Ҳуқуқий савол-жавобларнинг тили ҳақида

Олий ва ўрта махсус таълим вазирлигининг Телеграм каналида қуйидагича савол-жавоб эълон қилинди:

«Савол: Ўқишдан четлатилган талаба неча йил муддат ичида ўқишни қайта тиклаши мумкин?

Бир олий таълим муассасаси доирасида олий таълимнинг мос ва турдош йўналишлари (мутахассисликлари) бўйича талабалар ўқишини қайта тиклаш — талабалар сафидан четлаштирилганлигига

👉 5 йилгача бўлган муддатда шу олий таълим муассасаси ректорининг буйруғи асосида;

👉 5 йилдан 10 йилгача муддат ўтганда олий таълим муассасаси бўйсунадиган вазирлик (идора) қарори асосида;

👉 10 йилдан ортиқ вақт ўтган бўлса Идоралараро комиссия қарори билан амалга оширилади».


ОАВларни кузата туриб, ҳуқуқий саволларга бериладиган жавоблар аксарият ҳолларда халқ учун тушунарсиз, шунчаки қонун ҳужжатларидан кўчирилган ҳолда берилишига гувоҳи бўламиз. Айрим газета ва журналларда берилган савол-жавобларни қайта-қайта ўқиб, ҳатто юрист бўлсам тушуна олмайман. «Мен нима дейману, қўбизим нима дейди», деган нақл эсга тушади.

Ҳуқуқий саволларга имкон қадар халқ тилида содда қилиб, жавоб беришни ўрганишимиз керак. Бу бевосита халқнинг ҳуқуқий онги ошишига ёрдам беради. Судда ёки терговда бўлса, тушунарли, ўта расмий ва қонун тили билан ёзса ярашади.

Масалан, юқоридаги саволга қандай жавоб берган бўлар эдим:

«Савол: Ўқишдан четлатилган талаба неча йил муддат ичида ўқишни қайта тиклаши мумкин?

ЖАВОБ: Исталган муддатда! Яъни ҳеч қандай йил чеклови ўрнатилмаган, талаба хоҳласа 2 йилдан кейин, хоҳласа 20 йилдан кейин, ўқишини тиклаш учун ариза бериши мумкин.

Фақат эътиборли бир жиҳати, тикланиш муддатининг узоқлигига қараб, масалани ҳал қиладиган ташкилотлар ўзгаради. Яъни қанча узоқ вақт ўтса, шунча “тепадан” ҳал бўлади.

Масалан, агар четлатилганига 5 йилдан ортиб кетмаган бўлса, унда тикланиш масаласини ўзи ўқиган ОТМ ректори ҳал қилиб қўя қолади.

Агар 5 йилдан 10 йилгача вақт ўтган бўлса, унда ўзи ўқиган ОТМ бўйсунадиган вазирлик ҳал қилади. Мисол учун, Юридик университетга тикланмоқчи бўлса - Адлия вазирлиги ёки Тиббиёт академиясига тикланмоқчи бўлса – Соғлиқни сақлаш вазирлиги ҳал қилади.

Агар четлатилганига 10 йилдан ортиқ вақт ўтган бўлса, унда Идоралараро комиссия ҳал қилади. Бунақа идоралараро комиссия Бош вазир бошчилик қилагидан Ўқишга қабул қилиш бўйича Давлат комиссиясининг қошида тузилади».

Мана шунақа жавоб бериш, менинг фикру ожизимча, бироз тушунарлироқ бўлармиди, ким билсин.

P.S.: Бу билан вазирлик берган жавоб нотўғри ёки ғализ, меники зўр демоқчи эмасман, уларнинг жавобини ҳам бемалол тушунса бўлади. Шунчаки ҳуқуқий савол-жавоблар ҳақида анчадан буён айтмоқчи бўлиб юрган фикрларим бор эди, кечаги пост мисол тариқасида шунга тўғри келиб қолди холос. Русча айтганда - «ничего личного».

Каналга уланиш: 👇
https://t.me/joinchat/AAAAAEe1KDC7Hm03UPVooQ

ДТМ матбуот анжуманидан блиц жавоблар

1. 5та фан билан боғлиқ машмаша бу ўқув йилимас, кейинги ўқув йилида бўлади.

2. Абитуриент белни маҳкам қилинг. Лойиҳага кўра, нафақат 202.730сўм тўлайсиз, балки ҳудудингизда туриб Давлат хизматлари агентлиги ёрдамида ҳужжат топширасиз. Улар бунга 10-20 минг сўм талаб қилиши мумкин.

3. ЭКИҲ бир марта тўланади, 3 та танлайдиган ОТМга ҳужжатлар параллел қабул қилинади.

4. Абитуриентга баллари ҳақида сертификат берилади, бу 3 йилга ўтади, яъни 3 йил ичида ЭКИҲни қайта тўлаш шарт бўлмайди.

