لما يختفي شخص وتضيع وياه…✏️

شايفين من انتو متعلقين بشخص وهوه نهار كلة يمكم ومتعودين علة سوالفة وعلة وجودة الدائم علة ضحكتة علة زعلة علة كلشي بي فجأة يختفي من حياتك تلاحض اول يوم مختفي تضل تدز اله مسج هواي تكلب الدنيا عليه بس تريد مسج منه او كلام حتى يطمنك عليه متلكه تضل تدور شخص قريب عليه حته تطمن عليه وهم متلكه تضل بدوامة انت ونفسك تضل تفكر بيه متكدر تنساه لحضة وحدة دائما تكول شنو سبب اختفائه المفاجئ تتذكر سوالفك انت وياه تتذكر الضحكة وتذكر كل موقف صار بينكم وترجع تتمنى يرجع الك بس ميرجع كل يوم وانت تنتضره يرجعلك بس مراح تلكاه هذا الشخص ترك أثر بداخلك
مستحيل يتصلح مستحيل تنساه راح تضل تسئل نفسك دائما ياترى وين اختفى وراح بهاي سهولة شصار عليه وتضل تلوم بنفسك اذا فد يوم غلطت بحقه وترجع تشتاقلة هواي يترك فراغ بداخلك وتبدي تلاحض هلفراغ الجبير تأثيره جبير عليك من الناحية النفسية والعقلية وكلشي حرفيا هذا الشخص كدر ياخذ مكانه بداخلنة عضيمة ومستحيل ينسي بساع🖤.

عقليات بعض الاهل…؟ ✏️

اكو ناس يزوجون بناتهم وهنة بعدهن قاصرات يعني إذا هو يعتبر نفسه عاقل شلون يقبل بهيج شي بدل ما يهتم بنتة ويخليها تكمل دراستها وتدخل الجامعة وتصير إنسانة قوية وسند لنفسها يزوجها وهي صغيرة وما تعرف شي عن الحياة والمشكلة مو بس بزواج القاصرات اكو عوائل تفضل الولد على البنية وأكو آباء يعنفون بناتهم ووين ما تروح تسمع قصص موجعة شنو اللي ديصير بينا وين وصلنا معقولة هيج وصلنا إحنا محتاجين وعي ورحمة لأن اللي ديصير يدمر أطفال ومستقبل بيوت كاملة البنية مو عيب ولا عبء البنية إنسان إلها حق تعيش طفولتها وتتعلم وتختار حياتها مو تجبر على الزواج وهي صغيرة خلوا البنات يعيشن طفولتهن ويتعلمن ويختارن دربهن بكرامة المستقبل لبنية الوعي مو الزواج المبكر🩶.

ذاك القليل…هوه سبب بقاءنا✍️

شايفين الجاي الحار من ينصب بالإستكان دائما يبقى فد فراغ شويه ليفوك هذا شكد ماشويه مقارنه بلباقي بس هوه الي يخليك تلزم الأستكان بدون متنجوي وهوه الي يخليك تاخذه من مكان الى مكان بدون ميوكع وبدون متنجوي ايدك تقريبا حياتنا هيج مثل هذا الإستكان متروسه موت وكئابه وحزن ووضع مو زين بس اكو هايه الشويه هيه الي مخليتنه نعيش اصدقائنه احلامنه شغفنه بالاشياء الي نحبه وهواي شغلات لخ هاي الأشياء الي مخليتنة نتأقلم ومن خلالها بس نكدر نحافض على صحتنه النفسيه وعزمنه الي ديروح بلاش هذا الشويه خلي نتمسك بي ونحافض علي اكثر لان كلما قل حننجوي اكثر ومحنعرف نعيش أبداً.

