小編探訪札記 #10

#2022年1月10日

#荔枝角收押所

#10

唔經唔覺得已經去到Day 10，記得邵家臻講過，喺裡面嘅人千祈唔好數「仲有」幾多日，要數「已經過咗」幾多日。今日坐車出荔枝角時候睇到卓韻芝嘅一篇文章，講「唯有某些時刻人才真正意識到時間，在其他時候，時間 simply passes。假的。假設而已。」的確係，我最意識到時間流逝無疑就係見小杰嗰15分鐘。

探訪名單已經更新，過去幾日我開始同其他朋友一齊去探小杰，明顯小杰狀態好了很多，面色有點紅潤，有剃鬚，未有消瘦跡象。佢見到朋友嘅時候都會笑住打招呼：「喂」就好似以前咁。小杰問朋友：「你個show點呀？」朋友：「啲show停鳩哂喇！」杰：「我知呀，我而家睇新聞分分鐘多過你呀！」

呢幾晚開始凍番，小杰表示裡面真係好凍，不過都冇辦法，衫就係得咁多。小杰話都唔係好瞓到，主要係光，裡面唔會熄燈，佢慣咗黑哂先瞓到覺（裡面好似可以申請眼罩，聽日同小杰講先）。私飯方面，佢決定同幾個囚友夾一齊訂私飯，一來唔洗孤單食，二來唔洗驚被人搶雞髀（我見私飯餐單有雞煲食囉），應該會由21號開始食私飯。

小杰亦分享咗裡面好多人都好傳奇，危險駕駛又有，吸毒又有，打人又有，打劫又有，有位囚友用咗三年半就讀完一個degree破咗監獄記錄。不過無論遇到幾多「猛人」都好，刑期最長嘅都係小杰（暴動量刑起點為4年），啲囚友笑說：「番嚟再坐都可能仲見到你。」我都只好苦笑。記得第二三日探訪時小杰話：「佢哋（囚友）話我呢啲斯文人唔啱嚟呢到，咁點啫！我想嚟㗎？」係囉，根本冇人想。

隨住日子過去，佢開始適應呢到嘅生活，我開始熟悉探訪嘅流程，其實愈來愈少「公事」要講...

而家開始定落嚟，真係可以當夜晚傾電話咁傾計，講下我昨晚同朋友打牌嘅時候食咗鋪十三么好開心，連埋朋友我哋三個相視而笑。

冇人想習慣呢到，只係一定要轉過心態去面對。

今日小杰被帶去醫院覆診，我又白行一趟，冇得探小杰。I miss him。

小杰 SiuuKit Patreon