5. Тарих фанидан атлас ва контур карталар бўйича саволлар қўшиляпти. Бу абитуриентга янгилик, нега кеч эълон қилиняпти, деган саволга жавоб: дарсликларда бор. Тайёрланганлар яхши билишади. Бу ДТМнинг тест дастурида аввалдан бўлган, шу пайтгача техник имкониятлар етарли бўлмагани учун, яхши чоп этилмагани учун бундай саволлар киритолмаганмиз. Энди, техник масала ҳал этилди, дарсликдан ташқари савол бўлмайди.

6. CEFR имтиҳонини топишириш учун бир неча ойдан бери рўйхатдан ўтишолмаяпти?
ВМ қарори қабул қилинади, анча кеч қолиб кетди. Оз қолди.

Манба: @aqurbonova

Каналга уланиш: 👇
https://t.me/joinchat/AAAAAEe1KDC7Hm03UPVooQ

Абитуриентлар учун тўлов ҳақида

Абитуриентлардан ҳужжат топшириш учун тўлов ундирилиши ҳақида жуда кўп саволлар, таклифлар ва эътирозлар келиб тушмоқда. Шахсий муносабатимни сўрашмоқда. Бугунги матбуот анжумани баҳона фикримни айтсам:

1) биринчи йилда ўқишга кира олмай, келгуси йилда қайта ҳужжат топшираётган абитуриентлардан тўлов ундириш лойиҳасига қарши эмасман, қўллаб-қувватлайман.

2) лекин бегиланган тўлов миқдорига жиддий эътирозим бор. ЭКИҲ 1 баравари жуда қиммат. Ҳозир 202 минг сўм, кейинчалик ойлик ошса, бу яна кўтарилиб бораверади. Ҳудудларда эса 150 минг сўм ойлик олиб ишлайдиганлар ота-оналар бор. Гарчи 3 йилга ўтадиган сертификат берилса ҳам, барибир қиммат. Таклифим: маааксимум ЭКИҲ 50%и қилиш керак.

3) яна 1 жиҳатга эътибор бериш керак: абитуриентлардан олинадиган тўловлар кириш имтиҳонларини ташкил қилишдаги харажатларни қоплагандан кейин, бюджетдан айни шу мақсадларда сарфланадиган маблағлар иқтисод бўлади. Мана шу тежаб қолинган маблағлар таълим тизимидаги ўқитувчиларни моддий рағбатлантиришга қаратилса нур устига нур бўлар эди. Тежаб қолинган маблағлар бошқа соҳа ёки имтиёзли кредитлар учун сарфланиб кетмаса яхши бўларди.

4) Давлат хизматлари агентлигидан ҳужжат топширганда маълум миқдорда тўлов қилиш керак. Бу мантиқан тўғри. Мана шу ўринда онлайн ҳужжат топширишни кўпайтириш ва ёшларда замонавий ахборот технологияларидан фойдаланишни рағбатлантириш мақсадида онлайн ҳужжат топширишни бепул қилишни таклиф этаман. Мундоқ бир ёшларимиз интернет деганда фақат Телеграм ёки Одноклассникини тушунмайдиган бўлармиди дейманда.

Ҳозирча шулар.

Каналга уланиш: 👇
https://t.me/joinchat/AAAAAEe1KDC7Hm03UPVooQ

Англия премьер лигасидаги Бёрнли-Тоттенхэм жамоалари ўртасидаги ўйин давомида стадионда Ўзбекистонга саёҳат қилиш тарғиб этилган рекламалар намойиш этилди.

Биттасида «Life is too short not to visit Uzbekistan» ёзуви чиққан бўлса, яна бошқасида «For 64 countries - Uzbekistan - Visa free» ёзувлари чиқмоқда.

Ажойиб, жуда ажойиб!

Каналга уланиш: 👇
https://t.me/joinchat/AAAAAEe1KDC7Hm03UPVooQ

​​«Ўзбекистон 24» телеканали мухбири Азиза Қурбонова ўз Телеграм каналида шундай ёзяпти:

«Данияда ўн йилдан буён яшаб, "Данфосс" компаниясида муваффақиятли ишлаб келаётган Абдулла Азизов билан суҳбатни кеча кўп эсладим.

- Сиз келажагингизни Ўзбекистон билан кўрасизми, қайтишингиз мумкинми?
- Ўзбекистон ўз вақтида менга сармоя киритган. Ҳозир кичик бўлса-да, қурилиш бўйича сармоя киритяпман ватанга.

Лекин... менинг келажагим- бу менинг болаларим. Мен уларнинг сифатли таълим олишини, ўзини кашф этишини истайман. Хорижда яшашимга бош сабаб -шу. Қолган ҳамма факторлар иккиламчи даражада.

Яна у айтгандики, унинг компанияси битта тадқиқот лойиҳасига тикадиган маблағ Ўзбекистоннинг бир йил илм-фанга йўналтирган маблағи билан тенг...»