مو حب هذا إذلال مغلف باسم التعلق…✍️

اجاني ولد وكلي عباس اني أحب بنية بس هيه لا تحبني ولا تريدني ومع هذا ما أكدر أتركها بصراحة استغربت شلون ما تكدر شلون تتمسك بشخص واضح من البداية إنو مو إلك اللي ما يريدك تركه مو ضعف هذا واجب على كرامتك مو منطقي تظل تركض ورا إنسان ما يشوفك ولا يحس بيك ولا حتى يفكر بيك مثل ما إنت تفكر بيه شنو معنى ما أكدر ؟ يعني إنت راضي تعيش بوهم؟ يعني متقبل تبقى آخر اهتماماته يعني عادي عندك تحب شخص يمكن ولا يوم راح يحبك ؟ هذا مو حب هذا تعلق يأذيك كل يوم أكثر الحب الحقيقي ما يخليك تتوسل ولا يخليك تبقى بمكان إنت بيه ما مرغوب إذا شخص ما يريدك لا تحاول تثبت له نفسك إتركه لأن وجودك هو اللي ديقلل من قيمتك مو غيابه🩶.

لا شيء يهدم النفس مثل المقارنة…✍️

طبعاً هذا الموضوع صار يتكرر هواي وحبيت أحجي عنه بصراحة ليش أغلب الأهل يقارنون أولادهم بغيرهم يعني شتحسون من تكولون لولدكم لو بيك حظ جان صرت مثل فلان أو للبنية لو بيج حظ جان صرتي مثل فلانة وهية أحسن منج دقيقة شنو هذا الحجي عبالكم دا تحفزون لا يمعودين إنتو مشتبهين بهيج كلام دا تدمرون أولادكم وتحطموهم بدون ما تحسون الولد أو البنية من يسمعون هيج كلام ما راح يتحفزون راح يحسون إنهم أقل وإنهم مهما يسوون ما راح يوصلون لرضاكم وبعدين خل نحجيها بصراحة ماكو واحد أحسن من واحد منو هو الأحسن و على يا مقياس أصلاً نجاح ؟ فلوس ؟ شكل ؟ لو مجرد مقارنة فارغة بدون ما تعرفون شنو ورا حياة ذاك الشخص ؟ ليش أصلاً نقارن وليش نقارن بأشخاص يمكن ما نعرف عنهم شي تره المقارنة تختصر إنسان كامل بجملة وهذا أكبر ظلم ممكن ينحط على أي شخص ومو بس هذا بعض الناس حتى لو أولادهم يسوون كلشي زين ما يحمدون ربهم ويضلون يقارنون بالنهاية نرجع ونكول ربي يهدي كل واحد يشوف المقارنة تربية وهي بالحقيقة جرح ما يروح بسهولة🩶.

الحب من طرف واحد…✍️

الحب من طرف واحد مو حب هذا تعب وسكتات الغلط مو إنو تحب الغلط إنك تبقى متعلق بشخص عايش على أمل وهمي وهو ما حاس بيك اللي يريدك صدك ما يخليك تنتظر ولا يحسسك إنك زايد بحياته
لا تضيع وقتك ومشاعرك على واحد ما اختارك اللي ما يختارك لا تتوسله يختارك اللي ما يشوفك لا تتعب حتى يلاحظك تره الحب مو حرب حتى تثبت نفسك بيها كرامتك أهم من أي إحساس وراحة بالك أغلى من أي تعلق الحب من طرف واحد مو حب هو اختبار لقيمة نفسك يا تختار تبقى تتألم يا تختار تمشي وتحافظ على كرامتك🩶.

من الخذلان بدأت رسالتي…✍️

مرات هواي ناس يسألوني :
ليش سويت هالقناة ؟ وليش تحجي بهالمواضيع ؟ وليش دا تحاول توعي الناس ؟
والجواب أني مريت بكلشي خيانة من أقرب الناس ، غدر ، قلة اهتمام ، ناس وعدتني وتركت ، أيام حسيت بيها أني وحدي ومحد فهمني من بعدها قررت شغلة إذا أني تأذيت ما أرضى أشوف غيري يوكع بنفس اللي وكعت بيه سويت هالقناة حتى أوصل كلمة حتى أوعي حتى أخلي واحد يمكن بكلمة وحدة يرجع للطريق الصح أو يبتعد عن شخص غلط أو يعرف قيمته وما يخلي أحد يستهين بيه وغير هالشي شفت هواي مواقف سويت هالقناة مو للونسة مو لأن أحب أوجع الناس لا سويتها حتى أوعي الناس حتى ما يعيشون نفس الألم اللي عشته هالقناة صارت صرخة صار هدفي أوعيكم أنبهكم أشارككم كل درس تعلمته أنا مو ملاك ولا أفضل من أحد بس تعلمت من جرحي تعلمت إنو مو كل ضحكة صادقة ومو كل قلب نظيف ومو كل كلمة حب صحيحة لهذا دا أحجي مو لأن أحب أوجع الناس بالعكس احجي لأن أريد أحد يسمعني ويكول زين سويت هذا الحجي صح وفي الختام كونوا واعين لا تنخدعون بالمظاهر ولا تنطون قلبكم بسرعة خلوا قيمتكم بعيونكم قبل عيون الناس🖤.

