小編探訪札記 #102

#2022年4月12日
#赤柱監獄
#小杰牆內修煉第102日

終於再有小編探訪札記喇！赤柱篇！

今日第一次入赤柱探小杰，入到去基本上同荔枝角程序一樣，不過明顯啲locker大啲勁啲新啲，我會形容係高設防啲，過安檢都相對地嚴啲，荔枝角係hea啲嘅。登記完之後係會被安排坐高爾夫球車去探訪等候室，我上車之後其實係興奮嘅，加上涼風陣陣好似幾得意咁，結果全程車只係坐咗1分鐘，我講真呀！1分鐘車程，我就到咗探訪等候室。探訪等候室都有幾道門推入去，好似好深嚴咁，整個等候室都有公立醫院嘅味道。等候室今日只係得我同第三被告嘅朋友嚟探，所以等嘅時間相對短，入埋物資好快就可以進入探訪室。（今日主要入咗6本書俾小杰）

探訪室都幾大，都好似同荔枝角一樣有23個窗口。視窗與視窗之間有距離能夠保持少少私隱，但每個視窗均有前後兩個cctv隊住。一見到小杰佢精神都唔錯，雙眼變咗一條線笑咪咪咁，過界之後剪咗一次頭髮，清爽短髮咁。冇再明顯瘦到，小杰表示食屙瞓都冇咩問題，啲嘢食好食過荔枝角大棚飯少少。小杰話赤柱環境整體都好好多，清幽寬敞，懲教都好啲。而家小杰自己一個人瞓，早上schedule 同荔枝角差唔多，都係去day room睇電視、睇報紙，有放風時間。小杰獲安排做車工，但由於係新人，未需要正式番工住，好似話要過冷河多一陣。期間都遇到少少同路人，但真係好少，反而聽到好多大粒人物（政治犯）都喺哂赤柱。

其實30分鐘根本都講唔夠，異常嘅短時間！只係傾上訴事宜都用咗10分鐘。咁上訴嗁事其實小杰都心意已決㗎喇，而家佢會喺赤柱填form申請上訴同埋法援，至於法援批唔批，批咗係咪冇得揀自己律師嗰啲就後話，因為所有申請都可以喺之後嘅時間取消番。總之25th之前小杰要入紙。
小杰話見到我同阿Dee送囚車，好清楚見到我哋兩個，抱歉見唔到其他人，但我都有同佢講其實有好多朋友企咗喺側邊。小杰話泊正之後未收過信，最後離開荔枝角前收緊朋友們3月5日寄出嘅信（照咁睇係delay緊1個月）由於曾經去過沙咀，又番番荔枝角，幾日後又過界赤柱，難免啲信會跟唔切。不過赤柱收信方式同荔枝角唔同，懲教係group埋一星期嘅信先一次過俾囚友，而且小杰現在要自己工作賺錢買郵票及信封，有機會回信出嚟再有困難咗，再耐咗。

唉，30分鐘咁就完咗，例排都係依依不捨咁喇，但再冇「左右行」呢支歌仔唱，一夠鐘懲教就會企喺小杰後面，「護送」佢離開，唯有喺咁兒揮手講byebye。事後諗番起仲有啲問題唔記得咗問，唯有等5月。

———————————————-

「屯門中央郵政局郵政信箱編號211」繼續收信！
❕信封封面切勿寫上任何收件人名稱❕
❕切勿寄post card❕（或者請預早影印在A4紙）

———————————————-

🌼感謝各位會員繼續支持小杰🌼你哋每一個支持，對小杰嚟講都係相當重要。

Siuukit