Каналга уланиш: 👇
https://t.me/joinchat/AAAAAEe1KDC7Hm03UPVooQ

Милиционер томонидан «ечинтирилган каттақўрғонлик аёл» Ғаллаоролдаги бозорда бир аёлнинг ҳамёнидан пул ўғирлаб, шериги (қора кўзойнакли эркак)га узатаётган лавҳа видеокузатув камераларига ёзиб олинган. Воқеа 10 феврал куни юз берган; аёлга нисбатан Жиноят кодексининг 169-моддаси 3-қисми «а» банди билан айблов эълон қилинган ва у 14 февраль куни қамоққа олинган.

Бу аёл бунгача бир неча бор судланган. Сўнгги бор 2018 йил 19 декабрида жиноят ишлари бўйича Оқдарё туман суди томонидан такроран ўғрилик қилишда айбдор деб топилиб, 4 йил муддатга озодликни чеклаш жазоси билан жазоланган. Ҳа, бу аёл жиноятчи. Лекин бу Каттақўрғон милициясининг 6,5 йилга қамалган собиқ ходими Санъат Умаров томонидан бу аёлга нисбатан қилинган таҳқирлашни оқлашга баҳона бўла олмайди. Ҳеч қачон.

https://t.me/joinchat/AAAAAD63OEHkQHOlfdglMg

#табассум

Бошланган янги ҳафтада бошингиз тошдан бўлишини тилайман 😄

Каналга уланиш: 👇
https://t.me/joinchat/AAAAAEe1KDC7Hm03UPVooQ

Талабаларнинг ҳурмати ҳақида

Яқинда бир гап эшитдим. Тошкент Халқаро Вестминстер университети раҳбарияти талабалардан келиб тушаётган кўплаб таклиф ва эътирозларни инобатга олиб “автотранспортлар тураргоҳи хизматчиси”, бошқача айтганда “стоянщик” деган янги ходимни ишга олибди. Бунга сабаб университет атрофида талабалар машинасини қўйишга қийналаётган экан, шунингдек улар дарсга кириб кетганда баъзан машиналарига талафот етаётган экан. Шу сабабли маъмурият университет ҳисобидан қўшимча пул тўлаб, битта назоратчи ёллашга мажбур бўлибди.

Хўш, энди худди шу вазиятни ўзимизнинг давлат ОТМларида тасаввур қилиб кўрайлик. Талабалар ректорга шунақа шикоят қилса, яъни “машиналаримизни қўйишга қийналяпмиз, дарсга кириб кетганимизда жой торлигидан бошқалар машиналаримизни туртиб, зиён етказиб кетишяпти, шу муаммони ҳал қилинг” дейишса, қандай натижа бўлар эди, деб ўйлайсиз? Тахмин қилиб кўраман, бизнинг ректорлар ҳам эртасигаёқ буйруқ чиқарарди. Фақат бу буйруқ... ўқишга машина ҳайдаб келишни тақиқлаш ҳақида бўларди. Машина билан келган талабаларни дарсга киритмаслик, уларга н/б қўйиш ҳақида бўларди. Худди галстуксиз талабани дарсга киритмасликка ўхшаган аҳмоқона қарорлар каби.

Фарқни сезяпсизми?

Ҳа, бизда шунақа. Талабанинг қадри йўқ. Бунинг бир нечта факторлари бор. Бу ҳақида кўп гапириш мумкин. Баъзиларига тўхталаман.

👉 Биздаги таълим тизими шунақа йўлга қўйилганки, унда талабанинг роли минимумга туширилган. Улар университет ҳаётига оид қарорлар қабул қилишда мутлақо иштирок этмайди. Ҳаммаси уларнинг иштирокисиз ҳал қилинади. 100 та талаба ўқиса ҳам бюджетдан шу ойликни олади, мингта талаба ўқитса ҳам. Қайсидир талаба бор бўлса ҳам ойлик нақд, талаба йўқ бўлса ҳам. Умумий олганда шунақа.

👉 Яъни талабага истеъмолчи сифатида қаралмайди. Талабанинг олдида ректор ва ўқитувчилар мажбурият ҳис қилмайди. Талабалар ҳаттоки ўқув режадаги танлов фанларини ҳам танлашмайди, тасаввур қиляпсизми? Ҳар бир ўқув режасида танлов фанлари бўлади, яъни талабалар ўзига кераклисини танлаши керак. Лекин талабалар учун бу ишни деканат ёки ўқув бўлими ҳал қилади.
Қачонки талабалар қайси фан ва қайси ўқитувчи дарс ўтишини ўзлари танлашса (айрим мажбурий мутахассислик фанларидан ташқари), ана ўшанда уларга бошқача кўз билан қараш бошланади, ўқитувчилар ўз устида ишлашни бошлайди. Бошқача айтганда, аслида талабалар ўқитувчилар учун салкам иш берувчи мақомида бўлиши керак.