مو كل حب أمان…✍️

مو كل شخص يكلج أحبج يعني يحبج صدك
أكو ناس تدخل حياة البنات مو حتى تبني علاقة لا تدخل حتى يكسرها ويسيطر عليها ويبتزها شنو ذنب البنية من تثق بشخص وتحسبه أمان إلها ليش بعض الشباب من يحصل صور أو أسرار يبدي يهدد بيها ويخليها تتوسل بي علمود يمسح لصور وكأنو رجولة الي جاي يسوي الرجولة مو تخلي بنية تبجي كل ليلة ولا تخليها توصل لمرحلة تأذي نفسها أو تفكر تنتحر حتى ترتاح من خوفها اليوم اجتني رسالة عل بوت خلتني أصفن صراحة اجتني بنية تكول صديقتي حبت شخص وهوة خلاها تتعلق بي وبعدين تركها وهددها بصورها ووصل بيها الحال الى الأنتحار حتى تهرب من الضغط والخوف هالدرجة صار البعض يستمتع بتعذيب الناس وأنتو بنات ليش تثقن بسرعة ليش أي شخص يحلف ويكول أحبج تصدكوه ليش تدزون صور وأسرار لشخص ممكن بأي لحظة يتغير مو كل شخص يدخل حياتج يعني يستاهل الثقة أكو ناس تدخل حتى تتسلى تتعلقون بيهم وبعدين يختفون أو يبدون يهددون وكأنو مشاعركم لعبة بإيدهم بالنهاية الحب الحقيقي عمره ما يبني نفسه على خوف وتهديد وابتزاز ديروا بالكم على نفسكم ومشاعركم لأن النفس أغلى من أي علاقة🩶.

يكتب…✍️

مو الألم نفسه المشكلة المشكلة شعورك لما تحاول تشرح تعبك للناس و محد يفتهمك مرات الإنسان يتغير مو لأنه يريد بس لأن الظروف والأذى والتعب النفسي يغيرونه غصب عنه فيصير مو نفس الشخص القديم يبقى يحاول يبين طبيعي يضحك يسولف يعيش يومه بشكل عادي بس من داخله أكو أفكار وحروب ما يعرف بيها أحد المشكلة مو بكل الناس المشكلة بمن يخليك تشك بنفسك يخليك تحس إن مشاعرك مبالغ بيها وإن تعبك ما إله قيمة وهنا الإنسان يبدي يضيع مو لأنه ضعيف بس لأنه ما عنده مكان آمن ينفهم بيه بدون حكم أو تقليل مو كل شخص ساكت يعني مرتاح ومو كل شخص تغير وصار بارد أكو ناس تغيرت لأن گلبها تعب من المحاولات ومن الخيبات اللي تجي حتى من أقرب الناس لهذا إذا شفت شخص هادئ أكثر من اللازم أو فجأة ابتعد وصار قليل كلام لا تستعجل بالحكم عليه يمكن دا يحارب شي وحده وما يريد يثگل على أحد وأنت إذا حسيت نفسك ضايع لا تدور على قيمتك بكلام الناس لأن الإنسان الحقيقي مو اللي يرضي الكل الإنسان الحقيقي هو اللي يحاول يحافظ على نفسه رغم كل التعب🩶.

