلفي

https://t.me/WAiomAill

السلام عليكم ورحمه الله وبركاته
قريبا سوف يتم نشر قصائد محرم 1446
تابعو قنواتنا👈 قصائد+نعي ابو ذيات
تجدون كل ماهو جديد وحصري على الرابط 👇👇👇
https://telegram.me/aabas78

الدعم الحسيني الزينبي دعم القنوات الحسينيه  الملتزمة وعدد مشتركيها لا يقل عن 500 مشترك من أفضل القنوات على التليكرام تنشر السته يوميا ثلاث مرات ساعتين كل مره ويتم الحذف من القناة  يكون الحذف من خلال البوت بعد انتهاء الوقت للاشتراك راسلنا على  الرابط 👇👇
https://t.me/Abas747

قريبا ان شاء الله فزاعيات احزان ناعيات الطف الخاصه بالحسين وابا الفضل العباس عليهم السلام ترررقبووو

الدعم الحسيني الزينبي دعم القنوات الحسينيه  الملتزمة وعدد مشتركيها لا يقل عن 500 مشترك من أفضل القنوات على التليكرام تنشر السته يوميا ثلاث مرات ساعتين كل مره ويتم الحذف من القناة  يكون الحذف من خلال البوت بعد انتهاء الوقت للاشتراك راسلنا على  الرابط 👇👇

https://t.me/Abas747