👉 Талабаларнинг ўзида ҳам айб бор. Юртимиздаги миллионлаб фуқаролар “мен солиқ тўловчиман, тўлаган солиқларим учун мана бундай шароит қилиб беришга мажбурсан” деб ҳукуматдан талаб қилишга ҳуқуқий онги етмаётганидек, талабалар ҳам “тўлаётган контрактим эвазига менга мана бунақа шароит, сифатли таълим керак” деб талаб қилишмайди. Бир амаллаб дипломни олишса-ю, шу даргоҳдан қутилиб чиқса бўлди. Уёғи бир гап бўлар. Тўғри, танганинг бошқа томони ҳам бор - мабодо қайсидир бири шунақа талаб қилса, барибир ўзгариш бўлмайди, аксинча унинг ўзи тақибга олинади, сессияда қийноқларга дучор қилинади.

👉 ОТМларда молиявий эркинлик йўқ. Яна юқоридаги мисолга қайтамиз. Кенг дунёқарашга эга бўлган давлат ОТМи ректори талабаларнинг таклифини бажонудил қабул қилмоқчи ҳам дейлик. Унда ОТМ ҳисобидан стоянщик ёллашга имкон борми? Ҳечамда! Бир дона қалам сотиб олишни ҳам тегишли молиявий идораларсиз ўзи ҳал қила олмаса керак. Қилиб кўрсинчи, КРУ деган ваҳимали ташкилот бўйнига бир неча миллион талон-торожни илиб кетади.
Шу сабабли ҳам юртимизда давлат ОТМларига босқичма-босқич молиявий мустақиллик берилмоқда, ва бу жуда тўғри қарор. Ҳамма ўзини аравасини ўзи тортса, ана шунда сифат ҳам секин-аста кўтарилишни бошлайди, чунки кучсизлар бозор шароитида касод бўлади.

Буларнинг барчаси ИМҲО.
Майли, ҳаммаси яхшиликка бўлсин. Таълимдаги охирги ўзгаришлардан кейин умидимиз яна жонланди, биз ҳам сифатли таълимга етишамиз бир кун.

Каналга уланиш: 👇
https://t.me/joinchat/AAAAAEe1KDC7Hm03UPVooQ

#архив

Пора беришга инсон мажбур бўлиши мумкин, аммо пора олиш ихтиёрий бўлади.

Ўтган йилги кириш имтиҳонларига бағишланган «Муносабат» ток-шоусидан парча

Каналга уланиш: 👇
https://t.me/joinchat/AAAAAEe1KDC7Hm03UPVooQ

Олтин ва кумуш медаль олган ўқувчиларга тест синовларида имтиёз берилмайди

Халқ таълими вазирлиги баъзи Telegram каналларида эълон қилинган хабарларга муносабат билдирди.

Вазирлик айтишича, олтин ва кумуш медаль бериш тартибига оид Низомни баъзи Telegram каналлар нотўғри талқин этмоқда, яъни олтин медаль олган мактаб битирувчисига кириш имтиҳонларида тўплаган умумий балига 50 фоиз, кумуш медаль олган мактаб битирувчисига эса 30 фоиз балл қўшиб берилишига оид нотўғри маълумотлар чоп этилган.

Аслида Низомда олтин ва кумуш медаллар билан тақдирланган ўқувчиларга имтиёзлар берилиши кўзда тутилмаган.

«Шу ўринда таъкидлашимиз жоизки, олтин ва кумуш медаллар аъло баҳоларда ўқиган ўқувчиларга берилишини инобатга олсак, кириш имтиҳонларида имтиёзли баллар берилмасада, ўз билимларини кўрсата олишлари лозим. Қолаверса, Халқ таълими вазирлиги олий ўқув юртига кириш учун талабгор ёшларга тенг имкониятлар тақдим этиш тарафдори», - дейилади хабарда.

Вазирлик олтин ва кумуш медаллардан кўзланган мақсад ўқувчиларни таълим олишга бўлган қизиқишларини янада ошириш, улар ўртасида соғлом рақобатни шакллантириш, коррупцион ҳолатларни олдини олиш ва иқтидорли ўқувчилар билимини рағбатлантиришдан иборатлигини таъкидлаган.

P.S.: Ҳа, мен ҳам имтиёзларга қаршиман, барча тенг бўлгани маъқул.

Айтганча, олий таълим тизимида ҳам халқ орасида «қизил диплом» номи билан аталадиган, устки ғилофи қизил рангда, ичига эса «имтиёзли диплом» деб ёзилган диплом берилади. Лекин бу дипломлар ҳам ҳеч қандай имтиёз бермайди. Агар мақсад шунчаки талабаларни рағбатлантириш, уларга мотивация бериш бўлса, унда олий таълим тизимида ҳам мактаблардаги каби олтин ва кумуш медаллар жорий қилиш керакдир балки. Лекин аслида ҳеч қандай имтиёз бермайдиган «имтиёзли диплом»ларни топшириш мантиққа тўғри келмайди, кулгили ҳатто.

Бу ҳақида бир пайтлар мақола ҳам ёзган эдим. Олий ва ўрта махсус таълим вазирлиги шу ҳақида ўйлаб кўрса, ёмон бўлмасди.

