#Qashqadaryo_tajribasi

Olis hududdagi maktablarda ishlaydigan o'qituvchilarga qo'shimcha kompensatsiya pullarini to'lab bermaslikning yo'lini topishibdi

Ma'lumki, Prezidentning 2021-yil 11-yanvardagi PQ-4940-son qaroriga ko'ra olis hududlarda joylashgan budjet tashkilotlariga boshqa hududlardan ishlash uchun kelgan oliy ma’lumotli mutaxassislarga bazaviy hisoblash miqdorining 50 baravari miqdorida bir martalik boshlang‘ich yordam puli va uy-joylarni ijaraga olganlik uchun bazaviy hisoblash miqdorining 2 baravari miqdorida har oylik pul kompensatsiyasi to'lab berilishi belgilangandi.

Ammo Qashqadaryo viloyati hokimligi ayrim o'qituvchilarga ushbu to'lovlarni to'lab bermoqchi emas. Viloyat hokimligi olis hududda ishlash uchun kelgan pedagoglarni ishga joylashtirishdagi ayrim talablar bajarilmaganligini sabab qilib ko'rsatgan.

Amaldagi tartibga ko'ra olis hududdagi ta'lim muassasasida ishlash istagida bo'lgan talabgor viloyat hokimligi bilan belgilangan imtiyozlardan foydalanish bo‘yicha shartnoma imzolashi hamda hokim mas’ul o‘rinbosari tavsiyanomasini olishi kerak edi.

Ammo olis hududdagi ta'lim muassasasida ishlash istagida bo'lgan pedagoglarga buning tartibi to'liq tushuntirilmasdan ular to'g'ridan-to'g'ri maktabga ishga qabul qilib yuborilgan.

Bizningcha, olis hududlar ro'yxatiga kiritilgan ta'lim muassasalari mavjud bo'lgan viloyat hokimliklari o'qituvchilarga bu borada tushuntirish ishlarini olib borishi, bu toifadagi maktablarda ishlash istagini bildirgan talabgorlarni belgilangan tartib bo'yicha ishga qabul qilishni nazoratga olishi kerak edi.

Qashqadaryo viloyat hokimligi esa bunday qilmagan. (yoki ataylab jim turgan bo'lishi ham mumkin) Endi esa ishga qabul qilib bo'lingan ayrim pedagoglarga bir martalik boshlang‘ich yordam puli va uy-joy ijarasi uchun kompensatsiyani to'lab berishdan bosh tortmoqda.

Aslida bu masalani kanalda e'lon qilmay hal qilishga juda ko‘p urindik. Bu borada O‘zbekiston ta’lim va fan xodimlari kasaba uyushmasi hududiy bo'linmasi bizga ancha ko'maklashdi. Ammo viloyat hokimligi rasmiy xat orqali ham ushbu to'lovlarni baribir to'lab bermasligini ma'lum qilibdi.

Bu olis hududdagi maktablarda ishlaydigan o'qituvchilarga qo'shimcha kompensatsiya pullarini to'lab bermaslikning yangicha yo'li bo'lsa kerak. O'ylaymizki, Qashqadaryo viloyat hokimligi bu masalani yana bir o'ylab ko'radi. Aks holda o'qituvchilar ortlariga qaytib ketmoqchi.

👉https://t.me/xalqtaliminfo