يكتب…✍️

هلو حبايب شلونكم طبعاً صارلي هواي ما ناشرلكم لأن بل شغل وما جاي افرغ هواي لمهم ليوم حاب احجي بموضوع مهم كلش للشباب واعتبره واحد من أكثر المواضيع الي ديضيع أعمار ناس هواي ، هواي نشوف شباب ضالين بالبيت لا شغل لا تعب لا شي وكل يوم نفس الروتين ونفس الأعذار حبيبي فهمني انت شتريد وين تريد توصل بعد سنة بعد خمس سنين العمر مو واكف عليك والدنيا متنتظر أحد اليوم انت شاب وعندك طاقة باجر تكبر وتندم على كل يوم ضيعته بدون فايدة مو عيب تشتغل العيب تبقى عالة وتنتظر الناس تسويلك مستقبلك روح اشتغل أي شغل شريف حتى لو بسيط حتى لو تعب بالبداية كل الناس تعبت محد بالبداية مرتاح والي تشوفه ناجح هسة جان بالبداية يتبهذل ويتعب ويصبر اشتغل جمع رأس مالك فكر بمشروع فكر بشي يخليك تعتمد على نفسك لأن إذا ضليت طول عمرك تشتغل عند الناس بدون تطور راح تبقى بنفس المكان مهما تعبت هواي ناس بدت من صفر وهسة عندهم رزق واسم ومكانة لأنهم تعبوا على روحهم واسعى لأن ربك ما ينسى تعب أحد وكل تعب إله نهاية حلوة واليوم الي تتعب بي هسة باجر راح تشكر نفسك عليه الله يرزق كل شاب تعبان ويريد يبني نفسه ويصنع مستقبله بيده🩶.

يكتب…✍️

مرات هواي ناس يسألوني ليش تسمع للناس ليش تضيع من وقتك علمودهم شنو الفائدة إذا تسمع مشاكلهم وهمومهم والجواب بسيط جداً لأني أعرف شكد صعبة الإنسان من يريد يحجي وما يلكه أحد يسمعه أعرف شكد صعب تكتم بداخلك كلام هواي وأفكار هواي ومشاعر ما كدرت تحجيها لأحد أعرف شعورك من تبقى تتمنى شخص واحد فقط يسمعك بدون ما يقاطعك بدون ما يحكم عليك بدون ما يستهزئ بكلامك أو يقلل من وجعك طول عمري جنت من الناس الكتومين من النوع اللي يضم كلشي بداخله ويكول عادي وهو مو عادي أبداً مرات الإنسان ما يحتاج حلول ولا يحتاج نصائح ولا يحتاج أحد يصلح حياته كل اللي يحتاجه أذن تسمعه وگلب يفهمه وأصعب شعور ممكن يمر بيه الإنسان مو الحزن نفسه وإنما لما يحس أن صوته ما يوصل لأحد وأن كل اللي بداخله يبقى محبوس وماكو شخص مهتم يسمعه لهذا السبب أسمع للناس مو لأن عندي كل الأجوبة ومو لأن أكدر أحل كل المشاكل لكن لأني ما أريد أحد يعيش نفس الشعور اللي عشته ما أريد أحد يبقى وحيد وهو محتاج كلمة أو يبقى ساكت وهو يتمنى أحد يسأله شبيك ؟ و اتمنى من كل گلبي محد يعيش شعور الي يريد يحجي وما يلكه أحد🩶.