Каналга уланиш: 👇
https://t.me/joinchat/AAAAAEe1KDC7Hm03UPVooQ

#ижтимоий_сўровнома

Байрамлардаги маршировка ҳақида

Баҳор байрамлар фасли. Айниқса, Наврўз умумхалқ байрамини айтмайсизми? Байрам сайлларида кўчалар одамлар билан тўлиб-тошган, дошқозонларда сумалаклар қайнаган, варраклар учирилган... Хуллас, барчаси ажойиб.

Наврўз арафасида бизда урфга айланган яна бир одат бор. Байрам дастурларида иштирок этиш учун юзлаб, балки минглаб талаба қизларни байроқ кўтаришга (давлат байроғи эмас, яшил, қизил байроқлар), яъни маршировкага жалб қилишади. Талаба қизлар 1 ойга яқин дарслардан қолиб, репетицияларда иштирок этади (мендаги аниқ маълумотларга кўра, жорий йилда ҳам талаба қизларни маршировкага жалб этиш режалаштириляпти, бу ҳақида ОТМларга тепадан топшириқ келган).

Ҳа, тўғри, бу умумхалқ байрами, уни чиройли ўтказишимиз керак. Лекин бу илм олиши керак бўлган талаба қизларни таълимдан ажратиб, иссиқда байроқ кўтартиришни оқлайдими? Эртанги келажагимиз бўлган талаба қизларга қайси бири муҳимроқ: илм олишми ёки байрамда байроқ кўтариш? Жамият учун қайси бири фойда?

🏁 - байроқ кўтараверишсин, ахир байрамку

📚 - йўқолсин маршировка! Талабалар илм олиши керак!

Пойтахтни Тошкент шаҳридан бошқа жойга кўчириш ҳақида каналимда ўтказилган ижтимоий сўровномада жами 9 ярим мингга яқин киши овоз берди.

54,2% овоз берувчилар бу фикрни маъқулламади. Лекин 4 минг 300 дан ортиқ инсонлар (45,8%) бу таклифни маъқуллашини билдирган.

Ҳа, тўғри, таклиф кўпчилик томонидан маъқулланмади. Лекин 45% дан кўпроқ кишилар пойтахт кўчирилишига қарши эмаслиги катта натижа, менимча. Бунақа натижани кутмагандим, рости.

Каналга уланиш: 👇
https://t.me/joinchat/AAAAAEe1KDC7Hm03UPVooQ

Бундан 10 кунча олдин my.gov.uz портали орқали Тошкентда вақтинчалик прописка олиш учун техник томондан максимум 6 ой муддатга ариза бериш мумкинлиги, аслида эса қонунчилик бўйича бу муддат 1 йилга узайтирилганини ёзган эдим.

Бугун маълум қилишларича, Ягона порталда ушбу хатолик тўғриланиб, «1 йил» деган бандни ҳам қўшишибди. Тезкор муносабат учун масъулларга раҳмат!

Ва яна олганларнинг айтиши бўйича, жавоби 1 кунда чиқаётган экан.

Электрон давлат хизматларидан фойдаланинг, мундоқ бир замонавийлашинг, ҳам вақтингизни, ҳам нақдингизни, ҳам асабларингизни тежайсиз. Балки бошида бироз тушунарсиз ва қийин бўлиши мумкин, лекин кейингиларида 5-10 дақиқа ишингиз битадиган бўлади.

Каналга уланиш: 👇
https://t.me/joinchat/AAAAAEe1KDC7Hm03UPVooQ

Ҳар доим ёрдамга шошилувчи ва ўзгалар тақдирига бефарқ бўлмаган яхши инсонлар орамизда жуда кўп. Шунақалар сафи кўпаяверсин.

Каналга уланиш: 👇
https://t.me/joinchat/AAAAAEe1KDC7Hm03UPVooQ

​​Ўзбекистонликлар март ойида неча кун дам олади?

2018 йил 12 ноябрдаги ПФ-5574-сонли Президент Фармони билан 2019 йилда расмий саналарни нишонлаш даврида қўшимча ишланмайдиган кунлар белгиланиб, дам олиш кунлари кўчирилган эди.

Мазкур фармон асосида март ойида ҳам кўчирилган дам олиш куни мавжуд.

Энг аввало ҳафтадаги иш кунлари сони дам олиш кунларига таъсир қилишини унутмаслик керак. Яъни 5 кунлик иш ҳафтасидаги ходимлар март ойида 13 кун дам олишади, ҳафтасига 6 кун ишлайдиган ходимлар эса мартда 8 кун дам олишади.

Масалан, 8 март – Халқаро хотин-қизлар куни байрами ҳафтанинг жума кунига тўғри келганлиги сабабли, 5 кунлик иш ҳафтасида ишловчи ходимлар кетма-кет 3 кун дам олишади.

Энди Наврўз байрами арафасидаги дам олиш кунларига келсак.

