نشرته على github اذا تريدون تجربوه

https://github.com/YousifVN/Youtube-Downloader

اعتمدت على مكتبة pytube هواي، اقرو ملف الـ readme بيه كل تفاصيل الاستخدام وهمين شرح الكود

#my_projects - #github

Hiiiii
الفترة الفاتت بطلت انشر بسبب ظروف خارجة عن قدرة الادمن (دور ثاني) والتهيت اخذ كم كورس جديد بس هسة راجع واكو هواي سوالف حلوة تعلمتها اريد اشاركها وياكم

Object Oriented Programming with PHP

الكورس هذا ضروري حتى يجهزني لـ Laravel (الـ framework الي نستخدمه بالشركة) لان يعتمد هواي على الـ OOP

اني اصلاً دارس OOP من قبل باكثر من لغة فـ بس احتاجيت اعرف شنو الجديد والمختلف بـ PHP وهمين ضبطته اكثر لان اسامه شرحه بشكل مرتب كلش

🎥: Course link on YouTube

#course #backend

JSON and API’s

كورس قصير وكلش سهل بس كله تفاصيل مهمة لان ماكو تقريباً اي مشروع ممكن نشتغله بدون ما نستعملهم

🎥: Course link on YouTube

#course #general_programming

AJAX

اجاكس كلش ضروري حتى نسوي update لاجزاء معينة من الصفحة بشكل منفصل بدون ما نحتاج نسوي reload للصفحة كاملة كل مرة يتغير شي بسيط، فيديوات الكورس قصيرة وهو سهل مابيه شي معقد بس كلش مفيد

🎥: Course link on Youtube

#course #frontend

Laravel

هذا آخر واثگل كورس بالـ road map مالتي وبس اخلصه المفروض اكون جاهز للشغل الحقيقي، مسويه احمد امام مبرمج مصري عنده خبرة من سنين شغل بالسوگ

هو گال انُ سوة هذا الكورس حتى يشرح شلون بالشركات الچبيرة يستعملون Laravel بشكل صحيح، شرح بالطريقة الي هو راد يشوفها بالمبرمجين الي يشتغلون وياه لان گال عدنا فراغ چبير بين الاساسيات وبين الشغل الحقيقي

الزيرو هم شارح Laravel بس السينيور مالتنا نصحني بهذا الكورس لان گال محد عاليوتيوب لا عربي ولا اجنبي شارح اشياء advanced بگده، والكورس بيه تطبيقات عملية هواي

🎥: Course link on YouTube

#course #backend

طول الشهور الفاتت اكو هواي اسئلة تكررت بـ بوت القناة مثل:

- شنو انسب حاسبة للبرمجة؟ منين اشتري الحاسبة؟ المستعمل يفيد؟ لابتوب لو دسكتوب؟
- منين ابلش اتعلم برمجة؟
- شلون احصل تدريب بشركة؟ وشلون اختار التخصص (برمجة مواقع، تطبيقات تلفون، العاب)؟
- ضروري الكل ياخذ كورس CS50x المجاني من جامعة هارڤرد علمود الاساسيات؟ لو اگدر اتعلم برمجة مواقع مباشرة؟
- الكورسات المجانية لو الكورسات الي بفلوس؟
- شلون اطور الانگليزي حتى اتعلم من مصادر اجنبية وهل المصادر العربية صدگ تعبانة؟

وچنت كل مرة اجاوب اگعد ادز بصمات ويصير بودكاست لشخص واحد، فـ فكرت اكتب اجوبة تفصيلية وانشرها هنا بالقناة حتى اي احد يسألني ادزهم اله مستقبلاً

القناة ترتبت هسة بفهرس كـ tags حتى توصلون لايشي تحتاجوه بسرعة

كل ما اريد التزم بالنشر هنا تتراكم تاسكات الشركة

طلاب السادس الي كملو بخير وسلامة، انتبهو بالتقديم هاي السنة راح تنفتح هندسة امن سيبراني بالجامعة العراقية وبجامعة النهرين، فرصة كلش حلوة استغلوها