يكتب…✍️

تعرفون شنو أكثر شي يكسر الإنسان ؟ أكثر شي يكسر الانسان من يحس نفسه غريب وهو بين أهله من يحس محد يريده محد يسمعه محد حاس بيه والله هاي أصعب شعور ممكن يعيشه الواحد هواي بيوت هسة مو بيوت مجرد مكان كله عياط ومشاكل و الأب يرجع معصب الأم تعبانة من الدنيا والأخ كل همه نفسه والبنية ساكتة لأن تدري إذا حجت محد يسمعها أصلاً وكل واحد يطلع حرته بأضعف شخص بالبيت ليش هيج بسهولة تكسرون خاطر أولادكم ؟ ليش تحسبون الكلمة تروح وتنسه ؟ ترى والله بعض الكلمات تبقى ببال الإنسان سنين مثل من تكله ما منك فايدة أو ليش مو مثل فلان أو أنت فاشل هاي مو سوالف عادية هاي تكسر الواحد من الداخل بدون ما تحسون شكد أكو ولد أو بنية بس يتمنون أحد يكولهم ترى أنت مهم ؟ والله مو محتاجين فلوس ولا طلعات ولا سوالف محتاجين حنان محتاجين اهتمام محتاجين أحد يحسسهم مو وحدهم بهالدنيا المشكلة مو بالدنيا المشكلة ببعض البشر اللي ما عدهم رحمة الأب المفروض أمان صار خوف والأخ المفروض سند صار حمل والبيت المفروض راحة صار سجن نفسي أقسم بالله الكلمة الحلوة تسوي معجزات يمكن بكلمة ترفع إنسان ويمكن بكلمة تهده🩶.

يكتب…✍️

شوفوا مو كل واحد يتغير لأن يريد يتغير مرات الحياة بنفسها تجبره موقف واحد ممكن يبدل هواي أشياء بداخلك وكلمة وحدة تبقى عالگلب سنين وشخص جان يعني الك الدنيا كلها يطلع من حياتك ويترك فراغ ما ينملي بسهولة أكو ناس غيرهم الإهمال وأكو ناس غيرهم الفقدان وأكو ناس تعبت من كثر ما انخذلت وسكتت لحد ما بطلت تحجي وأكو ناس مو لأنهم تغيرو بس لأنهم ما عاد عندهم طاقة يتحملون نفس الأشياء مثل قبل فمن تشوفني مو مثل قبل لا تسألني ليش تغيرت لأن التغيير مو يجي بيوم وليلة التغيير سببه أيام صعبة ومواقف توجع وأشياء انكسرت وما رجعت مثل ما جانت إنت تشوف النتيجة بس أما شكد تعبت وشكد تأذيت حتى وصلت لهالمرحلة ما تعرفه الإنسان مو حجر حتى يبقى نفسه طول العمر الناس تتغير والمشاعر تتغير وحتى طريقة الحجي والتعامل تتغير من كثر اللي نشوفه ونعبره فإذا شفتني متغير يا تتقبلني مثل ما أني هسة يا تبتعد بهدوء واحترام لأن مو كل وجع ينحجي💜.

يكتب…✍️

هلو يابة شلونكم طبعاً اليوم أريد احجي عن موضوع مهم كلش وجاي يتكرر هواي بمجتمعنه وهو موضوع إجبار البنية أو منعها من الزواج رغم هية مقتنعة بالشخص ومتقبلته لمهم طبتلي بنية وكالتلي عباس أني تقدملي شخص من كرايبنه أعرفه من سنين وشخص محترم وأخلاقه زينة ومرتاحتله ومقتنعة بي وحتى من زمان عندي قبول إله بس المشكلة أهلي رافضين كتلها زين شنو السبب ؟ كالت ماكو سبب مقنع بس همة مو موافقين هنا يجي السؤال ليش هواي أهل يقررون عن البنية بدون لا يسمعون رأيها ؟ وليش بعضهم يتعامل ويا الزواج وكأنه قرار يخصهم وحدهم تره البنية مو طفلة حتى غيرها يختار عنها وإذا وصلت عمر النضج وتفهم مصلحتها وعرفت الشخص زين ومقتنعة بي من حقها ينسمع رأيها وينأخذ بعين الاعتبار مو معقولة شخص راح يعيش عمره كله وياها وهي ما يكون إلها كلمة بالموضوع إي نعم الأهل إلهم دور مهم بالنصيحة والخبرة ويمكن يشوفون أشياء البنية ما منتبهة إلها بس الفرق جبير بين النصيحة وبين فرض الزواج مو مجرد مناسبة يومين وتنتهي الزواج حياة كاملة ومسؤولية ومستقبل ولهذا لازم يكون مبني على القناعة والرضا من الطرفين بالنهاية أسأل الله أن يهديكم للطريق الصح🩶.