Ҳафтасига 5 кун ишловчи ходимларга қуйидаги кунлар (4 кун кетма-кет) дам олиш куни ҳисобланади:

21 март – пайшанба (Наврўз байрами);
22 март – жума (қўшимча дам олиш куни);
23 март – шанба;
24 март – якшанба.

Ҳафтасига 6 кун ишловчи ходимларга қуйидаги кунлар дам олиш куни ҳисобланади:

21 март – пайшанба (Наврўз байрами);
22 март – жума (қўшимча дам олиш куни);
24 март – якшанба.

Изоҳ: ҳафтасига 6 кун ишловчи ходимлар 23 март (шанба) куни ишга чиқишлари лозим.

Мақола ҳаволаси

Каналга уланиш: 👇
https://t.me/joinchat/AAAAAEe1KDC7Hm03UPVooQ

Бюджет йўқолиши тўғрисидаги фейк хабарлар ҳақида

Орамизда содда ва ишонувчан одамлар кўп. Табиийки, бундай шароитда фейк (ёлғон) хабарлар ҳам кўп тарқатилади. Чунки хабарнинг рост-ёлғонлигини мустақил текшириб кўришни биладиган ва ўзи таҳлил қилиб, тўғри хулоса чиқара оладиган инсонлар камлиги сабабли, фейк хабарларнинг умри узоқ бўлади.

Чунки одамлар “эшитдингми?” дея бир-бирига юборишга қизиқади. “Ҳой, ахир бу ёлғонку, ёлғон хабарни бировга юбориш ҳам шарт эмас” дейишмайди.

Яқинда шунақа яна битта сохта хабар чиқди, эмишки Президент фармон чиқариб, давлат гранти асосида ўқишга қабул қилишни бутунлай бекор қилибди, ҳозир бюджетда ўқиётганларни ҳам контрактга ўтказибди. Хусусан, Телеграмда айланиб юрган сохта фармон матнида қуйидагича сўзлар ҳам бор:

«2.Hozirda byudjetda tahsil olayotgan talabalar bundan buyog'iga 100% to'lov-kontrakt tizimiga o'tkazilsin va o'tgan yillardagi to'lanmagan kontraktlarni 1 oy muhlat ichida 2 barobar miqdorda naqd pul ko'rinishida to'lashlari ta'minlansin;
3.Byudjetdagi talabalar shu muhlat ichida kontraktlarni to'lashmasa, qayta tiklanmaydigan va boshqa OTM lar qabul qilmaydigan qilib talabalar safidan chiqarilsin va kontraktlari uy-joy yoki mashina kabi mulklar hisobidan undirib olinsin.
4.Belgilab qo'yilsinki, byudjetdagi talabalarga barcha tadbir, hashar va shu kabi jamoat ishlarida qatnashish majburiyati yuklatilsin.»

Хуллас, қайсидир виждонсиз томонидан одамлар орасида ваҳима қўзғаш учун қасддан тўқилган ёлғон хабар бу (унга бундан нима фойда экан, ҳайронман).

Шу хабарлар тарқагандан кейин, кўпчилик менга мактуб ёзиб, шунинг рост-ёлғонлигини сўради. Нима эмиш, бу хабарни ўқиб, бюджетдаги талабалар ва уларнинг ота-оналари хавотирга тушиб қолишганмиш. Эй, Худойимей...

Бунақа ёлғон хабарларга ишонманг. Бошқа изоҳ ортиқча.

Каналга уланиш: 👇
https://t.me/joinchat/AAAAAEe1KDC7Hm03UPVooQ

​​Ўзбек футболидаги ақлга сиғмайдиган тутуруқсиз қарорлар ҳақида

Бугун ЎФА деган ташкилот бир қизиқ баёнот билан чиқди. У шунчалик қизиқки, Самвел Бабаяннинг футболга қайтиши билан боғлиқ саволларга «1 грамм» мантиқий жавоб бера олгани йўқ, аксинча янги саволларни пайдо қилди.

ЎФА баёнотида шундай дейилади:

«...Айнан мана шу сўровларга асосан 2018 йилнинг 15 январь куни Самвел Бабаянга нисбатан Ўзбекистон футбол ассоциацияси иш очди ҳамда мазкур иш якунига қадар ЎФА Ижроқўми мураббийни футболдан четлатди».

Ия, товба. Айтиляптики, Бабаян ўша пайтда унга нисбатан очилган иш якунига қадар футболдан четлатилган экан. Энди ўтган йили ЎФА расмий сайтида чиққан бошқа бир хабардан парчага диққат қиламиз:

«Ўзбекистон миллий терма жамоаси собиқ бош мураббийи Самвел Бабаян ЎФФ Ижроия Қўмитаси Бюросининг 2018 йил 15 январдаги 3-сонли қарорига мувофиқ футболга алоқадор ҳар қандай фаолият билан шуғулланишдан умрбод четлаштирилди».