والي ناوين يطبون هندسة حاسبات فـ اشجعكم القسم حلو والشغل بيه احلى بعد، بس لا تجون بجامعة بغداد وتتورطون مثلي، محد گاعد ينجح يمنا

هسة خلي نحچي عن شلون تشتري حاسبة للبرمجة، جمعت كل التفاصيل الي ممكن اي احد يحتاجها حتى بعد اي احد يسألني ادزله هاي الجرايد

راح احاول اخلي الكلام عام ومابيه هواي تفاصيل technical لان اغلب الي يحتاجون هيج شرح ماعدهم خلفية تقنية زينة حتى يستفادون من هاي التفاصيل، بس اذا تحب تفاصيل اكثر وعندك سؤال معين ببالك فـ البوت موجود وتدلل

اول شي خلي نتفق على مبدأ انُ الحاسبة حالها حال اي شغلة بالسوك، كل ما تدفع بيها فلوس اكثر (على الاغلب) كل ما تكون احسن، اسرع، اقوى، مواصفاتها احسن، بطاريتها اكبر وتعيش وياك سنين اكثر

بس هنا راح نحاول نحصل احسن حاسبة باحسن سعر، لان فد شغلة عن برمجة مواقع الويب وتطبيقات التلفون هي انها وحدة من اكثر الوظائف خفة على الحاسبة، بمعنى انك ممكن تتعلم وتشتغل وتتطور بيها كلش هواي بحاسبة مواصفاتها كلش بسيطة لان الكود الي نكتبه هو حرفياً text بالاخير، لا هو صور ولا فيديوات ولا ملفات عملاقة تضغط على الحاسبة

هذا على فرض انك راح تشتغل بـ برمجة الويب او تطبيقات الموبايل مثل اي انسان طبيعي، اذا ناوي على تخصصات مثل برمجة الالعاب والذكاء الاصطناعي وتحليل البيانات فـ هذا الحجي ما يفيدك، روح جيب كارت شاشة سعره ٥٠٠٠$ وولا اعرفك ولا تعرفني

دائماً من انصح بحاسبة احچي عن المواصفات مو عن قطعة معينة اكلك روح اخذها من الصناعة وها اها، اگدر اسوي هيچ بس هاي حاسبة مو صندوگ طماطة، عندك هواي خيارات وهواي براندات فـ استفاد من هذا التنوع بالماركت وتعب روحك حتى تاخذ قطعة مناسبة لطبيعة شغلك واحسن قيمة للسعر الي راح تدفعه

اقل مواصفات انصح بيها (ايشي اقل من هيچ راح يخليك حاير بمشاكل الحاسبة ودوختها مو بالكود مالتك):

1. CPU: Intel i5/i7/i9 or AMD Ryzen 5/7/9
المعالج هو القطعة المركزية بالحاسبة واهم وحدة بيهم، اذا تاخذ كل القطع مفولة وتاخذ معالج ضعيف ما تگدر تستفاد منهم، اداء الحاسبة حيكون ضعيف لان المعالج هو الي ينسق التواصل بين اجزاء الحاسبة كلها

2. RAM: 16GB
تگدر تاخد 8GB بس راح يتعبك من تفتح اكثر من برنامج وتحاول تشتغل على اكثر من مشروع سوة، ممكن تطوره بعدين بس افضل تاخذ 16GB من البداية

3. HARD: 256GB SSD
بشغل البرمجة ما تحتاج ذاكرة چبيرة لان ملفات المشروع مثل ما گلت هي بالاخير text يعني كلش خفيف وحجمه صغير ما يتقارن نهائياً بالصور والفيديوات، تگدر تستعمل وياه هارد خارجي SSD اكو هواي خيارات زينة ورخيصة اذا احتاجيت، افضل اي مبلغ اضافي عندك تصرفه على تطوير الرام او المعالج لانهم اهم للبرمجة
+ ملاحظة اخيرة: لا تاخذ هارد HDD نهائياً حتى لو حصلته ببلاش راح يكرهك بحياتك وبالحاسبة من كثر ما بطيئ