يكتب…✍️

اليوم جنت طالع وصادف ودخلت بنقاش ويا كم شخص عن عدة مواضيع ومن ضمنها موضوع اللبس والحجاب واللي دا نشوفه هالأيام بالمجتمع فطرحت عليهم سؤال بسيط اللي دا نشوفه نعتبره ثقافة وتطور لو مجرد شي الناس تعودت عليه مع الوقت كالو إي هذا تطور وثقافة بس هنا جان رأيي مختلف لأن مو كل شي ينتشر يصير تطور ومو كل شي الناس تتعود عليه يصير صح الحقيقة إن هواي أمور بالبداية تنرفض بس من تظل تنعاد كدام العين يوم ورا يوم تصير مألوفة مو لأنها صحيحة بس لأن الناس تعودت عليها وخلاص وهنا تبدي المشكلة لما يصير معيار الصح والغلط هو شنو الناس متعودة عليه مو شنو الصح فعلاً القيم مرات ما تنهار بصدمة وحدة تنهار شوي شوي بدون ما نحس اليوم نكول هذا شي عادي باجر يصير مقبول وبعدها يصير اللي يعترض عليه ينحجي عنه وكأنه متخلف مو كل شي مألوف يعني صح ومو كل شي منتشر يعني تطور لأن أخطر شي مو وجود الغلط أخطر شي لما الناس تتعود عليه لدرجة تدافع عنه وتشوفه شي طبيعي💜.

يكتب…✍️

اكو نوعية من الناس لازم تعرفوهم زين
هذا الشخص الي كل ما تكونون بمكان يحاول يطلعك انت الغلطان و يقلل من قيمتك كدام غيرك أو يضحك الناس عليك حتى يبين نفسة هو الأحسن تره هذا مو شقة ولا خفة دم هذا نقص لأن الإنسان الي واثق من نفسه ما يحتاج يكسر غيره حتى يبين نفسة الأحسن سواء كان صديق قريب أو أي شخص بحياتك الي يحبك ما يحاول يهينك ما يفرح من يشوفك بموقف محرج وما يخليك تحس إنك أقل من غيرك فلا تتمسك بأشخاص كل وجودهم بحياتك يقلل منك لأن بعض الناس خسارتهم راحة مو خسارة💜.

يكتب…✍️

اليوم حبيت أحجي عن موضوع يمكن هواي من عدنا مر بي مرات نحب شخص من كل كلبنة نطيه مكانة غير عن كل الناس نعتبره شي جبير بحياتنة ونصبر عليه حتى بأغلاطه مو لأن ما نشوف الغلط لا بس لأن محبتنا إله تخلينا نتحمل ونكول يمكن يتغير يمكن يحس بس المشكلة من يصير الطرف الثاني يعرف شكد انت متعلق بي ويبدأ يستغل هالشي يبدي يتمادى يغلط أكثر ويضمن إنك ما راح تتركه لأنك تحبه بس لازم نعرف شغلة الحب مو معناه تسمح لأحد يكسر خاطرك كل مرة ولا معناه تتحمل كلشي حتى تبقى العلاقة الشخص اللي يحبك صدگ ما يستغل صبرك بالعكس يخاف يخسرك ويحافظ عليك لأن مرات أكثر شي يوجع مو إن الشخص يروح الوجع الحقيقي إنك تبقى بمكان شخص ما عرف قيمة وجودك🩶.

يكتب…✍️

انتو شايفين هذول الناس من تناقشهم من أول دقيقة داخل للنقاش وهو مقتنع إن رأيه الصح وماكو أي مجال إن يسمع وجهة نظر غيره مهما تجيبله أدلة ومهما تشرحله بهدوء بالنهاية يحاول يطلعك انت الغلطان وهو الصح وتشوفه يقاطع بالحجي وما يخليك تكمل فكرتك وإذا حس نفسه ما عنده جواب يغير الموضوع أو يلف ويدور بس حتى ما يعترف إن ممكن يكون مخطئ والأغرب من هذا كله إن هدفه مو يفهم أو يوصل لحل هدفه بس يستفزك ويضوجك ويخليك تعصب بس هنا لازم تسأل نفسك ليش أخلي شخص هيج يتحكم بمزاجي وليش أضيع وقتي وأعصابي ويا واحد مو جاي يناقش حتى يفهم أكو ناس مهما تحجي وياهم ما راح يقتنعون لأنهم من البداية مو جايين يسمعون جايين يفرضون رأيهم وبس لهذا مرات أفضل رد تسلكله وتگله اي صح مو لأنك مقتنع بكلامه وإنما لأنك مقتنع إن راحة بالك أهم من جدال ما راح يوصل لنتيجة تذكر دائماً مو كل شخص يستاهل تشرحله ومو كل نقاش لازم تطلع بيه منتصر أكو ناس أكبر انتصار وياهم إنك ما تدخل وياهم بجدال من الأساس🩶.