Қайси бирига ишонайлик? Дисквалификация умрбодмиди ёки иш якунига қадар? Ҳар қанақасига ҳам ЎФА қаердадир ёлғон гапиряпти. Ёки ҳозир, ёки ўтган йили. Хуллас, халқни алдагани рост, фақат қачонлигини аниқ билмадим.

Бугунги баёнотни давом эттирамиз:

«Бироқ кейинчалик ЎФА Ижроқўмига “Бунёдкор” футбол клуби номидан билдирги тақдим этилиб, Бабаяндан дисквалификацияни олиб ташлаш сўралган...
...Шу тариқа Ўзбекистон футбол ассоциацияси томонидан очилган иш 2018 йилнинг 1 февраль куни ёпилди ҳамда Самвел Бабаяннинг дисквалификацияси бекор қилинди».

Демак, ЎФА ўша пайтда «Бабаян умрбод футболдан четлатилди» дея популистик хабар чиқаргану, аммо 15 кундан кейин ўзи чиқарган қарорни бекор қилган эканда? «Умрбод четлатиш» ЎФА учун атиги 15 кун экан, қойил.

Бошқа савол: хўп, майли, катта кетилган гапни қайтиб олиб, 15 кундан кейин Бабаяндан тақиқ олиб ташланган ҳам дейлик, унда нимага бу ҳақида ҳеч қандай хабар берилмаган? Нимага халқ бу ҳақида орадан 1 йил ўтиб хабар топяпти? Буни айтишга ор қилишганмикин? Унда ҳозирчи, ор қилишмаяптими? )) Бу саволга ҳам тайинли жавоб бера олишмаса керак.

Баёнот қуйидаги аччиқ киноя билан якунланади:

«ЎФА бундан буён Самвел Бабаян Ўзбекистоннинг ҳеч қайси терма жамоасида фаолият юритишига йўл қўймайди. Қўшимчасига, кейинги фаолиятини Самвел Бабаянсиз тасаввур қила олмаган “Локомотив” футбол клубининг қарорига ҳам қаршилик кўрсатмайди».

Қизиқ, жуда қизиқ. Мана шу банд кўп нарсани айтиб турибди. Демак, тахмин қилсак, ЎФА раҳбарияти ҳалигача Бабаянни кўргани кўзи йўқ, унинг футболга қайтишидан умуман манфаатдормас. Айниқса терма жамоаларга мутлақо яқинлаштиришмоқчи эмас. Аммо қандайдир «юқори кучлар» босими остида бунга қаршилик қила олишмаганига шаъма қилаётгандек гўё. Демак, ЎФА Бабаяннинг футболга қайтишидан кўпроқ “Локомотив” клуби ва унинг атрофидаги “катта одамлар” кўпроқ манфаатдорлигига ишора қилаётгандек туюлди менга.

Унда бошқа савол: ҳозир "Локомотив"га қайтишига қаршилик қила олмаган ЎФА, эртага мабодо "тепадан" миллий терма жамоага ҳам Бабаян қўйилиши ҳақида топшириқ бўлиб қолса, унга ҳам қаршилик қила олмас эканда? Ўшанчун ҳам халқимиз бекорга айтмаган: "Нонни катта тишласанг ҳам, гапни катта гапирма" деб. Бу айни ЎФАга тегишли.

Ўзбек футболидан ҳар нарсани кутса бўлади.

Қизиқ-а, “Бунёдкор” кафил бўлиб, хат ёзади, лекин Бабаян “Локомотив”га ишга киради )))

Демак, ўша “Бунёдкор” ёзган хат ҳам аслида “заказ”га ёзилган эканда?! Президент қилаётган кечиримлилик сиёсатини рўкач қилиб ёзилган хатдан “Бунёдкор” ҳам ҳеч қандай манфаатдор бўлмагани кўриниб турибди. Ҳаммаси олдиндан режалаштирилган “ўйин” эканлигига шубҳам йўқ.

Майли, нима ҳам дердик. Оҳ, десангиз ҳам, воҳ, десангиз ҳам, Бабаян “Локомотив”да иш бошлади. Кечиримли бўлсак, бўлибмизда, биздан нима кетди.

«Кунимиз кинначиларга қолган, Шаҳноза...» ©

Каналга уланиш: 👇
https://t.me/joinchat/AAAAAEe1KDC7Hm03UPVooQ

❗️Март ойидан контрактлар нархи ошади

2018 йил 13 октябрдаги Президент Фармонига биноан, 1 ноябрдан энг кам ойлик иш ҳақи миқдорлари 10% га оширилган эди.

Хабарингиз бор, ўтган йили илк маротаба ОТМлардаги тўлов-контрактлар миқдори энг кам иш ҳақига боғлаб қўйилганди.

Бу эса шуни англатадики, иш ҳақлари ошса, контракт ҳам худди шунча фоизга ошади. Фақат қоидага биноан, ЭКИҲ миқдори оширилганда контрактлар навбатдаги семестрдан бошлаб оширилади.