4. كارت الشاشة (الـ GPU) ما نحتاجه ابد بـ برمجة مواقع الويب وتطبيقات التلفون وهو يعتبر تقريباً اغلى قطعة بالحاسبة مرات حتى اكثر من المعالج نفسه، اذا تغلس عليه حتگدر تاخذ حاسبة كلش حلوة بسعر مناسب

5. لا تاخذ شاشة كلش غالية لان ما نحتاجها، اخذ بس حجم يكون وسط بين المفيد وي ساعات الشغل الطويلة وبين السهل بالتنقل، اني انصح بـ 15 inch

6. الكيبورد، المداخل الي بالحاسبة (الـ Ports)، البطارية وكلشي غيرهم هذا يتبع تفضيلك الشخصي

بهاي المواصفات اي حاسبة راح تاخذها حتكون مفيدة الك ان شاء الله وتگدر توصل بيها مرحلة كلش متقدمة وتشتغل بدون ما تحتاج تبدلها او تطورها

هذا الحچي بالنسبة لحاسبة مخصصة للبرمجة بشكل رئيسي، راح تفيدك بالدراسة والتاسكات اليومية البسيطة مثل التصفح والشغل المكتبي البسيط، بس ما تنفع للالعاب والگرافك دزاين وغيره

منين نشتري الحاسبة؟

اني صراحة مو من محبين الصناعة او الفرفرة بهيج جو، كل حاسبة اشتريتها الي او لمعارفي بآخر كم سنة چانت من موقع العالمية للحاسبات، شركة جبيرة ومعروفة وتوصيلهم مجاني وسريع، عدهم ضمان واسعار مناسبة وموقع تجربة التصفح بيه والطلب منه كلش سلسة وحلوة

مرة استلمت حاسبة بيها غلط بالمواصفات من حچيت وياهم اعتذرو ودزولي القطعة الصحيحة ثاني يوم بدون ما ياخذون اي مبلغ اضافي فـ اگدر ارشحهم الكم واني مأمن

موقعهم: https://globaliraq.net/

والله ما دافعيلي شي حتى امدحهم بس احنا قليل بالعراق عدنا شركات محترمة واسعارهم مناسبة وضمان حقيقي فـ اكيف من اشوف شغل مثل شغل العالمية (اذا احد من تيم العالمية بالقناة ومهتم اسويلكم اعلان تواصلو وياي عالبوت i can use the money wallah)

اخر شي خلي احچي عن الماك (im getting cancelled for this idc)

اذا تريد تريح بالك من كل الحچي الي فوگ وجوة ايدك مبلغ فوگ الـ 1000$ وتريد حاسبة تعيش وياك عمر باداء ممتاز فـ الماك احسن خيار لان برأيي حرام تدفع هيچ مبلغ على حاسبة ويندوز الا اذا چان شغلك نهائياً ما يصير الا على الويندوز

تأكد من تخصصك الجامعي والبرامج الي تحتاجها (حتى تكون حاسبة وحدة للبرمجة والدراسة) اذا چان كلشي تحتاجه موجود على الماك فـ توكل وراح تدعيلي بعدين

تگدر تاخذ MacBook Air كلش حلوة ومرتبة ما فد يوم قصرت وياي بشي، واذا تاخذ MacBook Pro بعد احسن لان بفترة الصيف تحتاج fan حتى الحاسبة ما تتضرر قطعها الداخلية بسبب الحرارة

احسن مكان تشتري منه ماكبوك هو Master Store عدهم هواي فروع ببغداد، شوف اقرب فرع الك وتعامل وياهم حتى تاخذ جهاز نظيف وبضمان الوكالة

https://www.masterstoreiq.com/

اهم شي لا تاخذ اي ماك بمعالجات intel، تأكد تكون اي وحدة بمعالجات الـ M الجديدة الي بلشت ورة ٢٠٢٠