ጉለሌ ክፍለ ከተማ ከሚገኙ ትምህርት ቤቶች መካከል በዘርፈ ብዙ ጉዳዮች ተግባራት የተሻለ ስራ በሰሩ የትምህርት ተቋማት ልምድ ልውውጥ ተካሄደ።

(ግንቦት 28/2017 ዓ.ም) የልምድ ልውውጡ በአጼ ነአኩቶ ለአብ 1ኛ ደረጃ እና በእንጦጦ አምባ 2ኛ ደረጃ ትምህርት ቤቶች የተካሄደ ሲሆን በመርሀ ግብሩ በክፍለ ከተማው የሚገኙ ትምህርት ቤቶች ዋና ርዕሳነ መምህራን እና የስርአተ ጾታ ክበብ ተጠሪዎችን ጨምሮ የክፍለ ከተማው እና የቢሮው የዘርፈ ብዙ ቡድን መሪዎችና ባለሙያዎች ተሳታፊ ሆነዋል።

የጉለሌ ክፍለ ከተማ ትምህርት ጽህፈት ቤት ኃላፊ አቶ ሚሊዮን ኮራ በክፍለ ከተማው በዘርፈ ብዙ ጉዳዮች በተለይም በስርአተ ጾታ ክበባት በሚከናወኑ ተግባራት የተሻለ አፈጻጸም ካላቸው ተቋማት መካከል የአጼ ነአኩቶ ለአብ 1ኛ ደረጃ እና እንጦጦ አምባ 2ኛ ደረጃ ትምህርት ቤቶች የሚጠቀሱ መሆናቸውን ገልጸው ተቋማቱ በስርአተ ጾታ ክበባት ማቋቋሚያ መመሪያ በተቀመጠው መሰረት ኃላፊነታቸውን በአግባቡ የተወጡበት መንገድ ለሌሎች ተሞክሮ የሚሆን በመሆኑ የልምድ ልውውጡ ተሳታፊዎች ያገኙትን ተሞክሮ መሰረት በማድረግ በተቋማቸው ውጤታማ ስራ መስራት እንደሚገባቸው አስገንዝበዋል።

ለ2018 የትምህርት ዘመን ጥራቱን የጠበቀ የደንብ ልብስ ለተማሪዎች ለማቅረብ እንዲቻል ጥራቱን ለማረጋገጥ በከተማ ደረጃ ለተቋቋመው የጥራት ኮሚቴ ኦረንቴሽን ተሰጠ፡፡

(ግንቦት 28/2017 ዓ.ም) የአዲስ አበባ ከተማ አስተደደር ትምህርት ቢሮ ለ2018 የትምህርት ዘመን የተማሪዎች የደንብ ልብስ ለማቅረብ ጨረታ ያሸነፉ ድርጅቶች ወደ ምርት ከመግባታቸዉ በፊት ጥራቱን ለማረጋገጥ በከተማ ደረጃ ለተቋቋመው የጥራት ኮሚቴ ኦረንቴሽን ሰጥቷል፡፡

የአዲስ አበባ ከተማ አስተደደር ትምህርት ቢሮ ምክትል ቢሮ ሀላፊ አቶ ሳምሶን መለስ ለ2018 የትምህርት ዘመን ጥራቱን የጠበቀ የደንብ ልብስ ለተማሪዎች ለማቅረብ እንዲቻል በከተማ ደረጃ ጨረታ ወጥቶ አሸናፊዎች መለየታቸዉን በመግለጽ ያሸነፉ ድርጅቶች ወደ ምርት ከመግባታቸዉ በፊት ጥራቱን ለማረጋገጥ በከተማ ደረጃ ለተቋቋመው የጥራት ኮሚቴ ኦረንቴሽን መሰጠቱን ገልጸዋል፡፡

አቶ ሳምሶን አክለዉም ኮሚቴው ጨረታዉን ባሸነፉ በ21 ዱም ጋርመንቶች በመሄድ ክትትልና ቁጥጥር ማድረግ እንደሚገባውና በሚፈለገው ልክ ጥራቱ የተጠበቀ የተማሪዎች የደንብ ልብስ እንዲሰፋ ትልቅ ሀላፊነትና አደራ ጭምር የተጣለበት መሆኑን ተናግረዋል፡፡


መረጃዎችን በፍጥነት ለማግኘት ማሰፈንጠሪያውን ይጫኑ!
https://linktr.ee/aacaebc

የአዲስ አበባ ከተማ አስተዳደር ትምህርት ቢሮ ስትራቴጂክ ካውንስል አባላት የ2018 የትምህርት ዘመንን መሪ እቅድ ገመገሙ።

(ግንቦት 29/2017) የአዲስ አበባ ከተማ አስተዳደር ትምህርት ቢሮ የስትራቴጂክ ካውንስል አባላት የቢሮውን የ2018 የትምህርት ዘመንን ረቂቅ መሪ እቅድ የገመገሙ ሲሆን እቅድ በቢሮ የእቅድ ዝግጅትና ክትትል ዳይሬክቶሬት ዳይሬክተር በሆኑት በአቶ ጌታሁን ለማ ቀርቧል።

የአዲስ አበባ ከተማ አስተዳደር ትምህርት ቢሮ ሀላፊ ዶ/ር ዘላለም ሙላቱ በ2017 ትምህርት ዘመን የተመዘገቡትን አበረታች ውጤቶች እንደ መልካም አጋጣሚ በመጠቀምና አጠናክሮ በማስቀጠል የታዩ ጉድለቶችን ለይቶ በማስተካከል በቀጣይ በ2018 ትምህርት ዘመን ውጤታማ ስራ ለመስራት የሚያስችሉ አራት ስትራቴጂክ ትኩረት መስኮች ላይ መሰረት በማድረግ ተቋማዊ የማስፈጸም አቅምን ፣ የሀብት አጠቃቀም እና የአገልግሎት አሰጣጥ አሰራር ማጎልበትን ፤ የአጠቃላይ ትምህርት ፍትሃዊ ተደራሽነትን ማረጋገጥን ፤ ጥራትና ተገቢነት ያለው መማር ማስተማር እና የትምህርት ውስጣዊ ብቃት ማሳደግ በሚሉት ላይ በትኩረት በመስራት የትምህርት ሴክተሩን አጠቃላይ ትምህርት ተልዕኮ፣ ራዕይና ፣ ዕሴቶችን ለማሳካት ይሰራል ብለዋል፡፡

ሀላፊው አክለዉም የጸደቀው የ2018 የትምህርት ዘመን ሪቂቅ መሪ እቅድ በቀጣይ ከትምህርት ባለድርሻ አካላት ጋር ውይይት የሚደረግበተና በሚሰጡ ግብዓቶች ተካተው የሚዳብር መሆኑን ገልጸዋል፡፡