Демак, ноябрда ошган иш ҳақлари март ойидан бошлаб ўқув йилининг 2-ярми учун тўланадиган контрактга таъсир қилади.

Хуллас, 2-семестрдан контракт миқдорлари қуйидагича бўлади:

(тоифаларга қайси таълим йўналишлари тўғри келишини мана бу ердан кўришингиз мумкин)


БАКАЛАВРИАТ
(кундузги, сиртқи ва кечки таълим учун)

1-тоифа: 45 баробар – 9 млн 122 минг 850 сўм
2-тоифа: 46 баробар – 9 млн 325 минг 580 сўм
3-тоифа: 50 баробар - 10 млн 136 минг 500 сўм
4-тоифа: 55 баробар - 11 млн 150 минг 150 сўм
5-тоифа: 60 баробар - 12 млн 163 минг 800 сўм

МАГИСТРАТУРА

1-тоифа: 49 баробар – 9 млн 933 минг 770 сўм
2-тоифа: 51 баробар – 10 млн 339 минг 230 сўм
3-тоифа: 55 баробар – 11 млн 150 минг 150 сўм
4-тоифа: 61 баробар – 12 млн 366 минг 530 сўм
5-тоифа: 66 баробар – 13 млн 380 минг 180 сўм

МАХСУС СИРТҚИ

1-тоифа: 15 баробар – 3 млн 40 минг 950 сўм
2-тоифа: 17 баробар – 3 млн 446 минг 410 сўм
3-тоифа: 20 баробар - 4 млн 54 минг 600 сўм
4-тоифа: 22 баробар - 4 млн 460 минг 60 сўм
5-тоифа: 27 баробар - 5 млн 473 минг 710 сўм

ИККИНЧИ МУТАХАССИСЛИК
(кундузги, сиртқи)

1-тоифа: 49 баробар – 9 млн 933 минг 770 сўм
2-тоифа: 51 баробар – 10 млн 339 минг 230 сўм
3-тоифа: 55 баробар – 11 млн 150 минг 150 сўм
4-тоифа: 61 баробар – 12 млн 366 минг 530 сўм
5-тоифа: 66 баробар – 13 млн 380 минг 180 сўм

ИККИНЧИ МУТАХАССИСЛИК
(сиртқи (2017/2018 ўқув йилида қабул қилинганлар учун)

1-тоифа: 25 баробар – 5 млн 68 минг 250 сўм
2-тоифа: 26 баробар – 5 млн 270 минг 980 сўм
3-тоифа: 28 баробар - 5 млн 676 минг 440 сўм
4-тоифа: 31 баробар - 6 млн 284 минг 630 сўм
5-тоифа: 33 баробар - 6 млн 690 минг 90 сўм


Агар кимдир контрактини олдиндан 1 йиллик тўлаб қўйган бўлса ҳам, барибир 2-семестр учун юзага келган фарқни қўшимча тўлов қилишига тўғри келади.

Xushnudbek.uz каналига уланиш: 👇
https://t.me/joinchat/AAAAAEe1KDC7Hm03UPVooQ

​​Сенатор, вазир ва ҳокимлар қанча маош олади?

Молия вазирлиги Газета.уз нашрига давлат хизматчилари ойлик маошлари тўғрисидаги маълумотларни тақдим этибди.

Унга кўра, раҳбар лавозимлар учун қуйидаги оклад бўйича иш ҳақи белгиланган:

Депутат ва сенатор – 1 млн 560 минг 413 сўм

Вилоят ҳокими – 1 млн 899 минг 783 сўм

Туман (шаҳар) ҳокими – 1 млн 643 минг 329 сўм

Бош вазир ўринбосари – 2 млн 75 минг 955 сўм

Вазир – 1 млн 727 минг 665 сўм

Қўмита раиси ёки агентлик директори – 1 млн 643 минг 329 сўм

Эслатма: бу фақат оклад бўйича иш ҳақи холос. Бу миқдорга қўшимча равишда бюджет ҳисобидан 115% гача устама берилиши мумкин. Масалан, депутатга 115% қўшимча устама берилса, унинг иш ҳақи 3 млн 354 минг 887 сўм бўлади.

Шунингдек, юқоридаги иш ҳақилари бюджетдан ташқари маблағлар ҳисобига яна ортиши мумкин.

Ҳа, айтганча, бу кўрсатилган миқдорларда солиқлар ҳисобга олинмаган. Солиқ ва бошқа мажбурий тўловлар чегириб ташланса, қўлга тегадиган иш ҳақлари миқдори янада камаяди.

Каналга уланиш: 👇
https://t.me/joinchat/AAAAAEe1KDC7Hm03UPVooQ

Каналим обуначилари сони 70 минг нафардан ошди.

Барчангизга катта раҳмат! Ишончингизни оқлашга ҳаракат қиламан.

Агар ёзганларим ҳеч бўлмаса 1 кишига бўлса ҳам фойдаси тегаётган бўлса, демак тўғри йўлдаман.