يكتب…✍️

هلو يابة شلونكم اليوم حاب أحجي عن موضوع أشوفه مهم كلش سواء إنت ولد أو إنتِ بنية إذا إنت تعرف من البداية إن ظروفك ما تسمحلك تكمل بعلاقة أو تعرف إن أهلك رافضين أو عندك ظروف مادية أو دراسة أو أي سبب يخليك بالنهاية تضطر تترك الشخص فالأفضل لا تدخل علاقة من الأساس ليش؟ لأن العلاقة مو مجرد سوالف حلوة أو اهتمام يومية العلاقة بيها مشاعر بيها تعلق وبيها شخص راح يربط قلبه بيك شوي شوي راح يصدك كلامك ينتظر رسائلك يفرح بوجودك ويبني أحلام يمكن إنت أصلًا تعرف إنها مستحيل تصير أسوأ شيء مو إن العلاقة انتهت أسوأ شيء إنك انت من البداية جنت تعرف ما رح تستمر ما إلها نهاية سعيدة ومع هذا كملت وخليت الطرف الثاني يتعلق بيك أكثر وأكثر يمكن إنت تشوفها فترة وتمر بس بالنسبة للطرف الثاني يمكن تكون أجمل فترة بحياته ويمكن بعد الانفصال يظل شهور أو سنين يحاول ينساك ويعالج نفسه من الوجع اللي إنت جنت تكدر تمنعه من البداية الحب مو كلمات حلوة ولا اهتمام مؤقت ولا خل نجرب ونشوف الحب مسؤولية وإذا ما تكدر تتحمل هالمسؤولية لا تدخل حياة إنسان وتعلقه بيك🩶.

يكتب…✍️

هلو يابة شلونكم اليوم أريد أسولف وياكم عن شغلة تصير ويانة هواي من تصير مشكلة بينك وبين شخص وتكعدون تحجون بالموضوع بس من تتناقش وياه تشوفه ضاج وعصب هنا إنت لأن تعز هالشخص أو تحترمه أو تقدرة تكول إي أني الغلطان أو تعتذر أو تسكت مو لأن مقتنع إن الغلط عليك لا بس حتى تهدي الوضع وهذا الشي مرات طبيعي لأن مو كل مشكلة تستاهل تكبرها بس المشكلة وين المشكلة من يصير هذا الشي بكل مرة كل مرة إنت الي تعتذر كل مرة إنت الي تتنازل كل مرة إنت الي تكسر بخاطرك حتى ترضي غيرك والطرف الثاني ولا مرة فكر يراجع نفسه أو يعترف بغلطه هنا لازم توكف وتسأل نفسك إلى متى؟ إلى متى أبقى أتنازل؟ وإلى متى أبقى أعتذر حتى لو مو غلطان؟ وإلى متى أبقى أساير شخص وهو متعود إن أني دائماً أرجعله؟ تره التنازل إذا صار من طرف واحد بعد ما يصير شي اسمه احترام يصير استغلال لأن الشخص الي يقدرك مستحيل يشوفك كل مرة تتنازل ويسكت إذا غلط يعترف بغلطه وإذا شاف نفسه مأذيك يحاول يصلح الموقف لأن أي علاقة سواء كانت صداقة ، قرابة ، زملاء ، حب ، أو غيرها لازم تكون أخذ وعطا مو واحد ينطي والثاني بس ياخذ🩶.