聖誕不平安(節日放負)

啱啱放監出嚟，打聽朋友嘅情況，先知道有前戰友被扣留喺深圳⋯⋯

坐牢時有朋友話嗰位戰友唔敢嚟探我，我當時唔理解，但之後我睇到12人嘅新聞，就明白佢嘅心情(雖然嗰時未知佢出咗事)。12人嗰時我寫過信俾迪辦，話唔敢睇12人嘅新聞，因為唔少囚友同我講過上面坐監嘅體驗(虐打、劣食同惡劣嘅環境)，所以我唔敢睇家屬嘅訪問，頂多只敢聽收音機嘅消息(因為冇畫面)。不過後期我都少聽收音機，因為會瞓唔着。有人話喺外面生活平安會諗起受難嘅手足幾咁慘，但其實喺牢獄生活唔好，會更加在意更唔好嘅人，因為難過時會明白有人比自己更難過⋯⋯

2018年就上庭嗰時，我同佢探過天琦，天琦15分鐘內講咗無數次「坐監真係好撚戇鳩⋯」，可能因為咁之後佢唔敢嚟睇我(唔想再睇到)，嗰時去完探天琦我先知原來係天琦擔心我，叫佢搵我去見天琦(其實我同天琦唔熟)。
我同佢都算係因為天琦而認識(光時1.0——新東補選)，但其實更早之前就見過面。喺以前學生運動，我俾狗拖行，條褲穿咗，手機跌咗出嚟唔知，佢執返俾我，雖然嗰時唔識佢但我都仲記得。

前排係佢嘅生日，唔少朋友講起佢，話佢同同路人食飯，成日自己一個埋單。臨坐監嗰時我去咗台灣買書準備坐監睇，冇辦法去買My Little Airport演唱會飛，結果佢幫我買，之後仲唔肯收返我錢，臨入去時叫我飲嘢都係咁⋯
雖然佢冇嚟探我但我都知佢其實好關心手足，我之前會同佢熟都係因為有共同朋友——光復運動(反送中前)嘅被告，佢哋本身唔識，但因為戰友好關心單案所以認識。我覺得可能因為佢見得多所以唔敢再接觸，好似我以前都做過抗爭支援，所以明白嗰種無力感。

我從來冇攞過透明卡出嚟打卡，當你唔識佢哋就ok，但你認識本人(而又唔係佢親人)就唔敢打卡，因為覺得自己實際上咩都做唔到，講出嚟會覺得唔好意思。我記得佢以前都好似講過類似嘅說話⋯

啱啱出嚟個人好頹廢，我想寫呢段嘢好耐但唔知從何入手，係今日先有少少動力，雖然想慢慢寫好，但如果唔一次過寫會寫唔出(寫完想執，但返睇好辛苦，越睇越難頂)。諗起以前有另一位好戰友坐監，我寫咗篇嘢，但冇公開擺出嚟，因為覺得自己中文差，不過佢叫我照擺出嚟，所以今日我諗起都突破心理關口，講咗出嚟。

作者：K
2020年 平安夜
願好人一生平安

「這一場革命也許無人取勝，但請你請你留低一起作見證⋯」

#mylittleairport #save12

抗爭點滴